ᠪᠠᠲᠤᠪᠠᠶᠠᠷ ᠤᠨ ᠦᠭᠡ ᠶᠢᠨ ᠤᠷᠠᠯᠢᠭ ᠤᠨ ᠭᠠᠶᠢᠬᠠᠮᠰᠢᠭ ᠪᠤᠶᠤ ᠪᠢᠳᠡᠨ ᠡᠴᠡ ᠭᠡᠭᠡᠭᠳᠡᠵᠦ ᠪᠤᠢ ᠲᠡᠷᠡ ᠦᠨᠡᠲᠦ ᠵᠦᠢᠯ ᠦᠳ ᠪᠡᠷᠬᠡᠰᠢᠶᠡᠯ ᠵᠣᠪᠠᠯᠠᠩ ᠲᠤᠯᠭᠠᠷᠠᠬᠤ ᠳᠤ ᠬᠦᠮᠦᠨ ᠦ ᠳᠣᠲᠣᠭᠠᠳᠤ ᠨᠥᠭᠡᠴᠡ ᠪᠣᠯᠤᠮᠵᠢ ᠨᠤᠭᠤᠳ ᠢᠯᠡᠷᠡᠨ ᠭᠠᠷᠴᠤ ᠠᠮᠢᠳᠤᠷᠠᠯ ᠤᠨ ᠰᠢᠨ᠎ᠡ ᠪᠣᠯᠤᠮᠵᠢ ᠨᠤᠭᠤᠳ ᠢ ᠣᠯᠵᠤ ᠬᠠᠷᠠᠳᠠᠭ ᠠᠵᠢ ᠬᠥᠬᠡ ᠲᠣᠯᠪᠤᠲᠤ ᠳ᠋ ᠊ ᠲᠡᠮᠦᠷᠸᠴᠢᠷ : ᠳᠠᠷᠮ᠎ᠠ ᠶᠢᠨ ᠪᠠᠲᠤᠪᠠᠶᠠᠷ 《ᠴᠠᠬᠢᠯᠵᠤ ᠶᠠᠪᠤᠭ᠎ᠠ ᠭᠥᠷᠥᠭᠡᠰᠦ》 (ᠲᠤᠭᠤᠵᠢ) ᠨᠡᠭᠦᠳᠡᠯᠴᠢᠨ ᠮᠣᠩᠭᠣᠯ ᠠᠬᠤᠢ ᠶᠢ ᠨᠢᠳᠦᠨ ᠳᠦ ᠬᠠᠷᠠᠭᠳᠠᠲᠠᠯ᠎ᠠ ᠳᠦᠷᠰᠦᠯᠡᠵᠦ᠂ ᠡᠮᠡᠭᠲᠡᠢ ᠬᠦᠮᠦᠨ ᠦ ᠰᠡᠳᠬᠢᠯ ᠵᠦᠢ ᠶᠢ ᠭᠠᠶᠢᠬᠠᠯᠲᠠᠢ ᠨᠠᠷᠢᠨ ᠮᠡᠳᠡᠷᠡᠵᠥ ᠪᠢᠴᠢᠭᠰᠡᠨ ᠮᠠᠨ ᠤ ᠬᠦᠦᠷᠨᠢᠯ ᠵᠣᠬᠢᠶᠠᠯ ᠤᠨ ᠰᠢᠯᠢᠳᠡᠭ ᠦᠳ ᠦᠨ ᠲᠣᠭᠠᠨ ᠳᠤ ᠪᠠᠲᠤ ᠲᠠᠢ ᠪᠠᠭᠲᠠᠬᠤ ᠴᠥᠭᠡᠬᠡᠨ ᠵᠣᠬᠢᠶᠠᠯ ᠤᠨ ᠨᠢᠭᠡ ᠳ᠋ᠡ᠃ ᠬᠡᠮᠵᠢᠶᠡᠨ ᠦ ᠬᠤᠪᠢ ᠳᠤ ᠠᠪᠰᠠᠷᠬᠠᠨ᠂ ᠦᠢᠯᠡ ᠶᠠᠪᠤᠳᠠᠯ ᠨᠢ ᠡᠩ ᠦᠨ᠂ ᠶᠡᠷᠦ ᠳᠡᠭᠡᠨ ᠯᠠ ᠨᠢᠭᠡ ᠭᠡᠷ ᠪᠦᠯᠢ ᠶᠢᠨ ᠵᠥᠷᠢᠴᠡᠯ ᠢ ᠦᠵᠡᠭᠦᠯᠵᠦ ᠪᠠᠶᠢᠭ᠎ᠠ ᠪᠣᠯᠪᠠᠴᠤ ᠬᠡᠯᠡᠬᠦ ᠭᠡᠰᠡᠨ ᠰᠠᠨᠠᠭ᠎ᠠ ᠨᠢ ᠭᠦᠨᠵᠡᠭᠡᠢ᠂ ᠳᠦᠷᠢ ᠳᠦᠷᠰᠦᠯᠡᠯ ᠨᠢ ᠴᠢᠮᠪᠠᠢ᠂ ᠲᠣᠷᠭᠠᠨ ᠮᠡᠳᠡᠷᠡᠮᠵᠢ ᠪᠡᠷ ᠠᠭᠠᠭᠯᠠᠨ ᠪᠢᠴᠢᠭᠰᠡᠨ ᠦᠭᠡ ᠶᠢᠨ ᠤᠷᠠᠯᠢᠭ ᠤᠨ ᠭᠠᠶᠢᠬᠠᠮᠰᠢᠭ ᠪᠢᠯᠡ᠃ ᠡᠷ᠎ᠡ ᠨᠥᠬᠥᠷ ᠨᠢ ᠥᠭᠡᠷ᠎ᠡ ᠪᠦᠰᠡᠭᠦᠢ ᠳᠦ ᠰᠡᠳᠬᠢᠯ ᠠᠯᠳᠠᠷᠠᠵᠤ᠂ ᠰᠡᠳᠬᠢᠯ ᠨᠢ ᠬᠣᠶᠠᠷᠳᠠᠵᠤ᠂ ᠰᠡᠳᠬᠢᠯ ᠨᠢ ᠰᠢᠨᠠᠯᠵᠤ ᠶᠠᠪᠤᠭ᠎ᠠ ᠶᠢ ᠡᠮᠡᠭᠲᠡᠢ ᠬᠦᠮᠦᠨ ᠦ ᠵᠥᠩ ᠢᠶᠡᠷ ᠮᠡᠳᠡᠷᠡᠭᠰᠡᠨ ᠳᠡᠵᠢᠳ ᠰᠢᠭᠤᠳᠬᠠᠨ ᠬᠥᠭᠡᠭᠡᠵᠦ ᠲᠠᠭᠤᠵᠤ ᠴᠢᠳᠠᠭ᠎ᠠ ᠦᠭᠡᠢ ᠴᠤ ᠪᠠᠰᠠ ᠠᠷᠠᠢ ᠴᠤ ᠦᠭᠡᠢ ᠪᠣᠯᠪᠠ ᠤᠤ ᠭᠡᠰᠡᠨ ᠭᠣᠷᠢᠳᠠᠯᠭ᠎ᠠ ᠪᠠᠷ ᠰᠠᠯᠬᠤ ᠲᠤᠬᠠᠢ ᠦᠭᠡ ᠴᠤᠬᠤᠯᠵᠠᠭᠤᠯᠬᠤ ᠳᠤ ᠳᠠᠮᠪᠠ ᠬᠠᠷᠢᠨ ᠠᠯᠢ ᠬᠡᠳᠦᠶᠢᠨ ᠳᠣᠲᠣᠷ᠎ᠠ ᠪᠠᠨ ᠰᠢᠢᠳᠴᠢᠬᠡᠭᠰᠡᠨ ᠪᠠᠶᠢᠭᠰᠠᠨ ᠢ ᠲᠡᠭᠦᠨ ᠦ 《ᠪᠢ ᠶᠠᠭᠤ ᠴᠤ ᠠᠪᠬᠤ ᠦᠭᠡᠢ ᠭᠡᠰᠡᠨ》 ᠭᠠᠭᠴᠠ ᠬᠠᠷᠢᠭᠤᠯᠲᠠ ᠠᠴᠠ ᠯᠠ ᠲᠣᠳᠣᠷᠬᠠᠢ ᠪᠣᠯᠳᠠᠭ᠃ ᠰᠠᠯᠵᠤ ᠰᠠᠷᠨᠢᠬᠤ ᠭᠡᠵᠦ ᠪᠠᠶᠢᠭ᠎ᠠ ᠡᠬᠡᠨᠡᠷ ᠨᠥᠬᠥᠷ ᠦᠨ ᠬᠣᠭᠣᠷᠣᠨᠳᠣ ᠬᠡᠷᠡᠭᠦᠯ ᠬᠠᠷᠢᠶᠠᠯ ᠪᠣᠯᠤᠭᠰᠠᠨ ᠦᠭᠡᠢ᠂ ᠶᠡᠷᠦ ᠶᠢᠨ ᠯᠠ ᠶᠠᠷᠢᠶ᠎ᠠ ᠬᠥᠭᠡᠷᠦᠭᠡ ᠥᠷᠨᠢᠵᠦ ᠪᠠᠶᠢᠭ᠎ᠠ ᠬᠡᠰᠡᠭ ᠦᠳ ᠶᠠᠭᠠᠬᠢᠵᠤ ᠴᠤ ᠡᠶᠢᠮᠦ ᠪᠠᠶᠢᠨ᠎ᠠ ᠡ ᠭᠡᠵᠦ ᠭᠠᠶᠢᠬᠠᠬᠤ ᠰᠡᠳᠬᠢᠯ ᠢ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠲᠥᠷᠦᠭᠦᠯᠦᠨ᠎ᠡ᠃ ᠮᠣᠩᠭᠣᠯ ᠬᠦᠮᠦᠨ ᠦ ᠢᠵᠠᠭᠤᠷ ᠲᠥᠷᠥᠯᠬᠢ ᠵᠠᠩ ᠴᠢᠨᠠᠷ᠂ ᠳᠣᠲᠣᠭᠠᠳᠤ ᠰᠡᠳᠬᠢᠬᠦᠢ᠂ ᠬᠦᠮᠦᠨ ᠴᠢᠨᠠᠷ᠂ ᠨᠢᠭᠡᠨ ᠢᠶᠡᠨ ᠬᠠᠶᠢᠷᠠᠯᠠᠬᠤ ᠰᠡᠳᠬᠢᠯ ᠦᠨ ᠲᠡᠩᠬᠡᠭᠡ᠂ ᠠᠭᠤᠵᠢᠭᠤ ᠤᠬᠠᠭᠠᠨ᠂ ᠰᠡᠳᠬᠢᠯ ᠵᠦᠢ ᠶᠢ ᠤᠷᠠᠨ ᠢᠶᠠᠷ ᠳᠦᠷᠰᠦᠯᠡᠨ ᠦᠵᠡᠭᠦᠯᠵᠦ᠂ ᠪᠢᠳᠡᠨ ᠦ ᠬᠠᠶᠠᠭᠳᠠᠵᠤ ᠭᠡᠭᠡᠭᠳᠡᠭᠰᠡᠨ ᠲᠡᠷᠡ ᠯᠠ ᠦᠨᠡᠲᠦ ᠵᠦᠢᠯ ᠦᠳ ᠢ ᠰᠡᠷᠭᠦᠭᠡᠨ ᠰᠠᠨᠠᠭᠤᠯᠳᠠᠭ ᠪᠢᠯᠡ᠃ ᠨᠥᠬᠥᠷ ᠲᠦ ᠪᠡᠨ ᠬᠠᠶᠠᠭᠳᠠᠭᠰᠠᠨ ᠲᠡᠷᠡ ᠯᠠ ᠮᠥᠴᠡ ᠡᠴᠡ ᠳᠡᠵᠢᠳ ᠥᠪᠡᠷ ᠢ ᠪᠡᠨ ᠰᠢᠨ᠎ᠡ ᠪᠡᠷ ᠨᠡᠭᠡᠭᠡᠵᠦ᠂ ᠥᠪᠡᠷ ᠲᠦ ᠨᠢ ᠶᠠᠮᠠᠷ ᠬᠦᠴᠦ ᠪᠣᠯᠤᠮᠵᠢ ᠨᠢᠭᠤᠭᠳᠠᠵᠤ ᠪᠠᠶᠢᠭᠰᠠᠨ ᠢ ᠣᠯᠵᠤ ᠮᠡᠳᠡᠬᠦ ᠲᠡᠳᠦᠢ ᠦᠭᠡᠢ᠂ ᠠᠮᠢᠳᠤᠷᠠᠯ ᠤᠨ ᠴᠣ ᠰᠢᠨ᠎ᠡ ᠠᠯᠬᠤᠮ ᠢ ᠪᠡᠶ᠎ᠡ ᠳᠠᠭᠠᠭᠠᠨ ᠡᠬᠢᠯᠡᠭᠦᠯᠵᠦ᠂ ᠤᠷᠢᠳ ᠨᠢ ᠠᠩᠵᠠᠭᠠᠷᠠᠭ᠎ᠠ ᠦᠭᠡᠢ ᠶᠠᠪᠤᠭᠰᠠᠨ ᠵᠢᠵᠢᠭ ᠰᠠᠵᠢᠭ ᠵᠦᠢᠯ ᠦᠳ ᠬᠦᠷᠲᠡᠯ᠎ᠡ ᠣᠳᠣ ᠬᠡᠴᠢᠨᠡᠨ ᠴᠢᠬᠤᠯᠠ ᠪᠣᠯᠬᠤ ᠶᠢ ᠪᠡᠶ᠎ᠡ ᠪᠡᠷ ᠢᠶᠡᠨ ᠮᠡᠳᠡᠷᠡᠵᠥ ᠡᠬᠢᠯᠡᠳᠡᠭ᠃ ᠨᠥᠬᠥᠷ ᠦᠨ ᠢᠶᠡᠨ ᠨᠥᠮᠥᠷᠢ ᠨᠥᠭᠡᠯᠭᠡ ᠳᠦ ᠠᠵᠢᠨ ᠲᠦᠵᠢᠨ ᠬᠣᠷᠸ᠎ᠠ ᠶᠢ ᠪᠠᠷᠠᠭᠰᠠᠨ ᠪᠣᠯ ᠲᠡᠷᠡ ᠥᠪᠡᠷ ᠢ ᠪᠡᠨ ᠬᠡᠵᠢᠶ᠎ᠡ ᠴᠤ ᠲᠠᠨᠢᠵᠤ ᠮᠡᠳᠡᠬᠦ ᠦᠭᠡᠢ ᠥᠩᠭᠡᠷᠡᠬᠦ ᠪᠠᠶᠢᠯ᠎ᠠ᠃ ᠪᠡᠷᠬᠡᠰᠢᠶᠡᠯ ᠵᠣᠪᠠᠯᠠᠩ ᠲᠤᠯᠭᠠᠷᠠᠬᠤ ᠳᠤ ᠬᠦᠮᠦᠨ ᠦ ᠳᠣᠲᠣᠭᠠᠳᠤ ᠨᠥᠭᠡᠴᠡ ᠪᠣᠯᠤᠮᠵᠢ ᠨᠤᠭᠤᠳ ᠢᠯᠡᠷᠡᠨ ᠭᠠᠷᠴᠤ᠂ ᠲᠡᠭᠦᠨ ᠳᠦ ᠬᠤᠷᠴᠠᠯᠠᠭᠳᠠᠨ ᠬᠦᠮᠦᠨ ᠥᠪᠡᠷᠲᠡᠭᠡᠨ ᠢᠲᠡᠭᠡᠯ ᠲᠡᠢ ᠪᠣᠯᠵᠤ᠂ ᠠᠮᠢᠳᠤᠷᠠᠯ ᠤᠨ ᠰᠢᠨ᠎ᠡ ᠪᠣᠯᠤᠮᠵᠢ ᠨᠤᠭᠤᠳ ᠢ ᠣᠯᠵᠤ ᠬᠠᠷᠠᠳᠠᠭ ᠠᠵᠢ᠃ ᠥᠪᠡᠷ ᠢ ᠪᠡᠨ ᠵᠥᠩ ᠳᠦ ᠨᠢ ᠬᠠᠶᠠᠭᠰᠠᠨ᠂ ᠢᠳᠡᠪᠬᠢ ᠦᠭᠡᠢ ᠰᠤᠯᠠ ᠳᠣᠷᠣᠢ ᠪᠠᠶᠢᠳᠠᠯ᠂ ᠨᠥᠬᠥᠷ ᠢ ᠪᠡᠨ ᠬᠠᠶᠢᠷ᠎ᠠ ᠬᠠᠯᠠᠮᠵᠢ ᠪᠠᠷ ᠳᠤᠲᠠᠭᠠᠭᠰᠠᠨ ᠵᠡᠷᠭᠡ ᠨᠢ ᠬᠠᠶᠠᠭᠳᠠᠬᠤ ᠰᠢᠯᠲᠠᠭᠠᠨ ᠪᠣᠯᠤᠭᠰᠠᠨ ᠢ ᠣᠶᠢᠯᠠᠭᠠᠵᠤ᠂ ᠥᠭᠡᠷ᠎ᠡ ᠪᠡᠷ ᠠᠮᠢᠳᠤᠷᠠᠬᠤ ᠰᠡᠳᠬᠢᠯ ᠦᠨ ᠲᠡᠩᠬᠡᠭᠡ ᠶᠢ ᠣᠯᠵᠤ ᠠᠪᠳᠠᠭ ᠪᠢᠯᠡ᠃ ᠳᠠᠮᠪᠠ ᠬᠡᠳᠦᠢ ᠪᠡᠷ ᠭᠡᠷ ᠪᠦᠯᠢ ᠪᠡᠨ ᠣᠷᠬᠢᠨ ᠶᠠᠪᠤᠭᠰᠠᠨ ᠴᠤ ᠠᠷᠤ ᠭᠡᠷ ᠲᠦ ᠪᠡᠨ ᠦᠷᠭᠦᠯᠵᠢ ᠰᠠᠨᠠᠭ᠎ᠠ ᠵᠣᠪᠠᠨᠢᠬᠤ ᠶᠢᠨ ᠬᠠᠵᠠᠭᠤ ᠪᠠᠷ᠂ ᠡᠨᠡ ᠪᠠᠶᠢᠳᠠᠯ ᠢ ᠨᠢ ᠲᠤᠭᠤᠬᠦᠦ ᠮᠡᠳᠡᠴᠢᠬᠡᠬᠦ ᠪᠤᠢ ᠭᠡᠬᠦ ᠡᠴᠡ ᠪᠠᠷᠢᠭᠤ ᠭᠤᠲᠤᠯ ᠡᠮᠦᠰᠦᠭᠰᠡᠨ ᠬᠦᠮᠦᠨ ᠮᠡᠲᠦ ᠰᠡᠳᠬᠢᠯ ᠦᠨ ᠵᠣᠪᠠᠯᠠᠩ ᠡᠳ᠋ᠯᠡᠬᠦ ᠠᠵᠢ᠃ ᠲᠣᠭᠣᠬᠦᠦ ᠶᠢᠨ ᠨᠠᠭᠠᠯᠢᠩᠬᠠᠢ ᠠᠭᠠᠰᠢ᠂ ᠡᠷᠬᠡᠯᠡᠵᠦ ᠨᠢᠯᠬᠠᠷᠠᠬᠤ ᠬᠠᠶᠢᠷᠠᠨ ᠳᠤ ᠤᠮᠪᠠᠨ ᠰᠠᠭᠤᠬᠤ ᠨᠢ ᠬᠡᠰᠡᠭᠬᠡᠨ ᠵᠠᠭᠤᠷ᠎ᠠ ᠶᠢᠨ ᠵᠢᠷᠭᠠᠯ ᠭᠡᠳᠡᠭ ᠢ ᠤᠬᠠᠭᠠᠷᠠᠵᠤ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠰᠠᠨᠠᠭ᠎ᠠ ᠳᠠᠮᠪᠠ ᠳᠤ ᠲᠥᠷᠥᠪᠡᠴᠤ ᠪᠠᠰᠠᠬᠦ ᠪᠦᠰᠡᠭᠦᠢ ᠶᠢᠨ ᠰᠡᠳᠬᠢᠯ ᠢ ᠭᠣᠮᠣᠳᠠᠭᠠᠬᠤ ᠵᠢᠷᠦᠬᠡ ᠵᠣᠷᠢᠭ ᠬᠦᠷᠬᠦ ᠦᠭᠡᠢ ᠬᠠᠯᠠᠷᠢᠭᠰᠠᠭᠠᠷ ᠳᠣᠣᠷ᠎ᠠ ᠪᠠᠨ ᠡᠷᠭᠢᠴᠡᠬᠦ ᠲᠤᠱᠠᠲᠠᠢ ᠮᠣᠷᠢ ᠮᠡᠲᠦ ᠨᠢᠭᠡ ᠲᠡᠶᠢᠮᠦ ᠬᠦᠯᠢᠭᠳᠡᠮᠡᠯ ᠪᠠᠶᠢᠳᠠᠯ ᠳᠤ ᠣᠷᠣᠴᠢᠬᠠᠭᠰᠠᠨ ᠬᠥᠭᠡᠷᠦᠬᠦᠶᠢᠯᠡᠯ ᠲᠡᠢ ᠳᠦᠷᠢ ᠲᠥᠷᠬᠥ ᠰᠡᠳᠬᠢᠯ ᠡᠮᠵᠡᠭᠯᠡᠭᠦᠯᠦᠨ᠎ᠡ᠃ ᠳᠠᠮᠪᠠ ᠶᠢᠨ ᠡᠪᠦᠭᠡ ᠡᠴᠢᠭᠡ ᠡᠴᠡ ᠤᠯᠠᠮᠵᠢᠯᠠᠨ ᠢᠷᠡᠭᠰᠡᠨ ᠬᠥᠯ ᠢᠶᠡᠨ ᠵᠢᠭᠢᠨ ᠬᠡᠪᠲᠡᠵᠦ ᠪᠤᠢ ᠬᠦᠷᠡᠯ ᠭᠥᠷᠥᠭᠡᠰᠦ ᠴᠠᠬᠢᠯᠤᠨ ᠣᠳᠴᠤ ᠪᠤᠢ ᠵᠡᠭᠦᠳᠦᠨ ᠦ ᠬᠡᠰᠡᠭ ᠪᠣᠯ ᠳᠡᠵᠢᠳ ᠲᠦ ᠨᠢᠭᠡᠨᠲᠡ ᠴᠠᠬᠢᠯᠤᠨ ᠣᠳᠤᠭᠰᠠᠨ ᠭᠥᠷᠥᠭᠡᠰᠦ ᠰᠢᠭ ᠥᠩᠭᠡᠷᠡᠭᠰᠡᠨ ᠠᠮᠢᠳᠤᠷᠠᠯ ᠤᠨ ᠬᠣᠶᠢᠨ᠎ᠠ ᠠᠴᠠ ᠵᠢᠭᠤᠷᠠᠯᠳᠤᠬᠤ ᠬᠡᠷᠡᠭ ᠦᠭᠡᠢ ᠭᠡᠰᠡᠨ ᠳᠣᠬᠢᠶ᠎ᠠ ᠰᠠᠨᠠᠭᠤᠯᠭ᠎ᠠ ᠪᠣᠯᠵᠤ᠂ ᠳᠠᠮᠪᠠ ᠶᠢ ᠪᠢᠲᠡᠭᠦᠬᠡᠨ ᠬᠦᠯᠢᠶᠡᠵᠦ ᠪᠠᠶᠢᠭᠰᠠᠨ ᠭᠣᠷᠢᠳᠠᠯᠭ᠎ᠠ ᠨᠠᠶᠢᠳᠠᠯᠭ᠎ᠠ ᠶᠢᠨ ᠬᠦᠯᠢᠶᠡᠰᠦ ᠲᠠᠰᠤᠷᠴᠣ᠂ ᠰᠡᠳᠬᠢᠯ ᠨᠢ ᠰᠢᠯᠤᠭᠤᠳᠠᠳᠠᠭ ᠪᠢᠯᠡ᠃ ᠬᠦᠷᠡᠯ ᠭᠥᠷᠥᠭᠡᠰᠦ ᠶᠢ ᠳᠠᠮᠪᠠ ᠳᠤ ᠬᠦᠷᠭᠡᠵᠦ ᠥᠭᠭᠦᠭᠰᠡᠨ ᠨᠢ ᠲᠡᠳᠡᠨ ᠦ ᠬᠣᠭᠣᠷᠣᠨᠳᠣ ᠶᠢᠨ ᠠᠮᠢᠳᠤᠷᠠᠯ ᠨᠢᠭᠡᠨᠲᠡ ᠲᠤᠰ ᠲᠤ ᠪᠠᠨ ᠪᠣᠯᠤᠭᠰᠠᠨ ᠢ ᠬᠦᠯᠢᠶᠡᠨ ᠵᠥᠪᠰᠢᠶᠡᠷᠡᠭᠰᠡᠨ ᠪᠡᠯᠭᠡ ᠲᠡᠮᠳᠡᠭ ᠲᠡᠳᠦᠢ ᠦᠭᠡᠢ᠂ ᠬᠡᠨ ᠬᠡᠨ ᠳᠦ ᠪᠡᠨ ᠬᠠᠷ᠎ᠠ ᠪᠤᠷᠤᠭᠤ ᠰᠠᠨᠠᠬᠤ ᠦᠭᠡᠢ ᠲᠤᠰᠠ ᠳᠡᠮᠲᠡᠢ ᠶᠠᠪᠤᠬᠤ ᠶᠢ᠂ ᠲᠡᠷᠡ ᠭᠥᠷᠥᠭᠡᠰᠦ ᠶᠢ ᠨᠠᠨᠳᠢᠩᠨᠠᠳᠠᠭ ᠰᠢᠭ ᠦᠷ᠎ᠡ ᠤᠳᠤᠮ ᠢᠶᠠᠨ ᠪᠠᠰᠠ ᠬᠠᠷᠠᠵᠤ᠂ ᠬᠠᠶᠢᠷᠠᠯᠠᠵᠤ ᠶᠠᠪᠤᠬᠤ ᠶᠢ ᠰᠠᠨᠠᠭᠤᠯᠵᠤ ᠪᠠᠶᠢᠭ᠎ᠠ ᠤᠷᠠᠨ ᠳᠦᠷᠰᠦᠯᠡᠯ ᠶᠤᠮ᠃ ᠬᠦᠮᠦᠨ ᠥᠩᠭᠡᠷᠡᠭᠰᠡᠨ ᠠᠮᠢᠳᠤᠷᠠᠯ ᠤᠨ ᠢᠶᠠᠨ ᠳᠤᠷᠠᠰᠤᠮᠵᠢ ᠪᠠᠷ ᠬᠥᠭᠯᠡᠭᠳᠡᠨ᠂ ᠲᠡᠭᠦᠨ ᠲᠡᠢ ᠪᠡᠨ ᠵᠢᠭᠤᠷᠠᠯᠳᠤᠨ ᠰᠡᠳᠬᠢᠯ ᠢᠶᠡᠨ ᠲᠡᠵᠢᠭᠡᠵᠦ ᠶᠠᠪᠤᠳᠠᠭ ᠢ ᠳᠡᠵᠢᠳ ᠥᠩᠭᠡᠷᠡᠭᠰᠡᠨ ᠠᠮᠢᠳᠤᠷᠠᠯ ᠢᠶᠠᠨ ᠳᠤᠷᠠᠰᠴᠤ ᠠᠯᠳᠠᠭ᠎ᠠ ᠣᠨᠣᠭ᠎ᠠ ᠪᠠᠨ ᠳᠡᠩᠰᠡᠯᠡᠨ ᠪᠤᠢ ᠲᠡᠷᠡ ᠬᠡᠰᠡᠭ ᠦᠳ ᠲᠤ ᠲᠣᠳᠣᠷᠬᠠᠢ ᠬᠠᠷᠠᠭᠳᠠᠨ᠎ᠠ᠃ ᠳᠡᠵᠢᠳ ᠦᠨ ᠪᠣᠳᠣᠯ᠂ ᠳᠤᠷᠠᠰᠤᠮᠵᠢ᠂ ᠳᠣᠲᠣᠭᠠᠳᠤ ᠬᠦᠦᠷᠨᠢᠯ ᠢᠶᠡᠷ ᠳᠠᠮᠵᠢᠭᠤᠯᠤᠨ ᠮᠣᠩᠭᠣᠯ ᠡᠮᠡᠭᠲᠡᠢ ᠬᠦᠮᠦᠨ ᠦ ᠠᠭᠤᠵᠢᠭᠤ ᠤᠬᠠᠭᠠᠨ᠂ ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢ᠂ ᠰᠡᠳᠬᠢᠯ ᠵᠦᠢ ᠶᠢ ᠭᠠᠶᠢᠬᠠᠯᠲᠠᠢ ᠨᠠᠷᠢᠨ ᠳᠦᠷᠰᠦᠯᠡᠨ ᠦᠵᠡᠭᠦᠯᠦᠭᠰᠡᠨ ᠬᠣᠪᠣᠷ ᠪᠦᠲᠦᠭᠡᠯ ᠦᠨ ᠨᠢᠭᠡ ᠰᠢᠦ᠃ ᠬᠠᠳᠤᠯᠠᠩ ᠳᠡᠭᠡᠷ᠎ᠡ ᠡᠴᠡ ᠳᠠᠮᠪᠠ ᠶᠢ ᠭᠡᠷ ᠲᠦ ᠪᠡᠨ ᠬᠠᠷᠢᠴᠢᠬᠠᠭᠠᠰᠠᠢ ᠭᠡᠬᠦ ᠪᠣᠳᠣᠯ ᠣᠯᠠᠨ ᠤᠩᠰᠢᠭᠴᠢ ᠳ᠋ᠤ ᠲᠥᠷᠦᠳᠡᠭ ᠪᠠᠶᠢᠬᠤ᠃ ᠲᠡᠭᠡᠬᠦ ᠯᠠ ᠶᠤᠮ ᠪᠣᠯ ᠵᠣᠬᠢᠶᠠᠯ ᠤᠨ ᠭᠣᠣᠯ ᠭᠣᠭᠴᠣᠭ᠎ᠠ᠂ ᠠᠮᠢᠨ ᠰᠤᠳᠠᠰᠤ ᠠᠯᠳᠠᠭᠳᠠᠵᠤ ᠴᠢᠨᠠᠭᠰᠢᠳᠠ ᠬᠥᠪᠥᠷᠡᠬᠦ ᠦᠢᠯᠡ ᠶᠠᠪᠤᠳᠠᠯ ᠤᠳ ᠰᠣᠨᠢᠷᠬᠠᠯ ᠦᠭᠡᠢ᠂ ᠠᠮᠲᠠ ᠦᠭᠡᠢ᠂ ᠬᠡᠯᠡᠬᠦ ᠭᠡᠰᠡᠨ ᠰᠠᠨᠠᠭ᠎ᠠ ᠨᠢ ᠳᠤᠲᠠᠭᠤᠳᠠᠬᠤ ᠶᠤᠮ᠃ ᠰᠣᠴ ᠷᠧᠶᠠᠯᠢᠰᠲ ᠤᠳᠬ᠎ᠠ ᠵᠣᠬᠢᠶᠠᠯ ᠢᠳᠡ ᠣᠷᠭᠢᠯ ᠦᠶ᠎ᠡ ᠳ᠋ᠡᠭᠡᠨ ᠯᠠ ᠪᠠᠶᠢᠭᠰᠠᠨ ᠨᠠᠶᠠᠭᠠᠳ ᠣᠨ ᠤ ᠡᠬᠢᠨ ᠦᠶ᠎ᠡ ᠳᠦ ᠪᠢᠴᠢᠭᠳᠡᠭᠰᠡᠨ ᠵᠣᠬᠢᠶᠠᠯ ᠭᠡᠬᠦ ᠳᠦ ᠦᠵᠡᠯ ᠰᠤᠷᠲᠠᠯ ᠥᠴᠥᠬᠡᠨ ᠴᠤ ᠦᠨᠦᠷᠳᠦᠬᠦ ᠦᠭᠡᠢ᠂ ᠨᠢᠭᠡ ᠭᠡᠷ ᠪᠦᠯᠢ ᠶᠢᠨ ᠠᠮᠢᠳᠤᠷᠠᠯ ᠤᠨ ᠵᠤᠷᠪᠤᠰ ᠦᠶ᠎ᠡ ᠶᠢ ᠡᠩ ᠦᠨ ᠮᠥᠷᠲᠡᠯ᠎ᠡ ᠡᠭᠡᠯ ᠦᠭᠡᠢ ᠰᠠᠶᠢᠬᠠᠨ ᠢᠶᠠᠷ ᠲᠤᠭᠤᠷᠪᠢᠨ ᠪᠢᠴᠢᠵᠦ ᠴᠢᠳᠠᠭᠰᠠᠨ ᠢᠶᠠᠷ ᠢᠶᠠᠨ ᠬᠦᠦᠷᠨᠢᠯ ᠵᠣᠬᠢᠶᠠᠯ ᠳᠤ ᠭᠡᠷᠡᠯᠲᠦ ᠰᠤᠪᠤᠷᠭ᠎ᠠ ᠮᠡᠲᠦ ᠨᠢᠭᠡ ᠰᠠᠶᠢᠬᠠᠨ ᠨᠠᠨᠳᠢᠨ ᠪᠦᠲᠦᠭᠡᠯ ᠦᠯᠡᠳᠡᠵᠦ ᠬᠣᠴᠣᠷᠴᠠᠢ᠃ ᠲᠣᠯᠰᠣᠲᠣᠢ᠂ ᠴᠸᠧᠢᠶᠢ᠂ ᠹᠯᠣᠪᠧᠷ ᠰᠢᠭ ᠡᠮᠡᠭᠲᠡᠢ ᠬᠦᠮᠦᠨ ᠦ ᠰᠡᠳᠬᠢᠯ ᠦᠨ ᠭᠦᠨ ᠳ᠋ᠤ ᠨᠡᠪᠲᠡᠷᠡᠵᠥ᠂ ᠳᠠᠯᠳᠠ ᠬᠦᠰᠡᠯ ᠲᠡᠮᠡᠦᠯᠡᠯ ᠢ ᠨᠢ ᠨᠡᠭᠡᠭᠡᠨ ᠭᠠᠷᠭᠠᠵᠤ ᠴᠢᠳᠠᠳᠠᠭ᠂ ᠡᠮᠡᠭᠲᠡᠢ ᠬᠦᠮᠦᠨ ᠢ ᠮᠡᠳᠡᠷᠡᠵᠥ ᠪᠢᠴᠢᠳᠡᠭ ᠲᠡᠶᠢᠮᠦ ᠯᠠ ᠮᠤᠨᠳᠠᠭ ᠵᠣᠬᠢᠶᠠᠯᠴᠢ ᠶᠢᠨ ᠨᠢᠭᠡ ᠲᠡᠳᠦᠢ ᠦᠭᠡᠢ᠂ ᠬᠡᠳᠦᠢ ᠪᠡᠷ ᠴᠥᠭᠡᠪᠲᠦᠷ ᠪᠦᠲᠦᠭᠡᠯ ᠲᠤᠭᠤᠷᠪᠢᠭᠰᠠᠨ ᠴᠤ ᠭᠣᠸ᠎ᠠ ᠵᠦᠢ ᠶᠢᠨ ᠲᠠᠭᠠᠰᠢᠶᠠᠯ ᠪᠦᠬᠦᠢ ᠪᠣᠭᠣᠨᠢ ᠬᠡᠮᠵᠢᠶᠡᠨ ᠦ ᠬᠦᠦᠷᠨᠢᠯ ᠵᠣᠬᠢᠶᠠᠯ ᠤᠨ ᠲᠥᠷᠥᠯ ᠳᠦ ᠡᠷᠳᠡᠨᠢ ᠪᠠᠪᠠᠢ ᠶᠢᠨ ᠠᠷᠤ ᠳ᠋ᠤ ᠯᠠ ᠡᠷᠢᠮᠪᠡᠯᠡᠭᠳᠡᠬᠦ ᠤᠳᠬ᠎ᠠ ᠵᠣᠬᠢᠶᠠᠯ ᠤᠨ ᠥᠨᠳᠥᠷᠯᠢᠭ ᠦᠳ ᠦᠨ ᠨᠢᠭᠡ ᠪᠣᠯ ᠡᠷᠬᠢᠮ ᠬᠥᠮᠥᠨ ᠳ᠋ ᠊ ᠪᠠᠲᠤᠪᠠᠶᠠᠷ ᠭᠤᠸᠠᠢ ᠪᠢᠯᠡ᠃ ᠲᠦᠮᠡᠲᠦ ᠰᠢᠨ᠎ᠡ ᠬᠥᠷᠪᠡᠭᠦᠯᠪᠡ