ᠣᠷᠭᠢᠯᠤᠭᠰᠠᠨ ᠰᠡᠳᠭᠢᠯ ᠦᠨ ᠤᠲᠠᠰᠤ ᠶᠢ ᠷᠣᠺ ᠢᠶᠡᠷ ᠬᠥᠨᠳᠡᠨ ᠵᠤᠭᠠᠴᠠᠭᠴᠢ
ᠪ ᠊ ᠣᠶᠢ᠍ᠳᠤᠪ : ︽ᠬᠤᠷᠳᠤ》 ᠬᠠᠮᠲᠤᠯᠢᠭ ᠤᠨ 25 ᠵᠢᠯ ᠦᠨ ᠣᠢ ᠡᠨᠡ ᠵᠢᠯ ᠲᠣᠬᠢᠶᠠᠵᠤ ᠪᠠᠶᠢᠨᠠ᠃ ᠲᠡᠶᠢᠮᠦ ᠡᠴᠡ ᠮᠣᠩᠭᠣᠯ ᠤᠨ ᠷᠣᠺ ᠫᠣᠫ ᠤᠷᠠᠯᠢᠭ ᠠᠴᠠ ᠲᠥᠷᠦᠵᠥ ᠭᠠᠷᠤᠭᠰᠠᠨ 《ᠬᠤᠷᠳᠤ》 ᠶᠢᠨ ᠣᠳᠬᠣᠨᠪᠠᠶᠠᠷ ᠤᠨ ᠬᠥᠷᠥᠭ ᠢ ᠲᠣᠯᠢᠯᠠᠭᠤᠯᠤᠶᠠ᠃
ᠣᠷᠭᠢᠯᠤᠭᠰᠠᠨ ᠰᠡᠳᠭᠢᠯ ᠦᠨ ᠤᠲᠠᠰᠤ ᠶᠢ ᠷᠣᠺ ᠢᠶᠡᠷ ᠬᠥᠨᠳᠡᠨ ᠵᠤᠭᠠᠴᠠᠭᠴᠢ
5848
2018-11-28 16:37
发表于:内蒙古
ᠪ ᠊ ᠣᠶᠢ᠍ᠳᠤᠪ : ︽ᠬᠤᠷᠳᠤ》 ᠬᠠᠮᠲᠤᠯᠢᠭ ᠤᠨ 25 ᠵᠢᠯ ᠦᠨ ᠣᠢ ᠡᠨᠡ ᠵᠢᠯ ᠲᠣᠬᠢᠶᠠᠵᠤ ᠪᠠᠶᠢᠨᠠ᠃ ᠲᠡᠶᠢᠮᠦ ᠡᠴᠡ ᠮᠣᠩᠭᠣᠯ ᠤᠨ ᠷᠣᠺ ᠫᠣᠫ ᠤᠷᠠᠯᠢᠭ ᠠᠴᠠ ᠲᠥᠷᠦᠵᠥ ᠭᠠᠷᠤᠭᠰᠠᠨ 《ᠬᠤᠷᠳᠤ》 ᠶᠢᠨ ᠣᠳᠬᠣᠨᠪᠠᠶᠠᠷ ᠤᠨ ᠬᠥᠷᠥᠭ ᠢ ᠲᠣᠯᠢᠯᠠᠭᠤᠯᠤᠶᠠ᠃
ᠣᠷᠭᠢᠯᠤᠭᠰᠠᠨ ᠰᠡᠳᠭᠢᠯ ᠦᠨ ᠤᠲᠠᠰᠤ ᠶᠢ ᠷᠣᠺ ᠢᠶᠡᠷ ᠬᠥᠨᠳᠡᠨ ᠵᠤᠭᠠᠴᠠᠭᠴᠢ
ᠮᠣᠩᠭᠣᠯ ᠤᠯᠤᠰ ᠤᠨ ᠭᠠᠪᠢᠶᠠᠳᠤ ᠵᠦᠵᠦᠭᠡᠴᠢᠨ ᠳᠠᠮᠪᠠ ᠶᠢᠨ ᠣᠳᠬᠣᠨᠪᠠᠶᠠᠷ 《ᠬᠤᠷᠳᠤ》 ᠬᠠᠮᠲᠤᠯᠢᠭ ᠤᠨ 《ᠡᠬᠡ ᠣᠷᠣᠨ》᠂ 《ᠴᠢ ᠮᠢᠨᠢ ᠪᠠᠶᠢᠭᠠ ᠪᠣᠯᠬᠣᠷ》᠂ 《ᠴᠢᠮᠡᠭᠡ ᠦᠭᠡᠢ ᠢᠷᠡᠬᠦ ᠳᠤᠷᠠᠯᠠᠯ》᠂ 《ᠨᠢᠯᠪᠤᠰᠤ ᠪᠠᠨ ᠲᠡᠪᠴᠢᠶᠡ》᠂ 《ᠬᠠᠨᠢ ᠳ᠋ᠠᠭᠠᠨ》᠂ 《ᠴᠣᠭᠯᠢᠭ ᠣᠶᠤᠲᠠᠨ》 ᠵᠡᠷᠭᠡ ᠬᠢᠲ ᠪᠣᠯᠤᠭᠰᠠᠨ ᠬᠠᠮᠤᠭ ᠯᠠ ᠰᠠᠶᠢᠬᠠᠨ ᠳᠠᠭᠤᠤ ᠨᠤᠭᠤᠳ ᠢ ᠵᠣᠬᠢᠶᠠᠭᠰᠠᠨ᠃ ᠡᠭᠦᠪᠡᠷ ᠵᠣᠭᠰᠣᠬᠤ ᠦᠭᠡᠢ ᠠᠰᠬᠠᠷᠠᠭᠰᠠᠨ ᠶᠡᠬᠡ ᠠᠪᠢᠶᠠᠰ ᠢᠶᠠᠨ ᠪᠤᠰᠤᠳ ᠲᠤ ᠪᠠᠨ ᠲᠦᠭᠡᠭᠡᠬᠦ ᠮᠠᠶ᠋ᠢᠭ ᠢᠶᠠᠷ ᠳᠠᠭᠤᠴᠢᠨ ᠠᠷᠢᠭᠤᠨᠠ᠂ ᠰᠠᠷᠠᠨᠲᠤᠶᠠᠭᠠ᠂ ᠰᠡᠷᠴᠢᠮᠠ᠂ 《ᠨᠣᠮᠢᠨ ᠲᠠᠯᠠᠰᠲᠤ》᠂ 《ᠴᠢᠨᠣᠠ》 ᠵᠡᠷᠭᠡ ᠬᠠᠮᠲᠤᠯᠢᠭ᠂ ᠳᠠᠭᠤᠴᠢᠳ ᠲᠤ ᠣᠯᠠᠨ ᠰᠠᠶᠢᠬᠠᠨ ᠳᠠᠭᠤᠤ ᠪᠡᠯᠡᠭᠯᠡᠵᠦ᠂ ᠲᠡᠳᠡᠭᠡᠷ ᠨᠢ ᠳᠠᠩᠳᠠ ᠬᠢᠲ ᠪᠣᠯᠵᠤ ᠢᠷᠡᠭᠰᠡᠨ᠃ ᠠᠯᠢᠪᠠ ᠨᠢᠭᠡ ᠬᠠᠮᠲᠤᠯᠢᠭ ᠤᠨ ᠠᠶᠠ ᠵᠣᠬᠢᠶᠠᠭᠴᠢ ᠪᠣᠯ ᠵᠥᠪᠬᠡᠨ ᠥᠪᠡᠷ ᠦᠨ ᠢᠶᠡᠨ ᠬᠠᠮᠲᠤᠯᠶᠭ ᠢ ᠳᠠᠭᠤᠤ ᠬᠤᠭᠤᠷ ᠢᠶᠠᠷ ᠭᠠᠴᠠᠭᠳᠠᠭᠤᠯᠴᠢᠬᠠᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠯᠠ ᠴᠢᠳᠠᠨ ᠶᠠᠳᠠᠨ ᠵᠢᠳᠬᠦᠵᠦ ᠪᠠᠶᠢᠭᠠ ᠬᠠᠷᠠᠭᠳᠠᠳᠠᠭ᠃ ᠬᠠᠷᠢᠨ ᠣᠳᠬᠣᠨᠪᠠᠶᠠᠷ ᠪᠣᠯ ᠲᠡᠶᠢᠮᠦ ᠪᠢᠰᠢ᠃ ᠬᠥᠨᠳᠡᠯᠡᠨ ᠡᠴᠡ ᠠᠵᠢᠭᠰᠠᠨ ᠬᠥᠮᠦᠨ ᠳ᠋ᠤ ᠪᠣᠯ ᠵᠦᠭᠡᠷ ᠯᠠ ᠬᠠᠯᠠᠭᠠᠰᠤᠨ ᠠᠴᠠ ᠪᠠᠨ ᠰᠠᠶᠢᠬᠠᠨ ᠰᠠᠶᠢᠬᠠᠨ ᠳᠠᠭᠤᠤ ᠭᠠᠷᠭᠠᠵᠤ ᠰᠢᠳᠡᠯᠡᠭᠡᠳ᠂ ᠪᠢᠯᠬᠠᠵᠤ ᠠᠰᠬᠠᠭᠰᠠᠨ ᠵᠠᠷᠢᠮ ᠢ ᠪᠠᠨ ᠪᠤᠰᠤᠳ ᠬᠠᠮᠲᠤᠯᠢᠭ᠂ ᠳᠠᠭᠤᠴᠢᠳ ᠤᠷᠤᠭᠤ 《ᠴᠢᠯᠠᠭᠤᠳᠠᠭᠠᠳ》 ᠪᠠᠶᠢᠬᠤ ᠰᠢᠭ ᠰᠠᠨᠠᠭᠳᠠᠳᠠᠭ᠃ ᠡᠭᠦᠨ ᠢ 《ᠠᠰᠬᠠᠷᠠᠭᠰᠠᠨ ᠶᠡᠬᠡ ᠠᠪᠢᠶᠠᠰ》 ᠭᠡᠵᠦ ᠬᠡᠯᠡᠨᠡ᠃ ᠰᠠᠶᠢᠬᠠᠨ ᠳᠠᠭᠤᠤ ᠪᠦᠲᠦᠭᠡᠨᠡ ᠭᠡᠳᠡᠭ ᠨᠢ ᠳᠠᠩ ᠭᠠᠭᠴᠠ ᠬᠥᠭᠵᠢᠮ ᠦᠨ ᠠᠶᠠᠯᠭᠤᠨ ᠠᠴᠠ ᠭᠠᠳᠠᠨᠠ ᠬᠥᠳᠡᠯᠮᠦᠷᠢ᠂ ᠡᠷᠢᠯᠬᠢᠯᠡᠯ᠂ ᠰᠤᠳᠤᠯᠭᠠ᠂ ᠮᠡᠳᠡᠷᠡᠮᠵᠢ᠂ ᠬᠥᠭᠵᠢᠮ ᠦᠨ ᠨᠠᠶᠢᠷᠠᠭᠤᠯᠭᠠ᠂ ᠳᠠᠭᠤᠨ ᠤ ᠦᠭᠡ ᠰᠣᠩᠭᠣᠯᠲᠠ ᠭᠡᠳ ᠣᠯᠠᠨ ᠵᠦᠢᠯ ᠢ ᠬᠠᠮᠤᠷᠳᠠᠭ ᠪᠥᠭᠡᠳ ᠠᠶᠠᠯᠭᠤ ᠵᠣᠬᠢᠶᠠᠬᠤ ᠠᠪᠢᠶᠠᠰ ᠲᠠᠢ ᠬᠢᠷᠢᠨᠡ ᠵᠠᠯᠬᠠᠭᠤ ᠬᠣᠶᠢᠷᠭᠣ ᠬᠦᠮᠦᠨ ᠪᠣᠯ ᠡᠳ᠋ᠡ ᠪᠦᠭᠦᠳᠡ ᠶᠢ ᠬᠡᠵᠢᠶᠡ ᠴᠤ ᠨᠢᠭᠡᠨ ᠴᠣᠭᠴᠠ ᠪᠣᠯᠭᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠵᠦᠭᠡᠷ ᠯᠠ ᠠᠮᠠᠨ ᠳᠤ ᠪᠠᠨ ᠨᠢᠭᠡ ᠰᠠᠶᠢᠬᠠᠨ ᠠᠶᠠ ᠭᠢᠩᠭᠢᠨᠡᠭᠡᠳ ᠶᠠᠪᠤᠬᠤ ᠪᠢᠵᠡ᠃ 《ᠶᠡᠬᠡ ᠠᠪᠢᠶᠠᠰ ᠶᠡᠬᠡ ᠬᠥᠳᠡᠯᠮᠦᠷᠢᠴᠢ ᠪᠠᠶᠢᠬᠤ ᠶᠢ ᠱᠠᠭᠠᠷᠳᠠᠳᠠᠭ》 ᠭᠡᠵᠦ ᠰᠤᠤᠲᠤ ᠬᠥᠭᠵᠢᠮ ᠦᠨ ᠵᠣᠬᠢᠶᠠᠯᠴᠢ ᠴᠸᠺᠣᠪᠰᠺᠢ ᠬᠡᠯᠡᠭᠰᠡᠨ ᠪᠠᠶᠢᠳᠠᠭ᠃ ᠡᠨᠡ ᠦᠭᠡ 《ᠬᠤᠷᠳᠤ》 ᠍ ᠤᠨ ᠣᠳᠬᠣᠨᠪᠠᠶᠠᠷ ᠲᠤ ᠶᠠᠭ ᠲᠣᠬᠢᠷᠠᠭᠠᠳ ᠪᠠᠶᠢᠳᠠᠭ ᠶᠤᠮ᠃
ᠤᠶᠠᠩᠭᠠ ᠶᠢᠨ ᠳᠠᠭᠤᠤ᠂ ᠢᠯᠠᠩᠭᠤᠶᠠ ᠠᠮᠠᠷᠠᠭ ᠬᠠᠶᠢᠷᠠ᠂ ᠠᠷᠢᠭᠤᠨ ᠳᠤᠷᠠᠯᠠᠯ ᠤᠨ ᠲᠤᠬᠠᠢ ᠳᠠᠭᠤᠨ ᠤ ᠠᠶᠠᠯᠭᠤ ᠵᠣᠬᠢᠶᠠᠬᠤ ᠳᠤ ᠲᠤᠬᠠᠢ ᠶᠢᠨ ᠵᠣᠬᠢᠶᠠᠭᠴᠢ ᠠᠴᠠ ᠭᠣᠸᠠ ᠰᠠᠶᠢᠬᠠᠨ ᠤ ᠥᠨᠳᠥᠷ ᠮᠡᠳᠡᠷᠡᠮᠵᠢ ᠱᠠᠭᠠᠷᠳᠠᠨᠠ᠃ ᠣᠳᠬᠣᠨᠪᠠᠶᠠᠷ ᠪᠣᠯ ᠭᠣᠸᠠ ᠰᠠᠶᠢᠬᠠᠨ ᠤ ᠥᠨᠳᠥᠷ ᠮᠡᠳᠡᠷᠡᠮᠵᠢ ᠲᠡᠢ ᠨᠢᠭᠡᠨ ᠪᠥᠭᠡᠳ ᠡᠨᠡ ᠲᠤᠬᠠᠢ ᠥᠪᠡᠷ ᠢᠶᠡᠨ ᠬᠦᠦᠷᠨᠢᠬᠦ ᠳᠦ ᠪᠡᠨ 《ᠪᠢ ᠲᠡᠭᠦᠰ ᠭᠣᠸᠠ ᠰᠠᠶᠢᠬᠠᠨ ᠤ ᠶᠢᠷᠲᠢᠨᠴᠦ ᠶᠢ ᠳᠣᠲᠣᠷᠠ ᠪᠠᠨ ᠲᠥᠰᠦᠭᠡᠯᠡᠵᠦ ᠪᠣᠳᠣᠳᠠᠭ᠃ ᠤᠬᠠᠭᠠᠨ ᠳᠤ ᠪᠠᠨ ᠠᠷᠢᠭᠤᠨᠠ ᠶᠢᠨ ︿ᠳᠤᠷᠠᠯᠠᠯ ᠮᠢᠨᠢ ᠵᠢᠷᠭᠠᠵᠤ ᠦᠵᠡᠭᠡ ᠦᠭᠡᠢ ᠵᠤᠯᠠ﹀ ᠳᠠᠭᠤᠤ ᠶᠢ ᠪᠦᠲᠦᠭᠡᠭᠰᠡᠨ ᠢᠶᠡᠷ ᠲᠡᠶᠢᠮᠦ ᠨᠢᠭᠡ ᠭᠣᠶᠣ ᠬᠠᠶᠢᠷᠠ ᠶᠢᠨ ᠶᠢᠷᠲᠢᠨᠴᠦ ᠶᠢ ᠪᠤᠰᠤᠳ ᠲᠤ ᠨᠡᠭᠡᠭᠡᠵᠦ ᠥᠭᠴᠦ ᠴᠢᠳᠠᠭᠰᠠᠨ᠃ ︿ᠴᠢᠮᠡᠭᠡ ᠦᠭᠡᠢ ᠢᠷᠡᠬᠦ ᠳᠤᠷᠠᠯᠠᠯ﹀᠂ ︿ᠬᠠᠨᠢ ᠳ᠋ᠠᠭᠠᠨ﹀᠂ ︿ᠬᠠᠶᠢᠷᠠ ᠶᠢᠨ ᠰᠠᠷᠨᠠᠢ﹀ ᠵᠡᠷᠭᠡ ᠳᠠᠭᠤᠨ ᠤ ᠬᠢ ᠪᠠᠨ ᠬᠥᠭᠵᠢᠮ ᠢ ᠪᠢ ᠡᠵᠡᠨ ᠪᠡᠶᠡ ᠦᠭᠡᠢ ᠰᠠᠶᠢᠬᠠᠨ ᠪᠦᠰᠡᠭᠦᠢ ᠶᠢ ᠮᠥᠷᠥᠭᠡᠳᠴᠦ ᠪᠦᠲᠦᠭᠡᠭᠰᠡᠨ᠃ ᠬᠠᠷᠢᠨ ︿ᠴᠢ ᠮᠢᠨᠢ ᠪᠠᠶᠢᠭᠠ ᠪᠣᠯᠬᠣᠷ﹀ ᠳᠠᠭᠤᠣ ᠪᠠᠨ ᠡᠬᠡᠨᠡᠷ ᠲᠦ ᠪᠡᠨ ᠵᠣᠷᠢᠭᠤᠯᠵᠤ ᠪᠢᠴᠢᠭᠰᠡᠨ︾ ᠭᠡᠵᠦ ᠦᠭᠦᠯᠡᠭᠰᠡᠨ ᠶᠤᠮ᠃ ᠮᠡᠳᠡᠭᠡᠵᠢ ᠭᠣᠸᠠ ᠰᠠᠶᠢᠬᠠᠨ ᠤ ᠥᠨᠳᠥᠷ ᠮᠡᠳᠡᠷᠡᠮᠵᠢ ᠲᠡᠢ ᠪᠠᠶᠢᠵᠤ ᠯᠠ ᠠᠮᠠᠷᠠᠭ ᠬᠠᠶᠢᠷᠠ ᠶᠢᠨ ᠲᠡᠷᠡ ᠣᠯᠠᠨ ᠰᠠᠶᠢᠬᠠᠨ ᠳᠠᠭᠤᠤ ᠶᠢ ᠠᠮᠢᠯᠠᠭᠤᠯᠤᠭᠰᠠᠨ ᠪᠠᠶᠢᠵᠤ ᠲᠠᠭᠠᠷᠠᠨᠠ᠃ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠼ ∙ ᠬᠤᠯᠠᠨ ᠴᠤᠬᠤᠮ ᠯᠠ ᠬᠠᠶᠢᠷᠠ ᠳᠤᠷᠠᠯᠠᠯ ᠳᠤ ᠪᠠᠨ ᠢᠳᠡ ᠰᠢᠲᠠᠵᠤ ᠶᠠᠪᠤᠬᠤ ᠦᠶᠡ ᠳ᠋ᠡᠭᠡᠨ《ᠳᠤᠷᠠᠯᠠᠯ ᠮᠢᠨᠢ ᠵᠢᠷᠭᠠᠵᠤ ᠦᠵᠡᠭᠡ ᠦᠭᠡᠢ ᠵᠤᠯᠠ》 ᠰᠢᠯᠦᠭ ᠢᠶᠡᠨ ᠪᠢᠴᠢᠭᠰᠡᠨ ᠭᠡᠬᠦ ᠪᠥᠭᠡᠳ ᠨᠠᠶᠢᠷᠠᠭᠴᠢ ᠶᠢᠨ ᠲᠡᠷᠡ ᠬᠦ ᠬᠠᠶᠢᠷᠠ ᠶᠢᠨ ᠲᠣᠷᠭᠠᠨ ᠮᠡᠳᠡᠷᠡᠮᠵᠢ᠂ ᠣᠳᠬᠣᠨᠪᠠᠶᠠᠷ ᠤᠨ ᠠᠶᠠᠯᠭᠤ ᠵᠣᠬᠢᠶᠠᠬᠤ ᠭᠣᠸᠠ ᠰᠠᠶᠢᠬᠠᠨ ᠤ ᠥᠨᠳᠥᠷ ᠮᠡᠳᠡᠷᠡᠮᠵᠢ ᠲᠡᠢ ᠰᠦᠯᠡᠯᠳᠦᠭᠰᠡᠨ ᠢᠶᠡᠷ ᠳᠤᠷᠠᠯᠠᠯ ᠤᠨ ᠲᠤᠬᠠᠢ ᠨᠢᠭᠡᠨ ᠰᠠᠶᠢᠬᠠᠨ ᠳᠠᠭᠤᠤ ᠪᠦᠲᠦᠵᠦ᠂ ᠤᠯᠠᠮ ᠢᠶᠠᠷ ᠲ ∙ ᠠᠷᠢᠭᠤᠨᠠ ᠤᠶᠠᠩᠭᠠᠯᠠᠭᠤᠯᠤᠭᠰᠠᠨ ᠢᠶᠠᠷ ᠳᠤᠷᠠᠯᠠᠯ ᠬᠠᠶᠢᠷᠠ ᠶᠢᠨ ᠶᠢᠷᠲᠢᠨᠴᠦ ᠶᠢ ᠪᠤᠰᠤᠳ ᠲᠤ ᠬᠠᠷᠠᠮ ᠦᠭᠡᠢ ᠨᠡᠭᠡᠭᠡᠵᠦ ᠥᠭᠴᠦ ᠴᠢᠳᠠᠭᠰᠠᠨ ᠪᠠᠶᠢᠵᠤ ᠲᠠᠭᠠᠷᠬᠤ ᠨᠢ᠃
ᠣᠳᠬᠣᠨᠪᠠᠶᠠᠷ ᠤᠷᠠᠯᠢᠭ ᠲᠤ ᠠᠩᠬᠠ ᠬᠡᠷᠬᠢᠨ ᠬᠥᠯ ᠲᠠᠯᠪᠢᠭᠰᠠᠨ ᠲᠤᠬᠠᠢ ᠪᠠᠨ ᠳᠤᠷᠠᠰᠬᠤ ᠳᠤ ᠪᠠᠨ᠄
᠁ ᠬᠠᠷᠠ ᠪᠠᠭᠠ ᠠᠴᠠ ᠪᠠᠨ ᠯᠠ 《ᠷᠣᠤᠯᠢᠩ ᠢ ᠰᠲ᠋ᠦ᠋ᠦᠨᠰ》 《ᠪᠢᠲ᠋ᠯᠵᠠ》᠂ 《ᠰᠮᠠᠦᠺᠢ》 ᠰᠢᠭ ᠪᠣᠯᠤᠨᠠ ᠭᠡᠵᠦ ᠮᠥᠷᠦᠭᠡᠳᠳᠡᠭ ᠪᠠᠶᠢᠯᠠ᠃ ᠮᠢᠨᠦ ᠬᠢᠴᠢᠶᠡᠯ ᠦᠨ ᠰᠢᠷᠡᠭᠡ ᠲᠡᠷᠡ ᠴᠢᠭ ᠢᠶᠡᠷ ᠢᠶᠡᠨ ᠭᠢᠲ᠋ᠠᠷ᠂ ᠪᠥᠮᠪᠥᠷ ᠵᠢᠷᠤᠴᠢᠬᠠᠭᠰᠠᠨ᠂ ᠲᠡᠷᠡ ᠨᠢ ᠶᠡᠷᠦ ᠡᠴᠡ ᠪᠡᠨ ᠠᠷᠢᠯᠳᠠᠭ ᠦᠭᠡᠢ ᠪᠠᠶᠢᠭᠰᠠᠨ᠃ ᠮᠠᠨ ᠤ ᠠᠩᠬᠢ ᠶᠢᠨ ᠠᠷᠪᠠᠨ ᠵᠢᠯ ᠦᠨ ᠮᠣᠨᠲ᠋ᠠᠵᠢᠨ ᠤ ᠵᠢᠷᠤᠭ ᠪᠣᠯᠤᠨ ᠳᠤᠷᠠᠰᠤᠮᠵᠢ ᠶᠢᠨ ᠳᠡᠪᠲᠡᠷ ᠳᠡᠭᠡᠷᠡ ᠠᠩᠬᠢ ᠶᠢᠨ ᠮᠠᠨᠢ ᠬᠡᠦᠬᠡᠳ ᠦᠳ ᠨᠠᠮᠠ ᠶᠢ《ᠢᠷᠡᠭᠡᠳᠦᠢ ᠳᠦ ᠬᠠᠮᠤᠭ ᠤᠨ ᠲᠣᠮᠣ ᠭᠢᠲ᠋ᠠᠷᠴᠢᠨ ᠪᠣᠯᠤᠨᠠ᠃ ᠢᠷᠡᠭᠡᠳᠦᠢ ᠶᠢᠨ ᠤᠷᠠᠯᠢᠭ ᠤᠨ ᠬᠠᠮᠤᠭ ᠤᠨ ᠲᠣᠮᠣ ᠲᠥᠯᠥᠭᠡᠯᠡᠯ ᠪᠣᠯᠤᠨᠠ᠃ ᠣᠳᠣ ᠪᠣᠯᠤᠭᠰᠠᠨ ᠬᠣᠶᠢᠨᠠ ᠪᠠᠨ ᠪᠢᠳᠡᠨ ᠢ ᠪᠡᠨ ᠪᠢᠲᠡᠭᠡᠢ ᠮᠠᠷᠲᠠᠴᠢᠬᠠᠭᠠᠷᠠᠢ》 ᠭᠡᠵᠦ ᠵᠥᠩᠨᠡᠨ ᠪᠢᠴᠢᠭᠰᠡᠨ ᠪᠠᠶᠢᠳᠠᠭ ᠶᠤᠮ᠃ ᠪᠢ ᠴᠤ ᠥᠪᠡᠷ ᠢ ᠪᠡᠨ ᠶᠡᠷᠦ ᠨᠢ ᠮᠡᠳᠡᠷᠡᠴᠢᠬᠡᠭᠰᠡᠨ ᠪᠠᠶᠢᠭᠰᠠᠨ᠃ ᠲᠡᠷᠡ ᠦᠶᠡ ᠳᠦ 《ᠬᠤᠷᠳᠤ》 ᠍ ᠶᠢᠨ ᠠᠩᠬᠠᠨ ᠤ ᠪᠦᠷᠢᠯᠳᠦᠬᠦᠨ 《ᠬᠠᠷᠠᠩᠭᠠ》 ᠬᠠᠮᠲᠤᠯᠢᠭ ᠲᠠᠢ ᠨᠡᠶᠢᠯᠡᠭᠡᠳ 《ᠬᠠᠷᠠᠩᠭᠠ》 ᠷᠣᠺ ᠲᠥᠪ ᠭᠡᠵᠦ ᠪᠠᠶᠢᠭᠤᠯᠴᠢᠬᠠᠭᠰᠠᠨ ᠪᠠᠶᠢᠯᠠ᠃ ᠡᠳᠡ ᠨᠠᠷ ᠮᠣᠰᠺᠸᠠ ᠶᠠᠪᠤᠵᠤ ᠴᠠᠬᠢᠯᠭᠠᠨ ᠬᠥᠭᠵᠢᠮ ᠣᠷᠣᠭᠤᠯᠵᠤ ᠢᠷᠡᠳᠡᠭ ᠪᠠᠶᠢᠭᠰᠠᠨ᠃ 《ᠬᠤᠷᠳᠤ》 ᠍ ᠶᠢᠨ ᠠᠩᠬᠠᠨ ᠤ ᠭᠡᠰᠢᠭᠦᠳ ᠦᠨ ᠨᠢᠭᠡ ᠪᠠᠲᠤᠵᠢᠷᠭᠠᠯ ᠠᠬᠠ ᠲᠤᠬᠠᠢ ᠶᠢᠨ ᠦᠶᠡ ᠳᠦ ᠮᠥᠩᠭᠥ ᠲᠡᠢ᠂ ᠲᠡᠭᠦᠪᠡᠷ ᠢᠶᠡᠨ ᠬᠣᠶᠢᠨᠠ ᠠᠴᠠ ᠬᠥᠭᠵᠢᠮ ᠣᠷᠣᠭᠤᠯᠵᠤ ᠢᠷᠡᠨᠡ᠃ ᠲᠡᠭᠡᠬᠦ ᠳᠦ ᠶᠠᠭᠠᠬᠢᠯᠲᠠ ᠴᠤ ᠦᠭᠡᠢ ᠮᠢᠨᠦ ᠰᠢᠲᠦᠭᠡᠨ ᠡᠩᠬᠡᠮᠠᠩᠯᠠᠢ ᠠᠬᠠ ᠮᠠᠨᠢ 《ᠬᠠᠷᠠᠩᠭᠠ》 ᠷᠣᠺ ᠲᠥᠪ ᠳᠡᠭᠡᠷᠡ ᠭᠢᠲ᠋ᠠᠷ ᠲᠣᠭᠯᠠᠨᠠ᠃ ᠪᠢ ᠶᠠᠭᠠᠬᠢᠵᠤ ᠲᠣᠭᠯᠠᠬᠤ ᠶᠢ ᠨᠢ ᠬᠠᠷᠠᠭᠠᠳ ᠯᠠ ᠰᠠᠭᠤᠳᠠᠭ ᠪᠠᠶᠢᠭᠰᠠᠨ᠃ ᠬᠡᠷᠬᠢᠨ ᠲᠣᠭᠯᠠᠵᠤ ᠪᠤᠢ ᠲᠧᠭᠨᠢᠭ ᠦᠳ ᠢ ᠨᠢ ᠶᠡᠬᠡ ᠠᠵᠢᠭᠯᠠᠨᠠ᠃ ᠬᠥᠮᠦᠨ ᠦᠭᠡᠢ ᠪᠠᠶᠢᠬᠤ ᠦᠶᠡ ᠳᠦ ᠮᠠᠩᠯᠠᠢ ᠠᠬᠠ ᠶᠢᠨ ᠭᠢᠲ᠋ᠠᠷ ᠢ ᠪᠠᠷᠢᠭᠠᠳ ᠨᠢᠭᠡ ᠲᠣᠭᠯᠠᠴᠢᠬᠠᠨᠠ᠂ ᠪᠠᠲᠤᠵᠢᠷᠭᠠᠯ ᠠᠬᠠ ᠶᠢᠨ ᠭᠢᠲ᠋ᠠᠷ ᠢ ᠨᠢᠭᠡ ᠰᠢᠭᠦᠷᠴᠥ ᠠᠪᠤᠭᠠᠳ ᠲᠣᠭᠯᠠᠴᠢᠬᠠᠨᠠ᠃ ᠲᠡᠭᠡᠵᠦ ᠪᠠᠶᠢᠲᠠᠯᠠ 1992 ᠣᠨ ᠳᠤ ᠭᠠᠯᠰᠠᠩᠪᠠᠲᠣ ᠠᠬᠠ ᠶᠢᠨ ᠨᠡᠷᠡᠮᠵᠢᠲᠦ 《ᠭᠢᠲ᠋ᠠᠷ ᠤᠨ ᠴᠤᠤᠷᠢᠶᠠ》 ᠬᠡᠮᠡᠬᠦ ᠤᠷᠤᠯᠳᠤᠭᠠᠨ ᠮᠣᠩᠭᠣᠯ ᠳᠤ ᠵᠣᠬᠢᠶᠠᠨ ᠪᠠᠶᠢᠭᠤᠯᠤᠭᠳᠠᠭᠰᠠᠨ᠃ ᠡᠨᠡ ᠤᠷᠤᠯᠳᠤᠭᠠᠨ ᠭᠤᠷᠪᠠᠨ ᠤᠳᠠᠭᠠ ᠵᠣᠬᠢᠶᠠᠭᠳᠠᠵᠤ ᠲᠤᠬᠠᠢ ᠶᠢᠨ ᠦᠶᠡ ᠶᠢᠨ ᠪᠦᠬᠦ ᠭᠢᠲ᠋ᠠᠷᠴᠢᠳ ᠣᠷᠣᠯᠴᠠᠭᠰᠠᠨ᠃ ᠪᠢ ᠣᠷᠣᠰ ᠤᠨ ᠠᠯᠳᠠᠷᠲᠤ ᠵᠣᠬᠢᠶᠠᠯ 《ᠬᠡᠳᠡᠭᠡᠨ ᠦ ᠶᠠᠪᠤᠳᠠᠯ》 ᠍ ᠢ ᠭᠢᠲ᠋ᠠᠷᠳᠠᠵᠤ ᠲᠣᠭᠯᠠᠭᠠᠳ ᠨᠢᠭᠡᠳᠦᠭᠡᠷ ᠪᠠᠶᠢᠷᠢ ᠡᠵᠡᠯᠡᠵᠦ ᠪᠠᠶᠢᠭᠰᠠᠨ ᠶᠤᠮ᠃ ᠲᠡᠷᠡ ᠴᠠᠭ ᠠᠴᠠ ᠬᠣᠶᠢᠰᠢ ᠮᠢᠨᠦ ᠤᠷᠠ ᠴᠢᠳᠠᠪᠤᠷᠢ ᠳᠡᠭᠡᠭᠰᠢᠯᠡᠵᠦ᠂ ᠬᠥᠭᠵᠢᠮ ᠲᠡᠢ ᠬᠠᠷᠢᠴᠠᠬᠤ ᠨᠢᠳᠦ ᠨᠡᠭᠡᠭᠡᠭᠳᠡᠭᠰᠡᠨ᠃ ᠡᠭᠦᠪᠡᠷ ᠵᠣᠭᠰᠣᠬᠤ ᠦᠭᠡᠢ 《ᠬᠤᠷᠳᠤ》 ᠬᠠᠮᠲᠤᠯᠢᠭ ᠲᠤ ᠭᠢᠲ᠋ᠠᠷᠴᠢᠨ ᠪᠣᠯᠬᠤ ᠡᠭᠦᠳᠡ ᠬᠠᠭᠠᠯᠭᠠ ᠨᠡᠭᠡᠭᠡᠭᠳᠡᠭᠰᠡᠨ᠃ ᠥᠪᠡᠷ ᠦᠨ ᠢᠶᠡᠨ ᠴᠢᠳᠠᠯ ᠢᠶᠠᠷ ᠣᠷᠣᠭᠰᠠᠨ᠃ ᠲᠡᠷᠡᠨ ᠡᠴᠡ ᠪᠢᠰᠢ ᠭᠠᠩᠪᠠᠶᠠᠷ ᠤᠨ ᠳᠡᠭᠦᠦ ᠭᠡᠳᠡᠭ ᠢᠶᠡᠷ ᠣᠷᠣᠭᠠ ᠦᠭᠡᠢ᠃ ᠪᠢ ᠳᠤᠮᠳᠠᠳ᠋ᠤ ᠰᠤᠷᠭᠠᠭᠤᠯᠢ ᠳᠤ ᠪᠠᠶᠢᠬᠤ ᠳᠤ ᠪᠠᠨ ᠭᠢᠲ᠋ᠠᠷ ᠤᠨ ᠬᠡᠳᠦ ᠬᠡᠳᠦᠨ ᠰᠣᠯᠢ ᠲᠣᠭᠯᠠᠭᠠᠳ ᠮᠠᠩᠨᠣᠲ᠋ᠣᠹᠣᠨ ᠳᠤ ᠬᠤᠷᠢᠶᠠᠴᠢᠬᠠᠭᠰᠠᠨ ᠪᠠᠶᠢᠯᠠ᠃ ᠡᠭᠦᠨ ᠢ ᠭᠠᠩᠪᠠᠶᠠᠷ ᠠᠬᠠ ᠰᠣᠨᠣᠰᠤᠭᠠᠳ ᠪᠠᠰᠠ ᠨᠢᠭᠡ ᠶᠢ ᠪᠣᠳᠣᠭᠰᠠᠨ ᠪᠠᠶᠢᠬᠤ᠃ ᠨᠢᠭᠡ ᠤᠳᠠᠭᠠ 《ᠬᠠᠷᠠᠩᠭᠠ》 ᠷᠣᠺ ᠲᠥᠪ ᠳᠡᠭᠡᠷᠡ ᠣᠴᠢᠭᠠᠳ ᠭᠢᠲ᠋ᠠᠷ ᠲᠣᠭᠯᠠᠵᠤ ᠰᠠᠭᠤᠭᠰᠠᠨ ᠴᠢᠨᠢ ᠡᠩᠬᠡᠮᠠᠩᠯᠠᠢ ᠠᠬᠠ ᠨᠠᠮᠠ ᠶᠢ 《ᠣᠲᠣ ᠡᠴᠡ ᠮᠢᠨᠦ ᠳᠡᠭᠦᠦ ᠪᠥᠮᠪᠥᠷ ᠪᠢᠲᠡᠭᠡᠢ ᠲᠣᠭᠯᠠ᠃ ᠶᠠᠭᠤᠮᠠ ᠶᠠᠭᠤᠮᠠ ᠤᠷᠤᠭᠤ ᠦᠰᠦᠴᠢᠭᠡᠳ ᠬᠡᠷᠡᠭ ᠦᠭᠡᠢ᠃ ᠠᠩᠬᠠᠨ ᠱᠠᠲᠤᠨ ᠤ ᠶᠡᠷᠦᠩᠬᠡᠢ ᠶᠠᠭᠤᠮᠠ ᠪᠠᠨ ᠯᠠ ᠰᠤᠷᠴᠢᠬᠠ᠃ ᠲᠡᠭᠡᠭᠡᠳ ᠭᠢᠲ᠋ᠠᠷ ᠢᠶᠠᠷ ᠢᠶᠠᠨ ᠳᠠᠩᠨᠠ》 ᠭᠡᠵᠦ ᠬᠡᠯᠡᠵᠦ ᠪᠠᠶᠢᠭᠰᠠᠨ᠃ ᠬᠡᠳᠦᠢ ᠪᠡᠷ ᠮᠠᠩᠯᠠᠢ ᠠᠬᠠ ᠨᠠᠳᠠ ᠳᠤ ᠨᠢᠭᠤᠷ ᠲᠤᠯᠵᠤ᠂ ᠰᠠᠪᠬᠠ ᠪᠠᠷ ᠴᠣᠬᠢᠵᠤ ᠬᠥᠭᠵᠢᠮ ᠰᠤᠷᠭᠠᠭᠠ ᠦᠭᠡᠢ ᠴᠤ ᠪᠢ ᠮᠠᠩᠯᠠᠢ ᠠᠬᠠ ᠶᠢ ᠬᠦᠨᠳᠦᠯᠡᠵᠦ᠂ ᠰᠢᠲᠦᠵᠦ ᠪᠠᠭᠰᠢ ᠪᠠᠨ ᠭᠡᠵᠦ ᠪᠣᠳᠣᠳᠠᠭ᠃ ᠲᠡᠷᠡ ᠬᠦᠮᠦᠨ ᠦ ᠲᠤᠭᠤᠯᠤᠭᠰᠠᠨ ᠠᠮᠢᠳᠤᠷᠠᠯ᠂ ᠬᠢᠭᠰᠡᠨ ᠤᠷᠠᠨ ᠪᠦᠲᠦᠭᠡᠯ᠂ ᠰᠡᠳᠬᠢᠯ ᠵᠢᠷᠦᠬᠡᠨ ᠡᠴᠡ ᠪᠡᠨ ᠲᠣᠭᠯᠠᠭᠰᠠᠨ ᠬᠥᠭ ᠠᠶᠠᠯᠭᠤ ᠨᠠᠳᠠ ᠳᠤ ᠮᠠᠰᠢ ᠲᠣᠮᠣ ᠦᠯᠢᠭᠡᠷ ᠳᠠᠭᠤᠷᠢᠶᠠᠯ ᠪᠣᠯᠵᠤ ᠶᠠᠪᠤᠳᠠᠭ᠃ ᠪᠢ ᠭᠢᠲ᠋ᠠᠷ ᠤᠨ ᠥᠩᠭᠡ ᠠᠶᠠᠯᠭᠤ ᠶᠢ ᠶᠡᠬᠡ ᠡᠷᠬᠢᠮᠯᠡᠳᠡᠭ᠃ ᠶᠠᠭᠠᠬᠢᠭᠠᠳ ᠭᠡᠬᠦ ᠪᠡᠷ ᠮᠠᠩᠯᠠᠢ ᠠᠬᠠ ᠴᠡᠪᠡᠷ ᠥᠩᠭᠡᠯᠢᠭ᠂ ᠠᠶᠠᠯᠭᠤᠯᠠᠭ ᠲᠣᠭᠯᠠᠳᠠᠭ ᠭᠢᠲ᠋ᠠᠷᠴᠢᠨ᠃ ᠲᠡᠶᠢᠮᠦ ᠴᠤ ᠤᠴᠢᠷ ᠠᠴᠠ ᠪᠤᠰᠤᠳ ᠠᠴᠠ ᠪᠠᠨ ᠲᠠᠰᠤᠷᠠᠭᠰᠠᠨ ᠭᠡᠵᠦ ᠪᠢ ᠪᠣᠳᠣᠳᠠᠭ᠃ ᠲᠡᠭᠡᠬᠦ ᠪᠡᠷ ᠪᠢ ᠶᠠᠭ ᠡᠨᠡ ᠬᠦᠮᠦᠨ ᠦ ᠵᠠᠮᠨᠠᠯ ᠢᠶᠠᠷ ᠯᠠ ᠶᠠᠪᠤᠬᠤ ᠶᠣᠰᠣᠲᠠᠢ ᠭᠡᠵᠦ ᠬᠢᠴᠢᠶᠡᠭᠰᠡᠨ᠃ ᠬᠦᠮᠦᠨ ᠦ ᠵᠢᠷᠦᠬᠡ ᠰᠡᠳᠬᠢᠯ ᠳᠦ ᠬᠦᠷᠦᠭᠰᠡᠨ᠂ ᠳᠠᠭᠤᠤ ᠲᠠᠢ ᠪᠠᠨ ᠠᠪᠴᠠᠯᠳᠤᠭᠰᠠᠨ ᠮᠠᠰᠢ ᠭᠣᠶᠣ ᠠᠶᠠᠯᠭᠤ ᠵᠣᠬᠢᠶᠠᠬᠤ ᠶᠣᠰᠣᠲᠠᠢ ᠶᠤᠮ ᠪᠠᠶᠢᠨᠠ ᠭᠡᠵᠦ ᠪᠣᠳᠣᠭᠰᠠᠨ ᠤ ᠦᠨᠳᠦᠰᠦᠨ ᠳᠡᠭᠡᠷᠡ ᠭᠢᠲ᠋ᠠᠷ ᠬᠥᠭᠵᠢᠮ ᠢ ᠪᠢ ᠨᠠᠰᠤ ᠪᠠᠷ ᠢᠶᠠᠨ ᠰᠣᠩᠭᠣᠵᠤ᠂ ᠲᠣᠭᠯᠠᠵᠤ ᠶᠠᠪᠤᠨᠠ᠃ ᠮᠠᠨ ᠤ ᠨᠠᠶᠠ ᠨᠠᠳᠠ ᠲᠠᠢ ᠬᠠᠮᠲᠤ ᠬᠠᠷᠠ ᠪᠠᠭᠠ ᠠᠴᠠ ᠪᠠᠨ 《ᠭᠠᠩ ᠵᠠᠮ》 ᠴᠢᠭᠤᠯᠭᠠ ᠳᠤ ᠲᠣᠭᠯᠠᠵᠤ ᠪᠠᠶᠢᠭᠰᠠᠨ᠃ ᠡᠨᠡ ᠤᠳᠬᠠ ᠪᠠᠷ ᠢᠶᠠᠨ ᠪᠢ ᠨᠠᠶᠠ ᠶᠢ 《ᠬᠠᠷᠠᠩᠭᠠ》 ᠷᠣᠺ ᠲᠥᠪ ᠳᠡᠭᠡᠷᠡ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ᠃ ᠡᠬᠢᠨ ᠳᠦ ᠪᠡᠨ ᠨᠠᠶᠠ ᠬᠦᠮᠦᠰ ᠦᠨ ᠭᠢᠲ᠋ᠠᠷ ᠢ ᠵᠥᠭᠡᠭᠡᠵᠦ ᠭᠦᠶᠦᠭᠡᠳ ᠯᠠ ᠶᠠᠪᠤᠳᠠᠭ ᠪᠠᠶᠢᠯᠠ᠃ ᠪᠢ ᠴᠤ ᠭᠡᠰᠡᠨ 《ᠬᠠᠷᠠᠩᠭᠠ》᠂ 《ᠬᠤᠷᠳᠤ》 ᠶᠢᠨ ᠬᠥᠭᠵᠢᠮ ᠢ ᠵᠥᠭᠡᠭᠡᠭᠡᠳ ᠯᠠ ᠭᠦᠶᠦᠵᠦ ᠶᠠᠪᠤᠳᠠᠭ ᠪᠠᠶᠢᠭᠰᠠᠨ᠃ ᠲᠡᠭᠡᠵᠦ ᠪᠠᠶᠢᠭᠠᠳ ᠯᠠ ᠨᠠᠶᠠ ᠪᠠᠨ ᠠᠪᠤᠭᠠᠳ 《ᠬᠤᠷᠳᠤ》 ᠍ ᠳᠦ ᠲᠣᠭᠯᠠᠬᠤ ᠪᠣᠯᠤᠭᠰᠠᠨ᠃ ᠮᠠᠨ ᠤ ᠨᠠᠶᠠ ᠶᠡᠬᠡ ᠴᠡᠮᠴᠡᠭᠡᠷ᠂ ᠥᠩᠭᠡᠯᠢᠭ᠂ ᠠᠶᠠᠯᠭᠤᠯᠠᠭ ᠲᠣᠭᠯᠠᠳᠠᠭ᠃ ᠡᠨᠡ ᠨᠢ ᠭᠠᠩᠪᠠᠶᠠᠷ ᠠᠬᠠ ᠳᠤ ᠲᠠᠭᠠᠯᠠᠭᠳᠠᠭᠰᠠᠨ᠃ ᠲᠡᠭᠡᠭᠡᠳ ᠯᠠ ᠪᠢᠳᠡ ᠭᠤᠷᠪᠠ ᠪᠡᠯᠡᠳᠬᠡᠯ ᠬᠢᠵᠦ ᠡᠬᠢᠯᠡᠵᠦ ᠪᠠᠶᠢᠭᠠ ᠶᠤᠮ᠃ ᠳᠠᠷᠠᠭᠠ ᠨᠢ ᠴᠣᠭ ᠥᠪᠡᠷ ᠦᠨ ᠬᠢ ᠪᠡᠨ ᠴᠢᠳᠠᠯ᠂ ᠬᠦᠴᠦᠨ ᠴᠢᠷᠮᠠᠶᠢᠯᠲᠠ ᠪᠠᠷ 《 ᠴᠢᠮᠠ ᠶᠢ ᠵᠣᠷᠢᠨᠠ》᠂ 《ᠴᠢᠨᠣᠠ》 ᠬᠣᠶᠠᠷ ᠢ ᠳᠠᠭᠤᠯᠠᠭᠠᠳ ᠢᠷᠡᠬᠦ ᠳᠦ ᠭᠠᠩᠪᠠᠶᠠᠷ ᠠᠬᠠ ᠲᠡᠭᠦᠨ ᠢ ᠬᠠᠮᠲᠤᠯᠢᠭ ᠲᠤ ᠪᠠᠨ ᠠᠪᠤᠭᠰᠠᠨ᠃ ᠴᠣᠭ ᠤᠨ ᠬᠣᠭᠣᠯᠠᠢ ᠴᠠᠭᠠᠨᠠ ᠪᠠᠨ ᠯᠠ ᠨᠢᠭᠡ ᠭᠣᠶᠣ᠂ ᠳᠤᠯᠠᠭᠠᠬᠠᠨ ᠪᠥᠭᠡᠳ ᠲᠣᠰᠣᠯᠢᠭ ᠥᠩᠭᠡ ᠲᠡᠢ᠃ ᠠᠩᠬᠠᠨ ᠳᠤ ᠪᠠᠨ ᠪᠢ ᠴᠣᠭ ᠢ ᠬᠠᠮᠲᠤᠯᠢᠭ ᠲᠤ ᠪᠠᠨ ᠠᠪᠬᠤ ᠳᠤᠷᠠ ᠦᠭᠡᠢ ᠪᠠᠶᠢᠭᠰᠠᠨ᠃ ᠨᠢᠭᠡ ᠭᠡᠷ ᠪᠦᠯᠢ ᠡᠴᠡ ᠠᠷᠠᠢ ᠯᠠ ᠣᠯᠠᠨ ᠬᠦᠮᠦᠨ ᠰᠢᠷᠭᠤᠬᠤ ᠭᠡᠳ ᠪᠠᠶᠢᠨᠠ ᠳ᠋ᠠ ᠭᠡᠬᠦ ᠪᠣᠳᠣᠯ ᠨᠠᠳᠠ ᠳᠤ ᠲᠥᠷᠦᠵᠥ ᠪᠠᠶᠢᠯᠠ᠃ ᠭᠡᠰᠡᠨ ᠴᠤ ᠴᠣᠭ ᠢ ᠬᠠᠮᠲᠤᠯᠢᠭ ᠲᠤ ᠪᠠᠨ ᠠᠪᠤᠭᠠᠳ 《ᠴᠡᠷᠢᠭ ᠦᠨ ᠪᠣᠳᠣᠯ》 ᠍ ᠢ ᠳᠠᠭᠤᠯᠠᠭᠤᠯᠲᠠᠯᠠ ᠦᠨᠡᠬᠡᠷ ᠬᠢᠲ ᠪᠣᠯᠤᠭᠰᠠᠨ᠃ 《ᠬᠤᠷᠳᠤ》 ᠴᠤ ᠠᠷᠠᠳ ᠲᠦᠮᠡᠨ ᠦ ᠰᠤᠨᠤᠰᠬᠤ ᠳᠤᠷᠠᠲᠠᠢ ᠬᠠᠮᠲᠤᠯᠢᠭ ᠪᠣᠯᠤᠭᠠᠳ ᠢᠷᠡᠭᠰᠡᠨ᠃ ᠮᠠᠨ ᠤ ᠣᠳᠬᠣᠨᠪᠠᠭᠠᠲᠤᠷ ᠲᠡᠷᠡ ᠦᠶᠡ ᠳᠦ ᠷᠠᠰᠢᠶᠠᠨᠳᠤ ᠥᠷᠲᠡᠭᠡᠨ ᠡᠴᠡ ᠰᠥ᠋ ᠵᠥᠭᠡᠭᠡᠳ ᠡᠵᠢ ᠠᠪᠤ ᠳᠤ ᠪᠠᠨ ᠲᠤᠰᠠᠯᠠᠭᠠᠳ ᠯᠠ ᠭᠦᠶᠦᠵᠦ ᠶᠠᠪᠤᠳᠠᠭ ᠪᠠᠶᠢᠯᠠ᠃ ᠡᠨᠡ ᠬᠣᠭᠣᠷᠣᠨᠳᠣ ᠣᠳᠬᠣᠨᠪᠠᠭᠠᠲᠤᠷ ᠥᠪᠡᠷᠲᠡᠭᠡᠨ ᠵᠣᠷᠢᠭᠤᠯᠵᠤ ᠪᠥᠮᠪᠥᠷ ᠬᠢᠭᠡᠳ᠂ ᠦᠬᠡᠷ ᠦᠨ ᠬᠥᠯᠳᠡᠭᠦᠦ ᠮᠢᠬᠠ ᠨᠦᠳᠦᠭᠡᠳ ᠮᠠᠰᠢ ᠶᠡᠬᠡ ᠬᠢᠴᠢᠶᠡᠯ ᠵᠢᠳᠬᠦᠯ ᠭᠠᠷᠭᠠᠭᠰᠠᠨ᠃ ᠲᠡᠭᠡᠭᠡᠳ ᠵᠢᠳᠬᠦᠭᠰᠡᠭᠡᠷ ᠪᠠᠶᠢᠭᠠᠳ ᠯᠠ ᠥᠪᠡᠷ ᠦᠨ ᠳᠤᠷᠠᠲᠠᠢ ᠶᠠᠭᠤᠮᠠᠨ ᠳᠤ ᠪᠠᠨ ᠬᠦᠷᠴᠦ᠂ ᠦᠶᠡ ᠶᠢᠨ ᠬᠢᠨ ᠡᠴᠡ ᠪᠡᠨ ᠪᠥᠮᠪᠥᠷ ᠢᠶᠡᠷ ᠪᠣᠯ ᠲᠠᠰᠤᠷᠠᠭᠰᠠᠨ᠃ ᠲᠡᠶᠢᠮᠦ ᠴᠤ ᠤᠴᠢᠷ ᠠᠴᠠ 《ᠬᠤᠷᠳᠤ》 ᠬᠠᠮᠲᠤᠯᠢᠭ ᠲᠤ ᠣᠷᠣᠬᠤ ᠠᠴᠠ ᠪᠠᠨ ᠡᠮᠦᠨᠡ 《ᠨᠢᠰᠸᠠᠨᠨᠢᠰ》 ᠬᠠᠮᠲᠤᠯᠢᠭ ᠲᠤ ᠪᠥᠮᠪᠦᠷᠴᠢᠨ ᠬᠢᠵᠦ ᠪᠠᠶᠢᠯᠠ᠃ ᠦᠨᠡᠬᠡᠷ ᠤᠷᠠ ᠴᠢᠳᠠᠪᠤᠷᠢ ᠰᠠᠶᠢᠲᠠᠢ᠂ ᠭᠣᠶᠣ ᠲᠣᠭᠯᠠᠭᠠᠳ ᠢᠷᠡᠬᠦ ᠪᠡᠷ ᠴᠢᠨᠢ ᠳᠡᠭᠦᠦ ᠪᠡᠨ ᠬᠠᠮᠲᠤᠯᠢᠭ ᠲᠤ ᠪᠠᠨ ᠠᠪᠬᠤ ᠦᠭᠡᠢ ᠭᠡᠳ ᠶᠠᠭᠠᠬᠢᠬᠤ ᠪᠢᠯᠡ᠃ ᠮᠠᠭᠠᠳ ᠦᠭᠡᠢ ᠪᠢᠳᠡ ᠲᠡᠭᠦᠨ ᠢ ᠥᠭᠡᠷᠡ ᠬᠠᠮᠲᠤᠯᠢᠭ ᠲᠤ ᠠᠯᠳᠠᠴᠢᠬᠠᠭᠰᠠᠨ ᠪᠣᠯ ᠴᠢᠨᠠᠭᠰᠢᠳᠠ ᠬᠥᠭᠵᠢᠵᠦ ᠳᠡᠪᠵᠢᠬᠦ ᠦᠭᠡᠢ ᠪᠠᠶᠢᠭᠰᠠᠨ ᠴᠤ ᠪᠠᠶᠢᠵᠤ ᠮᠡᠳᠡᠨᠡ᠃ ᠲᠡᠷᠡᠨ ᠡᠴᠡ ᠪᠢᠰᠢ ᠮᠠᠨ ᠤ ᠳᠡᠭᠦᠦ ᠯᠠ 《ᠬᠤᠷᠳᠤ》 ᠬᠠᠮᠲᠤᠯᠢᠭ ᠲᠤ ᠪᠥᠮᠪᠥᠷ ᠲᠣᠭᠯᠠᠬᠤ ᠶᠣᠰᠣᠲᠠᠢ᠂ ᠮᠠᠨ ᠤ ᠳᠡᠭᠦᠦ ᠯᠠ ᠳᠠᠭᠤᠯᠠᠬᠤ ᠶᠣᠰᠣᠲᠠᠢ ᠭᠡᠰᠡᠨ ᠢᠪᠴᠤᠤ ᠠᠷᠭᠠ ᠪᠠᠷ ᠲᠡᠮᠡᠴᠡᠵᠦ ᠪᠠᠶᠢᠭᠰᠠᠨ ᠦᠭᠡᠢ᠃ ᠡᠳᠡ ᠨᠠᠷ ᠪᠣᠯ ᠥᠪᠡᠷ ᠦᠨ ᠢᠶᠡᠨ ᠬᠦᠴᠦ ᠲᠡᠩᠬᠡᠭᠡ᠂ ᠬᠢᠴᠢᠶᠡᠯ ᠵᠢᠳᠬᠦᠯ᠂ ᠠᠪᠢᠶᠠᠰ ᠴᠢᠳᠠᠯ ᠢᠶᠠᠷ ᠢᠶᠠᠨ 《ᠬᠤᠷᠳᠤ》 ᠬᠠᠮᠲᠤᠯᠢᠭ ᠲᠤ ᠣᠷᠣᠭᠰᠠᠨ᠃ ᠪᠢ ᠴᠤ ᠪᠠᠰᠠ ᠲᠡᠶᠢᠮᠦ ᠯᠠ ᠵᠠᠮ ᠲᠤᠭᠤᠯᠤᠭᠰᠠᠨ᠃ ᠬᠦᠮᠦᠨ ᠪᠣᠯ ᠪᠠᠶᠠᠷᠯᠠᠵᠤ᠂ ᠳᠣᠭᠳᠣᠯᠵᠤ᠂ ᠪᠠᠰᠠ ᠭᠤᠲᠤᠷᠠᠵᠤ᠂ ᠰᠢᠨᠠᠯᠵᠤ ᠠᠮᠢᠳᠤᠷᠠᠬᠤ ᠶᠣᠰᠣᠲᠠᠢ ᠠᠮᠢᠲᠠᠨ᠃ ᠳᠠᠩᠳᠠ ᠵᠢᠷᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠪᠠᠶᠢᠩᠭᠤ ᠶᠢᠨ ᠵᠢᠷᠭᠠᠯ ᠬᠥᠮᠦᠨ ᠳ᠋ᠤ ᠰᠦᠢᠷᠡᠯ ᠠᠪᠴᠢᠷᠠᠳᠠᠭ᠃ ᠶᠠᠮᠠᠷ ᠨᠢᠭᠡᠨ ᠵᠦᠢᠯ ᠢᠶᠡᠷ ᠳᠤᠲᠠᠮᠠᠭ ᠪᠠᠶᠢᠬᠤ ᠲᠤᠰᠤᠮ ᠬᠦᠮᠦᠨ ᠦ ᠲᠥᠷᠥᠯᠬᠢ ᠶᠢᠨ ᠡᠷᠴᠢ ᠬᠦᠴᠦ᠂ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠢᠯᠡᠷᠡᠨ ᠭᠠᠷᠴᠤ ᠢᠷᠡᠳᠡᠭ᠃ ᠲᠡᠶᠢᠮᠦ ᠳᠦ ᠪᠡᠨ ᠴᠤ ᠠᠯᠢᠪᠠ ᠬᠠᠮᠲᠤᠯᠢᠭ ᠨᠢᠭᠡᠨ ᠴᠠᠭ ᠦᠶᠡ ᠶᠢ ᠵᠣᠯᠢᠶᠠᠰᠤᠯᠠᠵᠤ ᠪᠠᠶᠢᠵᠤ ᠠᠮᠵᠢᠯᠲᠠᠨ ᠳᠤ ᠬᠦᠷᠳᠡᠭ᠃ ᠮᠠᠨ ᠤ ᠬᠠᠮᠲᠤᠯᠢᠭ ᠴᠤ ᠭᠡᠰᠡᠨ ᠲᠡᠭᠡᠵᠦ ᠯᠠ ᠪᠠᠶᠢᠭᠰᠠᠨ᠃ ᠪᠢ ᠥᠪᠡᠷ ᠢ ᠪᠡᠨ ᠷᠣᠺ ᠫᠣᠫ ᠤᠷᠠᠯᠢᠭ ᠲᠤ ᠵᠣᠬᠢᠬᠤ ᠬᠡᠮᠵᠢᠶᠡ ᠪᠡᠷ ᠵᠣᠯᠢᠵᠤ ᠴᠢᠳᠠᠭᠰᠠᠨ ᠭᠡᠵᠦ ᠪᠣᠳᠣᠳᠠᠭ᠃ ᠵᠦᠭᠡᠷ ᠨᠢᠭᠡ ᠪᠠᠴᠠᠭᠠᠨ ᠭᠦᠶᠦᠵᠦ ᠢᠷᠡᠭᠡᠳ 《ᠬᠤᠷᠳᠤ》 ᠍ ᠤᠨ ᠭᠢᠲ᠋ᠠᠷᠴᠢᠨ ᠪᠣᠯᠴᠢᠬᠠᠭᠠ ᠦᠭᠡᠢ᠃ ᠷᠣᠺ ᠫᠣᠫ ᠤᠨ ᠲᠡᠦᠬᠡ ᠶᠢ ᠰᠡᠬᠦᠭᠡᠳ ᠬᠠᠷᠠᠬᠤ ᠳᠤ ᠲᠡᠷᠲᠡᠭᠡ ᠵᠢᠷᠠᠭᠠᠳ ᠣᠨ ᠠᠴᠠ ᠡᠬᠢ ᠲᠡᠢ ᠡᠨᠡ ᠤᠷᠠᠯᠢᠭ ᠲᠤ ᠠᠮᠢ ᠨᠠᠰᠤ᠂ ᠵᠢᠷᠦᠬᠡ ᠰᠡᠳᠬᠢᠯ ᠢᠶᠡᠨ ᠵᠣᠷᠢᠭᠤᠯᠤᠭᠰᠠᠨ ᠣᠯᠠᠨ ᠬᠥᠭᠵᠢᠮ ᠦᠨ ᠵᠣᠬᠢᠶᠠᠯᠴᠢ᠂ ᠬᠥᠭᠵᠢᠮᠴᠢᠳ᠂ ᠳᠠᠭᠤᠴᠢᠳ ᠤᠨ ᠬᠦᠴᠦ ᠴᠢᠳᠠᠯ ᠰᠢᠩᠭᠡᠭᠰᠡᠨ ᠪᠠᠶᠢᠳᠠᠭ ᠪᠣᠯᠬᠣᠷ ᠪᠢ ᠳᠣᠲᠣᠷᠠ ᠪᠠᠨ ᠵᠠᠯᠪᠠᠷᠢᠵᠤ ᠶᠠᠪᠤᠳᠠᠭ ᠶᠤᠮ᠃ ᠲᠡᠳᠡ ᠪᠠᠶᠢᠭᠰᠠᠨ ᠪᠣᠯᠬᠣᠷ ᠪᠢᠳᠡ ᠣᠳᠣ ᠪᠠᠶᠢᠭᠠ᠂ ᠪᠢᠳᠡ ᠪᠠᠶᠢᠭᠠ ᠪᠣᠯᠬᠣᠷ ᠪᠢᠳᠡᠨ ᠦ ᠬᠣᠶᠢᠴᠢ ᠦᠶᠡ ᠪᠠᠶᠢᠬᠤ ᠪᠣᠯᠤᠨᠠ᠃ 1992 ᠣᠨ ᠳᠤ ᠮᠠᠩᠯᠠᠢ ᠠᠬᠠ ᠨᠠᠳᠠ ᠳᠤ ᠬᠠᠨᠳᠤᠵᠤ 《ᠴᠢ ᠲᠡᠷᠡ ᠲᠣᠮᠣ ᠮᠣᠳᠣᠨ ᠤ ᠣᠷᠣᠢ ᠳᠤ ᠪᠠᠶᠢᠭᠠ ᠮᠥᠴᠢᠷ ᠢ ᠬᠠᠷᠠᠵᠤ ᠪᠠᠶᠢᠨᠠ ᠤᠤ᠃ ᠭᠢᠲ᠋ᠠᠷ ᠢ ᠨᠢᠭᠡᠨᠲᠡ ᠯᠠ ᠡᠬᠢᠯᠡᠬᠦ ᠶᠤᠮ ᠪᠣᠯ ᠴᠢ ᠣᠷᠣᠢ ᠳᠤ ᠨᠢ ᠬᠦᠷᠲᠡᠯᠡ ᠲᠣᠭᠯᠠᠨᠠ ᠰᠢᠦ》 ᠭᠡᠵᠦ ᠬᠡᠯᠡᠵᠦ ᠪᠠᠶᠢᠭᠰᠠᠨ᠃ ᠡᠨᠡ ᠦᠭᠡ ᠮᠢᠨᠦ ᠰᠡᠳᠬᠢᠯ ᠡᠴᠡ ᠭᠠᠷᠳᠠᠭ ᠦᠭᠡᠢ ᠶᠤᠮ᠃ ᠮᠠᠩᠯᠠᠢ ᠠᠬᠠ ᠲᠠᠢ ᠪᠠᠭᠰᠢ᠂ ᠱᠠᠪᠢ ᠶᠢᠨ ᠪᠠᠷᠢᠯᠳᠤᠯᠭᠠ ᠭᠡᠳ ᠰᠦᠢᠳ ᠪᠣᠯᠤᠭᠠ ᠦᠭᠡᠢ ᠴᠤ ᠭᠡᠯᠡ ᠶᠠᠭᠠᠬᠢᠯᠲᠠ ᠴᠤ ᠦᠭᠡᠢ ᠭᠢᠲ᠋ᠠᠷ ᠤᠨ ᠨᠠᠷᠢᠨ ᠮᠡᠳᠡᠷᠡᠮᠵᠢ᠂ ᠲᠧᠭᠨᠢᠭ ᠢ ᠮᠠᠩᠯᠠᠢ ᠠᠬᠠ ᠠᠴᠠ ᠰᠤᠷᠣᠭᠰᠠᠨ ᠪᠣᠯᠪᠠ ᠤᠤ᠃ 《ᠬᠤᠷᠳᠤ》 ᠬᠠᠮᠲᠤᠯᠢᠭ ᠲᠤ ᠣᠷᠣᠭᠰᠠᠨ ᠡᠬᠢᠨ ᠦ ᠦᠶᠡ ᠡᠴᠡ ᠪᠠᠨ ᠡᠬᠢᠯᠡᠭᠡᠳ ᠯᠠ ᠪᠢ ᠮᠠᠰᠢ ᠰᠠᠶᠢᠨ ᠲᠣᠭᠯᠠᠬᠤ ᠦᠭᠡᠢ ᠪᠣᠯ ᠶᠠᠪᠤᠭᠠᠨ ᠳᠠᠭᠠᠨ 《ᠬᠤᠷᠳᠤ》 ᠍ ᠠᠴᠠ ᠵᠢᠭᠢᠭᠳᠡᠵᠦ ᠮᠠᠭᠠᠳ ᠦᠭᠡᠢ ᠶᠤᠮ ᠪᠠᠶᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠡᠳᠦᠷᠵᠢᠨ ᠰᠥᠨᠢᠵᠢᠨ ᠪᠡᠯᠡᠳᠬᠡᠯ ᠬᠢᠳᠡᠭ ᠪᠠᠶᠢᠯᠠ》 ᠭᠡᠵᠦ ᠦᠭᠦᠯᠡᠭᠰᠡᠨ ᠶᠤᠮ᠃
ᠭᠢᠲ᠋ᠠᠷ ᠪᠣᠯ ᠭᠠᠶᠢᠬᠠᠮᠰᠢᠭᠲᠠᠢ ᠬᠥᠭᠵᠢᠮ ᠦᠨ ᠵᠢᠮᠰᠡᠭ᠃ ᠬᠦᠮᠦᠨ ᠲᠥᠷᠥᠯᠬᠢᠲᠡᠨ 20 ᠳ᠋ᠤᠭᠠᠷ ᠵᠠᠭᠤᠨ ᠳᠤ ᠴᠠᠬᠢᠯᠭᠠᠨ ᠭᠢᠲ᠋ᠠᠷ ᠪᠦᠲᠦᠭᠡᠭᠰᠡᠨ ᠢᠶᠡᠷ ᠬᠥᠭᠵᠢᠮ ᠦᠨ ᠤᠷᠠᠯᠢᠭ ᠤᠨ ᠲᠡᠦᠬᠡᠨ ᠳᠦ ᠠᠰᠤᠷᠤ ᠲᠣᠮᠣ ᠬᠤᠪᠢᠰᠤᠯ᠂ ᠰᠢᠨᠡᠴᠢᠯᠡᠯ ᠠᠪᠴᠢᠷᠠᠭᠰᠠᠨ ᠪᠥᠭᠡᠳ ᠡᠨᠡ ᠴᠤ ᠤᠳᠬᠠ ᠪᠠᠷ ᠢᠶᠠᠨ ᠭᠢᠲ᠋ᠠᠷ ᠬᠥᠭᠵᠢᠮ ᠨᠢ 20 ᠳ᠋ᠤᠭᠠᠷ ᠵᠠᠭᠤᠨ ᠤ ᠰᠢᠯᠢᠳᠡᠭ ᠬᠥᠭᠵᠢᠮ ᠦᠨ ᠵᠢᠮᠰᠡᠭ ᠪᠣᠯᠵᠤ ᠴᠢᠳᠠᠭᠰᠠᠨ᠃ ᠭᠢᠲ᠋ᠠᠷ ᠬᠥᠭᠵᠢᠮ ᠡᠴᠡ ᠪᠡᠯ ᠳᠽ᠂ ᠺᠠᠤᠨᠲᠷᠢ᠂ ᠹᠯᠮᠡᠩᠺᠣ᠂ ᠷᠣᠺ᠂ ᠫᠣᠫ ᠭᠡᠬᠦ ᠮᠡᠲᠦ ᠣᠯᠠᠨ ᠠᠷᠪᠠᠨ ᠤᠷᠤᠰᠬᠠᠯ ᠤᠨ ᠠᠶᠠᠯᠭᠤ ᠶᠢ ᠰᠣᠨᠣᠰᠴᠤ ᠪᠣᠯᠤᠨᠠ᠃ ᠣᠳᠬᠣᠨᠪᠠᠶᠠᠷ ᠤᠨ ᠠᠩᠬᠠᠨ ᠤ ᠦᠨᠡ ᠲᠡᠢ᠂ ᠲᠣᠮᠣ ᠭᠢᠲ᠋ᠠᠷ ᠭᠡᠪᠡᠯ 《ᠹᠣᠺᠰ》 ᠦᠢᠯᠡᠳᠪᠦᠷᠢ ᠶᠢᠨ 《ᠪᠷᠣᠳᠪᠠᠢ》 ᠨᠡᠷᠡᠲᠡᠢ ᠤᠯᠠᠭᠠᠨ ᠭᠢᠲ᠋ᠠᠷ᠃ ᠡᠨᠡ ᠤᠯᠠᠭᠠᠨ ᠭᠢᠲ᠋ᠠᠷ ᠢᠶᠠᠷ ᠣᠳᠬᠣᠨᠪᠠᠶᠠᠷ ᠣᠯᠠᠨ ᠰᠠᠶᠢᠬᠠᠨ ᠳᠠᠭᠤᠤ ᠬᠢᠭᠰᠡᠨ᠃ ᠦᠨᠡᠨ ᠳᠦ ᠪᠡᠨ ᠰᠠᠶᠢᠨ ᠬᠥᠭᠵᠢᠮ ᠦᠨ ᠵᠢᠮᠰᠡᠭ ᠲᠡᠢ ᠪᠠᠶᠢᠵᠤ ᠯᠠ ᠰᠠᠶᠢᠨ ᠪᠦᠲᠦᠭᠡᠯ ᠲᠥᠷᠥᠨᠡ ᠭᠡᠳᠡᠭ ᠨᠢ ᠤᠷᠠᠯᠢᠭ ᠤᠨ ᠬᠢᠨ ᠤ ᠬᠤᠪᠢ ᠳᠤ ᠪᠢᠴᠢᠭᠳᠡᠭᠡ ᠦᠭᠡᠢ ᠬᠠᠤᠯᠢ᠃ ᠪᠢᠴᠢᠭᠳᠡᠭᠡ ᠦᠭᠡᠢ ᠵᠠᠷᠢᠮ ᠬᠠᠤᠯᠢ ᠪᠢᠴᠢᠭᠳᠡᠭᠰᠡᠨ ᠪᠦᠬᠦ ᠬᠠᠤᠯᠢ ᠠᠴᠠ ᠴᠤ ᠬᠦᠴᠦᠲᠡᠢ ᠪᠠᠶᠢᠬᠤ ᠲᠣᠬᠢᠶᠠᠯᠳᠤᠯ ᠪᠠᠰᠠ ᠪᠤᠢ᠃ ᠲᠡᠶᠢᠮᠦ ᠴᠤ ᠤᠴᠢᠷ ᠠᠴᠠ ᠶᠡᠷᠡᠭᠡᠳ ᠣᠨ ᠤ ᠶᠠᠳᠠᠭᠤ ᠲᠠᠷᠴᠢᠭ ᠲᠡᠷᠡᠬᠡᠨ ᠦᠶᠡ ᠳᠦ 《ᠬᠤᠷᠳᠤ》 ᠶᠢᠨ ᠬᠢᠨ ᠠᠯᠢ ᠪᠣᠯᠬᠤ ᠰᠠᠶᠢᠨ ᠬᠥᠭᠵᠢᠮ ᠦᠨ ᠵᠢᠮᠰᠡᠭ ᠪᠠᠷᠢᠬᠤ ᠭᠡᠵᠦ ᠲᠡᠮᠡᠦᠯᠵᠦ ᠪᠠᠶᠢᠯᠠ᠃ ᠵᠢᠱᠢᠶᠡ ᠨᠢ ᠣᠳᠬᠣᠨᠪᠠᠶᠠᠷ ᠠᠩᠬᠠᠨ ᠤ ᠲᠣᠮᠣ ᠮᠡᠷᠭᠡᠵᠢᠯ ᠦᠨ ᠭᠢᠲ᠋ᠠᠷ ᠢᠶᠠᠨ 1998 ᠣᠨ ᠳᠤ ᠠᠪᠤᠭᠰᠠᠨ ᠶᠤᠮ᠃ ᠲᠡᠷᠡ ᠨᠢ ᠠᠯᠳᠠᠷᠲᠤ 《ᠮᠧᠲ᠋ᠠᠯᠢᠺᠠ》 ᠬᠠᠮᠲᠤᠯᠢᠭ ᠤᠨ ᠪᠠᠷᠢᠳᠠᠭ 《ESP》 ᠬᠡᠮᠡᠬᠦ ᠭᠢᠲ᠋ᠠᠷ᠃ ᠦᠨᠡ ᠨᠢ 3200 ᠳ᠋ᠣᠯᠯᠠᠷ᠃ ᠳᠤᠤᠭᠠᠷᠤᠯᠲᠠ ᠨᠢ ᠬᠡᠪᠢ ᠮᠧᠲ᠋ᠠᠯ ᠰᠲ᠋ᠢᠯᠢ ᠳᠦ ᠶᠡᠬᠡ ᠲᠣᠬᠢᠷᠠᠳᠠᠭ᠃ ᠳᠠᠯᠠ᠂ ᠨᠠᠶᠠᠭᠠᠳ ᠣᠨ ᠤ ᠦᠶᠡ ᠳᠦ ᠳᠡᠯᠡᠬᠡᠢ ᠳ᠋ᠠᠬᠢᠨ ᠳᠤ 《Fender》᠂ 《Gibson》᠂ 《Ibanez》᠂ 《Jackson》᠂ 《Yamaha》᠂ 《Paul Reed Smith》᠂ 《ESP》᠂ 《Taylor》᠂ 《Takamine》 ᠭᠡᠳ ᠮᠠᠰᠢ ᠣᠯᠠᠨ ᠠᠯᠳᠠᠷᠲᠠᠢ ᠹᠧᠷᠮ ᠦᠨ ᠭᠢᠲ᠋ᠠᠷ ᠤᠳ ᠪᠤᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠡᠳᠡ ᠪᠦᠭᠦᠳᠡ ᠥᠪᠡᠷ ᠥᠪᠡᠷᠰᠡᠳ ᠦᠨ ᠬᠡᠪ ᠮᠠᠶ᠋ᠢᠭ᠂ ᠵᠠᠭᠪᠤᠷ ᠬᠢᠴᠡ ᠲᠡᠢ᠂ ᠣᠨᠴᠠᠯᠢᠭ ᠳᠤᠤᠭᠠᠷᠤᠯᠲᠠ ᠲᠠᠢ᠃ ᠲᠡᠶᠢᠮᠦ ᠡᠴᠡ ᠠᠮᠢᠳᠤ ᠬᠥᠭᠵᠢᠮ ᠦᠨ ᠬᠠᠮᠲᠤᠯᠢᠭ ᠤᠳ ᠶᠠᠮᠠᠷ ᠲᠥᠷᠥᠯ ᠵᠠᠨᠷ ᠢᠶᠡᠷ ᠲᠣᠭᠯᠠᠳᠠᠭ ᠠᠴᠠ ᠪᠠᠨ ᠰᠢᠯᠲᠠᠭᠠᠯᠠᠭᠠᠳ ᠭᠢᠲ᠋ᠠᠷ ᠢᠶᠠᠨ ᠰᠣᠩᠭᠣᠳᠠᠭ᠃ ᠬᠡᠪᠢ ᠮᠧᠲ᠋ᠠᠯ ᠤᠷᠤᠰᠬᠠᠯ ᠤᠨ ᠬᠢᠨ ᠶᠡᠬᠡᠪᠴᠢᠯᠡᠨ 《Fender》᠂ 《Gibson》᠂ 《ESP》 ᠬᠡᠷᠡᠭᠯᠡᠬᠦ ᠵᠢᠱᠢᠶᠡ ᠲᠡᠢ᠃ ᠣᠳᠬᠣᠨᠪᠠᠶᠠᠷ 1998 ᠣᠨ ᠳᠤ 《ESP》 ᠭᠢᠲ᠋ᠠᠷ ᠠᠪᠤᠭᠠᠳ ᠰᠡᠳᠬᠢᠯ ᠨᠢ ᠪᠠᠰᠠ ᠬᠠᠨᠤᠭᠰᠠᠨ ᠦᠭᠡᠢ᠃ ᠠᠮᠧᠷᠢᠺᠠ ᠶᠢᠨ 《Bon Joyi》 ᠬᠠᠮᠲᠤᠯᠢᠭ ᠤᠨ ᠪᠠᠷᠢᠳᠠᠭ 《Fender》 ᠭᠢᠲ᠋ᠠᠷ ᠢ 2500 ᠳ᠋ᠣᠯᠯᠠᠷ ᠢᠶᠠᠷ᠂ 《Steve Moorse》 ᠍ ᠦᠨ ᠪᠠᠷᠢᠳᠠᠭ 《Music man》 ᠭᠢᠲ᠋ᠠᠷ ᠢ 2700 ᠳ᠋ᠣᠯᠯᠠᠷ ᠢᠶᠠᠷ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ᠃ ᠡᠳᠦᠭᠡ ᠲᠡᠷᠡ ᠳᠣᠮᠣᠭᠲᠤ 《Guns N Roses》 ᠬᠠᠮᠲᠤᠯᠢᠭ ᠤᠨ ᠬᠢᠨ ᠤ ᠪᠠᠷᠢᠳᠠᠭ 6000 ᠳ᠋ᠣᠯᠯᠠᠷ ᠤᠨ ᠦᠨᠡᠲᠡᠢ᠂ ᠳᠡᠭᠡᠳᠦ ᠲᠠᠯᠠ ᠳᠤ ᠪᠠᠨ 12 ᠤᠲᠠᠰᠤ ᠲᠠᠢ᠂ ᠳᠣᠣᠷᠠᠳᠤ ᠲᠠᠯᠠ ᠳᠤ ᠪᠠᠨ ᠵᠢᠷᠭᠤᠭᠠᠨ ᠤᠲᠠᠰᠤ ᠲᠠᠢ 《Gibson》 ᠬᠡᠮᠡᠬᠦ ᠬᠣᠶᠠᠷ ᠭᠠᠷ ᠲᠠᠢ ᠭᠢᠲ᠋ᠠᠷ ᠢ ᠦᠶᠡ ᠦᠶᠡ ᠪᠠᠷᠢᠳᠠᠭ᠃ ᠳᠠᠰᠢᠷᠠᠮ ᠳᠤ ᠬᠡᠯᠡᠬᠦ ᠳᠦ 《Fender》᠂ 《Gibson》 ᠭᠢᠲ᠋ᠠᠷ ᠤᠳ ᠡᠳᠦᠭᠡ ᠦᠢᠯᠡᠳᠪᠦᠷᠢᠯᠡᠭᠳᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠲᠤᠯᠠ ᠤᠯᠠᠮ ᠦᠨᠡ ᠳᠦ ᠣᠷᠣᠵᠤ ᠪᠠᠶᠢᠭᠠ ᠪᠥᠭᠡᠳ ᠢᠨᠲ᠋ᠧᠷᠨᠡᠲ ᠢᠶᠡᠷ ᠵᠠᠷᠤᠬᠤ ᠳᠤ ᠳᠣᠣᠷᠠ ᠬᠠᠶᠠᠵᠤ 10 ᠮᠢᠩᠭᠠᠨ ᠳ᠋ᠣᠯᠯᠠᠷ ᠲᠤ ᠬᠦᠷᠥᠨᠡ ᠭᠡᠵᠦ ᠪᠠᠶᠢᠨᠠ ᠰᠢᠦ᠃
《ᠬᠠᠮᠤᠭ ᠤᠨ ᠭᠣᠣᠯ ᠨᠢ ᠡᠨᠡ ᠰᠠᠶᠢᠬᠠᠨ ᠬᠥᠭᠵᠢᠮ ᠦᠨ ᠵᠢᠮᠰᠡᠭ ᠦᠳ ᠢᠶᠡᠨ ᠠᠰᠢᠭᠯᠠᠵᠤ᠂ ᠪᠦᠲᠦᠭᠡᠯ ᠬᠢᠬᠦ ᠨᠢ ᠴᠢᠬᠤᠯᠠ᠃ ᠦᠨᠡᠲᠡᠢ ᠮᠠᠰᠢᠨ᠂ ᠦᠨᠡᠲᠡᠢ ᠭᠢᠲ᠋ᠠᠷ ᠬᠣᠶᠠᠷ ᠤᠨ ᠠᠯᠢ ᠨᠢᠭᠡ ᠶᠢ ᠰᠣᠩᠭᠣ ᠭᠡᠪᠡᠯ ᠪᠢ ᠬᠠᠮᠤᠭ ᠤᠨ ᠦᠨᠡᠲᠡᠢ ᠭᠢᠲ᠋ᠠᠷ ᠢ ᠯᠠ ᠰᠣᠩᠭᠣᠨᠠ᠃ ᠮᠠᠰᠢᠨ ᠪᠣᠯ ᠬᠡᠷᠡᠭᠯᠡᠭᠡ᠃ ᠭᠢᠲ᠋ᠠᠷ ᠪᠣᠯ ᠮᠢᠨᠦ ᠬᠣᠶᠠᠷ ᠳᠠᠬᠢ ᠡᠬᠡᠨᠡᠷ》 ᠭᠡᠵᠦ ᠣᠳᠬᠣᠨᠪᠠᠶᠠᠷ ᠬᠡᠯᠡᠵᠦ ᠪᠠᠶᠢᠨᠠ᠃ ᠲᠡᠷᠡᠪᠡᠷ 《Fender》 ᠭᠢᠲ᠋ᠠᠷ ᠢᠶᠠᠷ ᠢᠶᠠᠨ 《ᠬᠤᠷᠳᠤ》 ᠬᠠᠮᠲᠤᠯᠢᠭ ᠤᠨ ᠣᠯᠠᠨ ᠠᠷᠪᠠᠨ ᠬᠢᠲ ᠳᠠᠭᠤᠤ ᠶᠢ ᠵᠣᠬᠢᠶᠠᠵᠤ ᠲᠣᠭᠯᠠᠬᠤ ᠶᠢᠨ ᠰᠠᠴᠠᠭᠤ 《ᠨᠣᠮᠢᠨ ᠲᠠᠯᠠᠰᠲᠤ》 ᠬᠠᠮᠲᠤᠯᠢᠭ ᠤᠨ 《ᠵᠡᠭᠦᠳᠦᠨ ᠳᠦ ᠢᠷᠡᠬᠦ ᠵᠢᠷᠭᠠᠯ》᠂ ᠳᠠᠭᠤᠴᠢᠨ ᠰᠡᠷᠴᠢᠮᠠ ᠶᠢᠨ 《ᠬᠠᠮᠢᠭᠠ ᠴᠤ ᠴᠤᠭ》 ᠭᠡᠬᠦ ᠮᠡᠲᠦ ᠬᠢᠲ ᠪᠣᠯᠤᠭᠰᠠᠨ ᠳᠠᠭᠤᠤ ᠨᠤᠭᠤᠳ ᠢ ᠵᠣᠬᠢᠶᠠᠬᠤ ᠳᠤ ᠪᠠᠨ ᠡᠨᠡ ᠯᠠ ᠭᠢᠲ᠋ᠠᠷ ᠢᠶᠠᠨ ᠤᠶᠠᠩᠭᠠᠯᠠᠭᠤᠯᠵᠤ᠂ ᠲᠤᠬᠠᠢ ᠶᠢᠨ ᠳᠠᠭᠤᠨ ᠨᠤᠭᠤᠳ ᠲᠤ 《Fender》 ᠭᠢᠲ᠋ᠠᠷ ᠤᠨ ᠳᠠᠬᠢᠨ ᠳᠠᠪᠲᠠᠭᠳᠠᠰᠢ ᠦᠭᠡᠢ ᠥᠩᠭᠡ ᠶᠢ ᠮᠥᠩᠬᠡᠯᠡᠨ ᠦᠯᠡᠳᠡᠭᠡᠵᠡᠢ᠃ ᠭᠡᠪᠡᠴᠦ ᠣᠳᠬᠣᠨᠪᠠᠶᠠᠷ 2011 ᠣᠨ ᠳᠤ ᠬᠣᠶᠠᠷ ᠳᠠᠬᠢ ᠡᠬᠡᠨᠡᠷ ᠪᠣᠯᠤᠭᠰᠠᠨ 《Fender》 ᠲᠡᠷᠢᠭᠦᠲᠡᠢ ᠵᠢᠷᠭᠤᠭᠠᠨ ᠭᠢᠲ᠋ᠠᠷ ᠢᠶᠠᠨ ᠮᠠᠰᠢᠨ ᠠᠴᠠ ᠪᠠᠨ ᠬᠤᠯᠠᠭᠠᠢ ᠳᠤ ᠠᠯᠳᠠᠵᠤ ᠨᠢᠭᠡ ᠬᠡᠰᠡᠭ ᠲᠦ ᠪᠡᠨ ᠯᠠ ᠪᠤᠬᠢᠨᠢᠳᠤᠨ ᠰᠢᠨᠠᠯᠵᠤ ᠪᠠᠶᠢᠭᠰᠠᠨ ᠶᠤᠮ᠃ ᠶᠠᠮᠠᠷ ᠰᠠᠶᠢᠨ ᠳᠤ ᠪᠠᠨ ᠯᠠ ᠲᠡᠷᠡᠪᠡᠷ 《ᠪᠢ ᠲᠠᠨᠢᠳᠠᠭ ᠮᠡᠳᠡᠳᠡᠭ ᠣᠯᠠᠨ ᠬᠥᠮᠦᠨ ᠢᠶᠡᠨ ᠠᠯᠳᠠᠵᠤ ᠪᠠᠶᠢᠭᠰᠠᠨ᠃ ᠭᠡᠲᠡᠯᠡ ᠭᠢᠲ᠋ᠠᠷ ᠢᠶᠠᠨ ᠠᠯᠳᠠᠬᠤ ᠨᠢ ᠳᠣᠲᠣᠨᠤ ᠬᠦᠮᠦᠰ ᠡᠴᠡ ᠪᠡᠨ ᠬᠠᠭᠠᠴᠠᠬᠤ ᠠᠴᠠ ᠴᠤ ᠬᠡᠴᠡᠭᠦᠦ ᠶᠤᠮ》 ᠭᠡᠵᠦ ᠬᠡᠯᠡᠵᠦ ᠪᠠᠶᠢᠭᠰᠠᠨ ᠤᠳᠠᠭᠠ ᠲᠠᠢ᠃ ᠬᠠᠷᠢᠨ ᠤᠷᠠᠯᠢᠭ ᠤᠨ ᠲᠩᠷᠢ ᠢᠪᠡᠭᠡᠭᠰᠡᠨ ᠴᠤ ᠶᠤᠮ ᠦᠦ᠂ ᠠᠵᠠ ᠭᠡᠭᠴᠢ ᠨᠢ ᠱᠣᠪᠣᠶᠢᠭᠰᠠᠨ ᠴᠤ ᠶᠤᠮ ᠦᠦ᠂ ᠲᠡᠭᠦᠨ ᠦ ᠠᠯᠳᠠᠭᠳᠠᠭᠰᠠᠨ ᠭᠢᠲ᠋ᠠᠷ ᠤᠳ ᠪᠤᠷᠬᠠᠨ ᠤ ᠠᠪᠤᠷᠠᠯ ᠢᠶᠠᠷ ᠬᠣᠵᠢᠮ ᠡᠷᠭᠢᠭᠡᠳ ᠣᠯᠳᠠᠭᠰᠠᠨ ᠪᠢᠯᠡ᠃
《ᠠᠷᠪᠠᠨ ᠬᠤᠷᠤᠭᠤ ᠮᠢᠨᠢ ᠮᠣᠶᠢᠨᠣᠭ ᠴᠤ ᠭᠡᠰᠡᠨ
ᠠᠮᠢᠳᠤᠷᠠᠯ ᠨᠠᠮᠠ ᠶᠢ ᠭᠢᠲ᠋ᠠᠷᠴᠢᠨ ᠪᠣᠯᠭᠠᠭᠰᠠᠨ
ᠳᠠᠭᠤᠯᠬᠤ ᠬᠣᠭᠣᠯᠠᠢ ᠮᠢᠨᠢ ᠰᠥᠭᠡᠩᠭᠢ ᠴᠤ ᠭᠡᠰᠡᠨ
ᠳᠤᠷᠠᠯᠠᠯ ᠨᠠᠮᠠ ᠶᠢ ᠳᠠᠭᠤᠴᠢᠨ ᠪᠣᠯᠭᠠᠭᠰᠠᠨ》 ᠭᠡᠬᠦ ᠦᠭᠡ ᠲᠡᠢ ᠳᠠᠯᠠᠭᠠᠳ ᠣᠨ ᠤ ᠨᠢᠭᠡᠨ ᠵᠣᠬᠢᠶᠠᠮᠠᠯ ᠳᠠᠭᠤᠤ᠂ ᠬᠠᠭᠤᠴᠢᠨ ᠭᠢᠲ᠋ᠠᠷ ᠤᠨ ᠨᠠᠮᠤᠭᠤᠬᠠᠨ ᠠᠶᠠᠰ ᠪᠠᠶᠢᠳᠠᠭ᠃ ᠡᠨᠡ ᠳᠠᠭᠤᠤ ᠶᠢ ᠣᠳᠬᠣᠨᠪᠠᠶᠠᠷ ᠶᠡᠬᠡ ᠲᠠᠭᠠᠰᠢᠶᠠᠳᠠᠭ ᠶᠤᠮ᠃ ᠲᠡᠭᠦᠨ ᠦ ᠴᠤᠭᠯᠠᠭᠤᠯᠭᠠᠨ ᠳᠤ ᠨᠡᠯᠢᠶᠡᠳ ᠬᠡᠳᠦᠨ ᠭᠢᠲ᠋ᠠᠷ ᠪᠤᠢ᠃ 2010 ᠣᠨ ᠳᠤ ᠨᠠᠮᠠ ᠶᠢ ᠭᠡᠷ ᠲᠦ ᠨᠢ ᠣᠴᠢᠬᠤ ᠳᠤ ᠣᠳᠬᠣᠨᠪᠠᠶᠠᠷ ᠬᠠᠨᠠᠨ ᠳᠤ ᠪᠠᠨ ᠡᠯᠭᠦᠭᠰᠡᠨ 《Asashoryu》 ᠬᠡᠮᠡᠬᠦ ᠳᠥᠷᠪᠡᠨ ᠤᠲᠠᠰᠤ ᠲᠠᠢ ᠠᠷᠭᠠ ᠦᠭᠡᠢ ᠯᠠ ᠨᠠᠨᠳᠢᠨ᠂ ᠴᠠᠮᠢᠩ ᠭᠢᠲ᠋ᠠᠷ ᠦᠵᠡᠭᠦᠯᠦᠭᠡᠳ 《ᠡᠭᠦᠨ ᠢ ᠨᠠᠳᠠ ᠳᠤ ᠳ᠋ᠠᠭᠪᠠ ᠠᠪᠤᠷᠭᠤ ᠪᠡᠯᠡᠭᠯᠡᠭᠰᠡᠨ ᠶᠤᠮ᠃ ᠡᠨᠡ ᠪᠣᠯ ᠶᠠᠫᠣᠨ ᠤ ᠬᠠᠮᠤᠭ ᠤᠨ ᠰᠠᠶᠢᠨ ᠭᠢᠲ᠋ᠠᠷ ᠦᠢᠯᠡᠳᠪᠦᠷᠢᠯᠡᠭᠴᠢ ᠺᠣᠮᠫᠠᠨᠢ ᠶᠢᠨ ᠭᠠᠭᠴᠠᠬᠠᠨ ᠰᠢᠷᠬᠡᠭ ᠦᠢᠯᠡᠳᠪᠦᠷᠢᠯᠡᠵᠦ ᠭᠠᠷᠭᠠᠭᠰᠠᠨ ᠭᠢᠲ᠋ᠠᠷ᠃ ᠶᠠᠫᠣᠨ ᠤ ᠨᠢᠭᠡ ᠠᠯᠳᠠᠷᠲᠠᠢ ᠬᠠᠮᠲᠤᠯᠢᠭ ᠶᠡᠬᠡ ᠠᠪᠤᠷᠭᠤ ᠳᠤ ᠪᠡᠯᠡᠭᠯᠡᠭᠰᠡᠨ ᠶᠤᠮ ᠪᠢᠯᠡ᠃ ᠲᠡᠷᠡ ᠨᠢ ᠵᠥᠪᠬᠡᠨ ᠥᠪᠡᠷ ᠲᠦ ᠨᠢ ᠵᠣᠷᠢᠭᠤᠯᠤᠭᠳᠠᠭᠰᠠᠨ 《Asashoryu》 ᠨᠡᠷᠡ ᠲᠡᠢ᠃ ᠳᠡᠯᠡᠬᠡᠢ ᠳᠦ ᠭᠠᠭᠴᠠᠬᠠᠨ ᠰᠢᠷᠬᠡᠭ ᠪᠠᠶᠢᠭᠠ ᠡᠨᠡ ᠭᠢᠲ᠋ᠠᠷ ᠢ ᠠᠪᠤᠷᠭᠤ ᠮᠠᠨᠢ ᠨᠠᠳᠠ ᠳᠤ ᠪᠡᠯᠡᠭᠯᠡᠭᠰᠡᠨ ᠶᠤᠮ》 ᠭᠡᠵᠦ ᠶᠡᠬᠡ ᠯᠠ ᠪᠠᠬᠠᠳᠤᠯ ᠲᠠᠢ ᠪᠠᠷ ᠦᠭᠦᠯᠡᠵᠦ ᠪᠠᠶᠢᠭᠰᠠᠨ ᠶᠤᠮ᠃
ᠬᠣᠶᠠᠷ ᠳᠠᠬᠢ ᠡᠬᠡᠨᠡᠷ ᠪᠣᠯᠤᠭᠰᠠᠨ ᠭᠢᠲ᠋ᠠᠷ ᠤᠳ ᠤᠨ ᠢᠶᠠᠨ ᠲᠤᠬᠠᠢ ᠣᠳᠬᠣᠨᠪᠠᠶᠠᠷ ᠥᠭᠦᠯᠡᠬᠦ ᠳᠦ ᠪᠡᠨ 《ᠪᠢ ᠭᠢᠲ᠋ᠠᠷ ᠲᠤ ᠮᠥᠩᠭᠥ ᠬᠠᠶᠢᠷᠠᠯᠠᠳᠠᠭ ᠦᠭᠡᠢ᠃ ᠠᠷᠠᠳ ᠲᠦᠮᠡᠨ ᠳᠦ ᠪᠡᠨ ᠰᠠᠶᠢᠨ ᠭᠢᠲ᠋ᠠᠷ ᠤᠨ ᠰᠠᠶᠢᠬᠠᠨ ᠠᠶᠠᠯᠭᠤ ᠰᠣᠨᠣᠰᠬᠠᠬᠤ ᠶᠢᠨ ᠲᠤᠯᠠᠳᠠ ᠲᠣᠭᠯᠠᠯᠲᠠ ᠶᠢᠨ ᠢᠶᠠᠨ ᠬᠠᠮᠤᠭ ᠯᠠ ᠮᠥᠩᠭᠥ ᠶᠢ ᠭᠢᠲ᠋ᠠᠷ ᠲᠤ ᠥᠭᠴᠦ ᠪᠠᠶᠢᠯᠠ᠃ ᠰᠠᠶᠢᠨ ᠵᠢᠮᠰᠡᠭ᠂ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠲᠠᠢ ᠪᠠᠶᠢᠵᠤ ᠯᠠ ᠪᠤᠰᠤᠳ ᠠᠴᠠ ᠢᠯᠡᠭᠦᠦ ᠭᠠᠷᠤᠨᠠ᠃ ᠨᠠᠳᠠ ᠳᠤ ᠮᠠᠰᠢᠨ ᠤ ᠦᠨᠡ ᠲᠡᠢ ᠭᠢᠲ᠋ᠠᠷ ᠴᠤ ᠪᠤᠢ᠃ ᠲᠡᠭᠡᠬᠦ ᠳᠦ ᠪᠡᠨ ᠦᠨᠡ ᠮᠥᠩᠭᠥᠨ ᠳᠦ ᠪᠡᠨ ᠪᠢᠰᠢ᠃ ᠬᠠᠮᠤᠭ ᠤᠨ ᠭᠣᠣᠯ ᠨᠢ ᠳᠤᠤᠭᠠᠷᠤᠯᠲᠠ᠂ ᠬᠢᠴᠡ᠂ ᠬᠡᠪ ᠮᠠᠶ᠋ᠢᠭ ᠨᠢ ᠴᠢᠬᠤᠯᠠ᠃ ᠪᠢᠳᠡ ᠤᠷᠠᠯᠢᠭ ᠤᠨ ᠲᠥᠯᠥᠭᠡ᠂ ᠬᠥᠭᠵᠢᠮ ᠦᠨ ᠲᠥᠯᠥᠭᠡ ᠵᠢᠳᠬᠦᠵᠦ᠂ ᠹᠸᠨ ᠨᠦᠭᠦᠳ ᠲᠡᠢ ᠪᠡᠨ ᠬᠠᠮᠲᠤ ᠳᠠᠭᠤᠯᠠᠨ ᠣᠮᠣᠭᠰᠢᠵᠤ᠂ ᠲᠡᠳᠡᠨ ᠡᠴᠡ ᠡᠷᠴᠢ ᠬᠦᠴᠦ ᠠᠪᠴᠤ ᠣᠨ ᠵᠢᠯ ᠦᠳ ᠢ ᠡᠯᠡᠭᠡᠵᠦ ᠶᠠᠪᠤᠭᠠ ᠬᠦᠮᠦᠰ᠃ ᠲᠡᠶᠢᠮᠦ ᠪᠣᠯᠬᠣᠷ ᠪᠢᠳᠡ ᠣᠯᠤᠭᠰᠠᠨ ᠮᠥᠩᠭᠥ ᠪᠡᠨ ᠪᠤᠴᠠᠭᠠᠭᠠᠳ ᠤᠷᠠᠨ ᠪᠦᠲᠦᠭᠡᠯ ᠳᠦ ᠪᠡᠨ ᠵᠠᠷᠤᠴᠠᠭᠤᠯᠳᠠᠭ᠃ ᠪᠢᠳᠡᠨ ᠳᠦ ᠲᠤᠰᠠᠯᠠᠵᠤ ᠳᠡᠮᠵᠢᠳᠡᠭ ᠬᠦᠮᠦᠨ ᠴᠤ ᠣᠯᠠᠨ ᠪᠠᠶᠢᠳᠠᠭ᠃ ᠲᠡᠶᠢᠮᠦ ᠡᠴᠡ ᠠᠶᠠᠨᠳᠠᠭᠠᠨ ᠤᠷᠮᠠ ᠵᠣᠷᠢᠭ ᠪᠤᠴᠠᠯᠤᠭᠠᠳ ᠢᠷᠡᠳᠡᠭ ᠶᠤᠮ᠃ ᠳᠡᠯᠡᠬᠡᠢ ᠳᠦ ᠶᠠᠮᠠᠷ ᠳᠠᠭᠤᠤ ᠨᠣᠶᠠᠯᠠᠵᠤ ᠪᠠᠶᠢᠨᠠ᠂ ᠳᠡᠯᠡᠬᠡᠢ ᠶᠢᠨ ᠤᠷᠠᠯᠢᠭ ᠤᠨ ᠪᠠᠶᠢᠳᠠᠯ ᠶᠠᠮᠠᠷ ᠪᠠᠶᠢᠨᠠ ᠪᠤᠢ ᠭᠡᠳᠡᠭ ᠢ ᠪᠠᠶᠢᠩᠭᠤ ᠰᠤᠳᠤᠯᠳᠠᠭ᠃ ᠨᠢᠭᠡ ᠶᠠᠩᠵᠤ ᠶᠢᠨ ᠤᠷᠠᠨ ᠪᠦᠲᠦᠭᠡᠯ ᠬᠢᠭᠡᠳ ᠪᠠᠶᠢᠪᠠᠯ ᠦᠵᠡᠭᠴᠢ᠂ ᠰᠣᠨᠣᠰᠤᠭᠴᠢᠳ ᠮᠠᠨᠢ ᠬᠥᠭᠵᠢᠬᠦ ᠦᠭᠡᠢ ᠰᠢᠦ ᠳ᠋ᠡ᠃ ᠪᠤᠰᠤᠳ ᠤᠨ ᠰᠡᠳᠬᠢᠯ ᠦᠨ ᠢᠯᠡᠷᠬᠡᠶᠢᠯᠡᠯ ᠢ ᠲᠣᠭᠯᠠᠵᠤ ᠪᠠᠶᠢᠭᠠ ᠴᠤ ᠥᠪᠡᠷ ᠦᠨ ᠥᠩᠭᠡ ᠠᠶᠠᠰ ᠢ ᠭᠠᠷᠭᠠᠵᠤ ᠴᠢᠳᠠᠳᠠᠭ ᠬᠦᠮᠦᠨ ᠪᠣᠯ ᠭᠢᠲ᠋ᠠᠷᠴᠢᠨ᠃ ᠭᠡᠬᠦ ᠳᠦ ᠪᠡᠨ ᠠᠯᠢᠪᠠ ᠰᠢᠨᠡ ᠭᠢᠲ᠋ᠠᠷ ᠠᠴᠠ ᠣᠳᠬᠣᠨᠪᠠᠶᠠᠷ ᠭᠡᠳᠡᠭ ᠥᠩᠭᠡ ᠶᠠᠭᠠᠬᠢᠭᠠᠳ ᠴᠤ ᠶᠤᠮ ᠪᠤᠢ ᠢᠯᠭᠠᠷᠴᠣ ᠳᠤᠤᠭᠠᠷᠳᠠᠭ ᠦᠭᠡᠢ ᠶᠤᠮ᠃ ᠬᠠᠷᠢᠨ ᠲᠡᠷᠡ ᠥᠩᠭᠡ ᠶᠢ ᠭᠠᠷᠭᠠᠬᠤ ᠶᠢᠨ ᠲᠤᠯᠠᠳᠠ ᠪᠢ ᠭᠢᠲ᠋ᠠᠷ ᠲᠠᠢ ᠪᠠᠨ ᠳᠣᠣᠷᠠ ᠬᠠᠶᠠᠵᠤ 10 ᠵᠢᠯ ᠨᠥᠬᠥᠷᠯᠡᠬᠦ ᠶᠣᠰᠣᠲᠠᠢ᠃ ᠡᠳᠦᠷ ᠪᠦᠷᠢ ᠲᠣᠭᠯᠠᠵᠤ᠂ ᠲᠡᠷᠡ ᠭᠢᠲ᠋ᠠᠷ ᠤᠨ ᠮᠣᠳᠣᠨ ᠳᠤ᠂ ᠤᠲᠠᠰᠤᠨ ᠳᠤ ᠮᠢᠨᠦ ᠵᠢᠷᠦᠬᠡ ᠰᠡᠳᠬᠢᠯ᠂ ᠰᠦᠨᠡᠰᠦ ᠰᠦᠯᠳᠡ ᠰᠢᠩᠭᠡᠭᠰᠡᠨ ᠪᠠᠶᠢᠬᠤ ᠤᠴᠢᠷᠲᠠᠢ᠃ ᠭᠢᠲ᠋ᠠᠷ ᠤᠳ ᠮᠠᠨᠢ ᠨᠠᠳᠠ ᠲᠠᠢ ᠣᠯᠠᠨ ᠵᠢᠯ ᠬᠠᠮᠲᠤ ᠪᠠᠶᠢᠵᠤ᠂ ᠨᠠᠮᠠ ᠶᠢ ᠪᠠᠶᠢᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠴᠤ ᠪᠠᠶᠢᠵᠤ ᠯᠠ ᠪᠠᠶᠢᠬᠤ ᠲᠡᠶᠢᠮᠦ ᠯᠠ ᠨᠠᠨᠳᠢᠨ ᠡᠳ᠋ ᠵᠦᠢᠯᠡᠰ ᠶᠤᠮ᠃ ᠭᠢᠲ᠋ᠠᠷ ᠪᠣᠯ ᠮᠢᠨᠦ ᠠᠮᠢᠨ ᠵᠢᠷᠦᠬᠡ︾ ᠭᠡᠵᠦ ᠬᠡᠯᠡᠭᠰᠡᠨ ᠶᠤᠮ᠃
ᠡᠨᠡ ᠰᠠᠶᠢᠬᠠᠨ ᠦᠭᠡᠨ ᠳᠦ ᠵᠣᠷᠢᠭᠤᠯᠵᠤ᠂ ᠪᠠᠰᠠ ᠣᠳᠬᠣᠨᠪᠠᠶᠠᠷ ᠲᠤ ᠵᠣᠷᠢᠭᠤᠯᠵᠤ ᠪᠢ ᠪᠡᠷ《ᠤᠶᠠᠩᠭᠠᠯᠠᠨ ᠳᠠᠭᠤᠯᠠᠭᠴᠢ ᠭᠢᠲ᠋ᠠᠷ ᠮᠢᠨᠢ》 ᠭᠡᠳᠡᠭ ᠰᠢᠯᠦᠭ ᠲᠡᠷᠯᠡᠭᠰᠡᠨ ᠶᠤᠮ᠃ ᠡᠭᠦᠨ ᠢ ᠪᠡᠨ ᠣᠳᠬᠣᠨᠪᠠᠶᠠᠷ ᠤᠨ ᠭᠠᠪᠢᠶᠠᠲᠤ ᠶᠢᠨ ᠨᠠᠶᠢᠷ ᠳᠡᠭᠡᠷᠡ ᠤᠩᠰᠢᠵᠤ᠂ ᠨᠢᠵᠢᠭᠢᠨᠡᠭᠰᠡᠨ ᠠᠯᠠᠭᠠ ᠲᠠᠰᠢᠯᠲᠠ ᠪᠠᠷ ᠱᠠᠩᠨᠠᠭᠤᠯᠵᠤ ᠶᠠᠪᠤᠯᠠ᠃
《ᠠᠶᠠ᠂ ᠮᠢᠨᠦ ᠤᠶᠠᠩᠭᠠᠯᠠᠨ ᠳᠠᠭᠤᠯᠠᠭᠴᠢ ᠭᠢᠲ᠋ᠠᠷ ᠮᠢᠨᠢ
ᠠᠵᠠ ᠵᠢᠷᠭᠠᠯ᠂ ᠪᠠᠶᠠᠷ ᠪᠠᠶᠠᠰᠤᠯ ᠤᠨ ᠭᠢᠯᠪᠠᠭᠠ ᠮᠢᠨᠢ
ᠡᠷᠡᠨ ᠦᠶᠡ ᠶᠢ ᠡᠵᠡᠩᠨᠡᠭᠰᠡᠨ ᠠᠶᠢᠵᠠᠮᠳᠤ ᠬᠡᠮᠨᠡᠯ ᠮᠢᠨᠢ
ᠡᠭᠡᠰᠢᠭ ᠳᠠᠭᠤᠤ ᠬᠠᠶᠢᠷᠠᠯᠠᠭᠰᠠᠨ ᠠᠶᠠᠯᠭᠤᠲᠤ ᠴᠢᠪᠬᠠᠳᠠᠰᠤ ᠮᠢᠨᠢ
ᠤᠷᠠᠯᠢᠭ ᠲᠤ ᠠᠩᠬᠠ ᠬᠥᠲᠥᠯᠦᠭᠰᠡᠨ ᠤᠶᠠᠩᠭᠠᠯᠠᠨ ᠳᠠᠭᠤᠯᠠᠭᠴᠢ ᠭᠢᠲ᠋ᠠᠷ ᠮᠢᠨᠢ
ᠤᠶᠠᠷᠠᠮᠠ ᠠᠶᠠᠯᠭᠤ ᠶᠢ ᠤᠷᠠᠯᠠᠵᠤ ᠥᠭᠭᠦᠭᠰᠡᠨ ᠰᠡᠳᠬᠢᠮᠵᠢ ᠮᠢᠨᠢ
ᠠᠯᠳᠠᠷᠠᠵᠤ ᠳᠣᠭᠳᠣᠯᠬᠤ ᠰᠡᠳᠬᠢᠯ ᠦᠨ ᠲᠣᠷᠭᠠᠨ ᠮᠡᠳᠡᠷᠡᠮᠵᠢ ᠮᠢᠨᠢ
ᠠᠮᠵᠢᠯᠲᠠ ᠪᠦᠲᠦᠭᠡᠯ ᠠᠪᠴᠢᠷᠠᠭᠰᠠᠨ ᠲᠣᠭᠠ ᠲᠠᠢ ᠳᠤᠷᠠᠰᠤᠮᠵᠢ ᠮᠢᠨᠢ
ᠠᠶᠠ᠂ ᠮᠢᠨᠦ ᠭᠢᠲ᠋ᠠᠷ ᠮᠢᠨᠢ᠂ ᠭᠢᠲ᠋ᠠᠷ ᠮᠢᠨᠢ
ᠠᠬᠤᠢ ᠰᠠᠨᠠᠭᠠ᠂ ᠠᠮᠢᠨ ᠵᠢᠷᠦᠬᠡᠨ ᠦ ᠴᠣᠮᠨᠠᠯ ᠮᠢᠨᠢ
ᠶᠢᠷᠲᠢᠨᠴᠦ ᠳ᠋ᠤ ᠣᠷᠣᠰᠢᠨ ᠪᠠᠶᠢᠬᠤ ᠶᠢᠨ ᠤᠳᠬᠠ ᠤᠴᠢᠷ ᠮᠢᠨᠢ
ᠢᠷᠦᠭᠡᠯ ᠢᠶᠡᠷ ᠤᠴᠠᠷᠠᠭᠰᠠᠨ ᠢᠷᠠᠭᠤ ᠡᠭᠡᠰᠢᠭᠯᠡᠩᠲᠦ ᠠᠯᠳᠠᠷᠠᠢ ᠮᠢᠨᠢ
ᠵᠦᠢᠷᠯᠡᠬᠦ ᠶᠢᠨ ᠠᠷᠭᠠ ᠦᠭᠡᠢ ᠤᠶᠠᠩᠭᠠᠯᠠᠨ ᠳᠠᠭᠤᠯᠠᠭᠴᠢ ᠭᠢᠲ᠋ᠠᠷ ᠮᠢᠨᠢ
ᠵᠥᠪᠬᠡᠨ ᠨᠠᠳᠠ ᠳᠤ ᠵᠠᠶᠠᠭᠠᠭᠰᠠᠨ ᠶᠤᠮ ᠰᠢᠭ ᠲᠠᠪᠢᠯᠠᠩ ᠮᠢᠨᠢ
ᠵᠡᠭᠦᠳᠦᠨ ᠦ ᠪᠢᠴᠢᠯᠭᠡ ᠶᠢ ᠵᠦᠭᠯᠡᠭᠦᠯᠵᠦ ᠥᠭᠭᠦᠭᠰᠡᠨ ᠵᠠᠷᠤᠯᠭᠠ ᠮᠢᠨᠢ
ᠵᠢᠷᠦᠬᠡᠨ ᠦ ᠬᠠᠶᠢᠷᠠ ᠲᠠᠢ ᠤᠴᠠᠷᠠᠭᠤᠯᠵᠤ ᠥᠭᠭᠦᠭᠰᠡᠨ ᠵᠠᠷᠤᠳᠠᠰᠤ ᠮᠢᠨᠢ
ᠨᠠᠰᠤᠨ ᠲᠤᠷᠰᠢᠳᠠ ᠤᠶᠠᠩᠭᠠᠯᠠᠨ ᠳᠠᠭᠤᠯᠠᠭᠴᠢ ᠭᠢᠲ᠋ᠠᠷ ᠮᠢᠨᠢ
ᠨᠠᠮᠠ ᠶᠢ ᠴᠢᠮᠡᠳᠡᠭ ᠮᠥᠩᠬᠡ ᠶᠢᠨ ᠴᠣᠭ ᠵᠢᠪᠬᠤᠯᠠᠩ ᠮᠢᠨᠢ
ᠨᠠᠵᠢᠳ᠂ ᠴᠡᠩᠭᠡᠯ ᠢ ᠬᠠᠮᠲᠤ ᠳᠤ ᠪᠠᠨ ᠲᠤᠭᠤᠯᠤᠭᠰᠠᠨ ᠢᠲᠡᠭᠡᠯ ᠮᠢᠨᠢ
ᠨᠠᠷᠠᠲᠤ ᠠᠴᠠ ᠬᠠᠯᠢᠭᠰᠠᠨ ᠴᠤ ᠡᠷᠭᠢᠨ ᠳᠠᠭᠤᠷᠢᠰᠬᠤ ᠤᠴᠠᠷᠠᠯ ᠮᠢᠨᠢ
ᠠᠶᠠ᠂ ᠮᠢᠨᠦ ᠭᠢᠲ᠋ᠠᠷ ᠮᠢᠨᠢ᠂ ᠭᠢᠲ᠋ᠠᠷ ᠮᠢᠨᠢ
ᠠᠬᠤᠢ ᠰᠠᠨᠠᠭᠠ᠂ ᠠᠮᠢᠨ ᠵᠢᠷᠦᠬᠡᠨ ᠦ ᠴᠣᠮᠨᠠᠯ ᠮᠢᠨᠢ
ᠶᠢᠷᠲᠢᠨᠴᠦ ᠳ᠋ᠤ ᠣᠷᠣᠰᠢᠨ ᠪᠠᠶᠢᠬᠤ ᠶᠢᠨ ᠤᠳᠬᠠ ᠤᠴᠢᠷ ᠮᠢᠨᠢ
ᠢᠷᠦᠭᠡᠯ ᠢᠶᠡᠷ ᠤᠴᠠᠷᠠᠭᠰᠠᠨ ᠢᠷᠠᠭᠤ ᠡᠭᠡᠰᠢᠭᠯᠡᠩᠲᠦ ᠠᠯᠳᠠᠷᠠᠢ ᠮᠢᠨᠢ》᠃
ᠳᠠᠰᠢᠷᠠᠮ ᠳᠤ ᠥᠭᠥᠯᠡᠬᠦ ᠳᠦ 《ᠬᠤᠷᠳᠤ》 ᠶᠢᠨ ᠬᠢᠨ ᠳᠠᠭᠤᠨ ᠤ ᠰᠢᠯᠦᠭ ᠲᠦ ᠰᠦᠷᠡᠬᠡᠢ ᠼᠧᠨᠽᠤᠷ ᠲᠠᠯᠪᠢᠳᠠᠭ ᠪᠥᠭᠡᠳ ᠶᠡᠷᠦ ᠨᠢ ᠰᠢᠯᠦᠭ ᠯᠠ ᠭᠣᠯᠣᠨᠠ ᠤᠤ ᠭᠡᠬᠦ ᠡᠴᠡ ᠪᠢᠰᠢ ᠵᠣᠬᠢᠶᠠᠭᠰᠠᠨ ᠡᠵᠡᠨ ᠢ ᠨᠢ ᠬᠡᠵᠢᠶᠡ ᠴᠤ ᠭᠣᠯᠣᠵᠤ ᠰᠢᠯᠢᠵᠥ ᠪᠠᠶᠢᠭᠰᠠᠨ ᠦᠭᠡᠢ᠃ ᠠᠳᠠᠭ ᠤᠨ ᠮᠠᠭᠤ ᠴᠢᠷᠠᠢ ᠵᠢᠰᠦ ᠮᠠᠭᠤ ᠲᠠᠢ ᠪᠢ ᠭᠡᠬᠦ ᠳᠦ ᠯᠠ 《ᠬᠤᠷᠳᠤ》 ᠍ ᠲᠠᠢ ᠬᠠᠮᠲᠤᠷᠠᠭᠠᠳ ᠬᠣᠷᠢ ᠣᠷᠴᠢᠮ ᠳᠠᠭᠤᠤ ᠬᠢᠴᠢᠬᠡᠭᠰᠡᠨ ᠪᠠᠶᠢᠬᠤ ᠪᠥᠭᠡᠳ ᠮᠢᠨᠦ ᠮᠠᠭᠤ ᠬᠡᠳᠦᠨ ᠰᠢᠯᠦᠭ ᠲᠡᠳᠡᠨ ᠦ ᠠᠶᠢᠬᠤᠪᠲᠤᠷ ᠼᠧᠨᠽᠤᠷ ᠢ ᠳᠠᠪᠠᠵᠤ ᠭᠠᠷᠤᠭᠰᠠᠨ ᠨᠢ ᠪᠠᠰᠠ ᠶᠠᠭᠠᠮᠠᠢ᠃
《ᠬᠤᠷᠳᠤ》 ᠬᠠᠮᠲᠤᠯᠢᠭ ᠤᠨ ᠠᠬᠠᠯᠠᠭᠴᠢ ᠳ ∙ ᠭᠠᠩᠪᠠᠶᠠᠷ ᠳᠠᠭᠤᠨ ᠤ ᠰᠢᠯᠦᠭ ᠦᠨ ᠲᠤᠬᠠᠢ ᠥᠭᠥᠯᠡᠬᠦ ᠳᠦ ᠪᠡᠨ 《ᠮᠠᠨ ᠤ ᠳᠠᠭᠤᠨ ᠤ ᠦᠭᠡᠨ ᠨᠦᠭᠦᠳ ᠢ ᠶᠡᠷᠦ ᠡᠴᠡ ᠪᠡᠨ ᠡᠩ ᠦᠨ ᠬᠦᠮᠦᠰ ᠯᠠ ᠭᠣᠣᠯᠴᠢᠯᠠᠨ ᠪᠢᠴᠢᠭᠰᠡᠨ ᠪᠠᠶᠢᠳᠠᠭ᠃ ᠲᠥᠷᠥ ᠶᠢᠨ ᠰᠣᠶᠣᠷᠬᠠᠯ ᠲᠠᠢ᠂ ᠨᠡᠷᠡ ᠳᠦ ᠭᠠᠷᠤᠭᠰᠠᠨ ᠢᠷᠠᠭᠤ ᠨᠠᠶᠢᠷᠠᠭᠴᠢᠳ ᠤᠨ ᠵᠣᠬᠢᠶᠠᠭᠰᠠᠨ ᠦᠭᠡ ᠮᠠᠨ ᠤ ᠳᠠᠭᠤᠨ ᠨᠤᠭᠤᠳ ᠲᠤ ᠪᠠᠷᠤᠭ ᠦᠭᠡᠢ᠃《ᠵᠢᠷᠤᠭ ᠰᠢᠭ ᠪᠦᠰᠡᠭᠦᠢ》 ᠳᠠᠭᠤᠨ ᠤ ᠰᠢᠯᠦᠭ ᠢ ᠭᠡᠬᠦ ᠳᠦ ᠯᠠ ᠨᠢᠭᠡ ᠵᠠᠯᠠᠭᠤ 1972 ᠣᠨ ᠳᠤ ᠮᠣᠰᠺᠸᠠ ᠳᠤ ᠣᠶᠤᠲᠠᠨ ᠪᠠᠶᠢᠬᠤ ᠳᠤ ᠪᠠᠨ ᠪᠢᠴᠢᠭᠰᠡᠨ ᠪᠠᠶᠢᠬᠤ ᠵᠢᠱᠢᠶᠡ ᠲᠡᠢ᠃ ᠡᠭᠦᠨ ᠢ ᠨᠢ ᠪᠢᠳᠡ ᠬᠣᠭ ᠤᠨ ᠰᠠᠪᠠ ᠳ᠋ᠤ ᠪᠠᠶᠢᠭᠰᠠᠨ ᠰᠣᠨᠢᠨ ᠤ ᠲᠠᠰᠤᠷᠬᠠᠢ ᠳᠡᠭᠡᠷᠡ ᠡᠴᠡ ᠣᠯᠵᠤ ᠪᠠᠶᠢᠯᠠ᠃ 《ᠴᠢᠮᠡᠭᠡ ᠦᠭᠡᠢ ᠢᠷᠡᠬᠦ ᠳᠤᠷᠠᠯᠠᠯ》 ᠳᠠᠭᠤᠨ ᠤ ᠰᠢᠯᠦᠭ ᠢ ᠠᠷᠪᠠᠨ ᠵᠢᠯ ᠦᠨ ᠬᠡᠦᠬᠡᠳ ᠦᠳ ᠦᠨ ᠳᠤᠷᠠᠰᠬᠠᠯ ᠤᠨ ᠳᠡᠪᠲᠡᠷ ᠳᠡᠭᠡᠷᠡ ᠡᠴᠡ ᠣᠯᠤᠭᠰᠠᠨ᠃ 《ᠪᠠᠬᠠᠷᠬᠠᠯ》 ᠳᠠᠭᠤᠨ ᠤ ᠰᠢᠯᠦᠭ ᠢ ᠠᠷᠪᠠᠳᠤᠭᠠᠷ ᠠᠩᠬᠢ ᠶᠢᠨ ᠥᠬᠢᠨ ᠪᠢᠴᠢᠭᠰᠡᠨ᠃ ᠮᠥᠨ 《ᠴᠡᠷᠢᠭ ᠦᠨ ᠪᠣᠳᠣᠯ》 ᠳᠠᠭᠤᠨ ᠤ ᠦᠭᠡ᠂ ᠠᠶᠠ ᠶᠢ ᠪᠢᠳᠡᠨ ᠦ ᠲᠣᠮᠣ ᠠᠬᠠ ᠪᠢᠴᠢᠭᠰᠡᠨ᠃ ᠡᠨᠡ ᠳᠠᠭᠤᠤ ᠪᠦᠷ ᠡᠩ ᠦᠨ᠃ ᠡᠩ ᠦᠨ᠂ ᠡᠩ ᠦᠨ ᠳᠦ ᠪᠡᠨ ᠮᠠᠰᠢ ᠡᠩ ᠦᠨ ᠳᠠᠭᠤᠤ᠃ ᠵᠦᠭᠡᠷ ᠯᠠ ᠨᠢᠭᠡ ᠡᠩ ᠦᠨ ᠴᠡᠷᠢᠭ ᠦᠨ ᠬᠤᠸᠠᠷᠠᠨ ᠳᠤ ᠪᠠᠨᠵᠠᠨ ᠭᠢᠲ᠋ᠠᠷ ᠳᠡᠭᠡᠷᠡ ᠵᠣᠬᠢᠶᠠᠭᠳᠠᠭᠰᠠᠨ ᠳᠠᠭᠤᠤ᠃ ᠡᠩ ᠦᠨ ᠬᠦᠮᠦᠰ ᠦᠨ ᠵᠣᠬᠢᠶᠠᠭᠰᠠᠨ ᠡᠩ ᠦᠨ ᠰᠠᠶᠢᠬᠠᠨ ᠰᠢᠯᠦᠭ ᠢᠶᠡᠷ ᠪᠦᠲᠦᠭᠰᠡᠨ ᠳᠠᠭᠤᠤ ᠬᠦᠮᠦᠨ ᠦ ᠵᠢᠷᠦᠬᠡ ᠰᠡᠳᠬᠢᠯ ᠳᠦ ᠬᠦᠷᠬᠦ ᠨᠢ ᠠᠮᠠᠷᠬᠠᠨ ᠪᠠᠶᠢᠳᠠᠭ᠃ ᠲᠡᠶᠢᠮᠦ ᠴᠤ ᠤᠴᠢᠷ ᠠᠴᠠ ︿ᠬᠤᠷᠳᠤ﹀ ᠶᠢᠨ ᠳᠠᠭᠤᠤ ᠨᠤᠭᠤᠳ ᠬᠢᠲ ᠪᠣᠯᠵᠤ ᠡᠳᠦᠢ ᠣᠯᠠᠨ ᠵᠢᠯ ᠣᠷᠣᠰᠢᠨ ᠲᠣᠭᠲᠠᠨᠢᠵᠤ ᠪᠠᠶᠢᠨᠠ᠃ ᠵᠠᠷᠢᠮ ᠳᠠᠭᠤᠤ ᠮᠠᠨᠢ ᠬᠠᠭᠤᠴᠢᠷᠠᠬᠤ ᠲᠤᠰᠤᠮ ᠢᠶᠠᠨ ᠳᠣᠮᠣᠭ ᠪᠣᠯᠵᠤ ᠪᠠᠶᠢᠨᠠ》 ᠭᠡᠰᠡᠨ ᠶᠤᠮ᠃
ᠦᠨᠡᠬᠡᠷ 《ᠴᠡᠷᠢᠭ ᠦᠨ ᠪᠣᠳᠣᠯ》 ᠳᠠᠭᠤᠤ ᠪᠣᠯ ᠬᠣᠷᠢᠨ ᠵᠢᠯ ᠦᠨ ᠲᠤᠷᠰᠢ ᠳᠣᠮᠣᠭ ᠪᠣᠯᠤᠯᠠ ᠰᠢᠦ ᠳ᠋ᠡ᠃ ᠡᠭᠦᠨ ᠦ ᠲᠣᠳᠣ ᠵᠢᠱᠢᠶᠡ ᠨᠢ ᠤᠭ ᠳᠠᠭᠤᠤ ᠶᠢ ᠰᠤᠨᠤᠰᠬᠤ ᠭᠡᠰᠡᠨ ᠦᠵᠡᠭᠴᠢ᠂ ᠰᠣᠨᠣᠰᠤᠭᠴᠢᠳ ᠤᠨ ᠬᠦᠰᠡᠯ ᠲᠡᠮᠡᠦᠯᠡᠯ ᠡᠴᠡ ᠰᠢᠭᠤᠳ ᠣᠶᠢᠯᠠᠭᠠᠭᠳᠠᠳᠠᠭ᠃ ᠣᠭᠲᠣ ᠬᠠᠭᠤᠴᠢᠷᠠᠳᠠᠭ ᠦᠭᠡᠢ᠂ ᠬᠥᠮᠥᠨ ᠦ ᠰᠡᠳᠬᠢᠯ ᠳᠦ ᠣᠯᠠᠨ ᠵᠢᠯ ᠤᠶᠠᠩᠭᠠᠯᠠᠵᠤ ᠪᠠᠶᠢᠳᠠᠭ ᠳᠠᠭᠤᠤ ᠭᠡᠵᠦ ᠪᠠᠰᠠ ᠪᠠᠶᠢᠬᠤ ᠶᠤᠮ᠃ ᠡᠨᠡ ᠴᠤ ᠤᠳᠬᠠ ᠪᠠᠷ ᠢᠶᠠᠨ 《ᠴᠡᠷᠢᠭ ᠦᠨ ᠪᠣᠳᠣᠯ》 ᠶᠡᠷᠡᠭᠡᠳ ᠣᠨ ᠠᠴᠠ ᠥᠨᠥ ᠶᠢ ᠬᠦᠷᠲᠡᠯᠡ ᠮᠠᠰᠢ ᠣᠯᠠᠨ ᠱᠠᠩᠨᠠᠯ ᠠᠪᠤᠭᠰᠠᠨ ᠪᠠᠶᠢᠳᠠᠭ᠃ ᠮᠠᠨ ᠤ ᠬᠠᠮᠲᠤᠯᠢᠭ᠂ ᠳᠠᠭᠤᠴᠢᠳ ᠠᠷᠠᠳᠴᠢᠯᠠᠯ ᠤᠨ ᠬᠣᠷᠢᠨ ᠵᠢᠯ ᠳᠦ ᠶᠠᠮᠠᠷᠪᠠ ᠨᠢᠭᠡᠨ ᠼᠧᠨᠽᠦᠷ ᠦᠭᠡᠢ ᠪᠡᠷ ᠴᠢᠯᠦᠭᠡᠲᠡᠢ ᠰᠡᠳᠬᠢᠵᠦ᠂ ᠣᠯᠠᠨ ᠠᠷᠪᠠᠨ ᠳᠠᠭᠤᠤ ᠤᠷᠠᠯᠠᠨ ᠪᠦᠲᠦᠭᠡᠭᠰᠡᠨ᠃ ᠲᠡᠭᠡᠯᠡ ᠴᠤ 《ᠴᠡᠷᠢᠭ ᠦᠨ ᠪᠣᠳᠣᠯ》 ᠍ ᠠᠴᠠ ᠳᠠᠪᠠᠵᠤ ᠭᠠᠷᠤᠭᠰᠠᠨ ᠳᠠᠭᠤᠤ ᠪᠠᠷᠤᠭ ᠦᠭᠡᠢ᠃ ᠦᠨᠡᠨ ᠳᠦ ᠪᠡᠨ ᠲᠡᠳᠡ ᠡᠩ ᠦᠨ ᠡᠴᠡ ᠡᠩ ᠦᠨ 《ᠴᠡᠷᠢᠭ ᠦᠨ ᠪᠣᠳᠣᠯ》 ᠳᠠᠭᠤᠨ ᠳᠤ ᠢᠯᠠᠭᠳᠠᠴᠢᠬᠠᠭᠰᠠᠨ᠃ ᠤᠷᠠᠯᠢᠭ ᠤᠨ ᠲᠤᠬᠠᠢ ᠶᠠᠷᠢᠬᠤ ᠳᠤ 《ᠠᠪᠢᠶᠠᠰ》 ᠭᠡᠳᠡᠭ ᠦᠭᠡ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠠᠮᠠᠨ ᠳᠡᠭᠡᠷᠡ ᠭᠠᠷᠤᠭᠠᠳ ᠢᠷᠡᠳᠡᠭ ᠶᠤᠮ᠃ ᠠᠪᠢᠶᠠᠰ ᠭᠡᠳᠡᠭ ᠨᠢ ᠠᠯᠢᠪᠠ ᠦᠢᠯᠡ ᠶᠢ ᠬᠢᠬᠦ ᠭᠠᠷᠮᠠᠭᠠᠢ ᠡᠪ ᠳᠦᠢ ᠪᠥᠭᠡᠳ ᠥᠭᠡᠷᠡ ᠪᠤᠰᠤᠳ ᠬᠦᠮᠦᠰ ᠦᠨ ᠪᠣᠳᠣᠵᠤ᠂ ᠰᠡᠳᠬᠢᠵᠦ᠂ ᠭᠦᠢᠴᠡᠳᠭᠡᠵᠦ ᠴᠢᠳᠠᠭᠠ ᠦᠭᠡᠢ᠂ ᠴᠤᠬᠤᠮ ᠬᠦ ᠲᠩᠷᠢ ᠡᠴᠡ ᠢᠯᠡᠭᠡᠭᠰᠡᠨ ᠭᠡᠮᠡᠷ ᠲᠡᠶᠢᠮᠦ ᠨᠢᠭᠡᠨ ᠤᠷᠠ ᠴᠢᠳᠠᠪᠤᠷᠢ ᠶᠤᠮ᠃ ᠠᠯᠳᠠᠷᠲᠤ 《ᠵᠠᠭᠤᠨ ᠵᠢᠯ ᠦᠨ ᠭᠠᠭᠴᠠᠭᠠᠷᠳᠠᠯ》 ᠷᠣᠮᠠᠨ ᠢᠶᠠᠨ ᠪᠢᠴᠢᠭᠡᠳ ᠨᠣᠪᠧᠯ ᠤᠨ ᠱᠠᠩᠨᠠᠯ ᠬᠦᠷᠲᠡᠭᠰᠡᠨ ᠺᠣᠯᠤᠮᠪᠤ ᠶᠢᠨ ᠶᠡᠬᠡ ᠪᠢᠴᠢᠭ ᠦᠨ ᠬᠦᠮᠦᠨ ᠭᠠᠪᠷᠢᠶᠡᠯ ᠭᠠᠷᠰᠧ ᠮᠠᠷᠺᠧᠰ ᠨᠢᠭᠡᠨᠲᠡ 《ᠡᠨᠡ ᠷᠣᠮᠠᠨ ᠢ ᠪᠢᠴᠢᠬᠦ ᠳᠦ ᠨᠠᠳᠠ ᠳᠤ ᠰᠢᠭᠤᠳ ᠲᠩᠷᠢ ᠡᠴᠡ ᠬᠡᠯᠡᠵᠦ ᠥᠭᠭᠦᠭᠡᠳ ᠪᠠᠶᠢᠬᠤ ᠰᠢᠭ ᠪᠠᠶᠢᠭᠰᠠᠨ》 ᠭᠡᠵᠦ ᠳᠤᠷᠠᠰᠤᠭᠰᠠᠨ ᠪᠠᠶᠢᠳᠠᠭ᠃ ᠡᠭᠦᠨ ᠯᠤᠭᠡ ᠡᠩ ᠦᠨ ᠰᠠᠶᠢᠬᠠᠨ ᠰᠢᠯᠦᠭ ᠪᠢᠴᠢᠭᠰᠡᠨ ᠵᠠᠷᠢᠮ ᠬᠥᠮᠦᠨ ᠳ᠋ᠤ ᠲᠩᠷᠢ ᠲᠤᠰᠠᠯᠠᠳᠠᠭ ᠪᠠᠶᠢᠵᠤ ᠮᠡᠳᠡᠬᠦ ᠶᠠᠭᠤᠮᠠ᠃
ᠡᠩ ᠦᠨ ᠬᠦᠮᠦᠨ ᠦ ᠵᠣᠬᠢᠶᠠᠭᠰᠠᠨ ᠡᠩ ᠦᠨ ᠰᠢᠯᠦᠭ ᠦᠨ ᠲᠤᠬᠠᠢ 《ᠬᠤᠷᠳᠤ》 ᠶᠢᠨ ᠣᠳᠬᠣᠨᠪᠠᠶᠠᠷ ᠥᠭᠦᠯᠡᠬᠦ ᠳᠦ ᠪᠡᠨ 《ᠪᠢ ᠡᠩ ᠦᠨ ᠬᠦᠮᠦᠰ ᠦᠨ ᠪᠢᠴᠢᠭᠰᠡᠨ ᠡᠩ ᠦᠨ ᠰᠠᠶᠢᠬᠠᠨ ᠰᠢᠯᠦᠭ ᠲᠦ ᠠᠶᠠ ᠬᠢᠬᠦ ᠳᠤᠷᠠᠲᠠᠢ᠃ ᠪᠢᠳᠡᠨ ᠦ 《ᠨᠢᠯᠪᠤᠰᠤ ᠪᠠᠨ ᠲᠡᠪᠴᠢᠶᠡ》 ᠭᠡᠳᠡᠭ ᠳᠠᠭᠤᠤ ᠪᠠᠶᠢᠳᠠᠭ᠃ ᠡᠨᠡ ᠳᠠᠭᠤᠨ ᠤ ᠦᠭᠡ ᠶᠢ ᠲᠤᠩ ᠰᠣᠨᠢᠷᠬᠠᠯᠲᠠᠢ ᠪᠠᠶᠢᠳᠠᠯ ᠢᠶᠠᠷ ᠣᠯᠵᠤ ᠠᠪᠴᠤ ᠪᠠᠶᠢᠭᠰᠠᠨ ᠶᠤᠮ᠃ ᠶᠠᠭᠠᠬᠢᠭᠠᠳ ᠰᠣᠨᠢᠷᠬᠠᠯᠲᠠᠢ ᠪᠤᠢ ᠭᠡᠬᠦ ᠪᠡᠷ ᠭᠤᠳᠤᠮᠵᠢᠨ ᠤ ᠬᠣᠭ ᠳᠡᠭᠡᠷᠡ ᠡᠴᠡ ᠣᠯᠤᠭᠰᠠᠨ᠃ ᠨᠢᠭᠡ ᠴᠠᠭᠠᠰᠤ ᠬᠡᠶᠢᠰᠴᠥ ᠪᠠᠶᠢᠯᠠ᠃ ᠲᠡᠷᠡ ᠦᠶᠡ ᠳᠦ ᠬᠡᠦᠬᠡᠳ ᠦᠳ ᠪᠡᠶᠡ ᠪᠡᠶᠡᠨ ᠦ ᠬᠢ ᠪᠡᠨ ᠡᠪᠦᠷ ᠦᠨ ᠳᠡᠪᠲᠡᠷ ᠳᠡᠭᠡᠷᠡ ᠵᠢᠷᠤᠭ ᠵᠢᠷᠤᠵᠤ᠂ ᠰᠢᠯᠦᠭ ᠪᠢᠴᠢᠭᠡᠳ ᠪᠡᠶᠡ ᠪᠡᠶᠡ ᠪᠠᠨ ᠳᠤᠷᠠᠰᠴᠤ ᠶᠠᠪᠤᠭᠠᠷᠠᠢ ᠭᠡᠵᠦ ᠢᠷᠦᠭᠡᠳᠡᠭ ᠪᠠᠶᠢᠯᠠ᠃ ᠢᠩᠭᠢᠵᠦ ᠬᠣᠭ ᠳᠣᠲᠣᠷᠠ ᠠᠴᠠ ᠬᠡᠶᠢᠰᠴᠥ ᠶᠠᠪᠤᠭᠰᠠᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠡᠴᠡ ᠣᠯᠳᠠᠭᠰᠠᠨ ᠰᠢᠯᠦᠭ ᠢᠶᠡᠷ 《ᠨᠢᠯᠪᠤᠰᠤ ᠪᠠᠨ ᠲᠡᠪᠴᠢᠶᠡ》 ᠳᠠᠭᠤᠤ ᠮᠠᠨᠢ ᠲᠦᠷᠦᠭᠰᠡᠨ ᠶᠤᠮ᠃ ᠡᠨᠡ ᠳᠠᠭᠤᠨ ᠤ ᠰᠢᠯᠦᠭ ᠢ ᠵᠣᠬᠢᠶᠠᠭᠰᠠᠨ ᠡᠵᠡᠨ ᠨᠢ ᠣᠯᠳᠠᠭᠠ ᠦᠭᠡᠢ᠃ ᠶᠡᠷᠦ ᠨᠢ ᠠᠯᠢᠪᠠ ᠨᠢᠭᠡᠨ ᠳᠠᠭᠤᠤ ᠶᠢ ᠪᠦᠲᠦᠭᠡᠬᠦ ᠳᠦ ᠶᠠᠭ ᠯᠠ ᠥᠪᠡᠷᠲᠡᠭᠡᠨ ᠲᠣᠬᠢᠶᠠᠯᠳᠤᠭᠰᠠᠨ ᠶᠤᠮ ᠰᠢᠭ ᠲᠥᠰᠦᠭᠡᠯᠡᠵᠦ᠂ ᠲᠡᠷᠡ ᠳᠦᠷᠢ ᠳᠦ ᠪᠡᠨ ᠬᠤᠪᠢᠷᠠᠵᠤ᠂ ᠶᠠᠭ ᠯᠠ ᠵᠦᠴᠦᠭᠡᠴᠢᠨ ᠬᠦᠮᠦᠨ ᠳᠦᠷᠢ ᠳᠦ ᠪᠡᠨ ᠣᠷᠣᠳᠠᠭ ᠰᠢᠭ ᠵᠣᠬᠢᠶᠠᠪᠠᠯ ᠢᠯᠡᠭᠦᠦ ᠶᠡᠬᠡ ᠮᠡᠳᠡᠷᠡᠮᠵᠢ ᠲᠡᠢ ᠪᠣᠯᠳᠠᠭ᠃ ᠡᠨᠡ ᠪᠣᠯ ᠮᠢᠨᠦ ᠠᠷᠭᠠᠴᠢᠯᠠᠯ》 ᠭᠡᠰᠡᠨ ᠪᠢᠯᠡ᠃
ᠶᠡᠷᠡᠭᠡᠳ ᠣᠨ ᠤ ᠦᠶᠡ ᠳᠦ 《ᠬᠤᠷᠳᠤ》 ᠬᠠᠮᠲᠤᠯᠢᠭ ᠤᠨ ᠦᠨᠡᠨ ᠦᠭᠡ ᠲᠡᠢ ᠡᠩ ᠦᠨ ᠰᠠᠶᠢᠬᠠᠨ ᠳᠠᠭᠤᠤ ᠨᠤᠭᠤᠳ ᠤᠨ ᠦᠭᠡ ᠰᠣᠨᠢᠨ᠂ ᠰᠡᠳᠬᠦᠯ ᠳᠡᠭᠡᠷᠡ ᠬᠡᠪᠯᠡᠭᠳᠡᠯᠡ ᠯᠠ ᠪᠣᠯ ᠲᠤᠬᠠᠢ ᠶᠢᠨ ᠰᠣᠨᠢᠨ᠂ ᠰᠡᠳᠬᠦᠯ ᠳᠡᠭᠡᠷᠡ ᠬᠠᠶᠢᠴᠢᠯᠠᠭᠰᠠᠨ ᠳᠥᠷᠪᠡᠯᠵᠢᠨ ᠨᠦᠬᠡ ᠦᠯᠡᠳᠡᠳᠡᠭ ᠪᠠᠶᠢᠯᠠ᠃ ᠤᠩᠰᠢᠭᠴᠢᠳ ᠳᠠᠭᠤᠨ ᠤ ᠦᠭᠡ ᠶᠢ ᠲᠤᠰ ᠲᠤ ᠨᠢ ᠠᠪᠴᠤ ᠬᠠᠳᠠᠭᠠᠯᠠᠵᠤ ᠪᠤᠢ ᠨᠢ ᠲᠡᠷᠡ᠃《ᠬᠤᠷᠳᠤ》 ᠶᠢᠨ ᠰᠢᠯᠢᠵᠥ ᠰᠣᠩᠭᠣᠵᠤ ᠳᠠᠭᠤᠤ ᠬᠢᠭᠰᠡᠨ ᠰᠢᠯᠦᠭ ᠨᠦᠭᠦᠳ ᠬᠥᠮᠥᠨ ᠦ ᠰᠡᠳᠬᠢᠯ ᠳᠦ ᠢᠩᠭᠢᠵᠦ ᠯᠠ ᠬᠦᠷᠳᠡᠭ ᠶᠤᠮ ᠳ᠋ᠠ᠃
ᠣᠳᠬᠣᠨᠪᠠᠶᠠᠷ ᠤᠨ ᠬᠤᠪᠢ ᠳᠤ ᠭᠡᠪᠡᠯ ᠳᠠᠭᠤᠨ ᠤ ᠰᠢᠯᠦᠭ ᠮᠠᠰᠢ ᠶᠡᠬᠡ ᠭᠣᠯᠣᠵᠤ ᠰᠢᠯᠢᠳᠡᠭ᠃ ᠶᠠᠮᠠᠷ ᠰᠠᠶᠢᠨ ᠳᠤ ᠪᠠᠨ ᠯᠠ ᠲᠡᠭᠦᠨ ᠳᠦ ᠳᠠᠭᠤᠤ ᠪᠣᠯᠵᠤ ᠮᠡᠨᠳᠦᠯᠡᠭᠡ ᠦᠭᠡᠢ ᠱᠤᠤᠳᠠᠢ ᠳᠦᠭᠦᠷᠡᠩ ᠰᠢᠯᠦᠭ ᠪᠤᠢ᠃ ᠡᠨᠡ ᠲᠤᠬᠠᠢ ᠲᠡᠭᠦᠨ ᠡᠴᠡ ᠠᠰᠠᠭᠤᠬᠤ ᠳᠤ 《ᠰᠢᠯᠦᠭ ᠭᠣᠯᠣᠨᠠ ᠭᠡᠳᠡᠭ ᠨᠢ ᠮᠢᠨᠦ ᠥᠪᠡᠷ ᠦᠨ ᠮᠡᠳᠡᠷᠡᠮᠵᠢ ᠶᠤᠮ ᠪᠣᠯᠪᠠ ᠤᠤ ᠳ᠋ᠠ᠃ ᠰᠢᠯᠦᠭ ᠪᠣᠯᠭᠠᠨ ᠳᠠᠭᠤᠤ ᠪᠣᠯᠳᠠᠭ ᠦᠭᠡᠢ᠃ ᠲᠡᠶᠢᠮᠦ ᠤᠴᠢᠷ ᠠᠴᠠ ᠪᠢ ᠳᠠᠭᠤᠨ ᠤ ᠰᠢᠯᠦᠭ ᠲᠤ ᠮᠠᠰᠢ ᠥᠨᠳᠥᠷ ᠼᠧᠨᠽᠤᠷ ᠲᠠᠯᠪᠢᠳᠠᠭ᠃ ᠶᠡᠬᠡ ᠰᠣᠨᠢᠨ ᠪᠠᠶᠢᠳᠠᠭ᠃ ᠲᠡᠷᠡ ᠮᠡᠳᠡᠷᠡᠮᠵᠢ ᠶᠢ ᠪᠢ ᠣᠳᠣ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠶᠢᠨᠠ᠃ ᠼᠧᠨᠽᠤᠷᠳᠠᠭᠰᠠᠨ ᠰᠢᠯᠦᠭ ᠮᠠᠨᠢ ᠠᠶᠠ ᠲᠠᠢ ᠪᠠᠨ ᠶᠠᠭ ᠯᠠ ᠲᠠᠭᠠᠷᠠᠳᠠᠭ ᠶᠤᠮ᠃ ᠠᠯᠢᠪᠠ ᠶᠠᠭᠤᠮᠠ ᠡᠪ ᠲᠤ ᠪᠡᠨ ᠣᠷᠣᠨᠠ ᠭᠡᠵᠦ ᠪᠠᠶᠢᠳᠠᠭ ᠳ᠋ᠠ᠃ ᠡᠪ ᠲᠤ ᠪᠡᠨ ᠣᠷᠣᠭᠠ ᠦᠭᠡᠢ ᠳᠠᠭᠤᠤ ᠨᠤᠭᠤᠳ ᠮᠣᠩᠭᠣᠯ ᠢᠶᠠᠷ ᠳᠦᠭᠦᠷᠡᠩ ᠪᠠᠶᠢᠨᠠ ᠰᠢᠦ ᠳ᠋ᠡ᠃ ᠳᠠᠭᠤᠨ ᠤ ᠡᠬᠢᠯᠡᠯ ᠨᠢ ᠶᠠᠮᠠᠷ ᠪᠠᠶᠢᠬᠤ ᠪᠤᠢ᠂ ᠥᠷᠨᠢᠯ ᠨᠢ ᠶᠠᠮᠠᠷ ᠪᠠᠶᠢᠬᠤ ᠪᠤᠢ᠂ ᠲᠡᠭᠦᠰᠬᠡᠯ ᠨᠢ ᠶᠠᠮᠠᠷ ᠪᠠᠶᠢᠬᠤ ᠪᠤᠢ᠂ ᠳᠠᠬᠢᠯᠲᠠ ᠨᠢ ᠶᠠᠮᠠᠷ ᠪᠠᠶᠢᠬᠤ ᠪᠤᠢ ᠭᠡᠳᠡᠭ ᠢ ᠮᠠᠨ ᠤ ᠵᠠᠷᠢᠮ ᠬᠠᠮᠲᠤᠯᠢᠭ᠂ ᠳᠠᠭᠤᠴᠢᠳ᠂ ᠠᠶᠠ ᠵᠣᠬᠢᠶᠠᠭᠴᠢ ᠨᠠᠷ ᠶᠡᠷᠦ ᠡᠴᠡ ᠪᠡᠨ ᠣᠶᠢᠯᠠᠭᠠᠬᠤ ᠦᠭᠡᠢ ᠪᠠᠶᠢᠨᠠ᠃ ᠶᠡᠷᠦ ᠨᠢ ᠠᠯᠢᠪᠠ ᠳᠠᠭᠤᠨ ᠤ ᠨᠢᠭᠡ ᠯᠠ ᠮᠥᠷ ᠪᠤᠰᠤᠳ ᠢ ᠪᠠᠨ ᠳᠠᠭᠠᠭᠤᠯᠳᠠᠭ᠃ ᠶᠠᠮᠠᠷ ᠴᠤ ᠳᠠᠭᠤᠤ ᠬᠦᠮᠦᠰ ᠦᠨ ᠲᠥᠪ ᠮᠡᠳᠡᠷᠡᠯ ᠦᠨ ᠰᠢᠰᠲ᠋ᠧᠮ ᠳᠦ ᠬᠦᠷᠴᠦ ᠲᠤᠰᠬᠤ ᠦᠭᠡ᠂ ᠠᠶᠠᠯᠭᠤ ᠲᠠᠢ ᠪᠠᠶᠢᠬᠤ ᠶᠣᠰᠣᠲᠠᠢ᠃ ᠵᠢᠱᠢᠶᠡ ᠨᠢ ᠣᠶᠢᠳᠣᠪ ᠠᠬᠠ ᠡ᠂ ᠲᠠ ᠪᠢᠳᠡ ᠬᠣᠶᠠᠷ ᠤᠨ ᠬᠢᠭᠰᠡᠨ 《ᠴᠣᠭᠯᠢᠭ ᠣᠶᠤᠲᠠᠨ》 ᠪᠠᠶᠢᠨᠠ᠃ ᠣᠶᠤᠲᠠᠨ ᠤ ᠲᠤᠬᠠᠢ ᠣᠯᠠᠨ ᠳᠠᠭᠤᠤ ᠪᠠᠶᠢᠳᠠᠭ᠃ ᠭᠡᠲᠡᠯᠡ 《ᠴᠣᠭᠯᠢᠭ ᠣᠶᠤᠲᠠᠨ》 ᠍ ᠢ ᠣᠶᠤᠲᠠᠨ ᠪᠣᠯᠭᠠᠨ ᠳᠠᠭᠤᠯᠠᠵᠤ ᠪᠠᠶᠢᠨᠠ ᠰᠢᠦ ᠳ᠋ᠡ᠃ ᠶᠡᠷᠦ ᠨᠢ ᠳᠠᠭᠤᠨ ᠤ ᠰᠢᠯᠦᠭ ᠭᠡᠳᠡᠭ ᠪᠣᠯ ᠥᠪᠡᠷ ᠢᠶᠡᠨ ᠰᠦᠨᠡᠰᠦ ᠲᠡᠢ᠂ ᠥᠪᠡᠷ ᠢᠶᠡᠨ ᠠᠶᠠᠯᠭᠤ ᠲᠠᠢ ᠪᠠᠶᠢᠳᠠᠭ᠃ ᠴᠤᠬᠤᠮ ᠲᠡᠷᠡ ᠰᠦᠨᠡᠰᠦ᠂ ᠲᠡᠷᠡ ᠠᠶᠠᠯᠭᠤ ᠶᠢ ᠨᠢ ᠣᠯᠵᠤ ᠬᠥᠭᠵᠢᠮ ᠢᠶᠡᠨ ᠵᠣᠬᠢᠶᠠᠵᠤ ᠴᠢᠳᠠᠪᠠᠯ ᠲᠡᠷᠡ ᠳᠠᠭᠤᠤ ᠠᠮᠢᠳᠤᠷᠠᠨᠠ᠃ ᠰᠦᠨᠡᠰᠦ ᠶᠢ ᠨᠢ ᠣᠯᠵᠤ ᠴᠢᠳᠠᠭᠠ ᠦᠭᠡᠢ ᠳᠠᠭᠤᠤ ᠨᠤᠭᠤᠳ ᠮᠠᠨ ᠤ ᠬᠠᠮᠲᠤᠯᠢᠭ᠂ ᠳᠠᠭᠤᠴᠢᠳ ᠲᠤ ᠮᠠᠰᠢ ᠶᠡᠬᠡ ᠪᠠᠶᠢᠳᠠᠭ᠃ ᠬᠦᠴᠥ ᠪᠡᠷ ᠪᠠᠬᠠᠨ ᠳᠠᠭᠤᠤ ᠵᠣᠬᠢᠶᠠᠳᠠᠭ᠃ ᠭᠠᠭᠴᠠ ᠪᠠᠳᠠᠭ ᠰᠢᠯᠦᠭ ᠪᠢᠴᠢᠴᠢᠬᠡᠭᠡᠳ ᠯᠠ ᠳᠠᠷᠠᠭᠠᠴᠢ ᠶᠢᠨ ᠪᠠᠳᠠᠭ ᠤᠳ ᠢ ᠨᠢ ᠰᠢᠭᠤᠳ ᠬᠦᠴᠦᠩᠳᠡᠭᠡᠳ ᠪᠠᠶᠢᠳᠠᠭ᠃ ᠳᠠᠭᠤᠨ ᠤ ᠰᠢᠯᠦᠭ ᠢ ᠶᠡᠷᠦ ᠡᠴᠡ ᠪᠡᠨ ᠠᠩᠬᠠᠷᠳᠠᠭ ᠦᠭᠡᠢ᠂ ᠣᠶᠢᠰᠢᠶᠠᠳᠠᠭ ᠦᠭᠡᠢ᠃ ᠢᠩᠭᠢᠵᠦ ᠪᠦᠲᠦᠭᠡᠯ ᠬᠢᠵᠦ ᠪᠣᠯᠬᠤ ᠦᠭᠡᠢ᠃ ᠰᠢᠯᠦᠭ ᠭᠡᠳᠡᠭ ᠪᠣᠯ ᠲᠤᠬᠠᠢ ᠶᠢᠨ ᠬᠠᠮᠲᠤᠯᠢᠭ᠂ ᠳᠠᠭᠤᠴᠢᠳ ᠢ ᠠᠪᠴᠤ ᠶᠠᠪᠤᠳᠠᠭ ᠨᠢᠭᠡ ᠲᠦᠯᠬᠢᠭᠦᠷ ᠶᠤᠮ ᠰᠢᠦ ᠳ᠋ᠡ᠃ ᠲᠡᠶᠢᠮᠦ ᠴᠤ ᠤᠴᠢᠷ ᠠᠴᠠ ᠣᠳᠣ ᠪᠢᠳᠡᠨ ᠦ ᠭᠠᠷᠬᠤ ᠭᠡᠵᠦ ᠪᠠᠶᠢᠭᠠ ᠠᠯᠢᠪᠦᠮ ᠳᠠᠭᠤᠨ ᠤ ᠰᠢᠯᠦᠭ ᠡᠴᠡ ᠪᠣᠯᠵᠤ ᠮᠠᠰᠢ ᠶᠡᠬᠡ ᠤᠳᠠᠵᠤ ᠪᠠᠶᠢᠨᠠ᠃ ᠨᠠᠳᠠ ᠳᠤ ᠳᠠᠭᠤᠤ ᠪᠣᠯᠵᠤ ᠮᠡᠨᠳᠦᠯᠡᠭᠡ ᠦᠭᠡᠢ ᠮᠠᠰᠢ ᠣᠯᠠᠨ ᠰᠢᠯᠦᠭ ᠪᠤᠢ᠃ ᠶᠡᠷᠦ ᠨᠢ ᠰᠢᠭᠤᠳᠠᠢ ᠳᠦᠭᠦᠷᠦᠨᠡ ᠰᠢᠦ᠃ ᠪᠢ ᠬᠠᠳᠠᠭᠠᠯᠠᠭᠠᠳ ᠯᠠ ᠪᠠᠶᠢᠳᠠᠭ ᠶᠤᠮ᠃ ᠠᠩᠬᠠ ᠵᠣᠬᠢᠶᠠᠭᠳᠠᠵᠤ ᠪᠠᠶᠢᠭᠰᠠᠨ ᠪᠦᠲᠦᠭᠡᠯ ᠦᠳ ᠦᠨ ᠨᠣᠣᠷᠠᠭ ᠤᠳ ᠬᠦᠷᠲᠡᠯᠡ ᠪᠤᠢ᠃ ᠮᠠᠭᠠᠳ ᠦᠭᠡᠢ ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ ᠱᠤᠤᠳᠠᠢ ᠳᠦᠭᠦᠷᠡᠩ ᠰᠢᠯᠦᠭ ᠢᠶᠡᠷ ᠢᠶᠡᠨ ᠮᠦᠽᠧᠢ ᠭᠠᠷᠭᠠᠵᠤ ᠪᠠᠰᠠ ᠪᠣᠯᠤᠨᠠ ᠰᠢᠦ ᠳ᠋ᠡ᠃ ᠬᠦᠮᠦᠰ ᠡᠩ ᠦᠨ ᠰᠠᠶᠢᠬᠠᠨ ᠰᠢᠯᠦᠭ ᠲᠡᠢ ᠳᠠᠭᠤᠤ ᠶᠢ ᠰᠣᠨᠣᠰᠤᠭᠠᠳ ᠤᠬᠠᠭᠠᠷᠠᠯ ᠠᠪᠳᠠᠭ᠃ ᠠᠮᠢᠳᠤᠷᠠᠯ ᠤᠷᠤᠭᠤ ᠤᠷᠮᠠ ᠵᠣᠷᠢᠭᠲᠠᠢ ᠲᠡᠮᠡᠦᠯᠳᠡᠭ᠃ ᠶᠡᠷᠦ ᠨᠢ ᠰᠡᠭᠦᠯ ᠦᠨ ᠦᠶᠡ ᠳᠦ ᠡᠩ ᠦᠨ ᠦᠭᠡ ᠲᠡᠢ ᠰᠠᠶᠢᠬᠠᠨ ᠰᠢᠯᠦᠭ ᠲᠥᠷᠥᠬᠦ ᠦᠭᠡᠢ ᠪᠠᠶᠢᠨᠠ᠃ ᠣᠯᠳᠠᠬᠤ ᠦᠭᠡᠢ ᠪᠠᠶᠢᠨᠠ᠃ ᠮᠢᠨᠦ ᠬᠤᠪᠢ ᠳᠤ ᠶᠡᠬᠡ ᠵᠣᠪᠠᠵᠤ ᠪᠠᠶᠢᠨᠠ》 ᠭᠡᠵᠦ ᠰᠠᠨᠠᠭᠠᠰᠢᠷᠠᠭᠰᠠᠨ ᠶᠤᠮ᠃
ᠣᠯᠢᠭᠲᠠᠢ ᠤᠷᠠᠨ ᠪᠦᠲᠦᠭᠡᠯ ᠬᠢᠬᠦ ᠦᠭᠡᠢ᠂ ᠴᠤᠬᠤᠮ ᠯᠠ ᠡᠮᠦᠨᠡᠬᠢ ᠳᠤᠷᠠᠰᠤᠮᠵᠢ ᠪᠠᠷ ᠢᠶᠠᠨ ᠠᠮᠢᠳᠤᠷᠠᠵᠤ ᠪᠠᠶᠢᠭᠠ ᠬᠠᠮᠲᠤᠯᠢᠭ᠂ ᠳᠠᠭᠤᠴᠢᠳ ᠣᠯᠠᠨ ᠪᠠᠶᠢᠨᠠ᠃ ᠵᠠᠷᠢᠮ ᠨᠢ ᠭᠠᠪᠢᠶᠠᠳᠤ ᠠᠪᠴᠢᠬᠠᠭᠠᠳ ᠲᠡᠭᠦᠨ ᠢ ᠪᠡᠨ ᠡᠴᠦᠰ ᠦᠨ ᠪᠠᠭᠤᠳᠠᠯ ᠭᠡᠵᠦ ᠣᠶᠢᠯᠠᠭᠠᠳᠠᠭ ᠴᠤ ᠶᠤᠮ ᠦᠦ ᠳᠡᠩᠳᠡᠭᠦᠦ ᠰᠠᠶᠢᠬᠠᠨ ᠲᠠᠶᠢᠪᠤᠰᠢᠷᠠᠯ ᠤᠨ ᠵᠠᠮ ᠳᠤ ᠣᠷᠣᠴᠢᠬᠠᠬᠤ ᠶᠤᠮ᠃ ᠡᠨᠡ ᠲᠤᠬᠠᠢ ᠣᠳᠬᠣᠨᠪᠠᠶᠠᠷ ᠠᠴᠠ ᠠᠰᠠᠭᠤᠬᠤ ᠳᠤ 《 ᠶᠠᠭᠤ ᠴᠤ ᠬᠢᠬᠦ ᠦᠭᠡᠢ᠃ ᠲᠡᠭᠡᠭᠡᠳ ᠠᠮᠢᠳᠤ ᠮᠥᠷᠲᠡᠯᠡ ᠦᠬᠦᠭᠰᠡᠨ ᠶᠤᠮ ᠰᠢᠭ ᠳᠤᠷᠠᠰᠤᠭᠳᠠᠵᠤ ᠯᠠ ᠠᠮᠢᠳᠤᠷᠠᠮᠠᠷ ᠦᠭᠡᠢ ᠪᠠᠶᠢᠨᠠ ᠰᠢᠦ᠃ ᠪᠢ ᠵᠢᠷᠠ᠂ ᠳᠠᠯᠠ ᠬᠦᠷᠦᠭᠰᠡᠨ ᠴᠤ ᠭᠢᠲ᠋ᠠᠷ ᠢᠶᠠᠨ ᠲᠣᠭᠯᠠᠭᠰᠠᠭᠠᠷ ᠯᠠ ᠪᠠᠶᠢᠬᠤ ᠪᠣᠯᠤᠨᠠ᠃ ᠠᠮᠢᠳᠤ ᠬᠥᠭᠵᠢᠮ ᠬᠡᠵᠢᠶᠡ ᠴᠤ ᠨᠠᠰᠤ ᠭᠣᠯᠣᠳᠠᠭ ᠦᠭᠡᠢ ᠶᠤᠮ》 ᠭᠡᠵᠦ ᠡᠷᠡᠰᠬᠡᠨ ᠬᠡᠯᠡᠵᠦ ᠪᠠᠶᠢᠨᠠ ᠯᠡ᠃
ᠲᠡᠷᠡᠪᠡᠷ ᠭᠠᠩᠪᠠᠶᠠᠷ ᠠᠬᠠ ᠰᠢᠭ ᠢᠶᠡᠨ ᠦᠶᠡ ᠦᠶᠡ ᠦᠨᠳᠦᠰᠦᠨ ᠦ ᠦᠵᠡᠯ ᠴᠤᠬᠤᠯᠵᠠᠭᠤᠯᠵᠤ᠂ ᠬᠠᠶᠠ ᠪᠠᠰᠠ ᠪᠣᠯᠵᠤ ᠪᠥᠲᠥᠬᠦ ᠦᠭᠡᠢ ᠬᠡᠨ ᠨᠢᠭᠡᠨ ᠢ ᠬᠠᠲᠠᠭᠤᠬᠠᠨ ᠰᠢᠭᠦᠮᠵᠢᠯᠡᠭᠡᠳ ᠠᠪᠳᠠᠭ ᠦᠨᠡᠨ ᠦᠭᠡ ᠲᠡᠢ ᠬᠦᠮᠦᠨ᠃ ᠲᠡᠭᠦᠨ ᠢ ᠪᠠᠰᠠ ᠪᠤᠰᠤᠳ ᠠᠴᠠ ᠢᠷᠡᠭᠰᠡᠨ ᠰᠢᠭᠦᠮᠵᠢ ᠬᠤᠷᠴᠠᠯᠠᠳᠠᠭ ᠭᠡᠨᠡ᠃ ᠵᠢᠱᠢᠶᠡ ᠨᠢ ᠲᠣᠯᠢᠨ ᠤ ᠡᠮᠦᠨᠡ ᠵᠣᠭᠰᠣᠭᠠᠳ 《ᠣᠳᠬᠣᠨᠪᠠᠶᠠᠷ ᠡ᠂ ᠨᠠᠶᠢᠵᠠ ᠡ᠂ ᠢᠩᠭᠢᠵᠦ ᠪᠣᠯᠬᠤ ᠦᠭᠡᠢ ᠰᠢᠦ》 ᠭᠡᠵᠦ ᠥᠪᠡᠷ ᠲᠡᠢ ᠪᠡᠨ ᠶᠠᠷᠢᠵᠤ᠂ ᠥᠪᠡᠷᠲᠡᠭᠡᠨ ᠲᠣᠳᠣᠷᠬᠠᠢ ᠡᠭᠦᠷᠭᠡ ᠳᠠᠭᠠᠭᠠᠯᠭᠠᠪᠤᠷᠢ ᠥᠭᠳᠡᠭ ᠭᠡᠵᠦ ᠪᠠᠶᠢᠭᠠ ᠶᠤᠮ᠃ ᠡᠨᠡ ᠶᠡᠷᠦ ᠨᠢ ᠥᠪᠡᠷ ᠢ ᠪᠡᠨ ᠬᠦᠮᠦᠵᠢᠭᠦᠯᠬᠦ ᠶᠡᠬᠡ ᠭᠣᠶᠣ ᠠᠷᠭᠠ ᠪᠠᠶᠢᠭᠠ ᠪᠢᠵᠡ᠃ ᠬᠠᠶᠠ ᠪᠠᠰᠠ ᠲᠣᠯᠢᠨ ᠳᠤ ᠬᠠᠷᠠᠭᠠᠳ ᠥᠪᠡᠷ ᠢ ᠪᠡᠨ ᠵᠠᠩᠨᠠᠴᠢᠬᠠᠵᠤ ᠪᠠᠶᠢᠮᠠᠷ ᠶᠠᠭᠤᠮᠠ ᠪᠠᠶᠢᠨᠠ ᠰᠢᠦ᠃ ᠬᠠᠷᠢᠨ ᠥᠪᠡᠷ ᠢ ᠪᠡᠨ ᠵᠣᠳᠣᠵᠤ ᠪᠣᠯᠬᠤ ᠦᠭᠡᠢ᠃ ᠲᠡᠭᠡᠪᠡᠯ ᠨᠢᠳᠦ ᠴᠢᠨᠢ ᠬᠠᠪᠤᠳᠤᠨᠠ᠃ ᠵᠣᠳᠣᠨᠠ ᠭᠡᠰᠡᠨ ᠡᠴᠡ 《ᠬᠤᠷᠳᠤ》 ᠶᠢᠨ ᠵᠠᠯᠠᠭᠤᠰ ᠭᠠᠩᠪᠠᠶᠠᠷ ᠠᠬᠠ ᠶᠢᠨ ᠢᠶᠠᠨ ᠦᠭᠡᠨ ᠡᠴᠡ ᠣᠭᠲᠣᠬᠠᠨ ᠴᠤ ᠭᠠᠵᠢᠳᠠᠭ ᠦᠭᠡᠢ᠂ ᠡᠨᠡ ᠬᠢᠷᠢ ᠪᠡᠷ ᠢᠶᠡᠨ ᠪᠤᠷᠤᠭᠤ ᠦᠢᠯᠡᠳᠦᠯ᠂ ᠬᠣᠣᠷᠲᠤ ᠵᠤᠷᠰᠢᠯ ᠠᠴᠠ ᠢᠮᠠᠭᠲᠠ ᠬᠣᠯᠠ ᠶᠠᠪᠤᠳᠠᠭ ᠶᠤᠮ ᠪᠠᠶᠢᠨᠠ᠃ ᠶᠡᠷᠦ ᠨᠢ ᠮᠠᠨ ᠤ ᠬᠠᠮᠲᠤᠯᠢᠭ᠂ ᠳᠠᠭᠤᠴᠢᠳ ᠠᠴᠠ ᠬᠠᠮᠤᠭ ᠤᠨ ᠶᠣᠰᠣ ᠵᠦᠢ ᠶᠢᠨ ᠬᠦᠮᠦᠵᠢᠯᠲᠡᠢ᠂ ᠵᠠᠬᠢᠷᠬᠤ᠂ ᠵᠠᠬᠢᠷᠤᠭᠳᠠᠬᠤ ᠶᠣᠰᠣ ᠵᠢᠷᠤᠮ ᠲᠠᠢ ᠬᠠᠮᠲᠤᠯᠢᠭ ᠪᠣᠯ 《ᠬᠤᠷᠳᠤ》 ᠶᠤᠮ ᠪᠠᠶᠢᠨᠠ ᠰᠢᠦ᠃ ᠡᠶᠢᠮᠦ ᠰᠠᠶᠢᠬᠠᠨ ᠶᠣᠰᠣ ᠵᠦᠢ ᠶᠢᠨ ᠬᠦᠮᠦᠵᠢᠯᠲᠡᠢ ᠪᠣᠯᠬᠣᠷ 《ᠬᠤᠷᠳᠤ》 ᠶᠢᠨ ᠬᠢᠨ ᠭᠠᠳᠠᠭᠤᠷ ᠳᠣᠲᠣᠭᠤᠷ ᠡᠯᠳᠡᠪ ᠶᠠᠭᠤᠮᠠᠨ ᠳᠤ ᠣᠷᠢᠶᠠᠴᠠᠯᠳᠤᠭᠠᠳ᠂ ᠪᠣᠯᠤᠭᠰᠠᠨ ᠪᠣᠯᠤᠭᠠ ᠦᠭᠡᠢ ᠰᠢᠭᠦᠮᠵᠢᠯᠡᠯ ᠳᠦ ᠥᠷᠲᠥᠭᠡᠳ ᠪᠠᠶᠢᠳᠠᠭ ᠦᠭᠡᠢ ᠰᠠᠶᠢᠨ ᠲᠠᠯᠠ ᠲᠠᠢ᠃
ᠣᠳᠬᠣᠨᠪᠠᠶᠠᠷ ᠲᠤ ᠪᠠᠰᠠ ᠨᠢᠭᠡ ᠭᠣᠴᠣ ᠭᠣᠶᠢᠳᠠ ᠴᠢᠨᠠᠷ ᠪᠤᠢ᠃ ᠲᠡᠷᠡ ᠨᠢ ᠶᠠᠭᠤ ᠭᠡᠪᠡᠯ ᠠᠯᠢᠪᠠ ᠳᠠᠭᠤᠨ ᠳᠤ ᠠᠶᠠᠯᠭᠤ ᠬᠢᠬᠦ ᠳᠦ ᠪᠡᠨ ᠳᠣᠲᠣᠷᠠ ᠪᠠᠨ ᠮᠠᠰᠢ ᠶᠡᠬᠡ ᠪᠡᠷ ᠪᠢᠰᠢᠯᠭᠠᠳᠠᠭ ᠲᠤ ᠣᠷᠣᠰᠢᠨᠠ᠃《ᠡᠨᠡ ᠳᠠᠭᠤᠤ ᠡᠨᠡ ᠳᠠᠭᠤᠴᠢᠨ ᠳᠤ ᠲᠠᠭᠠᠷᠠᠨᠠ᠂ ᠡᠨᠡ ᠳᠠᠭᠤᠨ ᠤ ᠡᠨᠡ ᠬᠡᠰᠡᠭ ᠢ ᠠᠷᠠᠳ ᠲᠦᠮᠡᠨ᠂ ᠵᠠᠯᠠᠭᠤᠴᠤᠳ ᠳᠠᠭᠠᠵᠤ ᠳᠠᠭᠤᠯᠠᠬᠤ ᠪᠠᠶᠢᠬᠤ》 ᠭᠡᠬᠦ ᠮᠡᠲᠦ ᠪᠡᠷ ᠪᠦᠭᠦᠳᠡ ᠶᠢ ᠲᠤᠩᠭᠠᠨ ᠪᠣᠳᠣᠵᠤ ᠪᠠᠶᠢᠵᠤ ᠠᠶᠠᠯᠭᠤ ᠵᠣᠬᠢᠶᠠᠳᠠᠭ ᠪᠥᠭᠡᠳ ᠤᠬᠠᠭᠠᠨ ᠳᠤ ᠪᠠᠨ ᠳᠠᠭᠤᠴᠢᠨ ᠰᠠᠷᠠᠨᠲᠤᠶᠠᠭᠠ ᠶᠢᠨ ᠳᠠᠭᠤᠯᠠᠭᠰᠠᠨ 《ᠴᠢ ᠮᠢᠨᠦᠬᠢ》 ᠭᠡᠬᠦ ᠳᠠᠭᠤᠨ ᠤ ᠵᠥᠪᠬᠡᠨ 《ᠴᠢ ᠮᠢᠨᠦᠬᠢ》 ᠭᠡᠬᠦ ᠳᠠᠬᠢᠯᠲᠠ ᠶᠢᠨ ᠬᠡᠰᠡᠭ ᠢ ᠳᠠᠭᠠᠵᠤ ᠳᠠᠭᠤᠯᠠᠬᠤ ᠵᠢᠱᠢᠶᠡ ᠲᠡᠢ᠃ ᠡᠨᠡᠬᠦ ᠪᠢᠰᠢᠯᠭᠠᠯ ᠨᠢ ᠶᠠᠭ ᠯᠠ ᠨᠢᠳᠦ ᠪᠡᠨ ᠣᠯᠤᠭᠰᠠᠨ ᠪᠠᠶᠢᠬᠤ ᠪᠥᠭᠡᠳ ᠣᠯᠠᠨ ᠲᠠᠯᠠ ᠠᠴᠠ ᠨᠢ ᠪᠢᠰᠢᠯᠭᠠᠵᠤ ᠪᠢᠴᠢᠭᠰᠡᠨ ᠲᠡᠭᠦᠨ ᠦ ᠳᠠᠭᠤᠤ ᠨᠤᠭᠤᠳ ᠬᠢᠲ ᠪᠣᠯᠤᠭᠠᠳ ᠪᠠᠶᠢᠳᠠᠭ ᠤᠨ ᠨᠢᠭᠤᠴᠠ ᠨᠢ ᠡᠨᠡ ᠪᠣᠯᠪᠠ ᠤᠤ᠃ ᠲᠡᠶᠢᠮᠦ ᠳᠦ ᠪᠡᠨ ᠴᠤ 《ᠬᠤᠷᠳᠤ》 ᠬᠠᠮᠲᠤᠯᠢᠭ ᠤᠨ ᠤᠶᠠᠩᠭᠠ ᠶᠢᠨ ᠳᠠᠭᠤᠤ ᠨᠤᠭᠤᠳ ᠢ ᠮᠡᠳᠡᠬᠦ ᠦᠭᠡᠢ᠂ ᠰᠣᠨᠣᠰᠤᠭᠠ ᠦᠭᠡᠢ᠂ ᠳᠠᠭᠠᠵᠤ ᠠᠶᠠᠯᠠᠳᠠᠭ ᠦᠭᠡᠢ ᠮᠣᠩᠭᠣᠯ ᠬᠦᠮᠦᠨ ᠭᠡᠵᠦ ᠦᠭᠡᠢ᠃《ᠬᠤᠷᠳᠤ》 ᠬᠡᠳᠦᠢ ᠪᠡᠷ ᠷᠣᠺ ᠬᠠᠮᠲᠤᠯᠢᠭ ᠴᠤ ᠭᠡᠯᠡ ᠣᠳᠬᠣᠨᠪᠠᠶᠠᠷ ᠤᠨ ᠵᠣᠬᠢᠶᠠᠭᠰᠠᠨ ᠤᠶᠠᠩᠭᠠ ᠶᠢᠨ ᠰᠠᠶᠢᠬᠠᠨ ᠳᠠᠭᠤᠤ ᠨᠤᠭᠤᠳ 《ᠬᠤᠷᠳᠤ》 ᠶᠢ ᠍ᠢᠮᠠᠭᠲᠠ ᠴᠢᠮᠡᠵᠦ᠂ ᠢᠯᠡᠭᠦᠦ ᠠᠯᠳᠠᠷᠲᠠᠢ ᠪᠣᠯᠭᠠᠭᠰᠠᠨ ᠪᠢᠯᠡ᠃ ᠤᠷᠠᠯᠢᠭ᠂ ᠲᠡᠷᠡ ᠳᠤᠮᠳᠠ ᠪᠠᠨ ᠳᠠᠭᠤᠨ ᠤ ᠤᠷᠠᠯᠢᠭ ᠪᠣᠯ ᠨᠢᠳᠦᠨ ᠳᠦ ᠦᠯᠦ ᠦᠵᠡᠭᠳᠡᠭᠴᠢ᠂ ᠵᠥᠪᠬᠡᠨ ᠮᠡᠳᠡᠷᠡᠮᠵᠢ᠂ ᠪᠢᠰᠢᠯᠭᠠᠯ ᠵᠡᠷᠭᠡ ᠳᠦ ᠯᠠ ᠪᠠᠷᠢᠭᠳᠠᠬᠤ ᠨᠢᠭᠤᠴᠠᠬᠠᠨ ᠡᠷᠴᠢᠮ ᠬᠦᠴᠦ ᠶᠢ ᠠᠭᠤᠯᠳᠠᠭ ᠲᠤ ᠣᠷᠣᠰᠢᠨᠠ᠃ ᠬᠡᠨ ᠪᠦᠬᠦᠨ ᠢ ᠡᠵᠡᠮᠳᠡᠳᠡᠭ ᠲᠡᠷᠡ ᠤᠷᠠᠯᠢᠭ ᠬᠡᠮᠡᠬᠦ ᠵᠢᠷ ᠦᠨ ᠪᠤᠰᠤ ᠦᠵᠡᠭᠳᠡᠯ᠂ ᠥᠪᠡᠷᠮᠢᠴᠡ ᠢᠳᠢ ᠰᠢᠳᠢ ᠶᠢ ᠵᠥᠪᠬᠡᠨ ᠣᠨᠴᠠᠭᠠᠢ ᠴᠢᠳᠠᠪᠤᠷᠢ ᠯᠠ ᠪᠤᠢ ᠪᠣᠯᠭᠠᠵᠤ ᠴᠢᠳᠠᠬᠤ ᠪᠥᠭᠡᠳ ᠬᠠᠷᠠᠮᠰᠠᠯᠲᠠᠢ ᠨᠢ ᠲᠡᠷᠡ ᠣᠨᠴᠠᠭᠠᠢ ᠴᠢᠳᠠᠪᠤᠷᠢ ᠨᠢ ᠴᠥᠭᠡᠬᠡᠨ ᠬᠥᠮᠦᠨ ᠳ᠋ᠤ ᠵᠠᠶᠠᠭᠠᠭᠳᠠᠭᠰᠠᠨ ᠪᠠᠶᠢᠳᠠᠭ᠃ ᠡᠭᠦᠨ ᠢ ᠠᠪᠢᠶᠠᠰ ᠭᠡᠳᠡᠭ ᠶᠤᠮ᠃
ᠨᠢᠭᠡᠨ ᠵᠦᠢᠯ ᠢ ᠣᠨᠴᠠᠯᠠᠵᠤ ᠬᠡᠯᠡᠬᠦ ᠳᠦ ᠮᠣᠩᠭᠣᠯ ᠤᠯᠤᠰ ᠲᠤ ᠨᠢᠭᠡᠨ ᠭᠡᠷ ᠪᠦᠯᠢ ᠡᠴᠡ ᠭᠤᠷᠪᠠᠨ ᠭᠠᠪᠢᠶᠠᠳᠤ ᠲᠦᠷᠦᠭᠰᠡᠨ ᠲᠣᠬᠢᠶᠠᠯᠳᠤᠯ ᠪᠠᠷᠤᠭ ᠦᠭᠡᠢ᠃ ᠬᠠᠷᠢᠨ ᠨᠠᠮᠰᠠᠷᠠᠶᠢᠵᠠᠪ ᠠᠭᠰᠠᠨ᠂ ᠴᠣᠭᠵᠢᠯᠮᠠ ᠭᠤᠸᠠᠢ᠂ ᠡᠨᠡ ᠬᠣᠶᠠᠷ ᠤᠨ ᠬᠡᠦᠬᠡᠳ ᠵᠦᠴᠦᠭᠡᠴᠢᠨ ᠰᠤᠪᠤᠳ ᠨᠠᠷ ᠭᠤᠷᠪᠠᠭᠤᠯᠠ ᠪᠠᠨ ᠲᠥᠷᠥ ᠶᠢᠨ ᠰᠣᠶᠣᠷᠬᠠᠯ ᠬᠦᠷᠲᠡᠭᠰᠡᠨ ᠶᠠᠪᠤᠳᠠᠯ ᠪᠤᠢ᠃ ᠮᠣᠩᠭᠣᠯ ᠤᠨ ᠲᠡᠮᠦᠷ ᠵᠠᠮ ᠳᠤ ᠨᠠᠰᠤ ᠪᠠᠷ ᠢᠶᠠᠨ ᠠᠵᠢᠯᠯᠠᠭᠰᠠᠨ ᠵᠢᠷ ᠦᠨ ᠨᠢᠭᠡᠨ ᠠᠷᠠᠳ ᠳᠠᠮᠪᠠ ᠭᠡᠳᠡᠭ ᠠᠶᠢᠯ ᠠᠴᠠ ᠭᠠᠩᠪᠠᠶᠠᠷ᠂ ᠣᠳᠬᠣᠨᠪᠠᠶᠠᠷ᠂ ᠲᠡᠮᠦᠷᠰᠦ᠋ᠬᠡ ᠭᠡᠳᠡᠭ ᠭᠤᠷᠪᠠᠨ ᠭᠠᠪᠢᠶᠠᠳᠤ ᠲᠥᠷᠦᠵᠥ ᠭᠠᠷᠤᠭᠰᠠᠨ ᠨᠢ ᠮᠣᠩᠭᠣᠯ ᠳᠤ ᠪᠣᠯ ᠷᠧᠺᠣᠷᠳ᠋ ᠠᠮᠵᠢᠯᠲᠠᠨ ᠳᠤ ᠲᠣᠭᠠᠴᠠᠭᠳᠠᠨᠠ᠃《ᠬᠤᠷᠳᠤ》 ᠶᠢᠨ ᠬᠢᠨ ᠳᠤ ᠵᠣᠷᠢᠭᠤᠯᠵᠤ ᠪᠢ ᠡᠶᠢᠮᠦ ᠰᠢᠯᠦᠭ ᠪᠢᠴᠢᠵᠦ ᠪᠠᠶᠢᠯᠠ᠃ ᠡᠭᠦᠨ ᠢ ᠪᠡᠨ ᠭᠠᠩᠪᠠᠶᠠᠷ ᠤᠨ ᠭᠠᠪᠢᠶᠠᠲᠤ ᠶᠢᠨ ᠨᠠᠶᠢᠷ ᠳᠡᠭᠡᠷᠡ ᠤᠩᠰᠢᠭᠰᠠᠨ᠃ ᠣᠯᠠᠨ ᠬᠦᠮᠦᠨ ᠨᠢᠵᠢᠭᠢᠨᠡᠲᠡᠯᠡ ᠠᠯᠠᠭᠠ ᠲᠠᠰᠢᠭᠰᠠᠨ᠃ ᠲᠡᠷᠡ ᠪᠣᠯ 《ᠬᠤᠷᠳᠤ》 ᠭᠡᠳᠡᠭ ᠰᠢᠯᠦᠭ᠃
ᠡᠭᠡᠯ ᠦᠭᠡᠢ ᠭᠠᠶᠢᠬᠠᠮᠰᠢᠭ ᠢ ᠪᠦᠲᠦᠭᠡᠬᠦ ᠪᠡᠷ ᠡᠪᠯᠡᠯᠳᠦᠨ ᠨᠢᠭᠡᠳᠦᠭᠰᠡᠨ ᠮᠡᠳᠡᠷᠡᠮᠵᠢ
ᠡᠯᠴᠢᠯ ᠦᠭᠡᠢ ᠲᠠᠯᠠ ᠶᠢᠨ ᠬᠥᠷᠦᠰᠥᠡ ᠳᠡᠭᠡᠷᠡ ᠡᠭᠡᠰᠢᠭ ᠰᠠᠳᠠᠷᠠᠭᠤᠯᠤᠭᠰᠠᠨ ᠶᠢᠷᠲᠢᠨᠴᠦ
ᠶᠡᠷᠡᠭᠡᠳ ᠣᠨ ᠤ ᠧᠰᠲᠷᠠᠳ᠋ ᠤᠷᠠᠯᠢᠭ ᠤᠨ ᠶᠡᠬᠡ ᠲᠡᠰᠦᠷᠡᠯᠲᠡ
ᠡᠬᠡ ᠣᠷᠣᠨ᠂ ᠠᠪᠤ ᠡᠵᠢ᠂ ᠠᠮᠠᠷᠠᠭ ᠬᠠᠶᠢᠷᠠ ᠶᠢᠨ ᠳᠠᠭᠤᠯᠠᠯ
ᠴᠢᠯᠡᠭᠡᠳᠡᠭᠦᠦ ᠨᠡᠶᠢᠭᠡᠮ ᠢ ᠴᠣᠴᠢᠷᠠᠭᠠᠭᠰᠠᠨ ᠴᠢᠪᠬᠠᠳᠠᠰᠤᠲᠤ ᠭᠢᠲ᠋ᠠᠷ ᠤᠨ ᠴᠡᠴᠡᠷᠡᠭᠡ
ᠴᠢᠩᠬᠦ ᠬᠦᠰᠡᠯ ᠢ ᠪᠠᠳᠠᠷᠠᠭᠠᠭᠰᠠᠨ ᠴᠡᠪᠡᠷ ᠤᠶᠠᠩᠭᠠ ᠶᠢᠨ ᠷᠣᠺ
ᠰᠡᠴᠡᠨ ᠪᠢᠯᠢᠭᠲᠦ ᠲᠦᠮᠡᠨ ᠦ ᠴᠡᠭᠡᠵᠢᠨ ᠳᠦ ᠡᠭᠡᠰᠢᠭᠯᠡᠭᠰᠡᠨ ᠠᠶᠠᠯᠭᠤ
ᠴᠢᠬᠢᠨ ᠦ ᠴᠢᠮᠡᠭ ᠪᠣᠯᠤᠭᠰᠠᠨ ᠵᠢᠩᠬᠢᠨᠢ ᠮᠣᠩᠭᠣᠯ ᠬᠠᠮᠲᠤᠯᠢᠭ
ᠠᠶᠠ᠂ ᠡᠨᠡ ᠪᠣᠯ 《ᠬᠤᠷᠳᠤ》
ᠠᠬᠠᠨ ᠳᠡᠭᠦᠰ ᠦᠨ ᠠᠰᠬᠠᠷᠠᠭᠰᠠᠨ ᠶᠡᠬᠡ ᠠᠪᠢᠶᠠᠰ
ᠮᠥᠩᠬᠡ ᠲᠩᠷᠢ ᠡᠴᠡ ᠪᠢᠳᠡᠨ ᠳᠦ ᠢᠯᠡᠭᠡᠭᠰᠡᠨ ᠤᠳᠬᠠ ᠤᠶᠠᠩᠭᠠ ᠶᠢᠨ ᠵᠠᠷᠤᠳᠠᠰᠤ
ᠮᠥᠩᠬᠡᠳᠡ ᠳᠠᠭᠤᠷᠢᠰᠤᠭᠳᠠᠬᠤ ᠮᠣᠩᠭᠣᠯ ᠲᠦᠮᠡᠨ ᠦ ᠭᠠᠶᠢᠬᠠᠮᠰᠢᠭᠲᠤ 《ᠬᠤᠷᠳᠤ》
ᠬᠡᠷᠡᠭ ᠵᠣᠷᠢᠭ᠂ ᠬᠡᠯᠪᠡᠷᠢ ᠠᠭᠤᠯᠭᠠ᠂ ᠬᠡᠮᠨᠡᠯᠳᠦ ᠶᠢᠷᠲᠢᠨᠴᠦ ᠶᠢᠨ ᠵᠣᠬᠢᠴᠠᠯ
ᠬᠡᠰᠡᠭ ᠠᠪᠢᠶᠠᠰ ᠢ ᠭᠠᠩᠨᠠᠵᠤ ᠵᠠᠩᠭᠢᠳᠤᠭᠰᠠᠨ ᠭᠠᠩᠪᠠᠶᠠᠷ ᠤᠨ ᠶᠡᠬᠡ ᠲᠡᠮᠡᠦᠯᠡᠯ
ᠬᠡᠪᠢ ᠮᠧᠲ᠋ᠠᠯ᠂ ᠺᠯᠠᠰᠰᠢᠺ ᠷᠣᠺ ᠤᠨ ᠴᠣᠭᠴᠠ ᠠᠶᠠᠯᠭᠤᠨ ᠳᠤᠮᠳᠠ ᠠᠴᠠ
ᠬᠡᠭᠡᠨᠴᠢᠷᠯᠡᠨ ᠤᠶᠠᠩᠭᠠᠯᠠᠬᠤ ᠴᠣᠭ ᠤᠨ ᠴᠡᠭᠡᠯ ᠬᠣᠭᠣᠯᠠᠢ
ᠣᠯᠠᠨ ᠴᠠᠭ ᠲᠠᠰᠤᠷᠠᠯᠲᠠ ᠦᠭᠡᠢ ᠫᠢᠵᠢᠩᠨᠡᠬᠦ ᠠᠮᠢᠳᠤ ᠠᠴᠠ ᠠᠮᠢᠳᠤ ᠲᠣᠭᠯᠠᠯᠲᠠ
ᠣᠷᠣᠶᠢᠯᠠᠨ ᠲᠣᠭᠯᠠᠭᠴᠢ ᠨᠠᠶᠠ ᠶᠢᠨ ᠠᠷᠭᠢᠯ ᠭᠢᠲ᠋ᠠᠷ ᠤᠨ ᠲᠥᠪᠡᠷᠭᠡᠨ
ᠣᠷᠭᠢᠯᠣᠭᠰᠠᠨ ᠰᠡᠳᠬᠢᠯ ᠦᠨ ᠤᠲᠠᠰᠤ ᠶᠢ ᠷᠣᠺ ᠢᠶᠠᠷ ᠬᠥᠨᠳᠡᠨ ᠵᠤᠭᠠᠴᠠᠭᠴᠢ
ᠣᠳᠬᠣᠨᠪᠠᠶᠠᠷ ᠤᠨ ᠰᠦᠨ ᠥᠩᠭᠡ ᠪᠡᠷ ᠰᠣᠯᠣᠩᠭᠠᠷᠠᠬᠤ ᠰᠣᠯᠢ ᠭᠢᠲ᠋ᠠᠷ ᠤᠨ ᠴᠢᠬᠢᠷᠠᠭᠠᠨ
ᠣᠮᠣᠭᠰᠢᠯ᠂ ᠡᠷᠡᠮᠰᠢᠯ᠂ ᠲᠠᠴᠢᠭᠢᠨᠠᠭᠰᠠᠨ ᠬᠤᠷᠳᠤ᠂ ᠨᠢᠵᠢᠭᠢᠨᠡᠭᠰᠡᠨ ᠠᠯᠠᠭᠠ ᠲᠠᠰᠢᠯᠲᠠ
ᠣᠴᠢ ᠮᠡᠲᠦ ᠴᠠᠬᠢᠯᠤᠨ ᠪᠥᠮᠪᠥᠷᠳᠡᠭᠴᠢ ᠣᠳᠬᠣᠨᠪᠠᠭᠠᠲᠤᠷ ᠤᠨ ᠨᠦᠷᠭᠢᠯᠡᠭᠡᠨ
ᠣᠷᠢᠯᠠᠭᠠᠨ᠂ ᠴᠢᠷᠠᠯᠠᠭᠠᠨ᠂ ᠢᠰᠬᠡᠷᠦᠭᠡᠨ
ᠣᠮᠤᠭᠯᠠᠩ ᠹᠧᠨ ᠨᠦᠭᠦᠳ ᠦᠨ ᠬᠠᠰᠬᠢᠷᠤᠭᠠᠨ
ᠠᠶᠠ᠂ ᠡᠨᠡ ᠪᠣᠯ 《ᠬᠤᠷᠳᠤ》
ᠠᠬᠠᠨ ᠳᠡᠭᠥᠦᠰ ᠦᠨ ᠠᠭᠠᠭᠢᠯᠠᠭᠰᠠᠨ ᠶᠡᠬᠡ ᠠᠪᠢᠶᠠᠰ᠂ ᠠᠰᠬᠠᠷᠠᠭᠰᠠᠨ ᠶᠡᠬᠡ ᠬᠥᠯᠥᠰᠥ
ᠮᠥᠩᠬᠡ ᠲᠩᠷᠢ ᠡᠴᠡ ᠪᠢᠳᠡᠨ ᠳᠦ ᠢᠯᠡᠭᠡᠭᠰᠡᠨ ᠤᠳᠬᠠ ᠤᠶᠠᠩᠭᠠ ᠶᠢᠨ ᠵᠠᠷᠤᠳᠠᠰᠤ
ᠮᠥᠩᠬᠡᠳᠡ ᠳᠠᠭᠤᠷᠢᠰᠤᠭᠳᠠᠬᠤ ᠮᠣᠩᠭᠣᠯ ᠲᠦᠮᠡᠨ ᠦ ᠭᠠᠶᠢᠬᠠᠮᠰᠢᠭᠲᠤ 《ᠬᠤᠷᠳᠤ》
ᠳᠠᠰᠢᠷᠠᠮ ᠳᠤ ᠥᠭᠥᠯᠡᠬᠦ ᠳᠦ 2014 ᠣᠨ ᠳᠤ 《ᠬᠤᠷᠳᠤ》 ᠬᠠᠮᠲᠤᠯᠢᠭ 20 ᠵᠢᠯ ᠦᠨ ᠢᠶᠡᠨ ᠣᠢ ᠶᠢ ᠲᠡᠮᠳᠡᠭᠯᠡᠵᠦ᠂ ᠠᠮᠧᠷᠢᠺᠠ ᠳᠤ ᠠᠯᠲᠠᠨ ᠫᠢᠨᠽᠠ ᠬᠢᠯᠭᠡᠭᠰᠡᠨ ᠨᠢ ᠮᠣᠩᠭᠣᠯ ᠳᠤ ᠪᠣᠯ ᠠᠩᠬᠠᠳᠠᠭᠴᠢ ᠨᠢ ᠪᠣᠯᠵᠤ ᠪᠠᠶᠢᠯᠠ᠃ ᠮᠥᠨ ᠡᠨᠡ ᠣᠢ ᠶᠢᠨ ᠬᠦᠷᠢᠶᠡᠨ ᠳᠦ 20 ᠵᠢᠯ ᠦᠨ ᠲᠡᠦᠬᠡᠨ ᠨᠣᠮ ᠪᠦᠲᠦᠭᠡᠪᠡ᠃ ᠡᠨᠡ ᠬᠦ ᠨᠣᠮ ᠢ ᠪᠢᠴᠢᠬᠦ ᠶᠢ 《ᠬᠤᠷᠳᠤ》 ᠍ ᠤᠨ ᠬᠢᠨ ᠨᠠᠳᠠ ᠳᠤ ᠳᠠᠭᠠᠭᠠᠯᠭᠠᠭᠰᠠᠨ ᠨᠢ ᠨᠡᠷᠡ ᠲᠥᠷᠥ ᠶᠢᠨ ᠬᠡᠷᠡᠭ ᠪᠠᠶᠢᠯᠠ᠃ ᠬᠣᠷᠢᠨ ᠵᠢᠯ ᠣᠷᠣᠰᠢᠨ ᠲᠣᠭᠲᠠᠨᠢᠭᠰᠠᠨ ᠠᠯᠳᠠᠷᠲᠠᠢ ᠬᠠᠮᠲᠤᠯᠢᠭ 《ᠬᠤᠷᠳᠤ》 ᠠᠷᠪᠢᠨ ᠶᠡᠬᠡ ᠲᠡᠦᠬᠡ ᠲᠡᠢ᠂ ᠠᠳᠠᠯ ᠶᠠᠪᠤᠳᠠᠯ ᠶᠡᠬᠡ ᠲᠡᠢ᠂ ᠠᠯᠳᠠᠷ ᠤᠨ ᠵᠠᠮ ᠣᠯᠠᠨ ᠲᠠᠢ ᠪᠠᠶᠢᠭᠰᠠᠨ ᠪᠣᠯᠬᠣᠷ ᠪᠢᠴᠢᠬᠦ ᠳᠦ ᠬᠦᠷᠲᠡᠯᠡ ᠤᠷᠮᠠ ᠲᠠᠢ ᠪᠠᠶᠢᠯᠠ᠂ ᠪᠡᠯᠡᠨ ᠵᠡᠯᠡᠨ ᠦᠭᠡ ᠲᠡᠢ ᠪᠠᠶᠢᠯᠠ᠂ ᠪᠢᠯᠢᠭ ᠲᠠᠩᠬᠠᠢ ᠣᠩᠭᠣᠳ ᠲᠠᠢ ᠴᠤ ᠪᠠᠶᠢᠯᠠ᠃ ᠭᠡᠬᠦ ᠳᠦ ᠪᠡᠨ ᠪᠢ 《ᠬᠤᠷᠳᠤ》 ᠬᠠᠮᠲᠤᠯᠢᠭ ᠤᠨ ᠬᠣᠷᠢᠨ ᠵᠢᠯ ᠦᠨ ᠵᠤᠵᠠᠭᠠᠨ ᠲᠡᠦᠬᠡ ᠶᠢᠨ ᠬᠣᠷᠢᠬᠠᠨ ᠬᠤᠪᠢ ᠪᠤᠶᠤ ᠥᠩᠭᠡᠴᠡᠬᠡᠨ ᠬᠡᠰᠡᠭ ᠢ ᠯᠠ ᠱᠦᠭᠦᠷᠳᠡᠭᠰᠡᠨ᠃ ᠤᠴᠢᠷ ᠨᠢ ᠣᠳᠬᠣᠨᠪᠠᠶᠠᠷ᠄ 《ᠪᠢᠳᠡ ᠶᠠᠮᠠᠷ ᠲᠠᠷᠬᠠᠵᠤ ᠪᠤᠲᠠᠷᠠᠭᠠᠳ᠂ ᠰᠥᠨᠥᠵᠦ ᠮᠥᠬᠦᠴᠢᠬᠡᠭᠰᠡᠨ ᠬᠠᠮᠲᠤᠯᠢᠭ ᠪᠢᠰᠢ᠃ ᠬᠣᠵᠢᠮ ᠪᠠᠰᠠ ᠶᠠᠷᠢᠬᠤ ᠶᠠᠭᠤᠮᠠ ᠲᠠᠢ᠂ ᠶᠠᠷᠢᠭᠠᠳ ᠪᠢᠴᠢᠬᠦ ᠶᠠᠭᠤᠮᠠ ᠲᠠᠢ᠂ ᠪᠢᠴᠢᠭᠡᠳ ᠳᠤᠷᠠᠰᠬᠤ ᠶᠠᠭᠤᠮᠠ ᠲᠠᠢ ᠪᠠᠶᠢᠬᠤ ᠶᠢᠨ ᠲᠤᠯᠠᠳᠠ ᠡᠮᠦᠨᠡᠬᠢ ᠵᠠᠷᠢᠮ ᠲᠡᠦᠬᠡ ᠪᠡᠨ ᠦᠭᠦᠴᠡᠨ ᠳᠦ ᠨᠢ ᠦᠯᠡᠳᠡᠭᠡᠬᠦ ᠨᠢ ᠴᠢᠬᠤᠯᠠ》 ᠭᠡᠵᠦ ᠬᠡᠯᠡᠭᠰᠡᠨ᠃ ᠲᠡᠶᠢᠮᠦ ᠡᠴᠡ ᠪᠢ 《ᠬᠤᠷᠳᠤ》 ᠍ ᠍ ᠶᠢᠨ ᠬᠢᠨ ᠢ ᠨᠢᠭᠡ ᠶᠡᠬᠡ ᠣᠯᠠᠨ ᠬᠣᠨᠣᠭ ᠠᠰᠠᠭᠤᠵᠤ ᠰᠢᠯᠭᠠᠭᠠᠵᠤ ᠵᠣᠪᠠᠭᠠᠭᠠ ᠦᠭᠡᠢ᠃《ᠪᠢᠳᠡ ᠮᠣᠩᠭᠣᠯ ᠤᠨ ᠳᠣᠮᠣᠭ ᠪᠣᠯᠤᠭᠰᠠᠨ ᠴᠠᠭ ᠲᠤ ᠪᠠᠨ ᠯᠠ ᠲᠠᠶᠢᠰᠠᠨ ᠠᠴᠠ ᠪᠠᠭᠤᠨᠠ᠃ ᠲᠡᠷᠡᠨ ᠡᠴᠡ ᠨᠠᠰᠢ ᠪᠠᠭᠤᠬᠤ ᠦᠭᠡᠢ᠃ ᠵᠠᠭᠤᠨ ᠵᠠᠭᠤᠨ ᠵᠢᠯ ᠳᠠᠭᠤᠷᠢᠰᠤᠭᠳᠠᠬᠤ ᠤᠷᠠᠨ ᠪᠦᠲᠦᠭᠡᠯ ᠢᠶᠡᠨ ᠬᠢᠭᠰᠡᠭᠡᠷ ᠯᠠ ᠪᠠᠶᠢᠬᠤ ᠪᠣᠯᠤᠨᠠ》 ᠭᠡᠵᠦ ᠣᠳᠬᠣᠨᠪᠠᠶᠠᠷ ᠪᠠᠰᠠ ᠬᠡᠯᠡᠵᠦ ᠪᠠᠶᠢᠯᠠ᠃ ᠮᠢᠨᠦ ᠪᠣᠳᠣᠯ ᠢᠶᠠᠷ 《ᠬᠤᠷᠳᠤ》 ᠬᠠᠮᠲᠤᠯᠢᠭ ᠠᠯᠢ ᠬᠡᠳᠦᠶᠢᠨ ᠮᠣᠩᠭᠣᠯ ᠤᠨ ᠠᠮᠢᠳᠤ ᠳᠣᠮᠣᠭ ᠪᠣᠯᠴᠢᠬᠠᠭᠰᠠᠨ᠃ ᠡᠨᠡᠬᠦ ᠠᠮᠢᠳᠤ ᠳᠣᠮᠣᠭ ᠴᠢᠨᠠᠭᠰᠢᠳᠠ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠬᠣᠷᠢ᠂ ᠭᠤᠴᠢ᠂ ᠮᠠᠭᠠᠳ ᠦᠭᠡᠢ ᠳᠥᠴᠢ᠂ ᠲᠠᠪᠢᠨ ᠵᠢᠯ ᠲᠠᠶᠢᠰᠠᠨ ᠳᠡᠭᠡᠷᠡ ᠠᠮᠢᠳᠤ ᠲᠣᠭᠯᠠᠯᠲᠠ ᠬᠢᠭᠰᠡᠭᠡᠷ ᠯᠠ ᠪᠠᠶᠢᠬᠤ ᠪᠤᠢ ᠵᠠ᠃ ᠲᠡᠷᠡ ᠴᠠᠭ ᠲᠤ ᠵᠠᠭᠤᠨ ᠵᠠᠭᠤᠨ ᠵᠢᠯ ᠳᠠᠭᠤᠷᠢᠰᠤᠭᠳᠠᠬᠤ ᠰᠠᠶ᠋ᠢᠬᠠᠨ ᠠᠶᠠᠯᠭᠤ ᠮᠢᠩᠭᠠᠨᠲᠠ ᠤᠷᠤᠰᠬᠤ ᠪᠣᠯᠤᠨᠠ᠃ ᠡᠷᠬᠢᠮ ᠬᠥᠮᠥᠨ ᠲᠠ ᠰᠤᠨᠤᠰᠬᠤ ᠯᠠ ᠪᠣᠯᠤᠨᠠ᠃
ᠲᠡᠷᠡ ᠲᠡᠨᠳᠡ ᠨᠢᠭᠡᠨ ᠰᠠᠶᠢᠬᠠᠨ ᠳᠠᠭᠤᠤ ᠡᠭᠡᠰᠢᠭᠯᠡᠨᠡ᠃ ᠲᠠ ᠰᠣᠨᠣᠰᠤᠭᠠᠷᠠᠢ᠃ ᠲᠡᠷᠡ ᠲᠠᠨ ᠤ ᠳᠤᠷᠠᠲᠠᠢ ᠳᠠᠭᠤᠤ ᠪᠠᠶᠢᠬᠤ ᠪᠣᠯᠤᠨᠠ᠃ ᠬᠠᠪᠤᠷ ᠤᠨ ᠦᠳᠡᠰᠢ ᠡᠵᠡᠨ ᠦᠭᠡᠢ ᠴᠡᠴᠡᠷᠯᠢᠭ ᠦᠨ ᠬᠣᠭᠣᠰᠣᠨ ᠰᠠᠨᠳᠠᠯᠢ ᠲᠠᠨ ᠢ ᠬᠦᠯᠢᠶᠡᠵᠦ ᠪᠠᠶᠢᠭᠠ᠃ ᠲᠠ ᠲᠡᠨᠳᠡ ᠰᠠᠭᠤᠭᠠᠳ ᠵᠢᠭᠠᠬᠠᠨ ᠴᠤ ᠭᠡᠰᠡᠨ ᠠᠮᠠᠷᠠᠬᠤ ᠶᠢ ᠬᠦᠰᠡᠵᠦ ᠪᠠᠶᠢᠭᠠ᠃ 《ᠬᠤᠷᠳᠤ》 ᠍ ᠶᠢᠨ ᠳᠠᠭᠤᠤ ᠶᠢ ᠰᠣᠨᠣᠰᠳᠠᠭ ᠤᠤ︖ ᠭᠡᠵᠦ ᠬᠡᠨ ᠨᠢᠭᠡᠨ ᠲᠠᠨ ᠠᠴᠠ ᠠᠰᠠᠭᠤᠨᠠ᠃ ᠶᠠᠭᠤ ᠴᠤ ᠪᠢᠲᠡᠭᠡᠢ ᠬᠠᠷᠢᠭᠤᠯᠤᠭᠠᠷᠠᠢ︕
ᠲᠦᠮᠡᠲᠦ ᠰᠢᠨᠡ ᠬᠥᠷᠪᠡᠭᠦᠯᠪᠡ
3 0