ᠲᠤᠭᠤᠵᠢ
ᠪᠤᠷᠬᠠᠨ ᠶᠠᠯᠠᠯᠠᠳᠠᠭ ᠶᠤᠮ ᠠ᠋
ᠪᠤᠷᠬᠠᠨ ᠶᠠᠯᠠᠯᠠᠳᠠᠭ ᠶᠤᠮ ᠡ
5310
2018-10-02 15:42
发表于:内蒙古
ᠪᠤᠷᠬᠠᠨ ᠶᠠᠯᠠᠯᠠᠳᠠᠭ ᠶᠤᠮ ᠡ
︵ ᠪᠣᠭᠣᠨᠢ ᠥᠭᠦᠯᠡᠯᠭᠡ ︶
ᠰ ᠊ ᠠᠮᠢᠨᠠ
--ᠬᠦᠮᠦᠨ ᠭᠡᠭᠴᠢ ᠨᠢ ᠠᠮᠢᠳᠤᠷᠠᠯ ᠠᠴᠠ ᠰᠤᠷᠤᠯᠴᠠᠵᠤ᠂ ᠤᠬᠠᠭᠠᠨ ᠤ ᠤᠴᠢᠭ ᠢ ᠲᠠᠶᠢᠯᠤᠨᠠ ᠭᠡᠵᠦ ᠦᠭᠡᠢ ᠶᠤᠮ ᠪᠣᠯᠪᠠ ᠤᠤ ᠳ᠋ᠠ᠃ ᠪᠢ 47 ᠨᠠᠰᠤᠲᠠᠢ᠂ ᠳᠡᠭᠡᠳᠦ ᠪᠣᠯᠪᠠᠰᠤᠷᠠᠯ ᠡᠵᠡᠮᠰᠢᠭᠰᠡᠨ᠂ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠢ ᠨᠢᠭᠡᠨ ᠵᠠᠯᠠᠭᠤ ᠁
᠁ ᠰᠢᠷᠡᠭᠡᠨ ᠳᠡᠭᠡᠷᠡ ᠮᠢᠨᠢ ᠬᠤᠭᠤᠰ ᠰᠢᠯ ᠠᠷᠢᠬᠢ ᠬᠠᠷᠠᠭᠳᠠᠨᠠ᠃ ᠥᠪᠡᠷᠲᠡᠭᠡᠨ ᠬᠤᠨᠳᠠᠭᠠᠯᠠᠪᠠ᠃ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠮᠡᠯᠮᠡᠢ ᠨᠢᠯᠪᠤᠰᠤ ᠪᠠᠷ ᠁
《 ᠥᠷᠥᠰᠢᠶᠡ ᠬᠠᠳᠠᠮ ᠡᠵᠢ ᠮᠢᠨᠢ ᠁》
---ᠬᠣᠷᠢ ᠵᠢᠭᠠᠬᠠᠨ ᠳᠠᠪᠠᠯᠭᠠᠯᠠᠬᠤ ᠨᠠᠰᠤᠨ ᠳᠤ ᠪᠠᠨ ᠭᠣᠳᠣᠭᠣᠷ ᠰᠢᠷᠠ ᠥᠬᠢᠨ ᠳᠦ ᠤᠬᠠᠭᠠᠨ ᠦᠭᠡᠢ ᠳᠤᠷᠠᠯᠠᠵᠤ ᠭᠡᠷᠯᠡᠭᠰᠡᠨ ᠳ᠋ᠡ᠃ ᠡᠯᠡ ᠥᠬᠢᠨ ᠣᠳᠣ ᠮᠢᠨᠦ ᠬᠠᠨᠢ᠃ ᠬᠣᠶᠠᠭᠤᠯᠠ ᠪᠠᠨ ᠬᠥᠲᠦᠯᠦᠯᠴᠡᠵᠦ ᠭᠦᠶᠦᠭᠡᠳ᠂ ᠠᠮᠢᠳᠤᠷᠠᠯ ᠭᠡᠬᠦ ᠥᠨᠳᠥᠷ ᠪᠣᠱᠤᠭᠠ ᠤᠷᠤᠭᠤ ᠠᠯᠬᠤᠭᠰᠠᠨ᠃ ᠭᠤᠴᠢᠨ ᠨᠠᠰᠤ ᠱᠦᠷᠭᠦᠬᠦ ᠬᠠᠪᠢᠴᠠᠭᠠ ᠬᠠᠨᠢ ᠢᠵᠢᠯᠢ ᠦᠷᠡ ᠬᠡᠦᠬᠡᠳ ᠬᠡᠳᠦᠶᠢᠨ ᠬᠡᠪ ᠦᠨ ᠪᠠᠶᠢᠬᠤ ᠶᠣᠰᠣᠲᠠᠢ ᠮᠡᠲᠦ ᠰᠠᠨᠠᠭᠳᠠᠵᠤ᠂ ᠠᠮᠢᠳᠤᠷᠠᠯ ᠦᠶᠡ ᠦᠶᠡ ᠪᠠᠷᠵᠠᠶᠢᠵᠤ᠂ ᠢᠷᠡᠬᠦ ᠢᠷᠡᠬᠦ ᠨᠠᠮᠤᠷ ᠤᠳ ᠤᠭᠲᠤᠭᠰᠠᠭᠠᠷ ᠁ ᠡᠬᠡᠨᠡᠷ ᠮᠢᠨᠢ ᠠᠶᠢᠯ ᠤᠨ ᠪᠠᠭᠠ ᠥᠬᠢᠨ ᠪᠣᠯᠤᠭᠠᠳ ᠴᠤ ᠲᠡᠷᠡ ᠦᠦ ᠶᠡᠬᠡ ᠳᠤᠷᠠ ᠪᠠᠷ ᠢᠶᠠᠨ ᠪᠠᠰᠠ ᠠᠭᠠᠰᠢ ᠲᠠᠢ ᠯᠠ ᠳ᠋ᠠ᠃ ᠵᠠᠷᠢᠮ ᠳᠤ ᠪᠠᠨ ᠲᠡᠪᠴᠢᠬᠦ ᠶᠢᠨ ᠠᠷᠭᠠ ᠦᠭᠡᠢ᠃ ᠪᠢ ᠴᠤ ᠡᠮᠦᠨᠡ ᠡᠴᠡ ᠨᠢ ᠬᠡᠷᠡᠯᠳᠦᠨᠡ᠂ ᠬᠠᠰᠬᠢᠷᠤᠨᠠ᠂ ᠵᠠᠷᠢᠮ ᠳᠤ ᠪᠠᠨ ᠪᠦᠷ ᠭᠠᠷ ᠬᠦᠷᠴᠢᠬᠡᠳᠡᠭ ᠪᠠᠶᠢᠪᠠ᠃ ᠡᠨᠡ ᠨᠢ ᠳᠠᠭᠠᠭᠠᠮᠵᠢᠷᠠᠭᠰᠠᠭᠠᠷ ᠵᠢᠭᠠᠬᠠᠨ ᠠᠭᠤᠷ ᠯᠠ ᠬᠦᠷᠪᠡᠯ ᠬᠠᠨᠢ ᠳ᠋ᠠᠭᠠᠨ ᠣᠮᠣᠭᠳᠠᠨ ᠬᠠᠰᠬᠢᠷᠴᠣ᠂ ᠬᠠᠮᠢᠭᠠ ᠬᠠᠮᠢᠶᠠ ᠦᠭᠡᠢ ᠲᠠᠭᠠᠷᠠᠭᠰᠠᠨ ᠵᠦᠢᠯ ᠢᠶᠡᠷ ᠢᠶᠡᠨ ᠴᠣᠬᠢᠴᠢᠬᠠᠳᠠᠭ ᠪᠣᠯᠴᠢᠬᠠᠵᠠᠢ᠃ ᠳᠤᠷᠤᠮᠵᠢᠯᠠᠬᠤ ᠭᠤᠲᠤᠭᠠᠬᠤ ᠪᠣᠯ ᠡᠨᠡᠦᠬᠡᠨ ᠳᠦ ᠁ ᠥᠪᠡᠷ ᠢᠶᠡᠨ ᠴᠤ ᠲᠡᠷᠡ ᠲᠠᠮᠠᠯᠤᠯ ᠢᠶᠡᠨ ᠪᠠᠶᠢᠬᠤ ᠶᠣᠰᠣᠲᠠᠢ ᠮᠡᠲᠦ ᠡᠨᠳᠡᠭᠦᠷᠡᠵᠦ ᠶᠠᠪᠤᠵᠠᠢ᠃ ᠡᠮᠡᠭᠲᠡᠢ ᠬᠥᠮᠦᠨ ᠳ᠋ᠦ ᠲᠡᠷᠡ ᠲᠤᠰᠤᠮ ᠢᠶᠠᠨ ᠡᠬᠡᠨᠡᠷ ᠲᠦ ᠪᠡᠨ ᠬᠠᠲᠠᠭᠤ ᠭᠠᠷ ᠢ ᠬᠦᠷᠲᠡᠭᠡᠬᠦ ᠪᠡᠨ ᠶᠠᠭᠤᠮᠠᠨ ᠴᠢᠨᠡᠭᠡ ᠪᠣᠳᠣᠭᠰᠠᠨ ᠦᠭᠡᠢ ᠳ᠋ᠡ ᠁ ᠠᠢ ᠬᠥᠭᠡᠷᠦᠬᠦᠢ ᠁
---ᠣᠳᠣ ᠠᠴᠠ 4 ᠵᠢᠯ ᠦᠨ ᠡᠮᠦᠨᠡ ᠬᠠᠳᠠᠮ ᠡᠵᠢ ᠶᠢᠨ ᠪᠡᠶᠡ ᠮᠠᠭᠤᠳᠠᠯᠠ᠃ ᠪᠦᠭᠦᠳᠡ ᠣᠴᠢᠪᠠ᠃ ᠭᠡᠲᠡᠯᠡ ᠵᠥᠪᠬᠡᠨ ᠨᠠᠳᠠ ᠲᠠᠢ ᠠᠭᠤᠯᠵᠠᠬᠤ ᠶᠢ ᠡᠪᠡᠳᠴᠢᠲᠡᠢ ᠬᠡᠪᠲᠡᠷᠢ ᠳᠦ ᠪᠠᠶᠢᠭᠠ ᠲᠡᠷᠡ ᠬᠥᠭᠰᠢᠨ ᠬᠦᠰᠡᠭᠰᠡᠨ ᠨᠢ ᠶᠡᠬᠡ ᠯᠠ ᠴᠣᠴᠢᠷᠳᠠᠭᠤᠯᠵᠤ ᠪᠢᠯᠡ᠃
ᠨᠢᠳᠦᠨ ᠳᠦ ᠪᠡᠨ ᠳᠦᠭᠦᠷᠡᠩ ᠨᠢᠯᠪᠤᠰᠤ ᠲᠠᠢ ᠨᠠᠳᠠ ᠤᠷᠤᠭᠤ ᠰᠢᠷᠲᠡᠵᠦ ᠪᠠᠢᠭᠠᠳ ᠡᠶᠢᠨᠬᠦᠦ ᠬᠡᠯᠡᠭᠰᠡᠨ ᠶᠤᠮ ᠳ᠋ᠠ᠃
᠁《 ᠬᠦᠷᠭᠡᠨ ᠮᠢᠨᠢ᠂ ᠬᠦᠦ ᠮᠢᠨᠢ ᠳ᠋ᠡ᠃ ᠡᠳᠦᠷ ᠬᠣᠨᠣᠭ ᠢᠶᠠᠨ ᠬᠦᠯᠢᠶᠡᠭᠰᠡᠨ ᠬᠥᠭᠰᠢᠨ ᠪᠢ ᠣᠳᠣ ᠶᠠᠭᠤ ᠬᠦᠰᠡᠵᠦ ᠪᠤᠢ ᠶᠢ ᠮᠡᠳᠡᠬᠦ ᠦᠦ᠃ ᠴᠢᠮᠠ ᠶᠢ ᠠᠪᠤᠭᠠᠳ ᠬᠠᠮᠲᠤ ᠳᠤ ᠪᠠᠨ ᠠᠪᠰᠠᠨ ᠳᠤ ᠪᠠᠨ ᠣᠷᠣᠮᠠᠷ ᠪᠠᠶᠢᠨᠠ》 ᠭᠡᠬᠦ ᠳᠦ ᠨᠢ ᠭᠡᠨᠡᠳᠲᠡ ᠮᠢᠨᠦ ᠵᠢᠷᠦᠬᠡ ᠰᠠᠯᠭᠠᠨᠠᠴᠢᠬᠠᠯᠠ᠃ ᠲᠡᠷᠡᠪᠡᠷ ᠴᠠᠰᠢ ᠨᠢ᠂
《ᠪᠢ ᠠᠮᠤᠷ ᠨᠢᠳᠦ ᠠᠨᠢᠵᠤ ᠴᠢᠳᠠᠬᠤ ᠦᠭᠡᠢ ᠨᠢ᠃ ᠴᠢᠮᠠ ᠳᠤ ᠮᠠᠰᠢ ᠶᠡᠬᠡ ᠭᠣᠮᠣᠳᠠᠬᠤ ᠶᠤᠮ᠃ ᠶᠠᠭᠠᠬᠢᠵᠤ ᠬᠠᠶᠢᠷᠠᠯᠠᠵᠤ ᠥᠰᠬᠡᠭᠰᠡᠨ ᠥᠬᠢᠨ ᠪᠢᠯᠡ ᠳ᠋ᠡ᠃ ᠳᠥᠷᠪᠡᠨ ᠬᠠᠨᠠ ᠲᠠᠢ ᠭᠡᠷ ᠲᠤ᠂ ᠬᠦᠢᠲᠡᠨ ᠡᠪᠦᠯ ᠦᠨ ᠰᠥᠨᠢ ᠥᠬᠢᠨ ᠢᠶᠡᠨ ᠬᠠᠭᠤᠷᠠᠶᠢᠯᠠᠬᠤ ᠳᠤ ᠪᠠᠨ ᠳᠠᠭᠠᠷᠠᠴᠢᠬᠠᠬᠤ ᠪᠤᠢ ᠭᠡᠵᠦ ᠪᠤᠷᠬᠠᠨ ᠳᠤ ᠣᠳᠤᠭᠰᠠᠨ ᠡᠪᠦᠭᠡᠨ ᠮᠠᠨᠢ ᠬᠥᠨᠵᠢᠯᠡ ᠪᠡᠨ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠢᠶᠡᠨ ᠨᠥᠮᠥᠷᠴᠥ᠂ ᠲᠡᠷᠡ ᠳᠤᠯᠠᠭᠠᠬᠠᠨ ᠬᠥᠨᠵᠢᠯᠡ ᠶᠢᠨ ᠢᠯᠴᠢᠨ ᠳᠦ ᠨᠢ ᠥᠬᠢᠨ ᠢᠶᠡᠨ ᠬᠠᠭᠤᠷᠠᠶᠢᠯᠠᠳᠠᠭ ᠪᠠᠶᠢᠭᠰᠠᠨ᠃ ᠡᠪᠡᠳᠦᠴᠢᠬᠡᠬᠦ ᠪᠤᠢ᠂ ᠵᠣᠪᠠᠴᠢᠬᠠᠬᠤ ᠪᠤᠢ ᠭᠡᠵᠦ ᠡᠪᠦᠭᠡᠨ ᠪᠢᠳᠡ ᠬᠣᠶᠠᠷ ᠬᠠᠶᠢᠷᠠ ᠶᠢᠨ ᠳᠡᠭᠡᠳᠦ ᠪᠡᠷ ᠪᠥᠭᠡᠴᠡᠶᠢᠯᠡᠵᠦ ᠥᠰᠬᠡᠭᠰᠡᠨ ᠳ᠋ᠡ᠃ ᠲᠡᠷᠡ ᠵᠢᠭᠠᠬᠠᠨ ᠬᠥᠯ᠂ ᠠᠯᠠᠭᠠ ᠶᠢᠨ ᠴᠢᠨᠡᠭᠡᠬᠡᠨ ᠴᠢᠷᠠᠢ᠂ ᠠᠭᠠᠰᠢᠯᠠᠵᠤ ᠢᠨᠢᠶᠡᠵᠦ ᠪᠤᠢ ᠨᠢ ᠣᠳᠣ ᠴᠤ ᠨᠢᠯᠬᠠ ᠪᠠᠷ ᠢᠶᠠᠨ᠃ ᠭᠡᠲᠡᠯᠡ ᠴᠢ ᠶᠠᠭᠠᠬᠢᠵᠤ ᠬᠠᠲᠠᠭᠤ ᠭᠠᠷ ᠬᠦᠷᠲᠡᠭᠡᠵᠦ᠂ ᠬᠠᠷᠢᠶᠠᠯ ᠢᠶᠡᠷ ᠲᠠᠮᠤᠯᠠᠵᠤ ᠵᠣᠪᠠᠭᠠᠵᠤ ᠴᠢᠳᠠᠵᠤ ᠪᠠᠢᠨᠠ ᠡ᠃ ᠴᠢᠨᠤ ᠭᠠᠷ ᠤᠨ ᠡᠳᠡᠭᠦᠷ ᠪᠣᠯᠭᠠᠬᠤ ᠭᠡᠵᠦ ᠥᠬᠢᠨ ᠢᠶᠡᠨ ᠥᠰᠬᠡᠭᠡ ᠤᠤ᠃ ᠥᠬᠢᠨ ᠮᠠᠨᠢ ᠶᠡᠬᠡ ᠵᠣᠪᠠᠯᠠᠩ ᠢ ᠨᠠᠳᠠ ᠠᠴᠠ ᠨᠢᠭᠤᠳᠠᠭ᠃ ᠭᠡᠪᠡᠴᠦ ᠡᠬᠡ ᠶᠢᠨ ᠰᠡᠳᠬᠢᠯ ᠮᠡᠳᠡᠳᠡᠭ ᠶᠤᠮ᠃ ᠲᠡᠷᠲᠡᠭᠡ ᠣᠳᠤᠭᠰᠠᠨ ᠠᠪᠤ ᠨᠢ ᠲᠩᠷᠢ ᠶᠢᠨ ᠣᠷᠣᠨ ᠠᠴᠠ ᠴᠢᠨᠤ ᠦᠢᠯᠡᠳᠦᠯ ᠪᠦᠬᠦᠨ ᠢ ᠬᠠᠷᠠᠭᠠᠳ ᠶᠠᠭᠠᠬᠢᠵᠤ ᠭᠣᠮᠣᠳᠠᠵᠤ ᠪᠤᠢ ᠪᠣᠯ ᠳ᠋ᠠ ᠁ ᠡᠴᠢᠭᠡ ᠶᠢᠨ ᠠᠯᠠᠭᠠᠨ ᠳᠤ ᠪᠠᠭᠳᠠᠭᠰᠠᠨ ᠲᠡᠷᠡ ᠵᠢᠭᠠᠯᠬᠠᠨ ᠪᠡᠶᠡ ᠶᠢ ᠨᠢ ᠬᠥᠬᠡ ᠡᠷᠢᠶᠡᠨ ᠴᠢᠰᠤ ᠪᠠᠷ ᠪᠤᠳᠤᠴᠢᠬᠠᠭᠠᠳ ᠴᠢ ᠡᠷᠡ ᠬᠦᠮᠦᠨ ᠦᠦ᠃ ᠵᠠ ᠶᠠᠭᠠᠬᠢᠬᠤ ᠪᠤᠢ ᠡᠨᠡ ᠮᠢᠨᠦ ᠡᠴᠦᠰ ᠦᠨ ᠬᠠᠲᠠᠭᠤ ᠦᠭᠡ᠃ ᠡᠷᠢᠶᠡᠨ ᠲᠡᠢ ᠪᠠᠷᠠᠭᠠᠨ ᠲᠠᠢ ᠵᠠᠮᠢᠯᠠᠨ ᠳᠤ ᠬᠠᠨᠢ ᠪᠠᠨ ᠣᠯᠵᠤ ᠴᠢᠳᠠᠭᠠ ᠦᠭᠡᠢ ᠮᠢᠨᠦ ᠥᠬᠢᠨ ᠢ ᠡᠵᠡ ᠲᠣᠰᠤᠭᠰᠠᠨ ᠪᠠᠶᠢᠬᠤ᠃ ᠭᠡᠬᠦ ᠳᠦ ᠪᠡᠨ ᠬᠠᠶᠢᠷᠠ ᠶᠢᠨ ᠠᠵᠠ ᠭᠡᠵᠦ ᠪᠤᠢ ᠬᠦᠷᠭᠡᠨ ᠮᠢᠨᠢ ᠁
ᠬᠣᠷᠸᠠ ᠶᠢᠨ ᠵᠢᠮᠠ ᠪᠠᠷ ᠪᠢ ᠣᠳᠣ ᠪᠤᠴᠠᠨᠠ᠃ ᠥᠬᠢᠨ ᠤ ᠬᠢ ᠪᠠᠨ ᠮᠠᠷᠭᠠᠰᠢ ᠨᠥᠭᠥᠭᠡᠳᠦᠷ ᠢ ᠪᠣᠳᠣᠬᠤ ᠪᠠᠷ ᠰᠡᠳᠬᠢᠯ ᠢᠲᠡᠭᠡᠯ ᠨᠢ ᠮᠡᠯᠮᠡᠢ ᠶᠢ ᠮᠢᠨᠢ ᠠᠨᠢᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠨᠢ᠃ ᠴᠢᠮᠠ ᠳᠤ ᠭᠣᠮᠣᠳᠠᠬᠤ ᠡᠯᠡ ᠪᠦᠭᠦᠳᠡ ᠶᠢ ᠲᠡᠭᠡᠭᠡᠭᠡᠳ ᠲᠩᠷᠢ ᠶᠢᠨ ᠣᠷᠣᠨ ᠳᠤ ᠬᠥᠭᠰᠢᠨ ᠲᠡᠢ ᠪᠡᠨ ᠠᠭᠤᠯᠵᠠᠬᠤ ᠪᠠᠷ ᠮᠢᠨᠦ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠶᠢ ᠮᠡᠳᠡᠵᠦ ᠪᠠᠶᠢᠨᠠ ᠤᠤ᠃ ᠪᠦᠰᠡᠭᠦᠢ ᠬᠦᠮᠦᠨ ᠢ ᠲᠠᠷᠴᠢᠯᠠᠭᠠᠬᠤ ᠲᠤᠰᠤᠮ ᠪᠤᠷᠬᠠᠨ ᠴᠢᠮᠠ ᠶᠢ ᠶᠠᠯᠠᠯᠠᠳᠠᠭ ᠶᠤᠮ ᠰᠢᠦ ᠳ᠋ᠡ᠃ ᠠᠴᠢ᠂ ᠵᠢᠭᠡ ᠨᠠᠷ ᠤᠨ ᠮᠢᠨᠢ ᠡᠴᠢᠭᠡ ᠶᠤᠮ ᠪᠣᠯᠬᠣᠷ ᠴᠢᠮᠠ ᠳᠤ ᠬᠣᠷᠣᠰᠴᠤ᠂ ᠦᠵᠡᠨ ᠶᠠᠳᠠᠬᠤ ᠦᠭᠡᠢ ᠡ᠃ ᠭᠡᠬᠦ ᠳᠦ ᠪᠡᠨ ᠥᠬᠢᠨ ᠢᠶᠡᠨ ᠪᠣᠳᠣᠬᠤ ᠪᠠᠷ ᠴᠢᠮᠠ ᠲᠠᠢ ᠯᠠ ᠬᠠᠮᠲᠤ ᠲᠡᠰᠢ ᠪᠡᠨ ᠶᠠᠪᠤᠮᠠᠷ ᠪᠤᠢ᠃ ᠮᠠᠷᠭᠠᠰᠢ ᠨᠠᠮᠠ ᠶᠢ ᠪᠤᠯᠠᠴᠢᠬᠠᠨᠠ᠃ ᠨᠥᠭᠥᠭᠡᠳᠦᠷ ᠥᠬᠢᠨ ᠢ ᠮᠢᠨᠢ ᠲᠠᠷᠴᠢᠯᠠᠭᠠᠪᠠᠯ ᠲᠡᠨᠳᠡ ᠨᠠᠳᠠ ᠳᠤ ᠰᠣᠨᠣᠰᠤᠭᠳᠠᠨᠠ᠃ ᠶᠠᠭ ᠢᠩᠭᠢᠵᠦ ᠪᠣᠳᠣᠭᠠᠳ ᠰᠡᠳᠬᠢᠯ ᠢᠲᠡᠭᠡᠯ ᠨᠢ ᠦᠬᠦᠯ ᠤᠷᠤᠭᠤ ᠴᠢᠷᠬᠦ ᠪᠡᠷ ᠡᠨᠡ ᠮᠡᠯᠮᠡᠢ ᠨᠢ ᠲᠠᠶᠢᠪᠤᠩ ᠠᠨᠢᠵᠤ ᠴᠢᠳᠠᠬᠤ ᠦᠭᠡᠢ ᠲᠠᠷᠴᠢᠯᠠᠨᠠ᠃ ᠴᠢ ᠪᠠᠰᠠ ᠨᠠᠮᠠ ᠶᠢ ᠴᠤ ᠲᠠᠮᠤᠯᠠᠨᠠ᠃ ᠵᠠ ᠲᠡᠭᠡᠭᠡᠳ ᠭᠠᠷ ᠳ᠋ᠠ ᠁》 ᠭᠡᠵᠦ ᠬᠡᠯᠡᠵᠦ ᠪᠢᠯᠡ᠃ ᠡᠶᠢᠨᠬᠦᠦ ᠤᠳᠠᠭᠰᠠᠨ ᠦᠭᠡᠢ ᠬᠠᠳᠠᠮ ᠡᠵᠢ ᠮᠢᠨᠢ ᠪᠤᠷᠬᠠᠨ ᠪᠣᠯᠤᠭᠰᠠᠨ ᠳ᠋ᠠ᠃ ᠲᠡᠭᠡᠬᠦ ᠳᠦ ᠪᠡᠨ ᠬᠠᠮᠤᠭ ᠤᠨ ᠰᠡᠭᠦᠯ ᠦᠨ ᠠᠮᠠᠨ ᠠᠴᠠ ᠨᠢ ᠭᠠᠷᠤᠭᠰᠠᠨ ᠦᠭᠡ 《 ᠭᠠᠷ ᠳ᠋ᠡ ᠁》
----ᠬᠠᠳᠠᠮ ᠡᠵᠢ ᠥᠩᠭᠡᠷᠡᠭᠰᠡᠨ ᠡᠴᠡ ᠬᠣᠶᠢᠰᠢ ᠪᠢ ᠡᠯᠡ ᠠᠮᠢᠳᠤᠷᠠᠯ ᠢ ᠲᠡᠷᠡ ᠴᠢᠭ ᠢᠶᠡᠷ ᠨᠢ ᠨᠣᠮ ᠠᠳᠠᠯᠢ ᠤᠩᠰᠢᠬᠤ ᠶᠢ ᠬᠢᠴᠢᠶᠡᠭᠰᠡᠨ᠃ ᠣᠷᠣᠢ ᠤᠷᠤᠭᠤ ᠣᠷᠣᠲᠠᠯᠠ ᠵᠢᠷᠦᠬᠡ ᠤᠷᠤᠭᠤ ᠬᠠᠳᠬᠣᠲᠠᠯᠠ ᠬᠠᠲᠠᠭᠤ ᠦᠭᠡ ᠬᠡᠯᠡᠭᠡᠳ ᠣᠳᠴᠠᠢ᠃ ᠡᠵᠢ ᠮᠢᠨᠢ ᠁
ᠲᠡᠭᠦᠨ ᠡᠴᠡ ᠬᠣᠶᠢᠰᠢ ᠳᠥᠷᠪᠡᠨ ᠬᠠᠪᠤᠷ ᠤᠯᠠᠷᠢᠵᠠᠢ᠃ ᠬᠠᠨᠢ ᠮᠢᠨᠢ 40 ᠢᠯᠡᠭᠦᠦ ᠨᠠᠰᠤᠨ ᠳᠤ ᠪᠠᠨ ᠨᠢᠷᠠᠶᠢᠯᠠᠵᠤ᠂ ᠭᠠᠷ ᠲᠤ ᠮᠢᠨᠢ ᠭᠠᠩᠭᠠᠩᠳᠠᠬᠤ ᠪᠠᠷ᠂ ᠬᠣᠰᠢᠭᠤᠨ ᠳᠤ ᠮᠢᠨᠢ ᠠᠷᠢᠭᠤᠠᠳᠠᠬᠤ ᠪᠠᠷ ᠬᠥᠭᠡᠷᠦᠬᠦᠨ ᠥᠬᠢᠨ ᠲᠥᠷᠦᠭᠦᠯᠦᠭᠰᠡᠨ᠃ ᠪᠢ ᠡᠬᠡᠨᠡᠷ ᠲᠦ ᠪᠡᠨ ᠭᠠᠷ ᠬᠦᠷᠬᠦ ᠪᠡᠨ ᠪᠦᠷ ᠪᠣᠯᠢᠭᠰᠠᠨ᠃ ᠬᠠᠨᠢ ᠮᠢᠨᠢ ᠠᠭᠠᠰᠢᠯᠠᠭᠠᠳ ᠯᠠ᠂ ᠬᠠᠰᠬᠢᠷᠤᠭᠠᠳ ᠯᠠ᠂ ᠵᠠᠷᠢᠮ ᠳᠤ ᠪᠠᠨ ᠨᠠᠮᠠ ᠶᠢ ᠡᠯᠳᠡᠭᠦᠷᠳᠡᠴᠢᠬᠡᠨᠡ᠃ ᠬᠠᠷᠢᠨ ᠰᠡᠳᠬᠢᠯ ᠮᠢᠨᠢ ᠨᠠᠳᠠ ᠳᠤ 《 ᠣᠳᠣ ᠴᠢᠨᠦ ᠡᠭᠡᠯᠵᠢ ᠁》ᠬᠡᠮᠡᠨ ᠳᠠᠮᠰᠢᠭᠯᠠᠨᠠ᠃ ᠠᠭᠠᠰᠢᠯᠠᠵᠤ ᠭᠥᠵᠢᠭᠦᠳᠯᠡᠴᠢᠬᠡᠭᠡᠳ᠂ ᠰᠥᠨᠢ ᠳᠦ ᠪᠡᠨ ᠬᠦᠢᠲᠡᠨ ᠬᠥᠯ ᠢᠶᠡᠨ ᠭᠤᠶᠠᠨ ᠤ ᠵᠠᠪᠰᠠᠷ ᠬᠠᠪᠴᠢᠭᠤᠯᠤᠭᠠᠳ᠂ ᠳᠤᠯᠠᠭᠠᠬᠠᠨ ᠡᠩᠭᠡᠷ ᠲᠦ ᠮᠢᠨᠢ ᠬᠣᠰᠢᠭᠤ ᠪᠠᠨ ᠨᠠᠭᠠᠭᠠᠳ᠂ ᠲᠠᠶᠢᠪᠤᠩ ᠭᠡᠭᠴᠢ ᠨᠣᠶᠢᠷᠰᠤᠵᠤ ᠪᠤᠢ ᠡᠵᠢ ᠶᠢᠨ ᠥᠬᠢᠨ᠂ ᠠᠪᠤ ᠶᠢᠨ ᠦᠷᠡ ᠶᠢ ᠪᠢ ᠶᠠᠭᠠᠬᠢᠵᠤ ᠭᠤᠲᠤᠭᠠᠵᠤ᠂ ᠬᠠᠷᠢᠶᠠᠵᠤ᠂ ᠳᠣᠷᠣᠮᠵᠢᠯᠠᠵᠤ᠂ ᠬᠠᠲᠠᠭᠤ ᠭᠠᠷ ᠢ ᠬᠦᠷᠲᠡᠭᠡᠳᠡᠭ ᠪᠠᠶᠢᠪᠠ ᠡ᠃ ᠪᠣᠯᠳᠠᠭ ᠪᠣᠯ ᠬᠡᠯᠡᠭᠰᠡᠨ ᠠᠮᠠ ᠤᠷᠤᠭᠤ ᠪᠠᠨ ᠪᠠᠭᠠᠰᠤ ᠴᠢᠬᠡᠵᠦ ᠬᠢᠭᠰᠡᠨ ᠦᠢᠯᠡᠳᠦᠯ ᠪᠦᠷᠢ ᠳᠦ ᠪᠠᠨ ᠡᠨᠡ ᠰᠠᠷᠪᠠᠤ ᠶᠢ ᠪᠢᠴᠠᠷᠠᠲᠠᠯᠠ ᠨᠢ ᠨᠦᠳᠦᠬᠥ ᠰᠠᠨ ᠳ᠋ᠡ᠃ ᠬᠠᠶᠢᠷᠠᠨ ᠰᠠᠶᠢᠬᠠᠨ ᠣᠨ ᠵᠢᠯ ᠦᠳ ᠲᠦ ᠬᠠᠨᠢ ᠶᠢᠨ ᠢᠶᠠᠨ ᠮᠡᠯᠮᠡᠶᠢᠨ ᠡᠴᠡ ᠬᠠᠷᠠᠮᠰᠠᠯ ᠳᠤ ᠰᠢᠭᠦᠭᠳᠡᠭᠰᠡᠨ ᠭᠠᠰᠢᠭᠤᠨ ᠨᠢᠯᠪᠤᠰᠤ ᠶᠢ ᠬᠡᠴᠢᠨᠡᠨ ᠤᠷᠤᠰᠬᠠᠪᠠ ᠳ᠋ᠠ᠃ ᠪᠤᠷᠬᠠᠨ ᠨᠠᠮᠠ ᠶᠢ ᠶᠠᠯᠠᠯᠠᠭ ᠡ ᠬᠠᠮᠢᠶᠠ ᠦᠭᠡᠢ ᠪᠢ ᠠᠶᠤᠬᠤ ᠦᠭᠡᠢ ᠡ᠃ ᠬᠠᠲᠠᠭᠤ ᠶᠠᠯᠠ ᠶᠢ ᠵᠥᠭᠡᠯᠡᠷᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠦᠯᠡᠳᠡᠭᠰᠡᠨ ᠭᠡᠬᠦ ᠠᠮᠢᠳᠤᠷᠠᠯ ᠳᠤ ᠪᠠᠨ ᠬᠢᠴᠢᠶᠡᠨᠡ ᠡ᠃ ᠡᠨᠡ ᠮᠢᠨᠦ ᠠᠮᠢᠳᠤᠷᠠᠯ ᠤᠨ ᠲᠣᠮᠣ ᠰᠤᠷᠭᠠᠮᠵᠢ ᠡ᠃
---《ᠠᠪᠰᠠᠨ ᠳᠤ ᠪᠠᠨ ᠠᠪᠤᠭᠠᠳ ᠣᠷᠣᠴᠢᠬᠠᠮᠠᠷ ᠪᠤᠢ᠃ ᠭᠠᠷ ᠳ᠋ᠠ ᠁》 ᠭᠡᠬᠦ ᠡᠵᠢ ᠲᠠᠨ ᠤ ᠰᠡᠭᠦᠯᠴᠢ ᠶᠢᠨ ᠮᠥᠴᠡ ᠳᠦ ᠬᠡᠯᠡᠭᠰᠡᠨ ᠦᠭᠡ ᠠᠮᠢᠳᠤᠷᠠᠯ ᠳᠤ ᠶᠠᠮᠠᠷ ᠶᠡᠬᠡ ᠤᠬᠠᠭᠠᠷᠠᠯ ᠥᠭᠪᠡ ᠳ᠋ᠡ᠃ ᠬᠡᠵᠢᠶᠡ ᠴᠤ ᠣᠶᠢᠯᠠᠭᠠᠬᠤ ᠦᠭᠡᠢ᠂ ᠴᠡᠪᠳᠡᠭᠰᠡᠨ ᠰᠡᠳᠬᠢᠯ ᠳᠦ ᠭᠠᠭᠴᠠᠬᠠᠨ ᠦᠭᠡ ᠡᠶᠢᠨᠬᠦᠦ ᠁
᠁ ᠲᠠ ᠬᠣᠶᠠᠷ ᠮᠢᠨᠢ ᠲᠩᠷᠢ ᠶᠢᠨ ᠣᠷᠣᠨ ᠠᠴᠠ ᠬᠠᠷᠠᠵᠤ ᠪᠠᠶᠢᠨᠠ ᠤᠤ ᠁ ᠠᠮᠠ ᠪᠦᠯᠢ ᠮᠠᠨᠢ ᠨᠡᠮᠡᠭᠳᠡᠭᠡᠳ ᠬᠥᠭᠡᠷᠦᠬᠦᠨ ᠥᠬᠢᠨ ᠲᠠᠢ ᠪᠣᠯᠤᠭᠰᠠᠨ᠃ ᠪᠢᠴᠢᠬᠠᠨ ᠥᠬᠢᠨ ᠤ ᠬᠢ ᠪᠠᠨ ᠲᠡᠷᠡ ᠬᠥᠷ ᠪᠠᠶᠠᠰᠤᠯ ᠢ ᠬᠠᠷᠠᠬᠤ ᠪᠠᠷ ᠲᠣᠮᠣ ᠪᠣᠯᠤᠭᠠᠳ ᠠᠪᠤᠷᠢ ᠠᠷᠬᠢᠷᠠᠭᠰᠠᠨ ᠠᠷᠢᠶᠠᠲᠠᠨ ᠤ ᠭᠠᠷ ᠲᠤ ᠣᠴᠢᠴᠢᠬᠠᠬᠤ ᠶᠤᠮ ᠪᠢᠰᠢ ᠪᠢᠵᠡ ᠬᠡᠮᠡᠨ ᠪᠣᠳᠣᠵᠤ ᠪᠠᠴᠢᠭᠤᠷᠠᠬᠤ ᠳᠤ ᠡᠵᠢ ᠲᠠᠨ ᠤ 《 ᠠᠪᠰᠠᠨ ᠳᠤ ᠪᠠᠨ ᠴᠢᠮᠠ ᠶᠢ ᠠᠪᠤᠭᠠᠳ ᠣᠷᠣᠮᠠᠷ ᠁》 ᠭᠡᠬᠦ ᠦᠭᠡ ᠠᠷᠢᠭᠤᠨ ᠪᠠᠶᠢᠵᠠᠢ᠃
--ᠪᠣᠯᠤᠭᠠ ᠦᠭᠡᠢ ᠤᠴᠠᠷᠠᠯ ᠳᠤ ᠶᠠᠭᠠᠷᠠᠨ ᠪᠠᠶᠢᠵᠤ ᠢᠷᠡᠭᠡᠳᠦᠢ ᠶᠢᠨ ᠲᠡᠷᠡ ᠬᠦᠷᠭᠡᠨ ᠮᠢᠨᠦ ᠵᠠᠯᠠᠭᠤ ᠨᠠᠰᠤᠨ ᠤ ᠬᠠᠬᠢᠷ ᠢ ᠬᠠᠷᠠᠭᠤᠯᠤᠨᠠ ᠭᠡᠵᠦ ᠪᠣᠳᠣᠬᠤ ᠪᠠᠷ ᠯᠠ ᠣᠳᠣ ᠴᠤ ᠠᠯᠠᠯᠴᠠᠬᠤ ᠳᠤ ᠪᠡᠯᠡᠭᠡᠨ᠃ ᠢᠩᠭᠢᠵᠦ ᠯᠠ ᠥᠬᠢᠨ ᠦᠷᠡ ᠪᠡᠨ ᠬᠠᠶᠢᠷᠠᠯᠠᠵᠤ ᠬᠠᠮᠠᠭᠠᠯᠠᠵᠤ ᠥᠷᠥᠪᠳᠥᠨᠡ᠃ ᠠᠪᠤ᠂ ᠡᠵᠢ᠂ ᠲᠠ ᠬᠣᠶᠠᠷ ᠤᠨ ᠮᠢᠨᠢ ᠡᠶᠢᠮᠦ ᠭᠡᠭᠡᠨ ᠬᠠᠶᠢᠷᠠ ᠶᠢ ᠨᠢ ᠪᠢ ᠲᠠᠷᠴᠢᠯᠠᠭᠠᠵᠤ ᠪᠠᠶᠢᠭᠰᠠᠨ ᠭᠡᠵᠦ ᠪᠣᠳᠣᠬᠤ ᠪᠠᠷ ᠁
᠁ ᠠᠭᠤᠴᠢᠯᠠᠭᠠᠷᠠᠢ ᠪᠠᠰᠠ ᠭᠦᠨᠡ ᠥᠷᠥᠰᠢᠶᠡ ᠬᠦᠷᠭᠡᠨ ᠢᠶᠡᠨ ᠁ ᠬᠡᠮᠡᠭᠡᠳ ᠭᠠᠰᠢᠭᠤᠨ ᠠᠷᠢᠬᠢ ᠶᠢ ᠨᠢᠭᠡ ᠬᠥᠨᠲᠦᠷᠦᠴᠢᠬᠡᠪᠡ᠃
--- ᠶᠡᠷᠦᠨᠢ ᠬᠦᠮᠦᠨ ᠭᠡᠭᠴᠢ ᠠᠳᠠᠭ ᠤᠨ ᠠᠷᠠᠨᠰᠢᠨ ᠢᠶᠠᠨ ᠬᠠᠵᠠᠭᠤᠳᠠ ᠬᠢ ᠬᠠᠨᠢ ᠳ᠋ᠠᠭᠠᠨ ᠭᠠᠷᠭᠠᠳᠠᠭ ᠶᠤᠮ ᠪᠢᠯᠡ᠃ ᠬᠠᠲᠠᠭᠤ ᠦᠭᠡ ᠪᠡᠷ ᠳᠠᠭᠠᠷᠢᠵᠤ᠂ ᠬᠠᠷᠭᠢᠰ ᠦᠢᠯᠡᠳᠦᠯ ᠢ ᠦᠵᠡᠭᠦᠯᠳᠡᠭ᠃ ᠭᠡᠲᠡᠯᠡ ᠲᠡᠷᠡ ᠮᠢᠨᠢ ᠡᠵᠢ᠂ ᠠᠪᠤ ᠶᠢᠨ ᠠᠮᠢᠨ ᠰᠦᠨᠡᠰᠦ ᠰᠢᠭ ᠢᠶᠡᠨ ᠬᠠᠶᠢᠷᠠᠯᠠᠵᠤ ᠥᠰᠬᠡᠭᠰᠡᠨ᠂ ᠬᠠᠶᠢᠷᠠ ᠰᠢᠩᠭᠡᠭᠰᠡᠨ᠂ ᠳᠡᠯᠪᠢ ᠨᠢ ᠭᠦᠢᠴᠡᠵᠦ ᠥᠩᠭᠡ ᠠᠯᠠᠭᠯᠠᠭᠰᠠᠨ᠂ ᠦᠨᠦᠷᠲᠦ ᠰᠠᠶᠢᠬᠠᠨ ᠴᠡᠴᠡᠭᠡᠰ ᠢ ᠨᠢ ᠠᠷᠠᠴᠢᠭᠠ ᠦᠭᠡᠢ ᠪᠢᠳᠡᠨ ᠡᠷᠡᠴᠦᠳ ᠯᠠ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠳᠡᠯᠪᠢ ᠶᠢ ᠨᠢ ᠲᠠᠰᠤᠯᠬᠤ ᠦᠭᠡᠢ ᠪᠦᠷ ᠴᠢᠮᠬᠢ ᠴᠢᠮᠬᠢ ᠪᠡᠷ ᠲᠠᠰᠤᠷ ᠲᠠᠲᠠᠵᠤ᠂ᠲᠠᠮᠤᠯᠠᠳᠠᠭ ᠶᠤᠮ ᠪᠠᠶᠢᠨᠠ ᠰᠢᠦ ᠳ᠋ᠡ ᠁
--- ᠵᠠᠭᠤᠨ ᠭᠷᠠᠮ ᠲᠠᠲᠠᠴᠢᠬᠠᠭᠠᠳ ᠥᠬᠢᠨ ᠤ ᠬᠢ ᠪᠠᠨ ᠥᠷᠥᠭᠡᠨ ᠳᠦ ᠣᠷᠣᠯᠠ᠃ ᠵᠢᠭᠠᠬᠠᠨ ᠨᠢᠯᠬᠠ ᠥᠬᠢᠨ ᠦᠷᠡ ᠮᠢᠨᠢ ᠦᠨᠡᠭᠡᠴᠢᠯᠡᠨ ᠤᠨᠲᠠᠨᠠ᠃ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠦᠷᠡ ᠮᠢᠨᠢ᠂ ᠥᠬᠢᠨ ᠮᠢᠨᠢ ᠰᠠᠶᠢᠨ ᠯᠠ ᠬᠦᠮᠦᠨ ᠲᠡᠢ ᠬᠤᠪᠢ ᠵᠠᠶᠠᠭᠠ ᠪᠠᠨ ᠬᠣᠯᠪᠣᠭᠠᠷᠠᠢ ᠬᠡᠮᠡᠨ ᠴᠢᠬᠢᠨ ᠳᠦ ᠨᠢ ᠰᠢᠪᠡᠨᠡᠯᠡ᠃
--- ᠪᠤᠷᠬᠠᠨ ᠮᠢᠨᠢ ᠬᠠᠨᠢ ᠪᠠᠨ ᠵᠣᠪᠠᠭᠠᠵᠤ ᠪᠠᠶᠢᠭᠰᠠᠨ ᠢ ᠮᠢᠨᠢ ᠬᠠᠲᠠᠭᠤ ᠶᠠᠯᠠᠯᠠᠭᠠᠷᠠᠢ᠃ ᠬᠣᠶᠢᠳᠣ ᠨᠠᠰᠤᠨ ᠤ ᠡᠯᠡ ᠰᠢᠳᠬᠡᠯ ᠡᠴᠡ ᠪᠢ ᠵᠢᠭᠤᠲᠠᠬᠤ ᠦᠭᠡᠢ ᠡ᠃ ᠥᠬᠢᠨ ᠢ ᠮᠢᠨᠢ ᠰᠠᠶᠢᠨ ᠯᠠ ᠬᠠᠨᠢ ᠲᠠᠢ ᠪᠣᠯᠭᠠᠵᠤ ᠥᠭᠭᠦᠭᠡᠷᠡᠢ᠃ ᠬᠠᠨᠢ ᠪᠠᠨ ᠬᠠᠬᠢᠷᠳᠠᠭᠰᠠᠨ ᠬᠠᠲᠠᠭᠤ ᠶᠠᠯᠠ ᠶᠢ ᠮᠢᠨᠢ ᠨᠠᠳᠠ ᠳ᠋ᠤ ᠡᠭᠦᠷᠦᠭᠦᠯᠵᠦ᠂ ᠬᠠᠷᠢᠭᠤ ᠳ᠋ᠤ ᠨᠢ ᠥᠬᠢᠨ ᠤ ᠮᠢᠨᠢ ᠬᠤᠪᠢ ᠵᠠᠶᠠᠭᠠ ᠶᠢ ᠵᠢᠷᠭᠠᠯ ᠢᠶᠠᠷ ᠪᠢᠯᠬᠠᠭᠤᠯᠵᠤ ᠵᠥᠭᠡᠯᠡᠷᠡᠭᠦᠯᠵᠦ ᠥᠭᠭᠦᠭᠡᠷᠡᠢ ᠁ ᠭᠤᠶᠤᠶᠠ ᠁ ᠪᠤᠷᠬᠠᠨ ᠮᠢᠨᠢ ᠁
----ᠡᠵᠢ ᠠᠪᠤ ᠮᠢᠨᠢ ᠥᠷᠥᠰᠢᠶᠡᠭᠡᠷᠡᠢ᠃ ᠬᠡᠵᠢᠶᠡ ᠬᠣᠶᠢᠨᠠ ᠲᠠ ᠬᠣᠶᠠᠷ ᠳᠡᠭᠡᠷᠡ ᠪᠡᠨ ᠣᠴᠢᠬᠤ ᠬᠤᠪᠢ ᠦᠭᠡᠢ ᠴᠤ ᠲᠠᠮᠤ ᠶᠢᠨ ᠶᠠᠯᠠ ᠪᠠᠨ ᠪᠦᠷᠢᠨ ᠡᠳ᠋ᠯᠡᠴᠢᠬᠡᠭᠡᠳ ᠨᠢᠭᠤᠷ ᠪᠠᠷᠳᠠᠮ ᠲᠩᠷᠢ ᠶᠢᠨ ᠪᠤᠶᠠᠨ ᠤ ᠬᠠᠭᠠᠯᠭᠠ ᠶᠢ ᠲᠣᠭᠰᠢᠬᠤ ᠪᠣᠯᠤᠨᠠ ᠡ᠃
᠁ ᠥᠬᠢᠨ ᠤ ᠮᠢᠨᠢ ᠯᠠ ᠢᠷᠡᠭᠡᠳᠦᠢ ᠶᠢᠨ ᠰᠠᠶᠢᠨ ᠬᠠᠨᠢ ᠶᠢ ᠢᠯᠡᠭᠡᠵᠦ ᠶᠠᠪᠤᠭᠤᠯᠤᠨᠠ ᠤᠤ ᠁ ᠥᠬᠢᠨ ᠦᠷᠡ ᠮᠢᠨᠢ ᠁ ᠡᠪᠡᠢ ᠳ᠋ᠡ᠃ ᠨᠢᠯᠬᠠ ᠪᠡᠷ ᠢᠶᠡᠨ ᠶᠤᠮ ᠰᠢᠦ ᠳ᠋ᠡ᠃
ᠪᠠᠰᠠ ᠬᠠᠨᠢ ᠶᠢᠨ ᠬᠢ ᠪᠠᠨ ᠰᠡᠳᠬᠢᠯ ᠦᠨ ᠬᠢ ᠭᠦᠨ ᠳ᠋ᠤ ᠨᠢ᠂ ᠵᠢᠷᠦᠬᠡᠨ ᠦ ᠬᠢ ᠪᠡᠨ ᠴᠣᠬᠢᠯᠲᠠ ᠶᠢᠨ ᠲᠣᠭᠠ ᠪᠡᠷ ᠢᠶᠡᠨ ᠥᠷᠥᠰᠢᠶᠡᠯ ᠡᠷᠢᠨᠡᠮ᠃
ᠲᠦᠮᠡᠲᠦ ᠰᠢᠨᠡ ᠬᠥᠷᠪᠡᠭᠦᠯᠪᠡ
15 0