ᠰᠢᠭᠦᠮᠵᠢ
ᠬᠠᠶᠢᠷᠠ ᠪᠠᠷ ᠬᠥᠭᠯᠡᠭᠳᠡᠭᠰᠡᠨ ᠬᠥᠭᠵᠢᠮ ᠦᠨ ᠡᠭᠡᠰᠢᠭ
ᠮᠣᠩᠭᠣᠯ ᠬᠦᠮᠦᠨ ᠭᠡᠳᠡᠭ ᠢᠶᠡᠨ ᠢᠮᠠᠭᠲᠠ ᠰᠠᠨᠠᠵᠤ ᠬᠦᠮᠦᠨ ᠦ ᠨᠤᠲᠤᠭ ᠲᠤ ᠴᠤ ᠦᠯᠦ ᠭᠡᠭᠡᠬᠦ ᠶᠢᠨ ᠤᠴᠢᠷ
ᠨᠡᠶᠢ᠍ᠲᠡᠯᠡᠭ᠍ᠰᠡᠨ ᠬᠥᠬᠡ ᠲᠣᠯᠪᠣᠲᠤ ᠳ ᠊ ᠲᠡᠮᠦᠷᠸᠴᠢᠷ
ᠵ ∙ ᠫᠦᠷᠪᠦ 《ᠬᠥᠭᠵᠢᠮ ᠦᠨ ᠡᠭᠡᠰᠢᠭ》 ᠷᠣᠮᠠᠨ ᠪᠤᠶᠤ ᠬᠠᠶᠢᠷᠠ ᠪᠠᠷ ᠬᠥᠭᠯᠡᠭᠳᠡᠭᠰᠡᠨ ᠬᠥᠭᠵᠢᠮ ᠦᠨ ᠡᠭᠡᠰᠢᠭ
5078
2018-11-20 20:09
发表于:内蒙古
ᠮᠣᠩᠭᠣᠯ ᠬᠦᠮᠦᠨ ᠭᠡᠳᠡᠭ ᠢᠶᠡᠨ ᠢᠮᠠᠭᠲᠠ ᠰᠠᠨᠠᠵᠤ ᠬᠦᠮᠦᠨ ᠦ ᠨᠤᠲᠤᠭ ᠲᠤ ᠴᠤ ᠦᠯᠦ ᠭᠡᠭᠡᠬᠦ ᠶᠢᠨ ᠤᠴᠢᠷ
ᠨᠡᠶᠢ᠍ᠲᠡᠯᠡᠭ᠍ᠰᠡᠨ ᠬᠥᠬᠡ ᠲᠣᠯᠪᠣᠲᠤ ᠳ ᠊ ᠲᠡᠮᠦᠷᠸᠴᠢᠷ
ᠵ ∙ ᠫᠦᠷᠪᠦ 《ᠬᠥᠭᠵᠢᠮ ᠦᠨ ᠡᠭᠡᠰᠢᠭ》 ᠷᠣᠮᠠᠨ ᠪᠤᠶᠤ ᠬᠠᠶᠢᠷᠠ ᠪᠠᠷ ᠬᠥᠭᠯᠡᠭᠳᠡᠭᠰᠡᠨ ᠬᠥᠭᠵᠢᠮ ᠦᠨ ᠡᠭᠡᠰᠢᠭ
ᠠᠯᠢ ᠴᠤ ᠤᠴᠢᠷ ᠢᠶᠠᠨ ᠮᠡᠳᠡᠬᠦ ᠦᠭᠡᠢ ᠵᠠᠯᠠᠭᠤ ᠬᠦᠮᠦᠨ ᠦ ᠳᠡᠪᠡᠷᠡᠭᠦᠨ ᠵᠠᠩ ᠢᠶᠡᠷ ᠬᠣᠰᠢᠭᠤ ᠨᠣᠶᠠᠨ ᠢᠶᠠᠨ ᠳᠠᠭᠠᠨ ᠠᠯᠤᠰ ᠤᠨ ᠵᠠᠮ ᠳᠤ ᠭᠠᠷᠤᠭᠰᠠᠨ ᠪᠢᠴᠢᠭᠡᠴᠢ ᠬᠦᠦ ᠨᠢᠭᠡ ᠯᠠ ᠮᠡᠳᠡᠬᠦ ᠳᠦ ᠳᠡᠯᠡᠬᠡᠢ ᠶᠢᠨ ᠨᠥᠭᠥᠭᠡ ᠪᠥᠭᠡᠷᠡᠨ ᠳᠦ ᠣᠴᠢᠨᠠ ᠭᠡᠳᠡᠭ ᠶᠣᠰᠣᠲᠠᠢ ᠵᠡᠭᠦᠳᠦᠨ ᠳᠦ ᠴᠤ ᠣᠷᠣᠮ ᠦᠭᠡᠢ ᠠᠳᠠᠯ ᠶᠠᠪᠤᠳᠠᠯ ᠪᠠᠶᠢᠬᠤ᠃ ᠲᠡᠦᠬᠡᠨ ᠵᠣᠬᠢᠶᠠᠯ ᠤᠨ ᠭᠠᠷᠮᠠᠭᠠᠢ ᠮᠠᠰᠲ᠋ᠸᠷ ᠵ ∙ ᠫᠦᠷᠪᠦ ᠭᠤᠸᠠᠢ ᠶᠢᠨ ᠠᠩᠬᠠᠨ ᠤ ᠷᠣᠮᠠᠨ ᠭᠡᠬᠦ ᠳᠦ ᠦᠨᠡᠬᠡᠷ ᠴᠢᠨᠰᠠᠭᠠ ᠲᠠᠢ ᠪᠢᠴᠢᠵᠡᠢ᠃
ᠳᠦᠷᠢ ᠦᠳ ᠦᠨ ᠢᠶᠡᠨ ᠪᠣᠳᠣᠯ ᠰᠠᠨᠠᠭᠠ᠂ ᠠᠭᠠᠰᠢ ᠠᠪᠤᠷᠢ᠂ ᠬᠠᠷᠠᠮᠰᠠᠯ ᠭᠤᠨᠢᠭ᠂ ᠪᠠᠴᠢᠭᠤᠷᠠᠯ ᠵᠣᠪᠠᠯᠠᠩ ᠢ ᠨᠢᠳᠦᠨ ᠳᠦ ᠬᠠᠷᠠᠭᠳᠠᠵᠤ᠂ ᠰᠡᠳᠬᠢᠯ ᠣᠭᠰᠢᠲᠠᠯᠠ ᠳᠦᠷᠰᠦᠯᠡᠨ ᠪᠢᠴᠢᠨᠡ ᠭᠡᠳᠡᠭ ᠤᠷᠠ ᠴᠢᠳᠠᠪᠤᠷᠢ ᠶᠤᠮ ᠳ᠋ᠠ᠃ ᠰᠣᠴᠢᠶᠠᠯᠢᠰᠲ ᠷᠧᠶᠠᠯᠢᠰᠮ ᠤᠷᠠᠯᠢᠭ᠂ ᠤᠳᠬᠠ ᠵᠣᠬᠢᠶᠠᠯ ᠤᠨ ᠰᠢᠯᠭᠠᠭᠤᠷ ᠪᠣᠯᠵᠤ ᠬᠡᠪᠰᠢᠮᠡᠯ ᠠᠷᠭᠠ ᠪᠠᠷᠢᠯ᠂ ᠬᠡᠪᠯᠡᠮᠡᠯ ᠳᠦᠷᠢ ᠨᠦᠭᠦᠳ ᠪᠤᠢ ᠪᠣᠯᠤᠭᠰᠠᠨ ᠵᠢᠷᠠᠭᠠᠳ ᠣᠨ ᠤ ᠲᠡᠷᠡ ᠴᠠᠭ ᠦᠶᠡ ᠳᠦ ᠠᠷᠠᠳ ᠤᠨ ᠬᠤᠪᠢᠰᠬᠠᠯ᠂ ᠨᠠᠮ ᠵᠠᠰᠠᠭ᠂ ᠨᠢᠭᠡᠳᠦᠯᠵᠢᠬᠦ ᠬᠥᠳᠡᠯᠭᠡᠭᠡᠨ᠂ ᠠᠵᠢᠯᠴᠢᠨ ᠠᠩᠭᠢ ᠶᠢᠨ ᠮᠠᠭᠲᠠᠭᠤ ᠭᠡᠬᠦ ᠮᠡᠲᠦ ᠤᠯᠠᠮᠵᠢᠯᠠᠯ ᠪᠣᠯᠤᠭᠰᠠᠨ ᠰᠡᠳᠦᠪ ᠡᠴᠡ ᠬᠠᠬᠢ ᠥᠭᠡᠷᠡ᠂ ᠡᠭᠡᠯ ᠵᠢᠷ ᠦᠨ ᠵᠠᠯᠠᠭᠤ ᠬᠦᠮᠦᠨ ᠦ ᠬᠠᠶᠢᠷᠠ ᠰᠡᠳᠬᠢᠯ᠂ ᠡᠬᠡ ᠣᠷᠣᠨ᠂ ᠭᠠᠵᠠᠷ ᠰᠢᠷᠤᠶ ᠶᠢᠨ ᠦᠨᠡ ᠴᠡᠨᠡ ᠶᠢ ᠮᠡᠳᠡᠷᠡᠭᠦᠯᠦᠭᠰᠡᠨ ᠡᠶᠢᠮᠦ ᠵᠣᠬᠢᠶᠠᠯ ᠪᠢᠴᠢᠨᠡ ᠭᠡᠳᠡᠭ ᠬᠣᠪᠣᠷ ᠲᠣᠬᠢᠶᠠᠯ᠃
ᠤᠯᠠᠭᠠᠨ ᠵᠠᠰᠠᠭ ᠲᠣᠭᠲᠠᠵᠤ ᠦᠢᠮᠡᠭᠡᠨ ᠰᠠᠮᠠᠭᠤᠨ ᠲᠠᠢ ᠪᠣᠯᠤᠭᠰᠠᠨ᠂ ᠬᠦᠮᠦᠨ ᠰᠡᠭᠦᠳᠡᠷ ᠡᠴᠡ ᠪᠡᠨ ᠴᠤ ᠦᠷᠭᠦᠬᠦ ᠬᠡᠴᠡᠭᠦᠦ ᠴᠠᠭ ᠦᠶᠡ ᠳᠦ ᠠᠷᠭᠠ ᠦᠭᠡᠢ ᠶᠢᠨ ᠡᠷᠬᠡᠨ ᠳᠦ ᠡᠬᠡ ᠣᠷᠣᠨ ᠠᠴᠠ ᠪᠠᠨ ᠳᠦᠷᠪᠡᠨ ᠭᠠᠷᠤᠭᠰᠠᠨ ᠣᠯᠠᠨ ᠴᠠᠭᠠᠴᠢ ᠬᠦᠮᠦᠰ ᠦᠨ ᠨᠢᠭᠡᠨ ᠲᠥᠯᠥᠭᠡᠯᠡᠯ ᠨᠢ ᠵᠣᠬᠢᠶᠠᠯ ᠤᠨ ᠭᠣᠣᠯ ᠪᠠᠭᠠᠲᠤᠷ ᠰᠠᠶᠢᠨᠪᠢᠯᠢᠭ ᠶᠤᠮ᠃ ᠮᠣᠩᠭᠣᠯ ᠤᠨ ᠨᠡᠷᠡᠲᠦ ᠬᠦᠮᠦᠨ ᠳ᠋ᠢᠯᠠᠪᠠ ᠬᠤᠲᠤᠭᠲᠤ ᠶᠢᠨ ᠲᠤᠭᠤᠯᠤᠭᠰᠠᠨ ᠠᠮᠢᠳᠤᠷᠠᠯ ᠠᠴᠠ ᠰᠠᠨᠠᠭᠠ ᠠᠪᠤᠭᠰᠠᠨ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠭᠳᠠᠨᠠ᠃ ᠨᠡᠷᠡᠲᠦ ᠮᠣᠩᠭᠣᠯᠴᠢ ᠡᠷᠳᠡᠮᠲᠡᠨ ᠬᠠᠩᠭᠢᠨ ᠭᠣᠮᠪᠣᠵᠠᠪ ᠬᠡᠮᠡᠬᠦ ᠬᠦᠮᠦᠨ 《ᠡᠨᠡ ᠶᠠᠭ ᠮᠢᠨᠦ ᠲᠤᠭᠤᠯᠤᠭᠰᠠᠨ ᠠᠮᠢᠳᠤᠷᠠᠯ ᠪᠠᠶᠢᠨᠠ》 ᠭᠡᠵᠦ ᠵᠣᠬᠢᠶᠠᠯᠴᠢ ᠲᠠᠢ ᠳᠣᠲᠣᠨᠣ ᠨᠥᠬᠥᠷᠯᠡᠭᠰᠡᠨ ᠲᠤᠬᠠᠢ ᠶᠠᠷᠢᠶᠠ ᠪᠤᠢ᠃ ᠵᠣᠬᠢᠶᠠᠯ ᠥᠪᠡᠷ ᠢᠶᠡᠨ ᠪᠣᠳᠠᠲᠠᠢ᠂ ᠦᠨᠡᠮᠰᠢᠯᠲᠡᠢ ᠪᠢᠴᠢᠭᠳᠡᠭᠰᠡᠨ ᠪᠠᠶᠢᠭᠠ ᠨᠢ ᠬᠡᠨ ᠨᠢᠭᠡᠨ ᠬᠦᠮᠦᠨ ᠦ ᠨᠠᠮᠲᠠᠷ ᠲᠡᠦᠬᠡ ᠶᠢ ᠰᠠᠨᠠᠭᠳᠠᠭᠤᠯᠬᠤ ᠨᠢ ᠠᠷᠭᠠ ᠦᠭᠡᠢ᠃ ᠵᠣᠬᠢᠶᠠᠯ ᠤᠨ ᠳᠦᠷᠢ ᠦᠳ ᠠᠮᠢᠳᠤ᠂ ᠰᠣᠨᠢᠷᠬᠠᠯᠲᠠᠢ ᠵᠣᠪᠠᠯᠠᠩ ᠭᠤᠨᠢᠭ ᠢ ᠨᠢ ᠬᠤᠪᠢᠶᠠᠯᠴᠠᠬᠤ ᠮᠡᠲᠦ ᠰᠡᠳᠬᠢᠯ ᠳᠦ ᠬᠥᠨᠳᠡᠭᠦᠷ ᠲᠥᠷᠦᠳᠡᠭ᠃ ᠰᠠᠶᠢᠨᠪᠢᠯᠢᠭ᠂ ᠶᠠᠩᠵᠢᠨᠬᠣᠷᠯᠸᠠ ᠬᠣᠶᠠᠷ ᠤᠨ ᠬᠤᠪᠢᠷᠠᠰᠢ ᠦᠭᠡᠢ ᠬᠠᠶᠢᠷᠠ ᠰᠡᠳᠬᠢᠯ᠂ ᠬᠠᠪᠬᠠᠨ ᠳᠤ ᠣᠷᠣᠭᠰᠠᠨ ᠴᠢᠨᠣᠠ ᠰᠢᠭ ᠪᠣᠯᠤᠭᠰᠠᠨ ᠴᠡ ᠨᠣᠶᠠᠨ ᠤ ᠪᠠᠴᠢᠭᠤᠷᠠᠯ᠂ ᠬᠢᠲᠠᠳ ᠬᠦᠮᠦᠨ ᠦ ᠳᠣᠲᠣᠭᠤᠷ ᠲᠠᠮᠢᠷ᠂ ᠠᠯᠤᠰᠠᠭᠤᠷ ᠮᠡᠷᠡᠬᠦ ᠳᠣᠲᠣᠷᠠ ᠤᠬᠠᠭᠠᠨ ᠢ ᠮᠡᠳᠡᠷᠡᠭᠦᠯᠬᠦ ᠳᠠᠩᠵᠢᠶᠠᠳ᠂ ᠭᠧᠨᠧᠷᠠᠯ ᠬᠣᠶᠠᠷ᠂ ᠬᠦᠮᠦᠨ ᠦ ᠣᠯᠠᠨ ᠳᠣᠲᠣᠷᠠ ᠰᠠᠶᠢᠨ ᠬᠦᠮᠦᠨ ᠪᠤᠢ ᠶᠢ ᠰᠠᠨᠠᠭᠤᠯᠬᠤ ᠰᠢᠳᠤᠷᠭᠤ ᠬᠢᠲᠠᠳ ᠵᠠᠯᠠᠭᠤ᠂ ᠰᠠᠶᠢᠨ ᠰᠠᠨᠠᠭᠠᠲᠤ ᠡᠷᠳᠡᠮᠲᠡᠨ ᠬᠢᠲᠠᠳ ᠡᠪᠦᠭᠡᠨ᠂ ᠭᠡᠨᠡᠨ ᠴᠠᠶᠢᠯᠠᠭᠠᠨ ᠮᠡᠷᠢ ᠪᠦᠰᠡᠭᠦᠢ ᠭᠡᠳ ᠵᠣᠬᠢᠶᠠᠯ ᠤᠨ ᠳᠦᠷᠢ ᠪᠣᠯᠭᠠᠨ ᠣᠨᠴᠠᠯᠢᠭ ᠲᠠᠢ᠃
ᠲᠥᠷᠦᠵᠥ ᠥᠰᠦᠭᠰᠡᠨ ᠭᠠᠵᠠᠷ ᠰᠢᠷᠣᠢ ᠠᠯᠲᠠᠨ ᠠᠴᠠ ᠦᠨᠡᠲᠡᠢ ᠭᠡᠳᠡᠭ ᠢ ᠵᠣᠬᠢᠶᠠᠯ ᠤᠨ ᠭᠣᠣᠯ ᠳᠦᠷᠢ ᠶᠠᠰᠤ ᠮᠢᠬᠠᠨ ᠳᠤ ᠲᠤᠯᠲᠠᠯᠠ ᠮᠡᠳᠡᠷᠡᠭᠦᠯᠵᠦ ᠪᠠᠶᠢᠨᠠ᠃ ᠬᠠᠯᠠ ᠦᠵᠡᠵᠦ᠂ ᠬᠠᠯᠠᠭᠤᠨ ᠴᠢᠯᠠᠭᠤ ᠳᠣᠯᠢᠶᠠᠭᠰᠠᠨ ᠰᠠᠶᠢᠨᠪᠢᠯᠢᠭ 《ᠬᠠᠷᠢ ᠭᠠᠵᠠᠷ ᠤᠨ ᠬᠠᠶᠢᠷᠭᠤ ᠬᠠᠲᠠᠭᠤ᠂ ᠳᠠᠰᠤᠭᠰᠠᠨ ᠭᠠᠵᠠᠷ ᠤᠨ ᠳᠠᠪᠤᠤ ᠵᠥᠭᠡᠯᠡᠨ》 ᠪᠣᠯᠬᠤ ᠶᠢ ᠤᠬᠠᠭᠠᠷᠠᠵᠤ ᠡᠴᠦᠰ ᠦᠨ ᠮᠥᠴᠡ ᠳᠦ ᠡᠬᠡ ᠣᠷᠣᠨ ᠤᠷᠤᠭᠤ ᠪᠠᠨ ᠠᠮᠢ ᠬᠠᠶᠢᠷᠠ ᠦᠭᠡᠢ ᠲᠡᠮᠡᠴᠡᠵᠦ ᠪᠠᠶᠢᠭᠠ ᠨᠢ ᠥᠷᠥᠪᠳᠥᠮᠡᠷ᠃ ᠮᠣᠩᠭᠣᠯ ᠬᠦᠮᠦᠨ ᠭᠡᠳᠡᠭ ᠢᠶᠡᠨ ᠢᠮᠠᠭᠲᠠ ᠰᠠᠨᠠᠵᠤ ᠬᠦᠮᠦᠨ ᠦ ᠨᠤᠲᠤᠭ ᠲᠤ ᠦᠨᠳᠦᠰᠦᠨ ᠦ ᠬᠢ ᠪᠡᠨ ᠨᠠᠨᠳᠢᠨ ᠴᠢᠨᠠᠷ ᠤᠳ ᠢ ᠭᠡᠭᠡᠬᠦ ᠦᠭᠡᠢ ᠶᠠᠪᠤᠬᠤ ᠶᠢᠨ ᠴᠢᠬᠤᠯᠠ ᠶᠢ ᠰᠠᠨᠠᠭᠤᠯᠤᠭᠰᠠᠨ ᠵᠣᠬᠢᠶᠠᠯ ᠪᠦᠯᠦᠭᠡ᠃ 《ᠲᠤᠷᠤᠭ ᠶᠠᠳᠠᠷᠠᠪᠠᠯ ᠠᠭᠤᠯᠠ ᠪᠠᠨ᠂ ᠬᠦᠮᠦᠨ ᠶᠠᠳᠠᠷᠠᠪᠠᠯ ᠲᠥᠷᠥᠯ ᠢᠶᠡᠨ》 ᠵᠣᠷᠢᠳᠠᠭ ᠪᠢᠴᠢᠭᠳᠡᠭᠡ ᠦᠭᠡᠢ ᠬᠠᠤᠯᠢ ᠠᠯᠢ ᠴᠤ ᠴᠠᠭ ᠦᠶᠡ ᠳᠦ ᠬᠦᠴᠦᠨᠲᠡᠢ᠃
ᠮᠣᠩᠭᠣᠯ ᠤᠨ ᠲᠩᠷᠢ ᠳᠦ ᠥᠳᠦᠯᠡᠭᠰᠡᠨ ᠪᠦᠷᠭᠦᠳ ᠮᠣᠩᠭᠣᠯ ᠤᠨ ᠢᠶᠠᠨ ᠭᠠᠵᠠᠷ ᠰᠢᠷᠤᠶ ᠳᠤ ᠰᠢᠩᠭᠡᠬᠦ ᠨᠢ ᠵᠢᠮᠠ ᠶᠣᠰᠣ ᠪᠢᠯᠡ᠃ ᠲᠦᠮᠡᠨ ᠪᠡᠷᠡ ᠶᠢᠨ ᠭᠠᠵᠠᠷ ᠠᠴᠠ ᠠᠭᠤᠯᠠ ᠳᠠᠪᠠᠭᠠ᠂ ᠤᠰᠤ ᠮᠥᠷᠡᠨ ᠢ ᠭᠠᠲᠤᠯᠤᠨ ᠲᠦᠮᠡᠨ ᠪᠡᠷᠬᠡ ᠶᠢ ᠲᠤᠭᠤᠯᠤᠨ ᠡᠬᠡ ᠨᠤᠲᠤᠭ ᠲᠤ ᠪᠠᠨ ᠭᠦᠶᠦᠵᠦ ᠢᠷᠡᠳᠡᠭ ᠬᠦᠯᠦᠭ ᠮᠣᠷᠢ ᠬᠦᠮᠦᠨ ᠬᠣᠶᠠᠷ ᠠᠳᠠᠯᠢᠬᠠᠨ᠃ ᠬᠠᠶᠢᠷᠠ ᠰᠡᠳᠬᠢᠯ ᠨᠢ ᠠᠮᠢᠳᠤᠷᠠᠯ ᠪᠣᠯᠵᠤ ᠴᠡᠴᠡᠭᠯᠡᠭᠡ ᠦᠭᠡᠢ ᠴᠤ ᠬᠠᠶᠢᠷᠠᠲᠠᠢ ᠪᠦᠰᠡᠭᠦᠢ ᠶᠢᠨ ᠢᠶᠡᠨ ᠰᠦᠨᠡᠰᠦ ᠰᠢᠩᠭᠡᠭᠰᠡᠨ ᠰᠢᠳᠤᠷᠭᠤ ᠬᠥᠭᠵᠢᠮ ᠢ ᠨᠠᠨᠳᠢᠩᠨᠠᠨ ᠠᠪᠴᠤ ᠶᠠᠪᠤᠭᠠ ᠰᠠᠶᠢᠨᠪᠢᠯᠢᠭ ᠤᠨ ᠲᠤᠭᠤᠯᠤᠭᠰᠠᠨ ᠠᠮᠢᠳᠤᠷᠠᠯ ᠠᠳᠠᠯ ᠶᠠᠪᠤᠳᠠᠯ᠂ ᠡᠭᠡᠳᠡᠷᠡᠭᠡ ᠵᠣᠪᠠᠯᠠᠩ ᠢᠶᠠᠷ ᠳᠦᠭᠦᠷᠡᠩ ᠴᠤ ᠬᠦᠨᠳᠦ ᠪᠡᠷᠬᠡ ᠳᠦ ᠰᠥᠭᠦᠳᠦᠭᠡ ᠦᠭᠡᠢ ᠬᠦᠴᠦᠷᠬᠡᠭ ᠬᠤᠪᠢ ᠬᠦᠮᠦᠨ ᠪᠢᠯᠡ᠃ ᠤᠶᠠᠩᠭᠠ ᠰᠡᠳᠬᠢᠯ ᠵᠦᠢ ᠶᠢᠨ ᠭᠠᠶᠢᠬᠠᠯᠲᠠᠢ ᠲᠤᠭᠤᠷᠪᠢᠯ ᠪᠣᠯᠤᠭᠰᠠᠨ ᠡᠯᠡ ᠪᠦᠲᠦᠭᠡᠯ ᠳᠦᠷᠢ ᠶᠢᠨ ᠳᠣᠲᠣᠭᠠᠳᠤ ᠶᠢᠷᠲᠢᠨᠴᠦ᠂ ᠰᠡᠳᠬᠢᠯ ᠵᠦᠢ ᠶᠢ ᠴᠢᠳᠠᠪᠤᠷᠢᠯᠢᠭ ᠨᠡᠭᠡᠭᠡᠵᠦ᠂ ᠦᠢᠯᠡ ᠶᠠᠪᠤᠳᠠᠯ ᠢ ᠳᠦᠷᠰᠦᠯᠡᠨ ᠪᠢᠴᠢᠬᠦ ᠨᠢ ᠭᠣᠶᠢᠳᠠ ᠤᠷᠠᠨ ᠲᠤᠯᠠ ᠵᠣᠬᠢᠶᠠᠯ ᠤᠨ ᠪᠠᠭᠠᠲᠤᠷ ᠤᠳ ᠲᠠᠢ ᠲᠡᠷᠡ ᠴᠠᠭ ᠦᠶᠡ ᠳᠦ ᠣᠴᠢᠭᠰᠠᠨ ᠮᠡᠲᠦ ᠭᠦᠨ ᠭᠦᠨᠵᠡᠭᠡᠢ ᠰᠡᠳᠬᠢᠭᠳᠡᠯ ᠲᠦᠷᠦᠭᠰᠡᠨ ᠪᠢᠯᠡ᠃
3 0