ᠳ ᠊ ᠲᠡᠮᠦᠷᠸᠴᠢᠷ : ᠳ᠋ ∙ ᠮᠠᠮᠠ ᠶᠢᠨ 《ᠭᠢᠰᠭᠢᠬᠦ ᠭᠠᠵᠠᠷ ᠦᠭᠡᠢ ᠬᠥᠯ》 《ᠷᠣᠮᠠᠨ ᠤ ᠥᠭᠡᠷ᠎ᠡ ᠨᠢᠭᠡ ᠰᠢᠨᠵᠢ ᠶᠢ ᠲᠠᠨᠢᠭᠤᠯᠤᠭᠰᠠᠨ ᠳ ∙ ᠮᠠᠮ᠎ᠠ ᠶᠢᠨ ︿ᠭᠢᠰᠭᠢᠬᠦ ᠭᠠᠵᠠᠷ ᠦᠭᠡᠢ ᠬᠥᠯ﹀ ᠨᠠᠳᠠ ᠳᠤ ᠶᠡᠷᠦ ᠪᠤᠰᠤ ᠶᠢᠨ ᠬᠤᠷᠴᠠ᠂ ᠵᠢᠪᠡᠭᠦᠨ ᠪᠢᠴᠢᠯᠭᠡ ᠲᠡᠢ ᠵᠣᠬᠢᠶᠠᠯ ᠢᠶᠠᠷ ᠳᠤᠷᠠᠰᠤᠭᠳᠠᠳᠠᠭ᠃ ᠨᠡᠷ᠎ᠡ ᠨᠢ ᠴᠤ ᠶᠡᠷᠦ ᠪᠤᠰᠤ ᠶᠢᠨ᠂ ᠣᠨᠴᠢᠲᠠᠢ》 ᠭᠡᠵᠦ ᠵᠣᠬᠢᠶᠠᠯᠴᠢ ᠭ ∙ ᠠᠶᠤᠤᠷᠵᠠᠨ᠎ᠠ ᠳᠤᠷᠠᠳᠤᠭᠰᠠᠨ ᠪᠠᠶᠢᠳᠠᠭ ᠨᠢ ᠳᠠᠯᠳᠠ ᠤᠳᠬ᠎ᠠ᠂ ᠶᠣᠭᠲᠠᠯᠠᠯ᠂ ᠬᠠᠲᠠᠭᠤ ᠰᠢᠭᠦᠮᠵᠢ ᠪᠦᠬᠦᠢ ᠫᠠᠮᠹᠯᠧᠲ ᠷᠣᠮᠠᠨ ᠤ ᠤᠷᠠᠨ ᠴᠢᠳᠠᠪᠤᠷᠢ ᠶᠢ ᠦᠨᠡᠯᠡᠭᠰᠡᠨ ᠬᠡᠷᠡᠭ᠃ ᠵᠣᠬᠢᠶᠠᠯ ᠤᠨ ᠦᠭᠡ ᠬᠡᠯᠡᠯᠭᠡ ᠤᠷᠠᠨ ᠢᠷᠠᠭᠤ᠂ ᠵᠦᠢᠷᠯᠡᠯ ᠠᠳᠠᠯᠢᠳᠬᠠᠯ ᠨᠡᠩ ᠰᠣᠳᠣᠨ᠂ ᠳᠠᠯᠳᠠ ᠪᠡᠯᠭᠡᠳᠡᠯ ᠳᠠᠮ ᠤᠳᠬ᠎ᠠ ᠨᠢ ᠭᠦᠨ ᠭᠦᠨᠵᠡᠭᠡᠢ᠃ 《ᠰᠤᠶᠤᠯ ᠤᠨ ᠬᠤᠪᠢᠰᠬᠠᠯ》 ᠬᠡᠮᠡᠬᠦ ᠮᠠᠣ ᠶᠢᠨ ᠤᠯᠠᠭᠠᠨ ᠲᠧᠷᠣᠷᠣᠷ ᠤᠨ ᠤᠷᠰᠢᠭ ᠢᠶᠠᠷ ᠥᠪᠥᠷ ᠮᠣᠩᠭᠣᠯᠴᠤᠳ ᠬᠡᠷᠬᠢᠨ ᠬᠡᠯᠮᠡᠭᠳᠡᠨ ᠵᠣᠪᠠᠵᠤ᠂ ᠭᠠᠰᠢᠭᠤᠨ ᠵᠣᠪᠠᠯᠠᠩ ᠲᠤᠭᠤᠯᠵᠤ᠂ ᠬᠠᠷᠭᠢᠰ ᠬᠡᠷᠴᠡᠭᠡᠢ ᠡᠷᠡᠭᠦᠦ ᠰᠢᠭᠦᠯᠲᠡ ᠶᠢᠨ ᠳᠣᠣᠷ᠎ᠠ ᠲᠠᠮᠤᠯᠠᠭᠳᠠᠨ ᠲᠠᠷᠴᠢᠯᠠᠭᠰᠠᠨ ᠭᠠᠰᠢᠭᠤᠨ ᠬᠤᠪᠢ ᠲᠠᠪᠢᠯᠠᠩ ᠢ ᠵᠢᠷᠦᠬᠡ ᠵᠦᠰᠦᠮ᠎ᠡ ᠳᠦᠷᠰᠦᠯᠡᠨ ᠦᠵᠡᠭᠦᠯᠦᠭᠰᠡᠨ ᠡᠮᠭᠡᠨᠢᠯᠳᠦ ᠲᠤᠤᠯᠢᠰ ᠪᠢᠯᠡ᠃ ᠬᠠᠷᠢ ᠭᠦᠷᠦᠨ ᠦ ᠡᠷᠬᠡᠰᠢᠶᠡᠯ ᠳᠦ ᠣᠷᠣᠭᠰᠠᠨ ᠮᠣᠩᠭᠣᠯᠴᠤᠳ ᠢ ᠦᠨᠳᠦᠰᠦᠲᠡᠨ ᠦ ᠬᠢ ᠨᠢ ᠬᠤᠪᠢ ᠳᠤ ᠠᠭᠤᠰᠬᠠᠨ ᠠᠯᠠᠭ᠎ᠠ ᠪᠣᠯᠭᠠᠬᠤ᠂ ᠭᠤᠲᠤᠭᠠᠨ ᠳᠣᠷᠣᠮᠵᠢᠯᠠᠵᠤ ᠰᠦᠨᠡᠰᠦ ᠰᠦᠯᠳᠡ ᠶᠢ ᠨᠢ ᠵᠠᠶᠢᠯᠠᠭᠤᠯᠵᠤ 《ᠥᠮᠥᠬᠡᠢ ᠴᠢᠳᠬᠥᠷ》 ᠪᠣᠯᠭᠠᠨ ᠬᠤᠪᠢᠷᠠᠭᠠᠬᠤ ᠭᠡᠰᠡᠨ ᠬᠢᠲᠠᠳ ᠤᠳ ᠤᠨ ᠬᠣᠣᠷᠲᠤ ᠦᠵᠡᠯ᠂ ᠬᠣᠷᠣᠨ ᠰᠠᠨᠠᠭ᠎ᠠ ᠶᠢ ᠠᠭᠤᠳᠠᠯᠤᠨ ᠢᠯᠡᠴᠢᠯᠡᠭᠰᠡᠨ ᠰᠡᠷᠡᠮᠵᠢᠯᠡᠭᠦᠯᠭᠡ ᠵᠣᠬᠢᠶᠠᠯ ᠶᠤᠮ᠃ ᠬᠦᠮᠦᠨ ᠦ ᠰᠠᠨᠠᠭᠠᠨ ᠳᠤ ᠣᠷᠣᠮ ᠦᠭᠡᠢ ᠬᠠᠷᠭᠢᠰ ᠬᠡᠷᠴᠡᠭᠡᠢ᠂ ᠳᠣᠷᠣᠮᠵᠢ ᠠᠷᠭ᠎ᠠ ᠪᠠᠷ ᠲᠠᠮᠣᠯᠠᠬᠤ 《ᠤᠯᠠᠭᠠᠨ ᠬᠠᠮᠠᠭᠠᠯᠠᠭᠴᠢ》 ᠨᠠᠷ ᠤᠨ ᠳᠡᠷᠭᠡᠳᠡ ᠮᠠᠨᠵᠣ ᠨᠤᠭᠤᠳ ᠤᠨ ᠪᠣᠳᠣᠵᠤ ᠣᠯᠤᠭᠰᠠᠨ ᠶᠢᠰᠦᠨ ᠡᠷᠡᠭᠦᠦ ᠪᠣᠯ ᠵᠥᠭᠡᠯᠡᠨ ᠪᠣᠭᠣᠷᠰᠣᠭ ᠭᠡᠰᠡᠨ ᠦᠭᠡ᠃ 《ᠬᠦᠢᠰᠦᠨ ᠳᠦ ᠨᠢ ᠦᠷ᠎ᠡ ᠪᠡᠨ ᠴᠠᠴᠤᠵᠤ ᠬᠥᠷᠦᠰᠦᠨ ᠳᠦ ᠨᠢ ᠨᠣᠭᠣᠭ᠎ᠠ ᠪᠠᠨ ᠲᠠᠷᠢᠬᠤ》 ᠤᠷᠢᠶ᠎ᠠ ᠲᠠᠢ ᠬᠢᠲᠠᠳ ᠤᠨ ᠬᠠᠷ᠎ᠠ ᠲᠠᠬᠤᠯ ᠳᠤ ᠬᠡᠯᠮᠡᠭᠳᠡᠨ ᠵᠣᠪᠠᠭᠰᠠᠨ ᠥᠪᠥᠷ ᠮᠣᠩᠭᠣᠯᠴᠤᠳ ᠤᠨ ᠭᠠᠰᠠᠯᠠᠩ ᠵᠣᠪᠠᠯᠠᠩ ᠤᠨ ᠳᠠᠭᠤ ᠥᠨᠥ ᠴᠤ ᠴᠤᠤᠷᠢᠶᠠᠲᠤᠭᠰᠠᠭᠠᠷ ᠪᠠᠶᠢᠨ᠎ᠠ᠃ 《ᠲᠠᠪᠤ ᠶᠢᠨ ᠳᠤᠭᠤᠶᠢᠯᠠᠩ》 ᠪᠤᠶᠤ ᠨᠢᠭᠡ ᠬᠢᠲᠠᠳ ᠲᠠᠪᠣᠨ ᠮᠣᠩᠭᠣᠯ ᠡᠮᠡᠭᠲᠡᠢ ᠶᠢ ᠵᠢᠷᠮᠦᠰᠦᠯᠡᠭᠦᠯᠬᠦ ᠡᠭᠦᠷᠭᠡ ᠬᠦᠯᠢᠶᠡᠵᠦ᠂ ᠬᠠᠷᠢᠨ ᠮᠣᠩᠭᠣᠯ ᠡᠷᠡᠴᠦᠳ ᠨᠢ ᠬᠦᠢᠰᠦ ᠲᠡᠮᠲᠡᠷᠢᠭᠦᠯᠵᠦ᠂ ᠠᠮᠢᠳᠤ ᠦᠯᠡᠳᠡᠭᠰᠡᠳ ᠨᠢ ᠱᠣᠷᠣᠩ ᠭᠢᠨᠳᠠᠨ᠂ ᠴᠡᠷᠢᠭ ᠴᠤᠤᠬ᠎ᠠ ᠳᠤ ᠴᠥᠯᠡᠭᠳᠡᠵᠦ᠂ ᠡᠷᠡᠮᠳᠡᠭ ᠵᠡᠷᠡᠮᠳᠡᠭ ᠪᠣᠯᠵᠤ ᠬᠦᠮᠦᠨ ᠦ ᠲᠣᠭᠠᠨ ᠠᠴᠠ ᠬᠠᠰᠤᠭᠳᠠᠬᠤ ᠵᠡᠭᠦᠳᠦᠨ ᠳᠦ ᠴᠤ ᠣᠷᠣᠮ ᠦᠭᠡᠢ ᠠᠶᠤᠮᠰᠢᠭᠲᠤ ᠢᠷᠸ᠎ᠠ ᠶᠢᠨ ᠴᠠᠭ ᠵᠢᠷᠦᠬᠡ ᠰᠢᠮᠰᠢᠷᠡᠭᠦᠯᠦᠨ᠎ᠡ᠃ 《ᠰᠤᠶᠤᠯ ᠤᠨ ᠬᠤᠪᠢᠰᠬᠠᠯ》 ᠬᠡᠮᠡᠬᠦ ᠲᠦᠷᠢᠮᠡᠭᠡᠢ ᠪᠣᠳᠣᠯᠭ᠎ᠠ ᠶᠢ ᠳᠠᠯᠳᠠ ᠡᠰᠡᠷᠭᠦᠴᠡᠬᠦ ᠬᠦᠮᠦᠯᠢᠭ ᠬᠢᠲᠠᠳ ᠬᠦᠮᠦᠰ ᠦᠨ ᠳᠦᠷᠢ ᠲᠥᠷᠬᠥ ᠴᠤ ᠲᠣᠳᠣᠬᠠᠨ ᠲᠤᠰᠣᠭᠰᠠᠨ ᠪᠠᠶᠢᠨ᠎ᠠ᠃ 《ᠤᠯᠠᠭᠠᠨ ᠲᠠᠮᠣ》 ᠶᠢᠨ ᠲᠣᠭᠣᠭᠠᠨ ᠳᠤ ᠴᠢᠨᠠᠭᠳᠠᠭᠰᠠᠨ ᠴᠤ ᠤᠬᠤᠷᠢᠵᠤ ᠨᠢᠴᠤᠭ᠎ᠠ ᠦᠭᠡᠢ ᠰᠥᠰᠥ ᠶᠡᠬᠡᠲᠦ ᠲᠥᠷᠥ-ᠡᠩᠬᠡ᠂ ᠬᠠᠶᠢᠷ᠎ᠠ ᠰᠡᠳᠬᠢᠯ ᠢᠶᠡᠨ ᠠᠷᠠᠯᠵᠢᠭ᠎ᠠ ᠦᠭᠡᠢ ᠷᠠᠳᠨᠠᠬᠠᠨᠳᠠ ᠪᠦᠰᠡᠭᠦᠢ᠂ ᠬᠠᠯᠠᠭᠤᠨ ᠡᠪᠦᠷ ᠢᠶᠡᠨ ᠬᠠᠷᠢ ᠬᠥᠮᠦᠨ ᠳ᠋ᠦ ᠨᠡᠭᠡᠭᠡᠭᠡ ᠦᠭᠡᠢ ᠬᠠᠲᠠᠭᠤ ᠵᠣᠷᠢᠭᠲᠤ ᠱᠤᠭᠠᠷᠮ᠎ᠠ ᠪᠠᠭᠰᠢ ᠭᠡᠳ ᠬᠦᠮᠦᠨ ᠴᠢᠨᠠᠷ ᠤᠨ ᠣᠷᠭᠢᠯ ᠪᠣᠯᠤᠭᠰᠠᠨ ᠡᠮᠭᠡᠨᠢᠯᠳᠦ ᠳᠦᠷᠢ ᠨᠦᠭᠦᠳ 《ᠤᠯᠠᠭᠠᠨ ᠬᠠᠮᠠᠭᠠᠯᠠᠭᠴᠢ》 ᠨᠡᠷ᠎ᠡ ᠲᠡᠢ ᠬᠦᠷᠡᠯ ᠵᠢᠷᠦᠬᠡ ᠲᠡᠢ᠂ ᠬᠦᠢᠲᠡᠨ ᠴᠢᠰᠤᠲᠤ ᠲᠠᠮᠤᠯᠠᠭᠴᠢᠳ ᠤᠨ ᠬᠠᠷ᠎ᠠ ᠪᠠᠷᠠᠭᠠᠨ ᠳᠡᠪᠢᠰᠬᠡᠷ ᠳᠡᠭᠡᠷ᠎ᠡ ᠤᠯᠠᠮ ᠴᠤ ᠲᠣᠳᠣᠬᠠᠨ ᠳᠤᠷᠠᠶᠢᠵᠤ ᠪᠠᠶᠢᠨ᠎ᠠ᠃ ᠠᠯᠲᠠᠨᠰᠢᠷᠡᠭᠡ ᠠᠭᠤᠯᠠ ᠶᠢᠨ ᠠᠷᠪᠠᠨ ᠨᠠᠶᠮᠠᠨ ᠰᠠᠯᠠᠭ᠎ᠠ ᠡᠪᠡᠷ ᠲᠡᠢ ᠬᠠᠩᠭᠠᠯ ᠪᠤᠭᠤ᠂ ᠬᠠᠲᠤᠨ ᠰᠣᠭᠣ ᠬᠣᠶᠠᠷ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠭᠠᠵᠠᠷ ᠰᠢᠷᠤᠶ ᠳᠤ ᠪᠠᠨ ᠡᠵᠡᠨ ᠪᠣᠯᠵᠤ ᠮᠥᠩᠬᠡᠳᠡ ᠣᠷᠣᠰᠢᠬᠤ ᠶᠢᠨ ᠭᠦᠨ ᠪᠡᠯᠭᠡᠳᠡᠯ ᠪᠣᠯᠤᠨ ᠰᠡᠳᠬᠢᠯ ᠣᠭᠰᠢᠶᠠᠵᠤ᠂ ᠪᠤᠭᠤ ᠶᠢᠨ ᠤᠷᠤᠮᠳᠠᠬᠤ ᠳᠠᠭᠤ ᠨᠢ ᠰᠣᠨᠣᠰᠳᠠᠬᠤ ᠰᠢᠭ ᠲᠠᠶᠢᠪᠤᠰᠢᠷᠠᠯ ᠠᠪᠴᠢᠷᠠᠨ᠎ᠠ᠃ ᠬᠠᠷ᠎ᠠ ᠪᠤᠷᠤᠭᠤ ᠦᠢᠯᠡᠰᠲᠡᠨ ᠨᠦᠭᠦᠳ ᠦᠢᠯᠡ ᠶᠢᠨ ᠦᠷ᠎ᠡ ᠪᠡᠨ ᠡᠳ᠋ᠯᠡᠵᠦ ᠥᠪᠡᠷ ᠢᠶᠡᠨ ᠥᠪᠡᠷᠰᠡᠳ ᠢ ᠪᠡᠨ ᠬᠥᠨᠥᠭᠡᠬᠦ ᠬᠠᠲᠠᠭᠤ ᠲᠠᠪᠢᠯᠠᠩ ᠲᠠᠢ ᠠᠵᠢ᠃ ᠬᠢᠲᠠᠳ ᠬᠦᠮᠦᠨ ᠰᠠᠶᠢᠨ ᠮᠠᠭᠤ ᠳ᠋ᠠᠭᠠᠨ ᠭᠣᠣᠯ ᠨᠢ ᠪᠢᠰᠢ ᠬᠠᠨ ᠦᠨᠳᠦᠰᠦᠲᠡᠨ ᠦ ᠲᠥᠷᠥ ᠶᠢᠨ ᠪᠣᠳᠣᠯᠭ᠎ᠠ ᠨᠢ ᠬᠡᠳᠦᠨ ᠮᠢᠩᠭᠠᠨ ᠤ ᠲᠤᠷᠰᠢ ᠪᠤᠰᠤᠳ ᠦᠨᠳᠦᠰᠦᠲᠡᠨ ᠢ ᠠᠭᠤᠰᠬᠠᠨ ᠠᠪᠴᠤ ᠭᠠᠵᠠᠷ ᠨᠤᠲᠤᠭ ᠢᠶᠠᠨ ᠲᠡᠯᠡᠬᠦ ᠭᠡᠰᠡᠨ ᠬᠣᠮᠣᠬᠠᠢ ᠦᠵᠡᠯ ᠳᠦ ᠲᠤᠯᠭᠠᠭᠤᠷᠢᠯᠠᠵᠤ ᠪᠠᠶᠢᠭ᠎ᠠ ᠳᠤ ᠣᠷᠣᠰᠢᠨ᠎ᠠ᠃ 《ᠴᠢᠨ ᠱᠢ ᠬᠤᠸᠠᠩ ᠠᠴᠠ ᠬᠣᠶᠢᠰᠢ ᠮᠠᠨ ᠤ ᠤᠯᠤᠰ ᠨᠢᠭᠡ ᠵᠠᠭᠤᠨ ᠲᠠᠪᠢᠨ ᠦᠨᠳᠦᠰᠦᠲᠡᠨ ᠢ ᠠᠭᠤᠰᠬᠠᠨ ᠠᠪᠤᠭᠰᠠᠨ ᠲᠡᠦᠬᠡ ᠲᠡᠢ》 ᠬᠡᠮᠡᠨ ᠪᠠᠷᠳᠠᠮᠨᠠᠨ ᠬᠡᠯᠡᠬᠦ ᠬᠢᠲᠠᠳ ᠬᠦᠮᠦᠨ ᠶᠠᠭᠤ ᠶᠢ ᠰᠠᠨᠠᠭᠤᠯᠤᠨ᠎ᠠ ᠪᠤᠢ⁈《 ᠨᠠᠮ᠎ᠠ ᠶᠢ ᠭᠢᠰᠭᠢᠬᠦ ᠬᠥᠯ ᠦᠭᠡᠢ ᠪᠣᠯᠭᠠᠶ᠎ᠠ︕ 》ᠰᠤᠶᠤᠯ ᠤᠨ ᠬᠤᠪᠢᠰᠬᠠᠯ ᠤᠨ ᠬᠢᠨ ᠮᠥᠨ ᠴᠤ ᠶᠡᠬᠡ ᠦᠵᠡᠭᠰᠡᠨ ᠳ᠋ᠡ᠃ ᠲᠡᠭᠡᠪᠡᠴᠦ ᠪᠢ ᠬᠥᠯ ᠲᠡᠢ ᠪᠡᠨ ᠦᠯᠡᠳᠡᠵᠡᠢ᠃ ᠬᠠᠷᠢᠨ ᠬᠥᠯ ᠮᠢᠨᠢ ᠯᠠ ᠭᠢᠰᠭᠢᠬᠦ ᠲᠥᠷᠥᠯᠬᠢ ᠭᠠᠵᠠᠷ ᠦᠭᠡᠢ ᠪᠣᠯᠬᠤ ᠪᠤᠢ︕ ᠭᠡᠵᠦ ᠵᠣᠬᠢᠶᠠᠯ ᠤᠨ ᠪᠠᠭᠠᠲᠤᠷ ᠤᠨ ᠬᠠᠷᠠᠭᠤᠰᠤᠨ ᠬᠡᠯᠡᠭᠰᠡᠨ ᠦᠭᠡ ᠡᠳᠦᠭᠡ ᠤᠯᠠᠮ ᠪᠦᠷ ᠦᠨ᠎ᠡ ᠴᠡᠨ᠎ᠡ ᠲᠡᠢ᠂ ᠠᠶᠤᠯ ᠤᠨ ᠳᠣᠬᠢᠶ᠎ᠠ ᠶᠢ ᠴᠢᠮᠡᠭᠡᠯᠡᠭᠰᠡᠨ ᠵᠥᠩᠴᠢ ᠦᠭᠡ ᠪᠣᠯᠤᠨ ᠬᠣᠶᠢᠴᠢ ᠦᠶ᠎ᠡ ᠪᠠᠨ ᠰᠡᠷᠡᠮᠵᠢᠭᠦᠯᠵᠦ ᠪᠠᠶᠢᠨ᠎ᠠ᠃ ᠮᠣᠩᠭᠣᠯ ᠢᠶᠠᠨ ᠭᠡᠰᠡᠨ ᠬᠦᠮᠦᠨ ᠪᠦᠷᠢ ᠤᠩᠰᠢᠵᠤ ᠤᠬᠠᠭᠠᠷᠠᠭᠠᠰᠠᠢ᠂ ᠦᠨᠳᠦᠰᠦ ᠨᠢᠭᠡᠲᠡᠨ ᠦ ᠬᠢ ᠪᠡᠨ ᠭᠠᠰᠢᠭᠤᠨ ᠬᠤᠪᠢ ᠲᠠᠪᠢᠯᠠᠩ ᠢ ᠳᠠᠪᠲᠠᠬᠤ ᠴᠥᠪ ᠤᠨ ᠴᠠᠭ ᠪᠤᠤ ᠨᠢᠭᠤᠷᠯᠠᠭᠠᠰᠠᠢ ᠬᠡᠮᠡᠨ ᠵᠠᠯᠪᠠᠷᠢᠬᠤ ᠮᠢᠨᠢ︕