ᠲᠤᠭᠤᠵᠢ
ᠥᠬᠢᠨ ︵ ᠦᠭᠦᠯᠡᠯᠭᠡ ︶
ᠰᠡᠳᠭᠢᠯ ᠳᠦ ᠬᠦᠷᠦᠭᠰᠡᠨ ᠥᠭᠦᠯᠡᠯᠭᠡ ᠹᠸᠢᠰᠪᠦᠦᠺ ᠪᠦᠯᠦᠭ ᠤᠨ ᠪᠦᠲᠦᠭᠡᠯ
5032
2018-10-02 11:27
发表于:内蒙古
ᠴ ∙ ᠭᠠᠯᠰᠠᠩ
ᠥᠬᠢᠨ
ᠲᠡᠷᠡ ᠥᠬᠢᠨ ᠥᠨᠥᠬᠢ ᠯᠠ᠂ ᠨᠥᠬᠥᠳ ᠦᠨ ᠬᠤᠪᠢ ᠳᠤ ᠣᠶᠢᠷᠠᠳᠬᠤ ᠶᠢᠨ᠂ ᠪᠠᠭᠰᠢ ᠨᠠᠷ ᠤᠨ ᠬᠤᠪᠢ ᠳᠤ ᠥᠯᠡᠬᠦ ᠶᠢᠨ ᠠᠷᠭᠠ ᠦᠭᠡᠢ ᠴᠡᠮᠴᠡᠭᠡᠷ᠂ ᠴᠢᠮᠪᠠᠢ ᠪᠠᠶᠢᠳᠠᠯ ᠢ ᠢᠯᠡᠳᠬᠡᠨ ᠰᠠᠭᠤᠨᠠ᠃ ᠬᠠᠷᠠᠴᠠ ᠨᠢ ᠡᠮᠦᠨᠡᠬᠢ ᠰᠠᠮᠪᠠᠷᠠ ᠠᠴᠠ ᠦᠶᠡ ᠦᠶᠡ ᠣᠢ ᠶᠢᠨ ᠬᠠᠵᠠᠭᠤ ᠶᠢᠨ ᠬᠡᠯᠬᠢᠶᠡ ᠲᠡᠢ ᠠᠷᠤᠭ ᠶᠠᠰᠤᠨ ᠳᠡᠭᠡᠷᠡ ᠲᠤᠰᠬᠤ ᠳᠤ ᠪᠠᠨ ᠲᠡᠨᠳᠡ ᠡᠴᠡ ᠨᠢᠭᠡ ᠶᠢ ᠡᠷᠢᠬᠦ ᠮᠡᠲᠦ ᠴᠣᠷᠭᠢᠲᠠᠯᠠ ᠰᠢᠷᠲᠡᠨᠡ᠃ ᠤᠬᠠᠭᠠᠨ ᠪᠣᠳᠣᠯ ᠨᠢ ᠦᠨᠡᠬᠡᠷ ᠯᠠ ᠦᠷᠭᠦᠯᠵᠢ ᠶᠢᠨ ᠡᠷᠢᠯ ᠳᠦ᠂ ᠬᠣᠷᠸᠠ ᠳᠤ ᠥᠩᠭᠡᠷᠡᠭᠦᠯᠦᠭᠰᠡᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠨᠠᠰᠤᠨ ᠤ ᠬᠢ ᠪᠠᠨ ᠬᠣᠨᠣᠭ᠂ ᠴᠠᠭ ᠪᠦᠷᠢ ᠶᠢᠨ ᠬᠣᠶᠢᠨᠠ ᠠᠴᠠ ᠨᠡᠬᠡᠨ ᠪᠡᠳᠡᠷᠢᠨᠡᠮ ᠠᠵᠡᠢ᠃
ᠬᠥᠭᠰᠢᠨ ᠠᠪᠤ᠂ ᠡᠵᠢ ᠲᠡᠢ ᠪᠠᠶᠢᠭᠰᠠᠨ ᠢᠶᠠᠨ ᠲᠠᠮ ᠲᠤᠮ ᠰᠠᠨᠠᠵᠤ ᠪᠠᠶᠢᠪᠠ᠃
ᠴᠢᠷᠠᠢ ᠵᠢᠰᠦ ᠨᠢ ᠰᠠᠨᠠᠭᠠᠨ ᠳᠤ ᠪᠠᠭᠤᠵᠤ ᠥᠭᠭᠦ ᠦᠭᠡᠢ ᠮᠥᠷᠲᠡᠯᠡ ᠳᠠᠭᠤ ᠨᠢ ᠬᠠᠷᠢᠨ ᠴᠢᠬᠢᠨ ᠳᠦ ᠦᠯᠡᠳᠡᠴᠢᠬᠡᠭᠰᠡᠨ ᠪᠠᠶᠢᠳᠠᠭ᠃ ᠲᠡᠷᠡ ᠨᠢ ᠭᠡᠬᠦ ᠳᠦ ᠪᠡᠨ ᠠᠪᠤ ᠨᠢ ᠭᠡᠳᠡᠭ ᠭᠠᠭᠴᠠᠬᠠᠨ ᠦᠭᠡ ᠪᠠᠶᠢᠭᠰᠠᠨ ᠶᠤᠮ ᠰᠢᠭ᠃ ᠳᠠᠩᠴᠤ ᠲᠡᠷᠡ ᠠᠪᠤ ᠭᠡᠭᠴᠢ ᠶᠠᠮᠠᠷ ᠬᠦᠮᠦᠨ ᠪᠠᠶᠢᠭᠰᠠᠨ ᠢ ᠣᠢ ᠤᠬᠠᠭᠠᠨ ᠠᠴᠠ ᠪᠠᠨ ᠡᠷᠢᠭᠡᠳ ᠡᠷᠢᠭᠡᠳ ᠣᠯᠳᠠᠭ ᠦᠭᠡᠢ᠃ ᠬᠠᠷᠢᠨ ᠠᠪᠤ ᠶᠢᠨ ᠲᠤᠬᠠᠢ ᠪᠣᠳᠣᠬᠤ ᠲᠤᠰᠤᠮ ᠪᠠᠰᠠ ᠯᠠ ᠨᠢᠭᠡᠨ ᠳᠠᠭᠤᠤ᠂ ᠨᠢᠭᠡᠨ ᠠᠶᠠᠯᠭᠤ ᠴᠢᠬᠢᠨ ᠳᠦ ᠨᠢ ᠭᠡᠨᠡᠳᠲᠡ ᠬᠠᠩᠬᠢᠨᠠᠬᠤ ᠰᠢᠭ᠃
ᠡᠵᠢ ᠶᠢᠨ ᠲᠤᠬᠠᠢ ᠮᠡᠳᠡᠬᠦ ᠴᠤ᠂ ᠪᠣᠳᠣᠬᠤ ᠴᠤ ᠶᠠᠭᠤᠮᠠ ᠰᠡᠳᠬᠢᠯ ᠳᠦ ᠨᠢ ᠪᠠᠶᠢᠭᠰᠠᠨ ᠦᠭᠡᠢ᠃ ᠲᠡᠷᠡ ᠨᠢᠭᠡ ᠡᠳᠦᠷ ᠲᠡᠷᠡ ᠨᠢᠭᠡ ᠵᠠᠬᠢᠳᠠᠯ ᠢᠷᠡᠭᠡ ᠦᠭᠡᠢ ᠪᠣᠯ ᠲᠡᠷᠡ ᠴᠢᠭ ᠢᠶᠡᠷ ᠢᠶᠡᠨ ᠯᠠ ᠪᠠᠶᠢᠭᠠᠳ ᠪᠠᠶᠢᠬᠤ᠂ ᠠᠰᠠᠷᠠᠮᠵᠢ ᠶᠢᠨ ᠰᠤᠷᠭᠠᠭᠤᠯᠢ ᠶᠢᠨ ᠬᠡᠦᠬᠡᠳ ᠦᠨ ᠵᠢᠷᠭᠠᠯ ᠲᠠᠢ ᠪᠢᠰᠢ ᠴᠤ᠂ ᠵᠣᠪᠠᠯᠠᠩ ᠲᠠᠢ ᠴᠤ ᠪᠠᠰᠠ ᠪᠢᠰᠢ ᠨᠢᠭᠡᠨ ᠬᠡᠪ ᠦᠨ ᠡᠳᠦᠷ ᠬᠣᠨᠣᠭ ᠤᠳ ᠢ ᠦᠷᠭᠦᠯᠵᠢᠯᠡᠭᠦᠯᠦᠭᠰᠡᠭᠡᠷ ᠶᠠᠮᠠᠷ ᠨᠢᠭᠡᠨ ᠰᠤᠷᠭᠠᠭᠤᠯᠢ ᠳᠤ ᠤᠷᠤᠬᠤ᠂ ᠡᠰᠡᠪᠡᠯ ᠬᠠᠮᠢᠭᠠ ᠨᠢᠭᠡᠲᠡᠭᠡ ᠠᠵᠢᠯ ᠬᠢᠬᠦ᠂ ᠲᠡᠭᠡᠭᠡᠳ ᠴᠠᠭ ᠨᠢ ᠪᠣᠯᠬᠤ ᠳᠤ ᠬᠡᠨ ᠨᠢᠭᠡᠨ ᠲᠡᠢ ᠨᠡᠶᠢᠯᠡᠵᠦ ᠬᠡᠦᠬᠡᠳ ᠲᠥᠷᠥᠭᠦᠯᠬᠦ᠂ ᠥᠰᠬᠡᠬᠦ᠂ ᠥᠲᠡᠯᠬᠦ ᠠᠲᠠᠭᠠᠷᠬᠠᠮᠠᠷ ᠪᠢᠰᠢ ᠴᠤ᠂ ᠭᠣᠯᠣᠮᠠᠷ ᠴᠤ ᠪᠠᠰᠠ ᠪᠢᠰᠢ ᠨᠡᠶᠢᠲᠡᠯᠢᠭ ᠠᠮᠢᠳᠤᠷᠠᠯ ᠢᠶᠠᠷ ᠠᠮᠢᠳᠤᠷᠠᠭᠰᠠᠭᠠᠷ ᠨᠠᠰᠤ ᠶᠢ ᠪᠠᠷᠠᠬᠤ ᠳᠤ ᠪᠣᠯᠬᠤ ᠯᠠ ᠪᠠᠶᠢᠭᠰᠠᠨ᠃ ᠭᠡᠲᠡᠯᠡ ᠡᠬᠡ ᠨᠢ ᠪᠠᠶᠢᠵᠤ ᠪᠠᠶᠢᠳᠠᠭ᠂ ᠪᠠᠶᠢᠬᠤ ᠪᠠᠶᠢᠬᠤ ᠳᠤ ᠪᠠᠨ ᠪᠦᠷ ᠭᠠᠳᠠᠭᠠᠳᠤ ᠳᠤ ᠪᠠᠶᠢᠳᠠᠭ ᠭᠡᠬᠦ︕ ᠭᠡᠨᠡᠳᠲᠡ ᠭᠠᠷᠴᠤ ᠢᠷᠡᠭᠰᠡᠨ ᠡᠬᠡ ᠶᠢᠨ ᠰᠤᠷᠠᠭ ᠲᠡᠭᠦᠨ ᠢ ᠪᠠᠶᠠᠷᠯᠠᠭᠤᠯᠤᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠴᠤ ᠭᠣᠮᠣᠳᠠᠯ᠂ ᠬᠣᠷᠣᠰᠤᠯ ᠤᠷᠭᠢᠯᠪᠡ᠃ ᠭᠡᠲᠡᠯᠡ ᠨᠢᠭᠡ ᠮᠡᠳᠡᠬᠦ ᠳᠦ ᠬᠠᠷᠢᠭᠤ ᠪᠢᠴᠢᠴᠢᠬᠡᠭᠰᠡᠨ ᠪᠠᠶᠢᠯᠠ᠃ ᠤᠳᠠᠭᠠᠬᠢ ᠵᠠᠬᠢᠶᠠ ᠴᠤ ᠳᠣᠣᠷᠠᠬᠠᠨ ᠢᠶᠠᠨ ᠢᠷᠡᠯᠡ᠃ ᠡᠬᠡ ᠶᠢᠨ ᠭᠡᠮᠰᠢᠯ ᠴᠤ᠂ ᠪᠠᠶᠠᠷ ᠴᠤ ᠬᠢᠵᠠᠭᠠᠷ ᠦᠭᠡᠢ ᠪᠣᠯᠤᠯᠲᠠᠢ᠃ ᠠᠮᠢᠳᠤᠷᠠᠯ ᠳᠤ ᠪᠠᠨ ᠨᠢᠭᠡ ᠤᠳᠠᠭᠠ ᠪᠦᠳᠦᠷᠢᠭᠰᠡᠨ᠂ ᠣᠳᠣ ᠬᠠᠷᠢᠨ ᠰᠠᠶᠢᠨ ᠶᠠᠪᠤᠭᠠ ᠭᠡᠨᠡ᠃ ᠦᠨᠡᠬᠡᠷ ᠰᠠᠶᠢᠨ ᠶᠠᠪᠤᠭᠠ ᠨᠢ ᠴᠤ ᠬᠠᠷᠠᠬᠤ ᠠᠴᠠ ᠢᠯᠡᠳᠲᠡ᠃ ᠨᠠᠰᠤᠨ ᠵᠠᠯᠠᠭᠤ᠂ ᠨᠢᠳᠦ ᠳᠦᠭᠦᠷᠡᠩ ᠭᠣᠸᠠ ᠪᠦᠰᠡᠭᠦᠢ ᠥᠭᠡᠳᠡ ᠡᠴᠡ ᠨᠢ ᠲᠡᠭᠦᠨ ᠦ ᠬᠤᠪᠢ ᠳᠤ ᠬᠣᠷᠸᠠ ᠳᠤ ᠡᠶᠢᠮᠦ ᠵᠦᠢᠯᠡᠰ ᠪᠠᠶᠢᠳᠠᠭ ᠭᠡᠵᠦ ᠲᠥᠰᠥᠭᠡᠯᠡᠬᠦ ᠶᠢᠨ ᠠᠷᠭᠠ ᠦᠭᠡᠢ ᠭᠢᠯᠠ ᠴᠠᠯ ᠪᠠᠶᠢᠷᠢ ᠰᠠᠭᠤᠴᠠ᠂ ᠡᠷᠢᠶᠡᠨ ᠮᠢᠷᠢᠶᠠᠨ ᠭᠤᠳᠤᠮᠵᠢ ᠴᠢᠯᠦᠭᠡ᠂ ᠰᠢᠯ ᠲᠣᠯᠢᠨ ᠮᠠᠰᠢᠨ ᠳᠣᠲᠣᠷᠠ ᠠᠴᠠ ᠡᠭᠡᠯᠵᠢᠯᠡᠨ ᠢᠨᠢᠶᠡᠮᠰᠦᠭᠯᠡᠨᠡ᠃
ᠲᠡᠷᠡ ᠡᠳᠦᠷ ᠡᠴᠡ ᠬᠣᠶᠢᠰᠢ ᠥᠩᠭᠡᠷᠡᠭᠰᠡᠨ ᠬᠡᠳᠦᠨ ᠰᠠᠷᠠ ᠥᠬᠢᠨ ᠤ ᠠᠮᠢᠳᠤᠷᠠᠯ ᠢ ᠣᠷᠪᠣᠩ ᠢᠶᠠᠷ ᠨᠢ ᠡᠷᠭᠢᠭᠦᠯᠵᠡᠢ᠃ ᠠᠷᠪᠠ ᠳᠦᠭᠦᠷᠭᠡᠨᠡ ᠭᠡᠵᠦ ᠪᠠᠶᠢᠭᠰᠠᠨ ᠬᠦᠮᠦᠨ ᠨᠠᠶᠢᠮᠠ ᠠᠴᠠ ᠭᠠᠷᠴᠤ ᠠᠨᠠᠭᠠᠬᠤ ᠶᠢᠨ ᠳᠤᠮᠳᠠᠳᠤ ᠳᠤ ᠣᠷᠣᠵᠠᠢ᠃ ᠰᠠᠩ ᠤᠨ ᠦᠨᠡ ᠦᠭᠡᠢ᠂ ᠡᠭᠡᠯᠬᠡᠨ ᠬᠤᠪᠴᠠᠰᠤ ᠶᠢ ᠲᠠᠶᠢᠯᠵᠤ ᠬᠠᠶᠠᠭᠠᠳ ᠦᠶᠡ ᠦᠶᠡ ᠢᠯᠡᠭᠡᠮᠵᠢ ᠪᠡᠷ ᠢᠷᠡᠳᠡᠭ ᠪᠠᠰᠠ ᠯᠠ ᠦᠨᠡ ᠦᠭᠡᠢ ᠴᠤ᠂ ᠴᠠᠮᠢᠩ ᠬᠤᠪᠴᠠᠰᠤ ᠶᠢ ᠡᠳᠦᠷ ᠡᠳᠦᠷ ᠢᠶᠡᠷ ᠰᠤᠯᠢᠵᠤ ᠡᠮᠥᠰᠬᠦ ᠪᠣᠯᠵᠠᠢ᠃ ᠪᠠᠰᠠ ᠵᠠᠬᠠ ᠠᠴᠠ ᠨᠢ ᠢᠯᠡᠭᠦᠴᠢᠯᠡᠵᠦ᠂ ᠭᠣᠶᠣᠬᠤ ᠬᠣᠷᠣᠬᠠᠢ ᠲᠠᠢ ᠥᠬᠢᠳ ᠲᠤ ᠬᠤᠳᠠᠯᠳᠤᠨ ᠮᠥᠩᠭᠥ ᠪᠣᠯᠭᠠᠨᠠ᠃ ᠥᠷᠯᠥᠭᠡ ᠪᠦᠷᠢ ᠰᠣᠨᠢᠨ ᠭᠠᠷᠴᠠᠭᠯᠠᠵᠤ᠂ ᠦᠳᠡᠰᠢ ᠥᠭᠡᠷᠡ ᠮᠡᠳᠡᠭᠡ ᠴᠢᠩᠨᠠᠵᠤ 《ᠴᠠᠭᠠᠴᠢᠯᠠᠬᠤ ᠡᠷᠬᠡ ᠶᠢᠨ ᠬᠠᠤᠯᠢ》 ᠬᠡᠮᠡᠬᠦ ᠨᠢᠭᠡ ᠯᠠ ᠦᠭᠡ ᠶᠢ ᠬᠠᠮᠤᠭ ᠮᠡᠳᠡᠷᠡᠬᠦᠢ ᠪᠡᠷ ᠢᠶᠡᠨ ᠡᠷᠢᠨᠡ᠂ ᠬᠦᠯᠢᠶᠡᠨᠡ᠃
ᠠᠰᠠᠷᠠᠮᠵᠢ ᠶᠢᠨ ᠰᠤᠷᠭᠠᠭᠤᠯᠢ ᠠᠴᠠ ᠢᠷᠡᠭᠰᠡᠨ ᠢᠶᠡᠨ ᠠᠩᠭᠢ ᠶᠢᠨ ᠬᠢᠨ ᠠᠴᠠ ᠪᠠᠨ ᠨᠢᠭᠤᠵᠤ᠂ ᠥᠪᠡᠷ ᠢ ᠪᠡᠨ ᠭᠠᠳᠠᠭᠠᠳᠤ ᠳᠤ ᠰᠠᠭᠤᠳᠠᠭ ᠪᠠᠶᠠᠴᠤᠤᠯ ᠤᠨ ᠬᠡᠦᠬᠡᠳ ᠪᠣᠯᠭᠠᠨ ᠣᠶᠢᠯᠠᠭᠠᠭᠤᠯᠵᠠᠢ᠃ ᠦᠷᠭᠦᠯᠵᠢ ᠳᠡᠭᠵᠢᠨ ᠬᠤᠪᠴᠠᠰᠤᠯᠠᠵᠤ᠂ ᠬᠡᠨ ᠲᠡᠢ ᠴᠤ ᠦᠶᠡᠷᠬᠡᠳᠡᠭ ᠦᠭᠡᠢ᠂ ᠦᠭᠡ ᠳᠠᠭᠤ ᠴᠥᠭᠡᠨ ᠲᠡᠢ ᠲᠡᠭᠦᠨ ᠦ ᠦᠭᠡᠨ ᠳᠦ ᠡᠷᠡᠭᠡᠯᠵᠡᠬᠦ ᠤᠬᠠᠭᠠᠨ ᠬᠡᠨ ᠳᠦ ᠴᠤ ᠲᠦᠷᠦᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠨᠢᠭᠡ ᠨᠢ ᠠᠲᠠᠭᠠᠷᠬᠠᠨ ᠥ ᠡᠷᠢᠭᠰᠡᠨ᠂ ᠨᠥᠭᠥᠭᠡ ᠨᠢ ᠵᠢᠰᠤᠷᠳᠠᠵᠤ ᠲᠠᠯᠠ ᠵᠠᠰᠠᠭᠰᠠᠨ ᠦᠭᠡ ᠤᠨᠠᠭᠠᠭᠠᠳ ᠴᠤ ᠬᠠᠷᠢᠭᠤ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠨᠢ ᠦᠭᠡᠢ᠃ ᠲᠡᠷᠡ ᠪᠡᠷ ᠴᠡᠮᠴᠡᠭᠡᠷ᠂ ᠴᠢᠮᠪᠠᠢ ᠪᠠᠶᠢᠳᠠᠯ ᠢᠶᠠᠨ᠂ ᠨᠠᠶᠢᠮᠠᠶᠢᠯᠠᠵᠤ ᠣᠯᠤᠭᠰᠠᠨ ᠬᠡᠳᠦᠨ ᠴᠠᠭᠠᠰᠤ ᠲᠠᠢ ᠪᠠᠨ ᠪᠠᠲᠤ ᠬᠠᠳᠠᠭᠠᠯᠠᠭᠰᠠᠭᠠᠷ᠂ ᠪᠠᠭ ᠢᠶᠠᠨ ᠬᠠᠤ ᠲᠠᠲᠠᠨ᠂ ᠪᠦᠬᠦᠨ ᠢ ᠬᠥᠰᠡᠷ ᠬᠠᠶᠠᠬᠤ᠂ ᠲᠡᠭᠡᠭᠰᠡᠨ ᠢᠶᠡᠷ ᠥᠪᠡᠷ ᠢ ᠨᠢ ᠠᠰᠠᠷᠠᠮᠵᠢ ᠶᠢᠨ ᠰᠤᠷᠭᠠᠭᠤᠯᠢ ᠪᠠᠷ ᠳᠠᠮᠵᠢᠭᠤᠯᠤᠭᠰᠠᠨ ᠬᠤᠪᠢ ᠵᠠᠶᠠᠭᠠᠨ ᠠᠴᠠ ᠬᠠᠷᠢᠭᠤ ᠪᠠᠨ ᠠᠪᠬᠤ ᠡᠳᠦᠷ ᠢ ᠲᠡᠰᠬᠡᠯ ᠦᠭᠡᠢ ᠬᠦᠯᠢᠶᠡᠨ ᠪᠠᠶᠢᠪᠠ᠃
ᠨᠢᠭᠡ ᠬᠠᠷᠠᠲᠠᠯᠠ ᠠᠷᠤᠭ ᠶᠠᠰᠤᠨ ᠤ ᠭᠠᠪᠠᠯᠠ ᠨᠢᠭᠤᠷ ᠦᠨ ᠬᠢ ᠨᠢ ᠡᠮᠦᠨᠡ ᠲᠤᠯᠤᠭᠠᠳ ᠢᠷᠡᠴᠢᠬᠡᠭᠰᠡᠨ ᠡᠷᠡᠦ ᠪᠡᠨ ᠬᠠᠪᠰᠢᠨ ᠠᠩᠭᠠᠯᠵᠠᠵᠤ ᠪᠠᠶᠢᠬᠤ ᠨᠢ ᠲᠡᠷᠡ᠃ ᠥᠬᠢᠨ ᠮᠠᠭᠤᠬᠠᠢ ᠣᠷᠢᠯᠠᠭᠰᠠᠭᠠᠷ ᠪᠣᠰᠴᠣ ᠳᠠᠪᠬᠢᠪᠠ᠃ ᠶᠠᠭ ᠲᠡᠷᠡ ᠦᠶᠡ ᠪᠡᠷ ᠵᠢᠵᠢᠭᠦᠷ ᠡᠪᠦᠭᠡᠨ ᠠᠩᠬᠢ ᠶᠢᠨ ᠡᠭᠦᠳᠡ ᠪᠡᠷ ᠭᠠᠷᠴᠤ ᠶᠠᠪᠤᠭᠠᠳ ᠶᠠᠭᠤ ᠭᠡᠭᠴᠢ ᠪᠣᠯᠵᠤ ᠪᠠᠶᠢᠭᠠ ᠶᠢ ᠬᠠᠷᠠᠴᠢᠬᠠᠵᠠᠢ᠃ ᠣᠷᠣᠵᠤ ᠢᠷᠡᠭᠡᠳ 《ᠴᠢᠮᠠ ᠰᠢᠭ ᠨᠢᠰᠤᠭᠠᠢ ᠶᠢᠨ ᠲᠣᠭᠯᠠᠭᠠᠮ ᠲᠣᠬᠣᠭᠤ ᠪᠣᠯᠬᠤ ᠪᠠᠷ ᠦᠭᠡᠢ ᠯᠠ ᠡᠷᠡ ᠶᠠᠪᠤᠭᠰᠠᠨ ᠶᠤᠮ ᠳ᠋ᠠ᠃ ᠳᠠᠭᠤᠴᠢᠨ ᠰᠡᠷᠡᠩᠵᠠᠪ ᠭᠡᠵᠦ ᠳᠤᠭᠤᠯᠤᠭᠰᠠᠨ ᠤᠤ᠂ ᠨᠥᠬᠥᠷ ᠡ》 ᠭᠡᠵᠦ ᠳᠦᠷᠰᠦᠭᠦᠶᠢᠲᠦᠭᠴᠢ ᠶᠢ ᠵᠠᠩᠨᠠᠯᠠ᠃
ᠥᠬᠢᠨ ᠠᠷᠤᠭ ᠶᠠᠰᠤᠨ ᠠᠴᠠ ᠨᠢᠳᠦ ᠰᠠᠯᠭᠠᠵᠤ ᠶᠠᠳᠠᠨ ᠪᠦᠯᠲᠡᠭᠡᠨᠡᠨᠡ᠃ ᠳᠠᠭᠤᠴᠢᠨ ᠰᠡᠷᠡᠩᠵᠠᠪ ᠁ ᠭᠡᠵᠦ ᠠᠮᠠᠨ ᠳᠤ ᠪᠠᠨ ᠰᠢᠪᠡᠨᠡᠬᠦ ᠳᠦ ᠦᠶᠡ ᠦᠶᠡ ᠰᠠᠨᠠᠭᠠᠨ ᠳᠤ ᠨᠢ ᠣᠷᠣᠵᠤ ᠢᠷᠡᠳᠡᠭ ᠥᠨᠥ ᠠᠶᠠᠯᠭᠤ ᠴᠢᠬᠢᠨ ᠳᠦ ᠨᠢ ᠨᠢᠷᠬᠢᠲᠡᠯᠡ ᠤᠶᠠᠩᠭᠠᠯᠠᠵᠤ᠂ ᠪᠠᠰᠠ ᠶᠠᠭ ᠡᠨᠡ ᠭᠱᠠᠨ ᠳᠦ ᠬᠠᠷᠠᠪᠠᠯ ᠠᠷᠤᠭ ᠶᠠᠰᠤ ᠲᠠᠯᠠ ᠲᠠᠯᠠ ᠠᠴᠠ ᠪᠠᠨ ᠪᠡᠶᠡᠵᠢᠭᠰᠡᠭᠡᠷ ᠳᠡᠭᠵᠢᠨ ᠬᠤᠪᠴᠠᠰᠤᠯᠠᠭᠰᠠᠨ᠂ ᠴᠠᠶᠢᠪᠤᠷᠳᠠᠭᠤ ᠴᠢᠷᠠᠢ ᠲᠠᠢ ᠡᠷᠡ ᠪᠣᠯᠵᠤ ᠬᠤᠪᠢᠯᠤᠭᠠᠳ ᠥᠭᠡᠳᠡ ᠡᠴᠡ ᠨᠢ ᠳᠣᠲᠣᠨᠣ ᠬᠠᠷᠠᠴᠠ ᠪᠠᠷ ᠳᠥᠯᠭᠡᠬᠡᠨ ᠰᠢᠷᠲᠡᠬᠦ ᠮᠡᠲᠦ᠃
《ᠰᠡᠷᠡᠩᠵᠠᠪ ᠁ ᠰᠡᠷᠡᠩᠵᠠᠪ ᠤᠨ ᠁ ᠲᠣᠬᠢᠶᠠᠯᠳᠤᠯ ᠤᠤ︖》 ᠭᠡᠵᠦ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠨᠠ᠃ ᠨᠢᠳᠦ ᠪᠡᠨ ᠨᠢᠭᠡᠨᠲᠡ ᠰᠠᠶᠢᠨ ᠠᠨᠢᠭᠠᠳ ᠬᠠᠷᠠᠲᠠᠯᠠ ᠥᠨᠥ ᠬᠦᠮᠦᠨ ᠠᠯᠠᠭᠠ᠂ ᠠᠷᠤᠭ ᠶᠠᠰᠤ ᠬᠠᠭᠤᠴᠢᠨ ᠢᠶᠠᠷ ᠢᠶᠠᠨ ᠪᠠᠶᠢᠵᠤ ᠪᠠᠶᠢᠨᠠ᠃
ᠢᠷᠮᠡᠭ ᠨᠢ ᠡᠮᠲᠡᠷᠡᠴᠥ᠂ ᠢᠷᠡᠭᠡᠷ ᠲᠣᠷᠭᠠᠨ ᠬᠡ ᠳᠡᠭᠡᠭᠦᠷ ᠨᠢ ᠡᠯᠳᠡᠪ ᠵᠢᠷᠤᠭᠠᠰᠤ ᠭᠠᠷᠤᠭᠰᠠᠨ ᠵᠤᠵᠠᠭᠠᠨ ᠫᠢᠨᠽᠠ ᠡᠷᠭᠢᠯᠳᠦᠵᠦ᠂ ᠬᠡᠰᠡᠭᠬᠡᠨ ᠵᠠᠭᠤᠷᠠ ᠬᠡᠢ ᠱᠤᠤᠭᠢᠭᠰᠠᠨ ᠢᠶᠠᠨ 《ᠡᠷᠡ ᠪᠣᠷᠣ ᠬᠠᠷᠴᠠᠭᠠ 》 ᠶᠢᠨ ᠠᠶᠠ ᠬᠠᠳᠠᠨ᠂ ᠭᠱᠠᠨ ᠦ ᠳᠠᠷᠠᠭᠠᠬᠠᠨ ᠡᠷᠡ ᠬᠦᠮᠦᠨ ᠦ ᠪᠠᠷᠭᠢᠯᠳᠠᠭᠤ ᠬᠣᠭᠣᠯᠠᠢ ᠬᠦᠩᠭᠢᠨᠡᠯᠡ᠃ ᠲᠡᠷᠡ ᠪᠡᠷ ᠡᠷᠴᠢ ᠪᠡᠨ ᠠᠪᠤᠨ ᠠᠪᠤᠭᠰᠠᠭᠠᠷ ᠴᠢᠨᠡᠭᠡᠨ ᠳᠦ ᠪᠡᠨ ᠲᠤᠯᠬᠤ ᠮᠡᠲᠦ ᠪᠣᠯᠵᠤ ᠵᠣᠭᠰᠣᠰᠬᠢᠭᠰᠡᠨ ᠢᠶᠡᠨ ᠠᠭᠤᠯᠠ ᠶᠢᠨ ᠠᠷᠤ ᠪᠡᠯ ᠦᠨ ᠡᠪᠡᠰᠦ ᠦᠵᠦᠭᠦᠷ ᠡᠴᠡ ᠪᠡᠨ ᠰᠣᠷ ᠲᠠᠲᠠᠭᠤᠯᠤᠨ ᠬᠠᠯᠢᠭᠤᠷᠠᠨ ᠬᠤᠶᠢᠯᠠᠷᠠᠵᠤ᠂ ᠨᠠᠯᠠᠷᠠᠨ ᠬᠠᠨᠠᠷᠠᠨ ᠳᠠᠪᠠᠯᠭᠠᠯᠠᠬᠤ ᠠᠳᠠᠯᠢ ᠱᠤᠷᠠᠩᠬᠠᠶᠢᠯᠠᠬᠤ ᠶᠢᠨ ᠭᠱᠠᠨ ᠳᠦ 《ᠮᠥᠨ ᠪᠠᠶᠢᠨᠠ》 ᠭᠡᠬᠦ ᠪᠦᠰᠡᠭᠦᠢ ᠬᠦᠮᠦᠨ ᠦ ᠳᠠᠭᠤ ᠴᠢᠰᠬᠢᠯᠡ᠃
ᠨᠠᠷᠠᠩ ᠤᠨ ᠡᠩᠭᠡᠷ ᠲᠦ ᠨᠢᠭᠡᠨ ᠪᠠᠭ ᠬᠦᠮᠦᠨ ᠬᠡᠨ ᠨᠢᠭᠡᠨ ᠢ ᠣᠷᠣᠰᠢᠭᠤᠯᠵᠤ ᠪᠠᠶᠢᠯᠠ᠃ ᠪᠦᠬᠦᠢ ᠯᠠ ᠶᠣᠰᠣ ᠭᠣᠷᠢᠮ ᠤᠨ ᠳᠠᠭᠠᠤ ᠴᠢᠮᠡᠭᠯᠡᠭᠰᠡᠨ ᠠᠪᠰᠠ ᠶᠢ ᠪᠦᠭᠦᠳᠡ ᠪᠡᠷ ᠲᠣᠭᠣᠷᠢᠨ ᠵᠣᠭᠰᠣᠵᠠᠢ᠃ ᠬᠠᠭᠠᠰ ᠣᠩᠭᠣᠷᠬᠠᠢ ᠲᠠᠭ ᠤᠨ ᠴᠠᠭᠠᠨᠠ ᠠᠴᠠ ᠴᠤᠬᠤᠶᠢᠬᠤ ᠲᠩᠷᠢ ᠴᠡᠩᠬᠡᠷ ᠬᠠᠳᠠᠭ ᠠᠴᠠ ᠬᠠᠷᠠᠴᠠ ᠰᠠᠯᠭᠠᠬᠤ ᠦᠭᠡᠢ ᠭᠥᠯᠢᠷᠡᠬᠦ ᠬᠣᠶᠠᠷ ᠨᠢᠳᠦᠨ ᠡᠴᠡ ᠲᠣᠮᠣ ᠲᠣᠮᠣ ᠴᠡᠭᠡᠨ ᠨᠢᠯᠪᠤᠰᠤ ᠪᠥᠭᠡᠮ ᠪᠥᠭᠡᠮ ᠢᠶᠡᠷ ᠲᠠᠰᠤᠷᠠᠨ ᠬᠠᠴᠠᠷ ᠢ ᠳᠠᠭᠠᠨ ᠪᠥᠮᠪᠥᠷᠢᠨᠡ᠃ ᠳᠠᠷᠠᠭᠠ ᠨᠢ ᠲᠣᠯᠣᠭᠠᠢ ᠪᠦᠬᠦᠶᠢᠵᠦ ᠮᠠᠩᠨᠠᠢ ᠪᠠᠨ ᠬᠠᠳᠠᠭ ᠲᠤ ᠬᠦᠷᠭᠡᠨ ᠠᠳᠢᠰ ᠬᠦᠷᠲᠡᠬᠦ ᠭᠱᠠᠨ ᠳᠦ 《ᠬᠣᠵᠢᠮᠳᠠᠵᠤ ᠢᠷᠡᠭᠰᠡᠨ ᠥᠬᠢᠨ ᠢᠶᠡᠨ ᠥᠷᠥᠰᠢᠶᠡᠭᠡᠷᠡᠢ ᠠᠪᠤ ᠮᠢᠨᠢ》 ᠭᠡᠬᠦ ᠦᠭᠡᠰ ᠤᠭᠤᠬᠢᠯᠠᠵᠤ ᠴᠤᠷᠬᠢᠷᠠᠬᠤ ᠳᠠᠭᠤᠨ ᠳᠣᠲᠣᠷᠠ ᠠᠴᠠ ᠢᠯᠭᠠᠷᠠᠨ ᠰᠣᠨᠣᠰᠳᠠᠪᠠᠢ᠃
ᠲᠦᠮᠡᠲᠦ ᠰᠢᠨᠡ ᠬᠥᠷᠪᠡᠭᠦᠯᠪᠡ
6 0