ᠬᠥᠬᠡ ᠲᠣᠯᠪᠣᠲᠤ ᠳ ∙ ᠲᠡᠮᠦᠷᠸᠴᠢᠷ ᠄ ᠲᠠᠩᠨᠠᠭᠤᠯᠴᠢ ᠪᠦᠰᠡᠭᠦᠢ ᠶᠢᠨ ᠳᠠᠯᠳᠠ ᠲᠡᠮᠡᠴᠡᠯ (ᠠᠳᠠᠯ ᠶᠠᠪᠤᠳᠠᠯ ᠳᠤ ᠲᠤᠭᠤᠵᠢ) ᠰᠢᠭᠤᠷᠠᠢ ᠰᠣᠯᠣᠩᠭ᠎ᠠ ᠤᠨ 《ᠱᠠᠮᠪᠠᠯ ᠤᠨ ᠴᠡᠩᠬᠡᠷ ᠰᠠᠯᠬᠢ》 ᠰᠡᠪᠡᠯᠵᠡᠵᠦ᠂ ᠬᠠᠭᠠᠯᠭ᠎ᠠ ᠶᠢ ᠨᠢ ᠲᠠᠲᠠᠵᠤ ᠦᠵᠡᠭᠰᠡᠨ ᠲᠡᠷᠡ ᠴᠠᠭ ᠠᠴᠠ ᠬᠣᠶᠢᠰᠢ ᠵᠣᠬᠢᠶᠠᠯᠴᠢ ᠪᠦᠰᠡᠭᠦᠢ ᠶᠢᠨ ᠰᠢᠨ᠎ᠡ ᠪᠦᠲᠦᠭᠡᠯ ᠢ ᠬᠦᠰᠡᠨ ᠬᠦᠯᠢᠶᠡᠵᠦ ᠰᠠᠭᠤᠬᠤ ᠪᠣᠯᠤᠭᠰᠠᠨ ᠶᠤᠮ᠃ ᠴᠣ ᠰᠢᠨᠡᠬᠡᠨ ᠪᠦᠲᠦᠭᠡᠯ ᠪᠣᠯᠬᠤ ᠭᠢᠮᠠᠯᠠᠢ᠌ ᠲᠤᠭᠤᠵᠢ ᠶᠢ ᠤᠩᠰᠢᠵᠤ ᠰᠠᠭᠤᠬᠤ ᠳᠤ ᠪᠠᠨ ᠪᠦᠲᠦᠭᠡᠯ ᠡᠴᠡ ᠪᠦᠲᠦᠭᠡᠯ ᠦᠨ ᠬᠣᠭᠣᠷᠣᠨᠳᠣ ᠤᠷ᠎ᠠ ᠴᠢᠳᠠᠪᠤᠷᠢ ᠨᠢ ᠨᠡᠮᠡᠭᠳᠡᠵᠦ᠂ ᠤᠯᠠᠮ ᠴᠢᠮᠪᠠᠶᠢᠷᠠᠵᠤ᠂ ᠤᠷᠠᠯᠠᠨ ᠪᠢᠴᠢᠬᠦ ᠠᠪᠢᠶᠠᠰ ᠣᠩᠭᠣᠳ ᠨᠢ ᠬᠥᠭᠯᠡᠭᠳᠡᠵᠦ ᠪᠠᠶᠢᠭ᠎ᠠ ᠶᠢ ᠮᠡᠳᠡᠷᠡᠭᠰᠡᠨ ᠶᠤᠮ᠃ ᠤᠷᠠᠨ ᠪᠦᠲᠦᠭᠡᠯᠴᠢ ᠬᠦᠮᠦᠨ ᠪᠤᠰᠤᠳ ᠢ ᠬᠠᠭᠤᠯᠬᠤ ᠡᠰᠡ ᠪᠥᠭᠡᠰᠦ ᠥᠪᠡᠷ ᠢᠶᠡᠨ ᠥᠪᠡᠷ ᠢ ᠪᠡᠨ ᠳᠠᠪᠲᠠᠨ ᠬᠠᠭᠤᠯᠬᠤ ᠲᠡᠷᠡ ᠲᠣᠭᠣᠷᠢᠭ ᠠᠴᠠ ᠭᠠᠷᠴᠤ ᠰᠢᠨ᠎ᠡ ᠪᠡᠷ ᠰᠡᠳᠬᠢᠨ ᠲᠤᠭᠤᠷᠪᠢᠬᠤ ᠠᠮᠠᠷ ᠦᠭᠡᠢ ᠬᠡᠴᠡᠭᠦᠦ ᠵᠠᠮ ᠳᠤ ᠥᠪᠡᠷ ᠦᠨ ᠣᠷᠣᠨ ᠵᠠᠢ ᠶᠢ ᠣᠯᠵᠤ ᠴᠢᠳᠠᠭᠰᠠᠨ ᠳᠤ ᠣᠯᠵᠠᠭᠤᠷᠬᠠᠨ ᠰᠠᠭᠤᠨ᠎ᠠ᠃ ᠨᠢᠭᠤᠴᠠ ᠠᠯᠪᠠᠨ ᠤ ᠠᠵᠢᠯᠲᠠᠨ ᠭᠢᠮᠠᠯᠠᠢ ᠭᠡᠬᠦ ᠪᠦᠰᠡᠭᠦᠢ ᠶᠢᠨ ᠠᠮᠢᠳᠤᠷᠠᠯ ᠢ ᠦᠭᠦᠯᠡᠭᠰᠡᠨ ᠠᠳᠠᠯ ᠶᠠᠪᠤᠳᠠᠯᠳᠤ ᠲᠤᠭᠤᠵᠢ ᠠᠴᠠ ᠪᠢᠳᠡᠨ ᠦ ᠣᠭᠲᠣ ᠮᠡᠳᠡᠬᠦ ᠦᠭᠡᠢ ᠴᠣ ᠰᠢᠨ᠎ᠡ ᠶᠢᠷᠲᠢᠨᠴᠦ ᠶᠢ ᠨᠢᠳᠦᠨ ᠦ ᠡᠮᠦᠨ᠎ᠡ ᠳᠡᠯᠭᠡᠨ ᠲᠠᠯᠪᠢᠬᠤ ᠳᠤ ᠪᠠᠨ ᠬᠠᠭᠠᠰ ᠥᠨᠥᠴᠢᠨ ᠪᠠᠯᠴᠢᠷ ᠥᠬᠢᠨ ᠤ ᠲᠤᠭᠤᠯᠤᠭᠰᠠᠨ ᠡᠭᠡᠳᠡᠷᠡᠭᠡᠲᠦ ᠵᠠᠮ ᠮᠥᠷ᠂ ᠡᠬᠡ ᠣᠷᠣᠨ ᠤ ᠬᠢ ᠪᠠᠨ ᠲᠥᠯᠥᠭᠡ ᠵᠣᠯᠢᠶᠠᠰᠤᠯᠠᠭᠰᠠᠨ ᠡᠷ᠎ᠡ ᠵᠣᠷᠢᠭ ᠢ ᠢᠷᠠᠭᠤᠬᠠᠨ ᠬᠦᠦᠷᠨᠢᠨ ᠦᠭᠦᠯᠡᠵᠡᠢ᠃ ᠬᠦᠮᠦᠨ ᠬᠤᠪᠢ ᠵᠠᠶᠠᠭᠠᠨ ᠤ ᠬᠢ ᠪᠠᠨ ᠵᠠᠮ ᠢ ᠥᠪᠡᠷ ᠢᠶᠡᠨ ᠰᠣᠩᠭᠣᠨ ᠠᠮᠢᠳᠤᠷᠠᠳᠠᠭ ᠲᠡᠷᠡ ᠲᠠᠪᠢᠯᠠᠩ ᠠᠴᠠ ᠲᠡᠰᠦ ᠥᠭᠡᠷ᠎ᠡ ᠪᠡᠷ ᠡᠬᠡ ᠣᠷᠣᠨ ᠤ ᠬᠢ ᠪᠠᠨ ᠢᠵᠠᠭᠤᠷ ᠡᠷᠬᠡ ᠠᠰᠢᠭ ᠤᠨ ᠲᠥᠯᠥᠭᠡ ᠵᠣᠯᠢᠭᠰᠠᠨ ᠪᠦᠰᠡᠭᠦᠢ ᠶᠢᠨ ᠲᠤᠭᠤᠯᠤᠭᠰᠠᠨ ᠵᠠᠮ ᠬᠥᠨᠳᠡᠯᠡᠨ ᠡᠴᠡ ᠬᠠᠷᠠᠬᠤ ᠳᠤ ᠭᠤᠨᠢᠭ ᠲᠠᠢ ᠴᠤ ᠨᠥᠭᠥᠭᠡ ᠲᠠᠯ᠎ᠠ ᠪᠠᠷ ᠪᠠᠬᠠᠷᠬᠠᠯ ᠲᠠᠢ ᠶᠤᠮ᠃ ᠨᠣᠮ ᠤᠨ ᠡᠬᠢᠨ ᠳᠦ 《ᠡᠨᠡ ᠬᠣᠶᠠᠷ ᠲᠤᠭᠤᠵᠢ ᠳᠤ ᠭᠠᠷᠴᠤ ᠪᠤᠢ ᠦᠢᠯᠡ ᠶᠠᠪᠤᠳᠠᠯ ᠨᠢ ᠪᠣᠳᠠᠲᠤ ᠠᠮᠢᠳᠤᠷᠠᠯ ᠠᠴᠠ ᠰᠡᠳᠦᠪᠯᠡᠭᠡ ᠦᠭᠡᠢ ᠪᠥᠭᠡᠳ ᠳᠠᠩ ᠭᠠᠭᠴᠠ ᠤᠷᠠᠨ ᠰᠡᠳᠬᠢᠮᠵᠢ ᠪᠡᠷ ᠪᠦᠲᠦᠭᠡᠭᠳᠡᠭᠰᠡᠨ ᠪᠣᠯᠤᠨ᠎ᠠ》 ᠭᠡᠵᠦ ᠡᠮᠦᠨᠡᠳᠭᠡᠯ ᠪᠢᠴᠢᠭᠰᠡᠨ ᠬᠡᠳᠦᠢ ᠴᠤ ᠵᠣᠬᠢᠶᠠᠯ ᠢ ᠤᠩᠰᠢᠵᠤ ᠦᠵᠡᠬᠦ ᠳᠦ ᠶᠠᠭᠠᠬᠢᠯᠲᠠ ᠴᠤ ᠦᠭᠡᠢ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠠᠴᠠ ᠰᠡᠳᠦᠪᠯᠡᠨ ᠪᠣᠳᠠᠲᠤ ᠬᠦᠮᠦᠨ ᠦ ᠲᠡᠦᠬᠡ ᠪᠡᠷ ᠪᠦᠲᠦᠭᠡᠭᠳᠡᠭᠰᠡᠨ ᠮᠡᠲᠦ ᠰᠠᠨᠠᠭᠳᠠᠯ᠎ᠠ᠃ ᠡᠨᠡ ᠨᠢ ᠵᠣᠬᠢᠶᠠᠯᠴᠢ ᠶᠢᠨ ᠤᠷ᠎ᠠ ᠴᠢᠳᠠᠪᠤᠷᠢ ᠤᠤ᠂ ᠡᠰᠡᠪᠡᠯ ᠨᠢᠭᠤᠴᠠ ᠲᠠᠢ ᠬᠣᠯᠪᠣᠭᠠᠲᠠᠢ ᠠᠰᠠᠭᠤᠳᠠᠯ ᠤᠴᠢᠷ ᠠᠴᠠ ᠵᠣᠷᠢᠭᠤᠳᠠ ᠢᠩᠭᠢᠭᠰᠡᠨ ᠦᠦ ᠠᠯᠢ ᠨᠢ ᠪᠣᠯᠬᠤ ᠶᠢ ᠬᠡᠯᠡᠵᠦ ᠮᠡᠳᠡᠬᠦ ᠦᠭᠡᠢ ᠪᠠᠶᠢᠨ᠎ᠠ᠃ ᠪᠠᠭ᠎ᠠ ᠠᠴᠠ ᠪᠠᠨ ᠡᠬᠢᠯᠡᠨ ᠲᠤᠰᠬᠠᠢ ᠠᠵᠢᠯᠲᠠᠨ ᠪᠣᠯᠬᠣᠷ ᠪᠡᠯᠡᠳᠬᠡᠭᠳᠡᠭᠰᠡᠨ ᠭᠢᠮᠠᠯᠠᠢ ᠪᠦᠰᠡᠭᠦᠢ 16 ᠵᠢᠯ ᠦᠨ ᠲᠤᠷᠰᠢ ᠵᠣᠪᠠᠯᠠᠩ ᠪᠡᠷᠬᠡᠰᠢᠶᠡᠯ ᠢ ᠲᠤᠭᠤᠯᠤᠨ᠂ ᠠᠮᠢ ᠥᠷᠢᠰᠦᠨ ᠪᠠᠶᠢᠵᠤ ᠬᠠᠷᠢ ᠶᠢᠨ ᠣᠷᠣᠨ ᠳᠤ ᠲᠤᠰᠬᠠᠢ ᠡᠭᠦᠷᠭᠡ ᠭᠦᠢᠴᠡᠳᠭᠡᠬᠦ ᠳᠦ ᠪᠡᠨ ᠨᠢᠭᠡ ᠯᠠ ᠡᠳᠦᠷ ᠬᠡᠨ ᠳᠦ ᠴᠤ ᠬᠡᠷᠡᠭ ᠦᠭᠡᠢ ᠤᠰᠤᠨ ᠳᠤ ᠬᠠᠶᠠᠭᠰᠠᠨ ᠴᠢᠯᠠᠭᠤ ᠰᠢᠭ ᠣᠷᠣ ᠲᠠᠰᠤ ᠮᠠᠷᠲᠠᠭᠳᠠᠨ᠎ᠠ ᠭᠡᠵᠦ ᠲᠥᠰᠥᠭᠡᠯᠡᠭᠡ ᠴᠤ ᠦᠭᠡᠢ ᠶᠠᠪᠤᠵᠠᠢ᠃ ᠡᠬᠡ ᠣᠷᠣᠨ ᠤ ᠬᠢ ᠪᠠᠨ ᠲᠥᠯᠥᠭᠡ ᠭᠡᠰᠡᠨ ᠴᠢᠩ ᠬᠠᠯᠠᠭᠤᠨ ᠰᠡᠳᠬᠢᠯ ᠢᠶᠡᠷ ᠵᠢᠳᠬᠦᠵᠦ ᠶᠠᠪᠤᠬᠤ ᠳᠤ ᠪᠠᠨ ᠬᠣᠵᠢᠮ ᠤᠨ ᠡᠳᠦᠷ ᠠᠮᠢᠳᠤᠷᠠᠯ ᠬᠡᠷᠬᠢᠨ ᠬᠤᠪᠢᠷᠠᠵᠤ ᠥᠭᠡᠷᠡᠴᠢᠯᠡᠭᠳᠡᠬᠦ ᠶᠢ ᠵᠡᠭᠦᠳᠦᠯᠡᠭᠡ ᠴᠤ ᠦᠭᠡᠢ ᠶᠠᠪᠤᠵᠠᠢ᠃ ᠲᠡᠭᠦᠨ ᠳᠦ ᠭᠠᠭᠴᠠᠬᠠᠨ ᠮᠥᠷᠥᠭᠡᠳᠦᠯ ᠪᠠᠶᠢᠭᠰᠠᠨ᠃ ᠬᠠᠶᠢᠷᠠᠲᠠᠢ ᠬᠦᠮᠦᠨ ᠲᠡᠢ ᠪᠡᠨ ᠦᠷ᠎ᠡ ᠬᠡᠦᠬᠡᠳ ᠢᠶᠡᠨ ᠳᠠᠭᠠᠭᠤᠯᠤᠭᠠᠳ ᠡᠭᠡᠯ ᠵᠢᠷ ᠦᠨ ᠠᠮᠠᠷ ᠵᠢᠮᠡᠷ ᠠᠮᠢᠳᠤᠷᠠᠬᠤ᠃ ᠬᠦᠮᠦᠨ ᠰᠢᠭ ᠯᠠ ᠬᠠᠶᠢᠷᠠᠯᠠᠵᠤ ᠳᠤᠷᠠᠯᠠᠬᠤ᠂ ᠦᠷ᠎ᠡ ᠬᠡᠦᠬᠡᠳ ᠭᠠᠷᠭᠠᠬᠤ᠂ ᠥᠪᠡᠷ ᠦᠨ ᠬᠢ ᠪᠡᠷ ᠢᠶᠡᠨ ᠪᠠᠶᠢᠬᠤ᠃ ᠭᠡᠪᠡᠴᠦ ᠡᠨᠡ ᠪᠦᠬᠦᠨ ᠬᠣᠷᠢᠭ᠎ᠠ ᠲᠠᠢ᠃ ᠨᠢᠭᠡ ᠪᠣᠯ ᠡᠷᠭᠦᠭᠰᠡᠨ ᠲᠠᠩᠭᠠᠷᠢᠭ ᠲᠤ ᠪᠠᠨ ᠦᠨᠡᠨᠴᠢ ᠶᠠᠪᠤᠬᠤ᠂ ᠡᠰᠡᠪᠡᠯ ᠦᠬᠦᠬᠦ᠃ ᠥᠭᠡᠷ᠎ᠡ ᠰᠣᠩᠭᠣᠯᠲᠠ ᠪᠠᠶᠢᠬᠤ ᠦᠭᠡᠢ᠃ ᠡᠨᠡ ᠬᠡᠨ ᠬᠥᠮᠦᠨ ᠳ᠋ᠤ ᠬᠣᠪᠣᠷ ᠲᠣᠬᠢᠶᠠᠬᠤ ᠬᠦᠨᠳᠦ ᠬᠡᠴᠡᠭᠦᠦ ᠰᠣᠷᠢᠯᠲᠠ᠃ ᠭᠡᠬᠦ ᠳᠦ ᠪᠡᠨ ᠭᠢᠮᠠᠯᠠᠢ ᠪᠦᠰᠡᠭᠦᠢ ᠡᠨᠡ ᠪᠦᠬᠦᠨ ᠢ ᠳᠠᠪᠠᠵᠤ ᠴᠢᠳᠠᠭᠰᠠᠨ᠃ ᠭᠡᠲᠡᠯ᠎ᠡ ᠠᠮᠢᠨ ᠠᠴᠠ ᠪᠠᠨ ᠢᠯᠡᠭᠦᠦ ᠵᠢᠳᠬᠦᠵᠦ ᠶᠠᠪᠤᠭᠰᠠᠨ ᠲᠡᠷᠡ ᠦᠢᠯᠡᠰ ᠨᠢ ᠨᠢᠭᠡ ᠯᠠ ᠡᠳᠦᠷ ᠪᠤᠷᠤᠭᠤᠳᠠᠵᠤ ᠥᠪᠡᠷ ᠦᠨ ᠬᠢ ᠨᠢ ᠵᠦᠭ ᠪᠤᠤ ᠶᠢᠨ ᠠᠮᠠ ᠴᠢᠭᠯᠡᠬᠦ ᠶᠤᠮ ᠭᠡᠵᠦ ᠬᠡᠨ ᠰᠠᠨᠠᠬᠤ ᠪᠢᠯᠡ᠃ ᠲᠡᠷᠡ ᠣᠳᠣ ᠵᠢᠰᠦ ᠪᠡᠨ ᠬᠤᠪᠢᠷᠠᠭᠠᠨ ᠴᠣ ᠰᠢᠨ᠎ᠡ ᠲᠡᠮᠡᠴᠡᠯ ᠢ ᠡᠬᠢᠯᠡᠭᠦᠯᠵᠡᠢ᠃ ᠰᠥᠷᠭᠦ ᠲᠠᠩᠨᠠᠭᠤᠯ ᠤᠨ ᠠᠯᠪᠠᠨ ᠳᠤ ᠰᠢᠷᠭᠤᠯᠠᠭᠰᠠᠨ ᠬᠠᠷᠢ ᠡᠲᠡᠭᠡᠳ ᠦᠨ ᠭᠠᠷ ᠬᠥᠯ ᠢ ᠲᠠᠰᠣ ᠴᠤᠬᠢᠬᠤ᠃ ᠤᠳᠤᠮ ᠳᠠᠮᠵᠢᠭᠰᠠᠨ ᠲᠠᠩᠨᠠᠭᠤᠯ ᠤᠨ ᠰᠦᠯᠵᠢᠶ᠎ᠡ ᠪᠣᠯᠬᠤ ᠰᠢ ᠣᠪᠣᠭᠲᠠᠨ ᠤ ᠨᠢᠭᠤᠴᠠ ᠪᠦᠯᠦᠭᠯᠡᠯ ᠲᠡᠢ ᠲᠡᠮᠡᠴᠡᠬᠦ ᠬᠠᠲᠠᠭᠤᠬᠠᠨ ᠰᠣᠷᠢᠯᠲᠠ ᠲᠤᠯᠭᠠᠷᠠᠵᠠᠢ᠃ ᠲᠠᠩᠨᠠᠭᠤᠯ ᠶᠠᠪᠤᠭᠰᠠᠨ ᠬᠦᠮᠦᠨ ᠲᠠᠩᠨᠠᠭᠤᠯ ᠲᠠᠢ ᠲᠡᠮᠡᠴᠡᠨ᠎ᠡ ᠭᠡᠰᠡᠨ ᠦᠭᠡ᠃ ᠡᠨᠡ ᠲᠤᠭᠤᠵᠢ ᠳᠠᠭᠤᠰᠤᠭ᠎ᠠ ᠦᠭᠡᠢ ᠴᠢᠨᠠᠭᠰᠢᠳᠠ ᠦᠷᠭᠦᠯᠵᠢᠯᠡᠬᠦ ᠶᠤᠮ ᠪᠠᠶᠢᠨ᠎ᠠ᠃ ᠭᠢᠮᠠᠯᠠᠢ ᠪᠦᠰᠡᠭᠦᠢ ᠶᠢᠨ ᠬᠤᠪᠢ ᠵᠠᠶᠠᠭ᠎ᠠ ᠴᠢᠨᠠᠭᠰᠢᠳᠠ ᠬᠡᠷᠬᠢᠬᠦ᠂ ᠶᠠᠮᠠᠷ ᠠᠳᠠᠯ ᠰᠣᠨᠢᠨ ᠶᠠᠪᠤᠳᠠᠯ ᠤᠳ ᠥᠷᠨᠢᠬᠦ ᠶᠢ ᠬᠦᠯᠢᠶᠡᠬᠦ ᠯᠠ ᠦᠯᠡᠳᠡᠯ᠎ᠡ᠃ ᠤᠭ ᠲᠤᠭᠤᠵᠢ ᠳᠤ ᠮᠥᠩᠭᠥ ᠲᠡᠢ᠂ ᠪᠠᠶᠠᠨ ᠲᠠᠩᠰᠤᠭ ᠠᠮᠢᠳᠤᠷᠠᠯ ᠲᠠᠢ ᠭᠠᠵᠢ ᠳᠣᠩᠲᠠᠨ ᠭᠠᠳᠠᠭᠠᠳᠤ ᠡᠷ᠎ᠡ ᠮᠣᠩᠭᠣᠯ ᠪᠦᠰᠡᠭᠦᠢ ᠶᠢ ᠬᠠᠭᠤᠷᠤᠨ ᠭᠠᠵᠢ ᠬᠦᠰᠡᠯ ᠦᠨ ᠢᠶᠡᠨ ᠵᠣᠯᠢᠶᠠᠰᠤ ᠪᠣᠯᠭᠠᠬᠤ ᠭᠡᠵᠦ ᠪᠠᠶᠢᠭᠰᠠᠨ ᠢ ᠲᠤᠰᠬᠠᠢ ᠠᠯᠪᠠᠨ ᠤ ᠠᠵᠢᠯᠲᠠᠨ ᠠᠪᠤᠷᠠᠵᠤ ᠪᠠᠶᠢᠭ᠎ᠠ ᠲᠤᠬᠠᠢ ᠵᠤᠷᠪᠤᠰ ᠦᠭᠦᠯᠡᠨ᠎ᠡ᠃ ᠹᠡᠢᠰ ᠢᠶᠡᠷ ᠲᠡᠨᠦᠭᠦᠴᠢᠯᠡᠬᠦ ᠬᠠᠭᠤᠷᠮᠠᠴᠢ ᠲᠥᠷᠥᠬᠦᠲᠡᠨ ᠨᠦᠭᠦᠳ ᠦᠨ ᠴᠠᠭᠠᠨ᠎ᠠ ᠶᠠᠮᠠᠷ ᠠᠶᠤᠮᠰᠢᠭ ᠨᠢᠭᠤᠭᠳᠠᠵᠤ ᠪᠤᠢ ᠶᠢ᠂ ᠭᠡᠨᠡᠨ ᠢᠲᠡᠭᠡᠮᠡᠭᠡᠢ ᠬᠦᠮᠦᠰ ᠤᠷᠬᠠᠨ ᠳᠤ ᠣᠷᠣᠵᠤ ᠥᠭᠭᠦᠭᠡᠰᠢ ᠪᠣᠯᠬᠤ ᠠᠴᠠ ᠰᠡᠷᠡᠮᠵᠢᠯᠡᠭᠦᠯᠬᠦ ᠰᠤᠷᠭᠠᠮᠵᠢᠲᠠᠢ ᠶᠤᠮ ᠪᠠᠶᠢᠨ᠎ᠠ᠃ ᠤᠩᠰᠢᠭᠴᠢ ᠶᠢ ᠪᠠᠶᠢᠯᠳᠤᠨ ᠳᠠᠭᠠᠭᠤᠯᠬᠤ ᠤᠪᠠᠳᠢᠰ ᠡᠷᠳᠡᠮ ᠭᠡᠵᠦ ᠡᠨᠡ ᠳ᠋ᠡ᠃ 《ᠰᠡᠭᠦᠯᠴᠢ ᠶᠢᠨ ᠬᠦᠰᠡᠯᠲᠡ》 ᠭᠡᠰᠡᠨ ᠨᠢᠭᠡᠨ ᠰᠣᠨᠢᠷᠬᠠᠯᠲᠠᠢ ᠲᠤᠭᠤᠵᠢ ᠪᠠᠶᠢᠨ᠎ᠠ᠃ ᠨᠠᠶᠢᠵᠠ ᠵᠠᠯᠠᠭᠤ ᠲᠠᠢ ᠪᠠᠨ ᠠᠭᠯᠠᠭ ᠤᠨ ᠬᠡᠶᠢᠳ ᠲᠦ ᠣᠴᠢᠭᠰᠠᠨ ᠰᠡᠪᠦᠷᠦ ᠪᠦᠰᠡᠭᠦᠢ ᠳᠦ ᠨᠢᠭᠡᠨ ᠡᠪᠦᠭᠡᠨ 《ᠥᠲᠡᠯ᠎ᠡ ᠡᠴᠢᠭᠡ》 ᠍ ᠦᠨ ᠲᠤᠬᠠᠢ ᠳᠣᠮᠣᠭ ᠬᠦᠦᠷᠨᠢᠵᠦ ᠬᠦᠰᠡᠯ ᠪᠡᠶᠡᠯᠡᠭᠦᠯᠳᠡᠭ ᠰᠢᠳᠢᠲᠦ ᠰᠢᠪᠰᠢᠯᠭᠡ ᠵᠢᠭᠠᠵᠤ ᠥᠭᠴᠡᠢ᠃ ᠭᠤᠷᠪᠠᠨ ᠤᠳᠠᠭ᠎ᠠ ᠬᠦᠰᠡᠯ᠎ ᠢᠶᠡᠨ ᠪᠡᠶᠡᠯᠡᠭᠦᠯᠦᠭᠡᠳ ᠲᠡᠷᠡ ᠲᠠᠷᠨᠢ ᠶᠢᠨ ᠬᠦᠴᠦ ᠰᠤᠯᠠᠷᠠᠵᠤ 108 ᠲᠣᠭᠠᠨ ᠳᠤ ᠪᠠᠨ ᠬᠦᠷᠴᠦ ᠵᠢᠷ ᠦᠨ ᠦᠭᠡ ᠪᠣᠯᠤᠨ ᠬᠤᠪᠢᠷᠠᠬᠤ ᠠᠵᠢ᠃ ᠲᠡᠷᠡ ᠡᠬᠢᠨ ᠦ ᠬᠣᠶᠠᠷ ᠰᠢᠪᠰᠢᠯᠭᠡ ᠪᠡᠨ ᠬᠢᠨ ᠲᠥᠷᠥᠯ ᠠᠷᠠᠯᠵᠢᠪᠠ᠃ ᠲᠠᠷᠭᠤᠨ ᠲᠠᠨᠲᠠᠭᠠᠷ ᠰᠡᠪᠦᠷᠦ ᠲᠡᠭᠦᠰ ᠭᠣᠸ᠎ᠠ ᠪᠦᠰᠡᠭᠦᠢ ᠪᠣᠯᠤᠨ ᠬᠤᠪᠢᠷᠠᠵᠤ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠶᠡᠬᠡ ᠮᠥᠩᠭᠥᠨ ᠦ ᠡᠵᠡᠨ ᠪᠣᠯᠪᠠ᠃ ᠣᠳᠣ ᠲᠡᠭᠦᠨ ᠦ ᠡᠮᠦᠨ᠎ᠡ ᠬᠣᠷᠸ᠎ᠠ ᠶᠢᠨ ᠤᠰᠤᠨ ᠨᠢᠳᠦᠲᠦ ᠴᠢᠰᠤᠨ ᠵᠢᠷᠦᠬᠡᠲᠣ ᠪᠦᠬᠦᠨ ᠰᠥᠭᠥᠳᠦᠨ ᠮᠥᠷᠭᠥᠨ᠎ᠡ᠃ ᠭᠣᠸ᠎ᠠ ᠦᠵᠡᠰᠬᠦᠯᠡᠩ᠂ ᠮᠥᠩᠭᠥ ᠬᠣᠶᠠᠷ ᠠᠴᠠ ᠥᠭᠡᠷ᠎ᠡ ᠪᠦᠬᠦᠨ ᠢ ᠬᠠᠭᠠᠨᠴᠢᠯᠠᠬᠤ ᠬᠦᠴᠦ ᠭᠡᠵᠦ ᠬᠠᠮᠢᠭ᠎ᠠ ᠪᠠᠶᠢᠬᠤ ᠪᠢᠯᠡ᠃ ᠣᠷᠴᠢᠨ ᠴᠠᠭ ᠤᠨ ᠬᠦᠮᠦᠰ ᠦᠨ ᠬᠡᠶᠢᠰᠪᠦᠷᠢ ᠬᠠᠭᠤᠷᠮᠠᠴᠢ ᠵᠠᠩ ᠠᠪᠤᠷᠢ᠂ ᠰᠡᠳᠬᠢᠬᠦᠢ᠂ ᠬᠦᠮᠦᠨ ᠴᠢᠨᠠᠷ ᠢ ᠴᠢᠨᠠᠷ ᠢ ᠶᠣᠭᠲᠠᠯᠠᠨ ᠬᠠᠷᠠᠭᠤᠯᠬᠤ ᠶᠢᠨ ᠵᠡᠷᠭᠡᠴᠡᠭᠡ ᠡᠨᠡ ᠪᠣᠯ ᠪᠢᠳᠡᠨ ᠦ ᠥᠨᠥᠳᠥᠷ ᠦᠨ ᠪᠣᠳᠠᠲᠤ ᠦᠨᠡᠨ ᠰᠢᠦ ᠭᠡᠰᠡᠨ ᠶᠣᠵᠣᠲᠠᠢ ᠢᠨᠢᠶᠡᠮᠰᠦᠭᠯᠡᠯ ᠴᠠᠭᠠᠨ᠎ᠠ ᠨᠢ ᠨᠢᠭᠤᠭᠳᠠᠵᠤ ᠪᠠᠶᠢᠨ᠎ᠠ᠃ ᠲᠡᠭᠦᠨ ᠦ ᠰᠡᠭᠦᠯᠴᠢ ᠶᠢᠨ ᠬᠦᠰᠡᠯᠲᠡ ᠶᠠᠭᠤ ᠪᠠᠶᠢᠭᠰᠠᠨ ᠬᠢᠭᠡᠳ ᠡᠨᠡ ᠪᠦᠬᠦᠨ ᠮᠥᠷᠥᠭᠡᠳᠦᠯ᠂ ᠵᠡᠭᠦᠳᠦ᠂ ᠲᠥᠰᠥᠭᠡᠯᠡᠯ᠂ ᠬᠣᠪᠣᠰᠣ ᠠᠯᠢ ᠨᠢ ᠪᠣᠯᠬᠤ ᠶᠢ ᠵᠣᠬᠢᠶᠠᠯ ᠠᠴᠠ ᠤᠩᠰᠢᠵᠤ ᠮᠡᠳᠡᠪᠡᠯ ᠠᠮᠲᠠᠲᠠᠢ᠃ ᠵᠣᠬᠢᠶᠠᠯ ᠳᠤ ᠬᠥᠲᠦᠯᠦᠭᠳᠡᠬᠦ ᠲᠡᠷᠡ ᠤᠴᠢᠷ ᠰᠢᠯᠲᠠᠭᠠᠨ ᠨᠢ ᠦᠢᠯᠡ ᠶᠠᠪᠤᠳᠠᠯ ᠭᠡᠬᠦ ᠡᠴᠡ ᠪᠡᠨ ᠦᠨᠡᠮᠰᠢᠬᠦ ᠦᠢᠯᠡ ᠶᠠᠪᠤᠴᠠ ᠶᠤᠮ᠃ ᠶᠠᠭᠤ ᠶᠢ ᠴᠤ ᠲᠠᠶᠢᠯᠪᠤᠷᠢᠯᠠᠬᠤ ᠦᠭᠡᠢ ᠪᠡᠷ ᠳᠦᠷᠰᠦᠯᠡᠯ᠂ ᠬᠦᠦᠷᠨᠢᠯ ᠢᠶᠡᠷ ᠦᠨᠡᠮᠰᠢᠭᠦᠯᠦᠨ᠎ᠡ ᠭᠡᠳᠡᠭ ᠵᠣᠬᠢᠶᠠᠯᠴᠢ ᠶᠢᠨ ᠤᠷ᠎ᠠ ᠴᠢᠳᠠᠪᠤᠷᠢ᠂ ᠴᠢᠳᠠᠯ ᠴᠢᠨᠰᠠᠭ᠎ᠠ ᠪᠠᠶᠢᠳᠠᠭ᠃ ᠦᠭᠡ ᠪᠡᠷ ᠨᠠᠭᠠᠳᠤᠬᠣ᠂ ᠦᠢᠯᠡ ᠶᠠᠪᠤᠳᠠᠯ ᠢᠶᠠᠷ ᠦᠨᠡᠮᠰᠢᠭᠦᠯᠬᠦ ᠶᠢᠨ ᠲᠤᠬᠠᠢ ᠳᠤ ᠪᠣᠯ ᠬᠠᠩᠭᠠᠯᠲᠠ ᠲᠠᠢ ᠪᠠᠢᠨ᠎ᠠ᠃ ᠵᠣᠬᠢᠶᠠᠯ ᠠᠴᠠ ᠬᠢᠮᠡᠯ᠂ ᠬᠠᠭᠤᠷᠮᠠᠴᠢ᠂ ᠬᠦᠴᠦᠯᠡᠭᠰᠡᠨ ᠪᠢᠴᠢᠯᠭᠡ ᠠᠵᠢᠭᠯᠠᠭᠳᠠᠭᠰᠠᠨ ᠦᠭᠡᠢ᠃ 《ᠱᠠᠮᠪᠠᠯ ᠤᠨ ᠴᠡᠩᠬᠡᠷ ᠰᠠᠯᠬᠢ》᠂ 《ᠲᠣᠭᠣᠷᠣᠯᠵᠢᠨᠭᠣᠸ᠎ᠠ》᠂ 《ᠭᠢᠮᠠᠯᠠᠢ》 ᠲᠤᠭᠤᠵᠢ ᠨᠤᠭᠤᠳ ᠨᠢ ᠰᠡᠳᠦᠪ ᠰᠠᠨᠠᠭᠠᠨ ᠤ ᠬᠤᠪᠢ ᠳᠤ ᠥᠭᠡᠷ᠎ᠡ᠂ ᠵᠣᠬᠢᠶᠠᠮᠵᠢ ᠪᠦᠲᠦᠴᠡ ᠨᠢ ᠳᠠᠪᠲᠠᠭᠳᠠᠬᠤ ᠦᠭᠡᠢ ᠪᠠᠶᠢᠭ᠎ᠠ ᠨᠢ ᠰᠠᠶᠢᠨ ᠰᠢᠪᠬᠠᠪᠠᠯ ᠱᠠᠭᠬᠢᠭᠰᠡᠨ ᠪᠦᠲᠦᠭᠡᠯ ᠭᠠᠷᠬᠤ ᠤᠨᠳᠤᠷᠭ᠎ᠠ ᠲᠠᠢ ᠵᠣᠬᠢᠶᠠᠯᠴᠢ ᠶᠤᠮ ᠭᠡᠬᠦ ᠰᠡᠳᠬᠢᠭᠳᠡᠯ ᠲᠥᠷᠥᠯ᠎ᠡ᠃ ᠤᠩᠰᠢᠭᠴᠢᠳ ᠰᠠᠶᠢᠨ ᠪᠦᠲᠦᠭᠡᠯ ᠰᠢᠯᠢᠵᠦ ᠰᠣᠩᠭᠣᠨ ᠤᠩᠰᠢᠬᠤ ᠶᠢ ᠬᠦᠰᠡᠨ᠎ᠡ᠂ ᠲᠡᠭᠡᠬᠦ ᠴᠤ ᠤᠴᠢᠷᠲᠠᠢ᠃ ᠬᠠᠷᠢᠨ ᠤᠷᠠᠨ ᠵᠣᠬᠢᠶᠠᠯ ᠰᠣᠨᠢᠷᠬᠠᠭᠴᠢ᠂ ᠠᠵᠢᠭᠯᠠᠭᠴᠢ ᠬᠦᠮᠦᠨ ᠰᠠᠶᠢᠨ ᠮᠠᠭᠤ ᠠᠯᠢ ᠠᠯᠢᠨ ᠢ ᠨᠢ ᠰᠡᠬᠦᠵᠦ ᠶᠠᠭᠠᠬᠢᠭᠠᠳ ᠰᠠᠶᠢᠨ ᠮᠠᠭᠤ ᠪᠣᠯᠤᠭᠰᠠᠨ ᠤᠴᠢᠷ ᠰᠢᠯᠲᠠᠭᠠᠨ ᠢ ᠬᠠᠶᠢᠬᠤ ᠤᠴᠢᠷᠲᠠᠢ᠃ ᠬᠥᠬᠡ ᠲᠣᠯᠪᠣᠲᠤ ᠳ ∙ ᠲᠡᠮᠦᠷᠸᠴᠢᠷ 2018-05-06 ᠬᠦᠮᠦᠨ ᠴᠢᠯᠠᠭᠤᠨ ᠤ ᠬᠣᠩᠬᠣᠷ᠃ ᠲᠦᠮᠡᠲᠦ ᠰᠢᠨ᠎ᠡ ᠬᠥᠷᠪᠡᠭᠦᠯᠪᠡ