ᠲᠤᠭᠤᠵᠢ
ᠡᠬᠡ ︵ ᠴ ᠊ ᠭᠠᠯᠰᠠᠩ ᠤᠨ ᠪᠦᠲᠦᠭᠡᠯ ︶
ᠵᠢᠷᠦᠬᠡᠨ ᠳᠦ ᠬᠦᠷᠦᠭᠰᠡᠨ ᠥᠭᠥᠯᠡᠯᠭᠡ
4788
2018-10-02 09:06
发表于:内蒙古
ᠴ ᠊ ᠭᠠᠯᠰᠠᠩ
ᠡᠬᠡ
ᠪᠦᠵᠦᠩ ᠳᠥᠴᠢᠨ ᠶᠢᠰᠦᠨ ᠦ ᠬᠢ ᠪᠡᠨ ᠵᠢᠯ ᠳᠡᠭᠡᠷᠡ ᠶᠠᠪᠤᠴᠢᠬᠠᠯᠠ᠃ ᠥᠩᠭᠡᠷᠡᠬᠥ ᠶᠢᠨ ᠢᠶᠡᠨ ᠤᠷᠳᠤᠬᠠᠨ ᠳᠣᠵᠢᠳ ᠢ ᠳᠠᠭᠤᠳᠠᠭᠤᠯᠵᠠᠢ᠃ ᠲᠡᠷᠡ ᠨᠢ ᠣᠯᠠᠨ ᠵᠢᠯ ᠦᠨ ᠡᠮᠦᠨᠡ ᠨᠥᠬᠥᠷ ᠢ ᠨᠢ ᠰᠠᠯᠭᠠᠵᠤ ᠰᠠᠭᠤᠭᠰᠠᠨ ᠨᠢᠭᠡᠨ᠃ ᠬᠣᠶᠠᠷ ᠪᠦᠰᠡᠭᠦᠢ ᠶᠢᠨ ᠬᠣᠭᠣᠷᠣᠨᠳᠣ ᠡᠬᠢᠨ ᠳᠦ ᠪᠡᠨ ᠶᠠᠭᠤᠮᠠ ᠶᠠᠭᠤᠮᠠ ᠯᠠ ᠪᠣᠯᠤᠭᠠᠳ ᠥᠩᠭᠡᠷᠡᠵᠡᠢ᠃ ᠬᠠᠷᠢᠨ ᠰᠦᠨᠵᠢᠳ ᠡᠴᠡ ᠬᠣᠶᠢᠰᠢ ᠨᠢᠭᠡ ᠨᠢᠭᠡᠨ ᠦ ᠬᠢ ᠪᠡᠨ ᠵᠠᠮ ᠠᠴᠠ ᠵᠠᠶᠢᠯᠠᠰᠬᠢᠵᠤ ᠡᠨᠳᠡ ᠲᠡᠨᠳᠡ ᠬᠠᠶᠠ ᠲᠠᠭᠠᠷᠠᠯᠳᠤᠪᠠᠯ ᠮᠡᠨᠳᠦ ᠤᠰᠤ ᠴᠤ ᠦᠭᠡᠢ᠂ ᠬᠡᠨ ᠬᠡᠨ ᠨᠢ ᠬᠠᠷᠠᠭᠠ ᠦᠭᠡᠢ ᠴᠢᠷᠠᠶᠢᠯᠠᠳᠠᠭ ᠪᠣᠯᠵᠠᠢ᠃ ᠴᠢᠩᠭᠢᠬᠦ ᠳᠦ ᠪᠡᠨ ᠨᠢᠭᠡ ᠨᠢ ᠨᠥᠬᠥᠷ ᠦᠨ ᠮᠢᠨᠢ ᠲᠣᠯᠣᠭᠠᠢ ᠶᠢ ᠵᠠᠯᠭᠢᠭᠰᠠᠨ ᠪᠤᠵᠠᠷ ᠡᠮᠡ︕ ᠭᠡᠵᠦ ᠪᠣᠳᠣᠵᠤ ᠪᠠᠶᠢᠬᠤ ᠳᠤ ᠨᠥᠭᠥᠭᠡ ᠨᠢ ᠨᠥᠬᠥᠷ ᠢ ᠮᠢᠨᠢ ᠵᠣᠪᠠᠭᠠᠵᠤ ᠶᠠᠪᠤᠭᠰᠠᠨ ᠥᠭᠡᠳᠡ ᠦᠭᠡᠢ ᠡᠮᠡ︕ ᠭᠡᠵᠦ ᠪᠣᠳᠣᠬᠤ ᠮᠡᠲᠦ᠃ ᠲᠡᠭᠡᠲᠡᠯᠡ ᠣᠳᠣ ᠨᠢᠭᠡᠨ ᠦ ᠬᠢ ᠨᠢ ᠬᠣᠷᠸᠠ ᠳᠤ ᠠᠮᠢᠳᠤᠷᠠᠬᠤ ᠬᠣᠨᠣᠭ ᠤᠨ ᠲᠣᠭᠠ ᠭᠦᠢᠴᠡᠵᠦ᠂ ᠨᠥᠭᠥᠭᠡ ᠨᠢ᠂ ᠦᠬᠦᠬᠦ ᠬᠦᠮᠦᠨ ᠦ ᠭᠤᠶᠤᠯᠭᠠ ᠪᠣᠯᠤᠭᠰᠠᠨ ᠬᠣᠶᠢᠨᠠ ᠶᠠᠭᠠᠬᠢᠶᠠ ᠭᠡᠬᠦ ᠪᠤᠢ᠂ ᠣᠴᠢᠵᠤ ᠠᠭᠤᠯᠵᠠᠬᠤ ᠪᠣᠯᠵᠠᠢ᠃ ᠳᠣᠵᠢᠳ ᠡᠮᠨᠡᠯᠭᠡ ᠶᠢᠨ ᠬᠠᠭᠠᠯᠭᠠᠨ ᠤ ᠬᠦᠢᠲᠡᠨ ᠲᠡᠮᠦᠷ ᠪᠠᠷᠢᠭᠤᠯ ᠳᠤ ᠭᠠᠷ ᠬᠦᠷᠬᠦ ᠳᠦ ᠪᠡᠨ ᠠᠭᠵᠠᠰᠬᠢᠲᠡᠯᠡ ᠵᠢᠬᠡᠭᠦᠴᠡᠨ᠂ ᠪᠠᠰᠠ ᠯᠠ ᠡᠶᠢᠮᠦ ᠬᠠᠲᠠᠭᠤ᠂ ᠴᠡᠪᠳᠡᠭ ᠦᠭᠡ ᠳᠤᠭᠤᠯᠬᠤ ᠪᠠᠶᠢᠬᠤ ᠳ᠋ᠠ ᠭᠡᠵᠦ ᠵᠢᠷᠦᠬᠡ ᠠᠯᠠᠳᠠᠨ ᠪᠣᠳᠣᠭᠰᠠᠨ ᠨᠢ ᠣᠨᠣᠭᠰᠠᠨ ᠦᠭᠡᠢ᠂ ᠪᠦᠵᠦᠩ ᠲᠡᠭᠦᠨ ᠢ ᠬᠣᠨᠵᠢᠩ ᠬᠣᠷᠣᠰᠤᠯ ᠤᠨ ᠤᠯᠠ ᠮᠥᠷ ᠴᠤ ᠦᠭᠡᠢ ᠤᠬᠠᠭᠠᠯᠢᠭ ᠲᠠᠯᠪᠢᠭᠤᠨ ᠬᠠᠷᠠᠴᠠ᠂ ᠤᠶᠠᠩᠭᠠᠯᠢᠭ ᠵᠥᠭᠡᠯᠡᠨ ᠳᠠᠭᠤ ᠪᠠᠷ ᠤᠭᠲᠤᠵᠠᠢ᠃ ᠪᠡᠶᠡ ᠶᠢᠨ ᠬᠢ ᠨᠢ ᠪᠠᠶᠢᠳᠠᠯ ᠢ ᠯᠠᠪᠯᠠᠭᠰᠠᠨ ᠠᠰᠠᠭᠤᠯᠲᠠ ᠳᠤ ᠪᠡᠯᠭᠡ ᠶᠢ ᠬᠢᠴᠢᠶᠡᠭᠰᠡᠨ ᠴᠥᠭᠡᠨ ᠦᠭᠡ ᠪᠡᠷ ᠲᠣᠭᠣᠷᠢᠭᠤᠯᠤᠰᠬᠢᠨ ᠬᠠᠷᠢᠭᠤᠯᠤᠭᠰᠠᠨ ᠢᠶᠠᠨ ᠰᠢᠭᠤᠳ ᠯᠠ ᠶᠠᠷᠢᠵᠤ ᠭᠠᠷᠤᠭᠰᠠᠨ ᠢ ᠪᠣᠳᠣᠬᠤ ᠳᠤ ᠦᠭᠡ ᠪᠠᠨ ᠡᠷᠲᠡᠨ ᠡᠴᠡ ᠴᠡᠭᠴᠡᠯᠡᠴᠢᠬᠡᠭᠡᠳ ᠬᠠᠳᠠᠭᠠᠯᠠᠵᠤ ᠪᠠᠶᠢᠭᠰᠠᠨ ᠨᠢ ᠢᠯᠡᠳᠲᠡ 《ᠬᠣᠶᠠᠷ ᠪᠡᠶᠡ ᠬᠣᠶᠠᠷ ᠭᠡᠷ ᠢ ᠮᠠᠨᠢ ᠬᠣᠯᠠᠳᠠᠭᠤᠯᠪᠠᠴᠤ ᠪᠠᠰᠠ ᠬᠣᠯᠪᠣᠵᠤ ᠶᠠᠪᠤᠭᠰᠠᠨ ᠬᠦᠮᠦᠨ ᠢ ᠶᠠᠳᠠᠬᠤ ᠳᠤ ᠪᠠᠨ ᠦᠭᠡᠢ ᠪᠣᠯᠤᠭᠰᠠᠨ ᠤ ᠳᠠᠷᠠᠭᠠ ᠪᠢ ᠴᠢᠮᠠ ᠲᠠᠢ ᠠᠭᠤᠯᠵᠠᠵᠤ ᠴᠠᠶᠢᠷᠠᠯᠴᠠᠬᠤ ᠬᠡᠷᠡᠭᠲᠡᠢ ᠪᠠᠶᠢᠵᠠᠢ᠃ ᠳᠠᠩᠴᠤ ᠪᠣᠭᠣᠨᠢ ᠤᠬᠠᠭᠠᠨ ᠲᠠᠢ ᠲᠦᠷᠦᠭᠰᠡᠨ ᠬᠣᠶᠢᠨᠠ ᠶᠠᠭᠠᠬᠢᠶᠠ ᠭᠡᠬᠦ ᠪᠤᠢ᠃ ᠬᠠᠷᠢᠨ ᠰᠠᠶ᠋ᠢ ᠯᠠ ᠣᠶᠢᠯᠠᠭᠠᠯᠠ᠃ ᠦᠷᠡ ᠶᠢᠨ ᠮᠠᠨᠢ ᠡᠴᠢᠭᠡ᠂ ᠮᠢᠨᠦ ᠵᠢᠷᠭᠠᠭᠠᠵᠤ ᠴᠢᠳᠠᠭᠠ ᠦᠭᠡᠢ ᠲᠡᠷᠡ ᠬᠦᠮᠦᠨ ᠢ ᠵᠢᠷᠭᠠᠭᠠᠭᠰᠠᠨ ᠤ ᠴᠢᠨᠢ ᠲᠥᠯᠦᠭᠡ ᠪᠢ ᠴᠢᠨᠤ ᠥᠷᠢᠲᠡᠨ ᠶᠠᠪᠤᠵᠠᠢ᠃ ᠲᠡᠷᠡ ᠥᠷᠢ ᠪᠠᠨ ᠴᠢᠮᠠ ᠳᠤ ᠪᠢ ᠲᠥᠯᠥᠬᠥ ᠡᠴᠡ ᠣᠳᠣ ᠨᠢᠭᠡᠨᠲᠡ ᠬᠣᠵᠢᠮᠳᠠᠵᠠᠢ᠃ ᠭᠡᠬᠦ ᠳᠦ ᠪᠡᠨ ᠬᠦᠦ ᠮᠢᠨᠢ ᠯᠠ ᠮᠢᠨᠦ ᠲᠥᠯᠥᠭᠡᠨ ᠡᠴᠡ ᠲᠥᠯᠥᠬᠦ ᠶᠢ ᠴᠤ ᠬᠡᠨ ᠪᠠᠶᠢᠭ ᠭᠡᠬᠦ ᠪᠤᠢ》 ᠭᠡᠬᠦ ᠳᠦ ᠨᠢ ᠳᠣᠵᠢᠳ ᠤᠨ ᠨᠢᠭᠤᠷ ᠡᠴᠡ ᠭᠠᠯ ᠪᠤᠲᠠᠷᠠᠬᠤ ᠰᠢᠭ ᠪᠣᠯᠤᠯᠠ᠃ ᠬᠥᠯ ᠳ᠋ᠤ ᠨᠢ ᠨᠢᠭᠤᠷ ᠢᠶᠡᠨ ᠨᠠᠭᠠᠵᠤ ᠪᠠᠶᠢᠭᠠᠳ᠄ 《ᠦᠭᠡᠢ ᠳ᠋ᠡ᠂ ᠪᠦᠵᠦᠩ ᠮᠢᠨᠢ᠂ ᠦᠭᠡᠢ︕ ᠪᠢ ᠯᠠ ᠴᠢᠮᠠ ᠳᠤ ᠲᠥᠯᠦᠵᠦ ᠪᠠᠷᠠᠰᠢ ᠦᠭᠡᠢ ᠶᠡᠬᠡ ᠥᠷᠢ ᠲᠡᠢ᠃ ᠬᠠᠷᠢᠨ ᠬᠦᠦ ᠳ᠋ᠦ ᠴᠢᠨᠢ ᠯᠠ ᠲᠥᠯᠥᠬᠦ ᠶᠢ ᠬᠢᠴᠢᠶᠡᠶᠡ》 ᠭᠡᠵᠦ ᠬᠡᠯᠡᠮᠡᠷ ᠪᠠᠶᠢᠭᠰᠠᠨ ᠴᠤ ᠳᠤᠤᠭᠠᠷᠤᠶᠠ ᠭᠡᠲᠡᠯᠡ ᠬᠣᠭᠣᠯᠠᠢ ᠨᠢ ᠲᠠᠭᠯᠠᠷᠠᠵᠤ᠂ ᠬᠥᠳᠡᠯᠦᠶᠡ ᠭᠡᠲᠡᠯᠡ ᠪᠡᠶᠡ ᠨᠢ ᠬᠥᠰᠢᠵᠦ ᠣᠷᠬᠢᠭᠠᠳ ᠶᠠᠭᠠᠬᠢᠵᠤ ᠴᠤ ᠪᠣᠯᠤᠭᠰᠠᠨ ᠦᠭᠡᠢ᠃ ᠪᠦᠵᠦᠩ ᠬᠦᠦ ᠶᠢᠨ ᠢᠶᠡᠨ ᠲᠤᠬᠠᠢ ᠶᠠᠷᠢᠭᠰᠠᠨ ᠨᠢ᠂ ᠠᠰᠠᠷ ᠴᠤ ᠡᠴᠢᠭᠡ ᠶᠢ ᠪᠡᠨ ᠥᠪᠴᠢᠭᠰᠡᠨ᠂ ᠭᠠᠳᠠᠨᠠ ᠠᠴᠠ ᠪᠠᠨ ᠳᠣᠩᠭᠢᠶᠠᠳᠠᠭᠤ ᠶᠤᠮ ᠰᠢᠭ ᠬᠠᠷᠠᠭᠳᠠᠬᠤ ᠠᠲᠠᠯᠠ ᠴᠠᠭᠠᠨᠠ ᠪᠠᠨ ᠶᠠᠭᠤᠮᠠ ᠶᠠᠭᠤᠮᠠ ᠶᠢ ᠠᠶᠢᠬᠤᠪᠲᠤᠷ ᠯᠠᠪ ᠲᠤᠰᠬᠠᠵᠤ ᠠᠪᠳᠠᠭ᠂ ᠡᠮᠵᠡᠭ ᠡᠷᠬᠡ ᠳᠤᠷᠠ ᠪᠠᠷ ᠢᠶᠠᠨ ᠠᠮᠢᠲᠠᠨ ᠪᠣᠯᠤᠯᠲᠠᠢ᠃ ᠵᠤᠨ ᠴᠤ᠂ ᠡᠪᠦᠯ ᠴᠤ᠂ ᠴᠠᠢ ᠶᠢ ᠬᠠᠯᠠᠭᠤᠨ ᠢᠶᠠᠷ ᠨᠢ ᠤᠤᠭᠤᠳᠠᠭ ᠦᠭᠡᠢ᠂ ᠵᠠᠪᠠᠯ ᠵᠠᠶᠢᠯᠠᠵᠤ ᠬᠥᠷᠥᠭᠡᠭᠡᠳ ᠠᠯᠢ ᠭᠡᠳᠡᠭ᠂ ᠰᠢᠭᠦᠷᠬᠡᠶᠢᠳᠡᠭᠦᠦ ᠴᠢᠨᠠᠭᠰᠠᠨ ᠪᠤᠯᠴᠢᠩ ᠮᠢᠬᠠᠨ ᠳᠤ ᠳᠤᠷᠠᠲᠠᠢ᠂ ᠳᠡᠷᠡ ᠦᠭᠡᠢ᠂ ᠬᠠᠷᠢᠨ ᠬᠥᠯ ᠤᠨ ᠬᠢ ᠪᠠᠨ ᠤᠯᠠ ᠳᠤ ᠳᠡᠷᠡ ᠰᠢᠭ ᠶᠠᠭᠤᠮᠠ ᠬᠢᠵᠦ ᠤᠨᠲᠠᠳᠠᠭ᠂ ᠪᠠᠰᠠ ᠬᠥᠮᠥᠰᠬᠡ ᠵᠤᠮᠪᠠ ᠶᠢᠨ ᠪᠠᠭᠠ ᠥᠬᠢᠨ ᠲᠠᠢ ᠲᠣᠭᠯᠠᠵᠤ ᠥᠰᠦᠭᠰᠡᠨ᠂ ᠬᠣᠭᠣᠷᠣᠨᠳᠣ ᠪᠠᠨ ᠢᠪᠡᠭᠡᠯ ᠵᠢᠯ ᠲᠡᠢ ᠶᠤᠮᠰᠠᠨ ᠭᠡᠨᠡ᠃ ᠡᠨᠡ ᠪᠦᠬᠦᠨ ᠢ ᠶᠠᠷᠢᠬᠤ ᠳᠤ ᠬᠡᠳᠦᠬᠡᠨ ᠬᠣᠷᠤᠮ ᠯᠠ ᠣᠷᠣᠵᠠᠢ᠃ ᠳᠠᠷᠠᠭᠠ ᠨᠢ ᠡᠮᠴᠢ ᠢᠷᠡᠵᠦ ᠳᠣᠵᠢᠳ ᠢ ᠭᠠᠷᠭᠠᠪᠠ᠃ ᠡᠨᠡ ᠪᠣᠯ ᠬᠠᠪᠤᠷ ᠪᠣᠯᠤᠭᠰᠠᠨ ᠬᠡᠷᠡᠭ᠃ ᠨᠠᠮᠤᠷ ᠨᠢ ᠪᠦᠵᠦᠩ ᠦᠨ ᠬᠦᠦ ᠠᠩᠭᠢᠷ ᠴᠡᠷᠢᠭ ᠡᠴᠡ ᠬᠠᠯᠠᠭᠳᠠᠪᠠ᠃ ᠲᠡᠷᠡ ᠪᠡᠷ ᠡᠵᠢ ᠶᠢᠨ ᠢᠶᠡᠨ ᠥᠩᠭᠡᠷᠡᠭᠰᠡᠨ ᠢ ᠳᠤᠭᠤᠯᠤᠭᠰᠠᠨ᠂ ᠬᠡᠳᠦᠨ ᠮᠠᠯ᠂ ᠭᠡᠷ ᠣᠷᠣᠨ ᠤ ᠬᠢ ᠪᠠᠨ ᠤᠴᠢᠷ ᠢ ᠣᠯᠴᠢᠬᠠᠭᠠᠳ ᠪᠤᠴᠠᠨᠠ ᠭᠡᠰᠡᠨ ᠶᠠᠷᠢᠶᠠ ᠲᠠᠢ ᠢᠷᠡᠵᠡᠢ᠃ ᠬᠠᠮᠢᠭᠠ᠂ ᠬᠡᠨ ᠦ ᠳᠦ ᠪᠠᠶᠢᠬᠤ ᠪᠠᠨ ᠴᠤ ᠮᠡᠳᠡᠬᠦ ᠦᠭᠡᠢ᠂ ᠳᠣᠲᠣᠷᠠ ᠪᠠᠨ ᠭᠠᠶᠢᠬᠠᠵᠠᠨᠠᠪᠠᠴᠤ 《ᠲᠠᠨ ᠤ ᠳᠤ ᠬᠡᠳᠦ ᠬᠣᠨᠣᠶᠠ︾ ᠭᠡᠵᠦ ᠴᠤᠭ ᠠᠯᠪᠠ ᠬᠠᠭᠠᠭᠰᠠᠨ ᠨᠥᠬᠥᠳ ᠲᠡᠭᠡᠨ ᠬᠡᠯᠡᠵᠦ ᠨᠢᠭᠡ ᠯᠠ ᠵᠢᠷᠦᠬᠡᠯᠡᠬᠦ ᠦᠭᠡᠢ ᠰᠢᠨᠠᠯᠵᠤ ᠶᠠᠪᠤᠵᠠᠢ᠃ ᠬᠠᠷᠢᠨ ᠰᠤᠮᠤ ᠶᠢᠨ ᠲᠥᠪ ᠲᠦ ᠪᠠᠭᠤᠲᠠᠯᠠ ᠳᠣᠵᠢᠳ ᠭᠤᠸᠠᠢ ᠶᠢᠨ ᠬᠦᠦ᠄ 《ᠠᠩᠭᠢᠶᠠ ᠠᠬᠠ ᠡ︕》 ᠭᠡᠭᠰᠡᠭᠡᠷ ᠲᠣᠰᠤᠨ ᠭᠦᠶᠦᠭᠡᠳ ᠢᠷᠡᠪᠡ᠃ ᠴᠡᠷᠢᠭ ᠲᠦ ᠶᠠᠪᠤᠬᠤ ᠠᠴᠠ ᠡᠮᠦᠨᠡ ᠠᠬᠠ ᠳᠡᠭᠦᠥᠰᠬᠦ ᠨᠢ ᠪᠤᠤ ᠬᠡᠯᠡ᠂ ᠬᠣᠶᠠᠷ ᠪᠡᠶᠡ ᠪᠡᠷ ᠢᠶᠡᠨ ᠲᠤᠯᠤᠨ ᠠᠭᠤᠯᠵᠠᠵᠤ ᠶᠠᠪᠤᠭᠰᠠᠨ ᠨᠢ ᠦᠭᠡᠢ᠂ ᠶᠡᠷᠦ ᠨᠢ ᠨᠤᠲᠤᠭ ᠨᠤᠭᠤ ᠶᠢᠨ ᠣᠯᠠᠩᠬᠢ ᠠᠶᠢᠯ ᠤᠨ ᠬᠡᠦᠬᠡᠳ ᠦᠳ ᠦᠨ ᠯᠠ ᠠᠳᠠᠯᠢ ᠵᠢᠰᠦ ᠮᠡᠳᠡᠬᠦ ᠡᠴᠡ ᠴᠠᠰᠢ ᠦᠭᠡᠢ ᠶᠠᠪᠤᠵᠠᠢ᠃ ᠭᠡᠲᠡᠯᠡ ᠣᠳᠣ ᠲᠡᠶᠢᠨᠬᠦᠦ ᠠᠬᠠᠶᠢᠯᠠᠵᠤ ᠳᠠᠭᠤᠳᠠᠭᠰᠠᠭᠠᠷ ᠬᠦᠷᠦᠭᠡᠳ ᠢᠷᠡᠭᠰᠡᠨ ᠳ᠋ᠤ ᠲᠡᠪᠡᠳᠡᠪᠡᠴᠦ᠂ ᠶᠣᠰᠣ ᠶᠢ ᠪᠣᠳᠣᠨ ᠠᠬᠠ ᠨᠠᠰᠤ ᠲᠠᠶ ᠶᠢᠨ ᠬᠤᠪᠢ ᠳᠤ ᠲᠣᠰᠤᠨ ᠵᠣᠯᠭᠠᠵᠤ ᠵᠤᠯᠠᠢ ᠶᠢ ᠨᠢ ᠦᠨᠦᠷᠯᠡᠵᠡᠢ᠃ ᠲᠡᠭᠡᠭᠡᠳ ᠥᠪᠡᠷ ᠢ ᠨᠢ ᠠᠪᠬᠤ ᠪᠠᠷ ᠬᠥᠲᠥᠯᠥᠭᠡ ᠮᠣᠷᠢ ᠲᠠᠢ ᠢᠷᠡᠭᠰᠡᠨ ᠢ ᠳᠤᠭᠤᠯᠬᠤ ᠳᠤ ᠪᠠᠨ ᠪᠠᠶᠠᠷᠯᠠᠭᠰᠠᠨ ᠭᠡᠵᠦ ᠲᠣᠶᠢᠮᠣ ᠦᠭᠡᠢ᠃ ᠤᠶᠠᠭᠠᠨ ᠳᠡᠭᠡᠷᠡ ᠪᠠᠭᠤᠲᠠᠯᠠ ᠳᠣᠵᠢᠳ ᠭᠤᠸᠠᠢ ᠭᠡᠷ ᠡᠴᠡ ᠭᠠᠷᠴᠤ ᠰᠠᠨᠳᠤ ᠮᠡᠨᠳᠦ ᠭᠦᠶᠦᠭᠰᠡᠭᠡᠷ ᠢᠷᠡᠵᠦ ᠬᠣᠶᠠᠷ ᠬᠠᠴᠠᠷ ᠢ ᠨᠢ ᠦᠨᠦᠰᠦᠨ ᠤᠭᠲᠤᠪᠠ᠃ ᠲᠡᠭᠡᠭᠡᠳ ᠭᠡᠷ ᠲᠦ ᠣᠷᠣᠵᠤ ᠠᠶᠠᠨ ᠵᠠᠮ ᠤᠨ ᠢᠶᠠᠨ ᠲᠣᠭᠣᠰᠣ᠂ ᠬᠥᠯᠥᠰᠥ ᠶᠢ ᠳᠥᠩᠭᠡᠵᠢ ᠨᠢᠮᠭᠡᠯᠡᠲᠡᠯᠡ ᠲᠡᠷᠡ ᠪᠡᠷ ᠲᠣᠭᠣᠭᠠᠨ ᠳᠤ ᠣᠷᠭᠢᠵᠤ ᠪᠠᠶᠢᠭᠰᠠᠨ ᠴᠠᠶ ᠠᠴᠠ ᠪᠠᠨ ᠰᠢᠨᠠᠭᠠ ᠶᠢ ᠲᠠᠰᠤᠯᠵᠤ ᠰᠠᠭᠠᠯᠢ ᠶᠢᠨ ᠬᠤᠪᠢᠩ ᠳᠤ ᠬᠡᠳᠦ ᠵᠠᠶᠢᠯᠠᠭᠰᠠᠨ ᠢᠶᠠᠨ᠄ 《ᠠᠮᠠ ᠨᠢ ᠴᠠᠩᠭᠠᠭᠠ ᠪᠢᠵᠡ᠂ ᠪᠢᠴᠢᠬᠠᠨ ᠵᠥᠭᠡᠭᠡᠲᠦᠭᠦᠯᠴᠢᠬᠡᠯᠡ》 ᠭᠡᠭᠰᠡᠭᠡᠷ ᠠᠶᠠᠭᠠᠯᠠᠨ ᠪᠠᠷᠢᠪᠠ᠃ ᠳᠠᠷᠠᠭᠠ ᠨᠢ ᠳᠡᠷᠭᠡᠳᠡᠬᠢ ᠭᠣᠣᠯ ᠳᠡᠭᠡᠷᠡ ᠣᠴᠢᠵᠤ ᠤᠰᠤᠨ ᠳᠤ ᠣᠷᠣᠴᠢᠬᠠᠭᠠᠳ ᠢᠷᠡᠪᠡᠯ ᠴᠤ ᠬᠣᠭᠣᠯᠠ ᠴᠤ ᠪᠡᠯᠡᠨ ᠪᠣᠯᠵᠠᠢ᠃ ᠲᠡᠷᠡ ᠨᠢ ᠱᠠᠭᠠᠨᠲᠤ᠂ ᠪᠣᠭᠲᠣᠭᠣᠰᠣ ᠣᠷᠣᠯᠴᠠᠭᠰᠠᠨ ᠬᠡᠳᠦᠨ ᠪᠦᠬᠦᠯᠢ ᠮᠢᠬᠠ᠂ ᠣᠭᠲᠣᠯᠤᠭᠠᠳ ᠣᠷᠬᠢᠪᠠᠯ ᠪᠣᠷᠣ ᠰᠢᠭᠦᠰᠦ ᠤᠷᠤᠰᠴᠤ ᠪᠠᠶᠢᠨᠠ᠃ ᠡᠭᠦᠨ ᠢ ᠬᠠᠷᠠᠭᠰᠠᠨ ᠳᠡᠭᠦᠦ ᠨᠢ 《ᠣᠯᠢᠭᠲᠠᠶᠢᠬᠠᠨ ᠪᠣᠯᠭᠠᠴᠢᠬᠠᠬᠤ ᠦᠭᠡᠢ ᠳ᠋ᠡ︕》 ᠭᠡᠳ ᠡᠵᠢ ᠤᠷᠤᠭᠤ ᠪᠡᠨ ᠬᠢᠯᠠᠮᠬᠢᠭᠰᠡᠨ ᠳᠦ ᠴᠠᠭᠠᠳᠤᠬᠢ ᠨᠢ 《ᠰᠢᠳᠦ ᠲᠡᠢ ᠲᠠᠨᠤᠰ ᠲᠤ ᠰᠢᠭᠦᠰᠦ ᠲᠡᠢ ᠨᠢ ᠳᠡᠭᠡᠷᠡ ᠪᠢᠵᠡ》 ᠭᠡᠰᠬᠢᠵᠦ ᠥᠩᠭᠡᠷᠡᠪᠡ᠃ ᠣᠷᠣᠢ ᠤᠨᠲᠠᠬᠤ ᠴᠠᠭ ᠪᠣᠯᠬᠤ ᠳᠤ ᠳᠣᠵᠢᠳ:《ᠡᠨᠡ ᠫᠦᠷᠱ ᠲᠡᠢ ᠣᠷᠣᠨ ᠳᠤ ᠳᠡᠷᠡ ᠲᠡᠢ ᠬᠡᠪᠲᠡᠪᠡᠯ ᠬᠡᠦᠬᠡᠳ ᠦᠨ ᠰᠡᠭᠡᠷ ᠨᠢᠷᠤᠭᠤ ᠴᠢᠯᠡᠴᠢᠬᠡᠬᠦ ᠪᠤᠢ᠃ ᠬᠠᠷᠢᠨ ᠨᠣᠶᠢᠷ ᠲᠤ ᠪᠠᠨ ᠲᠡᠮᠦᠷ ᠢᠰᠬᠦᠯᠡᠴᠢᠬᠡᠵᠦ ᠮᠡᠳᠡᠰᠢ ᠦᠭᠡᠢ᠂ ᠤᠯᠨ ᠳᠤ ᠨᠢ ᠵᠢᠭᠢᠷᠢᠭ ᠢᠪᠢᠴᠢᠬᠡᠶᠡ》 ᠭᠡᠭᠰᠡᠭᠡᠷ ᠣᠷᠣ ᠶᠢ ᠨᠢ ᠵᠠᠰᠠᠵᠤ ᠥᠭᠪᠡ᠃ ᠬᠡᠪᠲᠡᠭᠰᠡᠨ ᠬᠣᠶᠢᠨᠠ ᠪᠠᠨ ᠪᠣᠳᠣᠭᠠᠳ ᠦᠵᠡᠪᠡᠯ ᠡᠨᠡ ᠡᠳᠦᠷ ᠦᠨ ᠶᠠᠪᠤᠳᠠᠯ ᠠᠩᠭᠢᠷ ᠲᠤ ᠵᠡᠭᠦᠳᠦ ᠶᠤᠮ ᠰᠢᠭ ᠰᠠᠨᠠᠭᠳᠠᠵᠠᠢ᠃ ᠨᠤᠲᠤᠭ ᠤᠰᠤ ᠨᠢ ᠮᠥᠨ ᠠᠲᠠᠯᠠ ᠭᠡᠷ ᠨᠢ ᠪᠢᠰᠢ᠂ ᠭᠡᠲᠡᠯᠡ ᠭᠡᠷ ᠨᠢ ᠪᠢᠰᠢ ᠠᠲᠠᠯᠠ ᠣᠷᠣ ᠨᠢ ᠮᠥᠨ ᠶᠤᠮ ᠰᠢᠭ ᠪᠠᠰᠠ ᠡᠵᠢ ᠨᠢ ᠦᠭᠡᠢ ᠶᠤᠮ ᠰᠢᠭ ᠠᠲᠠᠯᠠ᠂ ᠥᠪᠡᠷ ᠦᠨ ᠬᠢ ᠨᠢ ᠲᠥᠯᠥᠭᠡ ᠬᠡᠯᠡᠵᠦ᠂ ᠬᠢᠳᠡᠭ ᠦᠭᠡ᠂ ᠦᠢᠯᠡᠰ ᠨᠢ ᠦᠯᠡᠳᠡᠴᠢᠬᠡᠭᠡ ᠤᠤ ᠭᠡᠮᠡᠷ ᠳᠣᠵᠢᠳ ᠭᠤᠸᠠᠢ ᠶᠢ ᠡᠶᠢᠮᠦ ᠬᠦᠮᠦᠨ ᠭᠡᠵᠦ ᠶᠡᠷᠦ ᠰᠠᠨᠠᠭᠰᠠᠨ ᠦᠭᠡᠢ᠃ ᠡᠵᠢ ᠴᠤ᠂ ᠪᠠᠰᠠ ᠡᠨᠡ ᠡᠭᠡᠴᠢ ᠴᠤ ᠬᠡᠨ ᠬᠡᠨ ᠢᠶᠡᠨ ᠴᠤᠬᠤᠮ ᠲᠡᠶᠢᠮᠦ ᠬᠦᠮᠦᠨ ᠭᠡᠵᠦ ᠮᠡᠳᠡᠬᠦ ᠦᠭᠡᠢ ᠪᠠᠶᠢᠭᠰᠠᠨ ᠪᠠᠶᠢᠬᠤ᠂ ᠡᠰᠡ ᠲᠡᠭᠡᠪᠡᠯ ᠬᠣᠶᠠᠭᠤᠯᠠ ᠬᠣᠭᠣᠷᠣᠨᠳᠣ ᠪᠠᠨ ᠰᠠᠶᠢᠨ ᠪᠠᠶᠢᠬᠤ ᠪᠠᠶᠢᠭᠰᠠᠨ ᠪᠤᠢ᠃ ᠠᠪᠤ ᠯᠠ ᠬᠠᠷᠢᠨ ᠬᠣᠶᠠᠭᠤᠯᠠ ᠶᠢ ᠨᠢ ᠲᠠᠨᠢᠵᠤ ᠮᠡᠳᠡᠭᠡᠳ ᠲᠡᠷᠡ ᠬᠣᠶᠠᠷ ᠤᠨ᠂ ᠬᠣᠶᠠᠷ ᠭᠡᠷ ᠦᠨ ᠢᠶᠡᠨ᠂ ᠳᠡᠭᠦᠦ ᠪᠢᠳᠡ ᠬᠣᠶᠠᠷ ᠤᠨ ᠬᠣᠭᠣᠷᠣᠨᠳᠣ ᠶᠠᠪᠤᠭᠠᠳ ᠪᠠᠶᠢᠭᠰᠠᠨ ᠶᠤᠮ ᠪᠣᠯᠪᠠ ᠤᠤ᠃ ᠥᠷᠯᠥᠭᠡ ᠪᠣᠰᠤᠭᠠᠳ ᠢᠷᠡᠪᠡᠯ ᠴᠣ ᠰᠢᠨᠡ ᠮᠠᠯᠠᠭᠠᠢ᠂ ᠳᠡᠪᠡᠯ᠂ ᠪᠥᠰᠡ᠂ ᠭᠤᠲᠤᠯ ᠣᠷᠣᠨ ᠤ ᠬᠢ ᠨᠢ ᠡᠮᠦᠨᠡ ᠪᠠᠶᠢᠵᠤ ᠪᠠᠶᠢᠨᠠ᠃ ᠳᠣᠵᠢᠳ ᠤᠨ ᠬᠡᠯᠡᠬᠦ ᠶᠢ ᠰᠣᠨᠣᠰᠪᠠᠯ ᠡᠵᠡᠭᠦᠢ ᠳᠦ ᠨᠢ ᠬᠢᠵᠦ ᠲᠠᠯᠪᠢᠭᠠᠳ ᠰᠡᠭᠦᠯᠴᠢ ᠶᠢᠨ ᠬᠡᠳᠦᠨ ᠤᠲᠠᠰᠤ ᠰᠢᠳᠡᠭᠡᠰᠦ ᠶᠢ ᠰᠠᠶ᠋ᠢ ᠯᠠ ᠭᠦᠢᠴᠡᠭᠡᠵᠡᠢ᠃
《ᠦᠳᠡ ᠡᠴᠡ ᠬᠣᠶᠢᠰᠢ ᠮᠣᠷᠢ ᠡᠮᠡᠭᠡᠯᠯᠡᠭᠦᠯᠵᠦ ᠠᠪᠤᠭᠠᠳ ᠨᠤᠲᠤᠭ ᠤᠨ ᠢᠶᠠᠨ ᠠᠶᠢᠯ ᠤᠳ ᠢᠶᠠᠷ ᠣᠷᠣᠨᠠ ᠤᠤ ᠳ᠋ᠠ᠂ ᠬᠦᠦ ᠮᠢᠨᠢ᠃
ᠡᠨᠡᠦᠬᠡᠨ ᠳᠣᠣᠷᠠ ᠬᠠᠶᠢᠯᠠᠩᠲᠤ ᠶᠢᠨ ᠴᠢᠳᠬᠤᠯᠠᠩ ᠳᠤ ᠬᠥᠮᠥᠰᠬᠡ ᠵᠤᠮᠪᠠ ᠭᠤᠸᠠᠢ ᠶᠢᠨ ᠬᠢ ᠪᠤᠢ᠃ ᠡᠵᠢ ᠶᠢ ᠴᠢᠨᠢ ᠡᠷᠭᠢᠵᠦ ᠲᠣᠭᠣᠷᠢᠵᠤ ᠯᠠ ᠪᠠᠶᠢᠭᠰᠠᠨ᠂ ᠳᠠᠷᠠᠭᠠ ᠨᠢ ᠠᠵᠢᠯ ᠶᠠᠪᠤᠳᠠᠯ ᠳᠤ ᠨᠢ ᠴᠤ ᠶᠠᠪᠤᠯᠴᠠᠭᠰᠠᠨ ᠬᠦᠮᠦᠰ ᠦᠨ ᠨᠢᠭᠡ ᠳ᠋ᠡ᠃ ᠭᠠᠭᠴᠠᠭᠠᠷᠳᠠᠪᠠᠯ ᠳᠡᠭᠦᠦ ᠪᠡᠨ ᠳᠠᠭᠠᠭᠤᠯᠵᠤ ᠶᠠᠪᠤᠨᠠ ᠪᠢᠵᠡ》ᠭᠡᠨᠡ᠃
᠁ ᠲᠡᠷᠡ ᠨᠠᠮᠤᠷ ᠠᠴᠠ ᠬᠣᠶᠢᠰᠢ ᠬᠡᠳᠦᠨ ᠵᠢᠯ ᠥᠩᠭᠡᠷᠡᠵᠡᠢ᠃ ᠥᠴᠦᠭᠡᠳᠦᠷᠬᠡᠨ ᠵᠡᠭᠦᠷᠮᠡᠭ ᠳᠠᠩ ᠬᠥᠬᠡ ᠨᠣᠭᠣᠭᠠᠨ ᠤ ᠤᠨᠢᠶᠠᠷ ᠲᠤ ᠠᠨᠢᠷᠭᠦᠶᠢᠬᠡᠨ ᠤᠮᠪᠠᠵᠤ ᠪᠠᠶᠢᠭᠰᠠᠨ ᠬᠡᠭᠡᠯᠡᠩᠳᠦ᠂ ᠬᠠᠶᠢᠯᠠᠩᠳᠤ᠂ ᠬᠦᠢᠯᠡᠨᠳᠦ ᠭᠤᠷᠪᠠᠨ ᠭᠣᠣᠯ ᠤᠨ ᠪᠡᠯᠴᠢᠷ ᠥᠨᠥᠳᠥᠷ ᠦᠬᠡᠷ ᠮᠠᠯ ᠦᠵᠡᠭᠳᠡᠵᠦ᠂ ᠨᠢᠭᠡᠨ ᠭᠡᠷ ᠪᠠᠭᠤᠪᠠ᠃ ᠠᠩᠭᠢᠷ ᠡᠵᠢ ᠶᠢᠨ ᠬᠢ ᠶᠢ ᠪᠡᠨ ᠨᠡᠭᠦᠯᠭᠡᠨ ᠢᠷᠡᠵᠦ ᠵᠥᠭᠡᠭᠡᠪᠦᠷᠢ ᠲᠠᠯᠪᠢᠵᠤ ᠪᠠᠶᠢᠭᠠ ᠨᠢ ᠲᠡᠷᠡ ᠠᠵᠢ᠃
ᠲᠦᠮᠡᠲᠦ ᠰᠢᠨᠡ ᠬᠥᠷᠪᠡᠭᠦᠯᠪᠡ
3 0