ᠰᠢᠭᠦᠮᠵᠢ
ᠲ ∙ ᠮᠠᠨᠳᠢᠷᠠ ᠶᠢᠨ ︽ ᠬᠣᠷᠢᠨ ᠨᠢᠭᠡᠨ ᠬᠥᠷᠦᠭ ︾ ︵ ᠵᠢᠷᠤᠭᠯᠠᠯ ᠥᠭᠦᠯᠡᠯᠭᠡ ︶
ᠲ ∙ ᠮᠠᠨᠳᠢᠷᠠ ᠶᠢᠨ ︽ ᠬᠣᠷᠢᠨ ᠨᠢᠭᠡᠨ ᠬᠥᠷᠦᠭ ︾
︵ ᠵᠢᠷᠤᠭᠯᠠᠯ ᠥᠭᠦᠯᠡᠯᠭᠡ ︶
5007
2018-10-23 10:30
发表于:内蒙古
ᠲ ∙ ᠮᠠᠨᠳᠢᠷᠠ ᠶᠢᠨ ︽ ᠬᠣᠷᠢᠨ ᠨᠢᠭᠡᠨ ᠬᠥᠷᠦᠭ ︾
︵ ᠵᠢᠷᠤᠭᠯᠠᠯ ᠥᠭᠦᠯᠡᠯᠭᠡ ︶
ᠲᠡᠦᠬᠡᠴᠢ ᠲ ∙ ᠮᠠᠨᠳᠢᠷᠠ ᠭᠤᠸᠠᠢ ᠶᠢᠨ 《ᠬᠣᠷᠢᠨ ᠨᠢᠭᠡᠨ ᠬᠥᠷᠦᠭ》 ᠵᠢᠷᠤᠭᠯᠠᠯ ᠦᠭᠦᠯᠡᠯᠭᠡ ᠪᠣᠯ ᠠᠩᠬᠠᠳᠠᠭᠴᠢ ᠴᠣ ᠰᠢᠨᠡ ᠰᠣᠳᠣᠨ ᠰᠠᠨᠠᠭᠠ ᠭᠡᠳᠡᠭ ᠢᠶᠡᠷ ᠢᠶᠡᠨ ᠭᠠᠶᠢᠬᠠᠯᠲᠠᠢ ᠲᠡᠳᠦᠢ ᠦᠭᠡᠢ ᠲᠡᠦᠬᠡᠨ ᠪᠢᠴᠢᠯᠭᠡ ᠳᠦ ᠨᠢᠭᠡᠨ ᠴᠣ ᠰᠢᠨᠡ ᠵᠠᠮ ᠮᠥᠷ ᠢ ᠨᠡᠭᠡᠭᠡᠭᠰᠡᠨ ᠢᠶᠡᠷ ᠢᠶᠡᠨ ᠰᠢᠨᠡ ᠦᠵᠡᠭᠳᠡᠯ ᠪᠣᠯᠤᠭᠰᠠᠨ ᠶᠤᠮ᠃ ᠮᠣᠩᠭᠣᠯ ᠤᠨ ᠲᠡᠦᠬᠡᠨ ᠳᠦ ᠲᠣᠪᠣᠶᠢᠨ ᠲᠣᠳᠣᠷᠠᠭᠰᠠᠨ ᠬᠣᠷᠢᠨ ᠨᠢᠭᠡᠨ ᠲᠡᠦᠬᠡᠲᠦ ᠬᠦᠮᠦᠨ ᠦ ᠲᠤᠬᠠᠢ ᠥᠭᠥᠯᠡᠬᠦ ᠳᠦ ᠪᠡᠨ ᠲᠡᠦᠬᠡᠨ ᠡᠬᠢ ᠰᠤᠷᠪᠤᠯᠵᠢ ᠳᠤ ᠳᠤᠷᠠᠳᠤᠭᠳᠠᠭᠰᠠᠨ ᠮᠡᠳᠡᠭᠡ ᠵᠠᠩᠭᠢ᠂ ᠨᠣᠮ ᠵᠣᠬᠢᠶᠠᠯ ᠳᠤ ᠪᠢᠴᠢᠭᠳᠡᠭᠰᠡᠨ ᠤᠩᠰᠢᠭᠴᠢ ᠶᠢᠨ ᠣᠯᠠᠨ ᠤ ᠮᠡᠳᠡᠬᠦ ᠵᠦᠢᠯᠡᠰ ᠢ ᠪᠤᠰᠤ ᠣᠭᠲᠣ ᠲᠥᠰᠥᠭᠡᠯᠡᠯ ᠳᠦ ᠪᠠᠭᠤᠬᠤ ᠦᠭᠡᠢ ᠲᠡᠶᠢᠮᠦ ᠰᠢᠨᠡ ᠲᠥᠷᠬᠥ ᠶᠢ ᠤᠷᠠᠯᠠᠨ ᠪᠦᠲᠦᠭᠡᠭᠰᠡᠨ ᠢᠶᠡᠷ ᠢᠶᠡᠨ ᠣᠨᠴᠠᠯᠢᠭ ᠶᠤᠮ᠃ ᠵᠣᠬᠢᠶᠠᠭᠴᠢ ᠮᠠᠨᠢ ᠬᠣᠷᠢᠨ ᠨᠢᠭᠡᠨ ᠲᠡᠦᠬᠡᠲᠦ ᠬᠦᠮᠦᠨ ᠦ ᠬᠥᠷᠥᠭ ᠳᠦᠷᠢ ᠶᠢ ᠴᠣ ᠰᠢᠨᠡ ᠪᠡᠷ ᠪᠦᠲᠦᠭᠡᠵᠦ᠂ ᠮᠣᠩᠭᠣᠯ ᠬᠦᠮᠦᠨ ᠤ ᠬᠤᠪᠴᠠᠰᠤ ᠬᠡᠷᠡᠭᠯᠡᠯ᠂ ᠴᠢᠷᠠᠢ ᠲᠥᠷᠬᠥ᠂ ᠪᠡᠶᠡ ᠭᠠᠯᠪᠢᠷ ᠢ ᠣᠯᠠᠨ ᠡᠬᠢ ᠰᠤᠷᠪᠤᠯᠵᠢ ᠲᠠᠢ ᠬᠠᠷᠭᠤᠭᠤᠯᠤᠨ ᠦᠵᠡᠭᠰᠡᠨ ᠦ ᠦᠨᠳᠦᠰᠦᠨ ᠳᠡᠭᠡᠷᠡ ᠮᠣᠩᠭᠣᠯ ᠲᠡᠭ ᠮᠠᠶ᠋ᠢᠭ ᠢᠶᠠᠷ ᠪᠦᠲᠦᠭᠡᠭᠰᠡᠨ ᠨᠢᠳᠦᠨ ᠳ᠋ᠤ ᠳᠣᠲᠣᠨᠣ ᠲᠤᠰᠣᠨᠠ᠃
ᠠᠲᠤᠷᠢᠶᠠᠲᠤ ᠲᠡᠩᠭᠢᠰ ᠦᠨ ᠡᠮᠦᠨᠡ ᠪᠣᠳᠣᠯᠭᠠᠰᠢᠷᠠᠨ ᠰᠠᠭᠤᠭᠠ ᠴᠤᠤᠲᠤ ᠰᠦᠪᠡᠭᠡᠳᠡᠢ ᠪᠠᠭᠠᠲᠤᠷ ᠤᠨ ᠡᠪᠦᠭᠡᠵᠢᠶᠡᠷ ᠳᠦᠷᠢ ᠲᠥᠷᠬᠥ ᠡᠴᠡ ᠬᠠᠭᠤᠷᠠᠢ ᠭᠠᠵᠠᠷ ᠤᠨ ᠳᠠᠶᠢᠳᠠ ᠶᠢ ᠮᠣᠷᠢᠨ ᠲᠤᠭᠤᠷᠠᠢ ᠪᠠᠷ ᠬᠡᠮᠵᠢᠵᠦ ᠳᠠᠭᠤᠰᠤᠭᠰᠠᠨ ᠮᠣᠩᠭᠣᠯ ᠪᠠᠭᠠᠲᠤᠷ ᠤᠳ ᠤᠨ ᠮᠠᠩᠯᠠᠢ ᠡᠪᠦᠭᠡᠨ ᠨᠣᠶᠠᠨ ᠤ ᠦᠷᠴᠢᠯᠡᠭᠡᠲᠦ ᠳᠤᠬᠤ᠂ ᠰᠣᠶᠣᠭᠠ ᠰᠠᠬᠠᠯ᠂ ᠠᠮᠤᠷᠯᠠᠩᠭᠤᠢ ᠲᠥᠷᠬᠥ᠂ 《ᠪᠢᠳᠡ ᠴᠢᠳᠠᠯᠠ》 ᠭᠡᠰᠡᠨ ᠣᠮᠤᠭ ᠪᠠᠷᠳᠠᠮ ᠰᠡᠳᠬᠢᠯ ᠬᠠᠩᠭᠠᠯᠤᠭᠤᠨ ᠪᠠᠶᠢᠳᠠᠯ ᠢ ᠣᠯᠵᠤ ᠬᠠᠷᠠᠨᠠ᠃ ᠡᠨᠡ ᠮᠡᠲᠦ ᠪᠡᠷ ᠲᠡᠦᠬᠡᠨ ᠪᠠᠭᠠᠲᠤᠷ ᠤᠳ ᠤᠨ ᠬᠥᠷᠥᠭ ᠲᠤᠰ ᠪᠦᠷᠢ ᠲᠠᠨ ᠳᠤ ᠰᠡᠳᠬᠢᠯ ᠢᠶᠡᠨ ᠬᠦᠦᠷᠨᠢᠬᠦ ᠮᠡᠲᠦ ᠰᠡᠳᠬᠢᠭᠳᠡᠯ ᠲᠥᠷᠦᠭᠦᠯᠦᠨᠡ᠃ ᠬᠣᠷᠢᠨ ᠨᠢᠭᠡᠨ ᠬᠥᠷᠦᠭ ᠵᠢᠷᠤᠭᠯᠠᠯ ᠦᠭᠦᠯᠡᠯᠭᠡ ᠳᠦ ᠪᠡᠨ 《ᠲᠡᠦᠬᠡ ᠶᠢᠨ ᠲᠣᠪᠴᠢᠶᠠ》 ᠭᠡᠰᠡᠨ ᠯᠠᠪᠯᠠᠮᠵᠢ ᠣᠷᠣᠭᠤᠯᠤᠭᠰᠠᠨ ᠨᠢ ᠲᠤᠬᠠᠢ ᠶᠢᠨ ᠪᠠᠭᠠᠲᠤᠷ ᠤᠨ ᠲᠠᠯᠠ ᠪᠠᠷ ᠦᠨᠳᠦᠰᠦᠯᠡᠯ ᠪᠠᠷᠢᠮᠲᠠ ᠲᠠᠢ ᠲᠡᠦᠬᠡᠨ ᠮᠡᠳᠡᠭᠡᠯᠡᠯ ᠢ ᠤᠩᠰᠢᠭᠴᠢᠳ ᠲᠤ ᠥᠭᠴᠦ ᠦᠭᠦᠯᠡᠯᠭᠡ ᠪᠡᠨ ᠬᠣᠯᠪᠣᠨ ᠣᠶᠢᠯᠠᠭᠠᠵᠤ᠂ ᠤᠳᠬᠠ ᠰᠠᠨᠠᠭᠠ ᠶᠢ ᠨᠢ ᠲᠣᠳᠣᠷᠬᠠᠢ ᠪᠣᠯᠭᠠᠬᠤ ᠭᠡᠰᠡᠨ ᠥᠪᠡᠷᠮᠢᠴᠡ ᠰᠢᠢᠳᠦᠯ ᠶᠤᠮ᠃ ᠲᠡᠦᠬᠡᠲᠦ ᠬᠦᠮᠦᠨ ᠦ ᠠᠵᠤ ᠠᠮᠢᠳᠤᠷᠠᠯ ᠤᠨ ᠨᠢᠭᠡ ᠯᠠ ᠵᠤᠷᠪᠤᠰ ᠦᠶᠡ ᠶᠢ ᠵᠣᠬᠢᠶᠠᠮᠵᠢᠯᠠᠨ ᠠᠪᠬᠤ ᠳᠤ ᠪᠠᠨ ᠲᠤᠬᠠᠢ ᠶᠢᠨ ᠲᠡᠷᠡ ᠬᠡᠰᠡᠭ ᠡᠴᠡ ᠲᠡᠦᠬᠡᠨ ᠪᠠᠭᠠᠲᠤᠷ ᠤᠨ ᠠᠭᠠᠰᠢ ᠠᠷᠠᠨᠰᠢᠨ᠂ ᠪᠣᠳᠣᠯ ᠰᠠᠨᠠᠭᠠ᠂ ᠵᠠᠩ ᠲᠥᠷᠬᠦ ᠶᠢ ᠮᠡᠳᠡᠵᠦ ᠠᠪᠴᠤ ᠪᠣᠯᠬᠣᠷ ᠪᠠᠶᠢᠭᠠ ᠨᠢ 《ᠦᠬᠡᠷ ᠦᠨ ᠮᠢᠬᠠ ᠦᠩᠬᠦᠯᠴᠡᠭ ᠲᠦ ᠪᠡᠨ ᠪᠠᠭᠳᠠᠨᠠ》 ᠭᠡᠳᠡᠭ ᠰᠢᠭ ᠤᠷᠠᠯᠠᠬᠤᠢ ᠶᠢᠨ ᠭᠠᠶᠢᠬᠠᠮᠰᠢᠭ ᠶᠤᠮ᠃
ᠠᠯᠳᠠᠷᠲᠤ 《ᠨᠢᠭᠤᠴᠠ ᠲᠣᠪᠴᠢᠶᠠ》 ᠍ ᠪᠠᠨ ᠯᠠ ᠪᠦᠳᠡᠭᠢ ᠪᠠᠳᠠᠭᠢ ᠮᠡᠳᠡᠵᠦ ᠪᠠᠶᠢᠭᠰᠠᠨ ᠬᠠᠭᠠᠰ ᠵᠢᠷᠠᠨ ᠤ ᠡᠮᠦᠨᠡᠬᠢ ᠲᠡᠷᠡ ᠴᠠᠭ ᠦᠶᠡ ᠳᠦ ᠮᠣᠩᠭᠣᠯ ᠤᠨ ᠲᠡᠦᠬᠡ ᠶᠢᠨ ᠲᠠᠯᠠ ᠪᠠᠷ ᠡᠶᠢᠮᠦ ᠰᠢᠨᠡᠯᠡᠭ᠂ ᠥᠪᠡᠷᠮᠢᠴᠡ ᠪᠢᠴᠢᠯᠭᠡ ᠭᠠᠷᠴᠤ ᠢᠷᠡᠭᠰᠡᠨ ᠨᠢ ᠣᠯᠠᠨ ᠬᠥᠮᠦᠨ ᠳ᠋ᠤ ᠡᠬᠢ ᠲᠡᠦᠬᠡ ᠪᠡᠷ ᠢᠶᠡᠨ ᠪᠠᠬᠠᠷᠬᠠᠬᠤ ᠰᠡᠳᠬᠢᠯ ᠢ ᠲᠥᠷᠦᠭᠦᠯᠵᠦ᠂ ᠲᠡᠦᠬᠡᠨ ᠪᠦᠲᠦᠭᠡᠯ ᠤᠩᠰᠢᠵᠤ ᠰᠤᠳᠤᠯᠬᠤ ᠤᠷᠮᠠ ᠵᠣᠷᠢᠭ ᠢ ᠪᠠᠳᠠᠷᠠᠭᠠᠨᠠ ᠭᠡᠳᠡᠭ ᠲᠦ ᠡᠷᠡᠭᠡᠯᠵᠡᠬᠦ ᠦᠭᠡᠢ ᠪᠠᠶᠢᠨᠠ᠃ ᠨᠣᠮ ᠤᠨ ᠬᠣᠷᠣᠬᠠᠶᠢᠲᠠᠨ᠂ ᠦᠨᠡᠨᠴᠢ ᠹᠡᠨ ᠨᠦᠭᠦᠳ ᠦᠨ ᠨᠣᠮ ᠤᠨ ᠰᠠᠩ ᠤᠨ ᠲᠠᠯᠪᠢᠭᠤᠷ ᠲᠤ ᠡᠨᠡ ᠨᠣᠮ ᠪᠠᠶᠢᠬᠤ ᠤᠴᠢᠷ ᠲᠠᠢ᠂ ᠪᠠᠶᠢᠭᠠ ᠪᠠᠶᠢᠬᠤ ᠭᠡᠳᠡᠭ ᠲᠦ ᠪᠢ ᠢᠲᠡᠭᠡᠯ ᠲᠡᠢ ᠪᠠᠶᠢᠨᠠ᠃ ᠭᠠᠭᠴᠠ ᠷᠣᠮᠠᠨ ᠪᠢᠴᠢᠭᠡᠳ ᠲᠡᠷᠡ ᠨᠢ ᠰᠣᠩᠭᠣᠳᠠᠭ ᠲᠤᠭᠤᠷᠪᠢᠯ ᠪᠣᠯᠤᠨ ᠮᠥᠩᠬᠡᠷᠡᠭᠰᠡᠨ᠂ ᠥᠪᠡᠷ ᠢᠶᠡᠨ ᠰᠤᠷᠠᠭ ᠲᠠᠰᠤᠷᠠᠭᠰᠠᠨ ᠳᠣᠮᠣᠭᠲᠤ ᠰᠡᠯᠢᠩᠵᠧᠷ ᠰᠢᠭ ᠮᠣᠩᠭᠣᠯ ᠵᠣᠬᠢᠶᠠᠯᠴᠢ ᠪᠣᠯ ᠲ ∙ ᠮᠠᠨᠳᠢᠷᠠ ᠭᠤᠸᠠᠢ ᠪᠢᠯᠡ᠃ ᠮᠣᠩᠭᠣᠯ ᠤᠨ ᠲᠡᠦᠬᠡᠨ ᠤᠷᠠᠨ ᠵᠣᠬᠢᠶᠠᠯ ᠳᠤ 《ᠬᠣᠷᠢᠨ ᠨᠢᠭᠡᠨ ᠬᠥᠷᠥᠭ》᠂ 《 ᠰᠠᠷᠠᠨ ᠵᠡᠪᠡ》 ᠍ ᠪᠡᠷ ᠭᠡᠷᠡᠯᠲᠦ ᠬᠥᠰᠢᠶᠡ ᠪᠣᠰᠬᠠᠭᠰᠠᠨ ᠡᠨᠡ ᠰᠣᠳᠣ ᠠᠪᠢᠶᠠᠰᠲᠤ ᠤᠷᠠᠨ ᠪᠦᠲᠦᠭᠡᠯᠴᠢ ᠶᠠᠭᠤᠨ ᠤ ᠤᠴᠢᠷ ᠳᠠᠬᠢᠨ ᠲᠣᠮᠣᠬᠠᠨ ᠪᠦᠲᠦᠭᠡᠯ ᠲᠤᠭᠤᠷᠪᠢᠯ ᠦᠭᠡᠢ ᠠᠵᠢᠨ ᠲᠦᠵᠢᠨ ᠨᠠᠮ ᠭᠦᠮᠬᠡᠨ ᠰᠠᠭᠤᠭᠰᠠᠨ ᠢ ᠪᠤᠷᠬᠠᠨ ᠴᠤ ᠦᠯᠦ ᠮᠡᠳᠡᠬᠦ ᠪᠢᠵᠡ ᠪᠡᠨ᠃ ᠶᠠᠭᠤᠲᠠᠢ ᠴᠤ ᠲᠡᠦᠬᠡ ᠰᠣᠨᠢᠷᠬᠠᠳᠠᠭ᠂ ᠲᠡᠦᠬᠡᠨ ᠤᠷᠠᠨ ᠵᠣᠬᠢᠶᠠᠯ ᠰᠢᠮᠡᠳᠦᠨ ᠤᠩᠰᠢᠳᠠᠭ ᠬᠡᠨ ᠪᠦᠬᠦᠨ ᠵᠠᠪᠠᠯ ᠤᠩᠰᠢᠵᠤ ᠲᠠᠨᠢᠯᠴᠠᠬᠤ ᠶᠣᠰᠣᠲᠠᠢ᠂ ᠲᠡᠦᠬᠡᠨ ᠪᠢᠴᠢᠯᠭᠡ ᠶᠢᠨ ᠥᠪᠡᠷᠮᠢᠴᠡ ᠪᠦᠲᠦᠭᠡᠯ ᠦᠳ ᠭᠡᠳᠡᠭ ᠢ ᠰᠠᠨᠠᠭᠤᠯᠵᠤ ᠬᠡᠯᠡᠶᠡ︕
ᠬᠥᠬᠡ ᠲᠣᠯᠪᠣᠲᠤ ᠳ ∙ ᠲᠡᠮᠦᠷ-ᠣᠴᠢᠷ ︵ ᠲᠦᠮᠡᠲᠦ ᠰᠢᠨᠡ ᠬᠥᠷᠪᠡᠭᠦᠯᠪᠡ ︶
2018-05-01
1 0