ᠰᠢᠭᠦᠮᠵᠢ
ᠳᠠᠮᠳᠢᠨᠰᠦ᠋ᠷᠦᠩ ᠦᠨ ᠤᠷᠢᠶᠠᠩᠬᠠᠢ ᠮᠣᠩᠭᠣᠯ ᠤᠨ ᠤᠷᠠᠨ ᠵᠣᠬᠢᠶᠠᠯ ᠤᠨ ᠶᠢᠷᠲᠢᠨᠴᠦ ᠳ᠋ᠤ
ᠳᠠᠮᠳᠢᠨᠰᠦ᠋ᠷᠦᠩ ᠦᠨ ᠤᠷᠢᠶᠠᠩᠬᠠᠢ ᠮᠣᠩᠭᠣᠯ ᠤᠨ ᠤᠷᠠᠨ ᠵᠣᠬᠢᠶᠠᠯ ᠤᠨ ᠶᠢᠷᠲᠢᠨᠴᠦ ᠳ᠋ᠤ
5472
2018-11-19 16:42
发表于:内蒙古
ᠳᠠᠮᠳᠢᠨᠰᠦ᠋ᠷᠦᠩ ᠦᠨ ᠤᠷᠢᠶᠠᠩᠬᠠᠢ ᠮᠣᠩᠭᠣᠯ ᠤᠨ ᠤᠷᠠᠨ ᠵᠣᠬᠢᠶᠠᠯ ᠤᠨ ᠶᠢᠷᠲᠢᠨᠴᠦ ᠳ᠋ᠤ ᠬᠦᠦᠷᠨᠢᠯ ᠵᠣᠬᠢᠶᠠᠯ ᠢᠶᠠᠷ ᠠᠩᠬᠠ ᠬᠥᠯ ᠲᠠᠯᠪᠢᠭᠰᠠᠨ ᠪᠢᠯᠡ᠃ 1972 ᠣᠨ ᠳᠤ 《ᠬᠦᠮᠦᠨ ᠲᠠᠨᠠ》 ᠨᠡᠶᠢᠲᠡᠯᠡᠯ᠂ ᠨᠠᠶᠢᠷᠠᠭᠤᠯᠤᠯ ᠤᠨ ᠨᠣᠮ᠂ 1974 ᠣᠨ ᠳᠤ 《ᠲᠠᠨ ᠤ ᠰᠢᠨᠡ ᠲᠠᠨᠢᠯ》 ᠲᠤᠭᠤᠵᠢ᠂ 1978 ᠣᠨ ᠳᠤ 《ᠡᠪᠦᠯ ᠦᠨ ᠰᠢᠪᠠᠭᠤ》 ᠥᠭᠦᠯᠡᠯᠭᠡ ᠶᠢᠨ ᠲᠡᠭᠦᠪᠦᠷᠢ ᠪᠡᠨ ᠬᠡᠪᠯᠡᠭᠦᠯᠵᠦ ᠬᠦᠦᠷᠨᠢᠯ ᠵᠣᠬᠢᠶᠠᠯᠴᠢ ᠶᠢᠨ ᠬᠤᠪᠢ ᠪᠡᠷ ᠶᠡᠬᠡ ᠤᠳᠬᠠ ᠵᠣᠬᠢᠶᠠᠯ ᠤᠨ ᠡᠭᠦᠳᠡ ᠶᠢ ᠰᠡᠬᠦᠭᠰᠡᠨ ᠪᠠᠶᠢᠨᠠ᠃ ᠭᠡᠪᠡᠴᠦ ᠡᠳᠦᠭᠡ ᠳ ∙ ᠤᠷᠢᠶᠠᠩᠬᠠᠢ ᠬᠡᠮᠡᠬᠦ ᠬᠥᠮᠥᠨ ᠥᠪᠡᠷ ᠢ ᠪᠡᠨ ᠬᠠᠩᠭᠠᠯᠲᠠᠲᠠᠢ ᠢᠷᠠᠭᠤ ᠨᠠᠶᠢᠷᠠᠭᠴᠢᠯᠠᠵᠤ᠂ ᠲᠡᠭᠦᠨ ᠢ ᠨᠢ ᠳᠠᠭᠠᠭᠠᠳ ᠪᠢᠳᠡ ᠴᠤ ᠬᠠᠩᠭᠠᠯᠲᠠ ᠲᠠᠢ ᠢᠷᠠᠭᠤ ᠨᠠᠶᠢᠷᠠᠭᠴᠢᠯᠠᠭᠳᠠᠵᠠᠢ᠃
ᠡᠷᠢᠯᠬᠢᠯᠡᠯ ᠪᠠ ᠢᠯᠡᠷᠬᠡᠢᠯᠡᠯ
ᠶᠡᠷᠦ ᠨᠢ ᠶᠠᠮᠠᠷᠪᠠ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠤᠷᠠᠨ ᠪᠦᠲᠦᠭᠡᠯ ᠭᠡᠳᠡᠭ ᠴᠠᠭ ᠬᠤᠭᠤᠴᠠᠭᠠᠨ ᠠᠴᠠ ᠡᠰᠡ ᠬᠠᠮᠢᠶᠠᠷᠤᠯᠲᠣ ᠮᠥᠨ ᠴᠢᠨᠠᠷ ᠲᠠᠢ᠃ ᠢᠷᠠᠭᠤ ᠨᠠᠶᠢᠷᠠᠭ ᠲᠤ ᠲᠠᠯᠪᠢᠬᠤ ᠰᠢᠯᠭᠠᠭᠤᠷ ᠪᠠᠶᠢᠳᠠᠭ ᠪᠣᠯ ᠲᠡᠷᠡ ᠨᠢ ᠠᠯᠢ ᠴᠤ ᠴᠠᠭ ᠲᠤ ᠠᠮᠢ ᠬᠠᠯᠠᠭᠤᠨ ᠢᠶᠠᠷ ᠢᠶᠠᠨ ᠬᠠᠭᠤᠴᠢᠷᠠᠰᠢ ᠦᠭᠡᠢ ᠪᠠᠶᠢᠬᠤ ᠮᠥᠨ ᠴᠢᠨᠠᠷ ᠶᠤᠮ᠃ ᠭᠡᠪᠡᠴᠦ ᠲᠡᠳᠡᠭᠡᠷ ᠢ ᠠᠩᠬᠠᠯᠠᠨ ᠰᠤᠳᠤᠯᠵᠤ᠂ ᠲᠠᠨᠢᠨ ᠮᠡᠳᠡᠬᠦᠢ ᠶᠢᠨ ᠬᠦᠷᠢᠶᠡᠨ ᠳᠦ ᠣᠷᠣᠭᠤᠯᠵᠤ ᠢᠷᠡᠬᠦ ᠶᠢᠨ ᠲᠤᠯᠠᠳᠠ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠪᠠᠷᠢᠮᠠ ᠲᠠᠯᠪᠢᠮᠠ ᠴᠠᠭ ᠬᠤᠭᠤᠴᠠᠭᠠ ᠶᠢ ᠪᠠᠷᠢᠮᠵᠢᠶᠠ ᠪᠣᠯᠭᠠᠬᠤ ᠠᠴᠠ ᠠᠷᠭᠠ ᠦᠭᠡᠢ᠃ ᠡᠨᠡ ᠡᠭᠦᠳᠡᠨ ᠡᠴᠡ ᠨᠢ ᠬᠠᠷᠠᠪᠠᠯ ᠶᠠᠮᠠᠷᠪᠠ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠤᠷᠠᠨ ᠪᠦᠲᠦᠭᠡᠯ ᠦᠨ ᠵᠠᠮᠨᠠᠯ ᠢ ᠬᠠᠮᠤᠭ ᠤᠨ ᠪᠦᠳᠦᠭᠦᠪᠴᠢᠯᠡᠭᠰᠡᠨ ᠪᠠᠶᠢᠳᠠᠯ ᠢᠶᠠᠷ ᠬᠣᠶᠠᠷ ᠬᠡᠪ ᠲᠥᠷᠬᠥ ᠳ᠋ᠤ ᠬᠤᠪᠢᠶᠠᠵᠤ ᠪᠣᠯᠬᠤ ᠶᠤᠮ᠃ ᠲᠡᠷᠡ ᠨᠢ᠄
ᠨᠢᠭᠡᠳᠦᠭᠡᠷ ᠲᠦ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠥᠪᠡᠷ ᠦᠨ ᠬᠡᠯᠡ᠂ ᠰᠡᠳᠬᠢᠯᠭᠡᠨ ᠦ ᠪᠣᠯᠤᠮᠵᠢ ᠶᠢ ᠲᠤᠷᠰᠢᠨ᠂ ᠡᠮᠦᠨᠡᠬᠢ ᠦᠶᠡ ᠶᠢᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠰᠡᠳᠬᠢᠯᠭᠡᠨ ᠦ ᠥᠪ᠂ ᠣᠨᠣᠯ ᠲᠠᠢ ᠲᠠᠨᠢᠯᠴᠠᠵᠤ᠂ ᠥᠪᠡᠷ ᠦᠨ ᠳᠠᠬᠢᠨ ᠳᠠᠪᠲᠠᠭᠳᠠᠰᠢ ᠦᠭᠡᠢ ᠬᠡᠯᠪᠡᠷᠢ ᠶᠢ ᠤᠯᠬᠤ ᠦᠶᠡ ᠪᠤᠶᠤ 《ᠡᠷᠢᠯᠬᠢᠯᠡᠯ ᠦᠨ ᠦᠶᠡ》᠂
ᠬᠣᠶᠠᠳᠤᠭᠠᠷ ᠲᠤ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠥᠪᠡᠷ ᠦᠨ ᠰᠡᠷᠡᠯ ᠮᠡᠳᠡᠷᠡᠮᠵᠢ᠂ ᠹᠢᠯᠣᠰᠣᠹᠢ ᠶᠢ ᠥᠪᠡᠷ ᠦᠨ ᠪᠤᠢ ᠪᠣᠯᠭᠠᠭᠰᠠᠨ ᠲᠤᠭᠤᠷᠪᠢᠯ ᠵᠦᠢ ᠶᠢᠨ ᠬᠡᠯᠪᠡᠷᠢ᠂ ᠤᠷᠠᠨ ᠰᠠᠶᠢᠬᠠᠨ ᠤ ᠲᠤᠷᠰᠢᠯᠭᠠ ᠳᠤ ᠪᠠᠨ ᠳᠤᠯᠳᠤᠶᠢᠳᠤᠨ ᠢᠯᠡᠷᠬᠡᠶᠢᠯᠡᠵᠦ ᠡᠬᠢᠯᠡᠬᠦ ᠦᠶᠡ ᠪᠤᠶᠤ 《ᠢᠯᠡᠷᠬᠡᠶᠢᠯᠡᠯ ᠦᠨ ᠦᠶᠡ》᠃
ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠬᠤᠪᠢ ᠳᠤ ᠥᠪᠡᠷ ᠦᠨ ᠡᠷᠢᠯᠬᠢᠯᠡᠯ ᠦᠨ ᠦᠶᠡ ᠳ᠋ᠡᠭᠡᠨ ᠬᠢᠷᠢ ᠶᠡᠬᠡ ᠬᠤᠭᠤᠴᠠᠭᠠ ᠵᠠᠷᠤᠴᠠᠭᠤᠯᠤᠭᠰᠠᠨ ᠠᠴᠠ ᠲᠡᠭᠦᠨ ᠦ ᠤᠷᠠ ᠴᠢᠳᠠᠪᠤᠷᠢ᠂ ᠠᠪᠢᠶᠠᠰ ᠪᠢᠯᠢᠭ᠂ ᠰᠡᠳᠬᠢᠯᠭᠡᠨ ᠦ ᠬᠤᠷᠳᠤ ᠶᠢ ᠬᠠᠷᠠᠵᠤ ᠪᠣᠯᠤᠨᠠ᠃ ᠲᠡᠭᠦᠨᠴᠢᠯᠡᠨ ᠢᠯᠡᠷᠬᠡᠶᠢᠯᠡᠯ ᠦᠶᠡ ᠳ᠋ᠡᠭᠡᠨ ᠶᠠᠮᠠᠷᠬᠠᠤ ᠪᠠᠶᠠᠯᠢᠭ ᠥᠪ ᠦᠯᠡᠳᠡᠭᠡᠭᠰᠡᠨ ᠡᠴᠡ ᠨᠢ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠪᠤᠢ ᠪᠣᠯᠭᠠᠭᠰᠠᠨ ᠬᠡᠯᠡ᠂ ᠰᠡᠳᠬᠢᠯᠭᠡᠨ ᠦ ᠴᠠᠷᠠᠭᠠ ᠶᠢ ᠬᠠᠷᠠᠵᠤ ᠪᠣᠯᠳᠠᠭ᠃ ᠹᠷᠠᠨᠼᠢ ᠶᠢᠨ ᠰᠢᠮᠪᠣᠯᠢᠰᠲ ᠰᠢᠯᠦᠭᠴᠢ ᠰᠢᠷᠠᠯ ᠪᠣᠳᠣᠯᠧᠷ ᠨᠠᠰᠤᠨ ᠲᠤᠷᠰᠢᠳᠠ ᠪᠠᠨ ᠨᠢᠭᠡ ᠨᠣᠮ ᠳᠡᠭᠡᠷᠡ ᠠᠵᠢᠯᠯᠠᠭᠰᠠᠨ᠃ ᠴᠠᠭ ᠦᠶᠡ ᠳ᠋ᠡᠭᠡᠨ ᠠᠯᠳᠠᠷᠲᠠᠢ᠂ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠭᠳᠡᠭᠰᠡᠨ ᠤᠷᠠᠨ ᠰᠠᠶᠢᠬᠠᠨ ᠤ ᠰᠢᠭᠦᠮᠵᠢᠯᠡᠭᠴᠢ᠂ ᠡᠰᠰᠡᠴᠢᠨ ᠠᠲᠠᠯᠠ ᠪᠠᠨ ᠠᠮᠢᠳᠤᠷᠠᠯ ᠲᠤᠷᠰᠢᠳᠠ ᠪᠠᠨ ᠭᠠᠭᠴᠠᠬᠠᠨ 《ᠡᠮᠭᠡᠭ ᠴᠡᠴᠡᠭᠡᠰ》(Les fleurs du mal) ᠬᠡᠮᠡᠬᠦ ᠨᠣᠮ ᠪᠦᠲᠦᠭᠡᠭᠰᠡᠨ᠃ ᠡᠨᠡ ᠨᠢ ᠲᠡᠭᠦᠨ ᠢ ᠠᠯᠳᠠᠷᠰᠢᠭᠤᠯᠬᠤ ᠳᠤ᠂ ᠢᠯᠠᠩᠭᠤᠶᠠ ᠬᠣᠶᠢᠴᠢ ᠶᠢᠨ ᠰᠢᠯᠦᠭᠴᠢᠳ ᠦᠨ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠳᠦ ᠨᠥᠯᠥᠭᠡᠯᠡᠬᠦ ᠳᠦ᠂ ᠳᠡᠯᠡᠬᠡᠢ ᠶᠢᠨ ᠬᠠᠮᠤᠭ ᠤᠨ ᠠᠭᠤᠤ ᠨᠠᠶᠢᠷᠠᠭᠴᠢ ᠬᠡᠮᠡᠬᠦ ᠠᠯᠳᠠᠷ ᠢ ᠣᠯᠠᠨ ᠦᠨᠳᠦᠰᠦᠲᠡᠨ ᠦ ᠰᠡᠳᠬᠢᠭᠴᠢᠳ ᠡᠴᠡ ᠬᠦᠷᠲᠡᠬᠦ ᠳᠦ ᠰᠠᠭᠠᠳ ᠪᠣᠯᠤᠭᠰᠠᠨ ᠦᠭᠡᠢ᠃ ᠨᠣᠶᠠᠨ ᠰᠢᠷᠠᠯ ᠪᠣᠳᠣᠯᠧᠷ ᠪᠡᠶᠡ ᠶᠢᠨ ᠳᠣᠷᠣᠶᠢᠲᠠᠯ ᠢᠶᠠᠷ ᠪᠡᠶᠡ ᠪᠠᠷᠠᠭᠠ ᠦᠭᠡᠢ ᠪᠣᠯ ᠠᠬᠢᠭᠠᠳ ᠨᠣᠮ ᠭᠠᠷᠭᠠᠬᠤ ᠯᠠ ᠪᠠᠶᠢᠭᠰᠠᠨ ᠪᠠᠶᠢᠬᠤ ᠯᠠ ᠳ᠋ᠠ᠃ ᠭᠡᠬᠦ ᠳᠦ ᠪᠡᠨ ᠭᠠᠷᠭᠠᠭᠰᠠᠨ ᠭᠠᠭᠴᠠ ᠨᠣᠮ ᠨᠢ ᠤᠷᠠᠨ ᠪᠦᠲᠦᠭᠡᠯ ᠳᠦ ᠪᠡᠨ ᠰᠢᠳᠤᠷᠭᠤ ᠪᠠᠷ ᠬᠠᠨᠳᠤᠬᠤ ᠶᠢᠨ᠂ ᠥᠪᠡᠷ ᠦᠨ 《ᠡᠷᠢᠯᠬᠢᠯᠡᠯ ᠢᠶᠡᠨ ᠬᠦᠨᠳᠦᠳᠭᠡᠬᠦ》 ᠍ ᠶᠢᠨ ᠵᠢᠱᠢᠶᠡ ᠭᠠᠷᠴᠠᠭᠠ ᠦᠭᠡᠢ ᠮᠥᠨ᠃
ᠥᠷᠥᠨᠡ ᠳ᠋ᠠᠬᠢᠨ ᠤ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠬᠣᠶᠠᠷ ᠶᠡᠬᠡ ᠰᠠᠷᠲᠠᠸᠠᠬᠢ ᠰᠢᠷᠠᠯ ᠪᠣᠳᠣᠯᠧᠷ᠂ ᠤᠤᠯᠲᠠ ᠤᠲ᠋ᠮᠧᠨ ᠨᠠᠷ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠶᠢᠷᠲᠢᠨᠴᠦ ᠳ᠋ᠤ ᠬᠣᠶᠠᠷ ᠲᠣᠮᠣᠬᠠᠨ ᠰᠢᠨᠡᠴᠢᠯᠡᠯ ᠬᠢᠭᠰᠡᠨ ᠪᠢᠯᠡ᠃ ᠰᠢᠷᠠᠯ ᠪᠣᠳᠣᠯᠧᠷ ᠦᠨ ᠬᠤᠪᠢ ᠳᠤ ᠮᠣᠷᠠᠯ ᠪᠤᠶᠤ ᠬᠦᠮᠦᠯᠢᠭ ᠴᠢᠭ ᠱᠤᠭᠤᠮ᠂ ᠶᠣᠰᠣ ᠰᠤᠷᠲᠠᠬᠤᠨ ᠢ ᠲᠠᠶᠠᠭᠳᠠᠨ ᠬᠠᠶᠠᠵᠤ ᠣᠯᠠᠨ ᠶᠠᠩᠵᠤ ᠪᠠᠷ ᠲᠠᠶᠢᠯᠵᠤ ᠪᠣᠯᠬᠤᠶᠢᠴᠠ᠂ ᠪᠡᠯᠭᠡᠳᠡᠯ᠂ ᠶᠥᠭᠡᠳᠡᠯ᠂ ᠢᠷᠤᠯᠠᠯ ᠪᠦᠬᠦᠢ 《ᠵᠠᠳᠠᠭᠠᠢ ᠵᠦᠢᠷᠯᠡᠯ》 ᠍ ᠲᠡᠢ ᠰᠢᠯᠦᠭ ᠪᠢᠴᠢᠵᠦ ᠪᠠᠶᠢᠪᠠ᠃ ᠤᠤᠯᠲᠠ ᠤᠲ᠋ᠮᠧᠨ ᠦ ᠬᠤᠪᠢ ᠳᠤ ᠴᠤ ᠡᠨᠡ ᠲᠠᠯᠠ ᠳᠡᠭᠡᠷᠡ ᠪᠣᠳᠣᠯᠧᠷ ᠠᠴᠠ ᠳᠤᠲᠠᠬᠤ ᠵᠦᠢᠯ ᠦᠭᠡᠢ᠃ ᠭᠡᠬᠦ ᠳᠦ ᠪᠡᠨ ᠲᠡᠭᠦᠨ ᠦ ᠬᠠᠮᠤᠭ ᠤᠨ ᠭᠣᠣᠯ ᠣᠨᠴᠠᠯᠢᠭ ᠪᠣᠯ ᠰᠢᠯᠦᠭᠯᠢᠭ ᠵᠦᠢ᠂ ᠬᠡᠯᠡᠨ ᠦ ᠲᠣᠭᠲᠠᠭᠰᠠᠨ ᠲᠠᠭᠠᠯᠠᠯ ᠭᠡᠬᠦ ᠡᠴᠡ ᠪᠡᠨ ᠰᠡᠳᠬᠢᠯ ᠵᠦᠢ ᠶᠢᠨ ᠦᠶᠡᠯᠵᠡᠯ᠂ ᠬᠥᠳᠡᠯᠭᠡᠭᠡᠨ ᠢ ᠳᠠᠭᠠᠭᠰᠠᠨ 《ᠴᠢᠯᠦᠭᠡᠲᠦ ᠰᠢᠯᠦᠭᠯᠡᠯ》 ᠶᠤᠮ᠃ ᠬᠣᠵᠢᠮ ᠡᠨᠡ ᠬᠣᠶᠠᠷ ᠶᠡᠬᠡ ᠨᠠᠶᠢᠷᠠᠭᠴᠢ ᠶᠢᠨ ᠰᠢᠨᠡᠴᠢᠯᠡᠯ ᠮᠣᠳᠧᠷᠨᠢᠰᠮ ᠤᠨ ᠡᠭᠦᠳᠬᠡᠯ ᠪᠣᠯᠤᠭᠰᠠᠨ᠃
1970-1980 ᠍ ᠊ᠭᠠᠳ ᠣᠨ ᠳᠤ ᠤᠷᠠᠨ ᠵᠣᠬᠢᠶᠠᠯ ᠳᠤ ᠬᠥᠯ ᠲᠠᠯᠪᠢᠭᠰᠠᠨ ᠳ ∙ ᠤᠷᠢᠶᠠᠩᠬᠠᠢ᠂ ᠣ᠊ ∙ ᠳᠠᠰᠢᠪᠠᠯᠪᠠᠷ᠂ ᠪ ∙ ᡀᠠᠭᠸᠠᠰᠦ᠋ᠷᠦᠩ ᠨᠠᠷ ᠴᠤᠬᠤᠮ ᠳᠡᠭᠡᠷᠡᠬᠢ ᠬᠣᠶᠠᠷ ᠰᠠᠷᠲᠠᠸᠠᠬᠢ ᠶᠢᠨ ᠡᠷᠢᠯᠬᠢᠯᠡᠯ ᠢ ᠡᠬᠡ ᠬᠡᠯᠡᠨ ᠳᠦ ᠪᠡᠨ ᠬᠢᠭᠰᠡᠨ ᠶᠤᠮ᠃
ᠳ ᠊ ᠤᠷᠢᠶᠠᠩᠬᠠᠢ᠌ ᠶᠢᠨ ᠡᠷᠢᠯᠬᠢᠯᠡᠯ ᠤᠨ ᠦᠶᠡ
ᠰᠢᠯᠦᠭ ᠪᠣᠯᠵᠤ ᠪᠤᠢ ᠣᠩᠭᠣᠳ ᠢ ᠲᠣᠣᠷᠯᠠᠭᠳᠠᠵᠤ ᠪᠤᠢ ᠡᠷᠬᠡ ᠴᠢᠯᠦᠭᠡ ᠭᠡᠯᠲᠡᠢ᠃
ᠤᠴᠢᠷ ᠨᠢ ᠠᠬᠤᠢ ᠶᠢ ᠴᠤ᠂ ᠰᠡᠷᠡᠯ ᠢ ᠴᠤ ᠦᠭᠡᠨ ᠳᠦ ᠪᠠᠭᠤᠯᠭᠠᠨᠠ ᠭᠡᠳᠡᠭ ᠦᠭᠡ ᠶᠢ ᠲᠣᠣᠷᠯᠠᠵᠤ ᠪᠤᠢ ᠬᠡᠷᠡᠭ᠃
ᠭᠡᠬᠦ ᠳᠦ ᠪᠡᠨ ᠲᠡᠳᠡ ᠲᠣᠣᠷ ᠲᠠᠢ ᠪᠠᠨ ᠴᠤ ᠨᠢᠰᠴᠦ ᠴᠢᠳᠠᠨᠠ᠃
ᠳ ∙ ᠤᠷᠢᠶᠠᠩᠬᠠᠢ
ᠢᠷᠠᠭᠤ ᠨᠠᠶᠢᠷᠠᠭᠴᠢ ᠳ ∙ ᠤᠷᠢᠶᠠᠩᠬᠠᠢ 1980 ᠣᠨ ᠳᠤ ᠠᠩᠬᠠᠨ ᠤ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠪᠦᠲᠦᠭᠡᠯ ᠪᠣᠯᠬᠤ 《ᠴᠠᠭ ᠤᠨ ᠬᠥᠯ》 ᠨᠣᠮ ᠢᠶᠠᠨ ᠬᠡᠪᠯᠡᠭᠦᠯᠦᠭᠰᠡᠨ ᠡᠴᠡ ᠬᠣᠶᠢᠰᠢ 10 ᠭᠠᠷᠤᠢ ᠵᠢᠯ ᠦᠨ ᠳᠣᠲᠣᠷᠠ 《ᠨᠢᠯᠬᠠ ᠬᠥᠯ ᠦᠨ ᠰᠠᠯᠬᠢ》 1982᠂ 《ᠴᠡᠭᠡᠵᠢᠨ ᠦ ᠨᠥᠮᠥᠷᠢ》 1988᠂ 《ᠳᠠᠭᠤ ᠦᠭᠡᠢ ᠨᠣᠮ》 1990᠂ 《ᠨᠠᠰᠤᠨ ᠤ ᠬᠡᠰᠢᠭ》 1991᠂ 《ᠦᠭᠡ ᠶᠢᠨ ᠰᠥ᠋》 1992 ᠭᠡᠰᠡᠨ ᠲᠠᠪᠤᠨ ᠨᠣᠮ ᠬᠡᠪᠯᠡᠭᠦᠯᠦᠭᠰᠡᠨ ᠪᠠᠶᠢᠳᠠᠭ᠃ ᠴᠤᠬᠤᠮ ᠡᠨᠡᠬᠦ ᠲᠠᠪᠤᠨ ᠨᠣᠮ ᠳᠤ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠲᠤᠭᠤᠷᠪᠢᠯ ᠵᠦᠢ ᠶᠢᠨ ᠦᠨᠳᠦᠰᠦᠨ ᠥᠩᠭᠡ ᠠᠶᠠᠰ ᠪᠥᠷᠢᠯᠳᠦᠨ ᠲᠣᠭᠲᠠᠭᠰᠠᠨ ᠪᠠᠶᠢᠨᠠ᠃ ᠡᠨᠡ ᠦᠶᠡ ᠳᠦ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠬᠡᠯᠪᠡᠷᠢ ᠠᠭᠤᠯᠭᠠ ᠶᠢᠨ ᠥᠷᠭᠡᠨ ᠴᠠᠷᠠᠭᠠ ᠲᠠᠢ ᠡᠷᠢᠯᠬᠢᠯᠡᠯ ᠬᠢᠵᠡᠢ᠃ ᠲᠡᠭᠦᠨ ᠦ ᠡᠷᠢᠯᠬᠢᠯᠡᠯ ᠦᠳ ᠡᠴᠡ 1974 ᠣᠨ ᠳᠤ ᠠᠩᠬᠠ ᠬᠡᠪᠯᠡᠭᠦᠯᠦᠭᠰᠡᠨ 《ᠪᠢᠳᠡ-ᠳᠣᠲᠣᠭᠠᠳᠤ ᠰᠢᠲᠠᠯᠲᠠ ᠶᠢᠨ ᠬᠥᠳᠡᠯᠭᠡᠭᠦᠷ》 ᠬᠡᠮᠡᠬᠦ ᠨᠠᠶᠢᠷᠠᠭᠯᠠᠯ ᠨᠢ ᠶᠡᠬᠡᠬᠡᠨ ᠠᠯᠳᠠᠷᠲᠠᠢ᠃ ᠡᠨᠡ ᠨᠠᠶᠢᠷᠠᠭᠯᠠᠯ ᠪᠣᠯ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠡᠷᠢᠯᠬᠢᠯᠡᠯ ᠦᠨ ᠤᠳᠤᠷᠢᠳᠬᠠᠯ ᠭᠡᠮᠡᠷ ᠣᠯᠠᠨ ᠲᠠᠯᠠᠲᠤ ᠰᠢᠨᠵᠢ ᠲᠡᠢ᠃ ᠲᠡᠳᠡᠭᠡᠷ ᠰᠢᠨᠵᠢ ᠶᠢ ᠳᠠᠷᠠᠭᠠᠯᠠᠭᠤᠯᠪᠠᠯ᠄
ᠨᠢᠭᠡ ᠳᠦ᠂ ᠤᠤᠯᠲᠠ ᠤᠲ᠋ᠮᠧᠨ ᠦ ᠪᠤᠢ ᠪᠣᠯᠭᠠᠭᠰᠠᠨ ᠵᠠᠳᠠᠭᠠᠢ ᠰᠢᠯᠦᠭᠯᠡᠯ ᠦᠨ ᠠᠷᠭᠠ ᠶᠢ ᠵᠣᠷᠢᠭᠲᠠᠢ ᠲᠤᠷᠰᠢᠭᠰᠠᠨ᠃
ᠬᠣᠶᠠᠷ ᠲᠤ᠂ ᠲᠤᠬᠠᠢ ᠶᠢᠨ ᠦᠶᠡ ᠳᠦ ᠬᠦᠴᠦᠲᠡᠢ ᠪᠠᠶᠢᠭᠰᠠᠨ ᠦᠵᠡᠯ ᠰᠤᠷᠲᠠᠯ ᠤᠨ ᠥᠩᠭᠡ ᠠᠶᠠᠰ ᠢ ᠴᠢᠯᠦᠭᠡᠲᠦ ᠵᠦᠢᠷᠯᠡᠯ᠂ ᠡᠷᠭᠢᠴᠡᠭᠦᠯᠦᠯ ᠢᠶᠡᠷ ᠪᠠᠶᠠᠵᠢᠭᠤᠯᠤᠭᠰᠠᠨ ᠨᠡᠶᠢᠲᠡᠯᠡᠯ ᠦᠨ ᠥᠩᠭᠡ ᠠᠶᠠᠰ ᠲᠠᠢ ᠰᠢᠯᠦᠭ ᠦᠳ ᠪᠢᠴᠢᠭᠰᠡᠨ᠃ ᠵᠠᠷᠢᠮ ᠵᠣᠬᠢᠶᠠᠯᠴᠢᠳ ᠤᠨ ᠦᠵᠡᠯ ᠰᠤᠷᠲᠠᠯ ᠤᠨ ᠰᠢᠨᠵᠢ ᠲᠡᠢ ᠰᠢᠯᠦᠭ ᠦᠳ ᠴᠠᠭᠠᠨ ᠰᠢᠯᠦᠭᠯᠢᠭ᠂ ᠬᠣᠭᠣᠰᠣᠨ ᠮᠠᠭᠲᠠᠭᠤ ᠰᠢᠨᠵᠢ ᠲᠡᠢ ᠪᠠᠶᠢᠳᠠᠭ ᠪᠣᠯ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠡᠨᠡ ᠰᠢᠯᠦᠭ ᠦᠳ ᠨᠢ ᠠᠮᠢᠳᠤᠷᠠᠵᠤ ᠪᠤᠢ ᠨᠡᠶᠢᠭᠡᠮ᠂ ᠨᠡᠶᠢᠭᠡᠮ ᠢᠶᠡᠷ ᠢᠶᠡᠨ ᠵᠣᠷᠢᠵᠤ ᠪᠤᠢ ᠦᠵᠡᠯ ᠰᠠᠨᠠᠭᠠ ᠶᠢ ᠲᠠᠨᠢᠬᠤ ᠶᠢ ᠣᠷᠣᠯᠳᠤᠭᠰᠠᠨ ᠰᠡᠬᠡᠭᠡᠯᠢᠭ᠂ ᠣᠶᠤᠨᠯᠢᠭ ᠥᠭᠦᠯᠡᠮᠵᠢ ᠪᠡᠷ ᠢᠶᠡᠨ ᠢᠯᠭᠠᠷᠠᠳᠠᠭ᠃
ᠭᠤᠷᠪᠠ ᠳᠤ᠂ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠹᠢᠯᠣᠰᠣᠹᠢ᠂ ᠳᠣᠲᠣᠭᠠᠳᠤ ᠬᠦᠦᠷᠨᠢᠯ ᠦᠨ ᠥᠩᠭᠡ ᠠᠶᠠᠰ ᠡᠨᠡ ᠪᠦᠲᠦᠭᠡᠯ ᠳᠦ ᠣᠯᠠᠨ ᠲᠠᠯᠠ ᠪᠠᠷ ᠠᠩᠬᠠᠯᠠᠨ ᠲᠤᠰᠣᠭᠰᠠᠨ᠃ ᠶᠡᠷᠦ ᠨᠢ 《ᠴᠠᠭ ᠤᠨ ᠬᠥᠯ》 ᠨᠣᠮ ᠳᠡᠭᠡᠷᠡᠬᠢ ᠭᠤᠷᠪᠠᠨ ᠴᠢᠭᠯᠡᠯ ᠢᠶᠡᠷ ᠡᠷᠢᠯ ᠬᠢᠭᠰᠡᠨ ᠰᠢᠯᠦᠭ ᠦᠳ ᠡᠴᠡ ᠪᠦᠲᠦᠳᠡᠭ᠃ ᠡᠯᠡ ᠠᠯᠳᠠᠷᠲᠤ ᠨᠠᠶᠢᠷᠠᠭᠯᠠᠯ ᠤᠨ ᠨᠢᠭᠡ ᠬᠡᠰᠡᠭ ᠡᠴᠡ ᠤᠩᠰᠢᠭᠠᠳ ᠦᠵᠡᠶᠡ..᠃
ᠬᠠᠶᠢᠷᠠ ᠪᠣᠯ ᠬᠥᠳᠡᠯᠮᠦᠷᠢ
ᠪᠢᠳᠡ ᠬᠣᠲᠠ ᠬᠥᠳᠡᠭᠡ ᠶᠢᠨ ᠬᠦᠮᠦᠰ
ᠪᠢᠳᠡ ᠬᠣᠲᠠ ᠬᠥᠳᠡᠭᠡ ᠶᠢᠨ ᠬᠦᠮᠦᠰ
ᠪᠢᠳᠡ ᠬᠥᠳᠡᠭᠡ ᠶᠢ ᠲᠡᠭᠡᠭᠡᠵᠦ ᠬᠣᠲᠠ ᠳ᠋ᠤ ᠠᠪᠴᠤ ᠢᠷᠡᠨᠡᠮ᠃
ᠬᠣᠲᠠ ᠶᠢ ᠲᠡᠭᠡᠭᠡᠵᠦ ᠬᠥᠳᠡᠭᠡ ᠳᠦ ᠠᠪᠠᠴᠢᠨᠠᠮ᠃
ᠬᠥᠯ ᠲᠠᠯᠪᠢᠬᠤ ᠳᠤ ᠯᠠ ᠰᠡᠳᠬᠢᠯ ᠴᠡᠯᠦᠰᠬᠢᠬᠦ
ᠬᠥᠳᠡᠭᠡ ᠲᠠᠯᠠ᠂ ᠨᠤᠭᠤ ᠬᠥᠨᠳᠡᠶ ᠳ᠋ᠤ ᠭᠡᠷ ᠲᠡᠢ ᠴᠤ᠂
ᠬᠥᠪᠴᠢ ᠳ᠋ᠤ ᠤᠷᠤᠮᠳᠠᠬᠤ ᠪᠤᠭᠤ ᠶᠢᠨ ᠳᠠᠭᠤᠨ ᠳᠤ ᠬᠠᠶᠢᠷᠠᠲᠠᠢ ᠴᠤ
ᠠᠭᠤᠷ ᠴᠠᠬᠢᠯᠭᠠᠨ᠂ ᠭᠦᠦᠷ ᠳᠠᠯᠠᠩ᠂
ᠠᠭᠤᠷᠬᠠᠢ᠂ ᠪᠠᠷᠢᠯᠭᠠ ᠶᠢᠨ ᠨᠦᠷᠭᠢᠭᠡᠨ ᠰᠡᠳᠬᠢᠯ ᠳᠦ ᠪᠢᠴᠢᠭᠡᠰᠦᠲᠡᠢ︕
ᠠᠲ᠋ᠣᠮ ᠤᠨ ᠴᠥᠮᠡ᠂ ᠨᠠᠷᠠᠨ ᠤ ᠡᠨᠧᠷᠭᠢ
ᠠᠯᠢ ᠠᠯᠢ ᠨᠢ ᠪᠣᠳᠣᠯ ᠳᠤ ᠪᠠᠭᠳᠠᠭᠠᠰᠤᠲᠠᠢ︕
᠁ ᠥᠷᠯᠥᠭᠡ ᠭᠠᠷᠤᠭᠠᠳ ᠬᠠᠮᠢᠭᠠᠰᠢ ᠪᠠᠨ ᠴᠤ ᠬᠠᠷᠠᠭᠰᠠᠨ
ᠥᠨᠳᠥᠷ ᠪᠠᠷᠢᠯᠭᠠ ᠶᠢᠨ ᠴᠣᠩᠬᠣᠨ ᠳᠤ ᠨᠠᠷᠠ ᠠᠰᠠᠨ
ᠥᠰᠴᠦ ᠲᠦᠷᠦᠭᠰᠡᠨ ᠢᠰᠡᠭᠡᠢ ᠭᠡᠷ ᠡᠴᠡ ᠮᠢᠨᠢ
ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠪᠣᠳᠣᠯ ᠤᠷᠪᠠᠭᠤᠯᠤᠨᠠᠮ᠃
ᠲᠣᠯᠣᠭᠠᠳ ᠤᠨ ᠰᠢᠯᠢ ᠪᠡᠷ ᠴᠤᠬᠤᠶᠢᠬᠤ ᠲᠡᠮᠡᠭᠡᠳ ᠰᠢᠭ
ᠲᠣᠷᠣᠮ᠂ ᠲᠠᠶᠢᠯᠤᠭ ᠰᠤᠷᠭᠠᠬᠤ ᠡᠷᠳᠡᠮ ᠢ ᠮᠢᠨᠢ ᠴᠢᠮᠠᠯᠠᠭᠤᠯᠤᠨᠠᠮ ᠁
ᠮᠡᠳᠡᠭᠡᠵᠢ ᠬᠡᠷᠡᠭ ᠥᠨᠥᠳᠥᠷ ᠦᠨ ᠣᠯᠠᠨ ᠤ ᠲᠠᠨᠢᠯ ᠳ ∙ ᠤᠷᠢᠶᠠᠩᠬᠠᠢ ᠠᠴᠠ ᠬᠡᠯᠡ ᠵᠦᠢ᠂ ᠤᠷᠠ ᠶᠢᠨ ᠬᠤᠪᠢ ᠳᠤ ᠳᠤᠲᠠᠮᠠᠭ ᠪᠠᠶᠢᠭᠰᠠᠨ ᠨᠢ ᠣᠶᠢᠯᠠᠭᠠᠮᠵᠢᠲᠠᠢ᠃ ᠭᠡᠬᠦ ᠳᠦ ᠪᠡᠨ ᠲᠤᠬᠠᠢ ᠶᠢᠨ ᠦᠶᠡ ᠳ᠋ᠡᠭᠡᠨ ᠱᠤᠤᠭᠢᠶᠠᠨ ᠲᠠᠷᠢᠵᠤ᠂ ᠣᠶᠤᠨᠯᠢᠭ ᠬᠦᠷᠢᠶᠡᠨ ᠳ᠋ᠡᠬᠢ ᠥᠷᠭᠡᠨ ᠬᠡᠯᠡᠯᠴᠡᠭᠦᠯᠭᠡ ᠶᠢᠨ ᠰᠡᠳᠦᠪ ᠪᠣᠯᠵᠤ ᠴᠢᠳᠠᠬᠤᠶᠢᠴᠠ ᠡᠷᠢᠯᠬᠢᠯᠡᠯ ᠪᠠᠶᠢᠵᠤ ᠳ᠋ᠡ᠃
ᠮᠣᠩᠭᠤᠯ ᠤᠯᠤᠰ ᠤᠨ ᠪᠠᠭᠰᠢ ᠶᠢᠨ ᠶᠡᠬᠡ ᠰᠤᠷᠭᠠᠭᠤᠯᠢ ᠶᠢᠨ ᠫᠷᠣᠹᠧᠰᠰᠣᠷ ᠼ ∙ ᠮᠠᠭᠰᠠᠷ ᠤᠨ 《 ᠬᠣᠷᠢᠳᠤᠭᠠᠷ ᠵᠠᠭᠤᠨ ᠤ ᠮᠣᠩᠭᠣᠯ ᠤᠨ ᠤᠳᠬᠠ ᠵᠣᠬᠢᠶᠠᠯ ᠤᠨ ᠰᠢᠭᠦᠮᠵᠢᠯᠡᠯ》 ᠨᠢᠭᠡ ᠰᠡᠳᠦᠪᠲᠦ ᠪᠦᠲᠦᠭᠡᠯ ᠮᠠᠨ ᠤ ᠤᠳᠬᠠ ᠵᠣᠬᠢᠶᠠᠯ ᠤᠨ ᠣᠨᠣᠯ ᠤᠨ ᠰᠡᠳᠬᠢᠯᠭᠡᠨ ᠳᠦ ᠴᠢᠬᠤᠯᠠ ᠪᠠᠶᠢᠷᠢ ᠰᠠᠭᠤᠷᠢ ᠡᠵᠡᠯᠡᠬᠦ ᠤᠴᠢᠷᠲᠠᠢ ᠪᠦᠲᠦᠭᠡᠯ᠃ ᠡᠯᠡ ᠨᠣᠮ ᠳᠤ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ 《ᠪᠢᠳᠡ-ᠳᠣᠲᠣᠭᠠᠳᠤ ᠰᠢᠲᠠᠯᠲᠠ ᠶᠢᠨ ᠬᠥᠳᠡᠯᠭᠡᠭᠦᠷ》 ᠨᠠᠶᠢᠷᠠᠭᠯᠠᠯ ᠢ ᠲᠣᠭᠣᠷᠢᠭᠰᠠᠨ ᠮᠠᠷᠭᠤᠭᠠᠨ ᠬᠡᠷᠬᠢᠨ ᠥᠷᠨᠢᠵᠦ ᠪᠠᠶᠢᠭᠰᠠᠨ ᠢ ᠲᠣᠶᠢᠮᠣᠯᠠᠭᠰᠠᠨ ᠨᠢ ᠪᠤᠢ᠄
《ᠡᠨᠡ ᠮᠠᠷᠭᠤᠭᠠᠨ 70 ᠍ ᠊ᠭᠠᠳ ᠣᠨ ᠳᠤ ᠮᠣᠩᠭᠣᠯ ᠢᠷᠠᠭᠤ ᠨᠠᠶᠢᠷᠠᠭ ᠲᠤ ᠢᠯᠡᠷᠡᠭᠰᠡᠨ ᠭᠦᠨ ᠤᠬᠠᠭᠠᠨᠴᠢ ᠰᠡᠳᠬᠢᠯᠭᠡᠨ ᠦ ᠲᠤᠰᠬᠠᠯ ᠪᠣᠯᠤᠭᠰᠠᠨ ᠤ ᠬᠢ ᠪᠠᠨ ᠬᠤᠪᠢ ᠳᠤ ᠴᠢᠨᠠᠭᠰᠢᠳᠠ ᠪᠣᠳᠣᠯ ᠪᠢᠰᠢᠯᠭᠠᠯ ᠤᠨ ᠤᠶᠠᠩᠭᠠ ᠬᠥᠭᠵᠢᠬᠦ᠂ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠤᠷᠠᠨ ᠴᠢᠳᠠᠪᠤᠷᠢ᠂ ᠰᠡᠳᠬᠢᠯᠭᠡᠨ ᠦ ᠲᠦᠪᠰᠢᠨ ᠳᠡᠭᠡᠭᠰᠢᠯᠡᠬᠦ ᠳᠦ ᠠᠴᠢ ᠬᠣᠯᠪᠣᠭᠳᠠᠯ ᠲᠠᠢ ᠪᠠᠶᠢᠭᠰᠠᠨ ᠁》 ᠤᠭ ᠨᠣᠮ ᠠᠴᠠ ᠮᠠᠷᠭᠤᠭᠠᠨ ᠤ ᠳᠦᠷᠢ ᠵᠢᠷᠤᠭ ᠤᠨ ᠲᠠᠯᠠ ᠪᠠᠷ ᠲᠥᠰᠥᠭᠡᠯᠡᠯ ᠥᠭᠬᠦ ᠵᠠᠷᠢᠮ ᠨᠢᠭᠡ ᠵᠢᠱᠢᠶᠡ ᠶᠢ ᠰᠡᠶᠢᠷᠡᠭᠦᠯᠪᠡᠯ᠄ ᠰᠤᠳᠤᠯᠤᠭᠠᠴᠢ ᠪ ∙ ᠭᠠᠩᠪᠠᠲᠤ ᠶᠢᠨ ᠳ᠋ᠦᠩᠨᠡᠭᠰᠡᠨ ᠨᠢ᠂ ᠲᠧᠭᠨᠢᠭ ᠪᠣᠯ ᠲᠧᠭᠨᠢᠭ ᠯᠠ ᠪᠣᠯᠬᠤ ᠠᠴᠠ ᠪᠢᠰᠢ ᠤᠷᠠᠯᠢᠭ ᠪᠢᠰᠢ᠂ ᠲᠧᠭᠨᠢᠭ ᠦᠨ ᠳᠡᠪᠰᠢᠯ ᠶᠡᠬᠡᠬᠡᠨ ᠭᠠᠶᠢᠬᠠᠮᠰᠢᠭᠲᠠᠢ ᠪᠠᠶᠢᠯᠠ ᠴᠤ ᠤᠷᠠᠨ ᠵᠣᠬᠢᠶᠠᠯ ᠳᠤ ᠲᠤᠰᠬᠤ ᠠᠴᠠ ᠪᠤᠰᠤ ᠲᠡᠭᠦᠨ ᠢ ᠥᠪᠡᠷᠲᠡᠭᠡᠨ ᠳᠦᠢᠴᠡᠭᠦᠯᠦᠨ ᠬᠤᠪᠢᠷᠠᠭᠠᠨ ᠥᠭᠡᠷᠡᠴᠢᠯᠡᠬᠦ ᠶᠣᠰᠣ ᠦᠭᠡᠢ᠃ ᠰᠤᠳᠤᠯᠤᠭᠠᠴᠢ ᠳ ∙ ᠼᠧᠳᠡᠪ ᠦᠨ ᠳ᠋ᠦᠩᠨᠡᠭᠰᠡᠨ ᠨᠢ᠂ ᠤᠷᠢᠶᠠᠩᠬᠠᠢ ᠶᠢᠨ ᠨᠠᠶᠢᠷᠠᠭᠯᠠᠯ ᠵᠣᠬᠢᠶᠠᠮᠵᠢ ᠶᠢᠨ ᠬᠤᠪᠢ ᠳᠤ ᠳᠢᠭ ᠵᠢᠷᠤᠮ ᠦᠭᠡᠢ᠂ ᠲᠥᠪᠯᠡᠷᠡᠭᠰᠡᠨ ᠰᠠᠨᠠᠭᠠ ᠦᠭᠡᠢ᠂ ᠠᠬᠤᠢ ᠬᠡᠮᠡᠬᠦ ᠳᠠᠯᠠᠢ ᠶᠢᠨ ᠳᠤᠮᠳᠠ ᠬᠠᠶᠠᠭᠳᠠᠭᠰᠠᠨ ᠤᠶᠠᠩᠭᠠ ᠶᠢᠨ ᠭᠠᠭᠴᠠ ᠪᠠᠭᠠᠲᠤᠷ ︿ᠪᠢ﹀ ᠶᠤᠮ ᠁》 ᠭᠡᠬᠦ ᠮᠡᠲᠦ ᠦᠨᠡᠯᠡᠭᠡ ᠥᠭᠴᠦ ᠪᠠᠶᠢᠵᠠᠢ᠃ ᠬᠠᠷᠢᠨ ᠰᠤᠳᠤᠯᠤᠭᠠᠴᠢ ᠬ ∙ ᠰᠠᠮᠫᠢᠯᠳᠡᠩᠳᠡᠪ᠂ 《ᠭᠦᠨ ᠤᠬᠠᠭᠠᠨ ᠤ ᠠᠶᠠᠰ ᠲᠠᠢ ᠪᠢᠴᠢᠵᠦ ᠪᠤᠢ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠥᠨᠥ ᠦᠶᠡ ᠶᠢᠨ ᠬᠠᠨᠳᠤᠯᠭᠠ ᠶᠢ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠬᠢᠭᠰᠡᠨ ᠡᠷᠢᠯ ᠡᠴᠡ ᠠᠩᠭᠢᠳᠠ ᠰᠡᠳᠬᠢᠬᠦ ᠶᠢᠨ ᠦᠨᠳᠦᠰᠦ ᠦᠭᠡᠢ᠃ ᠳ ∙ ᠤᠷᠢᠶᠠᠩᠬᠠᠢ ᠪᠣᠯ 1970 ᠬᠡᠳᠦᠨ ᠣᠨ ᠳᠤ ᠵᠠᠯᠠᠭᠤ ᠵᠣᠬᠢᠶᠠᠯᠴᠢᠳ ᠠᠴᠠ ᠡᠩ ᠲᠦᠷᠦᠭᠦᠨ ᠳᠦ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠰᠡᠳᠬᠢᠯᠭᠡ ᠶᠢ ᠭᠦᠨᠵᠡᠭᠡᠶᠢᠷᠡᠭᠦᠯᠬᠦ᠂ ᠱᠠᠭᠠᠷᠳᠠᠯᠭᠠ ᠶᠢ ᠮᠡᠳᠡᠷᠡᠭᠰᠡᠨ ᠰᠢᠯᠦᠭᠴᠢᠳ ᠦᠨ ᠨᠢᠭᠡ ᠶᠤᠮ᠃ 《ᠪᠢᠳᠡ-ᠳᠣᠲᠣᠭᠠᠳᠤ ᠰᠢᠲᠠᠯᠲᠠ ᠶᠢᠨ ᠬᠥᠳᠡᠯᠭᠡᠭᠦᠷ》 ᠨᠠᠶᠢᠷᠠᠭᠯᠠᠯ ᠳᠤ ᠪᠠᠨ ᠭᠠᠳᠠᠨᠠ ᠠᠴᠠ ᠥᠩᠭᠡᠴᠡ ᠲᠣᠭᠠᠴᠢᠬᠤ ᠬᠠᠭᠤᠴᠢᠨ ᠪᠠᠷᠢᠯ ᠠᠴᠠ ᠵᠠᠶᠢᠯᠠᠰᠬᠢᠨ ᠭᠦᠨ ᠰᠡᠳᠬᠢᠮᠵᠢ ᠲᠡᠢ ᠪᠢᠴᠢᠬᠦ ᠣᠷᠣᠯᠳᠤᠯᠭᠠ ᠬᠢᠭᠰᠡᠨ ᠪᠢᠯᠡ》 ᠬᠡᠮᠡᠨ 16 ᠵᠢᠯ ᠦᠨ ᠳᠠᠷᠠᠭᠠ ᠳ᠋ᠦᠩᠨᠡᠵᠦ ᠪᠠᠶᠢᠵᠠᠢ᠃
ᠬᠡᠳᠦᠢ ᠦᠵᠡᠯ ᠰᠤᠷᠲᠠᠯᠵᠢᠭᠰᠠᠨ ᠬᠠᠨᠳᠤᠯᠭᠠ ᠲᠠᠢ᠂ ᠵᠠᠷᠢᠮ ᠰᠤᠳᠤᠯᠤᠭᠠᠴᠢᠳ ᠥᠨᠥᠳᠥᠷ ᠦᠨ ᠯᠠ ᠠᠳᠠᠯᠢ ᠤᠷᠠᠨ ᠪᠦᠲᠦᠭᠡᠯᠴᠢ ᠡᠴᠡ ᠪᠡᠨ ᠰᠡᠳᠬᠢᠯᠭᠡᠨ ᠦ ᠬᠤᠪᠢ ᠳᠤ ᠬᠣᠴᠣᠷᠤᠭᠳᠠᠭᠰᠠᠨ ᠨᠢ ᠠᠩᠵᠠᠭᠠᠷᠠᠭᠳᠠᠬᠤ ᠴᠤ ᠵᠠᠯᠠᠭᠤ ᠤᠷᠠᠨ ᠪᠦᠲᠦᠭᠡᠯᠴᠢ ᠶᠢᠨ ᠰᠢᠨᠡ ᠪᠦᠲᠦᠭᠡᠯ ᠦᠨ ᠲᠠᠯᠠ ᠪᠠᠷ ᠥᠷᠭᠡᠨ ᠬᠦᠷᠢᠶᠡᠨ ᠳᠦ ᠵᠠᠳᠠᠯᠤᠨ ᠰᠢᠨᠵᠢᠯᠡᠵᠦ ᠶᠠᠷᠢᠯᠴᠠᠵᠤ ᠴᠢᠳᠠᠳᠠᠭ ᠴᠤ ᠴᠠᠭ ᠪᠠᠶᠢᠵᠠᠢ᠃ ᠴᠢᠳᠠᠳᠠᠭ ᠴᠤ ᠰᠤᠳᠤᠯᠤᠭᠠᠴᠢᠳ ᠪᠠᠶᠢᠵᠠᠢ᠃
ᠬᠠᠷᠢᠨ ᠳᠠᠷᠠᠭᠠ ᠶᠢᠨ ᠨᠣᠮ ᠪᠣᠯᠬᠤ 1982 ᠣᠨ ᠳᠤ ᠬᠡᠪᠯᠡᠭᠳᠡᠭᠰᠡᠨ 《ᠨᠢᠯᠬᠠ ᠬᠥᠯ ᠦᠨ ᠰᠠᠯᠬᠢ》 ᠨᠣᠮ ᠳᠤ ᠪᠠᠨ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠡᠷᠢᠯ ᠬᠠᠶᠢᠭᠤᠯ ᠤᠨ ᠥᠨᠴᠥᠭ ᠢᠶᠡᠨ ᠳᠣᠷᠣᠨᠠ ᠤᠷᠤᠭᠤ ᠬᠠᠨᠳᠤᠭᠤᠯᠤᠭᠰᠠᠨ ᠨᠢ ᠬᠠᠷᠠᠭᠳᠠᠳᠠᠭ᠃ ᠢᠯᠠᠩᠭᠤᠶᠠ ᠡᠨᠡ ᠨᠣᠮ ᠤᠨ ᠥᠪᠡᠷᠮᠢᠴᠡ ᠵᠦᠢᠷᠯᠡᠯ ᠦᠳ ᠡᠴᠡ ᠪᠦᠲᠦᠳᠡᠭ ᠪᠣᠭᠣᠨᠢ ᠰᠢᠯᠦᠭ᠂ ᠬᠠᠶᠢᠺᠦ᠋᠂ ᠰᠤᠳᠤᠯᠪᠤᠷᠢ ᠰᠢᠨᠵᠢ ᠲᠡᠢ ᠴᠥᠭᠡᠪᠲᠦᠷ ᠰᠢᠯᠦᠭ ᠨᠢ ᠮᠣᠩᠭᠣᠯ ᠤᠨ ᠢᠷᠠᠭᠤ ᠨᠠᠶᠢᠷᠠᠭ ᠲᠤ ᠲᠤᠬᠠᠢ ᠶᠢᠨ ᠦᠶᠡ ᠳ᠋ᠡᠭᠡᠨ ᠰᠢᠨᠡᠯᠢᠭ ᠦᠵᠡᠭᠳᠡᠯ ᠪᠠᠶᠢᠭᠰᠠᠨ᠃ ᠮᠥᠨ ᠨᠣᠮ ᠤᠨ ᠲᠡᠭᠦᠰᠬᠡᠯ ᠳ᠋ᠡᠬᠢ 《ᠨᠢᠯᠬᠠ ᠬᠥᠯ ᠦᠨ ᠰᠠᠯᠬᠢ》 ᠬᠡᠮᠡᠬᠦ ᠰᠢᠯᠦᠭ᠂ ᠦᠭᠦᠯᠡᠭᠰᠡᠨ ᠰᠢᠯᠦᠭ ᠡᠴᠡ ᠪᠦᠲᠦᠬᠦ ᠨᠢᠭᠡ ᠬᠡᠰᠡᠭ ᠨᠢ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠬᠣᠵᠢᠮ ᠤᠨ ᠨᠢᠭᠡᠨ ᠥᠪᠡᠷᠮᠢᠴᠡ ᠥᠩᠭᠡ ᠠᠶᠠᠰ ᠪᠣᠯᠬᠤ 《poem prose》 ᠪᠤᠶᠤ ᠦᠭᠦᠯᠡᠭᠰᠡᠨ ᠰᠢᠯᠦᠭ ᠦᠨ ᠠᠩᠬᠠᠳᠠᠭᠴᠢ 《ᠲᠤᠷᠰᠢᠴᠠ》 ᠪᠠᠶᠢᠪᠠ᠃
ᠡᠭᠦᠨ ᠡᠴᠡ ᠬᠣᠶᠢᠰᠢ ᠨᠡᠶᠢᠭᠡᠮ ᠤᠨ ᠶᠡᠬᠡ ᠥᠭᠡᠷᠡᠴᠢᠯᠡᠯᠲᠡ ᠲᠡᠢ ᠤᠷᠤᠯᠳᠤᠨ ᠭᠠᠷᠭᠠᠭᠰᠠᠨ 《ᠴᠡᠭᠡᠵᠢᠨ ᠦ ᠨᠥᠮᠥᠷᠢ》᠂ 《ᠳᠠᠭᠤ ᠦᠭᠡᠢ ᠨᠣᠮ》᠂ 《ᠨᠠᠰᠤᠨ ᠤ ᠬᠡᠰᠢᠭ》 ᠬᠡᠮᠡᠬᠦ ᠭᠤᠷᠪᠠᠨ ᠨᠣᠮ ᠳᠤ ᠳ ∙ ᠤᠷᠢᠶᠠᠩᠬᠠᠢ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠬᠤᠪᠢ ᠳᠤ ᠵᠢᠩᠬᠢᠨᠢ ᠲᠡᠰᠦᠷᠡᠯᠲᠡ ᠬᠢᠭᠰᠡᠨ᠃ 《ᠴᠡᠭᠡᠵᠢᠨ ᠦ ᠨᠥᠮᠥᠷᠢ》 ᠨᠣᠮ ᠤᠨ ᠬᠤᠪᠢ ᠳᠤ ᠨᠠᠶᠠᠭᠠᠳ ᠣᠨ ᠤ ᠡᠬᠢᠨ ᠦᠶᠡ ᠳᠦ ᠪᠢᠴᠢᠭᠰᠡᠨ᠂ ᠳᠤᠮᠳᠠ ᠦᠶᠡ ᠳᠦ ᠵᠠᠰᠠᠭᠰᠠᠨ᠂ ᠡᠮᠦᠨᠡᠬᠢ ᠬᠣᠶᠠᠷ ᠨᠣᠮ ᠳᠤ ᠪᠠᠭᠳᠠᠭᠠ ᠦᠭᠡᠢ ᠰᠢᠯᠦᠭ ᠦᠳ ᠡᠴᠡ ᠭᠣᠣᠯᠴᠢᠯᠠᠨ ᠪᠥᠷᠢᠳᠦᠨᠡ᠃ ᠡᠨᠡ ᠨᠣᠮ ᠳᠤ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠰᠤᠳᠤᠯᠤᠭᠠᠴᠢᠳ ᠤᠨ ᠵᠦᠭ ᠡᠴᠡ ᠳ ∙ ᠤᠷᠢᠶᠠᠩᠬᠠᠢ ᠶᠢ ᠥᠯᠡᠨ ᠭᠣᠣᠴᠢᠯᠠᠳᠠᠭ ᠪᠠᠶᠢᠭᠰᠠᠨ 《ᠡᠬᠡ ᠮᠣᠩᠭᠣᠯ ᠬᠡᠯᠡ ᠪᠡᠷ ᠢᠶᠡᠨ ᠰᠡᠳᠬᠢᠨ ᠤᠷᠠᠯᠠᠬᠤ ᠴᠢᠳᠠᠪᠤᠷᠢ ᠬᠣᠮᠰᠠᠳᠤᠭᠰᠠᠨ ᠠᠴᠠ ᠤᠳᠬᠠ ᠰᠠᠨᠠᠭᠠ ᠳᠤᠲᠠᠭᠠ ᠦᠭᠡᠢ ᠴᠤ ᠤᠷᠠᠯᠠᠯ᠂ ᠤᠶᠠᠩᠭᠠ ᠳᠤᠲᠠᠬᠤ᠂ ᠡᠭᠦᠨ ᠡᠴᠡ ᠪᠣᠯᠤᠭᠠᠳ ᠵᠠᠷᠢᠮ ᠰᠢᠯᠦᠭ ᠨᠢ ᠬᠠᠳᠠᠮᠠᠯ ᠣᠷᠴᠢᠭᠤᠯᠭᠠ ᠰᠢᠭ ᠪᠣᠯᠬᠤ᠂ ᠡᠰᠡᠪᠡᠯ ᠬᠡᠲᠦ ᠤᠬᠠᠭᠠᠨ ᠲᠠᠢ ᠬᠡᠯᠡᠬᠦ ᠭᠡᠳ ᠣᠶᠢᠯᠠᠭᠠᠮᠵᠢ ᠦᠭᠡᠢ ᠡᠭᠡᠳᠡᠷᠡᠭᠡ ᠲᠡᠢ ᠵᠦᠢᠯ ᠪᠢᠴᠢᠬᠦ ᠵᠡᠷᠭᠡ ᠳᠣᠭᠣᠯᠳᠠᠯ》 ᠍ ᠠᠴᠠ ᠨᠢᠭᠡᠨᠲᠡ ᠠᠩᠭᠢᠷᠠᠭᠰᠠᠨ ᠨᠢ ᠬᠠᠷᠠᠭᠳᠠᠳᠠᠭ᠃ ᠨᠢᠭᠡᠨ ᠵᠢᠱᠢᠶᠡ᠃
ᠠᠭᠯᠠᠭ ᠰᠢᠭᠤᠢ ᠶᠢᠨ ᠰᠠᠯᠬᠢ ᠦᠨᠦᠷ ᠢᠶᠡᠨ ᠭᠡᠭᠡᠵᠦ᠂
ᠠᠮᠠᠷᠠᠭ ᠰᠢᠪᠠᠭᠤᠳ ᠤᠬᠢᠯᠠᠯᠳᠤᠭᠰᠠᠨ ᠨᠠᠮᠤᠷ ᠤᠨ ᠣᠷᠣᠢ
ᠠᠶᠢᠰᠤᠢ ᠬᠡᠲᠦ ᠶᠢᠨ ᠬᠠᠭᠠᠴᠠᠯ ᠤᠨ ᠦᠨᠡᠨ
ᠠᠶᠤᠩᠭᠠ ᠭᠢᠯᠪᠠᠭᠠᠨ᠂ ᠴᠡᠭᠡᠵᠢ ᠨᠡᠩᠵᠢᠬᠦᠢ
ᠠᠯᠮᠠᠰ ᠬᠠᠲᠠᠭᠤ ᠰᠡᠳᠬᠢᠯ ᠦᠨ ᠬᠠᠲᠠ ᠬᠠᠯᠢᠷᠠᠵᠤ
ᠡᠭᠡᠯᠢᠲᠦ ᠨᠠᠷᠠᠨ ᠤ ᠡᠷᠭᠢᠯᠲᠡ ᠰᠡᠭᠦᠳᠡᠷ ᠢᠶᠡᠨ ᠭᠦᠪᠢᠬᠦ ᠶᠢ ᠳᠠᠭᠠᠭᠠᠯ ᠦᠭᠡᠢ
ᠡᠭᠡᠰᠢᠭ ᠬᠠᠭᠰᠠᠭᠰᠠᠨ ᠬᠠᠩᠬᠠᠢ ᠴᠡᠭᠡᠵᠢᠨ ᠦ ᠮᠢᠨᠢ
ᠡᠵᠡᠭᠦᠶᠢᠷᠡᠨ ᠴᠠᠶᠢᠭᠰᠠᠨ ᠴᠢᠪᠬᠠᠳᠠᠰᠣᠨ ᠳᠤ ᠬᠥᠭ ᠣᠷᠣᠬᠤ ᠶᠢ ᠰᠣᠨᠣᠰᠤᠭᠠᠳ
ᠴᠢᠮᠠᠢ ᠪᠠᠨ ᠪᠢ ᠳᠠᠭᠤᠳᠠᠯᠠ᠂ ᠬᠠᠶᠢᠷᠠᠲᠤ ᠮᠢᠨᠢ︕
ᠨᠢᠭᠡᠨᠲᠡ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠭ ∙ ᠠᠶᠤᠤᠷᠵᠠᠨᠠ ᠡᠨᠡ ᠰᠢᠯᠦᠭ ᠦᠨ ᠲᠠᠯᠠ ᠪᠠᠷ᠂ 《ᠰᠠᠯᠬᠢ ᠦᠨᠦᠷ ᠢᠶᠡᠨ ᠭᠡᠭᠡᠵᠦ᠂ ᠰᠢᠪᠠᠭᠤᠳ ᠤᠬᠢᠯᠠᠯᠳᠤᠭᠰᠠᠨ ᠨᠠᠮᠤᠷ ᠤᠨ》 ᠲᠤᠬᠠᠢ᠂ ᠲᠥᠰᠥᠭᠡᠯᠡᠬᠦ ᠡᠴᠡ ᠬᠠᠯᠠᠰᠢᠷᠠᠮᠠ ᠡᠨᠡ ᠦᠭᠡᠰ ᠪᠣᠯ ᠳᠡᠭᠡᠳᠦ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠥᠩᠭᠡ ᠠᠶᠠᠯᠭᠤ》 ᠬᠡᠮᠡᠨ ᠳᠠᠭᠤ ᠠᠯᠳᠠᠭᠰᠠᠨ ᠨᠢ ᠪᠤᠢ᠃
ᠶᠡᠷᠦ ᠨᠢ ᠳᠠᠭᠤ ᠦᠭᠡᠢ ᠨᠣᠮ᠂ ᠨᠠᠰᠤᠨ ᠤ ᠬᠡᠰᠢᠭ ᠨᠣᠮ ᠤᠳ ᠳᠡᠭᠡᠷᠡ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠡᠷᠢᠯᠬᠢᠯᠡᠯ ᠦᠨ ᠦᠶᠡ ᠲᠡᠭᠦᠰᠴᠦ᠂ ᠥᠪᠡᠷ ᠦᠨ ᠭᠡᠰᠡᠨ ᠬᠦᠴᠦᠷᠬᠡᠭ ᠳᠠᠭᠤ ᠬᠣᠭᠣᠯᠠᠢ ᠶᠢ ᠣᠯᠵᠤ ᠡᠬᠢᠯᠡᠭᠰᠡᠨ ᠨᠢ ᠬᠠᠷᠠᠭᠳᠠᠳᠠᠭ ᠶᠤᠮ᠃ ᠨᠢᠭᠡᠨ ᠵᠢᠱᠢᠶᠡ᠂
ᠭᠱᠠᠨ
ᠭᠱᠠᠨ ᠪᠦᠷᠢ ᠴᠠᠭ ᠬᠤᠭᠤᠴᠠᠭᠠ ᠶᠢ ᠡᠬᠢᠯᠡᠨᠡ᠃ ᠭᠱᠠᠨ ᠪᠦᠷᠢ ᠶᠢᠨ ᠬᠢᠵᠠᠭᠠᠷ ᠬᠢᠭᠡᠳ ᠬᠢᠵᠠᠭᠠᠷ ᠦᠭᠡᠢ ᠡᠴᠡ ᠴᠠᠭ ᠬᠤᠭᠤᠴᠠᠭᠠ ᠡᠮᠬᠢᠷᠡᠨᠡ᠃
ᠭᠱᠠᠨ ᠳᠦ ᠬᠦᠮᠦᠨ ᠶᠠᠭᠤ ᠴᠤ ᠡᠰᠡ ᠵᠠᠪᠳᠤᠪᠠᠴᠤ ᠭᠱᠠᠨ ᠢ ᠠᠯᠳᠠᠪᠠᠯ ᠶᠠᠭᠤ ᠶᠢ ᠴᠤ ᠠᠯᠳᠠᠵᠤ᠂ ᠶᠠᠭᠤ ᠪᠠᠷ ᠴᠤ ᠬᠣᠬᠢᠷᠠᠵᠤ ᠪᠣᠯᠤᠨᠠ᠃ ᠤᠴᠢᠷ ᠬᠡᠮᠡᠪᠡᠯ᠂ ᠴᠠᠭᠲᠤ ᠣᠷᠴᠢᠯᠠᠩ ᠳᠤ ᠠᠯᠢ ᠨᠢᠭᠡ ᠭᠱᠠᠨ ᠳᠦ ᠲᠣᠬᠢᠶᠠᠵᠤ ᠡᠬᠢᠯᠡᠬᠦ ᠦᠭᠡᠢ᠂ ᠠᠯᠢ ᠨᠢᠭᠡ ᠭᠱᠠᠨ ᠳᠦ ᠲᠣᠬᠢᠶᠠᠵᠤ ᠳᠠᠭᠤᠰᠬᠤ ᠦᠭᠡᠢ ᠶᠠᠭᠤᠮᠠ ᠨᠢᠭᠡᠭᠡᠬᠡᠨ ᠪᠡᠷ ᠴᠤ ᠦᠭᠡᠢ ᠲᠤᠯᠠ ᠠᠯᠢᠪᠠ ᠪᠦᠭᠦᠳᠡ ᠶᠢᠨ ᠡᠬᠢᠯᠡᠬᠦ᠂ ᠳᠠᠭᠤᠰᠬᠤ ᠨᠢ ᠠᠯᠢ ᠨᠢᠭᠡ ᠭᠱᠠᠨ ᠦ ᠬᠢᠵᠠᠭᠠᠷ ᠲᠠᠢ ᠵᠠᠪᠠᠯ ᠲᠠᠭᠠᠷᠠᠵᠤ ᠳᠠᠪᠬᠤᠴᠠᠬᠤ ᠨᠢ ᠵᠠᠶᠢᠯᠠᠪᠤᠷᠢ ᠦᠭᠡᠢ᠃ ᠭᠱᠠᠨ ᠪᠦᠷᠢ ᠴᠠᠭ ᠬᠤᠭᠤᠴᠠᠭᠠ ᠶᠢ ᠡᠬᠢᠯᠡᠵᠦ᠂ ᠭᠱᠠᠨ ᠪᠦᠷᠢ ᠶᠢᠨ ᠬᠢᠵᠠᠭᠠᠷ ᠬᠢᠭᠡᠳ ᠬᠢᠵᠠᠭᠠᠷ ᠦᠭᠡᠢ ᠡᠴᠡ ᠴᠠᠭ ᠬᠤᠭᠤᠴᠠᠭᠠ ᠡᠮᠬᠢᠷᠡᠨᠡ᠃
ᠡᠨᠡᠬᠦ ᠦᠭᠦᠯᠡᠭᠰᠡᠨ ᠰᠢᠯᠦᠭ ᠡᠴᠡ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠥᠪᠡᠷ ᠦᠨ ᠳᠣᠲᠣᠭᠠᠳᠤ ᠮᠡᠳᠡᠷᠡᠮᠵᠢ ᠶᠢ ᠦᠭᠡ ᠶᠢᠨ ᠬᠦᠴᠥ ᠪᠡᠷ ᠢᠯᠡᠷᠬᠡᠶᠢᠯᠡᠬᠦ ᠥᠪᠡᠷ ᠦᠨ ᠭᠡᠰᠡᠨ ᠥᠪᠡᠷᠮᠢᠴᠡ ᠠᠷᠭᠠ ᠶᠢ ᠨᠢᠭᠡᠨᠲᠡ ᠣᠯᠤᠭᠰᠠᠨ ᠨᠢ ᠬᠠᠷᠠᠭᠳᠠᠨᠠ᠃ ᠦᠭᠡ ᠶᠢᠨ ᠳᠠᠪᠲᠠᠮᠵᠢ ᠬᠡᠮᠨᠡᠯ ᠢᠯᠡᠳᠲᠡ ᠠᠩᠵᠠᠭᠠᠷᠠᠭᠳᠠᠬᠤ ᠠᠭᠠᠳ᠂ ᠲᠡᠷᠡ ᠨᠢ ᠭᠦᠨ ᠤᠬᠠᠭᠠᠨ ᠤ ᠠᠭᠤᠯᠭᠠ ᠲᠠᠢ ᠪᠠᠨ ᠵᠣᠬᠢᠴᠠᠵᠤ᠂ ᠲᠤᠩ ᠡᠪᠲᠡᠶᠢᠬᠡᠨ ᠳᠣᠨᠵᠢ ᠡᠭᠦᠰᠬᠡᠵᠡᠢ᠃ ᠳ ∙ ᠤᠷᠢᠶᠠᠩᠬᠠᠢ ᠴᠢᠨᠠᠭᠰᠢᠳᠠ ᠣᠯᠠᠨ ᠨᠣᠮ ᠳᠤ ᠪᠠᠨ ᠡᠶᠢᠮᠦ ᠬᠡᠯᠪᠡᠷᠢ ᠶᠢᠨ ᠦᠭᠦᠯᠡᠭᠰᠡᠨ ᠰᠢᠯᠦᠭ ᠪᠢᠴᠢᠭᠰᠡᠨ ᠪᠥᠭᠡᠳ᠂ ᠶᠠᠪᠤᠭᠠᠨ ᠳᠠᠭᠠᠨ ᠡᠨᠡ ᠨᠢ ᠲᠡᠭᠦᠨ ᠦ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠦᠨᠳᠦᠰᠦᠨ ᠬᠡᠯᠪᠡᠷᠢ ᠪᠣᠯᠤᠨ ᠲᠣᠭᠲᠠᠭᠰᠠᠨ᠃ ᠵᠣᠬᠢᠶᠠᠯᠴᠢ ᠵ ∙ ᡀᠠᠭᠪᠠ ᠶᠢᠨ 《ᠲᠣᠯᠣᠭᠠᠳ ᠤᠨ ᠴᠠᠭᠠᠨᠠ ᠢᠩᠭᠡ ᠪᠤᠶᠢᠯᠠᠨᠠ》 ᠨᠣᠮ ᠠᠴᠠ ᠡᠭᠦᠳᠦᠯᠲᠡᠢ ᠦᠭᠦᠯᠡᠭᠰᠡᠨ ᠰᠢᠯᠦᠭ ᠦᠨ ᠡᠷᠢᠯᠬᠢᠯᠡᠯ 1980 ᠍ ᠊ᠭᠠᠳ ᠣᠨ ᠤ ᠰᠡᠭᠦᠯ ᠦᠶᠡ ᠳᠦ ᠳ ∙ ᠤᠷᠢᠶᠠᠩᠬᠠᠢ᠂ ᠣ᠊ ∙ ᠳᠠᠰᠢᠪᠠᠯᠪᠠᠷ᠂ ᠳ ∙ ᠪᠠᠲᠤᠪᠠᠶᠠᠷ ᠨᠠᠷ ᠤᠨ ᠪᠦᠲᠦᠭᠡᠯ ᠳᠦ ᠬᠡᠲᠦ ᠤᠶᠠᠩᠭᠠ ᠶᠢᠨ ᠳᠦᠷᠰᠦᠯᠡᠯ ᠢ ᠬᠠᠯᠠᠵᠤ᠂ ᠢᠷᠠᠭᠤ ᠠᠷᠭᠠ ᠵᠠᠮ ᠢᠶᠠᠷ 《ᠹᠢᠯᠣᠰᠣᠹᠢᠳᠠᠬᠤ》 ᠬᠡᠷᠡᠭᠰᠡᠯ ᠪᠣᠯᠵᠤ ᠬᠤᠪᠢᠷᠠᠭᠰᠠᠨ᠃
ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ 1991 ᠣᠨ ᠳᠤ ᠬᠡᠪᠯᠡᠭᠦᠯᠦᠭᠰᠡᠨ 《ᠨᠠᠰᠤᠨ ᠤ ᠬᠡᠰᠢᠭ》 ᠨᠣᠮ ᠨᠢ 1980 ᠍ ᠊ᠭᠠᠳ ᠣᠨ ᠤ ᠰᠡᠭᠦᠯ ᠬᠠᠭᠠᠰ ᠲᠤ ᠪᠢᠴᠢᠭᠰᠡᠨ ᠰᠢᠯᠦᠭ ᠦᠳ ᠡᠴᠡ ᠪᠦᠲᠦᠨᠡ᠃ ᠨᠠᠷᠠᠨ ᠲᠣᠭᠣᠷᠢᠭ᠂ ᠥᠪᠡᠷ ᠦᠨ ᠲᠣᠳᠣᠳᠬᠠᠯ᠂ ᠦᠭᠡᠶᠢᠯᠡᠬᠦ ᠶᠢᠨ ᠬᠠᠯᠠᠭᠤᠨ᠂ ᠬᠦᠷᠳ᠋ᠥ ᠬᠡᠮᠡᠬᠦ ᠲᠤᠰ ᠲᠤ ᠪᠠᠨ ᠨᠣᠮ ᠪᠣᠯᠬᠤᠶᠢᠴᠠ ᠳᠥᠷᠪᠡᠨ ᠪᠦᠯᠦᠭ ᠡᠴᠡ ᠪᠦᠲᠦᠬᠦ ᠡᠨᠡ ᠨᠣᠮ ᠳ ∙ ᠤᠷᠢᠶᠠᠩᠬᠠᠢ ᠨᠠᠶᠢᠷᠠᠭᠴᠢ ᠶᠢᠨ ᠴᠢᠨᠠᠭᠰᠢᠳᠠ ᠶᠢᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠳᠥᠷᠪᠡᠨ ᠴᠤᠬᠠᠭ ᠮᠥᠨ ᠴᠢᠨᠠᠷ ᠢ ᠢᠯᠡᠷᠬᠡᠶᠢᠯᠡᠳᠡᠭ᠃ ᠢᠯᠳᠠᠷ ᠥᠭᠥᠯᠡᠬᠦ ᠳᠦ ᠡᠨᠡ ᠨᠣᠮ ᠨᠢ ᠳ ∙ ᠤᠷᠢᠶᠠᠩᠬᠠᠢ ᠨᠠᠶᠢᠷᠠᠭᠴᠢ ᠶᠢᠨ ᠬᠠᠮᠤᠭ ᠤᠨ ᠴᠢᠨᠠᠷᠲᠠᠢ᠂ ᠰᠢᠯᠢᠳᠡᠭ ᠪᠦᠲᠦᠭᠡᠯ ᠦᠳ ᠦᠨ ᠨᠢᠭᠡ ᠳᠦ ᠵᠦᠢ ᠶᠣᠰᠣᠭᠠᠷ ᠲᠣᠭᠠᠴᠠᠭᠳᠠᠨᠠ᠃ ᠴᠠᠷᠠ ᠠᠭᠤᠯᠭᠠ᠂ ᠨᠠᠶᠢᠷᠠᠭᠯᠠᠭ ᠴᠢᠨᠠᠷ ᠢᠶᠠᠷ 2007 ᠣᠨ ᠳᠤ ᠬᠡᠪᠯᠡᠭᠦᠯᠦᠭᠰᠡᠨ 《ᠣᠭᠲᠣᠯᠤᠯᠴᠠᠬᠤᠢ》 ᠨᠣᠮ ᠨᠢ ᠯᠠ ᠡᠨᠡ ᠨᠣᠮ ᠲᠠᠢ ᠵᠡᠷᠭᠡᠴᠡᠵᠦ ᠢᠷᠡᠨᠡ᠃
ᠡᠯᠡ ᠨᠣᠮ ᠤᠨ 《ᠨᠠᠷᠠᠨ ᠲᠣᠭᠣᠷᠢᠭ》 ᠬᠡᠮᠡᠬᠦ ᠪᠦᠯᠦᠭ ᠲᠦ ᠪᠠᠶᠢᠭᠠᠯᠢ ᠶᠢᠨ ᠳᠦᠷᠢ ᠳᠦᠷᠰᠦᠯᠡᠯ ᠲᠣᠳᠣ ᠲᠣᠮᠣᠷᠠᠭᠤᠨ ᠬᠠᠷᠠᠭᠳᠠᠬᠤ ᠠᠭᠠᠳ᠂ ᠪᠠᠶᠢᠭᠠᠯᠢ ᠶᠢᠨ ᠰᠡᠷᠡᠬᠦᠢ ᠪᠡᠷ ᠳᠠᠮᠵᠢᠨ ᠶᠢᠷᠲᠢᠨᠴᠦ ᠶᠢᠨ ᠵᠢᠮᠠ ᠶᠣᠰᠣᠨ ᠤ ᠲᠤᠬᠠᠢ ᠤᠶᠠᠩᠭᠠ ᠶᠢᠨ ᠠᠷᠭᠠ ᠪᠠᠷ ᠬᠦᠦᠷᠨᠢᠳᠡᠭ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠬᠠᠮᠤᠭ ᠤᠨ ᠰᠣᠩᠭᠣᠳᠠᠭ ᠠᠷᠭᠠ ᠪᠠᠷᠢᠯ ᠬᠠᠷᠠᠭᠳᠠᠨᠠ᠃
ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠪᠠᠰᠠ ᠨᠢᠭᠡᠨ ᠴᠤᠬᠠᠭ ᠠᠷᠭᠠ ᠪᠠᠷᠢᠯ ᠪᠣᠯᠬᠤ ᠥᠪᠡᠷ ᠦᠨ ᠠᠮᠢᠳᠤᠷᠠᠯ᠂ ᠪᠣᠳᠠᠲᠤ ᠨᠠᠮᠲᠠᠷ ᠲᠤ ᠲᠤᠯᠭᠠᠭᠤᠷᠢᠯᠠᠬᠤ ᠥᠴᠢᠯ ᠬᠡᠯᠪᠡᠷᠢ ᠶᠢᠨ ᠰᠢᠯᠦᠭ ᠦᠳ ᠡᠴᠡ 《ᠥᠪᠡᠷ ᠦᠨ ᠲᠣᠳᠣᠳᠬᠠᠯ》 ᠪᠦᠯᠦᠭ ᠨᠢ ᠪᠦᠲᠦᠵᠡᠢ᠃ ᠡᠨᠡ ᠪᠦᠯᠦᠭ ᠳᠣᠲᠣᠷᠠᠬᠢ 《ᠥᠴᠢᠭ》 ᠬᠡᠮᠡᠬᠦ ᠰᠢᠯᠦᠭ ᠶᠡᠬᠡᠬᠡᠨ ᠠᠯᠳᠠᠷᠲᠠᠢ᠃ ᠴᠤᠬᠤᠮ ᠡᠨᠳᠡ ᠬᠣᠵᠢᠮ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠰᠢᠯᠦᠭ ᠦᠨ ᠭᠣᠣᠯ ᠥᠩᠭᠡ ᠠᠶᠠᠰ ᠪᠣᠯᠤᠨ ᠲᠣᠭᠲᠠᠭᠰᠠᠨ 《ᠨᠠᠮᠢᠨᠴᠢᠯᠠᠯ ᠤᠨ ᠢᠷᠠᠭᠤ ᠨᠠᠶᠢᠷᠠᠭ》 ᠭᠦᠢᠴᠡᠳ ᠪᠦᠷᠢᠯᠳᠦᠵᠡᠢ᠃
ᠴᠥᠭᠡᠪᠲᠦᠷ ᠰᠢᠯᠦᠭ ᠲᠡᠢ 《ᠦᠭᠡᠶᠢᠯᠡᠬᠦ ᠶᠢᠨ ᠬᠠᠯᠠᠭᠤᠨ》 ᠪᠦᠯᠦᠭ ᠨᠢ ᠳᠠᠩ ᠬᠠᠶᠢᠷᠠ ᠶᠢᠨ ᠰᠢᠯᠦᠭ ᠡᠴᠡ ᠪᠦᠲᠦᠨᠡ᠃ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠪᠦᠰᠡᠭᠦᠢ ᠬᠦᠮᠦᠨ ᠦ ᠭᠣᠸᠠ ᠰᠠᠶᠢᠬᠠᠨ ᠢ ᠮᠠᠭᠲᠠᠭᠰᠠᠨ ᠰᠢᠯᠦᠭ ᠦᠳ ᠡᠷᠣᠲ᠋ᠢᠺ ᠥᠩᠭᠡ ᠠᠶᠠᠰ᠂ ᠭᠣᠸᠠ ᠰᠠᠶᠢᠬᠠᠨ ᠤ ᠲᠤᠬᠠᠢ ᠡᠷᠭᠢᠴᠡᠭᠦᠯᠦᠯ ᠪᠦᠬᠦᠢ ᠭᠦᠨ ᠤᠬᠠᠭᠠᠨ ᠤ ᠭᠠᠷᠭᠠᠯᠭᠠ ᠲᠠᠢ ᠬᠣᠣᠰᠯᠠᠨ ᠪᠠᠶᠢᠳᠠᠭ ᠢᠶᠠᠷ ᠢᠶᠠᠨ ᠣᠨᠴᠠᠯᠢᠭ ᠲᠠᠢ᠃ ᠬᠤᠶᠠᠯᠢ ᠲᠠᠴᠢᠶᠠᠯ᠂ ᠤᠬᠠᠭᠠᠷᠠᠯ ᠭᠡᠭᠡᠷᠡᠯ ᠰᠦᠯᠡᠯᠳᠦᠭᠰᠡᠨ ᠡᠶᠢᠮᠦ ᠬᠡᠯᠪᠡᠷᠢ ᠶᠢᠨ ᠰᠢᠯᠦᠭ ᠦᠳ ᠨᠢ ᠵᠠᠭᠠᠷ ᠤᠨ ᠶᠡᠬᠡ ᠰᠢᠯᠦᠭᠴᠢ ᠷᠠᠪᠢᠨᠳᠠᠷᠨᠠᠲ ᠲᠠᠭᠦᠷ ᠦᠨ 《ᠡᠷᠭᠦᠯ ᠦᠨ ᠳᠠᠭᠤᠯᠠᠯ》 ᠍ ᠢ ᠰᠠᠨᠠᠭᠳᠠᠭᠤᠯᠤᠨᠠ᠃
ᠡᠴᠦᠰ ᠲᠦ ᠨᠢ ᠨᠢᠭᠡᠨ ᠰᠡᠳᠦᠪ ᠢ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠠᠷᠭᠠ ᠪᠠᠷ ᠬᠥᠭᠵᠢᠭᠦᠯᠦᠭᠰᠡᠨ 14 ᠮᠥᠷᠲᠦ ᠰᠢᠯᠦᠭ ᠡᠴᠡ ᠪᠦᠲᠦᠬᠦ 《ᠬᠦᠷᠳᠦ》 ᠬᠡᠮᠡᠬᠦ ᠪᠦᠯᠦᠭ ᠪᠤᠢ᠃ ᠥᠷᠥᠨᠡ ᠳ᠋ᠠᠬᠢᠨ ᠤ ᠰᠣᠨᠧᠲ ᠬᠡᠮᠡᠬᠦ ᠰᠢᠯᠦᠭ ᠦᠨ ᠰᠣᠩᠭᠣᠳᠠᠭ ᠪᠠᠳᠠᠭᠯᠠᠯ ᠵᠦᠢ ᠶᠢ ᠳ ∙ ᠤᠷᠢᠶᠠᠩᠬᠠᠢ ᠥᠪᠡᠷ ᠦᠨ ᠭᠦᠨ ᠤᠬᠠᠭᠠᠨ ᠤ ᠡᠷᠭᠢᠴᠡᠭᠦᠯᠦᠯ ᠢ ᠶᠢᠷᠲᠢᠨᠴᠦ ᠶᠢᠨ ᠡᠳ᠋ ᠶᠠᠭᠤᠮᠠᠰ ᠢ ᠳᠦᠷᠰᠦᠯᠡᠬᠦ ᠠᠷᠭᠠ ᠪᠠᠷ ᠪᠠᠭᠤᠯᠭᠠᠬᠤ ᠳᠤ ᠠᠰᠢᠭᠯᠠᠳᠠᠭ᠃ ᠶᠠᠭ ᠲᠤᠬᠠᠶᠢᠯᠠᠨ ᠰᠣᠨᠧᠲ ᠤᠨ ᠰᠣᠩᠭᠣᠳᠠᠭ ᠪᠠᠳᠠᠭᠯᠠᠯ ᠵᠦᠢ᠂ ᠮᠥᠷ᠂ ᠰᠡᠭᠦᠯ ᠬᠣᠯᠪᠣᠯᠲᠠ ᠶᠢ ᠪᠠᠷᠢᠮᠲᠠᠯᠠᠭᠠ ᠦᠭᠡᠢ᠂ ᠵᠥᠪᠬᠡᠨ ᠬᠡᠯᠪᠡᠷᠢ ᠲᠠᠯᠠ ᠠᠴᠠ ᠨᠢ 14 ᠮᠥᠷᠲᠦ ᠶᠢ ᠠᠰᠢᠭᠯᠠᠭᠰᠠᠨ ᠨᠢ ᠥᠪᠡᠷ ᠦᠨ ᠪᠣᠳᠣᠷᠠᠯ ᠡᠷᠭᠢᠴᠡᠭᠦᠯᠦᠯ ᠦᠨ ᠭᠦᠨ ᠳ᠋ᠤ ᠵᠢᠪᠥᠵᠥ᠂ ᠰᠢᠯᠦᠭ ᠦᠨ ᠬᠢᠵᠠᠭᠠᠷ ᠠᠴᠠ ᠳᠠᠪᠠᠬᠤ᠂ ᠬᠡᠲᠦ ᠤᠯᠢᠭᠯᠠᠨ ᠨᠤᠷᠱᠤᠬᠤ ᠡᠨᠳᠡᠯ ᠡᠴᠡ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢ ᠬᠠᠵᠠᠭᠠᠷᠯᠠᠭᠰᠠᠨ ᠨᠢ ᠠᠩᠵᠠᠭᠠᠷᠠᠭᠳᠠᠨᠠ᠃ ᠨᠢᠭᠡ ᠲᠠᠯᠠ ᠪᠠᠷ ᠪᠢᠰᠢᠯᠭᠠᠯ ᠤᠨ ᠳᠠᠰᠬᠠᠯ ᠴᠤ ᠭᠡᠮᠡᠷ ᠰᠠᠨᠠᠭᠳᠠᠳᠠᠭ ᠡᠨᠡ 14 ᠮᠥᠷᠲᠦ ᠶᠢᠨ ᠪᠦᠯᠦᠭ ᠦᠨ ᠰᠠᠨᠠᠭᠠ ᠪᠠᠨ ᠳ ∙ ᠤᠷᠢᠶᠠᠩᠬᠠᠢ ᠨᠠᠶᠢᠷᠠᠭᠴᠢ ᠳᠡᠯᠭᠡᠷᠡᠭᠦᠯᠦᠨ ᠬᠣᠵᠢᠮ 1997 ᠣᠨ ᠳᠤ 《ᠳᠣᠲᠣᠭᠠᠳᠤ ᠴᠢᠨᠠᠳᠤ》 ᠬᠡᠮᠡᠬᠦ ᠨᠣᠮ ᠤᠨ ᠢᠶᠠᠨ ᠦᠨᠳᠦᠰᠦᠨ ᠬᠡᠰᠡᠭ ᠢ ᠪᠢᠴᠢᠭᠰᠡᠨ᠃
ᠳ ᠊ ᠤᠷᠢᠶᠠᠩᠬᠠᠢ ᠶᠢᠨ ᠢᠯᠡᠷᠬᠡᠢᠯᠡᠯ ᠤᠨ ᠦᠶᠡ
ᠢᠮᠠᠭᠲᠠ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠪᠠᠢ᠂ ᠬᠦᠦᠷᠨᠢᠯ ᠵᠣᠬᠢᠶᠠᠯ ᠳᠡᠭᠡᠷᠡ ᠴᠤ ᠬᠦᠷᠲᠡᠯᠡ ᠁
ᠬᠣᠷᠬᠧ ᠯᠤᠢᠰ ᠪᠣᠷᠬᠧᠰ
ᠳ ∙ ᠤᠷᠢᠶᠠᠩᠬᠠᠢ ᠨᠠᠶᠢᠷᠠᠭᠴᠢ 1992 ᠣᠨ ᠳᠤ 《ᠦᠭᠡ ᠶᠢᠨ ᠰᠥ᠋》 ᠲᠡᠭᠦᠪᠦᠷᠢ ᠪᠡᠨ ᠬᠡᠪᠯᠡᠭᠦᠯᠦᠭᠰᠡᠨ ᠡᠴᠡ ᠬᠣᠶᠢᠰᠢ ᠮᠣᠩᠭᠣᠯ ᠤᠨ ᠢᠷᠠᠭᠤ ᠨᠠᠶᠢᠷᠠᠭ ᠲᠤ ᠨᠢᠭᠡᠨᠲᠡ ᠪᠠᠲᠤ ᠪᠠᠶᠢᠷᠢ ᠪᠠᠨ ᠡᠵᠡᠯᠡᠵᠦ᠂ ᠥᠪᠡᠷ ᠦᠨ ᠰᠢᠯᠦᠭ ᠦᠨ ᠳᠠᠪᠲᠠᠭᠳᠠᠰᠢ ᠦᠭᠡᠢ ᠬᠡᠯᠪᠡᠷᠢ᠂ ᠰᠡᠳᠬᠢᠯᠭᠡᠨ ᠦ ᠴᠢᠭ ᠱᠤᠭᠤᠮ ᠪᠦᠬᠦᠢ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠪᠣᠯᠤᠭᠰᠠᠨ᠃
ᠲᠡᠭᠦᠨ ᠡᠴᠡ ᠬᠣᠶᠢᠰᠢ 30 ᠭᠠᠷᠤᠢ ᠵᠢᠯ ᠥᠩᠭᠡᠷᠡᠬᠦ ᠳᠦ ᠢᠷᠠᠭᠤ ᠨᠠᠶᠢᠷᠠᠭᠴᠢ 《ᠦᠭᠡ ᠶᠢᠨ ᠰᠥ᠋》᠂ 《ᠳᠣᠲᠣᠭᠠᠳᠤ ᠴᠢᠨᠠᠳᠤ》᠂ 《ᠣᠭᠲᠣᠯᠤᠯᠴᠠᠬᠤᠢ》᠂ 《ᠬᠣᠯᠠᠳᠠᠬᠤ ᠲᠥᠪ》᠂ 《ᠦᠭᠡᠶᠢᠯᠡᠬᠦ ᠶᠢᠨ ᠬᠠᠯᠠᠭᠤᠨ》 ᠭᠡᠰᠡᠨ ᠯᠠᠪᠲᠠᠶᠠ ᠲᠠᠪᠤᠨ ᠨᠣᠮ ᠬᠡᠪᠯᠡᠭᠦᠯᠦᠭᠰᠡᠨ ᠪᠠᠶᠢᠨᠠ᠃
ᠡᠨᠡ ᠲᠠᠪᠤᠨ ᠨᠣᠮ ᠳᠤ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠳᠣᠣᠷᠠ ᠳᠤᠷᠠᠳᠬᠤ ᠦᠨᠳᠦᠰᠦᠨ ᠭᠤᠷᠪᠠᠨ ᠬᠡᠯᠪᠡᠷᠢ ᠶᠢᠨ ᠰᠢᠯᠦᠭ ᠢᠶᠡᠨ ᠬᠥᠭᠵᠢᠭᠦᠯᠦᠭᠰᠡᠨ᠃ ᠲᠡᠳᠡᠭᠡᠷ ᠢ ᠳᠤᠷᠠᠳᠪᠠᠯ᠄
-ᠨᠠᠮᠢᠨᠴᠢᠯᠠᠯ ᠤᠨ ᠢᠷᠠᠭᠤ ᠨᠠᠶᠢᠷᠠᠭ᠂
-ᠪᠠᠶᠢᠭᠠᠯᠢ ᠶᠢᠨ ᠳᠦᠷᠰᠦᠯᠡᠯ ᠳᠦ ᠰᠠᠭᠤᠷᠢᠯᠠᠭᠰᠠᠨ ᠨᠠᠲ᠋ᠦᠶᠢᠷᠠᠯᠢᠰᠲ ᠪᠣᠯᠤᠨ ᠰᠡᠷᠡᠯ ᠮᠡᠳᠡᠷᠡᠮᠵᠢ ᠳᠠᠪᠠᠮᠠᠭᠠᠶᠢᠯᠠᠭᠰᠠᠨ ᠢᠮᠫᠧᠷᠰᠢᠣᠨᠢᠰᠲ ᠥᠩᠭᠡ ᠠᠶᠠᠰ ᠲᠠᠢ ᠰᠢᠯᠦᠭ᠂
-ᠥᠪᠡᠷ ᠦᠨ ᠭᠦᠨ ᠤᠬᠠᠭᠠᠨ ᠤ ᠦᠷᠡ ᠪᠣᠳᠣᠷᠠᠯ ᠤᠳ ᠢᠶᠠᠨ ᠰᠢᠰᠲ᠋ᠧᠮᠴᠢᠯᠡᠨ ᠢᠯᠡᠷᠬᠡᠶᠢᠯᠡᠭᠰᠡᠨ ᠭᠦᠨ ᠤᠬᠠᠭᠠᠨ ᠤ ᠰᠢᠯᠦᠭ ᠦᠳ
ᠡᠬᠢᠨ ᠦ ᠬᠣᠶᠠᠷ ᠬᠡᠯᠪᠡᠷᠢ ᠶᠢᠨ ᠰᠢᠯᠦᠭ ᠦᠳ ᠦᠨ ᠬᠢ ᠨᠢ ᠲᠠᠯᠠ ᠪᠠᠷ ᠳᠡᠭᠡᠷᠡ ᠲᠣᠳᠣᠷᠬᠠᠢ ᠶᠠᠷᠢᠭᠰᠠᠨ ᠤᠴᠢᠷ ᠠᠴᠠ ᠡᠨᠳᠡ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ 《ᠭᠦᠨ ᠤᠬᠠᠭᠠᠨ ᠤ ᠰᠢᠯᠦᠭ ᠦᠳ》 ᠳᠡᠭᠡᠷᠡ ᠲᠣᠭᠲᠠᠵᠤ ᠶᠠᠷᠢᠯᠴᠠᠶᠠ᠃ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠪᠦᠲᠦᠭᠡᠯ ᠦᠨ ᠳᠦᠷᠢ ᠨᠢ ᠵᠣᠬᠢᠶᠠᠯᠴᠢ ᠶᠢᠨ ᠤᠶᠠᠩᠭᠠ ᠶᠢᠨ ᠪᠢ ᠪᠠᠭᠠᠲᠤᠷ ᠭᠡᠳᠡᠭ᠃ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠬᠤᠪᠢ ᠳᠤ ᠲᠡᠷᠡ ᠬᠦ ᠤᠶᠠᠩᠭᠠ ᠶᠢᠨ ᠪᠢ ᠪᠠᠭᠠᠲᠤᠷ ᠨᠢ ᠲᠤᠩ ᠵᠥᠷᠢᠴᠡᠯᠲᠦ ᠰᠢᠨᠵᠢ ᠲᠡᠢ᠃ ᠬᠦᠮᠦᠯᠢᠭ ᠦᠵᠡᠯ᠂ ᠡᠨᠡᠷᠢᠩᠭᠦᠢ ᠦᠵᠡᠯ ᠦᠨ ᠴᠣᠭᠴᠠᠯᠠᠪᠤᠷᠢ ᠪᠣᠯᠤᠭᠰᠠᠨ ᠪᠤᠳ᠋ᠳ᠋ᠾᠠᠶᠢᠰᠮ ᠪᠣᠯᠤᠨ ᠾᠷᠢᠰᠲ᠋ᠢ ᠪᠠᠨᠨᠢᠰᠮ᠂ ᠪᠦᠷ ᠨᠠᠭᠠᠰᠢᠯᠠᠭᠠᠳ ᠮᠠᠷᠺᠰᠢᠰᠮ ᠤᠨ ᠵᠠᠷᠢᠮ ᠭᠠᠷᠭᠠᠯᠭᠠᠨ ᠳᠤ ᠢᠲᠡᠭᠡᠳᠡᠭ᠂ ᠡᠳᠡᠭᠡᠷ ᠨᠢ ᠬᠦᠮᠦᠨ ᠦ ᠠᠮᠢᠳᠤᠷᠠᠪᠠᠯ ᠵᠣᠬᠢᠬᠤ ᠵᠠᠶᠢᠯᠠᠰᠢ ᠦᠭᠡᠢ ᠬᠡᠪ ᠮᠠᠶ᠋ᠢᠭ ᠬᠡᠮᠡᠨ ᠲᠡᠷᠰᠡᠵᠦ᠂ ᠥᠪᠡᠷ ᠦᠨ ᠵᠠᠮ ᠮᠥᠷ ᠢᠶᠡᠷ ᠦᠵᠡᠭᠦᠯᠬᠦ ᠶᠢ ᠬᠢᠴᠢᠶᠡᠳᠡᠭ ᠨᠢ ᠮᠠᠭᠠᠳ ᠦᠭᠡᠢ ᠨᠡᠶᠢᠭᠡᠮ ᠳᠦ ᠤᠷᠢᠶᠠᠩᠬᠠᠢ ᠬᠡᠮᠡᠬᠦ ᠥᠪᠡᠷᠮᠢᠴᠡ ᠤᠲ᠋ᠣᠫᠢ ᠪᠠᠭᠠᠲᠤᠷ ᠢ ᠪᠤᠢ ᠪᠣᠯᠭᠠᠭᠰᠠᠨ᠃ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠭᠡᠬᠦ ᠡᠴᠡ ᠪᠡᠨ ᠨᠡᠶᠢᠭᠡᠮ ᠤᠨ ᠵᠢᠳᠬᠦᠯᠲᠡᠨ ᠦ ᠡᠨᠡ ᠬᠡᠪ ᠲᠥᠷᠬᠥ ᠡᠴᠡ ᠨᠢ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠰᠢᠯᠦᠭ ᠪᠦᠲᠦᠭᠡᠯ ᠢ ᠰᠠᠯᠭᠠᠵᠤ ᠣᠶᠢᠯᠠᠭᠠᠭᠰᠠᠨ ᠢᠶᠠᠷ ᠮᠠᠭᠠᠳ ᠦᠭᠡᠢ ᠳ ∙ ᠤᠷᠢᠶᠠᠩᠬᠠᠢ ᠰᠤᠳᠤᠯᠤᠯ ᠵᠢᠩᠬᠢᠨᠢ ᠤᠳᠬᠠ ᠪᠠᠷ ᠢᠶᠠᠨ ᠡᠬᠢᠯᠡᠬᠦ ᠪᠢᠵᠡ ᠡ᠃
ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠢᠷᠠᠭᠤ ᠨᠠᠶᠢᠷᠠᠭ ᠨᠢ ᠲᠠᠨᠢᠨ ᠮᠡᠳᠡᠬᠦᠢ ᠶᠢᠨ ᠶᠡᠷᠦ ᠶᠢᠨ ᠦᠨᠡᠨ ᠡᠴᠡ ᠤᠷᠭᠤᠭᠤᠯᠤᠨ ᠹᠢᠯᠣᠰᠣᠹᠢ ᠶᠢᠨ ᠲᠡᠭᠦᠰᠥᠰᠢ ᠦᠭᠡᠢ ᠡᠷᠭᠢᠴᠡᠭᠦᠯᠦᠯ ᠤᠷᠤᠭᠤ ᠬᠥᠲᠥᠯᠡᠳᠡᠭ᠃ 1990 ᠍ ᠊ᠭᠡᠳ ᠣᠨ ᠤ ᠡᠬᠢᠨ ᠪᠣᠯᠤᠨ ᠰᠡᠭᠦᠯ ᠦᠶᠡ ᠳᠦ ᠭᠠᠷᠭᠠᠭᠰᠠᠨ 《ᠦᠭᠡ ᠶᠢᠨ ᠰᠥ᠋》᠂ 《ᠳᠣᠲᠣᠭᠠᠳᠤ ᠴᠢᠨᠠᠳᠤ》 ᠬᠡᠮᠡᠬᠦ ᠬᠣᠶᠠᠷ ᠨᠣᠮ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠰᠢᠯᠦᠭᠯᠢᠭ ᠵᠦᠢ ᠶᠢᠨ ᠬᠤᠪᠢ ᠳᠤ ᠲᠤᠩ ᠥᠭᠡᠷᠡ᠃ 《ᠦᠭᠡ ᠶᠢᠨ ᠰᠥ᠋》 ᠨᠣᠮ ᠸᠧᠷᠯᠢᠪᠷ (verslibre ᠹᠷ) ᠪᠤᠶᠤ ᠴᠢᠯᠦᠭᠡᠲᠦ ᠰᠢᠯᠦᠭᠯᠡᠯ ᠦᠨ ᠵᠠᠷᠴᠢᠮ ᠢᠶᠠᠷ ᠪᠢᠴᠢᠭᠳᠡᠭᠰᠡᠨ᠃ ᠶᠠᠮᠠᠷ ᠨᠢᠭᠡᠨ ᠪᠠᠳᠠᠭᠯᠠᠯ ᠦᠭᠡᠢ᠂ ᠴᠡᠪᠡᠷ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢᠨ ᠰᠡᠳᠬᠢᠮᠵᠢ᠂ ᠮᠡᠳᠡᠷᠡᠮᠵᠢ ᠶᠢᠨ ᠥᠩᠭᠡ ᠠᠶᠠᠰ ᠢ ᠳᠠᠭᠠᠭᠰᠠᠨ ᠪᠢᠴᠢᠯᠭᠡ ᠲᠡᠢ᠃ ᠬᠠᠷᠢᠨ 《ᠳᠣᠲᠣᠭᠠᠳᠤ ᠴᠢᠨᠠᠳᠤ》 ᠨᠣᠮ ᠤᠯᠠᠮᠵᠢᠯᠠᠯᠲᠤ ᠰᠢᠯᠦᠭᠯᠡᠯ ᠵᠦᠢ ᠶᠢ ᠳᠠᠭᠠᠭᠰᠠᠨ ᠪᠢᠴᠢᠯᠭᠡ ᠲᠡᠢ ᠶᠤᠮ᠃ ᠮᠥᠷ ᠲᠤ ᠬᠢ ᠦᠭᠡ ᠶᠢᠨ ᠲᠣᠭᠠ ᠶᠢ ᠲᠣᠭᠲᠠᠮᠠᠯ ᠪᠠᠷᠢᠵᠤ᠂ ᠲᠣᠯᠣᠭᠠᠢ ᠬᠤᠯᠪᠤᠬᠤ ᠵᠡᠷᠭᠡ ᠤᠯᠠᠮᠵᠢᠯᠠᠯᠲᠤ ᠠᠷᠭᠠ ᠪᠠᠷᠢᠯ ᠡᠨᠡ ᠨᠣᠮ ᠤᠨ ᠳᠡᠶᠢᠯᠦᠩᠬᠢ ᠬᠡᠰᠡᠭ ᠢ ᠪᠦᠷᠢᠳᠦᠭᠦᠯᠦᠨᠡ᠃
ᠡᠳᠡᠭᠡᠷ ᠡᠴᠡ 10 ᠵᠢᠯ ᠦᠨ ᠳᠠᠷᠠᠭᠠ ᠬᠡᠪᠯᠡᠭᠦᠯᠦᠭᠰᠡᠨ 《ᠣᠭᠲᠣᠯᠤᠯᠴᠠᠬᠤᠢ》᠂ 《ᠬᠣᠯᠠᠳᠠᠬᠤ ᠲᠥᠪ》 ᠨᠣᠮ ᠳᠤ ᠳ ∙ ᠤᠷᠢᠶᠠᠩᠬᠠᠢ ᠥᠪᠡᠷ ᠦᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠬᠡᠯᠪᠡᠷᠢ᠂ ᠠᠭᠤᠯᠭᠠ ᠶᠢ ᠵᠠᠩᠭᠢᠳᠴᠤ ᠴᠢᠳᠠᠵᠠᠢ᠃ ᠢᠯᠠᠩᠭᠤᠶᠠ 《ᠣᠭᠲᠣᠯᠤᠯᠴᠠᠬᠤᠢ》 ᠨᠣᠮ ᠳᠤ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠰᠢᠯᠦᠭᠯᠢᠭ ᠵᠦᠢ ᠡᠴᠡ ᠬᠠᠭᠠᠴᠠᠵᠤ ᠴᠢᠳᠠᠭᠰᠠᠨ ᠶᠤᠮ᠃ 《ᠬᠠᠭᠠᠴᠠᠵᠤ ᠴᠢᠳᠠᠭᠰᠠᠨ》 ᠭᠡᠬᠦ ᠶᠢᠨ ᠤᠴᠢᠷ ᠨᠢ ᠲᠡᠷᠡ ᠪᠡᠷ ᠥᠪᠡᠷ ᠦᠨ ᠦᠵᠡᠯ ᠰᠠᠨᠠᠭᠠ ᠪᠣᠯᠳ ᠤᠶᠠᠩᠭᠠ ᠶᠢᠨ ᠰᠡᠷᠡᠬᠦᠢ ᠶᠢ ᠣᠭᠲᠣ ᠠᠴᠠ ᠲᠥᠪᠡᠭ ᠦᠭᠡᠢ ᠰᠦᠯᠡᠵᠦ᠂ ᠰᠡᠳᠬᠢᠬᠦᠢ ᠶᠢᠨ ᠬᠤᠪᠢ ᠳᠤ ᠴᠤ᠂ ᠬᠡᠯᠪᠡᠷᠢ ᠶᠢᠨ ᠬᠤᠪᠢ ᠳᠤ ᠴᠤ ᠴᠢᠯᠦᠭᠡᠲᠡᠢ ᠵᠣᠷᠢᠭ ᠢᠶᠠᠷ ᠰᠢᠯᠦᠭᠯᠡᠬᠦ ᠪᠣᠯᠵᠠᠢ᠃ ᠡᠨᠡ ᠨᠣᠮ ᠳᠤ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠢᠷᠠᠭᠤ ᠨᠠᠶᠢᠷᠠᠭ ᠳᠠᠬᠢ ᠨᠠᠮᠢᠩᠯᠠᠯᠳᠤ ᠴᠢᠨᠠᠷ᠂ ᠢᠮᠫᠧᠷᠰᠢᠣᠨᠢᠰᠲ ᠥᠩᠭᠡ ᠠᠶᠠᠰ ᠠᠭᠤᠰᠤᠨ ᠰᠦᠯᠡᠯᠳᠦᠵᠦ᠂ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠭᠡᠵᠦ ᠬᠡᠯᠡᠵᠦ ᠪᠣᠯᠬᠤ ᠴᠢᠯᠦᠭᠡᠲᠦ ᠰᠢᠯᠦᠭᠯᠡᠯ ᠦᠨ ᠨᠢᠭᠡᠨ ᠰᠢᠨᠡ ᠬᠡᠯᠪᠡᠷᠢ ᠶᠢ ᠡᠭᠦᠰᠬᠡᠵᠦ ᠪᠠᠶᠢᠨᠠ᠃ ᠲᠡᠷᠲᠡᠭᠡ 1980 ᠣᠨ ᠳᠤ 《ᠴᠠᠭ ᠤᠨ ᠬᠥᠯ》 ᠨᠣᠮ ᠳᠤ ᠨᠢ ᠪᠠᠭᠲᠠᠭᠰᠠᠨ 《ᠰᠢᠯᠦᠭ ᠬᠡᠮᠡᠬᠦ ᠰᠢᠯᠦᠭ》 ᠪᠣᠯᠤᠨ 《ᠣᠭᠲᠣᠯᠤᠯᠴᠠᠬᠤᠢ》 ᠨᠣᠮ ᠤᠨ ᠳᠣᠲᠣᠷᠠᠬᠢ 《ᠢᠨᠢᠶᠡᠳᠦ ᠰᠢᠭ ᠬᠠᠭᠤᠴᠢᠨ ᠬᠦᠮᠦᠨ ᠦ ᠠᠮᠢᠳᠤᠷᠠᠯ》 ᠰᠢᠯᠦᠭ ᠦᠳ ᠢ ᠬᠠᠷᠢᠴᠠᠭᠤᠯᠤᠭᠠᠳ ᠬᠠᠷᠠᠬᠤ ᠳᠤ ᠯᠠ ᠡᠨᠡ ᠪᠦᠬᠦᠨ ᠮᠡᠳᠡᠷᠡᠭᠳᠡᠨᠡ᠃
ᠬᠡᠲᠦ ᠹᠢᠯᠣᠰᠣᠹᠢᠳᠤᠵᠤ ᠤᠷᠠᠯᠢᠭ ᠤᠨ ᠦᠨᠡᠨ ᠪᠠᠶᠢᠬᠤ ᠵᠠᠷᠴᠢᠮ ᠢ ᠲᠠᠶᠠᠭᠳᠠᠬᠤ ᠦᠭᠡᠢ᠂ ᠬᠡᠲᠦ ᠳᠦᠷᠰᠦᠯᠡᠯ ᠢ ᠰᠢᠲᠦᠵᠦ ᠤᠷᠠᠯᠢᠭ ᠤᠨ ᠬᠡᠶᠢᠰᠪᠦᠷᠢᠯᠡᠯ ᠦᠨ ᠵᠠᠷᠴᠢᠮ ᠢ ᠠᠯᠳᠠᠭᠳᠠᠭᠤᠯᠬᠤ ᠦᠭᠡᠢ ᠪᠠᠶᠢᠬᠤ ᠲᠤᠭᠤᠷᠪᠢᠯ ᠵᠦᠢ ᠶᠢᠨ ᠡᠨᠡ ᠡᠩ ᠦᠨ ᠦᠨᠡᠨ ᠡᠭᠡᠯ᠂ ᠠᠮᠠᠷᠬᠠᠨ ᠶᠤᠮ ᠰᠢᠭ ᠠᠲᠠᠯᠠ ᠪᠠᠨ ᠬᠡᠴᠢᠨᠡᠨ ᠬᠡᠴᠡᠭᠦᠦ ᠰᠢᠯᠭᠠᠭᠤᠷ ᠪᠣᠯᠬᠤ ᠶᠢ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠢᠷᠠᠭᠤ ᠨᠠᠶᠢᠷᠠᠭ ᠲᠤ ᠬᠢᠭᠰᠡᠨ ᠬᠠᠭᠠᠰ ᠵᠠᠭᠤᠨ ᠤ ᠡᠷᠢᠯ ᠬᠠᠶᠢᠭᠤᠯ ᠬᠠᠷᠠᠭᠤᠯᠵᠤ ᠪᠠᠶᠢᠨᠠ᠃ ᠡᠨᠡ ᠪᠠᠶᠠᠯᠢᠭ ᠡᠷᠢᠯ ᠬᠠᠶᠢᠭᠤᠯ ᠤᠨ ᠬᠢ ᠨᠢ ᠴᠠᠷᠠ ᠳᠠᠯᠠᠶᠢᠴᠠ᠂ ᠮᠥᠨ ᠴᠢᠨᠠᠷ ᠢ ᠰᠠᠶᠢᠲᠤᠷ ᠣᠶᠢᠯᠠᠭᠠᠵᠤ᠂ ᠲᠤᠬᠠᠶᠢᠯᠠᠨ ᠤᠩᠰᠢᠭᠠ ᠦᠭᠡᠢ ᠵᠠᠷᠢᠮ ᠰᠤᠳᠤᠯᠤᠭᠠᠴᠢ᠂ ᠡᠰᠡᠪᠡᠯ ᠤᠩᠰᠢᠭᠴᠢᠳ ᠲᠡᠭᠦᠨ ᠢ ᠲᠥᠭᠡᠷᠢᠯᠳᠦᠭᠰᠡᠨ ᠬᠦᠮᠦᠨ ᠭᠡᠬᠦ ᠨᠢ ᠪᠤᠢ᠃ ᠴᠢᠩ ᠦᠨᠡᠨ ᠳᠦ ᠪᠡᠨ ᠡᠨᠡ ᠪᠣᠯ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠲᠤᠭᠤᠷᠪᠢᠯ ᠵᠦᠢ ᠶᠢᠨ ᠪᠠᠶᠠᠯᠢᠭ ᠶᠢᠷᠲᠢᠨᠴᠦ ᠤᠷᠤᠭᠤ ᠱᠠᠭᠠᠶᠢᠬᠤ ᠲᠡᠳᠦᠢ ᠪᠣᠯᠤᠭᠠᠳ ᠲᠥᠭᠡᠷᠢᠯᠳᠦᠵᠦ ᠶᠠᠪᠤᠭᠠ ᠬᠦᠮᠦᠨ ᠦ ᠦᠭᠡ ᠶᠤᠮ᠃
ᠳ ᠊ ᠤᠷᠢᠶᠠᠩᠬᠠᠢ ᠶᠢᠨ ᠨᠥᠯᠥᠭᠡᠯᠡᠯ
ᠳ ∙ ᠤᠷᠢᠶᠠᠩᠬᠠᠢ ᠪᠣᠯ ᠬᠣᠶᠢᠴᠢ ᠦᠶᠡ ᠳ᠋ᠡᠭᠡᠨ ᠬᠠᠮᠤᠭ ᠤᠨ ᠬᠦᠴᠦᠲᠡᠢ ᠨᠥᠯᠦᠭᠡᠯᠡᠭᠰᠡᠨ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠦᠨ ᠨᠢᠭᠡ᠃ ᠲᠡᠭᠦᠨ ᠦ ᠤᠷᠠᠨ ᠪᠦᠲᠦᠭᠡᠯ᠂ ᠡᠷᠢᠯ ᠬᠠᠶᠢᠭᠤᠯ ᠳᠠᠩ ᠭᠠᠭᠴᠠ ᠢᠷᠠᠭᠤ ᠨᠠᠶᠢᠷᠠᠭ ᠲᠤ ᠪᠤᠰᠤ ᠵᠦᠴᠦᠭᠡ ᠶᠢᠨ ᠵᠣᠬᠢᠶᠠᠯ ᠳᠤ ᠴᠤ ᠬᠦᠴᠦᠲᠡᠢ ᠨᠥᠯᠦᠭᠡᠯᠡᠭᠰᠡᠨ᠃ ᠤᠭ ᠠᠴᠠ 1970 ᠍ ᠊ᠭᠠᠳ ᠣᠨ ᠤ ᠰᠡᠭᠦᠯ ᠡᠴᠡ 1990 ᠍ ᠊ᠭᠡᠳ ᠣᠨ ᠤ ᠡᠬᠢᠨ ᠬᠦᠷᠲᠡᠯᠡ ᠵᠠᠭᠠᠭ ᠲᠤ ᠪᠦᠲᠦᠭᠡᠯ ᠢᠶᠡᠨ ᠡᠷᠴᠢᠮᠲᠡᠢ ᠲᠤᠭᠤᠷᠪᠢᠵᠤ ᠪᠠᠶᠢᠭᠰᠠᠨ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠳ ∙ ᠤᠷᠢᠶᠠᠩᠬᠠᠢ᠂ ᠣ᠊ ∙ ᠳᠠᠰᠢᠪᠠᠯᠪᠠᠷ᠂ ᠪ ∙ ᡀᠠᠭᠸᠠᠰᠦ᠋ᠷᠦᠩ᠂ ᠳ ∙ ᠨᠢᠮᠠᠰᠦ᠋ᠷᠦᠩ ᠦᠨ ᠲᠤᠭᠤᠷᠪᠢᠯ ᠵᠦᠢ ᠶᠢᠨ ᠬᠡᠪ ᠮᠠᠶ᠋ᠢᠭ ᠤᠨ ᠨᠥᠯᠦᠭᠡᠨ ᠳᠦ ᠣᠷᠣᠭᠠ ᠦᠭᠡᠢ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠶᠢ ᠳᠠᠷᠠᠭᠠ ᠦᠶᠡ ᠡᠴᠡ ᠨᠢ ᠣᠯᠬᠤ ᠳᠤ ᠪᠡᠷᠬᠡ᠃ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠢᠮᠫᠧᠷᠰᠢᠣᠨᠢᠰᠲ᠂ ᠹᠢᠯᠣᠰᠣᠹᠢᠳᠠᠭᠴᠢ ᠨᠠᠮᠢᠨᠴᠢᠯᠠᠯᠳᠤ ᠥᠩᠭᠡ ᠠᠶᠠᠰ 《ᠵᠢᠰᠦ ᠪᠦᠭᠡᠭ ᠠᠨᠳᠠ ᠨᠤᠭᠤᠳ》 ᠪᠦᠯᠦᠭ᠂ ᠵᠣᠬᠢᠶᠠᠯᠴᠢ ᠤ᠊ ∙ ᠰᠢᠭᠦᠷᠭᠡ᠂ ᠪ ∙ ᠪᠠᠲᠤᠷᠡᠭᠵᠢᠳᠮᠠ᠂ ᠫᠠᠭᠮᠠ᠂ ᠳ ∙ ᠣᠶᠤᠨᠴᠢᠮᠡᠭ ᠦᠨ 《ᠬᠠᠷᠠᠩᠭᠤᠢ ᠶᠢᠨ ᠳᠠᠭᠤᠯᠠᠯ》᠂ ᠫ ∙ ᠪᠠᠲᠤᠬᠤᠶᠠᠭ ᠤᠨ 《ᠥᠩᠭᠡᠲᠦ ᠶᠢᠷᠲᠢᠨᠴᠦ》 ᠲᠡᠷᠢᠭᠦᠲᠡᠢ ᠡᠬᠢᠨ ᠦᠶᠡ ᠶᠢᠨ ᠬᠢ ᠨᠢ ᠪᠦᠲᠦᠭᠡᠯ ᠦᠳ ᠡᠴᠡ ᠲᠣᠳᠣ ᠬᠠᠷᠠᠭᠳᠠᠨᠠ᠃
ᠬᠠᠷᠢᠨ ᠪ ∙ ᡀᠠᠭᠸᠠᠰᠦ᠋ᠷᠦᠩ ᠦᠨ ᠦᠭᠡ ᠶᠢᠨ ᠴᠡᠴᠡ᠂ ᠬᠠᠷᠭᠢᠰ ᠵᠦᠢᠷᠯᠡᠯ ᠳᠦ ᠳᠤᠯᠳᠤᠶᠢᠳᠤᠭᠰᠠᠨ ᠰᠲᠷᠷᠧᠠᠯᠢᠰᠲ ᠥᠩᠭᠡ ᠠᠶᠠᠰ ᠼ ∙ ᠴᠢᠮᠡᠳᠳᠣᠷᠵᠢ᠂ ᠱ ∙ ᠭᠦᠷᠦᠪᠠᠽᠠᠷ ᠠᠴᠠ ᠡᠬᠢᠯᠡᠭᠡᠳ ᠪ ∙ ᠢᠴᠢᠨᠬᠣᠷᠯᠸᠠ ᠲᠡᠷᠢᠭᠦᠲᠡᠢ 1990 ᠍ ᠊ᠭᠡᠳ ᠣᠨ ᠤ ᠣᠯᠠᠨ ᠢᠷᠠᠭᠤ ᠨᠠᠶᠢᠷᠠᠭᠴᠢᠳ ᠤᠨ ᠤᠷᠠᠯᠠᠯ ᠳᠤ ᠬᠦᠴᠦᠲᠡᠢ ᠨᠥᠯᠥᠭᠡ ᠦᠵᠡᠭᠦᠯᠦᠭᠰᠡᠨ᠃ ᠣᠳᠣ ᠴᠤ ᠲᠡᠭᠦᠨ ᠦ ᠨᠥᠯᠥᠭᠡᠯᠡᠯ ᠡᠴᠡ ᠭᠠᠷᠴᠤ ᠴᠢᠳᠠᠭᠠ ᠦᠭᠡᠢ ᠶᠠᠪᠤᠭᠠ ᠰᠢᠯᠦᠭᠴᠢᠳ ᠣᠯᠠᠨ᠃ ᠪ ∙ ᡀᠠᠭᠸᠠᠰᠦ᠋ᠷᠦᠩ ᠦᠨ ᠨᠥᠯᠥᠭᠡ ᠲᠡᠢ ᠥᠷᠢᠰᠦᠯᠳᠡᠬᠦᠶᠢᠴᠡ ᠤᠶᠠᠩᠭᠠ ᠶᠢᠨ ᠨᠠᠲ᠋ᠦᠶᠢᠷᠠᠯᠢᠰᠲ ᠥᠩᠭᠡ ᠠᠶᠠᠰ ᠲᠠᠢ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠬᠡᠪ ᠮᠠᠶ᠋ᠢᠭ ᠢ ᠳ ∙ ᠨᠢᠮᠠᠰᠦ᠋ᠷᠦᠩ᠂ ᠣ᠊ ∙ ᠳᠠᠰᠢᠪᠠᠯᠪᠠᠷ ᠨᠠᠷ ᠬᠥᠭᠵᠢᠭᠦᠯᠦᠭᠰᠡᠨ᠃ ᠣ᠊ ∙ ᠳᠠᠰᠢᠪᠠᠯᠪᠠᠷ ᠠᠭᠰᠠᠨ ᠪᠦᠷ ᠡᠨᠡ ᠬᠡᠯᠪᠡᠷᠢ ᠪᠡᠨ ᠲᠤᠩᠬᠠᠭᠯᠠᠭᠰᠠᠨ 《ᠭᠣᠣᠯ ᠤᠰᠤ ᠨᠠᠮᠤᠭᠤᠬᠠᠨ ᠤᠷᠤᠰᠤᠨᠠ》 ᠤᠷᠤᠰᠬᠠᠯ ᠢ ᠲᠣᠮᠢᠶᠠᠯᠠᠵᠤ ᠪᠠᠶᠢᠪᠠ᠃ ᠪᠠᠶᠢᠭᠠᠯᠯᠢᠭ ᠰᠡᠷᠡᠬᠦᠢ ᠶᠢᠨ ᠳᠦᠷᠰᠦᠯᠡᠯ᠂ ᠨᠡᠭᠦᠳᠡᠯᠴᠢᠨ ᠦ ᠶᠢᠷᠲᠢᠨᠴᠦ ᠶᠢ ᠦᠵᠡᠬᠦ ᠦᠵᠡᠯ ᠢ ᠭᠣᠣᠯ ᠪᠣᠯᠭᠠᠭᠰᠠᠨ ᠡᠨᠡ ᠤᠷᠤᠰᠬᠠᠯ ᠤᠨ ᠦᠵᠡᠯ ᠰᠠᠨᠠᠭᠠ ᠣᠯᠠᠨ ᠲᠠᠯᠠ ᠪᠠᠷ ᠢᠶᠠᠨ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠲᠣᠮᠢᠶᠠᠯᠠᠭᠰᠠᠨ 《 ᠪᠢᠰᠢ ᠦᠦ ᠪᠢ》 ᠤᠷᠤᠰᠬᠠᠯ ᠲᠠᠢ ᠲᠥᠰᠲᠡᠢ᠃ ᠭᠣᠣᠯ ᠲᠥᠰᠦᠭᠡ ᠨᠢ ᠠᠯᠢ ᠠᠯᠢ ᠨᠢ ᠮᠣᠩᠭᠣᠯ ᠤᠨ ᠤᠯᠠᠮᠵᠢᠯᠠᠯᠲᠤ ᠢᠷᠠᠭᠤ ᠨᠠᠶᠢᠷᠠᠭ ᠢ ᠪᠤᠳ᠋ᠳ᠋ᠾᠠᠶᠢᠰᠮ ᠪᠣᠯᠤᠨ ᠥᠷᠥᠨᠡ ᠳ᠋ᠠᠬᠢᠨ ᠤ ᠰᠢᠨᠡᠴᠢᠯᠡᠭᠴᠢ ᠦᠵᠡᠯ ᠰᠠᠨᠠᠭᠠ ᠪᠠᠷ ᠪᠠᠶᠠᠵᠢᠭᠤᠯᠤᠨ ᠬᠥᠭᠵᠢᠭᠦᠯᠬᠦ ᠶᠢ ᠵᠣᠷᠢᠭᠰᠠᠨ᠃ ᠭᠣᠣᠯ ᠢᠯᠭᠠᠭᠠ ᠨᠢ ᠣ᠊ ∙ ᠳᠠᠰᠢᠪᠠᠯᠪᠠᠷ ᠰᠢᠯᠦᠭ ᠦᠨ ᠭᠠᠳᠠᠭᠠᠳᠤ ᠬᠡᠯᠪᠡᠷᠢ ᠪᠤᠶᠤ ᠦᠭᠡ ᠶᠢᠨ ᠰᠣᠩᠭᠣᠯᠲᠠ᠂ ᠰᠡᠳᠦᠪ ᠵᠡᠷᠭᠡ ᠳᠦ ᠢᠯᠡᠭᠦᠦ ᠠᠩᠬᠠᠷᠤᠯ ᠬᠠᠨᠳᠤᠭᠤᠯᠵᠤ᠂ ᠨᠡᠯᠢᠶᠡᠳ ᠬᠠᠭᠤᠴᠢᠨᠰᠠᠭ ᠪᠠᠶᠢᠷᠢ ᠰᠠᠭᠤᠷᠢ ᠪᠠᠷᠢᠮᠲᠠᠯᠠᠭᠰᠠᠨ ᠪᠣᠯ ᠳ ∙ ᠤᠷᠢᠶᠠᠩᠬᠠᠢ ᠰᠢᠯᠦᠭ ᠦᠨ ᠳᠣᠲᠣᠭᠠᠳᠤ ᠬᠡᠯᠡᠮᠵᠢ ᠪᠤᠶᠤ ᠹᠢᠯᠣᠰᠣᠹᠢᠯᠣᠭ ᠴᠢᠨᠠᠷ ᠢ ᠴᠢᠬᠤᠯᠠᠴᠢᠯᠠᠵᠤ᠂ ᠭᠱᠠᠨ ᠤ ᠰᠡᠷᠡᠯ ᠮᠡᠳᠡᠷᠡᠮᠵᠢ ᠶᠢ ᠰᠢᠲᠦᠭᠰᠡᠨ ᠡᠷᠡᠰ ᠰᠢᠨᠡᠯᠢᠭ ᠡᠷᠢᠯᠬᠢᠯᠡᠯ ᠢ ᠳᠡᠮᠵᠢᠭᠰᠡᠨ ᠳᠦ ᠪᠡᠨ ᠪᠤᠢ᠃ ᠣ᠊ ∙ ᠳᠠᠰᠢᠪᠠᠯᠪᠠᠷ᠂ ᠳ ∙ ᠨᠢᠮᠠᠰᠦ᠋ᠷᠦᠩ᠂ ᠭ ∙ ᠮᠡᠨᠳᠦ-ᠣᠣᠶᠣ ᠨᠠᠷ ᠤᠨ ᠭᠣᠣᠯ ᠤᠰᠤ ᠨᠠᠮᠤᠭᠤᠬᠠᠨ ᠤᠷᠤᠰᠤᠨᠠ ᠤᠷᠤᠰᠬᠠᠯ ᠳᠤ ᠲ ∙ ᠰᠣᠳᠨᠠᠮᠨᠠᠮᠵᠢᠯ᠂ ᠳ ∙ ᠴᠣᠭᠪᠠᠳᠠᠷᠠᠬᠤ᠂ ᠠ᠊ ∙ ᠡᠷᠳᠡᠨᠢ-ᠣᠴᠢᠷ᠂ ᠼ ∙ ᠪᠠᠪᠤᠳᠣᠷᠵᠢ ᠨᠠᠷ ᠤᠨ ᠢᠷᠠᠭᠤ ᠨᠠᠶᠢᠷᠠᠭᠴᠢᠳ ᠪᠦᠲᠦᠭᠡᠯ ᠦᠨ ᠥᠩᠭᠡ ᠠᠶᠠᠰ ᠢᠶᠠᠷ ᠢᠶᠠᠨ ᠬᠠᠮᠢᠶᠠᠷᠤᠨᠠ᠃ ᠡᠨᠡ ᠮᠡᠲᠦ ᠮᠣᠩᠭᠣᠯ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠤᠯᠠᠮᠵᠢᠯᠠᠯ᠂ ᠰᠢᠨᠡᠴᠢᠯᠡᠯ ᠦᠨ ᠠᠰᠠᠭᠤᠳᠠᠯ ᠢ ᠬᠡᠯᠡᠨ ᠦ ᠦᠵᠡᠭᠳᠡᠯ ᠦᠨ ᠬᠤᠪᠢ ᠳᠤ ᠠᠪᠴᠤ ᠦᠵᠡᠭᠰᠡᠨ ᠲᠤᠭᠤᠷᠪᠢᠯ ᠵᠦᠢ ᠶᠢᠨ ᠰᠤᠳᠤᠯᠭᠠ ᠮᠠᠨ ᠤ ᠳᠤ ᠦᠭᠦᠯᠡᠭᠳᠡᠵᠦ ᠪᠤᠢ᠃
ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠹᠢᠯᠣᠰᠣᠹᠢᠯᠣᠭ ᠬᠡᠯᠪᠡᠷᠢᠳᠡᠯᠲᠡ ᠨᠦᠭᠦᠳ᠂ ᠥᠪᠡᠷᠮᠢᠴᠡ ᠵᠦᠢᠷᠯᠡᠯ ᠦᠳ ᠢᠶᠡᠷ ᠢᠶᠡᠨ ᠮᠧᠲ᠋ᠠᠹᠣᠷ ᠤᠨ ᠪᠠᠶᠠᠯᠢᠭ ᠰᠠᠩ ᠡᠭᠦᠰᠬᠡᠭᠰᠡᠨ ᠴᠢᠯᠦᠭᠡᠲᠦ ᠰᠢᠯᠦᠭᠯᠢᠭ᠂ ᠪᠣᠳᠣᠷᠠᠯ ᠡᠷᠭᠢᠴᠡᠭᠦᠯᠦᠯ ᠦᠳ 1990 ᠍ ᠊ᠭᠡᠳ ᠣᠨ ᠤ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠵᠠᠯᠠᠭᠤᠰ ᠢ ᠰᠢᠨᠡ ᠥᠷᠨᠢᠯ ᠳᠦ ᠬᠥᠲᠥᠯᠵᠡᠢ᠃
1992 ᠣᠨ ᠳᠤ ᠬᠡᠪᠯᠡᠭᠦᠯᠦᠭᠰᠡᠨ 《ᠵᠢᠰᠦ ᠪᠦᠭᠡᠭ ᠠᠨᠳᠠ ᠨᠤᠭᠤᠳ》 ᠪᠦᠯᠦᠭ ᠦᠨ ᠨᠣᠮ ᠠᠴᠠ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ 《ᠨᠢᠯᠬᠠ ᠬᠥᠯ ᠦᠨ ᠰᠠᠯᠬᠢ》᠂ 《ᠴᠡᠭᠡᠵᠢᠨ ᠦ ᠨᠥᠮᠥᠷᠢ》 ᠨᠣᠮ ᠤᠳ ᠤᠨ ᠨᠥᠯᠥᠭᠡ ᠰᠢᠭᠤᠳ ᠠᠩᠵᠠᠭᠠᠷᠠᠭᠳᠠᠳᠠᠭ᠃ ᠤᠭ ᠪᠦᠯᠦᠭ ᠦᠨ ᠭᠣᠣᠯ ᠤᠷᠠᠨ ᠪᠦᠲᠦᠭᠡᠯᠴᠢ ᠭ ∙ ᠪᠠᠳᠠᠮᠰᠠᠮᠪᠤᠤ ᠬᠣᠵᠢᠮ᠂ 《ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠲᠤᠭᠤᠷᠪᠢᠬᠤ ᠬᠡᠪ ᠮᠠᠶ᠋ᠢᠭᠲᠤ ᠬᠣᠰᠢᠭᠤᠷᠠᠨ ᠳᠠᠭᠠᠵᠤ ᠪᠠᠶᠢᠭᠰᠠᠨ》 ᠲᠤᠬᠠᠢ ᠪᠠᠨ ᠳᠤᠷᠠᠰᠤᠭᠰᠠᠨ ᠨᠢ ᠪᠤᠢ᠃
ᠨᠢᠭᠡᠨ ᠵᠡᠷᠭᠡᠴᠡᠭᠦᠯᠦᠯ᠄
ᠨᠣᠮᠣᠬᠠᠨ ᠳᠥᠯᠥᠭᠡᠨ ᠳᠠᠯᠠᠢ ᠮᠢᠨᠣ
ᠳ ∙ ᠤᠷᠢᠶᠠᠩᠬᠠᠢ
ᠠᠶᠤᠨᠠᠮ᠃ ᠭᠤᠷᠭᠤᠤᠯᠳᠠᠢ ᠵᠢᠷᠭᠢᠪᠡᠴᠦ ᠳᠦᠯᠡᠢ᠂ ᠠᠷᠰᠯᠠᠨ ᠬᠦᠷᠬᠢᠷᠡᠪᠡᠴᠦ ᠳᠦᠯᠡᠢ᠃ ᠠᠶᠤᠨᠠᠮ᠃ ᠥᠳᠥ ᠤᠨᠠᠭᠰᠠᠨ ᠴᠤ ᠴᠣᠴᠢᠬᠤ ᠦᠭᠡᠢ᠂ ᠣᠳᠣ ᠤᠨᠠᠭᠰᠠᠨ ᠴᠤ ᠴᠣᠴᠢᠬᠤ ᠦᠭᠡᠢ᠂ ᠬᠦᠮᠦᠨ ᠭᠤᠤᠭᠤᠯᠤᠯᠠ ᠴᠤ᠂ ᠰᠠᠷᠮᠠᠭᠴᠢᠨ ᠣᠷᠢᠯᠠᠯᠠ ᠴᠤ ᠳᠠᠪᠠᠯᠭᠠ ᠯᠠ ᠴᠠᠯᠭᠢᠨᠠᠮ᠃
ᠠᠶᠤᠨᠠᠮ᠃ ᠳᠠᠯᠠᠢ ᠮᠢᠨᠢ ᠠᠭᠤᠤ ᠶᠡᠬᠡ ᠪᠡᠷ ᠢᠶᠡᠨ ᠠᠶᠤᠯᠭᠠᠵᠤ᠂ 《ᠪᠠᠭᠠ》 ᠍ ᠶᠢᠨ ᠵᠣᠪᠠᠯᠠᠩ ᠢ ᠲᠠᠨᠢᠭᠤᠯᠤᠨ᠂ ᠠᠵᠢᠭᠭᠦᠶᠢᠬᠡᠨ ᠢᠶᠡᠷ ᠳᠦᠩᠰᠦᠶᠢᠨᠡᠮ᠃ ᠭᠡᠪᠡᠴᠦ ᠠᠶᠤᠭᠰᠠᠨ ᠦᠨᠡᠨ ᠢ ᠮᠢᠨᠢ ᠮᠡᠳᠡᠭᠦᠲᠡ ᠪᠡᠨ ᠤᠤᠯᠭᠠ ᠠᠯᠳᠠᠨ ᠬᠤᠤᠬᠢᠷᠴᠤ᠂ ᠱᠤᠤᠭᠢᠨ ᠬᠦᠷᠬᠢᠷᠡᠵᠦ᠂ ᠠᠮᠠᠷᠠᠭ ᠡᠬᠡ ᠶᠢᠨ ᠠᠳᠠᠯᠢ ᠠᠷᠭᠠᠳᠠᠨ ᠬᠤᠷᠤᠶᠢᠯᠠᠨᠠᠮ᠃
ᠠᠮᠢᠷ ᠢ ᠬᠠᠯᠠᠬᠤ
ᠭ ∙ ᠪᠠᠳᠠᠮᠰᠠᠮᠪᠤᠤ
ᠰᠡᠳᠬᠢᠯ ᠲᠦᠳᠡᠭᠡᠳ ᠪᠠᠶᠢᠰᠬᠢᠮᠡᠭᠴᠡ ᠰᠣᠴᠢᠨ ᠠᠳᠬᠠᠬᠤ ᠪᠥᠯᠦᠭᠡ᠃
ᠭᠣᠣᠯ ᠤᠨ ᠬᠠᠷᠠᠩᠭᠤᠢ ᠡᠷᠭᠢ ᠁ ᠬᠦᠮᠦᠨ ᠦ ᠵᠢᠰᠦ ᠁ ᠤᠶᠢᠲᠤ ᠠᠢ ᠁ ᠴᠤᠪᠣᠬᠤ ᠨᠢᠯᠪᠤᠰᠤ ᠁ ᠢᠨᠢᠶᠡᠯᠴᠡᠬᠦ ᠁ ᠠᠩᠭᠢᠵᠢᠷᠠᠨ ᠣᠳᠬᠤ ᠁ ᠳᠠᠭᠤᠯᠠᠬᠤ ᠁ ᠬᠤᠷᠢᠴᠠᠬᠤ ᠁ ᠦᠬᠦᠬᠦ ᠮᠡᠲᠦ ᠪᠣᠯᠬᠤ ᠁ ᠬᠣᠣᠷᠯᠠᠬᠤ ᠶᠢ ᠬᠦᠰᠡᠬᠦ ᠁ ᠠᠲᠠᠭᠠ ᠴᠤᠭᠯᠠᠬᠤ ᠪᠦᠬᠦᠨ ᠪᠦᠷᠢᠨᠡ ᠨᠢᠭᠡᠳᠦᠭᠡᠳ ᠁ ᠭᠱᠠᠨᠠ ᠰᠠᠷᠨᠢᠵᠠᠢ᠃
ᠶᠣᠰᠣᠯᠠᠮᠠᠭᠴᠠ ᠡᠰᠡ ᠪᠣᠯᠤᠭᠰᠠᠨ ᠦᠢᠯᠡ᠂ ᠪᠣᠯᠤᠭᠰᠠᠨ ᠦᠢᠯᠡ᠂ ᠬᠦᠨᠳᠦᠳᠬᠡᠪᠡᠯ ᠵᠣᠬᠢᠬᠤ ᠪᠦᠬᠦᠨ ᠢ ᠦᠯᠦ ᠢᠯᠭᠠᠭᠠᠳ ᠨᠢᠭᠤᠷ ᠮᠡᠩᠳᠡᠭᠦᠷᠡᠨᠡᠮ᠃ ᠪᠢ᠂ ᠲᠩᠷᠢ ᠳᠦ ᠮᠡᠬᠦᠶᠢᠪᠡ ᠦᠦ᠂ ᠶᠠᠭᠠᠬᠢᠪᠠ ︖ ᠲᠡᠭᠦᠨ ᠦ ᠠᠰᠠᠭᠤᠯᠭᠠ ᠳᠤ ᠦᠯᠦ ᠥᠴᠢᠨᠡ᠃
ᠶᠠᠭᠤᠨ ᠬᠡᠮᠡᠬᠦᠯᠡ ᠪᠡᠶᠡ ᠮᠠᠨᠢ ᠦᠯᠦ ᠢᠯᠭᠠᠭᠴᠢ᠂ ᠢᠯᠡᠳᠲᠡ ᠲᠠᠨᠢᠭᠴᠢ ᠶᠢᠨ ᠠᠯᠢᠨ ᠢ ᠴᠤ ᠡᠰᠡ ᠡᠵᠡᠮᠰᠢᠪᠡᠢ᠃ ᠡᠵᠡᠮᠰᠢᠭᠰᠡᠨ ᠠᠬᠤᠯᠠ ᠲᠠᠷᠢᠬᠢ ᠮᠠᠭᠤ᠂ ᠦᠯᠦ ᠲᠥᠭᠡᠷᠢᠯᠳᠦᠬᠦ ᠬᠠᠲᠠᠭᠤᠴᠢ ᠰᠡᠳᠬᠢᠯ ᠪᠥᠬᠡᠵᠢᠭᠡᠳ ᠭᠠᠰᠠᠯᠠᠩᠭᠤᠢ ᠶᠢᠨ ᠦᠷᠡ ᠬᠠᠰᠬᠢᠷᠤᠨ ᠲᠦᠭᠡᠬᠦ ᠠᠮᠤᠢ᠃ ᠡᠭᠦᠨ ᠡᠴᠡ ᠵᠠᠪᠰᠠᠷᠯᠠᠵᠤ ᠠᠮᠵᠢᠪᠠᠢ᠃
ᠨᠠᠷᠠ
ᠳ ∙ ᠤᠷᠢᠶᠠᠩᠬᠠᠢ
ᠰᠡᠭᠦᠳᠡᠷ ᠪᠣᠯ ᠠᠮᠠᠷᠠᠵᠤ ᠪᠤᠢ ᠬᠠᠷᠠ ᠨᠠᠷᠠ᠃ ᠰᠡᠭᠦᠳᠡᠷᠲᠦᠬᠦ ᠶᠢᠨ ᠢᠶᠡᠨ ᠬᠡᠮᠵᠢᠶᠡ ᠪᠡᠷ ᠥᠩᠭᠡ ᠣᠷᠣᠨᠠ᠃
ᠬᠠᠷᠠ ᠣᠳᠣ
ᠪ ∙ ᠫᠦᠷᠪᠦᠰᠦ᠋ᠷᠦᠩ
ᠲᠡᠷᠡ ᠳᠡᠭᠡᠷᠡ
ᠲᠠᠭᠲᠤᠨ ᠳᠡᠭᠡᠷᠡ ᠵᠣᠭᠰᠣᠭᠠ ᠪᠦᠰᠡᠭᠦᠢ
ᠬᠠᠷᠠ ᠣᠳᠣ ᠠ᠋
ᠳ ᠊ ᠤᠷᠢᠶᠠᠩᠬᠠᠢ ᠶᠢᠨ ︽ ᠤᠲ᠋ᠤᠫᠢ 》
ᠢᠳᠧᠠᠯ ᠳᠤ ᠬᠦᠷᠬᠦ ᠪᠣᠯᠤᠮᠵᠢ ᠦᠭᠡᠢ᠃ ᠡᠭᠦᠨ ᠢ ᠤᠬᠠᠮᠰᠠᠷᠯᠠᠵᠤ ᠪᠤᠢ ᠪᠠᠷ ᠢᠶᠠᠨ ᠬᠦᠮᠦᠨ ᠦ ᠤᠬᠠᠭᠠᠨ ᠠᠭᠤᠤ᠃ ᠬᠦᠷᠴᠦ ᠪᠣᠯᠬᠤᠶᠢᠴᠠ᠂ ᠨᠡᠩ ᠲᠣᠳᠣᠷᠬᠠᠢ ᠵᠦᠢᠯ ᠢ ᠢᠳᠧᠠᠯ ᠭᠡᠵᠦ ᠦᠵᠡᠵᠦ ᠪᠠᠶᠢᠭᠠ ᠪᠣᠯ ᠲᠡᠷᠡ ᠶᠠᠭᠠᠬᠢᠪᠠᠴᠤ ᠡᠷᠡᠭᠦᠯ ᠰᠠᠷᠠᠭᠤᠯ ᠬᠦᠮᠦᠨ ᠪᠢᠰᠢ᠃
ᠠᠨᠳᠠᠷᠢ ᠲᠠᠷᠺᠣᠪᠰᠺᠦ
ᠹᠶᠣᠳᠠᠷ ᠮᠠᠬᠠᠶᠢᠯᠣᠸᠢᠴ ᠳᠠᠰᠤᠲᠠᠧᠦᠢᠰᠺᠦ ᠠᠰᠤᠷᠤ ᠲᠣᠮᠣ ᠤᠲ᠋ᠣᠫᠢ ᠲᠡᠭᠡᠭᠡᠵᠦ᠂ ᠲᠡᠭᠡᠭᠡᠷᠡ ᠲᠡᠭᠡᠭᠡᠰᠢᠨ ᠳᠦ ᠪᠡᠨ ᠲᠦᠦᠷᠲᠦᠵᠦ᠂ ᠲᠡᠷᠡ ᠲᠡᠭᠡᠰᠢ ᠪᠡᠨ ᠬᠦᠦᠷᠨᠢᠵᠦ ᠠᠮᠢᠳᠤᠷᠠᠭᠰᠠᠨ ᠵᠣᠬᠢᠶᠠᠯᠴᠢ᠃ ᠬᠠᠮᠵᠢᠯᠭᠠᠲᠤ ᠨᠡᠶᠢᠭᠡᠮ ᠨᠢ ᠥᠷᠥᠨᠡ ᠳ᠋ᠠᠬᠢᠨ ᠠᠴᠠ ᠬᠡᠳᠦᠨ ᠵᠠᠭᠤᠨ ᠢᠶᠠᠷ ᠬᠣᠴᠣᠷᠤᠭᠰᠠᠨ ᠣᠷᠣᠰ ᠤᠨ ᠰᠡᠬᠡᠭᠡᠲᠡᠨ ᠨᠦᠭᠦᠳ ᠢ ᠲᠤᠬᠠᠢ ᠶᠢᠨ ᠦᠶᠡ ᠳ᠋ᠡᠭᠡᠨ ᠶᠡᠬᠡ ᠪᠡᠷ ᠲᠠᠲᠠᠵᠤ ᠪᠠᠶᠢᠭᠰᠠᠨ ᠰᠣᠴᠢᠶᠠᠯᠢᠮ ᠤᠨ ᠤᠲ᠋ᠣᠫᠢ ᠳᠤ ᠳᠠᠰᠤᠲᠠᠧᠦᠢᠰᠺᠢ ᠲᠠᠲᠠᠭᠳᠠᠵᠤ᠂ ᠫᠧᠲ᠋ᠷᠠᠱᠧᠸᠰᠺ ᠤᠨ ᠳᠤᠭᠤᠶᠢᠯᠠᠩ ᠤᠨ ᠢᠳᠡᠪᠬᠢᠲᠡᠨ ᠪᠣᠯᠤᠭᠰᠠᠨ ᠲᠡᠦᠬᠡ ᠲᠡᠢ᠃ ᠲᠡᠷᠡ ᠡᠨᠡ ᠦᠵᠡᠯ ᠰᠠᠨᠠᠭᠠ ᠪᠠᠨ ᠳᠡᠭᠦᠵᠢᠯᠡᠭᠦᠷ ᠦᠨ ᠣᠯᠣᠰᠣ ᠲᠠᠢ ᠬᠠᠮᠲᠤ ᠣᠷᠬᠢᠭᠠ ᠦᠭᠡᠢ᠃ ᠴᠥᠯᠡᠯᠭᠡ ᠡᠴᠡ ᠲᠡᠷᠡ ᠺᠣᠮᠮᠤᠨᠢᠰᠲ ᠤᠲ᠋ᠣᠫᠢ ᠪᠠᠨ ᠱᠠᠰᠢᠨ ᠤ ᠡᠷᠭᠢᠴᠡᠭᠦᠯᠦᠯ ᠳᠦ ᠰᠠᠭᠤᠷᠢᠯᠠᠭᠰᠠᠨ ᠬᠦᠮᠦᠨᠯᠢᠭ ᠦᠵᠡᠯ ᠢᠶᠡᠷ ᠪᠠᠶᠠᠵᠢᠭᠤᠯᠤᠭᠠᠳ ᠡᠷᠭᠢᠵᠦ ᠢᠷᠡᠭᠰᠡᠨ᠃ ᠡᠨᠡ ᠨᠢ ᠨᠠᠰᠤᠨ ᠲᠤᠷᠰᠢ ᠶᠢᠨ ᠬᠢ ᠨᠢ ᠤᠷᠠᠨ ᠪᠦᠲᠦᠭᠡᠯ ᠦᠨ ᠴᠢᠭ ᠬᠠᠨᠳᠤᠯᠭᠠ ᠪᠣᠯᠤᠨ ᠲᠣᠭᠲᠠᠵᠤ᠂ ᠠᠭᠤᠤ ᠡᠷᠡᠦᠴᠢᠨ ᠭᠡᠬᠦ ᠮᠡᠲᠦ ᠡᠷᠭᠢᠴᠡᠭᠦᠯᠦᠯ ᠢ ᠪᠢᠴᠢᠭᠦᠯᠦᠭᠰᠡᠨ ᠪᠢᠯᠡ᠃ ᠺᠠᠷᠠᠮᠵᠣᠸ ᠤᠨ ᠬᠥᠪᠡᠭᠦᠳ ᠦᠨ ᠲᠡᠭᠦᠰᠬᠡᠯ ᠳ᠋ᠡᠬᠢ ᠬᠡᠦᠬᠡᠳ ᠦᠨ ᠭᠡᠭᠡᠨ ᠶᠢᠷᠲᠢᠨᠴᠦ ᠶᠢᠨ ᠲᠤᠬᠠᠢ ᠥᠭᠦᠯᠡᠮᠵᠢ ᠳᠦ ᠳᠠᠰᠤᠲᠠᠧᠦᠢᠰᠺᠢ ᠶᠢᠨ ᠬᠦᠮᠦᠨᠯᠢᠭ ᠦᠵᠡᠯ ᠦᠨ ᠭᠣᠣᠯ ᠰᠠᠨᠠᠭᠠ ᠲᠤᠰᠣᠭᠰᠠᠨ ᠨᠢ ᠪᠤᠢ᠃ ᠵᠣᠬᠢᠶᠠᠯᠴᠢ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠳᠣᠲᠣᠷᠠ ᠪᠠᠨ ᠠᠭᠤᠯᠵᠤ ᠪᠤᠢ ᠤᠲ᠋ᠣᠫᠢ ᠡᠭᠦᠨ ᠲᠡᠢ ᠲᠥᠰᠲᠡᠢ᠃ ᠲᠡᠷᠡ ᠪᠡᠷ ᠡᠨᠡ ᠭᠦᠨ ᠤᠬᠠᠭᠠᠨ ᠤ ᠡᠰᠢ ᠦᠵᠡᠯ ᠢᠶᠡᠨ ᠥᠪᠡᠷ ᠦᠨ ᠡᠰᠰᠠ᠂ ᠪᠣᠳᠣᠷᠠᠯ ᠤᠨ ᠨᠣᠮ ᠤᠳ ᠲᠠᠭᠠᠨ ᠵᠠᠳᠠᠯᠤᠨ ᠬᠥᠭᠵᠢᠭᠦᠯᠦᠭᠰᠡᠭᠡᠷ ᠢᠷᠡᠭᠰᠡᠨ᠃ ᠡᠳᠦᠭᠡ ᠨᠠᠰᠤᠨ ᠤ ᠷᠣᠮᠠᠨ ᠬᠡᠮᠡᠨ ᠪᠢᠴᠢᠭᠰᠡᠭᠡᠷ ᠪᠤᠢ ᠷᠣᠮᠠᠨ ᠳᠤ ᠨᠢ ᠡᠨᠡ ᠪᠦᠬᠦ ᠡᠷᠭᠢᠴᠡᠭᠦᠯᠦᠯ ᠨᠢ ᠰᠢᠩᠭᠡᠵᠦ ᠪᠤᠢ᠂ ᠲᠡᠶᠢᠮᠦ ᠴᠤ ᠤᠴᠢᠷ ᠠᠴᠠ ᠴᠠᠭ ᠶᠡᠬᠡ ᠱᠠᠭᠠᠷᠳᠠᠵᠤ ᠪᠤᠢ ᠨᠢ ᠣᠶᠢᠯᠠᠭᠠᠮᠵᠢᠲᠠᠢ᠃ ᠣᠯᠠᠨ ᠨᠡᠶᠢᠲᠡ ᠶᠢᠨ ᠪᠣᠯᠪᠠᠰᠤᠷᠠᠯ᠂ ᠭᠡᠭᠡᠷᠡᠯ ᠢ ᠦᠢᠯᠡᠳᠪᠦᠷᠢᠯᠡᠯ᠂ ᠪᠦᠲᠦᠭᠡᠯᠴᠢ ᠦᠢᠯᠡ ᠲᠡᠢ ᠬᠣᠣᠰᠯᠠᠭᠤᠯᠤᠭᠰᠠᠨ ᠠᠩᠭᠢ ᠦᠭᠡᠢ ᠨᠡᠶᠢᠭᠡᠮ ᠤᠨ ᠲᠤᠬᠠᠢ ᠲᠣᠮᠠᠰ ᠮᠣᠷ ᠤᠨ ᠤᠲ᠋ᠣᠫᠢ ᠦᠵᠡᠯ᠂ ᠮᠠᠷᠺᠰ ᠤᠨ 《ᠡᠪ ᠬᠠᠮᠲᠤ ᠶᠢᠨ ᠦᠵᠡᠯ ᠰᠠᠨᠠᠭᠠ》 ᠭᠡᠳ ᠨᠡᠶᠢᠭᠡᠮ ᠤᠨ ᠢᠯᠭᠠᠷᠠᠯ᠂ ᠬᠠᠷᠭᠢᠰ ᠪᠠᠶᠢᠳᠠᠯ ᠢ ᠤᠰᠠᠳᠬᠠᠬᠤ ᠲᠤᠬᠠᠢ ᠦᠵᠡᠯ ᠦᠳ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠡᠨᠡᠷᠢᠩᠭᠦᠢ ᠦᠵᠡᠯ ᠲᠡᠢ ᠬᠣᠯᠪᠣᠭᠠᠲᠠᠢ ᠶᠢ ᠲᠡᠷᠡᠪᠡᠷ ᠥᠪᠡᠷ ᠢᠶᠡᠨ ᠴᠤ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠳᠡᠭ᠃ ᠶᠠᠮᠠᠷ ᠰᠠᠶᠢᠨ ᠳᠤ ᠪᠠᠨ 《ᠨᠡᠶᠢᠭᠡᠮ ᠤᠨ ᠠᠮᠢᠳᠤᠷᠠᠯ ᠳᠤ ᠬᠢᠭᠡᠳ ᠢᠷᠡᠭᠡᠳᠦᠢ ᠳᠦ ᠬᠠᠨᠳᠤᠬᠤ ᠬᠠᠨᠳᠤᠯᠭᠠ ᠪᠠᠷ ᠢᠶᠠᠨ ᠪᠢ ᠤᠲ᠋ᠣᠫᠢ ᠢᠳᠧᠠᠯᠢᠰᠲ ᠦᠵᠡᠯ ︿ᠬᠠᠩᠬᠤᠯᠤᠭᠤᠯᠵᠤ﹀ ᠪᠠᠶᠢᠬᠤ ᠮᠠᠭᠠᠳ ᠲᠠᠢ》 ᠬᠡᠮᠡᠬᠦ ᠪᠤᠢ ᠳ᠋ᠡ᠃ ᠦᠨᠡᠨ ᠳᠦ ᠪᠡᠨ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠬᠦᠮᠦᠨᠯᠢᠭ ᠦᠵᠡᠯ ᠦᠨ ᠲᠣᠮᠢᠶᠠᠯᠠᠯ ᠤᠲ᠋ᠣᠫᠢ ᠭᠡᠬᠦ ᠡᠴᠡ ᠪᠡᠨ ᠢᠯᠡᠭᠦᠦ ᠰᠤᠷᠭᠠᠯ ᠨᠣᠮᠯᠠᠯ ᠤᠨ ᠴᠢᠨᠠᠷᠲᠠᠢ᠃ ᠭᠡᠬᠦ ᠳᠦ ᠪᠡᠨ ᠡᠨᠡ ᠦᠵᠡᠯ ᠨᠢ ᠮᠠᠨ ᠤ ᠨᠡᠶᠢᠭᠡᠮ ᠳᠦ ᠪᠡᠶᠡᠯᠡᠬᠦ ᠪᠣᠯᠤᠮᠵᠢ ᠣᠭᠲᠣ ᠠᠴᠠ ᠦᠭᠡᠢ᠂ ᠡᠰᠡᠬᠦᠯᠡ ᠲᠡᠶᠢᠮᠦ ᠪᠣᠯᠤᠮᠵᠢ ᠪᠠᠶᠢᠪᠠᠴᠤ ᠭᠦᠢᠴᠡᠯᠳᠦᠭᠦᠯᠬᠦ ᠬᠦᠰᠡᠯ ᠵᠣᠷᠢᠭ᠂ ᠰᠠᠴᠢᠢ ᠪᠢᠳᠡᠨ ᠳᠦ ᠳᠤᠲᠠᠵᠤ ᠪᠤᠢ ᠤᠴᠢᠷ ᠠᠴᠠ ᠯᠠ 《ᠤᠲ᠋ᠣᠫᠢ》 ᠭᠡᠳ ᠪᠠᠶᠢᠭᠠ ᠬᠡᠷᠡᠭ᠃
ᠠᠯᠢ ᠲᠡᠷᠲᠡᠭᠡ 1985 ᠣᠨ ᠳᠤ ᠳ ∙ ᠤᠷᠢᠶᠠᠩᠬᠠᠢ ᠥᠪᠡᠷ ᠦᠨ ᠬᠦᠮᠦᠨᠯᠢᠭ ᠦᠵᠡᠯ ᠢ ᠡᠶᠢᠨ ᠲᠣᠮᠢᠶᠠᠯᠠᠵᠤ ᠪᠠᠶᠢᠪᠠ᠃
ᠬᠥᠮᠦᠨ ᠳᠦ ᠳᠥᠷᠪᠡᠨ ᠤᠬᠠᠭᠠᠨ ᠳᠥᠷᠥᠭᠡ ᠪᠣᠯᠤᠨᠠ᠃
ᠳᠥᠷᠪᠡᠨ ᠵᠦᠭ ᠨᠡᠶᠢᠯᠡᠵᠦ ᠬᠣᠷᠸᠠ ᠶᠢ ᠴᠣᠭᠴᠠᠯᠠᠭᠠᠳᠠᠭ ᠰᠢᠭ ᠬᠦᠮᠦᠨ ᠪᠡᠶᠡ ᠪᠡᠨ ᠲᠡᠵᠢᠭᠡᠵᠦ᠂ ᠲᠥᠷᠥ ᠪᠡᠨ ᠰᠠᠬᠢᠵᠤ᠂ ᠪᠤᠷᠤᠭᠤ ᠪᠠᠨ ᠵᠥᠪᠲᠡᠭᠡᠵᠦ᠂ ᠪᠠᠶᠢᠬᠤ ᠦᠭᠡᠢ ᠶᠢ ᠪᠠᠶᠢᠯᠭᠠᠵᠤ ᠪᠠᠶᠢᠵᠤ ᠠᠮᠢᠳᠤᠷᠠᠯ ᠢᠶᠠᠨ ᠴᠣᠭᠴᠠᠯᠠᠭᠠᠨᠠ 》
《ᠳᠠᠭᠤ ᠦᠭᠡᠢ ᠨᠣᠮ》 ᠍ ᠳᠦ ᠪᠤᠢ ᠡᠨᠡ ᠰᠠᠨᠠᠭᠠ ᠳ ∙ ᠤᠷᠢᠶᠠᠩᠬᠠᠢ ᠶᠢᠨ ᠵᠠᠮ ᠮᠥᠷ ᠦᠨ ᠭᠣᠣᠯ ᠰᠤᠷᠭᠠᠯ ᠶᠤᠮ᠃ ᠲᠡᠷᠡ ᠪᠡᠷ ᠬᠦᠮᠦᠨ ᠦ ᠣᠷᠣᠰᠢᠬᠤᠢ ᠶᠢᠨ ᠠᠰᠠᠭᠤᠳᠠᠯ ᠢ ᠣᠯᠠᠨ ᠲᠠᠯᠠ ᠠᠴᠠ ᠨᠢ ᠵᠠᠳᠠᠯᠤᠨ ᠰᠢᠨᠵᠢᠯᠡᠵᠦ ᠠᠪᠴᠤ ᠦᠵᠡᠬᠦ ᠳᠦ ᠪᠡᠨ ᠢᠮᠠᠭᠲᠠ ᠮᠣᠩᠭᠣᠯ ᠣᠷᠣᠨ ᠤ ᠥᠩᠭᠡᠷᠡᠭᠰᠡᠨ᠂ ᠣᠳᠣ᠂ ᠢᠷᠡᠭᠡᠳᠦᠢ ᠶᠢᠨ ᠡᠮᠦᠨᠡ ᠡᠴᠡ ᠰᠡᠳᠬᠢᠵᠦ᠂ ᠦᠨᠳᠦᠰᠦᠲᠡᠨ ᠦ ᠬᠡᠮᠵᠢᠶᠡᠨ ᠳᠦ ᠭᠠᠷᠭᠠᠯᠭᠠ ᠡᠷᠢᠨᠡ᠃《ᠥᠷᠥᠨᠡ ᠶᠢᠨ ᠬᠡᠲᠦ ᠬᠥᠭᠵᠢᠯ ᠢ ᠤᠭᠲᠤᠨ ᠣᠴᠢᠬᠤ》 ᠪᠢᠰᠢ ᠦᠦ ᠪᠢ ᠶᠢᠨ ᠭᠠᠷᠭᠠᠯᠭᠠᠨ ᠠᠴᠠ ᠡᠬᠢᠯᠡᠭᠡᠳ 《ᠽᠡᠨᠳᠡᠮᠦᠨᠢ ᠣᠨᠣᠯ᠄ ᠮᠣᠩᠭᠣᠯ ᠤᠨ ᠨᠡᠶᠢᠭᠡᠮ ᠤᠨ ᠬᠥᠭᠵᠢᠯ ᠦᠨ ᠹᠢᠯᠣᠰᠣᠹᠢ ᠠᠰᠠᠭᠤᠳᠠᠯ ᠤᠳ》 ᠨᠣᠮ ᠬᠦᠷᠲᠡᠯᠡ ᠮᠣᠩᠭᠣᠯᠴᠤᠳ ᠦᠨᠳᠦᠰᠦᠲᠡᠨ ᠦ ᠬᠤᠪᠢ ᠳᠤ ᠬᠡᠷᠬᠢᠨ ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠲᠤᠬᠠᠢ᠂ ᠮᠣᠩᠭᠣᠯᠴᠤᠳ ᠤᠨ ᠡᠮᠦᠨᠡ ᠲᠤᠯᠭᠠᠷᠠᠭᠠᠳ ᠪᠤᠢ ᠠᠰᠠᠭᠤᠳᠠᠯ ᠤᠳ ᠤᠨ ᠤᠭ ᠰᠢᠯᠲᠠᠭᠠᠨ ᠳᠤ ᠬᠠᠷᠢᠭᠤᠯᠲᠠ ᠡᠷᠢᠳᠡᠭ᠃《ᠽᠡᠨᠳᠡᠮᠦᠨᠢ ᠣᠨᠣᠯ》 ᠨᠣᠮ ᠳᠤ ᠪᠠᠨ ᠲᠡᠷᠡ ᠪᠡᠷ ᠡᠶᠢᠨ ᠪᠢᠴᠢᠵᠡᠢ᠄
ᠬᠥᠮᠦᠨ ᠦ ᠠᠮᠢᠳᠤᠷᠠᠯ ᠤᠨ ᠬᠠᠮᠤᠭ ᠤᠨ ᠦᠨᠡᠲᠦ ᠵᠦᠢᠯ ᠭᠡᠪᠡᠯ᠂ ᠬᠦᠮᠦᠰ ᠲᠦ ᠲᠤᠰᠠ ᠪᠦᠲᠦᠭᠡᠬᠦ ᠴᠢᠳᠠᠪᠤᠷᠢ ᠶᠤᠮ᠃
ᠡᠭᠦᠨ ᠳᠦ᠄
-ᠡᠪᠡᠳᠦᠭᠰᠡᠨ ᠢ ᠡᠳᠡᠭᠡᠭᠡᠬᠦ
-ᠶᠠᠳᠠᠷᠠᠭᠰᠠᠨ ᠢ ᠲᠡᠳᠬᠦᠵᠦ ᠪᠠᠶᠠᠷᠯᠠᠭᠤᠯᠬᠤ
-ᠬᠦᠮᠦᠨ ᠦ ᠰᠡᠳᠬᠢᠯ ᠳ᠋ᠡᠬᠢ ᠬᠣᠣᠷ ᠤᠨ ᠦᠨᠳᠦᠰᠦ ᠶᠢ ᠲᠠᠰᠤᠯᠬᠤ ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠭᠡᠭᠡᠷᠡᠭᠦᠯᠬᠦ᠃
ᠮᠢᠨᠦ ᠬᠤᠪᠢ ᠳᠤ ᠭᠡᠪᠡᠯ᠂ ᠳᠡᠭᠡᠷᠡ ᠳᠤᠷᠠᠳᠤᠭᠰᠠᠨ ᠢ ᠤᠬᠠᠭᠠᠷᠠᠭᠰᠠᠨ ᠤᠬᠠᠭᠠᠷᠠᠯ ᠮᠢᠨᠢ ᠨᠠᠳᠠ ᠳᠤ ᠦᠨᠡᠲᠡᠢ᠃ ᠪᠠᠰᠠ ᠰᠠᠴᠢᠢ ᠲᠡᠳᠦᠶᠢᠯᠡᠨ ᠬᠦᠷᠬᠦ ᠦᠭᠡᠢ ᠴᠤ ᠲᠡᠳᠡᠭᠡᠷ ᠡᠴᠡ ᠰᠠᠨᠠᠭᠠ ᠭᠠᠵᠢᠯ ᠦᠭᠡᠢ ᠬᠢᠴᠢᠶᠡᠨ ᠵᠢᠳᠬᠦᠳᠡᠭ ᠡᠳᠦᠷ ᠲᠤᠲᠤᠮ ᠤᠨ ᠮᠢᠨᠢ ᠬᠥᠳᠡᠯᠮᠦᠷᠢ ᠮᠢᠨᠦ ᠠᠮᠢᠳᠤᠷᠠᠯ ᠤᠨ ᠭᠣᠣᠯ ᠦᠨᠡᠲᠦ ᠵᠦᠢᠯ ᠭᠡᠵᠦ ᠪᠣᠳᠣᠳᠠᠭ》᠃
ᠮᠣᠩᠭᠣᠯᠴᠤᠳ ᠤᠨ ᠬᠤᠪᠢ ᠳᠤ ᠡᠶᠢᠮᠦᠷᠬᠡᠦ ᠶᠠᠷᠢᠶᠠ ᠬᠤᠳᠠᠯ᠂ ᠤᠲ᠋ᠣᠫᠢ ᠰᠣᠨᠣᠰᠤᠭᠳᠠᠳᠠᠭ ᠪᠣᠯᠤᠭᠰᠠᠭᠠᠷ ᠤᠳᠠᠵᠤ ᠪᠠᠶᠢᠨᠠ᠃ ᠳᠡᠭᠡᠷᠡ ᠨᠢ ᠳ ∙ ᠤᠷᠢᠶᠠᠩᠬᠠᠢ ᠭᠤᠸᠠᠢ ᠤᠷᠲᠤ ᠤᠷᠲᠤ᠂ ᠰᠤᠨᠵᠢᠷᠠᠮᠠᠯ ᠬᠠᠪᠰᠤᠷᠤᠭᠰᠠᠨ ᠨᠡᠶᠢᠯᠡᠮᠡᠯ ᠥᠭᠦᠯᠡᠪᠦᠷᠢ ᠬᠡᠷᠡᠭᠯᠡᠳᠡᠭ ᠤᠴᠢᠷ ᠠᠴᠠ ᠬᠢᠷᠢ ᠶᠢᠨ ᠬᠦᠮᠦᠨ ᠨᠡᠶᠢᠭᠡᠮ ᠤᠨ ᠰᠢᠭᠦᠮᠵᠢ ᠨᠦᠭᠦᠳ ᠢ ᠨᠢ ᠪᠠᠷᠢᠵᠤ ᠤᠩᠰᠢᠬᠤ ᠳᠤ ᠪᠡᠷᠬᠡ᠃ ᠤᠩᠰᠢᠬᠤ ᠳᠤ ᠪᠠᠨ ᠬᠣᠶᠢᠰᠢ ᠰᠠᠭᠤᠮᠠᠬᠠᠢ ᠤᠩᠰᠢᠭᠴᠢ᠂ ᠪᠢᠴᠢᠬᠦ ᠳᠦ ᠪᠡᠨ ᠶᠠᠷᠪᠢᠭᠲᠠᠢ ᠰᠡᠳᠬᠢᠭᠴᠢ ᠬᠣᠶᠠᠷ ᠢ ᠶᠠᠭᠠᠬᠢᠯᠲᠠᠢ᠃ ᠶᠣᠰᠣᠲᠠᠢ ᠯᠠ ᠰᠤᠷᠣᠭᠰᠠᠨ ᠶᠠᠭᠤᠮᠠ ᠶᠢ ᠰᠤᠷ ᠢᠶᠠᠷ ᠪᠣᠭᠣᠬᠤ ᠪᠢᠰᠢ᠃ ᠭᠡᠪᠡᠴᠦ ᠨᠢᠭᠡᠲᠡᠭᠡ ᠲᠡᠷᠡ ᠪᠡᠷ ᠥᠪᠡᠷ ᠦᠨ ᠳᠣᠲᠣᠭᠠᠳᠤ ᠴᠢᠭ ᠵᠣᠷᠢᠯᠭᠠ ᠪᠠᠨ ᠲᠤᠩ ᠡᠩ ᠦᠨ ᠢᠶᠡᠷ ᠬᠤᠪᠢᠶᠠᠯᠴᠠᠭᠰᠠᠨ ᠨᠢ ᠪᠤᠢ᠄
ᠬᠥᠭᠵᠢᠯ ᠢ ᠵᠥᠪ ᠢᠶᠡᠷ ᠣᠶᠢᠯᠠᠭᠠᠪᠠᠯ ᠤᠴᠢᠷ ᠦᠭᠡᠢ ᠬᠤᠷᠠᠮᠳᠤᠯᠠᠯ᠂ 《ᠨᠡᠮᠡᠭᠦᠦ ᠥᠷᠲᠡᠭ》 ᠍ ᠦᠨ ᠦᠢᠯᠡᠳᠪᠦᠷᠢᠯᠡᠯ ᠪᠤᠰᠤ᠂ ᠬᠦᠮᠦᠨ ᠦ 《ᠳᠣᠲᠣᠭᠠᠳᠤ ᠶᠢᠷᠲᠢᠨᠴᠦ》 ᠶᠢᠨ ᠳᠡᠭᠡᠳᠦ ᠬᠥᠭᠵᠢᠯ ᠪᠤᠶᠤ ᠮᠠᠬᠠᠪᠣᠳ᠂ ᠰᠡᠳᠬᠢᠯ ᠰᠠᠨᠠᠭᠠᠨ ᠤ ᠠᠷᠢᠭᠤᠰᠤᠯ ᠢᠶᠠᠷ᠂ ᠡᠨᠡ ᠪᠡᠶᠡ ᠪᠡᠷ ᠢᠶᠡᠨ ᠪᠤᠷᠬᠠᠨ ᠤ ᠮᠥᠨ ᠴᠢᠨᠠᠷ ᠢ ᠤᠯᠬᠤ ᠶᠠᠪᠤᠳᠠᠯ ᠭᠡᠳᠡᠭ ᠢ ᠲᠠᠨᠢᠨ ᠮᠡᠳᠡᠵᠦ ᠳᠣᠲᠣᠭᠠᠳᠤ ᠬᠦᠴᠦᠨ ᠦ ᠬᠢ ᠪᠡᠨ ᠢᠳᠡ ᠰᠢᠳᠢ ᠳᠦ ᠬᠦᠷᠬᠦ ᠪᠣᠯᠤᠨᠠ᠃
ᠦᠨᠡᠬᠡᠷ ᠯᠠ ᠦᠯᠦ ᠪᠦᠲᠦᠬᠦ ᠦᠵᠡᠯ ᠮᠡᠲᠦ ᠰᠣᠨᠣᠰᠤᠭᠳᠠᠵᠤ ᠪᠠᠶᠢᠭᠠ ᠪᠢᠵᠡ︖ ᠤᠭ ᠨᠢ ᠳ ∙ ᠤᠷᠢᠶᠠᠩᠬᠠᠢ ᠭᠤᠸᠠᠢ ᠶᠢᠨ ᠶᠠᠷᠢᠭᠠᠳ ᠪᠠᠶᠢᠭᠠ ᠬᠠᠨᠳᠤᠯᠭᠠ ᠶᠢᠨ ᠰᠢᠨᠵᠢ ᠲᠡᠢ ᠠᠰᠠᠭᠤᠳᠠᠯ ᠤᠳ ᠢ ᠪᠢᠳᠡ ᠦᠨᠳᠦᠰᠦᠨ ᠬᠠᠤᠯᠢ ᠳ᠋ᠠᠭᠠᠨ 《ᠬᠦᠮᠦᠨᠯᠢᠭ ᠢᠷᠭᠡᠨ ᠦ ᠠᠷᠠᠳᠴᠢᠯᠠᠭᠰᠠᠨ ᠨᠡᠶᠢᠭᠡᠮ ᠪᠠᠶᠢᠭᠤᠯᠬᠤ》 ᠭᠡᠳ ᠣᠷᠣᠭᠤᠯᠴᠢᠬᠠᠭᠰᠠᠨ᠃ ᠦᠨᠡᠨ ᠳᠦ ᠪᠡᠨ ᠦᠨᠳᠦᠰᠦᠨ ᠬᠠᠤᠯᠢ ᠳᠠᠬᠢ ᠡᠨᠡ ᠥᠭᠦᠯᠡᠪᠦᠷᠢ ᠴᠤ ᠪᠢᠳᠡᠨ ᠳᠦ ᠤᠲ᠋ᠣᠫᠢ ᠰᠣᠨᠣᠰᠤᠭᠳᠠᠬᠤ ᠪᠣᠯᠵᠤ ᠳ᠋ᠡ᠃ ᠫᠣᠡᠲ ᠪ ∙ ᠭᠠᠯᠰᠠᠩᠰᠦ᠋ᠬᠡ ᠶᠢᠨ ᠪᠢᠴᠢᠭᠰᠡᠨ ᠢᠶᠡᠷ᠂ 《ᠬᠥᠰᠢᠭᠦᠨ᠂ ᠬᠣᠶᠢᠷᠭᠣ᠂ ᠬᠥᠯᠳᠡᠭᠦᠦ ᠶᠤᠮ ᠰᠢᠭ ᠬᠥᠭᠰᠢᠨ ᠠᠷᠠᠳ ᠲᠦᠮᠡᠨ ᠦ》 ᠳᠤᠮᠳᠠ ᠡᠶᠢᠮᠦ ᠨᠢᠭᠡ ᠴᠢᠬᠤᠯᠳᠠᠭᠤᠬᠠᠨ ᠤᠷᠠᠨ ᠪᠦᠲᠦᠭᠡᠯᠴᠢ ᠴᠥᠬᠦᠷᠡᠯᠲᠡ ᠦᠭᠡᠢ ᠪᠢᠴᠢᠭᠰᠡᠭᠡᠷ ᠰᠠᠭᠤᠨᠠ᠃
《ᠨᠡᠶᠢᠭᠡᠮ ᠤᠨ ᠬᠢᠮᠤᠷᠠᠯ ᠥᠪᠡᠷ ᠢᠶᠡᠨ ᠭᠦᠨ ᠭᠦᠨᠵᠡᠭᠡᠢ ᠤᠯᠠ ᠦᠨᠳᠦᠰᠦ ᠲᠡᠢ ᠦᠵᠡᠭᠳᠡᠯ ᠪᠣᠯᠬᠣᠷ ᠲᠡᠭᠦᠨ ᠢ ᠭᠡᠲᠦᠯᠦᠨ ᠳᠠᠪᠬᠤ ᠠᠮᠠᠷ ᠬᠢᠯᠪᠠᠷ ᠵᠠᠮ ᠤᠭ ᠠᠴᠠ ᠪᠠᠨ ᠪᠠᠶᠢᠬᠤ ᠦᠭᠡᠢ᠃ ᠭᠦᠨ ᠶᠠᠭᠤᠮᠠᠨ ᠳᠤ ᠪᠠᠭᠤᠷᠢ ᠲᠠᠢ ᠬᠠᠨᠳᠤᠯᠭᠠ᠂ ᠨᠥᠷᠢ ᠬᠦᠴᠦ ᠱᠠᠭᠠᠷᠳᠠᠭᠳᠠᠨᠠ᠃ ᠵᠠᠮ ᠤᠨ ᠲᠤᠬᠠᠢ ᠳᠤ ᠪᠣᠯ ᠶᠠᠮᠠᠷ ᠨᠢᠭᠡ ᠠᠵᠢᠯᠯᠠᠬᠤ ᠬᠦᠴᠦ ᠱᠠᠭᠠᠷᠳᠠᠭᠰᠠᠨ ᠮᠠᠲ᠋ᠧᠷᠢᠶᠠᠯᠯᠢᠭ ᠴᠢᠨᠠᠷ ᠲᠠᠢ ᠪᠠᠶᠢᠵᠤ ᠲᠠᠭᠠᠷᠠᠨᠠ᠃ ᠬᠠᠷᠢᠨ ᠳᠥᠲᠡ ᠵᠠᠮ ᠤᠨ ᠲᠤᠬᠠᠢ ᠳᠤ ᠪᠣᠯ ᠴᠠᠭ ᠬᠤᠭᠤᠴᠠᠭᠠᠨ ᠤ ᠤᠳᠬᠠ ᠪᠠᠷ ᠣᠶᠢᠯᠠᠭᠠᠨ ᠶᠠᠷᠢᠵᠤ ᠪᠣᠯᠬᠤ ᠶᠤᠮ ᠰᠢᠭ ᠰᠠᠨᠠᠭᠳᠠᠨᠠ᠃ ᠪᠢ ᠨᠡᠶᠢᠭᠡᠮ ᠤᠨ ᠬᠢᠮᠤᠷᠠᠯ ᠢ ᠭᠦᠨ᠂ ᠥᠷᠭᠡᠨ ᠬᠦᠷᠢᠶᠡ ᠲᠡᠢ ᠦᠵᠡᠭᠳᠡᠯ ᠭᠡᠵᠦ ᠬᠡᠯᠡᠬᠦ ᠳᠦ ᠪᠡᠨ᠂ ᠭᠣᠣᠯ ᠨᠢ ᠨᠡᠶᠢᠭᠡᠮ ᠤᠨ ᠶᠣᠰᠣ ᠰᠤᠷᠲᠠᠬᠤᠨ᠂ ᠣᠶᠤᠨ ᠰᠠᠨᠠᠭᠠᠨ ᠤ ᠬᠦᠷᠢᠶᠡ ᠲᠠᠯᠠ ᠠᠴᠠ ᠨᠢ ᠬᠠᠨᠳᠤᠭᠠᠳ ᠲᠡᠭᠡᠵᠦ ᠬᠡᠯᠡᠵᠦ ᠪᠠᠶᠢᠨᠠ᠃ ᠶᠠᠭᠤ ᠭᠡᠪᠡᠯ᠂ ᠤᠯᠤᠰ ᠲᠥᠷᠥ ᠡᠳ᠋ ᠍ ᠦᠨ ᠵᠠᠰᠠᠭ ᠤᠨ ᠰᠠᠯᠪᠤᠷᠢ ᠶᠢᠨ ᠬᠢᠮᠤᠷᠠᠯ ᠠᠴᠠ ᠬᠠᠷᠢᠴᠠᠩᠭᠤᠢ ᠪᠣᠭᠣᠨᠢ ᠬᠤᠭᠤᠴᠠᠭᠠᠨ ᠳᠤ ᠭᠠᠷᠬᠤ ᠪᠣᠯᠤᠮᠵᠢ ᠲᠠᠢ︾ ᠬᠡᠮᠡᠨ ᠢᠳᠬᠠᠵᠤ ᠰᠠᠭᠤᠨᠠ᠃
《ᠶᠠᠩᠬᠠᠳ ᠤᠨ ᠢᠨᠢᠶᠡᠳᠦ ᠤᠬᠢᠶᠠᠬᠤ ᠭᠠᠵᠠᠷ ᠤᠰᠤ ᠮᠢᠨᠢ》 ᠬᠡᠮᠡᠨ ᠶᠠᠷᠳᠠᠭᠯᠠᠵᠤ᠂ ᠪᠠᠴᠢᠮᠳᠠᠵᠤ ᠰᠠᠭᠤᠨᠠ᠃
ᠬᠥᠭᠵᠢᠯ ᠳᠡᠪᠰᠢᠯ᠂ ᠲᠧᠭᠨᠣᠯᠣᠭᠢ ᠶᠢ ᠲᠠᠯᠠᠷᠬᠠᠨ ᠳᠡᠮᠵᠢᠭᠴᠢ ᠥᠰᠬᠦ ᠢᠷᠡᠭᠡᠳᠦᠢ ᠲᠡᠢ ᠰᠡᠬᠡᠭᠡᠲᠡᠨ ᠡᠴᠡ (ᠪᠢᠳᠡ-ᠳᠣᠲᠣᠭᠠᠳᠤ ᠰᠢᠲᠠᠯᠲᠠ ᠶᠢᠨ ᠬᠥᠳᠡᠯᠭᠡᠭᠦᠷ᠃ 1974 ᠣᠨ) ᠬᠡᠷᠡᠭᠯᠡᠭᠡᠨ ᠦ ᠨᠡᠶᠢᠭᠡᠮ ᠢ ᠵᠢᠭᠰᠢᠵᠦ᠂ ᠮᠣᠩᠭᠣᠯᠴᠤᠳ ᠤᠨ ᠠᠵᠤ ᠲᠦᠷᠥᠬᠦᠢ ᠶᠢᠨ ᠤᠯᠠᠮᠵᠢᠯᠠᠯ ᠰᠡᠯᠲᠡ ᠡᠴᠡ ᠭᠡᠭᠡᠷᠡᠯ ᠦᠨ ᠤᠯᠠ ᠮᠥᠷ ᠲᠡᠮᠲᠡᠷᠢᠵᠤ᠂ ᠶᠢᠷᠲᠢᠨᠴᠦ ᠶᠢᠨ ᠬᠦᠮᠦᠨ ᠦ ᠨᠣᠮᠣᠬᠠᠨ᠂ ᠬᠦᠯᠢᠴᠡᠩᠭᠦᠢ ᠶᠢᠨ ᠰᠤᠷᠭᠠᠯ ᠪᠦᠬᠦᠨ ᠢ ᠳᠠᠭᠠᠭᠴᠢ ᠭᠠᠭᠴᠠᠭᠠᠷᠳᠠᠭᠰᠠᠨ ᠰᠡᠳᠬᠢᠭᠴᠢ ᠪᠣᠯᠤᠭᠰᠠᠨ ᠨᠢᠭᠡᠨ ᠵᠢᠷᠠᠨ ᠤ ᠲᠤᠭᠤᠷᠪᠢᠯ ᠲᠡᠭᠦᠨ ᠳᠦ ᠪᠤᠢ᠃
ᠴᠢᠩ ᠦᠨᠡᠨ ᠳᠦ ᠪᠡᠨ ᠪᠢᠳᠡ ᠳᠠᠮᠳᠢᠨᠰᠦ᠋ᠷᠦᠩ ᠦᠨ ᠤᠷᠢᠶᠠᠩᠬᠠᠢ ᠶᠢ ᠣᠭᠲᠣ ᠠᠴᠠ ᠤᠩᠰᠢᠬᠤ ᠦᠭᠡᠢ᠂ ᠣᠶᠢᠯᠠᠭᠠᠬᠤ ᠦᠭᠡᠢ ᠪᠠᠶᠢᠨᠠ᠃ ᠤᠶᠢᠯᠠᠭᠠᠬᠤ ᠬᠦᠰᠡᠯ ᠦᠭᠡᠢ᠂ ᠣᠶᠤᠨ ᠤ ᠬᠡᠷᠡᠭᠴᠡᠭᠡ ᠦᠭᠡᠢ ᠭᠠᠷ ᠭᠠᠵᠠᠷ᠂ ᠬᠥᠯ ᠬᠥᠰᠡᠷ ᠰᠠᠭᠤᠵᠠᠭᠠᠨᠠ᠃ ᠹᠢᠯᠣᠰᠣᠹᠢᠴᠢ ᠪ ∙ ᠪᠠᠲᠤᠴᠢᠯᠠᠭᠤᠨ ᠤ ᠬᠡᠯᠡᠭᠰᠡᠨ ᠭᠠᠰᠢᠭᠤᠨ ᠦᠨᠡᠨ ᠰᠠᠨᠠᠭᠠᠨ ᠳᠤ ᠪᠠᠭᠤᠨᠠ᠄
ᠶᠠᠭ ᠦᠨᠡᠨ ᠳᠦ ᠪᠡᠨ ᠵᠢᠩᠬᠢᠨᠢ ᠹᠢᠯᠣᠰᠣᠹᠢ ᠶᠢ ᠥᠪᠡᠷᠲᠡᠭᠡᠨ ᠠᠭᠤᠯᠵᠤ ᠪᠠᠶᠢᠭᠠ ᠬᠦᠮᠦᠨ ᠣᠯᠠᠨ ᠨᠡᠶᠢᠲᠡ ᠳᠦ ᠣᠶᠢᠯᠠᠭᠠᠭᠳᠠᠳᠠᠭ ᠦᠭᠡᠢ᠃ ᠲᠡᠶᠢᠮᠦ ᠡᠴᠡ ᠨᠡᠶᠢᠭᠡᠮ ᠳᠦ ᠪᠡᠨ ᠭᠠᠳᠠᠭᠤᠷᠬᠠᠭᠳᠠᠵᠤ᠂ ᠭᠠᠵᠢ ᠭᠡᠵᠦ ᠱᠣᠭᠣᠪᠲᠣᠷᠯᠠᠭᠳᠠᠭᠰᠠᠨ ᠮᠠᠶ᠋ᠢᠭᠲᠠᠢ ᠪᠠᠶᠢᠬᠤ ᠨᠢ ᠪᠤᠢ᠃ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠭᠳᠡᠭᠰᠡᠨ ᠬᠣᠪᠣᠷ ᠲᠣᠬᠢᠶᠠᠯᠳᠤᠯ ᠪᠠᠶᠢᠯᠠ ᠭᠡᠬᠦ ᠳᠦ ᠨᠡᠶᠢᠭᠡᠮ ᠳᠠᠶᠠᠭᠠᠷ ᠢᠶᠠᠨ ᠣᠶᠢᠯᠠᠭᠠᠵᠤ ᠪᠢᠰᠢ ᠰᠣᠬᠣᠷ ᠢᠶᠠᠷ ᠳᠠᠭᠠᠭᠰᠠᠨ ᠳᠤ ᠪᠠᠨ ᠯᠠ ᠲᠡᠷᠡ᠃
ᠪᠢᠳᠡᠨ ᠦ ᠣᠭᠲᠣ ᠮᠡᠳᠡᠳᠡᠭ ᠦᠭᠡᠢ ᠬᠢᠷᠢᠨᠡ ᠠᠶᠢᠬᠤᠪᠲᠤᠷ ᠬᠦᠨᠳᠦᠯᠡᠳᠡᠭ᠂ ᠡᠰᠡᠪᠡᠰᠦ ᠪᠣᠯᠪᠠᠰᠤᠷᠠᠯ ᠲᠠᠢ᠂ ᠤᠷᠠᠯᠢᠭᠯᠠᠭ ᠬᠠᠷᠠᠭᠳᠠᠬᠤ ᠭᠡᠰᠡᠨ ᠳᠦ ᠪᠡᠨ ᠬᠠᠮᠲᠤ ᠵᠢᠷᠤᠭ ᠳᠠᠷᠤᠭᠤᠯᠳᠠᠭ᠂ ᠨᠣᠮ ᠢ ᠨᠢ ᠴᠣ ᠰᠢᠨᠡ ᠪᠡᠷ ᠨᠢ ᠲᠡᠪᠬᠡᠷᠯᠡᠨ ᠬᠠᠳᠠᠭᠠᠯᠠᠳᠠᠭ᠂ ᠶᠠᠭ ᠯᠠ ᠠᠯᠲᠠ᠂ ᠲᠣᠷᠭᠠ ᠪᠠᠷ ᠣᠷᠢᠶᠠᠵᠤ᠂ ᠥᠷᠯᠥᠭᠡ ᠦᠳᠡᠰᠢ ᠳᠦ ᠪᠡᠨ ᠮᠥᠷᠭᠥᠬᠦ ᠬᠢᠷᠢᠨᠡ ᠳᠣᠲᠣᠷᠠ ᠨᠢ ᠶᠠᠮᠠᠷ ᠦᠨᠡᠲᠦ ᠨᠣᠮᠯᠠᠯ ᠪᠠᠶᠢᠭᠠ ᠶᠢ ᠦᠯᠦ ᠮᠡᠳᠡᠬᠦ ᠪᠤᠳ᠋ᠳ᠋ᠾᠠ ᠶᠢᠨ ᠰᠤᠳᠤᠷ ᠰᠢᠭ ᠬᠥᠮᠥᠨ ᠦ ᠲᠤᠬᠠᠢ ᠴᠤᠬᠤᠰ ᠥᠭᠥᠯᠡᠬᠦ ᠳᠦ ᠡᠶᠢᠮᠦ ᠪᠠᠶᠢᠨᠠ᠃
ᠵᠢᠴᠢ ᠥᠭᠦᠯᠡᠬᠦ ᠨᠢ᠂ ᠳ ∙ ᠤᠷᠢᠶᠠᠩᠬᠠᠢ ᠪᠣᠯ ᠮᠣᠩᠭᠣᠯ ᠤᠨ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠢᠲᠡᠭᠡᠯ ᠦᠨᠡᠮᠰᠢᠯ ᠶᠤᠮ᠃ ᠡᠨᠡ ᠢᠲᠡᠭᠡᠯ ᠦᠨᠡᠮᠰᠢᠯ ᠢ ᠮᠣᠩᠭᠣᠯ ᠬᠡᠯᠡᠨ ᠦ ᠢᠲᠡᠭᠡᠯ ᠦᠨᠡᠮᠰᠢᠯ ᠭᠡᠳᠡᠭ ᠢ ᠨᠣᠲᠠᠯᠠᠬᠤ ᠳᠤ ᠰᠤᠳᠤᠯᠤᠭᠠᠴᠢᠳ ᠤᠨ ᠬᠤᠪᠢ ᠨᠡᠮᠡᠷᠢ ᠬᠡᠷᠡᠭᠲᠡᠢ᠃ ᠵᠦᠢ ᠨᠢ ᠲᠡᠭᠦᠨ ᠦ ᠤᠷᠠᠨ ᠵᠣᠬᠢᠶᠠᠯ ᠤᠨ ᠪᠤᠰᠤᠳ ᠲᠥᠷᠥᠯ ᠢᠶᠡᠷ ᠪᠦᠲᠦᠭᠡᠭᠰᠡᠨ ᠥᠪ᠂ ᠢᠯᠠᠩᠭᠤᠶᠠ ᠵᠦᠴᠦᠭᠡ ᠶᠢᠨ ᠵᠣᠬᠢᠶᠠᠯ ᠤᠨ ᠲᠤᠬᠠᠢ ᠳᠤ ᠪᠣᠯᠤᠨ ᠶᠡᠷᠦ ᠡᠴᠡ ᠳ ∙ ᠤᠷᠢᠶᠠᠩᠬᠠᠢ ᠬᠡᠮᠡᠬᠦ ᠵᠣᠬᠢᠶᠠᠯᠴᠢ ᠶᠢᠨ ᠬᠡᠯᠡ ᠵᠦᠢ ᠶᠢᠨ ᠲᠤᠬᠠᠢ ᠳᠤ ᠮᠥᠨ ᠲᠤᠰᠬᠠᠶᠢᠯᠠᠨ ᠶᠠᠷᠢᠬᠤ ᠤᠴᠢᠷᠲᠠᠢ ᠶᠤᠮ᠃ ᠭᠡᠪᠡᠴᠦ ᠴᠠᠭ ᠤᠨ ᠣᠬᠣᠷ᠂ ᠴᠠᠭᠠᠰᠤᠨ ᠤ ᠬᠡᠮᠵᠢᠶᠡ ᠶᠢ ᠰᠠᠨᠠᠨ ᠦᠭᠡ ᠪᠠᠨ ᠣᠳᠣ ᠳᠤ ᠪᠠᠨ ᠡᠭᠦᠪᠡᠷ ᠡᠪᠬᠡᠶᠡ᠃
ᠦᠨᠳᠦᠰᠦᠲᠡᠨ ᠦ ᠲᠣᠶᠢ᠍ᠮᠤ №380
ᠨᠡᠶᠢ᠍ᠲᠡᠯᠡᠯᠴᠢ ᠶ ᠊ ᠪᠠᠶᠠᠷᠠ
7 0