ᠲᠤᠭᠤᠵᠢ
ᠲᠦᠮᠡᠨᠪᠠᠶᠠᠷ ᠤᠨ ᠪᠤᠮᠠᠨ᠊ᠡᠷᠳᠡᠨᠢ : ᠬᠡᠷᠢᠶᠡᠨ ᠦ ᠨᠢᠳᠦᠨ ᠳᠦ ᠬᠡᠨ ᠨᠢᠭᠡᠨ ᠪᠤᠢ (ᠥᠭᠦᠯᠡᠯᠭᠡ)
ᠲᠦᠮᠡᠨᠪᠠᠶᠠᠷ ᠤᠨ ᠪᠤᠮᠠᠨ᠊ᠡᠷᠳᠡᠨᠢ : ᠬᠡᠷᠢᠶᠡᠨ ᠦ ᠨᠢᠳᠦᠨ ᠳᠦ ᠬᠡᠨ ᠨᠢᠭᠡᠨ ᠪᠤᠢ
(ᠥᠭᠦᠯᠡᠯᠭᠡ)
4878
2018-10-24 09:37
发表于:内蒙古
ᠲᠦᠮᠡᠨᠪᠠᠶᠠᠷ ᠤᠨ ᠪᠤᠮᠠᠨ᠊ᠡᠷᠳᠡᠨᠢ : ᠬᠡᠷᠢᠶᠡᠨ ᠦ ᠨᠢᠳᠦᠨ ᠳᠦ ᠬᠡᠨ ᠨᠢᠭᠡᠨ ᠪᠤᠢ
(ᠥᠭᠦᠯᠡᠯᠭᠡ)
ᠵᠡᠭᠦᠳᠦ ᠵᠥᠩ ᠦᠨ ᠣᠷᠴᠢᠯᠠᠩ ᠬᠦᠮᠦᠨ ᠢ ᠶᠠᠮᠠᠷ ᠵᠦᠭᠡᠷ ᠪᠠᠶᠢᠯᠭᠠᠬᠤ ᠪᠢᠰᠢ ᠳ᠋ᠡ᠃ ᠳᠣᠣᠷᠠ ᠠᠴᠠ ᠪᠠᠨ᠂ ᠳᠡᠭᠡᠭᠰᠢ ᠪᠡᠨ ᠠᠨᠢᠪᠴᠢᠬᠤ ᠬᠡᠷᠢᠶᠡᠨ ᠦ ᠲᠠᠰ ᠬᠠᠷᠠ ᠨᠢᠳᠦ ᠨᠠᠮᠠ ᠶᠢ ᠲᠠᠭ ᠰᠢᠷᠲᠡᠵᠦ ᠪᠠᠶᠢᠨᠠ ᠭᠡᠵᠦ ᠵᠡᠭᠦᠳᠦᠯᠡᠪᠡ᠃ ᠵᠢᠷᠦᠬᠡᠨ ᠳᠡᠭᠡᠷᠡ ᠮᠢᠨᠢ ᠰᠠᠭᠤᠴᠢᠬᠠᠭᠠᠳ ᠢᠷᠸᠠ ᠵᠥᠩ ᠲᠠᠭᠤᠳᠠᠬᠤ ᠰᠢᠭ ᠰᠡᠳᠬᠢᠯ ᠳᠦ ᠨᠢᠭᠡ ᠯᠠ ᠵᠢᠪᠡᠭᠦᠨ᠃ ᠪᠠᠭᠠ ᠳᠤ ᠪᠠᠨ ᠪᠢ ᠬᠡᠷᠢᠶᠡ ᠶᠢ ᠦᠵᠡᠳᠡᠭ ᠦᠭᠡᠢ ᠪᠠᠶᠢᠯᠠ᠃ ᠶᠠᠭᠠᠬᠢᠭᠠᠳ ᠭᠡᠳᠡᠭ ᠢᠶᠡᠨ ᠪᠠᠰᠠ ᠮᠡᠳᠡᠬᠦ ᠦᠭᠡᠢ᠃ ᠮᠠᠭᠤ ᠢᠷᠸᠠ ᠢᠷᠤᠯᠠᠳᠠᠭ ᠭᠡᠰᠡᠨ ᠮᠤᠬᠤᠷ ᠰᠣᠬᠣᠷ ᠦᠭᠡ ᠰᠣᠨᠣᠰᠤᠭᠰᠠᠨ ᠪᠣᠯᠬᠤ ᠪᠠᠷ ᠲᠡᠷᠡ ᠦᠦ ᠭᠤᠸᠠᠭᠯᠠᠬᠤ ᠳᠠᠭᠤᠨ ᠳᠤ ᠨᠢ ᠵᠢᠪᠡᠭᠦᠴᠡᠵᠦ᠂ ᠬᠠᠷᠠᠭᠰᠠᠨ ᠳᠠᠷᠤᠢ ᠳᠤ ᠪᠠᠨ ᠯᠠ ᠴᠢᠯᠠᠭᠤ ᠨᠡᠭᠦᠯᠭᠡᠨᠡ᠃ ᠬᠡᠵᠢᠶᠡ᠂ ᠬᠠᠮᠢᠭᠠ ᠠᠴᠠ ᠨᠠᠳᠠ ᠳᠤ ᠢᠷᠡᠵᠦ ᠬᠣᠨᠣᠭᠰᠢᠭᠰᠠᠨ ᠢ ᠮᠡᠳᠡᠬᠦ ᠦᠭᠡᠢ ᠲᠡᠶᠢᠮᠦ ᠨᠢᠭᠡ ᠥᠰᠢᠶᠡ ᠬᠣᠨᠵᠢᠩ ᠢ ᠲᠡᠭᠦᠨ ᠡᠴᠡ ᠠᠪᠬᠤ ᠭᠡᠵᠦ ᠬᠢᠴᠢᠶᠡᠳᠡᠭ ᠰᠡᠨ᠃ 《ᠪᠠᠶᠢᠭ ᠡ ᠮᠢᠨᠦ ᠬᠦᠦ᠂ ᠬᠡᠷᠢᠶᠡ ᠴᠢᠨᠢ ᠶᠡᠬᠡ ᠤᠬᠠᠭᠠᠨ ᠲᠠᠢ ᠰᠢᠪᠠᠭᠤ ᠰᠢᠦ ᠳ᠋ᠡ》 ᠭᠡᠬᠦ ᠡᠪᠦᠭᠡ ᠶᠢᠨ ᠢᠶᠡᠨ ᠦᠭᠡ ᠶᠢ ᠴᠤ ᠦᠯᠦ ᠰᠣᠨᠣᠰᠤᠨᠠ᠃ ᠡᠪᠦᠭᠡ ᠮᠢᠨᠢ ᠬᠡᠷᠢᠶᠡ ᠶᠢ ᠥᠮᠥᠭᠡᠷᠡᠵᠥ ᠶᠡᠬᠡ ᠶᠠᠭᠤᠮᠠ ᠬᠡᠯᠡᠨᠡ᠃ ᠣᠳᠣ ᠵᠠᠷᠢᠮ ᠢ ᠨᠢ ᠮᠠᠷᠲᠠᠵᠤ ᠣᠷᠬᠢᠵᠠᠢ᠃
ᠭᠡᠲᠡᠯᠡ ᠡᠨᠡ ᠰᠥᠨᠢ ᠥᠰᠲᠦ ᠬᠦᠮᠦᠨ ᠥᠯᠢ ᠶᠢᠨ ᠳᠠᠪᠠᠭᠠᠨ ᠳᠤ ᠭᠡᠭᠴᠢ ᠪᠡᠷ ᠴᠡᠭᠡᠵᠢᠨ ᠳᠡᠭᠡᠷᠡ ᠮᠢᠨᠢ ᠥᠨᠥ ᠬᠡᠷᠢᠶᠡ ᠰᠠᠭᠤᠴᠢᠬᠠᠭᠠᠳ ᠶᠠᠭ ᠯᠠ ᠨᠢᠳᠦ ᠶᠢ ᠮᠢᠨᠢ ᠤᠬᠤᠬᠤ ᠭᠡᠰᠡᠨ ᠰᠢᠭ ᠲᠠᠭ ᠰᠢᠷᠲᠡᠵᠦ ᠪᠠᠶᠢᠭᠰᠠᠨ ᠢᠶᠠᠨ ᠤᠬᠤᠰᠬᠢᠨ ᠭᠣᠳᠣᠭᠣᠷ ᠬᠡᠯᠡ ᠲᠡᠢ ᠲᠠᠬᠢᠷ ᠬᠣᠰᠢᠭᠤ ᠪᠠᠷ ᠢᠶᠠᠨ ᠨᠠᠮᠠ ᠶᠢ ᠵᠠᠭᠤᠭᠠᠳ᠂ ᠥᠨᠳᠥᠷ ᠠᠪᠤᠨ ᠨᠢᠰᠦᠯᠡ᠃ ᠠᠮᠢᠰᠬᠤᠯᠠᠬᠤ ᠭᠡᠬᠦ ᠪᠡᠷ ᠠᠮᠢᠰᠬᠤᠯᠠᠵᠤ ᠪᠣᠯᠳᠠᠭ ᠦᠭᠡᠢ᠂ ᠠᠮᠢ ᠲᠠᠯᠪᠢᠴᠢᠬᠠᠬᠤ ᠭᠡᠬᠦ ᠪᠡᠷ ᠠᠷᠠᠢ ᠪᠠᠰᠠ ᠴᠢᠳᠠᠳᠠᠭ ᠦᠭᠡᠢ᠃ ᠦᠬᠦᠭᠰᠡᠨ᠂ ᠠᠮᠢᠳᠤ ᠶᠢᠨ ᠵᠠᠪᠰᠠᠷ ᠲᠤ ᠦᠢᠯᠡ ᠪᠠᠨ ᠪᠠᠷᠠᠵᠠᠢ ᠶᠠᠪᠤᠲᠠᠯᠠ ᠰᠦᠮᠡᠯᠵᠡᠬᠦ ᠵᠡᠷᠭᠡᠯᠭᠡᠨ ᠳᠤᠮᠳᠠ ᠣᠯᠠᠨ ᠴᠤᠪᠤᠭᠠ ᠶᠠᠪᠤᠬᠤ ᠶᠢ ᠬᠠᠷᠠᠪᠠ᠃
ᠡᠪᠡᠰᠦᠨ ᠲᠣᠯᠣᠭᠠᠢ ᠪᠥᠬᠥᠯᠵᠡᠵᠦ᠂ ᠡᠪᠦᠭᠡᠨ ᠲᠣᠯᠣᠭᠠᠳ ᠪᠦᠷᠲᠡᠯᠵᠡᠭᠰᠡᠨ ᠠᠭᠤᠳᠠᠮ ᠶᠡᠬᠡ ᠬᠥᠨᠳᠡᠢ ᠳᠦ ᠡᠬᠢᠯᠡᠯ ᠲᠡᠭᠦᠰᠬᠡᠯ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠨᠠᠶᠢᠮᠠᠨ ᠴᠤᠪᠤᠭᠠ ᠨᠢᠭᠡ ᠬᠠᠷᠠᠬᠤ ᠳᠤ ᠠᠭᠤᠯᠠᠰ ᠲᠡᠰᠢ᠂ ᠨᠥᠭᠥᠭᠡ ᠬᠠᠷᠠᠬᠤ ᠳᠤ ᠡᠭᠦᠯᠡᠰ ᠲᠡᠰᠢ ᠬᠥᠪᠥᠷᠡᠭᠰᠡᠭᠡᠷ ᠨᠠᠶᠢᠮᠠᠨ ᠵᠦᠭ ᠲᠦ ᠨᠠᠷᠠᠨ ᠯᠤᠭᠠ ᠰᠠᠴᠤᠷᠠᠵᠤ ᠣᠳᠬᠤ ᠠᠵᠡᠢ᠃ ᠵᠢᠩ ᠭᠡᠬᠦ ᠪᠡᠷ ᠵᠢᠩ ᠪᠢᠰᠢ᠂ ᠴᠡᠷᠢᠭ ᠦᠨ ᠭᠡᠬᠦ ᠪᠡᠷ ᠴᠡᠷᠢᠭ ᠦᠨ ᠪᠢᠰᠢ᠂ ᠨᠡᠭᠦᠳᠡᠯ ᠪᠣᠯ ᠪᠦᠷ ᠪᠢᠰᠢ ᠡᠨᠡ ᠴᠤᠪᠤᠭᠠ ᠶᠢ ᠰᠠᠶᠢᠨ ᠠᠵᠢᠪᠠᠯ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠨᠢᠭᠡᠨ ᠶᠡᠬᠡ ᠬᠥᠮᠥᠨ ᠢ ᠨᠤᠲᠤᠭᠯᠠᠭᠤᠯᠬᠤ ᠪᠠᠷ ᠠᠪᠴᠤ ᠶᠠᠪᠤᠭᠠ ᠭᠠᠰᠢᠭᠤᠳᠠᠯ ᠤᠨ ᠴᠤᠪᠤᠭᠠ ᠪᠠᠶᠢᠯᠠ᠃ ᠶᠠᠭᠤ ᠪᠣᠯᠤᠭᠠᠳ ᠪᠠᠶᠢᠭᠠ ᠶᠢ ᠤᠬᠠᠭᠠᠷᠠᠬᠤ ᠨᠢ ᠪᠠᠶᠢᠲᠤᠭᠠᠢ ᠤᠨᠲᠠᠭᠠ ᠰᠡᠷᠡᠭᠦᠨ ᠦ ᠵᠠᠪᠰᠠᠷ ᠲᠠᠷᠴᠢᠯᠠᠭᠰᠠᠨ ᠨᠠᠮᠠ ᠶᠢ ᠭᠠᠵᠠᠷ ᠲᠩᠷᠢ ᠶᠢᠨ ᠰᠠᠪᠰᠠᠯᠭᠠ ᠪᠠᠷ ᠨᠢᠰᠬᠡᠭᠰᠡᠭᠡᠷ ᠯᠠ ᠪᠠᠶᠢᠬᠤ ᠶᠤᠮ᠃ ᠣᠢ ᠲᠣᠶᠢᠨ ᠳᠤ ᠮᠢᠨᠢ ᠦᠯᠢᠭᠡᠷ ᠲᠤᠤᠯᠢᠰ᠂ ᠦᠨᠡᠨ ᠬᠤᠳᠠᠯ ᠤᠨ ᠠᠯᠢᠨ ᠪᠣᠯᠬᠤ ᠨᠢ ᠢᠯᠭᠠᠮᠠ ᠦᠭᠡᠢ ᠣᠯᠠᠨ᠂ ᠣᠯᠠᠨ ᠦᠵᠡᠭᠳᠡᠯ ᠦᠳ ᠵᠢᠷᠢᠯᠵᠡᠨ ᠥᠩᠭᠡᠷᠡᠨᠡ᠃
ᠲᠩᠷᠢ ᠡᠴᠢᠭᠡ᠂ ᠭᠠᠵᠠᠷ ᠡᠬᠡ ᠶᠢᠨ ᠳᠤᠮᠳᠠ ᠠᠴᠠ ᠲᠦᠷᠦᠭᠰᠡᠨ᠂ ᠬᠠᠭᠠᠨ ᠬᠥᠪᠡᠭᠦᠨ ᠪᠡᠶᠡ ᠪᠠᠷᠠᠪᠠ᠃ ᠭᠠᠵᠠᠷ ᠡᠬᠡ ᠠᠭᠤᠯᠠ ᠬᠠᠩᠭᠠᠢ ᠪᠠᠨ ᠳᠣᠩᠰᠣᠯᠭᠠᠵᠤ ᠤᠬᠢᠯᠠᠪᠠ᠂ ᠤᠰᠤ ᠳᠠᠯᠠᠢ ᠪᠠᠨ ᠴᠠᠯᠭᠢᠭᠠᠵᠤ ᠡᠨᠡᠯᠪᠡ᠃ ᠲᠩᠷᠢ ᠡᠴᠢᠭᠡ ᠣᠳᠣᠳ ᠡᠷᠬᠡᠰ ᠢᠶᠡᠨ ᠤᠨᠠᠭᠠᠵᠤ ᠭᠠᠰᠠᠯᠪᠠ᠂ ᠥᠪᠡᠷ ᠦᠨ ᠪᠡᠶᠡ ᠪᠡᠨ ᠴᠤᠭᠤᠯᠵᠤ ᠡᠮᠭᠡᠨᠢᠪᠡ᠃ ᠭᠤᠷᠪᠠᠨ ᠭᠤᠷᠪᠠ ᠶᠢᠨ ᠶᠢᠰᠦᠨ ᠬᠣᠨᠣᠭ ᠠᠶᠤᠩᠭᠠ ᠴᠠᠬᠢᠯᠭᠠᠨ ᠨᠢᠵᠢᠭᠢᠨᠡᠵᠦ᠂ ᠠᠭᠠᠳᠠᠷ ᠪᠣᠷᠣᠭᠠ ᠠᠰᠬᠠᠷᠠᠪᠠᠴᠤ ᠭᠠᠵᠠᠷ ᠳᠡᠯᠡᠬᠡᠢ ᠴᠠᠭ ᠠᠴᠠ ᠪᠠᠨ ᠡᠮᠦᠨᠡ ᠭᠠᠩᠳᠠᠪᠠ᠃ ᠲᠣᠯᠣᠭᠠᠶᠢᠲᠠᠨ ᠢ ᠪᠥᠬᠥᠶᠢᠯᠭᠡᠵᠦ᠂ ᠲᠣᠶᠢᠭᠲᠠᠨ ᠢ ᠰᠥᠬᠦᠷᠡᠭᠦᠯᠵᠦ ᠶᠠᠪᠤᠭᠰᠠᠨ ᠬᠠᠭᠠᠨ ᠬᠦᠦ ᠶᠢᠨ ᠢᠶᠡᠨ ᠠᠷᠤ ᠠᠴᠠ ᠲᠩᠷᠢ ᠡᠴᠢᠭᠡ᠂ ᠭᠠᠵᠠᠷ ᠡᠬᠡ ᠡᠶᠢᠨ ᠭᠠᠰᠢᠭᠤᠳᠠᠵᠠᠢ᠃
- ᠲᠩᠷᠢ ᠶᠢᠨ ᠬᠥᠪᠡᠭᠦᠨ ᠲᠩᠷᠢ ᠳᠦ ᠪᠡᠨ ᠵᠠᠯᠠᠷᠠᠬᠤ ᠤᠴᠢᠷᠲᠠᠢ᠃ ᠲᠡᠶᠢᠮᠦ ᠡᠴᠡ ᠬᠦᠦ ᠮᠢᠨᠢ ᠡᠴᠢᠭᠡ ᠳᠦ ᠪᠡᠨ ᠢᠷᠡ ᠭᠡᠵᠦ ᠲᠩᠷᠢ ᠡᠴᠢᠭᠡ ᠬᠠᠭᠠᠨ ᠬᠦᠦ ᠶᠢᠨ ᠬᠢ ᠪᠡᠨ ᠠᠮᠢᠨ ᠪᠡᠶᠡ ᠶᠢ ᠳᠡᠷᠭᠡᠳᠡ ᠪᠡᠨ ᠵᠠᠯᠠᠬᠤ ᠪᠠᠷ ᠵᠠᠷᠯᠢᠭᠳᠠᠪᠠ᠃ ᠭᠡᠲᠡᠯᠡ ᠭᠠᠵᠠᠷ ᠡᠬᠡ
- ᠠᠢ᠂ ᠬᠥᠬᠡ ᠲᠩᠷᠢ ᠮᠢᠨᠢ ᠪᠣᠯᠭᠣᠭᠠ᠃ ᠲᠠ ᠦᠭᠡᠢ ᠪᠣᠯ ᠪᠢ ᠬᠡᠷᠬᠢᠨ ᠣᠷᠣ ᠦᠭᠡᠢ ᠬᠣᠭᠣᠰᠣᠨ ᠳᠤ ᠪᠤᠢ ᠪᠣᠯᠬᠤ᠂ ᠨᠠᠳᠠ ᠦᠭᠡᠢ ᠪᠣᠯ ᠲᠠᠨ ᠤ ᠬᠣᠭᠣᠰᠣᠨ ᠣᠷᠣᠨ ᠵᠠᠢ ᠶᠢ ᠬᠡᠷᠬᠢᠨ ᠲᠩᠷᠢ ᠬᠡᠮᠡᠨ ᠨᠡᠷᠡᠯᠡᠬᠦ ᠪᠢᠯᠡ᠃ ᠲᠡᠶᠢᠮᠦ ᠳᠦ ᠪᠡᠨ ᠴᠤ ᠲᠠ ᠪᠢᠳᠡᠨ ᠦ ᠨᠠᠨᠳᠢᠨ ᠪᠠᠷᠢᠯᠳᠤᠯᠭᠠ ᠳᠤᠮᠳᠠ ᠠᠴᠠ ᠶᠡᠬᠡ ᠬᠥᠪᠡᠭᠦᠨ ᠲᠦᠷᠦᠭᠰᠡᠨ ᠰᠢᠦ ᠳ᠋ᠡ ᠭᠡᠬᠦ ᠳᠦ ᠲᠩᠷᠢ ᠡᠴᠢᠭᠡ
- ᠢᠷᠦᠭᠡᠯ ᠢᠶᠡᠷ ᠣᠷᠣᠰᠢᠭᠰᠠᠨ ᠵᠠᠶᠠᠭᠠ ᠲᠠᠪᠢᠯᠠᠩ ᠢᠶᠡᠨ ᠮᠡᠳᠡᠭᠰᠡᠭᠡᠷ ᠠᠲᠠᠯᠠ ᠪᠠᠨ ᠳᠠᠬᠢᠨ ᠤᠴᠢᠷᠯᠠᠳᠠᠭ ᠤᠨ ᠰᠢᠯᠲᠠᠭᠠᠨ ᠶᠠᠭᠤ ᠪᠢᠯᠡ︖
- ᠲᠠ ᠪᠣᠯᠭᠣᠭᠠᠪᠠᠰᠤ ᠡᠷᠳᠡᠨᠢᠲᠦ ᠬᠦᠦ ᠶᠢ ᠮᠢᠨᠢ ᠮᠢᠨᠦ ᠬᠠᠷᠠᠬᠤ ᠪᠠᠷᠠ ᠳᠤ ᠦᠯᠡᠳᠡᠭᠡᠵᠦ᠂ ᠬᠠᠯᠠᠭᠤᠨ ᠭᠣᠣᠯ ᠢ ᠮᠢᠨᠢ ᠳᠡᠪᠲᠦᠭᠡᠵᠦ ᠬᠠᠶᠢᠷᠠᠯᠠ ᠭᠡᠯᠡ᠃ ᠡᠶᠢᠮᠦ ᠵᠣᠬᠢᠰ ᠦᠭᠡᠢ ᠬᠦᠰᠡᠯᠲᠡ ᠰᠣᠨᠣᠰᠤᠭᠰᠠᠨ ᠳᠤ ᠪᠠᠨ ᠢᠲᠡᠭᠡᠭᠡ ᠦᠭᠡᠢ ᠲᠩᠷᠢ ᠡᠴᠢᠭᠡ ᠠᠭᠤᠷᠰᠠᠨ
- ᠶᠠᠭᠤ ᠶᠠᠭᠤ︖ ᠶᠡᠬᠡ ᠶᠢᠨ ᠶᠡᠬᠡ ᠶᠢ ᠪᠦᠲᠦᠭᠡᠵᠦ᠂ ᠡᠨᠡ ᠶᠢᠷᠲᠢᠨᠴᠦ ᠶᠢ ᠨᠢᠭᠡᠳᠬᠡᠬᠦ ᠬᠦᠦ ᠮᠢᠨᠢ ᠡᠨᠳᠡᠭᠰᠡᠨ ᠦ ᠭᠡᠮ ᠵᠡᠮ ᠢ ᠬᠡᠨ ᠦᠭᠦᠷᠡᠬᠦ ᠶᠢ ᠬᠡᠯᠡᠯᠴᠡᠬᠦ ᠶᠣᠰᠣᠲᠠᠢ ᠠᠲᠠᠯᠠ ᠬᠦᠦ ᠶᠢᠨ ᠮᠢᠨᠢ ᠰᠦᠨᠡᠰᠦ ᠶᠢ ᠡᠨᠳᠡ ᠦᠯᠡᠳᠡᠭᠡ ᠭᠡᠨᠡ ᠡ ᠁ ᠭᠡᠳ ᠶᠢᠰᠦᠨ ᠶᠢᠰᠦ ᠶᠢᠨ ᠨᠠᠶᠠᠨ ᠨᠢᠭᠡᠨ ᠭᠠᠵᠠᠷ ᠠᠶᠤᠩᠭᠠ ᠪᠠᠭᠤᠯᠭᠠᠯᠠ᠃ ᠨᠠᠶᠠᠨ ᠨᠢᠭᠡᠨ ᠭᠠᠵᠠᠷ ᠡᠮᠲᠡᠷᠡᠵᠥ᠂ ᠨᠠᠶᠠᠨ ᠨᠢᠭᠡᠨ ᠲᠦᠢᠮᠡᠷ ᠳᠡᠭᠳᠡᠪᠡ᠃
- ᠲᠠᠨ ᠤ ᠬᠢᠯᠢᠩᠨᠡᠬᠦ ᠲᠦᠮᠡᠨ ᠵᠥᠪ ᠡ᠃ ᠶᠢᠰᠦᠨ ᠶᠢᠰᠦ ᠶᠢᠨ ᠨᠠᠶᠠᠨ ᠨᠢᠭᠡ ᠭᠠᠵᠠᠷ ᠪᠠᠶᠢᠲᠤᠭᠠᠢ ᠶᠡᠷᠡᠨ ᠶᠢᠰᠦᠨ ᠲᠩᠷᠢ ᠪᠠᠭᠤᠭᠠᠳ ᠨᠢᠷᠭᠡᠪᠡᠯ ᠨᠢᠷᠭᠡ᠂ ᠬᠠᠮᠢᠶᠠ ᠦᠭᠡᠢ᠃ ᠭᠡᠰᠬᠡᠬᠦ ᠬᠦᠰᠡᠯ ᠪᠠᠶᠢᠬᠤ ᠠᠪᠠᠰᠤ ᠭᠡᠰᠬᠡᠲᠦᠭᠡᠢ᠃ ᠭᠡᠬᠦ ᠳᠦ ᠪᠡᠨ ᠨᠠᠮᠠ ᠶᠢ ᠡᠨᠡ ᠳᠡᠯᠡᠬᠡᠢ ᠶᠢᠨ ᠡᠰ ᠰᠢᠷᠬᠡᠭ ᠪᠦᠬᠦᠨ ᠦ ᠡᠬᠢ ᠭᠡᠳᠡᠭ ᠢ ᠪᠣᠯᠭᠣᠭᠠᠵᠤ᠂ ᠴᠢᠩ ᠬᠦᠰᠡᠯ ᠢ ᠮᠢᠨᠢ ᠭᠠᠭᠴᠠᠬᠠᠨ ᠤᠳᠠᠭᠠ ᠰᠣᠨᠣᠰᠤᠭᠠᠴᠢ᠃ ᠡᠰᠡ ᠲᠡᠭᠡᠪᠡᠰᠦ ᠪᠢ ᠣᠷᠣᠰᠢᠨ ᠪᠠᠶᠢᠬᠤ ᠶᠢᠨ ᠬᠡᠷᠡᠭ ᠶᠠᠭᠤᠨ ᠭᠡᠳ ᠭᠠᠵᠠᠷ ᠡᠬᠡ ᠶᠢᠰᠦᠨ ᠶᠢᠰᠦ ᠶᠢᠨ ᠨᠠᠶᠠᠨ ᠨᠢᠭᠡ ᠬᠣᠨᠣᠭ ᠡᠬᠡ ᠪᠡᠶᠡ ᠪᠠᠨ ᠰᠢᠯᠭᠡᠭᠡᠵᠦ ᠭᠣᠮᠣᠷᠬᠠᠯᠠ᠃ ᠠᠭᠤᠯᠠᠰ ᠬᠠᠭᠠᠷᠠᠵᠤ᠂ ᠤᠰᠤ ᠰᠢᠷᠭᠢᠵᠦ᠂ ᠮᠣᠳᠣᠳ ᠦᠬᠦᠵᠦ ᠡᠬᠢᠯᠡᠪᠡ᠃ ᠬᠠᠷᠠᠭᠰᠠᠭᠠᠷ ᠪᠠᠶᠢᠲᠠᠯᠠ ᠭᠠᠵᠠᠷ ᠡᠬᠡ ᠥᠪᠡᠷ ᠢ ᠪᠡᠨ ᠮᠥᠬᠥᠭᠡᠬᠦ ᠳᠦ ᠪᠡᠨ ᠲᠤᠯᠤᠭᠰᠠᠨ ᠳᠤ ᠲᠩᠷᠢ ᠡᠴᠢᠭᠡ ᠶᠢᠨ ᠬᠢᠯᠢᠩ ᠵᠥᠭᠡᠯᠡᠷᠡᠵᠦ
- ᠴᠢᠮᠠ ᠶᠢ ᠪᠣᠳᠣᠵᠤ ᠡᠶᠢᠮᠦ ᠶᠣᠰᠣ ᠪᠤᠰᠤ ᠶᠢ ᠬᠦᠰᠡᠭᠡᠳ ᠪᠠᠶᠢᠭᠠ ᠶᠢ ᠮᠡᠳᠡᠬᠦ ᠡᠴᠡ ᠨᠠᠰᠢ ᠪᠢ ᠬᠦᠦ ᠶᠢᠨ ᠢᠶᠡᠨ ᠰᠦᠨᠡᠰᠦ ᠶᠢ ᠴᠢᠮᠠ ᠳᠤ ᠦᠯᠡᠳᠡᠭᠡᠬᠦ ᠦᠭᠡᠢ ᠭᠡᠬᠦ ᠳᠦ ᠭᠠᠵᠠᠷ ᠡᠬᠡ
- ᠣᠷᠣᠨ ᠳᠤ ᠪᠠᠨ ᠤᠷᠤᠬᠤ ᠵᠠᠪ ᠦᠭᠡᠢ ᠣᠷᠣᠶᠢᠯᠠᠨ ᠲᠡᠮᠡᠴᠡᠵᠦ ᠪᠠᠶᠢᠭᠤᠯᠤᠭᠰᠠᠨ ᠶᠡᠬᠡ ᠭᠦᠷᠦᠨ ᠨᠢ ᠴᠤᠬᠤᠮ ᠶᠠᠮᠠᠷᠬᠠᠨ ᠬᠤᠪᠢ ᠵᠠᠶᠠᠭᠠ ᠶᠢ ᠲᠤᠭᠤᠯᠤᠨ ᠥᠩᠭᠡᠷᠡᠭᠦᠯᠬᠦ ᠶᠢ ᠬᠦᠦ ᠮᠢᠨᠢ ᠦᠵᠡᠬᠦ ᠶᠣᠰᠣᠲᠠᠢ ᠭᠡᠵᠦ ᠪᠢ ᠮᠤᠩᠬᠠᠭᠯᠠᠪᠠ ᠭᠡᠬᠦ ᠳᠦ
- ᠡᠭᠦᠨ ᠢ ᠴᠢᠨᠢ ᠲᠡᠭᠡᠭᠡᠳ ᠮᠢᠨᠦ ᠬᠦᠦ ᠬᠥᠬᠡ ᠲᠩᠷᠢ ᠡᠴᠡ ᠪᠡᠨ ᠲᠣᠯᠢᠳᠠᠵᠤ ᠪᠣᠯᠤᠨᠠ ᠰᠢᠦ ᠳ᠋ᠡ᠃ ᠪᠢ ᠲᠡᠭᠦᠨ ᠳᠦ ᠲᠡᠶᠢᠮᠦ ᠡᠷᠬᠡ ᠶᠢ ᠥᠭᠭᠦᠨᠡ᠃
- ᠦᠭᠡᠢ ᠡ᠂ ᠬᠦᠦ ᠮᠢᠨᠢ ᠲᠩᠷᠢ ᠳᠦ ᠭᠠᠷᠪᠠᠰᠤ ᠲᠠᠨ ᠤ ᠬᠢᠵᠠᠭᠠᠷ ᠨᠢ ᠦᠭᠡᠢ ᠣᠷᠣᠨ ᠵᠠᠢ ᠳᠤ ᠬᠡᠳᠦᠨ ᠮᠢᠩᠭᠠᠨ ᠵᠢᠯ ᠴᠤ ᠬᠡᠷᠦᠨ ᠭᠡᠰᠦᠬᠦ ᠬᠡᠨ ᠮᠡᠳᠡᠬᠦ ᠪᠢᠯᠡ᠃
- ᠪᠢ ᠬᠦᠦ ᠪᠠᠨ ᠶᠠᠭ ᠳᠡᠷᠭᠡᠳᠡ ᠪᠡᠨ ᠡᠷᠬᠡ ᠶᠠᠮᠪᠠᠨ ᠳᠤ ᠰᠠᠭᠤᠯᠭᠠᠵᠤ᠂ ᠲᠠᠨ ᠤ ᠶᠢᠷᠲᠢᠨᠴᠦ ᠶᠢ ᠰᠢᠨᠵᠢᠬᠦ ᠮᠡᠯᠮᠡᠢ ᠶᠠᠭᠤ ᠶᠢ ᠨᠢ ᠬᠠᠶᠢᠷᠠᠯᠠᠬᠤ ᠪᠣᠯᠤᠨᠠ᠃ ᠶᠠᠭᠤᠨ ᠲᠥᠯᠥᠭᠡ ᠲᠩᠷᠢ ᠡᠴᠢᠭᠡ ᠶᠢᠨ ᠬᠦᠦ ᠪᠢᠯᠡ ᠳ᠋ᠡ
- ᠶᠡᠬᠡ ᠥᠨᠳᠥᠷ ᠰᠡᠩᠲᠡᠢ ᠡᠴᠡ ᠡᠴᠦᠰ ᠦᠨ ᠴᠡᠭ ᠬᠠᠷᠠᠭᠳᠠᠳᠠᠭ ᠦᠭᠡᠢ ᠲᠠᠯᠠ ᠲᠠᠢ᠃ ᠡᠷᠬᠡ ᠮᠡᠳᠡᠯᠲᠡᠨ ᠦ ᠰᠡᠭᠦᠳᠡᠷ ᠡᠵᠡᠨ ᠢᠶᠡᠨ ᠴᠤ ᠡᠷᠭᠢᠭᠡᠳ ᠨᠥᠮᠥᠷᠳᠡᠭ ᠬᠠᠯᠠ ᠲᠠᠢ᠃ ᠲᠠᠨ ᠤ ᠳᠡᠷᠭᠡᠳᠡ ᠪᠠᠶᠢᠬᠤ ᠠᠪᠠᠰᠤ ᠬᠦᠦ ᠶᠢᠨ ᠮᠢᠨᠢ ᠮᠡᠯᠮᠡᠢ ᠴᠡᠭᠡᠷᠡᠵᠤ ᠴᠤ ᠮᠡᠳᠡᠨᠡ᠃ ᠬᠠᠷᠢᠨ ᠬᠦᠦ ᠮᠢᠨᠢ ᠡᠨᠳᠡ᠂ ᠮᠢᠨᠦ ᠳᠡᠷᠭᠡᠳᠡ ᠡᠴᠡ ᠯᠠ ᠲᠣᠯᠢᠳᠠᠬᠤᠢ ᠳ᠋ᠤ ᠮᠡᠳᠡᠬᠦ ᠶᠣᠰᠣᠲᠠᠢ ᠪᠦᠬᠦᠨ ᠢᠶᠡᠨ ᠮᠡᠳᠡᠬᠦ ᠪᠣᠯᠤᠨᠠ᠃
- ᠴᠢ ᠲᠡᠭᠡᠭᠡᠳ ᠬᠦᠦ ᠶᠢ ᠮᠢᠨᠢ ᠠᠷᠠᠢ ᠬᠡᠷᠦᠮᠡᠯ ᠲᠡᠨᠦᠭᠦᠯᠴᠢᠨ ᠪᠣᠯᠭᠠᠬᠤ ᠭᠡᠰᠡᠨ ᠶᠤᠮ ᠪᠢᠰᠢ ᠪᠢᠵᠡ︖
- ᠬᠡᠷᠦᠮᠡᠯ ᠲᠡᠨᠦᠭᠦᠯᠴᠢᠨ ᠪᠣᠯᠪᠠᠰᠤ ᠶᠡᠬᠡ ᠯᠠ ᠰᠠᠶᠢᠨ ᠳᠤ ᠪᠠᠨ ᠬᠦᠮᠦᠨ ᠦ ᠬᠡᠮᠵᠢᠶᠡᠨ ᠦ ᠦᠢᠯᠡ ᠶᠢ ᠯᠠ ᠮᠡᠳᠡᠷᠡᠨᠡ᠃ ᠡᠨᠡ ᠬᠠᠩᠭᠠᠯᠲᠠ ᠲᠠᠢ ᠪᠢᠰᠢ᠃ ᠲᠡᠶᠢᠮᠦ ᠡᠴᠡ ᠪᠢ ᠬᠦᠦ ᠳ᠋ᠡᠭᠡᠨ ᠡᠭᠦᠨ ᠡᠴᠡ ᠢᠯᠡᠭᠦᠦ ᠶᠢ ᠦᠵᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠳᠠᠯᠢ ᠵᠢᠭᠦᠷ ᠥᠭᠭᠦᠨᠡ
- ᠲᠡᠭᠡᠪᠡᠯ ᠴᠢ ᠬᠦᠦ ᠪᠡᠨ ᠤᠯᠤᠰ᠂ ᠤᠯᠤᠰ ᠤᠨ ᠳᠡᠭᠡᠭᠦᠷ ᠨᠢᠰᠬᠦ ᠲᠠᠰ᠂ ᠠᠭᠤᠯᠠ ᠠᠭᠤᠯᠠ ᠶᠢᠨ ᠳᠡᠭᠡᠭᠦᠷ ᠬᠠᠯᠢᠬᠤ ᠪᠦᠷᠭᠦᠳ ᠪᠣᠯᠭᠠ
- ᠦᠭᠡᠢ ᠡ᠂ ᠲᠠᠰ ᠬᠡᠮᠡᠨ ᠨᠢ ᠲᠠᠰ᠂ ᠪᠦᠷᠭᠦᠳ ᠭᠡᠮᠡᠨ ᠨᠢ ᠪᠦᠷᠭᠦᠳ᠃ ᠲᠡᠳᠡ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠡᠴᠡ ᠳᠥᠯᠦᠮᠡᠲᠡᠭᠡᠢ ᠲᠤᠯᠠ ᠬᠡᠷᠬᠢᠨ ᠶᠠᠭᠠᠬᠢᠵᠤ ᠡᠵᠡᠨᠲᠦ ᠭᠦᠷᠦᠨ ᠢᠶᠡᠨ ᠨᠢᠭᠲᠠᠯᠠᠨ ᠲᠣᠯᠢᠳᠠᠬᠤ ᠪᠢᠯᠡ᠃
- ᠲᠡᠭᠡᠭᠡᠳ ᠴᠢ ᠬᠥᠮᠦᠨ ᠳ᠋ᠤ ᠣᠶᠢᠷᠠᠬᠠᠨ ᠭᠡᠳ ᠠᠷᠠᠢ ᠲᠠᠭᠲᠠᠭᠠ᠂ ᠪᠣᠯᠵᠣᠮᠣᠷ ᠪᠣᠯᠭᠠᠬᠤ ᠭᠡ ᠤᠤ︖
- ᠦᠭᠡᠢ ᠳ᠋ᠡ᠂ ᠲᠡᠳᠡ ᠳᠡᠩᠳᠡᠭᠦᠦ ᠨᠣᠣᠮᠠᠶᠢᠳᠠᠨᠠ᠃ ᠬᠡᠳᠦᠢ ᠬᠥᠮᠥᠨ ᠳᠦ ᠣᠶᠢᠷᠠᠬᠠᠨ ᠴᠤ ᠭᠡᠯᠡ ᠲᠡᠳᠡ ᠠᠮᠢᠳᠤᠷᠠᠬᠤ ᠴᠢᠳᠠᠪᠤᠷᠢ ᠮᠠᠭᠤ ᠲᠠᠢ᠂ ᠵᠢᠷᠦᠬᠡ ᠵᠣᠷᠢᠭ ᠨᠢ ᠮᠣᠬᠣᠭᠰᠠᠨ᠂ ᠭᠠᠷ ᠤᠨ ᠳᠣᠣᠷᠠ ᠠᠮᠢᠲᠠᠳ ᠰᠢᠦ ᠳ᠋ᠡ ᠭᠡᠬᠦ ᠳᠦ ᠲᠩᠷᠢ ᠡᠴᠢᠭᠡ ᠨᠢᠭᠡ ᠶᠢ ᠰᠠᠨᠠᠪᠠ ᠪᠣᠯᠤᠯᠲᠠᠢ
- ᠲᠡᠭᠡᠪᠡᠯ ᠱᠣᠩᠬᠣᠷ᠃ ᠬᠦᠦ ᠮᠠᠨᠢ ᠱᠣᠩᠬᠣᠷ ᠢ ᠲᠤᠭ ᠰᠦᠯᠳᠡᠨ ᠳᠦ ᠪᠡᠨ ᠲᠠᠬᠢᠭᠰᠠᠨ ᠪᠤᠰᠤ ᠤᠤ᠃ ᠱᠣᠩᠬᠣᠷ ᠶᠠᠭ ᠯᠠ ᠁ ᠭᠡᠲᠡᠯᠡ ᠭᠠᠵᠠᠷ ᠡᠬᠡ ᠦᠭᠡ ᠶᠢ ᠨᠢ ᠲᠠᠰᠤᠯᠤᠨ
- ᠬᠡᠷᠢᠶᠡ ᠁ ᠭᠡᠵᠦ ᠴᠢᠩᠭᠠ ᠳᠠᠭᠤ ᠪᠠᠷ ᠣᠭᠴᠣᠮᠬᠠᠨ ᠬᠡᠯᠡᠪᠡ᠃
- ᠶᠠᠭᠤ︖ ᠴᠢᠨᠤ ᠰᠠᠨᠠᠭᠠᠨ ᠳᠤ ᠶᠠᠮᠠᠷ ᠢᠷᠸᠠ ᠶᠢᠨ ᠰᠢᠳᠢ ᠱᠦᠭᠯᠡᠬᠦ ᠪᠡᠷ ᠢᠶᠡᠨ ᠬᠠᠭᠠᠨ ᠬᠦᠦ ᠶᠢ ᠮᠢᠨᠢ ᠬᠡᠷᠢᠶᠡ ᠪᠣᠯᠭᠠᠨᠠ ᠭᠡᠵᠦ ᠰᠠᠨᠠᠳᠠᠭ ᠪᠠᠶᠢᠨᠠ︖ ᠭᠡᠳ ᠲᠩᠷᠢ ᠡᠴᠢᠭᠡ ᠠᠭᠤᠷᠰᠠᠵᠤ᠂ ᠠᠭᠤᠷᠰᠠᠬᠤ ᠳᠤ ᠪᠠᠨ ᠡᠭᠦᠯᠡᠰ ᠢᠶᠡᠨ ᠬᠤᠷᠢᠶᠠᠵᠤ ᠡᠬᠢᠯᠡᠯᠡ᠃
- ᠠᠭᠤᠷᠯᠠᠬᠤ ᠠᠴᠠ ᠪᠠᠨ ᠡᠮᠦᠨᠡ ᠦᠭᠡ ᠶᠢ ᠮᠢᠨᠢ ᠪᠣᠯᠭᠣᠭᠠᠭᠲᠤᠨ᠃ ᠪᠢ ᠬᠦᠦ ᠪᠠᠨ ᠬᠡᠷᠢᠶᠡ ᠪᠣᠯᠭᠠᠬᠤ ᠭᠡᠰᠡᠨ ᠶᠤᠮ ᠪᠢᠰᠢ᠃ ᠵᠥᠪᠬᠡᠨ ᠬᠡᠷᠢᠶᠡᠨ ᠦ ᠨᠢᠳᠦᠨ ᠳᠦ ᠰᠠᠭᠤᠯᠭᠠᠬᠤ ᠪᠣᠯᠤᠨᠠ᠃ ᠮᠢᠨᠦ ᠬᠦᠦ ᠬᠡᠷᠢᠶᠡᠨ ᠦ ᠬᠠᠷᠠᠴᠠᠨ ᠳᠤ ᠬᠠᠭᠠᠨ ᠲᠥᠷᠬᠥ ᠪᠡᠷ ᠢᠶᠡᠨ ᠰᠠᠭᠤᠬᠤ ᠠᠭᠠᠳ ᠥᠪᠡᠷ ᠦᠨ ᠡᠵᠡᠨᠲᠦ ᠭᠦᠷᠦᠨ ᠢᠶᠡᠨ ᠮᠢᠩᠭᠠᠨ ᠵᠢᠯ ᠦᠨ ᠲᠤᠷᠰᠢ ᠬᠡᠨ ᠡᠴᠡ᠂ ᠶᠠᠭᠤᠨ ᠠᠴᠠ ᠪᠣᠯᠵᠤ ᠬᠡᠷᠬᠢᠨ ᠶᠠᠭᠠᠬᠢᠵᠤ ᠥᠭᠡᠷᠡᠴᠢᠯᠡᠭᠳᠡᠬᠦ ᠶᠢ ᠬᠠᠷᠠᠬᠤ ᠪᠣᠯᠤᠨᠠ ᠭᠡᠬᠦ ᠳᠦ ᠲᠩᠷᠢ ᠡᠴᠢᠭᠡ ᠶᠡᠬᠡᠳᠡ ᠪᠣᠳᠣᠯᠭᠠᠰᠢᠷᠠᠪᠠ᠃ ᠭᠠᠵᠠᠷ ᠡᠬᠡ ᠴᠠᠭᠠᠰᠢ ᠨᠢ
- ᠬᠡᠷᠢᠶᠡ ᠬᠥᠮᠦᠨ ᠳ᠋ᠤ ᠣᠶᠢᠷᠠ ᠴᠤ ᠪᠢᠰᠢ᠂ ᠪᠠᠰᠠ ᠬᠣᠯᠠ ᠴᠤ ᠪᠢᠰᠢ᠃ ᠬᠡᠷᠢᠶᠡᠨ ᠦ ᠰᠠᠭᠤᠳᠠᠯ ᠨᠢ ᠬᠤᠪᠠᠬᠠᠢ ᠮᠣᠳᠣ᠂ ᠢᠳᠡᠰᠢ ᠨᠢ ᠰᠡᠭ ᠴᠤ ᠭᠡᠯᠡ ᠲᠡᠷᠡ ᠥᠪᠡᠷ ᠦᠨ ᠴᠢᠳᠠᠯ ᠢᠶᠠᠷ ᠠᠮᠢᠳᠤᠷᠠᠭᠴᠢ ᠨᠢᠭᠡᠨ᠃ ᠬᠡᠷᠡᠭᠴᠡᠭᠡ ᠭᠠᠷᠪᠠᠯ ᠬᠡᠷᠢᠶᠡ ᠬᠦᠮᠦᠨ ᠦ ᠮᠥᠰᠥ ᠶᠢ ᠳᠠᠭᠵᠠᠨ ᠠᠴᠠ ᠨᠢ ᠶᠠᠭ ᠲᠠᠭ ᠰᠢᠨᠵᠢᠬᠦ ᠴᠢᠳᠠᠪᠤᠷᠢ ᠲᠠᠢ᠃ ᠬᠡᠳᠦᠢ ᠪᠡᠷ ᠬᠠᠭᠠᠨ ᠬᠦᠮᠦᠨ ᠦ ᠲᠠᠪᠢᠯᠠᠩ ᠬᠡᠷᠢᠶᠡ ᠪᠢᠰᠢ ᠴᠤ ᠭᠡᠯᠡ ᠡᠨᠳᠡ ᠡᠴᠡ ᠯᠠ ᠲᠡᠷᠡ ᠠᠯᠢᠪᠠ ᠪᠦᠬᠦᠨ ᠢ ᠦᠨᠡᠨ ᠵᠥᠪ ᠢᠶᠡᠷ ᠨᠢ ᠬᠠᠷᠠᠵᠤ ᠴᠢᠳᠠᠬᠤ ᠪᠣᠯᠤᠨᠠ᠃ ᠪᠦᠷᠭᠦᠳ᠂ ᠲᠠᠰ᠂ ᠱᠣᠩᠬᠣᠷ ᠡᠷᠡᠮᠡᠭᠡᠢ ᠳᠠᠶᠢᠴᠢᠨ᠂ ᠡᠷᠡᠯᠬᠡᠭ ᠬᠦᠴᠦᠲᠡᠢ ᠴᠤ ᠬᠥᠮᠥᠨ ᠲᠥᠷᠥᠯᠬᠢᠲᠡᠨ ᠬᠣᠭᠣᠯᠠ ᠪᠠᠷ ᠨᠢ ᠤᠶᠠᠵᠤ᠂ ᠬᠠᠷᠠᠯᠭᠠᠨ ᠪᠣᠯᠭᠠᠵᠤ ᠳᠥᠩᠭᠡᠨᠡ᠃ ᠪᠣᠯᠵᠣᠮᠣᠷ᠂ ᠲᠠᠭᠲᠠᠭᠠ ᠵᠢᠭᠦᠷ ᠲᠡᠢ ᠴᠤ ᠭᠡᠯᠡ ᠦᠷᠡ᠂ ᠪᠤᠳᠠᠭᠠᠬᠠᠨ ᠳᠤ ᠬᠠᠭᠤᠷᠲᠠᠬᠤ ᠲᠡᠳᠦᠢ᠃
ᠬᠠᠷᠢᠨ ᠬᠡᠷᠢᠶᠡ ᠶᠢ ᠬᠦᠮᠦᠨ ᠬᠡᠵᠢᠶᠡ ᠴᠤ ᠥᠪᠡᠷᠲᠡᠭᠡᠨ ᠣᠶᠢᠷᠠᠲᠤᠭᠤᠯᠬᠤ ᠶᠢ ᠬᠦᠰᠡᠬᠦ ᠦᠭᠡᠢ᠃ ᠬᠡᠳᠦᠨ ᠦᠶᠡ ᠪᠡᠷ ᠢᠶᠡᠨ ᠴᠢᠯᠠᠭᠤ ᠰᠢᠳᠡᠭᠰᠡᠭᠡᠷ ᠪᠠᠶᠢᠬᠤ ᠪᠢᠵᠡ᠃ ᠭᠡᠯᠡ ᠴᠤ ᠬᠡᠷᠢᠶᠡ ᠬᠦᠮᠦᠨ ᠡᠴᠡ ᠰᠠᠨᠠᠭᠰᠠᠨ ᠤ ᠬᠢ ᠨᠢ ᠵᠣᠷᠢᠭ ᠢᠶᠡᠷ ᠬᠣᠯᠠᠳᠠᠴᠢᠬᠤ ᠦᠭᠡᠢ᠃ ᠭᠤᠷᠪᠠᠨ ᠵᠠᠭᠤᠨ ᠨᠠᠰᠤᠲᠠᠢ ᠭᠡᠭᠳᠡᠬᠦ ᠬᠡᠷᠢᠶᠡᠨ ᠦ ᠭᠤᠷᠪᠠᠨ ᠦᠶᠡ ᠥᠩᠭᠡᠷᠡᠭᠡᠳ᠂ ᠳᠠᠷᠠᠭᠠ ᠶᠢᠨ ᠵᠠᠭᠤᠨ ᠵᠢᠯ ᠳᠦ ᠮᠢᠨᠦ ᠬᠦᠦ ᠪᠡᠶᠡ ᠶᠢᠨ ᠴᠢᠯᠡᠭᠡ ᠶᠢ ᠦᠷᠭᠦᠭᠡᠨ ᠡᠨᠡ ᠶᠢᠷᠲᠢᠨᠴᠦ ᠳ᠋ᠤ ᠳᠠᠬᠢᠨ ᠮᠡᠨᠳᠦᠯᠡᠨᠡ᠃ ᠡᠵᠢ ᠳᠦ ᠪᠡᠨ ᠡᠷᠭᠢᠵᠦ ᠢᠷᠡᠨᠡ᠃ ᠲᠡᠭᠡᠭᠡᠳ ᠰᠢᠨᠡ ᠭᠦᠷᠦᠨ ᠢ ᠳᠠᠬᠢᠨ ᠴᠣᠭᠴᠠᠯᠠᠭᠠᠨᠠ ᠭᠡᠳᠡᠭ ᠲᠦ ᠪᠢ ᠢᠲᠡᠭᠡᠨᠡ᠃ ᠪᠢ ᠡᠭᠦᠨ ᠢ ᠯᠠ ᠬᠦᠰᠡᠵᠦ ᠪᠠᠶᠢᠨᠠ᠃
ᠬᠣᠶᠢᠴᠢ ᠦᠶᠡ ᠶᠢᠨ ᠬᠢᠨ ᠦ ᠬᠢ ᠪᠡᠨ ᠠᠯᠳᠠᠭᠠ ᠣᠨᠣᠭᠠ ᠶᠢ ᠬᠠᠷᠠᠯ ᠦᠭᠡᠢ ᠪᠡᠷ ᠲᠡᠷᠡ ᠪᠡᠷ ᠬᠡᠳᠦ ᠳᠠᠬᠢᠨ ᠲᠥᠷᠦᠭᠡᠳ ᠴᠤ ᠲᠤᠰᠠ ᠶᠢ ᠡᠰᠡ ᠣᠯᠤᠨᠠ ᠭᠡᠳᠡᠭ ᠢ ᠲᠩᠷᠢ ᠡᠴᠢᠭᠡ ᠲᠠ ᠲᠤᠩᠭᠠᠵᠤ ᠪᠤᠢ ᠪᠢᠵᠡ᠃ ᠬᠡᠷᠪᠡ ᠮᠢᠨᠦ ᠬᠦᠰᠡᠯᠲᠡ ᠶᠢ ᠡᠰᠡ ᠪᠣᠯᠭᠣᠭᠠᠪᠠᠰᠤ ᠨᠠᠮᠠ ᠶᠢ ᠦᠳᠲᠡᠷ ᠲᠦᠷᠭᠡᠨ ᠨᠢᠷᠭᠡᠵᠦ ᠰᠠᠭᠠᠬᠠᠯᠲᠠ ᠶᠢᠨ ᠳᠠᠢ ᠳ᠋ᠤ ᠶᠢᠨ ᠠᠩᠭᠠᠷᠠᠭ ᠯᠤᠭᠠ ᠪᠣᠯᠭᠠᠪᠠᠯ ᠵᠣᠬᠢᠯᠲᠠᠢ᠃ ᠨᠠᠳᠠ ᠳᠤ ᠳᠠᠬᠢᠵᠤ ᠠᠮᠢᠳᠤ ᠶᠢᠨ ᠬᠣᠷᠸᠠ ᠶᠢ ᠴᠣᠭᠴᠠᠯᠠᠭᠠᠬᠤ ᠬᠦᠰᠡᠯ ᠠᠯᠠᠭᠠ ᠬᠡᠮᠡᠭᠡᠳ ᠭᠠᠵᠠᠷ ᠡᠬᠡ ᠳᠠᠭᠤ ᠪᠠᠨ ᠬᠤᠷᠢᠶᠠᠯᠠ᠃
ᠲᠩᠷᠢ ᠡᠴᠢᠭᠡ ᠪᠣᠳᠣᠯ ᠳᠤ ᠠᠪᠲᠠᠭᠰᠠᠨ ᠴᠢᠭ ᠢᠶᠡᠷ ᠢᠶᠡᠨ ᠰᠠᠯᠬᠢ ᠴᠤ ᠦᠭᠡᠢ᠂ ᠡᠭᠦᠯᠡ ᠴᠤ ᠦᠭᠡᠢ᠂ ᠪᠣᠷᠣᠭᠠ ᠴᠤ ᠦᠭᠡᠢ᠂ ᠨᠠᠷᠠ ᠴᠤ ᠦᠭᠡᠢ ᠭᠤᠷᠪᠠᠨ ᠭᠤᠷᠪᠠ ᠶᠢᠨ ᠶᠢᠰᠦ ᠬᠣᠨᠣᠭ ᠲᠠᠭ ᠴᠢᠮᠡᠭᠡ ᠦᠭᠡᠢ ᠥᠩᠭᠡᠷᠡᠵᠡᠢ᠃ ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠳ᠋ᠤ ᠴᠢᠪ ᠴᠢᠮᠡᠭᠡ ᠦᠭᠡᠢ ᠨᠣᠶᠠᠯᠠᠬᠤ ᠳᠤ ᠥᠨᠥᠬᠢ ᠢᠵᠢᠯ ᠨᠠᠶᠢᠮᠠᠨ ᠴᠤᠪᠤᠭᠠ ᠶᠢ ᠡᠷᠭᠢᠨ ᠰᠠᠨᠠᠭᠠᠯᠵᠠᠪᠠ᠃ ᠲᠡᠳᠡ ᠶᠠᠭ ᠯᠠ ᠢᠳᠡ ᠰᠢᠳᠢ ᠶᠢᠨ ᠨᠢᠭᠤᠴᠠ ᠳᠤ ᠠᠭᠤᠰᠬᠤ ᠮᠡᠲᠦ ᠠᠯᠠᠭᠠ ᠪᠣᠯᠵᠠᠢ᠃ ᠭᠠᠭᠴᠠᠬᠦ ᠪᠤᠷ ᠪᠤᠷ ᠰᠠᠯᠬᠢ ᠲᠠᠢ ᠪᠣᠷ ᠪᠣᠷ ᠲᠣᠯᠣᠭᠠᠳ ᠴᠠᠭ ᠤᠨ ᠴᠠᠭ ᠲᠤ ᠴᠢᠪ ᠴᠢᠮᠡᠭᠡ ᠦᠭᠡᠢ᠂ ᠠᠶᠠ ᠨᠠᠮᠳᠠᠭᠤᠬᠠᠨ ᠳᠦᠩᠰᠦᠶᠢᠵᠡᠭᠡᠨᠡ᠃
《ᠲᠠᠭ ᠳᠠᠭᠤ ᠦᠭᠡᠢ ᠪᠠᠶᠢᠨᠠ ᠭᠡᠳᠡᠭ ᠪᠣᠯ ᠬᠠᠮᠤᠭ ᠤᠨ ᠪᠠᠲᠤ ᠴᠣᠣᠵᠢ ᠶᠤᠮ ᠳ᠋ᠠ》 ᠭᠡᠵᠦ ᠪᠣᠳᠣᠮᠠᠭᠯᠠᠬᠤ ᠵᠠᠭᠤᠷᠠ ᠥᠨᠥ ᠲᠣᠮᠣ ᠬᠠᠷᠠ ᠬᠡᠷᠢᠶᠡ 《ᠭᠤᠸᠠᠭ᠃ ᠭᠤᠸᠠᠭ᠃ ᠭᠤᠸᠠᠭ》 ᠭᠡᠵᠦ ᠶᠡᠬᠡ ᠳᠠᠭᠤ ᠪᠠᠷ ᠣᠷᠢᠯᠠᠬᠤ ᠳᠤ ᠪᠢ ᠳᠠᠪ ᠬᠢᠨ ᠰᠡᠷᠡᠯᠡ᠃
ᠬᠠᠮᠤᠭ ᠪᠡᠶᠡᠨ ᠦ ᠬᠠᠷᠠ ᠬᠥᠯᠥᠰᠥ ᠴᠤᠪᠤᠵᠠᠢ᠃ ᠬᠠᠴᠢᠨ ᠰᠣᠨᠢᠨ ᠡᠨᠡ ᠵᠡᠭᠦᠳᠦᠨ ᠦ ᠬᠠᠴᠢᠷ ᠢ ᠲᠠᠶᠢᠯᠵᠤ᠂ ᠬᠤᠵᠢᠷ ᠢ ᠲᠤᠩᠭᠠᠬᠤ ᠵᠣᠷᠢᠭ ᠨᠠᠳᠠ ᠳᠤ ᠪᠠᠶᠢᠭᠰᠠᠨ ᠦᠭᠡᠢ᠃ ᠬᠠᠷᠢᠨ᠂ ᠬᠠᠷᠠᠯᠭᠠᠨ ᠤᠬᠠᠭᠠᠨ ᠳᠤ ᠪᠠᠨ ᠤᠮᠠᠷᠲᠠᠵᠤ ᠣᠷᠬᠢᠭᠰᠠᠨ 《ᠬᠡᠷᠢᠶᠡᠨ ᠦ ᠳᠠᠭᠤ ᠭᠡᠳᠡᠭ ᠴᠢᠨᠢ ᠦᠨᠡᠨ ᠳᠦ ᠪᠡᠨ ᠪᠣᠯ ᠶᠡᠬᠡ ᠬᠠᠷᠠᠭᠤᠰᠤᠯ ᠤᠨ ᠳᠠᠭᠤᠨ ᠶᠤᠮ ᠭᠡᠨᠡ ᠯᠡ ᠰᠢᠦ᠂ ᠬᠦᠦ ᠮᠢᠨᠢ》 ᠭᠡᠰᠡᠨ ᠡᠪᠦᠭᠡ ᠶᠢᠨ ᠮᠢᠨᠢ ᠦᠭᠡᠰ ᠰᠠᠨᠠᠭᠠᠨ ᠤ ᠴᠡᠭᠡᠯ ᠳᠦ ᠲᠣᠳᠣ ᠠᠴᠠ ᠲᠣᠳᠣᠬᠠᠨ ᠬᠦᠩᠭᠢᠨᠡᠭᠡᠳ ᠢᠷᠡᠯᠡ . . ᠃
2016.8.29 ᠤᠯᠠᠭᠠᠨᠪᠠᠭᠠᠲᠤᠷ ᠬᠣᠲᠠ᠃
《 ᠳᠣᠲᠣᠷᠠ ᠡᠴᠡ ᠪᠠᠨ 》 ᠥᠭᠦᠯᠡᠯᠭᠡ ᠶᠢᠨ ᠲᠡᠭᠦᠪᠦᠷᠢ ᠡᠴᠡ ᠲᠦᠮᠡᠲᠦ ᠰᠢᠨᠡ ᠬᠥᠷᠪᠡᠭᠦᠯᠪᠡ᠃
6 0