ᠺᠠᠸᠠᠪᠠᠲ᠋ᠠ ᠶᠠᠰᠦᠨᠠᠷᠢ ᠲᠥᠷᠦᠭᠰᠡᠨ ᠨᠤᠲᠤᠭ ︵ ᠥᠭᠦᠯᠡᠯᠭᠡ ︶ ᠠᠶᠢᠯ ᠤᠨ ᠪᠠᠶᠢᠰᠢᠩ ᠲᠦᠷᠢᠶᠡᠰᠦᠯᠡᠬᠦ ᠪᠡᠷ ᠢᠷᠡᠭᠰᠡᠨ ᠡᠷᠬᠡ ᠵᠦᠢᠴᠢ ᠠᠷᠪᠠᠨ ᠬᠣᠶᠠᠷ᠂ ᠭᠤᠷᠪᠠᠨ ᠨᠠᠰᠤᠲᠠᠢ ᠬᠦᠦ ᠶᠢᠨ ᠭᠡᠷ ᠦᠨ ᠡᠵᠡᠨ ᠣᠷᠭᠢᠭᠰᠠᠨ ᠴᠢᠷᠠᠢ ᠲᠥᠷᠬᠥ ᠶᠢ ᠬᠠᠷᠠᠭᠠᠳ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠢᠨᠢᠶᠡᠳᠦ ᠨᠢ ᠬᠦᠷᠥᠨ᠎ᠡ᠃ - ᠵᠠ ᠬᠦᠦ ᠮᠢᠨᠢ ᠠᠪᠤ ᠶᠢᠨ ᠴᠢᠭᠡᠵᠢ ᠭᠠᠷᠭᠠᠯ ᠦᠭᠡᠢ ᠡᠵᠢ ᠳᠦ ᠪᠡᠨ ᠬᠤᠷᠳᠤᠨ ᠵᠠᠬᠢᠳᠠᠯ ᠪᠢᠴᠢᠭᠡᠳ ᠠᠰᠠᠭᠤᠭᠠᠳ ᠥᠭ᠃ - ᠡᠵᠢ ᠶᠢᠨ ᠲᠤᠬᠠᠢ ᠳᠤ ᠪᠣᠯ ᠲᠠᠲᠠᠭᠠᠯᠵᠠᠨ᠎ᠠ᠃ ᠨᠠᠳᠠ ᠲᠠᠢ ᠯᠠ ᠶᠠᠷᠢ᠃ - ᠲᠡᠭᠡᠭᠡᠳ ᠲᠦᠷᠢᠶᠡᠰᠦ ᠶᠢᠨ ᠮᠥᠩᠭᠥ ᠬᠡᠳᠦ ᠭᠡᠵᠦ ᠪᠠᠶᠢᠭ᠎ᠠ ᠶᠤᠮ︖ - ᠵᠠ ᠪᠠᠶᠢᠵᠠ ᠁ ᠲᠠᠪᠤᠨ ᠶᠸᠨ᠃ 《ᠮᠠᠭᠤ ᠵᠣᠯᠢᠭ ᠴᠢᠨᠢ ᠬᠠᠩᠰᠢ ᠮᠡᠳᠡᠵᠦ ᠪᠠᠶᠢᠨ᠎ᠠ》 ᠬᠡᠮᠡᠨ ᠳᠣᠲᠣᠷ᠎ᠠ ᠪᠠᠨ ᠪᠣᠳᠣᠭᠰᠠᠨ ᠡᠷᠬᠡ ᠵᠦᠢᠴᠢ ᠶᠠᠯᠢᠮ ᠦᠭᠡᠢ ᠨᠢᠷᠤᠭᠤ ᠪᠠᠨ ᠴᠢᠭᠡᠯᠡᠨ ᠪᠠᠶᠢᠵᠤ᠂ - ᠲᠠᠪᠤᠨ ᠶᠸᠨ ᠦᠨᠡᠲᠡᠢ ᠪᠠᠶᠢᠨ᠎ᠠ ᠭᠤᠷᠪᠠᠨ ᠶᠸᠨ ᠪᠣᠯᠭᠠᠴᠢᠬ᠎ᠠ︖ ᠭᠡᠬᠦ ᠳᠦ ᠬᠦᠦ᠂ - ᠲᠡᠷᠡ ᠶᠠᠷᠢᠬᠤ ᠦᠭᠡᠢ ᠡ ᠭᠡᠳ ᠶᠠᠭᠠᠬᠢᠬᠤ ᠡᠢᠬᠦ ᠶᠢᠨ ᠵᠠᠪᠳᠤᠯ ᠦᠭᠡᠢ ᠠᠷᠤ ᠶᠢᠨ ᠴᠡᠴᠡᠷᠯᠢᠭ ᠤᠷᠤᠭᠤ ᠪᠡᠨ ᠭᠦᠶᠦᠭᠡᠳ ᠶᠠᠪᠤᠴᠢᠬᠠᠬᠤ ᠰᠢᠨᠵᠢᠲᠡᠢ ᠪᠣᠯᠪᠠ᠃ ᠡᠷᠬᠡ ᠵᠦᠢᠴᠢ ᠡᠪᠦᠭᠡᠨ ᠡᠨᠡᠬᠦ ᠪᠠᠯᠴᠢᠷ ᠭᠡᠨᠡᠬᠡᠨ ᠮᠠᠢᠮᠠᠢ ᠳ᠋ᠤ ᠶᠠᠭᠠᠬᠢᠯᠲᠠ ᠴᠤ ᠦᠭᠡᠢ ᠪᠠᠭᠤᠵᠤ ᠥᠭᠭᠦᠯ᠎ᠡ᠃ ᠤᠴᠢᠷ ᠨᠢ ᠲᠡᠭᠦᠨ ᠳᠦ ᠬᠣᠲᠠ ᠶᠢᠨ ᠵᠠᠬᠢᠷᠭᠠᠨ ᠳᠤ ᠣᠶᠢᠷᠠᠬᠠᠨ ᠡᠨᠡ ᠪᠠᠶᠢᠰᠢᠩ ᠵᠠᠶᠢᠯᠠᠰᠢ ᠦᠭᠡᠢ ᠬᠡᠷᠡᠭᠲᠡᠢ ᠪᠣᠯᠤᠭᠰᠠᠨ ᠪᠠᠶᠢᠵᠠᠢ᠃ - ᠡᠨᠡ ᠰᠠᠷ᠎ᠠ ᠶᠢᠨ ᠲᠦᠷᠢᠶᠡᠰᠦ ᠶᠢᠨ ᠮᠥᠩᠭᠥ ᠶᠢ ᠯᠠ ᠤᠷᠢᠳᠴᠢᠯᠠᠵᠤ ᠥᠭᠭᠦᠭᠡᠷᠡᠢ᠃ - ᠴᠢᠮ᠎ᠠ ᠳᠤ ᠥᠭᠬᠦ ᠶᠤᠮ ᠤᠤ︖ - ᠲᠡᠶᠢᠮᠦ ᠭᠡᠵᠦ ᠬᠦᠦ ᠭᠡᠷ ᠦᠨ ᠡᠵᠡᠨ ᠰᠢᠭ ᠢᠲᠡᠭᠡᠯ ᠲᠡᠢ ᠨᠢ ᠠᠷᠭ᠎ᠠ ᠦᠭᠡᠢ ᠲᠣᠯᠣᠭᠠᠢ ᠳᠣᠬᠢᠪᠠ᠃ ᠭᠡᠪᠡᠴᠦ ᠳᠣᠲᠣᠷ᠎ᠠ ᠠᠴᠠ ᠪᠠᠨ ᠭᠠᠷᠴᠤ ᠢᠷᠡᠬᠦ ᠬᠡᠦᠬᠡᠳ ᠦᠨ ᠭᠡᠨᠡᠨ ᠲᠣᠮᠣᠭ᠎ᠠ ᠦᠭᠡᠢ ᠢᠨᠢᠶᠡᠮᠰᠦᠭᠯᠡᠯ ᠢᠶᠡᠨ ᠪᠠᠷᠢᠵᠤ ᠴᠢᠳᠠᠯ ᠦᠭᠡᠢ ᠰᠦᠷᠡᠬᠡᠢ ᠬᠥᠮᠥᠰᠬᠡ ᠵᠠᠩᠭᠢᠳᠤᠨ᠂ ᠤᠷᠤᠭᠤᠯ ᠢᠶᠠᠨ ᠲᠠᠰᠤ ᠵᠢᠮᠢᠢᠨ᠎ᠡ᠃ ᠬᠦᠦ ᠳᠦ ᠰᠢᠨᠡᠬᠡᠨ ᠰᠤᠷᠣᠭᠰᠠᠨ ᠨᠠᠶᠢᠮᠠᠢ ᠨᠢ ᠲᠣᠩ ᠴᠤ ᠰᠣᠨᠢᠷᠬᠠᠯᠲᠠᠢ ᠪᠠᠶᠢᠭ᠎ᠠ ᠠᠵᠢ᠃ ᠡᠨᠡ ᠨᠢ ᠬᠣᠶᠠᠷ ᠳᠠᠬᠢ ᠤᠳᠠᠭ᠎ᠠ ᠶᠢᠨ ᠲᠣᠮᠣ ᠨᠠᠶᠢᠮᠠᠢ ᠨᠢ ᠪᠠᠶᠢᠯ᠎ᠠ᠃ ᠬᠦᠦ ᠶᠢᠨ ᠡᠬᠡ ᠡᠭᠡᠴᠢ ᠶᠢ ᠨᠢ ᠲᠥᠷᠥᠬᠦ ᠳᠦ ᠲᠣᠺᠢᠣ᠋ ᠤᠷᠤᠭᠤ ᠲᠤᠰᠯᠠᠬᠤ ᠪᠠᠷ ᠶᠠᠪᠤᠭᠠᠳ ᠪᠤᠴᠠᠵᠤ ᠢᠷᠦᠬᠦ ᠦᠭᠡᠢ ᠭᠤᠷᠪᠠᠨ ᠴᠤ ᠰᠠᠷ᠎ᠠ ᠪᠣᠯᠵᠠᠢ᠃ ᠬᠦᠦ ᠪᠠᠨ ᠲᠣᠺᠢᠣ᠋ ᠍ ᠳᠤ ᠬᠦᠷᠦᠭᠡᠳ ᠢᠷ᠎ᠡ ᠭᠡᠬᠦ ᠪᠣᠯᠪᠠᠴᠤ ᠤᠨᠤᠭᠠᠨ ᠤ ᠵᠠᠷᠤᠳᠠᠯ ᠶᠠᠪᠤᠭᠤᠯᠤᠭᠰᠠᠨ ᠦᠭᠡᠢ᠃ ᠬᠥᠷᠰᠢ ᠠᠶᠢᠯ ᠤᠨ ᠳᠤ ᠪᠠᠨ ᠪᠠᠶᠢᠯ᠎ᠠ᠃ ᠬᠦᠦ ᠨᠢᠭᠡ ᠤᠳᠠᠭ᠎ᠠ ᠬᠥᠷᠰᠢ ᠠᠶᠢᠯ ᠤᠨ ᠳᠤ ᠨᠢ ᠢᠷᠡᠭᠰᠡᠨ ᠬᠠᠭᠤᠴᠢᠨ ᠪᠠᠷᠠᠭ᠎ᠠ ᠵᠠᠷᠤᠳᠠᠭ ᠬᠦᠮᠦᠨ ᠢ ᠭᠡᠷ ᠲᠦ ᠪᠡᠨ ᠳᠠᠭᠠᠭᠤᠯᠤᠨ ᠣᠷᠣᠭᠤᠯᠤᠭᠠᠳ ᠭᠡᠷ ᠦᠨ ᠢᠶᠡᠨ ᠬᠠᠭᠤᠴᠢᠨ ᠨᠣᠮ ᠰᠡᠳᠬᠦᠯ᠂ ᠬᠡᠷᠡᠭ ᠦᠭᠡᠢ ᠬᠤᠪᠴᠠᠰᠤ ᠬᠤᠨᠠᠷ ᠢ ᠵᠠᠷᠤᠪᠠ᠃ ᠲᠡᠭᠡᠭᠡᠳ ᠲᠡᠭᠦᠨ ᠳᠦ ᠪᠡᠨ ᠰᠡᠳᠬᠢᠯ ᠬᠥᠳᠡᠯᠦᠨ ᠪᠠᠶᠠᠷᠯᠠᠬᠤ ᠳᠤ ᠪᠠᠨ ᠢᠯᠡ ᠵᠤᠤᠬᠠᠨ ᠳᠡᠭᠡᠷ᠎ᠡ ᠪᠠᠶᠢᠭᠰᠠᠨ ᠰᠢᠷᠡᠮᠦᠨ ᠳᠠᠩᠬᠤ ᠪᠠᠨ ᠰᠢᠭᠦᠷᠡᠨ ᠠᠪᠴᠤ᠂ - ᠡᠨᠡ ᠬᠢᠷᠢ ᠵᠡᠷᠭᠡ ᠦᠨ᠎ᠡ ᠬᠦᠷᠬᠦ ᠪᠤᠢ︖ ᠭᠡᠵᠦ ᠳᠡᠯᠭᠡᠭᠦᠷ ᠦᠨ ᠬᠦᠮᠦᠨ ᠡᠴᠡ ᠠᠰᠠᠭᠤᠨ ᠵᠠᠷᠤᠭᠰᠠᠨ ᠠᠴᠠ ᠬᠣᠶᠢᠰᠢ ᠶᠠᠭᠤᠮ᠎ᠠ ᠵᠠᠷᠤᠬᠤ ᠡᠪᠡᠳᠴᠢᠨ ᠲᠤᠰᠴᠠᠢ᠃ ᠶᠠᠳᠠᠭᠤ ᠠᠶᠢᠯ ᠤᠳ ᠢᠶᠠᠷ ᠲᠣᠭᠣᠷᠢᠨ ᠶᠠᠪᠤᠵᠤ ᠥᠭᠡᠳᠡ ᠪᠣᠯᠤᠭᠰᠠᠨ ᠡᠴᠢᠭᠡ ᠶᠢᠨ ᠢᠶᠡᠨ ᠬᠤᠪᠴᠠᠰᠤ ᠶᠢ ᠬᠦᠷᠲᠡᠯ᠎ᠡ ᠵᠠᠷᠤᠵᠤ ᠤᠷᠬᠢᠪᠠ᠃ ᠣᠳᠣ ᠲᠠᠪᠤᠨ ᠶᠸᠨ ᠣᠯᠪᠠᠯ ᠲᠣᠺᠢᠣ᠋ ᠬᠣᠲᠠ ᠤᠷᠤᠭᠤ ᠶᠠᠪᠤᠭᠠᠳ ᠢᠷᠡᠬᠦ ᠵᠠᠷᠤᠳᠠᠯ ᠲᠠᠢ ᠪᠣᠯᠤᠨ᠎ᠠ᠃ ᠬᠦᠦ ᠡᠨᠡᠬᠦ ᠮᠠᠶᠢᠮᠠᠭ᠎ᠠ ᠪᠠᠷ ᠢᠶᠠᠨ ᠲᠣᠮᠣ ᠬᠦᠮᠦᠨ ᠦ ᠠᠵᠤ ᠲᠥᠷᠥᠯ᠂ ᠡᠳᠦᠷ ᠲᠤᠲᠤᠮ ᠤᠨ ᠠᠬᠤᠢ ᠬᠡᠷᠡᠭᠴᠡᠭᠡ ᠪᠡᠨ ᠪᠣᠯᠭᠠᠭᠠᠳ ᠶᠠᠪᠤᠬᠤ ᠶᠡᠷᠦ ᠪᠤᠰᠤ ᠶᠢᠨ ᠠᠮᠢᠳᠤᠷᠠᠯ ᠢ ᠮᠡᠳᠡᠷᠡᠭᠰᠡᠨ ᠢᠶᠡᠷ ᠦᠯᠦ ᠪᠠᠷᠠᠮ ᠨᠠᠶᠢᠮᠠᠢ ᠲᠣᠬᠢᠷᠠᠯᠴᠠᠭᠠᠨ ᠤ ᠮᠥᠩᠭᠥ ᠪᠡᠨ ᠬᠦᠯᠢᠶᠡᠨ ᠠᠪᠬᠤ ᠲᠠᠢ ᠵᠡᠷᠭᠡᠴᠡᠨ ᠬᠠᠭᠤᠴᠢᠨ ᠪᠠᠷᠠᠭᠠᠨ ᠤ ᠳᠡᠯᠭᠡᠭᠦᠷ ᠦᠨ ᠬᠦᠮᠦᠨ ᠴᠤ ᠪᠠᠢ᠂ ᠡᠷᠬᠡ ᠵᠦᠢᠴᠢ ᠡᠪᠦᠭᠡᠨ ᠴᠤ ᠪᠠᠢ ᠲᠡᠳᠡᠨ ᠦ ᠠᠮᠢᠳᠤᠷᠠᠯ ᠳᠤ ᠨᠤᠬᠤᠯᠠᠭᠳᠠᠭᠰᠠᠨ ᠥᠷᠥᠪᠳᠥᠮ᠎ᠡ ᠳᠦᠷᠢ ᠵᠢᠷᠤᠭ ᠬᠦᠦ ᠶᠢᠨ ᠲᠣᠯᠣᠭᠠᠢ ᠳᠤ ᠲᠣᠳᠣᠬᠠᠨ ᠳᠦᠷᠰᠦᠯᠡᠭᠳᠡᠵᠦ᠂ ᠲᠣᠮᠣ ᠬᠦᠮᠦᠨ ᠦ ᠠᠮᠢᠳᠤᠷᠠᠯ ᠳᠤ ᠬᠥᠯ ᠲᠠᠯᠪᠢᠭᠰᠠᠨ ᠠᠩᠬᠠᠨ ᠤ ᠠᠯᠬᠤᠮ ᠳᠤ ᠪᠠᠨ ᠬᠦᠦ ᠥᠪᠡᠷ ᠢ ᠪᠡᠨ ᠢᠯᠠᠨ ᠳᠡᠶᠢᠯᠦᠭᠴᠢ ᠮᠡᠲᠦ ᠪᠡᠷ ᠬᠠᠷᠠᠵᠠᠢ᠃ ᠬᠦᠮᠦᠨ ᠦ ᠠᠮᠢᠳᠤᠷᠠᠯ ᠳᠤ ᠬᠣᠭᠣᠯᠠ ᠪᠠᠨ ᠣᠯᠵᠤ ᠢᠳᠡᠭᠡᠳ ᠶᠠᠪᠤᠵᠤ ᠴᠢᠳᠠᠮᠠᠷ ᠰᠢᠭ ᠰᠠᠨᠠᠭᠳᠠᠭᠰᠠᠨ ᠠᠵᠢ᠃ ᠬᠦᠦ ᠠᠣᠮᠣᠷᠢ ᠮᠤᠵᠢ ᠶᠢᠨ ᠨᠠᠷᠢᠺᠣ ᠶᠢᠨ ᠨᠣᠭᠣᠭᠠᠨ ᠠᠯᠢᠮ᠎ᠠ ᠡᠭᠦᠷᠦᠭᠡᠳ ᠦᠢᠨᠠ ᠪᠠᠭᠤᠳᠠᠯ ᠳᠤ ᠢᠷᠡᠯ᠎ᠡ᠃ ᠡᠬᠡ ᠨᠢ ᠬᠡᠯᠡᠬᠦ ᠦᠭᠡ ᠪᠡᠨ ᠣᠯᠵᠤ ᠶᠠᠳᠠᠨ ᠵᠠᠩᠨᠠᠵᠤ ᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠪᠤᠴᠠᠬᠤ ᠨᠤᠲᠤᠭ ᠴᠤ ᠦᠭᠡᠢ᠂ ᠬᠠᠷᠢᠬᠤ ᠭᠡᠷ ᠣᠷᠣᠨ ᠴᠤ ᠦᠭᠡᠢ ᠪᠣᠯᠵᠠᠢ ᠭᠡᠬᠦ ᠪᠣᠳᠣᠯ ᠬᠥᠨᠳᠡᠢ ᠴᠡᠭᠡᠵᠢᠨ ᠳᠦ ᠨᠢ ᠤᠰᠤᠨ ᠤ ᠠᠳᠠᠯᠢ ᠨᠡᠪᠴᠢᠨ ᠲᠠᠷᠬᠠᠵᠠᠢ᠃ ᠲᠣᠮᠣ ᠬᠦᠦ ᠨᠢ ᠪᠠᠰᠠ ᠲᠣᠺᠢᠣ᠋ ᠍ ᠳᠤ ᠪᠤᠢ᠃ ᠪᠠᠶᠢᠰᠢᠩ ᠢᠶᠡᠨ ᠵᠠᠷᠤᠪᠠᠯ ᠲᠣᠮᠣ ᠬᠦᠦ ᠮᠠᠨᠢ ᠨᠠᠶᠢᠮᠠᠢ ᠬᠢᠬᠦ ᠬᠥᠷᠥᠩᠭᠡ ᠲᠡᠢ ᠪᠣᠯᠤᠨ᠎ᠠ ᠭᠡᠵᠦ ᠬᠡᠳᠦᠨ ᠴᠤ ᠵᠢᠯ ᠰᠢᠨᠠᠯᠤᠨ ᠪᠣᠳᠤᠭᠠᠳ ᠭᠡᠷ ᠡᠴᠡ ᠪᠡᠨ ᠬᠠᠭᠠᠴᠠᠨ ᠰᠠᠯᠬᠤ ᠵᠢᠷᠦᠬᠡ ᠵᠣᠷᠢᠭ ᠬᠦᠷᠦᠯ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠡᠳᠦᠢ ᠬᠦᠷᠦᠭᠰᠡᠨ ᠪᠠᠶᠢᠯ᠎ᠠ᠃ ᠭᠡᠲᠡᠯ᠎ᠡ᠂ ᠥᠪᠡᠷ ᠦᠨ ᠺᠢᠮᠣᠨᠣ ᠶᠢ ᠵᠠᠷᠤᠵᠤ ᠪᠠᠷᠠᠨ ᠬᠠᠶᠢᠷᠠᠯᠠᠨ ᠬᠠᠳᠠᠭᠠᠯᠠᠵᠤ ᠢᠷᠡᠭᠰᠡᠨ ᠡᠷ᠎ᠡ ᠨᠥᠬᠥᠷ ᠦᠨ ᠬᠢ ᠨᠢ ᠭᠣᠶᠣᠯ ᠤᠨ ᠬᠤᠪᠴᠠᠰᠤ ᠶᠢ ᠡᠨᠡ ᠬᠦᠦ ᠨᠢ ᠬᠠᠭᠤᠴᠢᠨ ᠮᠠᠭᠤ ᠪᠥᠰ ᠪᠠᠷᠠᠭ᠎ᠠ ᠮᠡᠲᠦ ᠵᠠᠷᠤᠵᠤ ᠣᠷᠬᠢᠭᠰᠠᠨ ᠪᠤᠰᠤ ᠤᠤ᠃ - ᠭᠤᠷᠪᠠᠨ ᠡᠳᠦᠷ ᠦᠨ ᠨᠣᠶᠢᠷ ᠢᠶᠠᠨ ᠠᠪᠤᠨ᠎ᠠ ᠭᠡᠳ ᠬᠦᠦ ᠡᠭᠡᠴᠢ ᠶᠢᠨ ᠢᠶᠡᠨ ᠭᠡᠷ ᠲᠦ ᠢᠷᠦᠭᠦᠲᠡ ᠪᠠᠲᠤ ᠪᠥᠬᠡ ᠭᠡᠭᠴᠢ ᠨᠢ ᠤᠨᠲᠠᠭᠠᠳ ᠥᠭᠭᠦᠯ᠎ᠡ᠃ ᠲᠣᠮᠣ ᠨᠠᠭᠤᠷ ᠲᠠᠢ ᠬᠣᠲᠠ ᠶᠢᠨ ᠵᠠᠬ᠎ᠠ ᠶᠢᠨ ᠠᠶᠢᠯ ᠪᠠᠶᠢᠯ᠎ᠠ᠃ ᠮᠠᠷᠭᠠᠰᠢ ᠨᠢ ᠬᠦᠦ ᠥᠷᠯᠥᠭᠡ ᠡᠷᠲᠡ ᠵᠢᠭᠠᠰᠤ ᠪᠠᠷᠢᠬᠤ ᠪᠠᠷ ᠨᠠᠭᠤᠷ ᠤᠷᠤᠭᠤ ᠭᠠᠭᠴᠠᠭᠠᠷ ᠢᠶᠠᠨ ᠶᠠᠪᠤᠵᠤ ᠪᠤᠴᠠᠵᠤ ᠢᠷᠡᠬᠦ ᠳᠦ ᠪᠡᠨ ᠬᠥᠷᠰᠢ ᠵᠡᠷᠭᠡᠯᠡᠳᠡᠭᠡ ᠠᠶᠢᠯ ᠤᠨ ᠲᠠᠪᠤ᠂ ᠵᠢᠷᠭᠤᠭᠠᠨ ᠬᠡᠦᠬᠡᠳ ᠢ ᠳᠠᠭᠠᠭᠤᠯᠤᠨ ᠢᠷᠡᠭᠡᠳ ᠭᠡᠷ ᠦᠨ ᠢᠶᠡᠨ ᠡᠭᠦᠳᠡᠨ ᠳᠦ ᠠᠷᠪᠠ ᠣᠷᠴᠢᠮ ᠬᠡᠯᠮᠡᠭ ᠵᠢᠭᠠᠰᠤ ᠬᠤᠪᠢᠶᠠᠵᠤ ᠥᠭᠪᠡ᠃ ᠭᠡᠷ ᠲᠦ ᠪᠡᠨ ᠣᠷᠣᠪᠠᠯ ᠡᠬᠡ᠂ ᠡᠭᠡᠴᠢ ᠬᠣᠶᠠᠷ ᠨᠢ ᠤᠬᠢᠯᠠᠵᠤ ᠪᠠᠶᠢᠬᠤ᠃ ᠬᠦᠷᠭᠡᠨ ᠠᠬ᠎ᠠ ᠨᠢ ᠬᠦᠦ ᠶᠢ ᠠᠵᠢᠯ ᠤᠨ ᠢᠶᠠᠨ ᠨᠢᠭᠡ ᠲᠠᠨᠢᠳᠠᠭ ᠰᠢᠪᠠᠷᠴᠢᠨ ᠤ ᠳᠤ ᠬᠠᠷ᠎ᠠ ᠪᠣᠷᠣ ᠠᠵᠢᠯ ᠬᠢᠯᠭᠡᠬᠦ ᠪᠡᠷ ᠰᠢᠢᠳᠥᠭᠰᠡᠨ ᠪᠠᠶᠢᠭᠰᠠᠨ ᠲᠤᠯᠠ ᠥᠨᠥ ᠣᠷᠣᠢ ᠬᠦᠦ ᠶᠢ ᠠᠪᠬᠤ ᠪᠠᠷ ᠢᠷᠡᠬᠦ ᠪᠣᠯᠵᠠᠢ᠃ ᠡᠬᠡ ᠨᠢ ᠠᠶᠢᠯ ᠳᠤ ᠵᠠᠷᠤᠬᠤ ᠪᠠᠷ ᠶᠠᠪᠤᠭᠤᠯᠬᠤ ᠳᠤ ᠪᠠᠨ ᠲᠤᠯᠤᠭᠰᠠᠨ ᠪᠣᠯ ᠪᠢ ᠬᠦᠦ ᠲᠡᠢ ᠪᠡᠨ ᠨᠤᠲᠤᠭ ᠤᠷᠤᠭᠤ ᠪᠠᠨ ᠬᠠᠷᠢᠨ᠎ᠠ ᠭᠡᠵᠦ ᠵᠢᠳᠬᠦᠪᠡ᠃ ᠬᠦᠦ ᠰᠢᠭᠤᠳ ᠲᠡᠳᠡᠨ ᠦ ᠳᠡᠷᠭᠡᠳᠡ ᠣᠶᠢᠷᠠᠳᠤᠨ ᠣᠴᠢᠭᠠᠳ ᠨᠠᠷᠢᠬᠠᠨ ᠭᠣᠣᠯ ᠳᠡᠭᠡᠭᠦᠷ ᠬᠡᠪ ᠨᠢᠭᠡ ᠭᠣᠳᠬᠢᠨ ᠬᠠᠷᠠᠶᠢᠨ ᠭᠠᠷᠳᠠᠭ ᠰᠢᠭ ᠢᠶᠡᠨ - ᠲᠡᠭᠡᠲᠡᠯ᠎ᠡ ᠪᠡᠨ ᠪᠦᠭᠦᠳᠡ ᠬᠡᠷᠡᠭᠦᠯ ᠤᠷᠤᠭᠤᠯ ᠬᠢᠨ ᠤᠬᠢᠯᠠᠭᠠᠨ ᠮᠠᠶᠢᠯᠠᠭᠠᠨ ᠪᠣᠯᠵᠤ ᠪᠠᠶᠢᠭ᠎ᠠ ᠪᠣᠯ ᠪᠢ ᠬᠠᠮᠢᠭᠠᠰᠢ ᠪᠠᠨ ᠴᠤ ᠬᠠᠮᠢᠶ᠎ᠠ ᠦᠭᠡᠢ ᠠᠵᠢᠯᠯᠠᠬᠤ ᠪᠠᠷ ᠶᠠᠪᠤᠨ᠎ᠠ ᠬᠡᠮᠡᠨ ᠣᠭᠲᠣ ᠲᠣᠭᠤᠭᠰᠠᠨ ᠰᠢᠨᠵᠢ ᠦᠭᠡᠢ ᠥᠭᠥᠯᠡᠪᠡ᠃ ᠡᠬᠡ ᠶᠠᠭᠤᠮ᠎ᠠ ᠬᠡᠯᠡᠯ ᠦᠭᠡᠢ ᠴᠢᠮᠡᠭᠡᠭᠦᠶᠢᠬᠡᠨ ᠬᠦᠦ ᠶᠢᠨ ᠢᠶᠡᠨ ᠣᠶᠢᠮᠣᠰᠤ ᠶᠢ ᠨᠥᠬᠥᠵᠦ ᠡᠬᠢᠯᠡᠪᠡ᠃ ᠬᠦᠦ ᠡᠬᠡ ᠶᠢᠨ ᠢᠶᠡᠨ ᠳᠠᠩ ᠺᠢᠮᠠᠨ᠎ᠠ᠂ ᠥᠪᠡᠷ ᠦᠨ ᠢᠶᠡᠨ ᠬᠤᠪᠴᠠᠰᠤ ᠮᠥᠨ ᠣᠳᠣ ᠵᠤᠨ ᠤ ᠤᠯᠠᠷᠢᠯ ᠠᠶᠢᠰᠤᠢ ᠠᠲᠠᠯ᠎ᠠ ᠡᠪᠦᠯ ᠦᠨ ᠣᠶᠢᠮᠣᠰᠤ ᠪᠠᠨ ᠬᠦᠷᠲᠡᠯ᠎ᠡ ᠲᠡᠭᠡᠰᠢ ᠳᠦ ᠪᠡᠨ ᠬᠢᠭᠡᠳ ᠢᠷᠡᠭᠰᠡᠨ ᠪᠠᠶᠢᠯ᠎ᠠ᠃ ᠣᠷᠴᠢᠭᠤᠯᠤᠭᠰᠠᠨ᠄ ᠳᠠᠮᠳᠢᠨᠵᠠᠪ ᠤᠨ ᠠᠯᠲᠠᠨᠴᠡᠴᠡᠭ ᠬᠥᠷᠪᠡᠭᠦᠯᠦᠭᠰᠡᠨ : ᠲᠦᠮᠡᠲᠦ ᠰᠢᠨ᠎ᠡ