ᠰᠢᠭᠦᠮᠵᠢ
ᠬᠠᠶᠢᠯᠲᠠ ᠨᠠᠶᠢᠷᠠᠭ ᠤᠨ ᠡᠷᠡᠮᠡᠭᠡᠢ ᠭᠱᠡᠨ
ᠬᠠᠶᠢᠯᠲᠠ ᠨᠠᠶᠢᠷᠠᠭ ᠤᠨ ᠡᠷᠡᠮᠡᠭᠡᠢ ᠭᠱᠡᠨ
4944
2018-11-01 09:31
发表于:内蒙古
ᠬᠠᠶᠢᠯᠲᠠ ᠨᠠᠶᠢᠷᠠᠭ ᠤᠨ ᠡᠷᠡᠮᠡᠭᠡᠢ ᠭᠱᠡᠨ
ᠣᠷᠭᠠ
ᠦᠪᠦᠷ ᠮᠣᠩᠭᠣᠯ ᠤᠨ ᠣᠷᠠᠨ ᠵᠣᠬᠢᠶᠠᠯ ᠤᠨ ᠲᠣᠬᠠᠢ ᠶᠠᠷᠢᠭᠰᠠᠭᠠᠷ ᠨᠠᠶᠠᠭᠠᠳ ᠣᠨ ᠡᠴᠡ ᠡᠬᠢᠯᠡᠭᠡᠳ ᠬᠠᠶᠢᠯᠲᠠ ᠨᠠᠶᠢᠷᠠᠭ ᠬᠡᠬᠦ ᠨᠢᠭᠡᠨ ᠨᠠᠷᠠ ᠶ᠋ᠢᠨ ᠬᠠᠭᠣᠳᠠᠰᠣ ᠭᠡᠭᠡᠭᠳᠡᠵᠦ ᠣᠷᠬᠢᠭᠳᠠᠵᠣ ᠪᠣᠯᠳᠠᠭ ᠦᠭᠡᠢ ᠶᠠᠷᠢᠭᠳᠠᠳᠠᠭ ᠢ ᠲᠠ ᠪᠦᠬᠦᠨ ᠮᠢᠨᠢ ᠶᠠᠭᠣᠨ ᠠᠨᠳᠠᠬᠣ ᠪᠢᠯᠡ ᠃ ᠨᠠᠶᠠ ᠂ ᠶᠡᠷᠡᠭᠡᠳ ᠣᠨ ᠳ᠋ᠣ ︽ ᠦᠨᠢᠷ ᠴᠡᠴᠡᠭ ︾ ᠰᠡᠳᠬᠦᠯ ᠤᠨ ᠬᠣᠶᠢᠮᠣᠷ ᠲᠣ ᠵᠠᠪᠢᠯᠠᠭᠠᠲᠡᠢ ᠪᠠᠶᠢᠬᠣ ᠳ᠋ᠣ ᠪᠦᠳᠡᠬᠢ ᠰᠢᠯᠦᠭ ᠪᠣᠶᠣ ᠮᠠᠨᠠᠨᠴᠢᠷ ᠨᠠᠶᠢᠷᠠᠭ ᠭᠡᠰᠡᠨ ᠴᠣᠯᠠ ᠮᠢᠨᠳᠠᠭ ᠲᠠᠢ ᠪᠠᠶᠢᠵᠣ ᠪᠠᠶᠢᠭᠰᠠᠨ ᠢᠶᠡᠨ ᠶᠡᠷᠡᠭᠡᠳ ᠣᠨ ᠤ ᠲᠣᠮᠳᠠᠴᠢ ᠰᠡᠭᠦᠯᠴᠢ ᠪᠡᠷ ᠬᠠᠷᠠᠭᠳᠠᠬᠣ ᠦᠭᠡᠢ ᠲᠦᠷ ᠨᠠᠮᠵᠢᠭᠰᠠᠨ ᠢᠶᠡᠨ ᠬᠣᠶᠠᠷ ᠮᠢᠩᠭᠠᠨ ᠣᠨ ᠪᠣᠯᠬᠣ ᠳ᠋ᠣ ᠲᠠᠬᠢᠨ ᠬᠦᠴᠦ ᠠᠪᠴᠣ ᠰᠦᠯᠵᠢᠶᠡ ᠂ ᠠᠯᠪᠠᠨ ᠤ ᠪᠣᠰᠣ ᠬᠡᠪᠯᠡᠯ ᠤᠨ ᠰᠡᠳᠬᠦᠯ ᠰᠣᠨᠢᠨ ᠂ ᠬᠣᠪᠢ ᠶ᠋ᠢᠨ ᠰᠦᠢᠳᠬᠡᠯ ᠪᠡᠷ ᠭᠠᠷᠳᠠᠭ ᠲᠡᠭᠦᠪᠦᠷᠢ ᠪᠦᠲᠦᠭᠡᠯ ᠪᠡᠷ ᠭᠠᠵᠠᠷ ᠠᠪᠴᠣ ᠬᠦᠴᠦᠲᠡᠢ ᠦᠷᠨᠢᠵᠦ ᠬᠦᠭᠵᠢᠯᠲᠡ ᠪᠡᠨ ᠣᠯᠣᠭᠰᠠᠨ ᠪᠠᠶᠢᠳᠠᠭ ᠃ ᠶᠡᠷᠡᠭᠡᠳ ᠣᠨ ᠤ ᠲᠣᠮᠳᠠᠴᠢ ᠰᠡᠭᠦᠯᠴᠢ ᠶ᠋ᠢᠨ ᠦᠶᠡ ᠪᠡᠷ ᠦᠪᠦᠷ ᠮᠣᠩᠭᠣᠯ ᠤᠨ ᠣᠷᠠᠨ ᠵᠣᠬᠢᠶᠠᠯ ᠳ᠋ᠣ ᠣᠨᠴᠠᠭᠠᠢ ᠨᠢᠭᠡᠨ ᠦᠵᠡᠭᠳᠡᠯ ᠢᠶᠡᠷ ᠶᠠᠷᠢᠶᠠ ᠬᠡᠯᠡᠯᠴᠡᠭᠡ ᠪᠣᠯᠵᠣ ᠪᠠᠶᠢᠭᠰᠠᠨ ᠠᠩᠭᠢᠲᠣ ᠶ᠋ᠢᠨ ︽ ᠲᠡᠭᠷᠢ ᠳ᠋ᠡᠭᠡᠨ ᠦᠬᠦᠳᠡᠭ ᠰᠢᠪᠠᠭᠣ ︾ ᠶ ᠊ ᠪᠠᠲᠣᠳᠠᠯᠠᠢ ᠶ᠋ᠢᠨ ︽ ᠲᠡᠯᠡᠬᠡᠢ ᠶ᠋ᠢᠨ ᠣᠯᠠᠭᠠᠨ ᠴᠢᠪᠠᠭᠠ ︾ ᠬᠡᠬᠦ ᠬᠣᠶᠠᠷ ᠨᠣᠮ ᠤᠨ ᠲᠠᠲᠠᠭᠰᠠᠨ ᠲᠣᠣᠯᠢᠶᠠᠨ ᠲᠡᠪᠵᠢᠶᠡᠨ ᠠᠷᠠᠢ ᠨᠢᠭᠡ ᠮᠠᠷᠲᠠᠭᠳᠠᠬᠣ ᠪᠣᠯᠬᠣ ᠳ᠋ᠣ ᠣᠨᠠᠭᠠ ᠶ᠋ᠢᠨ ︽ ᠬᠣᠷᠢᠭᠳᠠᠯ ᠡᠴᠡ ᠭᠠᠳᠠᠨᠠᠬᠢ ᠶᠠᠯᠠᠲᠠᠨ ︾ ᠪᠠ ᠳ᠋ ᠊ ᠦᠷᠭᠡᠨᠳᠠᠯᠠᠢ ᠶ᠋ᠢᠨ ︽ ᠬᠡᠯᠡ ᠬᠦᠷᠬᠦ ᠦᠭᠡᠢ ᠭᠠᠵᠠᠷ ︾ ᠬᠠᠷᠠ ᠰᠠᠷᠠᠨᠡᠢ ᠶ᠋ᠢᠨ ︽ ᠨᠠᠳᠠ ᠶᠠᠭ ᠪᠣᠷᠣᠭᠣ ᠦᠭᠡᠢ ︾ ᠬᠡᠬᠦ ᠰᠢᠯᠦᠭ ᠤᠨ ᠨᠣᠮ ᠤᠳ ᠮᠦᠨ ᠨᠡᠯᠢᠶᠡᠳ ᠲᠡᠪᠵᠢᠶᠡᠨ ᠦᠢᠮᠡᠭᠡᠨ ᠭᠠᠷᠭᠠᠵᠣ ᠨᠠᠮ ᠬᠦᠮ ᠨᠣᠶᠢᠷᠰᠣᠵᠣ ᠪᠣᠢ ᠣᠷᠠᠨ ᠪᠦᠲᠦᠭᠡᠯᠴᠢᠳ ᠢ ᠠᠮᠲᠠᠲᠣ ᠨᠣᠶᠢᠷ ᠡᠴᠡ ᠨᠢ ᠰᠡᠷᠡ᠊ᠭᠡᠵᠦ ᠪᠠᠶᠢᠭᠰᠠᠨ ᠢ ᠲᠡᠮᠲᠡᠭᠯᠡᠯᠲᠡᠢ ᠃ ᠡᠨᠡ ᠬᠡᠳᠦᠨ ᠨᠣᠮ ᠢ ᠬᠠᠶᠢᠯᠲᠠ ᠨᠠᠶᠢᠷᠠᠭ ᠬᠡᠬᠦ ᠡᠴᠡ ᠢᠯᠡᠭᠦᠦ ᠨᠣᠮ ᠬᠡᠪᠯᠡᠯ ᠤᠨ ᠴᠢᠯᠦᠭᠡᠲᠡᠢ ᠬᠡᠪᠯᠡᠭᠳᠡᠬᠦ ᠂ ᠪᠣᠷᠣᠯᠠᠭᠣᠯᠣᠭᠳᠠᠬᠣ ᠂ ᠨᠣᠮ ᠲᠡᠪᠲᠡᠷ ᠤᠨ ᠬᠠᠪᠢᠰᠣᠨ ᠤ ᠣᠷᠠᠯᠠᠯ ᠂ ᠵᠢᠭᠢᠷᠡᠭ ᠵᠢᠷᠣᠭ ᠂ ᠲᠡᠭᠦᠪᠦᠷᠢ ᠲᠡᠪᠳᠡᠷ ᠤᠨ ᠬᠡᠪᠯᠡᠯ ᠤᠨ ᠶᠠᠩᠵᠣ ᠬᠢᠴᠡ ᠳ᠋ᠣ ᠪᠦᠷ ᠣᠨᠴᠠᠭᠠᠢ ᠰᠢᠨᠡ ᠰᠣᠳᠣᠨ ᠦᠩᠭᠡ ᠭᠠᠯᠪᠢᠷ ᠢ ᠬᠦᠭᠡᠭᠡᠴᠡᠯᠳᠦᠵᠦ ᠂ ᠰᠣᠨᠢᠨ ᠰᠡᠪᠡᠭᠦᠨ ᠪᠣᠯᠭᠠᠭᠰᠠᠨ ᠨᠢ ᠰᠢᠨᠡ ᠨᠢᠭᠡᠨ ᠦᠵᠡᠭᠳᠡᠯ ᠪᠣᠯᠣᠭᠰᠠᠨ ᠨᠢ ᠶᠠᠷᠢᠶᠠᠨ ᠦᠭᠡᠢ ᠃
ᠦᠪᠦᠷ ᠮᠣᠩᠭᠣᠯ ᠤᠨ ᠬᠠᠶᠢᠯᠲᠠ ᠨᠠᠶᠢᠷᠠᠭ ᠢ ᠲᠣᠷᠠᠳᠬᠣ ᠳ᠋ᠣ 2002 ᠣᠨ ᠡᠴᠡ 2012 ᠣᠨ ᠬᠡᠮᠡᠬᠦ ᠨᠢᠭᠡᠨ ᠭᠱᠡᠨ ᠢ ᠲᠡᠮᠲᠡᠭᠯᠡᠬᠦ ᠦᠭᠡᠢ ᠦᠩᠭᠡᠷᠡᠵᠦ ᠦᠯᠦ ᠪᠣᠯᠣᠨᠠ ᠭᠡᠵᠦ ᠪᠣᠳᠣᠨᠠ ᠃ ᠡᠨᠡ ᠨᠢᠭᠡᠨ ᠠᠷᠪᠠᠨ ᠵᠢᠯ ᠳ᠋ᠣ ᠬᠠᠶᠢᠯᠲᠠ ᠨᠠᠶᠢᠷᠠᠭ ᠨᠢ ᠠᠯᠪᠠᠨ ᠤ ᠡᠷᠬᠢᠯᠡᠵᠦ ᠪᠣᠢ ᠨᠣᠮ ᠰᠡᠳᠬᠦᠯ ᠡᠴᠡ ᠠᠰᠳᠠᠭᠠᠨ ᠨᠢᠭᠡᠨ ᠵᠠᠮ ᠱᠣᠭᠣᠮ ᠢᠶᠡᠷ ᠬᠦᠭᠵᠢᠵᠦ ᠦᠷᠨᠢᠵᠦ ᠢᠷᠡᠭᠰᠡᠨ ᠪᠠᠶᠢᠳᠠᠭ ᠃ ᠲᠠᠷᠣᠢ ᠬᠠᠷᠠ ᠨᠣᠮ ︵ ᠠᠯᠪᠠᠨ ᠤ ᠬᠡᠪᠯᠡᠯ ᠤᠨ ᠭᠠᠷᠳᠠᠮ ᠦᠭᠡᠢ ︶ ᠤᠨ ᠵᠠᠮ ᠪᠡᠷ ᠬᠡᠪᠯᠡᠭᠳᠡᠵᠦ ᠲᠠᠷᠬᠠᠭᠠᠭᠳᠠᠵᠣ ᠪᠠᠶᠢᠭᠰᠠᠨ ᠃ ᠡᠨᠡ ᠦᠶᠡ ᠨᠢ ᠦᠪᠦᠷ ᠮᠣᠩᠭᠣᠯ ᠤᠨ ᠨᠣᠮ ᠬᠡᠪᠯᠡᠯ ᠠᠷᠠᠢ ᠴᠢᠯᠦᠭᠡᠲᠡᠢ ᠬᠡᠪᠯᠡᠭᠳᠡᠬᠦ ᠬᠠᠨᠳᠣᠰᠢ ᠲᠠᠢ ᠪᠠᠶᠢᠵᠣ ᠂ ᠣᠷᠠᠨ ᠵᠣᠬᠢᠶᠠᠯ ᠤᠨ ᠡᠯᠡ ᠰᠲ᠋ᠢᠯᠢ ᠶ᠋ᠢᠨ ᠨᠣᠮ ᠲᠡᠭᠦᠪᠦᠷᠢ ᠵᠣᠬᠢᠶᠠᠭᠴᠢ ᠦᠪᠡᠷ ᠢᠶᠡᠨ ᠬᠡᠪᠯᠡᠯ ᠤᠨ ᠰᠦᠢᠳᠬᠡᠯ ᠢᠶᠡᠨ ᠭᠠᠷᠭᠠᠭᠠᠳ ᠬᠡᠳᠦᠨ ᠵᠠᠭᠣᠨ ᠲᠡᠪᠲᠡᠷ ᠬᠡᠪᠯᠡᠭᠦᠯᠵᠦ ᠨᠠᠶᠢᠵᠠ ᠨᠦᠬᠦᠳ ᠳ᠋ᠡᠭᠡᠨ ᠪᠡᠯᠡᠭᠯᠡᠵᠦ ᠪᠣᠯᠵᠣ ᠪᠠᠶᠢᠭᠰᠠᠨ ᠦᠶᠡ ᠂ ᠡᠨᠡ ᠴᠢᠯᠦᠭᠡᠲᠦ ᠪᠠᠶᠢᠳᠠᠯ ᠲᠣᠣᠷᠠ ᠦᠪᠦᠷ ᠮᠣᠩᠭᠣᠯ ᠳ᠋ᠣ ᠬᠣᠪᠢ ᠬᠦᠮᠦᠨ ᠤ ᠡᠷᠬᠢᠯᠡᠭᠰᠡᠨ ᠣᠷᠠᠨ ᠵᠣᠬᠢᠶᠠᠯ ᠂ ᠲᠠᠮᠢᠷ ᠣᠷᠠᠯᠢᠭ ᠤᠨ ᠣᠯᠠᠨ ᠰᠡᠳᠬᠦᠯ ᠮᠡᠨᠳᠦᠯᠡᠭᠰᠡᠨ ᠢᠶᠡᠷ ᠪᠠᠷᠠᠬᠣ ᠦᠭᠡᠢ ᠬᠣᠪᠢ ᠬᠦᠮᠦᠨ ᠤ ᠣᠷᠠᠨ ᠵᠣᠬᠢᠶᠠᠯ ᠤᠨ ᠲᠡᠭᠦᠪᠦᠷᠢ ᠤᠳ ᠴᠣ ᠣᠯᠠᠨ ᠲᠣᠭᠠ ᠪᠡᠷ ᠭᠠᠷᠴᠣ ᠪᠠᠶᠢᠭᠰᠠᠨ ᠃ ᠡᠳᠡᠭᠡᠷ ᠬᠡᠪᠯᠡᠯ ᠤᠨ ᠭᠠᠷᠳᠠᠮ ᠦᠭᠡᠢ ᠬᠠᠷᠠ ᠨᠣᠮ ᠭᠡᠭᠴᠢ ᠳ᠋ᠣ ᠰᠢᠯᠦᠭ ᠤᠨ ᠨᠣᠮ ᠵᠣᠩᠭᠢᠯᠠᠬᠣ ᠲᠣᠭᠠ ᠶ᠋ᠢ ᠡᠵᠡᠯᠡᠵᠦ ᠂ ᠢᠷᠠᠭᠣ ᠨᠠᠶᠢᠷᠠᠭ ᠲᠣ ᠲᠦᠩᠭᠡᠵᠢ ᠬᠦᠯ ᠣᠯᠠ ᠪᠡᠨ ᠲᠠᠯᠪᠢᠵᠣ ᠪᠠᠶᠢᠭᠠ ᠵᠠᠯᠠᠭᠣᠴᠣᠳ ᠬᠣᠪᠢ ᠶ᠋ᠢᠨ ᠰᠦᠢᠳᠬᠡᠯ ᠢᠶᠡᠷ ᠦᠪᠡᠷ ᠦᠪᠡᠷ ᠤᠨ ᠡᠷᠢᠯᠲᠡ ᠬᠠᠶᠢᠯᠲᠠ ᠬᠢᠭᠰᠡᠨ ᠰᠢᠯᠦᠭ ᠤᠳ ᠢᠶᠡᠨ ᠨᠣᠮ ᠪᠣᠯᠭᠠᠨ ᠲᠡᠭᠦᠪᠦᠷᠢᠯᠡᠨ ᠭᠠᠷᠭᠠᠭᠰᠠᠨ ᠪᠠᠶᠢᠳᠠᠭ ᠃ ᠬᠣᠪᠢ ᠬᠦᠮᠦᠰ ᠤᠨ ᠡᠷᠬᠢᠯᠡᠵᠦ ᠪᠣᠢ ᠣᠷᠠᠨ ᠵᠣᠬᠢᠶᠠᠯ ᠤᠨ ᠰᠡᠳᠬᠦᠯ ᠤᠳ ᠴᠣ ᠵᠠᠯᠠᠭᠣᠰ ᠲᠠᠭᠠᠨ ᠡᠷᠴᠢ ᠬᠦᠴᠦ ᠨᠡᠮᠡᠬᠦ ᠶ᠋ᠢᠨ ᠲᠣᠯᠠᠳᠠ ᠲᠡᠲᠡᠨ ᠤ ᠦᠪᠡᠷᠮᠢᠴᠡ ᠰᠢᠯᠦᠭ ᠵᠣᠬᠢᠶᠠᠯ ᠢ ᠲᠣᠰᠬᠠᠢ ᠬᠠᠭᠣᠳᠠᠰᠣ ᠭᠠᠷᠭᠠᠨ ᠨᠡᠶᠢᠲᠡᠯᠡᠵᠦ ᠪᠠᠶᠢᠭᠰᠠᠨ ᠨᠢ ᠣᠳᠣ ᠡᠷᠭᠢᠴᠡᠭᠦᠯᠬᠦ ᠳ᠋ᠣ ᠣᠷᠠᠨ ᠵᠣᠬᠢᠶᠠᠯ ᠤᠨ ᠨᠠᠭᠠᠰᠢ ᠲᠠᠢ ᠣᠷᠴᠢᠨ ᠪᠦᠷᠢᠯᠳᠦᠭᠡᠳ ᠪᠠᠶᠢᠭᠰᠠᠨ ᠪᠠᠶᠢᠵᠡᠢ ᠃ ᠲᠣᠲᠣᠷᠬᠠᠢ ᠨᠢᠭᠡᠨ ᠵᠢᠱᠢᠶᠡ ᠲᠣᠷᠠᠳᠪᠠᠯ ᠪᠦᠷᠢᠨᠳᠡᠯᠡᠬᠡᠢ ᠂ ᠣᠨᠠᠭᠠ ᠶ᠋ᠢᠨ ᠡᠷᠬᠢᠯᠡᠵᠦ ᠪᠠᠶᠢᠭᠰᠠᠨ ︽ ᠴᠢᠩᠬᠢᠰ ᠤᠨ ᠮᠣᠩᠭᠣᠯ ︾ ᠰᠡᠳᠬᠦᠯ ᠬᠡᠳᠦᠨ ᠬᠣᠭᠣᠴᠠᠭᠠ ᠬᠡᠪᠯᠡᠭᠳᠡᠵᠦ ᠂ ᠬᠡᠷᠡᠳᠡᠢ ᠬᠠᠰᠪᠠᠶᠠᠷ ᠤᠨ ︽ ᠣᠯᠢᠶᠠᠰᠣᠨ ᠣᠢ ᠶ᠋ᠢᠨ ᠨᠠᠮᠣᠷ ︾ ᠭ ᠊ ᠡᠩᠬᠡᠪᠠᠶᠠᠷ ᠤᠨ ︽ ᠬᠣᠷᠣᠭᠣ ︾ ᠣᠨᠠᠭᠠ ᠶ᠋ᠢᠨ ︽ ᠬᠠᠶᠢᠷᠠᠲᠣ ᠲᠠᠶᠢᠰᠣᠨ ᠮᠢᠨᠢ ︾ ᠵᠡᠷᠭᠡ ᠰᠢᠨᠡ ᠰᠣᠷᠭᠣᠭ ᠠᠮᠢᠰᠬᠣᠯ ᠡᠷᠴᠢᠮ ᠪᠦᠬᠦᠢ ᠰᠢᠯᠦᠭ ᠤᠳ ᠢ ᠰᠡᠳᠬᠦᠯ ᠲᠡᠭᠡᠷᠡ ᠪᠡᠨ ᠲᠣᠰᠬᠠᠢ ᠪᠣᠯᠣᠩ ᠭᠠᠷᠭᠠᠵᠣ ᠨᠡᠶᠢᠲᠡᠯᠡᠵᠦ ᠪᠠᠶᠢᠪᠠ ᠃ ︽ ᠴᠢᠩᠬᠢᠰ ᠤᠨ ᠮᠣᠩᠭᠣᠯ ︾ ᠰᠡᠳᠬᠦᠯ ᠨᠢ ᠲᠣᠬᠠᠢ ᠶ᠋ᠢᠨ ᠦᠶᠡ ᠳ᠋ᠣ ᠬᠠᠮᠣᠭ ᠤᠨ ᠪᠣᠷᠣᠯᠠᠭᠣᠯᠣᠯᠲᠠ ᠰᠠᠶᠢᠲᠡᠢ ᠰᠡᠳᠬᠦᠯ ᠪᠠᠶᠢᠯᠠ ᠃
ᠮᠦᠨ ᠡᠨᠡ ᠦᠶᠡ ᠳ᠋ᠣ ᠦᠪᠦᠷ ᠮᠣᠩᠭᠣᠯ ᠤᠨ ᠣᠣᠭᠠᠯ ᠰᠣᠶᠣᠯ ᠰᠣᠳᠣᠯᠣᠯ ᠤᠨ ᠵᠠᠭᠠᠯᠮᠠᠶᠢᠯᠠᠭᠰᠠᠨ ᠡᠴᠢᠭᠡ ᠸ ᠊ ᠰᠠᠶᠢᠨᠴᠣᠭᠲᠣ ᠭᠣᠸᠠᠢ ᠵᠠᠩ ᠦᠢᠯᠡ ᠂ ᠬᠡᠬᠡᠷᠡ ᠶ᠋ᠢᠨ ᠪᠠᠶᠢᠴᠠᠭᠠᠯᠲᠠ ᠪᠡᠷ ᠭᠣᠣᠯ ᠠᠭᠣᠯᠭᠠ ᠪᠣᠯᠭᠠᠭᠰᠠᠨ ᠦᠪᠦᠷ ᠮᠣᠩᠭᠣᠯ ᠤᠨ ᠠᠩᠬᠠᠳᠠᠭᠴᠢ ᠮᠦᠷᠳᠡᠭᠡᠨ ᠴᠣᠷᠢ ᠶ᠋ᠢᠨ ᠭᠠᠭᠴᠠ ᠬᠣᠪᠢ ᠬᠦᠮᠦᠨ ᠤ ᠡᠷᠬᠢᠯᠡᠭᠰᠡᠨ ᠡᠷᠳᠡᠮ ᠰᠢᠨᠵᠢᠯᠡᠭᠡᠨ ᠤ ᠰᠡᠳᠬᠦᠯ ᠪᠣᠯᠬᠣ ︽ ᠣᠣᠭᠠᠯ ᠰᠣᠶᠣᠯ ︾ ᠰᠡᠳᠬᠦᠯ ᠢᠶᠡᠨ ᠬᠡᠳᠦᠨ ᠬᠣᠭᠣᠴᠠᠭᠠ ᠬᠡᠪᠯᠡᠭᠦᠯᠦᠭᠰᠡᠨ ᠪᠡᠷ ᠪᠠᠷᠠᠬᠣ ᠦᠭᠡᠢ ᠂ ᠸ ᠊ ᠰᠠᠶᠢᠨᠴᠣᠭᠲᠣ ᠶ᠋ᠢᠨ ᠪᠢᠴᠢᠭᠰᠡᠨ ︽ ᠬᠠᠷᠠᠩᠭᠣᠢ ᠶ᠋ᠢᠨ ᠡᠵᠡᠨ ︾ ᠬᠡᠬᠦ ᠨᠡᠶᠢᠬᠡᠮ ᠤᠨ ᠰᠢᠭᠦᠮᠵᠢ ᠶ᠋ᠢᠨ ᠨᠣᠮ ᠬᠡᠪᠯᠡᠭᠳᠡᠵᠦ ᠂ ︽ ᠦᠪᠦᠷ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯ ᠤᠨ ᠣᠷᠴᠢᠨ ᠠᠬᠣᠢ ᠬᠢᠭᠡᠳ ᠲᠣᠯᠭᠠᠷᠠᠭᠰᠠᠨ ᠠᠰᠠᠭᠣᠳᠠᠯ ᠤᠳ ︾ ᠬᠡᠬᠦ ᠣᠳᠬᠠ ᠵᠣᠬᠢᠶᠠᠯ ᠤᠨ ᠰᠢᠭᠦᠮᠵᠢ ᠨᠢ ᠦᠷᠭᠡᠨ ᠣᠯᠠᠨ ᠣᠷᠠᠨ ᠵᠣᠬᠢᠶᠠᠯ ᠤᠨ ᠲᠣᠷᠠ ᠪᠠᠬᠠᠲᠠᠳ ᠲᠠᠢ ᠵᠣᠯᠭᠠᠬᠣ ᠠᠵᠠ ᠪᠣᠶᠠᠨ ᠢ ᠣᠯᠵᠣ ᠂ ᠦᠪᠦᠷ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯ ᠤᠨ ᠦᠵᠡᠭᠳᠡᠯ ᠢ ᠦᠭᠡᠷᠡ ᠨᠢᠭᠡᠨ ᠬᠠᠷᠠᠭᠠᠰᠣ ᠡᠴᠡ ᠰᠢᠨᠵᠢᠯᠡᠵᠦ ᠂ ᠬᠠᠶᠢᠯᠲᠠ ᠨᠠᠶᠢᠷᠠᠭ ᠤᠨ ᠲᠣᠬᠠᠢ ᠴᠣ ᠦᠪᠡᠷᠮᠢᠴᠡ ᠦᠵᠡᠯᠲᠡ ᠪᠡᠨ ᠲᠣᠷᠠᠳᠴᠣ ᠂ ᠬᠠᠶᠢᠯᠲᠠ ᠨᠠᠶᠢᠷᠠᠭ ᠤᠨ ᠦᠨᠡ ᠦᠷᠲᠡᠭ ᠢ ᠦᠨᠳᠦᠷ ᠢᠶᠠᠷ ᠦᠨᠡᠯᠡᠭᠰᠡᠨ ᠪᠠᠶᠢᠳᠠᠭ ᠃
ᠡᠶᠢᠮᠦᠷᠭᠦ ᠨᠣᠮ ᠬᠡᠪᠯᠡᠯ ᠤᠨ ᠴᠢᠯᠦᠭᠡᠲᠦ ᠣᠷᠴᠢᠨ ᠤ ᠨᠠᠭᠠᠰᠢ ᠲᠠᠢ ᠠᠬᠣᠢ ᠳ᠋ᠣ ᠭ ᠊ ᠡᠩᠬᠡᠪᠠᠶᠠᠷ ︽ ᠲᠠᠪᠭᠰᠠᠨ ᠡᠷᠬᠡ ᠴᠢᠯᠦᠭᠡ 1 ︾ ︽ ᠲᠠᠪᠠᠭᠰᠠᠨ ᠡᠷᠬᠡ ᠴᠢᠯᠦᠭᠡ 2 ︾ ︽ ᠲᠠᠪᠠᠭᠰᠠᠨ ᠡᠷᠬᠡ ᠴᠢᠯᠦᠭᠡ ᠬᠢᠭᠡᠳ ᠣᠨᠳᠣᠣ ᠠᠭᠠᠷ ︾ ︽ ᠣᠷᠢᠳᠠᠭᠰᠠᠨ ᠲᠦᠪ ︾ ︽ ᠬᠦᠳᠡᠯᠭᠡᠭᠡᠨ ᠤ ᠬᠦᠳᠡᠯᠭᠡᠭᠡᠨ ︾ ᠵᠡᠷᠭᠡ ᠲᠠᠪᠣᠨ ᠰᠢᠨᠡ ᠬᠠᠶᠢᠯᠲᠠ ᠨᠠᠶᠢᠷᠠᠭ ᠤᠨ ᠨᠣᠮ ᠢᠶᠡᠨ ᠬᠡᠪᠯᠡᠭᠦᠯᠵᠦ ᠂ ᠬᠡᠷᠡᠳᠡᠢ ᠬᠠᠰᠪᠠᠶᠠᠷ ︽ ᠣᠯᠵᠠᠯᠠᠭᠳᠠᠬᠣᠢ ᠲᠣᠭ ᠢᠯᠠᠭᠴᠢ ᠶ᠋ᠢᠨ ᠪᠠᠷᠠᠭᠣᠨ ᠮᠦᠷ ︾ ᠣᠨᠠᠭᠠ ︽ ᠴᠠᠭ ᠤᠨ ᠭᠠᠳᠠᠨᠠᠬᠢ ᠵᠢᠷᠮᠦᠰᠦᠯᠡᠯ ︾ ︽ ᠲᠡᠷᠰᠯᠡᠭᠦᠦ ᠣᠷᠪᠠᠭᠴᠢ ︾ ︽ ᠲᠣᠰᠠᠭᠠᠷ ᠲᠣᠭᠲᠠᠨᠢᠯ ᠤᠨ ᠡᠮᠦᠨᠡ ᠹᠷᠣᠨᠲ ︾ ᠬᠠᠷᠠ ᠰᠠᠷᠠᠨᠠᠢ ︽ ᠭᠠᠷ ᠲᠡᠷᠡ ︾ ᠰ᠊ ᠊ ᠵᠣᠷᠢᠭᠲᠣ ︽ ᠬᠠᠬᠢᠷ ᠬᠦᠢᠲᠡᠨ ᠡᠳᠦᠷ ᠬᠣᠨᠣᠭ ︾ ᠨᠣᠮᠣᠬᠠᠨᠳᠠᠯᠠᠢ ︽ ᠨᠢᠳᠦ ᠦᠭᠡᠢ ᠲᠣᠯᠣᠭᠠᠢ ︾ ᠪᠣᠲᠣᠭᠣᠨᠪᠣᠶᠢᠯᠠᠭᠠᠨ ︽ ᠲᠠᠶᠢᠯᠠᠨ ᠲᠠᠭᠠᠭᠣᠯᠣᠭᠴᠢ ︾ ᠨ ᠊ ᠪᠢᠷ ᠤᠨ ᠵᠠᠳᠠᠭᠠᠢ ᠰᠢᠯᠦᠭ ︽ ᠰᠠᠷᠠ ᠬᠦᠯᠢᠶᠡᠭᠰᠡᠨ ᠬᠠᠷᠠᠩᠭᠣᠢ ︾ ᠡ ᠊ ᠣᠷᠭᠢᠯ ᠤᠨ ᠰᠢᠨᠡ ᠭᠣᠷᠪᠠᠨ ᠮᠦᠷᠲᠦ ᠮᠣᠩᠭᠣᠯ ᠬᠠᠶᠢᠺᠦ ︽ ᠪᠦᠷᠳᠡ ᠰᠠᠷᠠ ︾ ᠪᠠᠷᠠᠭᠣᠨ ᠦᠵᠦᠮᠦᠴᠢᠨ ᠤ ᠮᠠᠯᠴᠢᠳ ᠢᠶᠡᠷ ᠭᠣᠣᠯ ᠭᠡᠰᠢᠭᠦᠨ ᠢᠶᠡᠨ ᠪᠣᠯᠭᠠᠭᠰᠠᠨ ︽ ᠬᠡᠬᠡᠷᠡ ᠶ᠋ᠢᠨ ᠪᠦᠯᠦᠭ ︾ ᠣᠷᠣᠰᠬᠠᠯ ᠤᠨ ᠬᠢᠨ ᠤ ᠮᠦᠩᠬᠡᠪᠢᠯᠢᠭ ᠤᠨ ︽ ᠣᠷᠣ ᠲᠠᠯᠠ ︾ ᠬᠡᠬᠦ ᠮᠡᠲᠦ ᠣᠯᠠᠨ ᠰᠢᠯᠦᠭ ᠤᠨ ᠨᠣᠮ ᠬᠠᠷᠠ ᠪᠡᠷ ᠬᠡᠪᠯᠡᠭᠳᠡᠵᠦ ᠂ ᠡᠭᠦᠨ ᠤ ᠲᠣᠲᠣᠷᠠ ᠬᠡᠷᠡᠳᠡᠢ ᠬᠠᠰᠪᠠᠶᠠᠷ ᠂ ᠰ ᠊ ᠵᠣᠷᠢᠭᠲᠣ ᠂ ᠭ ᠊ ᠡᠩᠭᠡᠪᠠᠶᠠᠷ ᠂ ᠬᠠᠷᠠ ᠰᠠᠷᠠᠨᠠᠢ ᠂ ᠣᠨᠠᠭᠠ ᠶ᠋ᠢᠨ ᠨᠣᠮ ᠤᠳ ᠲᠣᠲᠣᠷᠬᠠᠢ ᠬᠠᠶᠢᠯᠲᠠ ᠨᠠᠶᠢᠷᠠᠭ ᠤᠨ ᠨᠢᠭᠡᠨ ᠬᠢᠷᠢ ᠲᠦᠪᠰᠢᠨ ᠢ ᠬᠠᠷᠠᠭᠣᠯᠬᠣᠶᠢᠴᠠ ᠵᠢᠩ ᠲᠠᠢ ᠪᠦᠲᠦᠭᠡᠯ ᠤᠳ ᠪᠠᠶᠢᠪᠠ ᠃ ᠡᠳᠡᠭᠡᠷ ᠬᠠᠷᠠ ᠨᠣᠮ ᠤᠳ ᠦᠪᠦᠷ ᠮᠣᠩᠭᠣᠯ ᠤᠨ ᠰᠢᠯᠦᠭ ᠤᠨ ᠨᠢᠭᠡᠨ ᠴᠠᠭ ᠦᠶᠡ ᠶ᠋ᠢᠨ ᠬᠢᠷᠢ ᠲᠦᠪᠰᠢᠨ ᠢ ᠬᠠᠷᠠᠭᠣᠯᠵᠣ ᠲᠡᠶᠢᠯᠳᠡᠭ ᠴᠣ ᠦᠪᠦᠷ ᠮᠣᠩᠭᠣᠯ ᠴᠢᠨᠠᠭᠰᠢᠯᠠᠪᠠᠯ ᠠᠷᠣ ᠮᠣᠩᠭᠣᠯ ᠤᠨ ᠠᠯᠪᠠᠨ ᠤ ᠪᠢᠴᠢᠭᠳᠡᠳ ᠮᠠᠶᠢᠭ ᠤᠨ ᠰᠢᠯᠦᠭ ᠰᠣᠳᠣᠯᠣᠭᠴᠢᠳ ᠤᠨ ᠵᠠᠶᠢᠯᠠᠰᠬᠢᠵᠣ ᠲᠣᠷᠠᠳᠬᠣ ᠦᠭᠡᠢ ᠦᠩᠭᠡᠷᠡᠳᠡᠭ ᠨᠣᠮ ᠵᠣᠬᠢᠶᠠᠯ ᠪᠣᠯᠣᠭᠰᠠᠨ ᠪᠠᠶᠢᠳᠠᠭ ᠃ ᠡᠭᠦᠨ ᠡᠴᠡ ᠵᠦᠢᠴᠢᠯᠡᠬᠦ ᠳ᠋ᠣ ᠦᠨᠦᠳᠦᠷ ᠤᠨ ᠦᠪᠦᠷ ᠮᠣᠩᠭᠣᠯ ᠤᠨ ᠴᠠᠯᠢᠩᠵᠢᠭᠰᠠᠨ ᠣᠳᠬᠠ ᠵᠣᠬᠢᠶᠠᠯ ᠤᠨ ᠰᠣᠳᠣᠯᠣᠭᠠᠴᠢᠳ ᠤᠨ ᠰᠣᠳᠣᠯᠭᠠ ᠰᠢᠨᠵᠢᠯᠡᠭᠡ ᠭᠡᠳᠡᠭ ᠨᠢ ᠶᠠᠮᠠᠷ ᠰᠢᠣᠬᠠᠨ ᠡᠷᠡᠮᠳᠡᠭ ᠵᠡᠷᠡᠮᠳᠡᠭ ᠭᠡᠳᠡᠭ ᠢ ᠪᠢᠳᠠ ᠬᠡᠯᠡᠯᠲᠡ ᠦᠭᠡᠢ ᠣᠶᠢᠯᠠᠭᠠᠵᠣ ᠪᠣᠯᠬᠣ ᠶᠣᠮ ᠃
ᠭ ᠊ ᠡᠩᠬᠡᠪᠠᠶᠠᠷ ᠂ ᠣᠨᠠᠭᠠ ᠶ᠋ᠢᠨ ᠨᠣᠮ ᠤᠨ ᠬᠢᠨᠢ ᠭᠠᠷᠴᠠᠭ ᠡᠴᠡ ᠦᠵᠡᠬᠦ ᠳ᠋ᠣ ︽ ᠲᠠᠪᠠᠭᠰᠠᠨ ᠶᠢᠷᠲᠢᠨᠴᠣ ᠂ ᠣᠨᠳᠣᠣ ᠠᠭᠠᠷ ᠂ ᠣᠷᠢᠳᠠᠭᠰᠠᠨ ᠲᠦᠪ ᠂ ᠴᠠᠭ ᠤᠨ ᠭᠠᠳᠠᠨᠠᠬᠢ ᠵᠢᠷᠮᠦᠰᠦᠯᠡᠯ ᠂ ᠲᠡᠷᠰᠯᠡᠭᠦᠦ ᠣᠷᠪᠠᠭᠴᠢ ᠂ ᠲᠣᠰᠠᠭᠠᠷ ᠲᠣᠭᠲᠠᠨᠢᠯ ᠤᠨ ᠡᠮᠦᠨᠡ ᠹᠷᠦᠨᠲ ︾ ᠬᠡᠬᠦ ᠮᠡᠲᠦ ᠨᠡᠷᠡᠰ ᠨᠢ ᠦᠪᠡᠷ ᠢ ᠪᠡᠨ ᠦᠭᠡᠷᠡ ᠪᠣᠰᠣᠳ ᠲᠠᠢ ᠦᠯᠦ ᠲᠠᠪᠬᠣᠴᠠᠬᠣ ᠭᠡᠰᠡᠨ ᠰᠠᠨᠠᠭᠠ ᠵᠣᠷᠢᠯᠭᠠ ᠪᠡᠨ ᠰᠢᠭᠣᠳ ᠲᠣᠰᠢᠶᠠᠭᠰᠠᠨ ᠨᠢ ᠢᠯᠡᠷᠬᠡᠢ ᠪᠠᠶᠢᠨᠠ ᠃ ᠲᠡᠲᠡ ᠭᠠᠷᠴᠠᠭ ᠲᠡᠭᠡᠷᠡ ᠪᠡᠨ ᠪᠣᠰᠣᠳ ᠲᠠᠢ ᠦᠰᠦᠳ ᠦᠭᠡᠷᠡ ᠰᠢᠨᠡ ᠭᠡᠰᠡᠨ ᠢᠶᠡᠨ ᠬᠡᠯᠡᠭᠰᠡᠨ ᠢᠶᠡᠷ ᠪᠠᠷᠠᠬᠣ ᠦᠭᠡᠢ ᠂ ᠰᠢᠯᠦᠭ ᠤᠨ ᠨᠣᠮ ᠤᠨ ᠢᠶᠡᠨ ᠡᠮᠦᠨᠡ ᠬᠣᠶᠢᠨᠠᠬᠢ ᠬᠠᠭᠣᠳᠠᠰᠣᠨ ᠳ᠋ᠣ ᠰᠢᠭᠦᠮᠵᠢ ᠲᠠᠶᠢᠯᠣᠨ ᠬᠠᠳᠠᠵᠣ ᠰᠢᠨᠡ ᠰᠢᠯᠦᠭ ᠤᠨ ᠦᠵᠡᠯᠲᠡ ᠲᠠᠨᠢᠯᠲᠠ ᠪᠡᠨ ᠡᠷᠢᠶᠡ ᠦᠭᠡᠢ ᠪᠢᠴᠢᠭᠰᠡᠨ ᠪᠠᠶᠢᠳᠠᠭ ᠃ ᠲᠡᠲᠡᠨ ᠤ ᠰᠢᠯᠦᠭ ᠤᠨ ᠶᠢᠷᠲᠡᠨᠴᠦ ᠨᠢ ᠰᠢᠯᠦᠭᠴᠢ ᠶ᠋ᠢᠨ ᠣᠩᠭᠣᠳ ᠤᠨ ᠠᠵᠠ ᠬᠡᠶᠢᠮᠣᠷᠢ ᠪᠠ ᠬᠡᠯᠡᠨ ᠤ ᠵᠦᠩ ᠮᠡᠳᠡᠷᠡᠬᠦᠢ ᠶ᠋ᠢᠨ ᠬᠠᠷᠰᠢᠯᠳᠣᠯ ᠡᠴᠡ ᠪᠣᠯᠣᠭᠰᠠᠨ ᠦᠷᠡ ᠦᠭᠭᠦᠭᠡᠵᠢ ᠭᠡᠵᠦ ᠲᠠᠶᠢᠯᠪᠣᠷᠢᠯᠠᠵᠣ ᠂ ᠰᠢᠯᠦᠭ ᠢ ᠰᠢᠯᠦᠭ ᠲᠣ ᠨᠢ ᠪᠣᠴᠠᠭᠠᠬᠣ ᠶ᠋ᠢ ᠣᠷᠢᠶᠠᠯᠠᠵᠣ ᠪᠠᠶᠢᠯᠠ ᠃
ᠲᠡᠲᠡ ᠰᠢᠯᠦᠭ ᠢ ᠠᠯᠪᠠᠨ ᠤ ᠬᠡᠷᠡᠭᠯᠡᠭᠡ ᠪᠠ ᠢᠷᠭᠡᠨ ᠤ ᠬᠡᠷᠡᠭᠯᠡᠭᠡᠨ ᠤ ᠬᠡᠯᠡᠨ ᠤ ᠪᠣᠬᠢᠷᠳᠣᠯ ᠡᠴᠡ ᠠᠪᠣᠷᠠᠬᠣ ᠶ᠋ᠢ ᠣᠷᠢᠶᠠᠯᠠᠵᠣ ᠡᠾᠸᠳ᠋ᠭᠸᠷ ᠤᠨ ᠢᠯᠡᠷᠭᠦᠯᠦᠭᠰᠡᠨ ᠡᠩ ᠤᠨ ᠬᠦᠮᠦᠨ ᠪᠣᠯᠬᠣ ᠡᠴᠡ ᠰᠢᠯᠦᠭ ᠢ ᠰᠡᠷᠡᠮᠵᠢᠯᠡᠭᠦᠯᠦᠭᠰᠡᠨ ᠪᠠᠶᠢᠳᠠᠭ ᠃ ᠪᠣᠳᠠᠰ ᠤᠨ ᠣᠷᠣᠰᠢᠬᠣᠢ ᠪᠣᠯ ᠰᠢᠯᠦᠭ ᠤᠨ ᠣᠭ ᠴᠢᠨᠠᠷ ᠡᠴᠡ ᠲᠡᠷᠰᠯᠡᠭᠰᠡᠨ ᠪᠠᠶᠢᠳᠠᠭ ᠭᠡᠵᠦ ᠲᠡᠲᠡ ᠦᠵᠡᠳᠡᠭ ᠃ ᠭᠸᠷᠮᠡᠨ ᠤ ᠬᠦᠨ ᠣᠬᠭᠠᠨᠲᠠᠨ ᠪᠦᠭᠡᠳ ᠱᠠᠰᠢᠨ ᠤ ᠰᠣᠳᠣᠯᠭᠠᠲᠠᠨ ᠡᠾᠸᠳ᠋ᠭᠸᠷ ᠠᠷᠪᠠᠨ ᠶᠢᠰᠦᠳᠦᠭᠡᠷ ᠵᠠᠭᠣᠨ ᠤ ᠰᠡᠭᠦᠯᠴᠢ ᠡᠴᠡ ᠬᠣᠷᠢᠳᠣᠭᠠᠷ ᠵᠠᠭᠣᠨ ᠤ ᠲᠣᠮᠳᠠᠴᠢ ᠰᠡᠭᠦᠯᠴᠢ ᠪᠣᠯᠲᠠᠯᠠ ᠠᠮᠢᠳᠣᠷᠠᠵᠣ ᠂ ᠭᠸᠷᠮᠠᠨ ᠤ ᠡᠯᠡ ᠶᠡᠬᠡ ᠰᠣᠷᠭᠠᠭᠣᠯᠢ ᠨᠤᠭᠤᠳ ᠲᠣ ᠬᠦᠨ ᠣᠬᠭᠠᠨ ᠤ ᠬᠢᠴᠢᠶᠡᠯ ᠵᠢᠭᠠᠬᠣ ᠶ᠋ᠢᠨ ᠲᠠᠭᠠᠣ ︽ ᠣᠷᠣᠰᠢᠬᠣᠢ ᠬᠢᠭᠡᠳ ᠴᠠᠭ ︾ ᠭᠡᠰᠡᠨ ᠠᠯᠲᠠᠷᠲᠠᠢ ᠬᠦᠨ ᠣᠬᠠᠭᠠᠨ ᠤ ᠨᠣᠮ ᠲᠣᠭᠣᠷᠪᠢᠭᠰᠠᠨ ᠮᠦᠷᠳᠡᠭᠡᠨ ᠬᠦᠮᠦᠨ ᠤ ᠡᠳᠦᠷ ᠲᠣᠲᠣᠮ ᠤᠨ ᠠᠮᠢᠳᠣᠷᠠᠯ ᠲᠣᠮᠳᠠᠬᠢ ᠣᠷᠣᠭᠣᠳᠠᠯ ᠭᠡᠬᠦ ᠰᠢᠨᠡ ᠣᠨᠣᠯ ᠢ ᠲᠣᠷᠠᠳᠣᠨ ᠭᠠᠷᠭᠠᠭᠰᠠᠨ ᠪᠠᠶᠢᠳᠠᠭ ᠃
ᠡᠾᠸᠳ᠋ᠭᠸᠷ ᠦᠵᠡᠬᠦ ᠲᠡᠭᠡᠨ ᠬᠣᠪᠢ ᠬᠦᠮᠦᠨ ᠡᠳᠦᠷ ᠲᠣᠲᠣᠮ ᠤᠨ ᠠᠮᠢᠳᠣᠷᠠᠯ ᠤᠨ ᠲᠣᠮᠳᠠ ᠣᠷᠴᠢᠨ ᠲᠣᠭᠣᠷᠢᠨ ᠪᠠ ᠲᠣᠬᠠᠢ ᠶ᠋ᠢᠨ ᠨᠡᠶᠢᠬᠡᠮ ᠲᠠᠢ ᠪᠡᠨ ᠬᠠᠷᠢᠴᠠᠭᠠ ᠡᠭᠦᠰᠬᠡᠬᠦ ᠶᠠᠪᠣᠴᠠ ᠳ᠋ᠣ ᠦᠪᠡᠷ ᠤᠨ ᠦᠡᠨᠡ ᠲᠦᠷᠢ ᠪᠡᠨ ᠠᠯᠳᠠᠵᠣ ᠂ ᠣᠷᠴᠢᠨ ᠲᠣᠭᠣᠷᠢᠨ ᠪᠠ ᠲᠡᠭᠦᠨ ᠢ ᠬᠦᠷᠢᠶᠡᠯᠡᠵᠦ ᠪᠣᠢ ᠲᠣᠬᠠᠢ ᠶ᠋ᠢᠨ ᠨᠡᠶᠢᠬᠡᠮ ᠤᠨ ᠨᠢᠳᠦ ᠪᠡᠷ ᠦᠪᠡᠷ ᠢ ᠪᠡᠨ ᠦᠵᠡᠵᠦ ᠂ ᠦᠪᠡᠷ ᠢ ᠪᠡᠨ ᠪᠣᠰᠣᠳ ᠲᠠᠢ ᠠᠳᠠᠯᠢ ᠪᠠᠶᠢᠬᠣ ᠶ᠋ᠢ ᠱᠠᠭᠠᠷᠳᠠᠵᠣ ᠂ ᠪᠣᠰᠣᠳ ᠶᠠᠮᠠᠷᠪᠠ ᠨᠢᠭᠡᠨ ᠬᠦᠮᠦᠨ ᠢᠶᠠᠷ ᠣᠷᠣᠯᠠᠭᠣᠯᠵᠣ ᠪᠣᠯᠬᠣ ᠡᠩ ᠤᠨ ᠬᠦᠮᠦᠨ ᠪᠠᠶᠢᠬᠣ ᠶ᠋ᠢ ᠵᠣᠷᠢᠳᠠᠭ ᠃ ᠦᠭᠡᠷᠡ ᠪᠡᠷ ᠬᠡᠯᠡᠪᠡᠯ ︽ ᠬᠦᠮᠦᠰ ︾ ᠪᠣᠯᠵᠣ ᠣᠨᠳᠣᠣᠰᠢᠳᠠᠭ ᠃ ᠬᠣᠪᠢ ᠬᠦᠮᠦᠨ ︽ ᠬᠦᠮᠦᠰ ︾ ᠪᠣᠯᠵᠣ ᠣᠨᠳᠣᠣᠰᠢᠮᠠᠭᠴᠠ ᠪᠣᠰᠣᠳ ᠬᠦᠮᠦᠨ ᠳ᠋ᠣ ᠬᠦᠯᠢᠶᠠᠰᠦᠯᠡᠭᠳᠡᠭᠰᠡᠨ ᠂ ᠦᠪᠡᠷᠮᠢᠴᠡ ᠴᠢᠨᠠᠷ ᠂ ᠡᠷᠬᠡ ᠴᠢᠯᠦᠭᠡ ᠪᠡᠨ ᠠᠯᠳᠠᠭᠰᠠᠨ ᠂ ᠬᠣᠪᠢ ᠬᠦᠮᠦᠨ ᠤ ᠢᠲᠡᠭᠡᠯ ᠪᠢᠰᠢᠷᠡᠯ ᠦᠭᠡᠢ ᠂ ᠦᠢᠯᠡ ᠠᠵᠢᠯᠯᠠᠭᠠᠨ ᠤ ᠰᠣᠩᠭᠣᠯᠲᠠ ᠬᠢᠬᠦ ᠴᠢᠳᠠᠪᠣᠷᠢ ᠦᠭᠡᠢ ︽ ᠣᠯᠠᠨ ᠤ ᠰᠠᠨᠠᠯ ︾ ︽ ᠨᠡᠶᠢᠲᠡ ᠶ᠋ᠢᠨ ᠬᠡᠯᠡᠯᠴᠡᠭᠡᠨ ︾ ᠤ ᠪᠣᠭᠣᠯ ᠪᠣᠯᠵᠣ ᠲᠣᠷᠣᠢ ᠨᠣᠮᠣᠢ ᠡᠩ ᠤᠨ ᠢᠷᠭᠡᠳ ᠪᠣᠯᠵᠣ ᠣᠷᠣᠭᠣᠳᠠᠳᠠᠭ ᠪᠠᠶᠢᠨᠠ ᠭᠡᠵᠦ ᠦᠵᠡᠵᠡᠢ ᠃ ᠰᠢᠯᠦᠭ ᠴᠣ ᠠᠳᠠᠯᠢᠬᠠᠨ ᠂ ᠡᠾᠸᠳ᠋ᠭᠸᠷ ᠤᠨ ᠢᠯᠡᠷᠭᠦᠯᠦᠭᠰᠡᠨ ᠡᠩ ᠤᠨ ᠢᠷᠭᠡᠳ ᠰᠢᠭ ᠪᠣᠯᠪᠠᠯ ᠰᠢᠯᠦᠭ ᠮᠡᠨᠳᠦᠯᠡᠬᠦ ᠦᠶᠡ ᠶ᠋ᠢᠨ ᠠᠷᠢᠭᠣᠨ ᠲᠠᠷᠬᠠᠨ ᠦᠪᠡᠷᠮᠢᠴᠡ ᠴᠢᠨᠠᠷ ᠨᠢ ᠣᠰᠠᠳᠣᠭᠠᠳ ᠰᠣᠯᠠ ᠲᠣᠷᠣᠢ ᠡᠩ ᠤᠨ ᠬᠦᠮᠦᠨ ᠰᠢᠭ ᠰᠢᠯᠦᠭ ᠪᠣᠯᠣᠨᠠ ᠃ ᠰᠢᠯᠦᠭ ᠢ ᠡᠩ ᠤᠨ ︽ ᠬᠦᠮᠦᠰ ︾ ᠰᠢᠭ ᠰᠢᠯᠦᠭ ᠡᠴᠡ ᠠᠪᠣᠷᠠᠬᠣ ᠶ᠋ᠢᠨ ᠲᠦᠯᠦᠭᠡ ᠬᠠᠶᠢᠯᠲᠠ ᠬᠢᠭ᠍ᠴᠢᠳ ᠵᠣᠷᠢᠭᠲᠠᠢ ᠣᠮᠣᠭᠯᠠᠭᠣᠨ ᠢᠶᠠᠷ ᠬᠡᠷᠡᠭᠯᠡᠭᠡᠨ ᠤ ᠬᠡᠯᠡᠨ ᠤ ᠪᠠᠶᠢᠭᠣᠯᠣᠮᠵᠢ ᠪᠦᠬᠦᠢ ᠬᠡᠪᠰᠢᠮᠡᠯ ᠰᠢᠯᠦᠭ ᠤᠨ ᠬᠡᠯᠡ ᠣᠷᠣᠭᠣ ᠲᠠᠭᠠᠷᠢᠯᠲᠠ ᠬᠢᠭᠰᠡᠨ ᠪᠠᠶᠢᠨᠠ ᠃
ᠢᠷᠠᠭᠣ ᠨᠠᠶᠢᠷᠠᠭ ᠨᠢ ᠨᠢᠭᠡ ᠪᠡᠶᠡ ᠪᠡᠨ ᠲᠠᠭᠠᠭᠠᠭᠰᠠᠨ ᠶᠢᠷᠲᠡᠨᠴᠦ ᠪᠣᠯᠬᠣᠷ ᠠᠯᠢᠪᠠ ᠨᠢᠭᠣᠷᠯᠠᠵᠣ ᠪᠠᠶᠢᠭᠠ ᠂ ᠭᠠᠷ ᠲᠣ ᠪᠠᠷᠢᠭᠳᠠᠵᠣ ᠨᠢᠳᠦᠨ ᠳ᠋ᠣ ᠦᠵᠡᠭᠳᠡᠭᠦᠶᠢᠴᠡ ᠪᠣᠳᠠᠰ ᠤᠨ ᠶᠡᠷᠲᠡᠨᠴᠦ ᠶ᠋ᠢᠨ ᠬᠡᠮ ᠬᠡᠮᠨᠡᠯ ᠬᠡᠯᠪᠡᠷᠢ ᠲᠦᠷᠰᠦ ᠶ᠋ᠢ ᠲᠠᠶᠠᠭᠳᠠᠵᠣ ᠂ ᠰᠡᠳᠬᠢᠯᠭᠡᠨ ᠤ ᠪᠠ ᠰᠡᠷᠡᠯ ᠤᠨ ᠮᠡᠳᠡᠷᠡᠮᠵᠢ ᠶ᠋ᠢ ᠲᠡᠷᠡ ᠴᠢᠭ ᠢᠶᠠᠷ ᠨᠢ ᠠᠮᠢᠯᠠᠭᠣᠯᠬᠣ ᠳ᠋ᠥ ᠨᠢᠭᠡᠨᠲᠡ ᠵᠠᠩᠰᠢᠯ ᠪᠣᠯᠵᠣ ᠬᠡᠪᠰᠢᠭᠰᠡᠨ ᠣᠳᠬᠠ ᠰᠠᠨᠠᠭᠠ ᠡᠴᠡ ᠶᠡᠬᠡᠬᠡᠨ ᠭᠠᠵᠢᠯᠲᠠ ᠬᠢᠬᠦ ᠬᠡᠷᠡᠭᠲᠡᠢ ᠭᠡᠵᠦ ᠬᠠᠶᠢᠯᠲᠠ ᠬᠢᠭ᠍ᠴᠢᠳ ᠬᠡᠯᠡᠯᠴᠡᠭᠡ ᠦᠭᠡᠢ ᠪᠡᠷ ᠬᠡᠯᠡᠯᠴᠡᠭᠰᠡᠨ ᠶᠣᠮ ᠰᠢᠭ ᠰᠠᠨᠠᠯ ᠨᠢᠭᠡ ᠲᠡᠢ ᠬᠦᠳᠡᠯᠦᠯᠴᠡᠭᠰᠡᠨ ᠪᠠᠶᠢᠨᠠ ᠃ ᠲᠠᠭᠠᠦ ᠳ᠋ᠣ ᠨᠢ ᠲᠡᠲᠡ ᠪᠠᠰᠠ ᠢᠷᠠᠭᠣ ᠨᠠᠶᠢᠷᠠᠭ ᠤᠨ ᠣᠣᠭᠠᠯ ᠰᠢᠨᠵᠢ ᠴᠢᠨᠠᠷ ᠢ ᠪᠣᠴᠠᠭᠠᠵᠣ ᠠᠪᠴᠢᠷᠠᠬᠣ ᠭᠡᠵᠦ ᠪᠣᠳᠠᠰ ᠤᠨ ᠣᠶᠢᠯᠠᠭᠠᠭᠳᠠᠬᠣᠨ ᠳ᠋ᠠᠬᠢ ᠴᠠᠭ ᠣᠷᠣᠨ ᠵᠠᠢ ᠶ᠋ᠢᠨ ᠬᠦᠯᠢᠶᠡᠰᠦᠨ ᠡᠴᠡ ᠴᠢᠯᠦᠭᠡᠯᠡᠬᠦ ᠭᠡᠵᠦ ︽ ᠴᠠᠭ ᠤᠨ ᠭᠠᠳᠠᠨᠠᠬᠢ ᠵᠢᠷᠮᠦᠰᠦᠯᠡᠯ ︾ ᠭᠡᠵᠦ ᠲᠣᠩᠬᠠᠭᠯᠠᠴᠢᠬᠠᠵᠡᠢ ᠃ ᠡᠨᠡ ᠨᠢᠭᠡᠨ ᠭᠱᠠᠨ ᠤ ᠬᠠᠷᠠ ᠨᠣᠮ ᠪᠢᠴᠢᠭ ᠂ ᠰᠦᠯᠵᠢᠶᠡ ᠬᠣᠯᠪᠣᠭᠠᠨ ᠤ ᠰᠢᠯᠦᠭ ᠤᠳ ᠤᠨ ᠡᠷᠦᠢ ᠬᠣᠷᠣᠢ ᠦᠭᠡᠢ ᠭᠡᠮᠡᠷ ᠲᠣᠷᠰᠢᠯᠲᠠ ᠬᠠᠶᠢᠯᠲᠠ ᠨᠢ ᠲᠠᠷᠠᠭᠠᠴᠢ ᠶ᠋ᠢᠨ ᠨᠡᠯᠢᠶᠡᠳ ᠪᠣᠯᠪᠠᠰᠣᠷᠠᠩᠭᠣᠢ ᠰᠢᠯᠦᠭ ᠤᠨ ᠬᠠᠶᠢᠯᠲᠠ ᠳ᠋ᠣ ᠨᠢᠭᠡ ᠶᠣᠰᠣᠨ ᠤ ᠰᠡᠲᠦᠯᠲᠡ ᠂ ᠰᠣᠩᠭᠣᠯᠲᠠ ᠶ᠋ᠢ ᠵᠢᠭᠠᠵᠣ ᠦᠭᠭᠦᠭᠰᠡᠨ ᠨᠢ ᠶᠠᠷᠢᠶᠠᠨ ᠦᠭᠡᠢ ᠃ ᠲᠠᠷᠠᠭᠠ ᠪᠠᠷ ᠴᠠᠭ ᠵᠠᠪ ᠭᠠᠷᠪᠠᠯ ᠲᠣᠰ ᠰᠢᠭᠦᠮᠵᠢ ᠶ᠋ᠢ ᠨᠡᠯᠢᠶᠡᠳ ᠲᠡᠯᠭᠡᠷᠡᠩᠭᠦᠢ ᠪᠡᠷ ᠪᠣᠲᠠᠲᠣ ᠰᠢᠯᠦᠭ ᠤᠳ ᠢ ᠨᠢ ᠵᠢᠱᠢᠶᠡᠯᠡᠵᠦ ᠪᠠᠶᠢᠭᠠᠳ ᠶᠠᠷᠢᠪᠠᠯ ᠨᠡᠩ ᠣᠶᠢᠯᠠᠭᠠᠮᠵᠢᠲᠡᠢ ᠢᠲᠡᠭᠡᠭᠦᠰᠢᠲᠡᠢ ᠪᠣᠯᠣᠨᠠ ᠭᠡᠵᠦ ᠰᠠᠨᠠᠵᠣ ᠪᠠᠶᠢᠨᠠ ᠃ ᠡᠨᠡ ᠨᠢᠭᠡᠨ ᠭᠱᠠᠨ ᠤ ᠰᠢᠯᠦᠭ ᠤᠳ ᠢ ᠡᠷᠲᠡᠮᠲᠡᠨ ᠸ ᠊ ᠰᠠᠶᠢᠨᠴᠣᠭᠲᠣ ᠶ᠋ᠢᠨ ᠣᠨᠠᠭᠠ ᠶ᠋ᠢᠨ ︽ ᠲᠣᠰᠠᠭᠠᠷ ᠲᠣᠭᠲᠠᠨᠢᠯ ᠤᠨ ᠡᠮᠦᠨᠡ ᠹᠷᠦᠨᠲ ︾ ᠭᠡᠬᠦ ᠰᠢᠯᠦᠭ ᠤᠨ ᠲᠡᠭᠦᠪᠦᠷᠢ ᠳ᠋ᠣ ᠪᠢᠴᠢᠭᠰᠡᠨ ᠣᠷᠣᠰᠢᠯ ᠢᠶᠡᠷ ᠬᠣᠷᠢᠶᠠᠩᠭᠣᠶᠢᠯᠠᠪᠠᠰᠣ ᠄ ︽ ᠣᠨᠠᠭᠠ ᠶ᠋ᠢᠨ ᠰᠢᠯᠦᠭ ᠤᠳ ᠪᠣᠯ ᠠᠮᠢ ᠨᠠᠰᠣᠨ ᠤ ᠡᠰᠡᠷᠭᠦᠴᠡᠯ ᠤᠨ ᠣᠳᠬᠠ ᠠᠭᠣᠯᠭᠠ ᠶ᠋ᠢ ᠬᠠᠮᠣᠭ ᠡᠴᠡ ᠰᠠᠶᠢᠨ ᠢᠯᠡᠷᠬᠡᠶᠢᠯᠡᠭᠰᠡᠨ ᠰᠢᠯᠦᠭ ᠶᠣᠮ ᠭᠡᠵᠦ ᠪᠢ ᠪᠣᠳᠣᠵᠣ ᠪᠠᠶᠢᠨᠠ ᠃ ︽ ᠭᠠᠯ ᠦᠬᠦᠴᠢᠭᠡᠯ ︾ ︽ ᠦᠩᠭᠡᠲᠦ ᠪᠣᠳᠣᠭ ᠠᠯᠠᠭᠠ ︾ ︽ ᠦᠲᠦ ᠠᠶᠢᠰᠣᠢ ︾ ᠭᠡᠬᠦ ᠮᠡᠲᠦ ᠰᠢᠯᠦᠭ ᠤᠳ ᠨᠢ ᠦᠪᠦᠷ ᠮᠣᠩᠭᠣᠯ ᠳ᠋ᠣ ᠣᠯᠠᠨ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠭᠦᠨ ᠣᠬᠠᠭᠠᠨ ᠤ ᠰᠣᠩᠭᠣᠳᠠᠭ ᠪᠠᠳᠠᠭ ᠶᠣᠮ ᠪᠠᠶᠢᠨᠠ ᠃ ᠰᠠᠶᠢᠴᠣᠩᠭᠠ ᠡᠴᠡ ᠨᠠᠰᠢ ᠣᠯᠠᠮᠵᠢᠯᠠᠯ ᠲᠠᠰᠣᠷᠠᠭᠠᠳ ᠣᠳᠠᠭᠰᠠᠨ ᠦᠪᠦᠷ ᠮᠣᠩᠭᠣᠯ ᠤᠨ ᠮᠢᠨᠢ ᠢᠷᠠᠭᠣ ᠨᠠᠶᠢᠷᠠᠭ ᠢᠩᠬᠢᠵᠦ ᠦᠷᠭᠦᠯᠵᠢᠯᠡᠵᠦ ᠪᠠᠶᠢᠨᠠ ᠃ ᠡᠨᠡ ᠪᠣᠯ ᠴᠣᠬᠣᠮ ᠣᠳᠬᠠ ᠲᠡᠭᠡᠷᠡᠬᠢ ︽ ᠪᠢᠳᠠᠨ ᠤ ︾ ᠰᠣᠶᠣᠯ ᠪᠢᠯᠡ ᠃ ᠦᠪᠦᠷ ᠮᠣᠩᠭᠣᠯ ᠤᠨ ᠭᠣᠣᠯᠯᠠᠭᠴᠢ ᠣᠷᠣᠰᠬᠠᠯ ᠤᠨ ᠢᠷᠠᠭᠣ ᠨᠠᠶᠢᠷᠠᠭᠴᠢᠳ ᠬᠡᠮᠡᠭᠳᠡᠭᠴᠢᠳ ᠮᠠᠨᠠᠢ ᠪᠦᠭᠦᠳᠡ ᠯᠠ ᠂ ᠵᠡᠭᠦᠨ ᠭᠠᠷ ᠲᠠᠭᠠᠨ ᠮᠣᠩᠭᠣᠯ ᠰᠣᠶᠣᠯ ᠤᠨ ᠪᠠᠮᠪᠠᠢ ᠶ᠋ᠢ ᠪᠠᠷᠢᠵᠣ ᠪᠠᠷᠠᠭᠣᠨ ᠭᠠᠷ ᠢᠶᠠᠷ ᠵᠠᠰᠠᠭ ᠲᠦᠷᠦ ᠶ᠋ᠢᠨ ᠰᠡᠯᠡᠮᠡ ᠶ᠋ᠢ ᠲᠠᠯᠠᠶᠢᠭᠰᠠᠨ ᠬᠦᠮᠦᠰ ᠭᠡᠳᠡᠭ ᠢ ᠡᠳᠦᠭᠡ ᠶ᠋ᠢᠨ ᠣᠩᠰᠢᠭᠴᠢᠳ ᠶᠠᠭᠣ ᠠᠨᠳᠠᠬᠣ ᠪᠢᠯᠡ ᠃ ᠴᠢᠩᠬᠢᠪᠡᠴᠦ ᠦᠪᠦᠷ ᠮᠣᠩᠭᠣᠯ ᠤᠨ ᠢᠷᠠᠭᠣ ᠨᠠᠶᠢᠷᠠᠭ ᠂ ᠬᠠᠷᠠᠩᠭᠣᠢ ᠶ᠋ᠢᠨ ᠲᠣᠮᠳᠠ ᠠᠯᠪᠢᠨ ᠭᠠᠯ ᠮᠡᠲᠦ ᠰᠦᠮᠡᠯᠵᠡᠵᠦ ᠦᠯᠡᠳᠡᠵᠡᠢ ᠃ ᠦᠪᠦᠷ ᠮᠣᠩᠭᠣᠯ ᠤᠨ ᠭᠡᠭᠳᠡᠬᠦ ᠢᠷᠠᠭᠣ ᠨᠠᠶᠢᠷᠠᠭ ᠢ ᠠᠯᠪᠠᠨ ᠤ ᠪᠣᠰᠣ ᠰᠢᠯᠦᠭᠴᠢᠳ ᠯᠠ ᠪᠦᠲᠦᠭᠡᠵᠦ ᠶᠠᠪᠣᠭᠠ ᠶᠣᠮ ᠭᠡᠳᠡᠭ ᠢ ᠪᠢᠳᠠ ᠨᠢᠭᠣᠯᠲᠠ ᠦᠭᠡᠢ ᠬᠡᠯᠡᠬᠦ ᠯᠠ ᠬᠡᠷᠡᠭᠲᠡᠢ ᠪᠣᠯᠵᠡᠢ ᠃ ︾
ᠣᠯᠠᠭᠠᠨᠴᠠᠪ ᠬᠣᠲᠠ ᠶ᠋ᠢᠨ ᠲᠦᠷᠪᠡᠳ ᠬᠣᠰᠢᠭᠣᠨ ᠤ ᠬᠠᠪᠴᠢᠯ ᠤᠨ ᠰᠦᠮᠡ
ᠣᠲᠠᠰᠣ13474813411
3 0