  ᠲᠦᠮᠡᠲᠦ ᠰᠢᠨ᠎ᠡ       
     ᠦᠦᠰᠢᠨ  ᠭᠠᠯᠠᠭᠤᠲᠤ 
   2017-07-25 10:54
   2024-01-05 18:54
   1774526
   1251

ᠬᠥᠬᠡ ᠲᠣᠯᠪᠤᠲᠤ ᠳ᠋ ᠊ ᠲᠡᠮᠦᠷᠸᠴᠢᠷ :《ᠠᠮᠢ ᠦᠭᠡᠢ ᠠᠯᠪᠠᠲᠤ ᠨᠤᠭᠤᠳ》 (ᠡᠯᠡᠭᠯᠡᠯ ᠷᠣᠮᠠᠨ)

ᠬᠥᠬᠡ ᠲᠣᠯᠪᠤᠲᠤ ᠳ᠋ ᠊ ᠲᠡᠮᠦᠷᠸᠴᠢᠷ :《ᠠᠮᠢ ᠦᠭᠡᠢ ᠠᠯᠪᠠᠲᠤ ᠨᠤᠭᠤᠳ》 (ᠡᠯᠡᠭᠯᠡᠯ ᠷᠣᠮᠠᠨ)  ᠤᠨ ᠲᠤᠬᠠᠢ ᠦᠵᠡᠯᠲᠡ
        4672     
2018-09-10 10:06    
发表于:内蒙古
ᠬᠥᠬᠡ ᠲᠣᠯᠪᠤᠲᠤ ᠳ᠋ ᠊ ᠲᠡᠮᠦᠷᠸᠴᠢᠷ :《ᠠᠮᠢ ᠦᠭᠡᠢ ᠠᠯᠪᠠᠲᠤ ᠨᠤᠭᠤᠳ》 (ᠡᠯᠡᠭᠯᠡᠯ ᠷᠣᠮᠠᠨ) ᠣᠷᠣᠰ ᠤᠨ ᠤᠳᠬ᠎ᠠ ᠵᠣᠬᠢᠶᠠᠯ ᠪᠣᠯ ᠶᠡᠷᠦ ᠪᠤᠰᠤ ᠶᠢᠨ ᠥᠨᠳᠥᠷ ᠳᠡᠭᠡᠳᠦ ᠲᠦᠪᠰᠢᠨ ᠳᠦ ᠬᠦᠷᠦᠭᠰᠡᠨ ᠭᠠᠶᠢᠬᠠᠯᠲᠠᠢ ᠪᠦᠲᠦᠭᠡᠯ ᠦᠳ ᠢᠶᠡᠷ ᠳᠦᠭᠦᠷᠡᠩ᠂ ᠠᠷᠪᠢᠨ ᠪᠠᠶᠠᠯᠢᠭ ᠡᠬᠢ ᠤᠨᠳᠤᠷᠭ᠎ᠠ ᠲᠠᠢ᠂ ᠬᠦᠮᠦᠨ ᠲᠥᠷᠥᠯᠬᠢᠲᠡᠨ ᠦ ᠣᠶᠤᠨ ᠤ ᠰᠤᠶᠤᠯ ᠳᠤ ᠬᠦᠨᠳᠦ ᠲᠡᠢ ᠪᠠᠶᠢᠷᠢ ᠰᠠᠭᠤᠷᠢ ᠡᠵᠡᠯᠡᠳᠡᠭ ᠨᠢ ᠮᠠᠷᠭᠤᠭᠠᠨ ᠦᠭᠡᠢ ᠦᠨᠡᠨ ᠶᠤᠮ᠃ ᠨ ∙ ᠭᠣᠭᠣᠯ᠂ ᠹ ∙ ᠳᠠᠰᠤᠲᠠᠧᠦᠢᠰᠺᠢ᠂ ᠯ ∙ ᠲᠣᠯᠰᠲᠣᠢ᠂ ᠫ ∙ ᠴᠧᠬᠣᠪ᠂ ᠰ ∙ ᠲᠦᠭᠧᠨᠧᠸ᠂ ᠮ ∙ ᠪᠤᠯᠭᠠᠺᠣᠸ᠂ ᠮ ∙ ᠱᠣᠯᠬᠤᠪ᠂ ᠸ ∙ ᠨᠠᠪᠠᠺᠣᠸ ᠁ ᠭᠡᠬᠦᠴᠢᠯᠡᠨ ᠵᠥᠪᠬᠡᠨ ᠬᠦᠦᠷᠨᠢᠯ ᠵᠣᠬᠢᠶᠠᠯ ᠤᠨ ᠠᠭᠤᠤ 《ᠭᠢᠭᠠᠨᠲ︾ ᠦᠳ ᠤᠨ ᠨᠡᠷᠡᠰ ᠬᠥᠪᠥᠷᠡᠬᠦ ᠳᠦ ᠯᠠ ᠲᠡᠳᠡᠨ ᠦ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠦᠳ ᠣᠢ ᠲᠣᠶᠢᠨ ᠳᠤ ᠭᠢᠯᠠᠰᠬᠢᠵᠤ᠂ ᠴᠠᠭᠠᠨ᠎ᠠ ᠨᠢ ᠥᠴᠢ ᠲᠥᠴᠢᠨᠡᠨ ᠢᠷᠠᠭᠤ ᠨᠠᠶᠢᠷᠠᠭᠴᠢ᠂ ᠵᠣᠬᠢᠶᠠᠯᠴᠢᠳ ᠪᠠᠶᠢᠭ᠎ᠠ ᠭᠡᠵᠦ ᠪᠣᠳᠣᠬᠤ ᠠᠴᠠ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠪᠠᠬᠠᠷᠬᠠᠬᠤ ᠰᠡᠳᠬᠢᠯ ᠲᠥᠷᠥᠨ᠎ᠡ᠃ ᠲᠡᠳᠡᠭᠡᠷ ᠦᠨ ᠳᠣᠲᠣᠷ᠎ᠠ ᠠᠴᠠ ᠣᠷᠣᠰ ᠤᠨ ᠤᠳᠬ᠎ᠠ ᠵᠣᠬᠢᠶᠠᠯ ᠢ ᠦᠨᠳᠦᠰᠦᠯᠡᠭᠴᠢ᠂ ᠠᠪᠰᠤᠷᠲ᠂ ᠮᠣᠳᠧᠷᠨ ᠵᠣᠬᠢᠶᠠᠯ ᠤᠨ ᠠᠩᠬᠠᠳᠠᠭᠴᠢ ᠭᠡᠳᠡᠭ ᠡᠷᠬᠢᠮ ᠨᠡᠷ᠎ᠡ ᠬᠦᠨᠳᠦᠲᠡᠢ ᠠᠯᠳᠠᠷ ᠤᠨ ᠡᠵᠡᠨ ᠪᠣᠯ ᠶᠠᠭᠠᠬᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ 《ᠭᠠᠵᠢ》 ᠰᠤᠤᠲᠠᠨ ᠬᠡᠮᠡᠭᠳᠡᠬᠦ ᠶᠡᠷᠦ ᠪᠤᠰᠤ ᠶᠢᠨ ᠨᠠᠮᠲᠠᠷ ᠲᠡᠦᠬᠡ ᠲᠡᠢ ᠨ ∙ ᠭᠣᠭᠣᠯ ᠪᠢᠯᠡ᠃ ᠤᠷᠠᠨ ᠵᠣᠬᠢᠶᠠᠯ ᠤᠨ ᠬᠡᠪᠰᠢᠮᠡᠯ ᠪᠢᠴᠢᠯᠭᠡ᠂ ᠵᠠᠭᠪᠤᠷ ᠢ ᠡᠷᠡᠰ ᠥᠭᠡᠷᠡᠴᠢᠯᠡᠵᠦ᠂ ᠴᠣ ᠰᠢᠨ᠎ᠡ ᠠᠷᠭ᠎ᠠ ᠪᠠᠷᠢᠯ᠂ ᠰᠡᠳᠬᠢᠯᠭᠡ ᠶᠢ ᠣᠷᠣᠭᠤᠯᠵᠤ ᠢᠷᠡᠭᠰᠡᠨ ᠭᠣᠭᠣᠯ ᠤᠨ ᠤᠷᠠᠨ ᠪᠦᠲᠦᠭᠡᠯ ᠨᠢ ᠳᠠᠬᠢᠨ ᠳᠠᠪᠲᠠᠭᠳᠠᠰᠢ ᠦᠭᠡᠢ ᠥᠪᠡᠷᠮᠢᠴᠡ ᠥᠩᠭᠡ ᠠᠶᠠᠰ ᠢᠶᠠᠷ ᠢᠶᠠᠨ ᠡᠷᠡᠰ ᠢᠯᠭᠠᠷᠠᠵᠤ ᠪᠠᠶᠢᠳᠠᠭ ᠶᠤᠮ᠃ ᠲᠡᠭᠦᠨ ᠦ ᠣᠷᠭᠢᠯ ᠪᠦᠲᠦᠭᠡᠯ ᠦᠨ ᠨᠢᠭᠡ 《ᠠᠮᠢ ᠦᠭᠡᠢ ᠠᠯᠪᠠᠲᠤ ᠨᠤᠭᠤᠳ》 ᠪᠣᠯ ᠬᠤᠪᠢ ᠬᠥᠮᠦᠨ ᠢᠶᠡᠷ ᠳᠠᠮᠵᠢᠭᠤᠯᠤᠨ ᠨᠡᠶᠢᠭᠡᠮ ᠤᠨ ᠪᠠᠶᠢᠳᠠᠯ ᠢ ᠲᠣᠯᠢᠳᠠᠨ ᠬᠠᠷᠠᠭᠤᠯᠤᠭᠰᠠᠨ ᠬᠣᠱᠣᠩ ᠷᠧᠠᠯᠢᠰᠲ ᠵᠣᠬᠢᠶᠠᠯ ᠶᠤᠮ᠃ ᠨᠢᠭᠡᠨ ᠮᠤᠵᠢ ᠶᠢᠨ N ᠬᠣᠲᠠ ᠳ᠋ᠤ ᠵᠣᠴᠢᠯᠠᠨ ᠢᠷᠡᠭᠰᠡᠨ ᠦᠯᠦ ᠲᠠᠨᠢᠬᠤ ᠨᠣᠶᠠᠨ ᠲᠡᠷᠡ ᠳᠣᠣᠷᠠᠬᠠᠨ ᠢᠶᠠᠨ ᠯᠠ ᠬᠣᠲᠠ ᠶᠢᠨ ᠨᠡᠷ᠎ᠡ ᠨᠥᠯᠥᠭᠡ ᠪᠦᠬᠦᠢ ᠳᠠᠷᠤᠭ᠎ᠠ᠂ ᠲᠦᠰᠢᠮᠡᠳ ᠦᠳ ᠦᠨ ᠠᠩᠬᠠᠷᠤᠯ ᠤᠨ ᠲᠥᠪ ᠲᠦ ᠣᠷᠣᠵᠤ᠂ ᠬᠦᠨᠳᠦ ᠲᠡᠢ ᠵᠣᠴᠢᠨ ᠤ ᠨᠢᠭᠡ ᠪᠣᠯᠵᠠᠢ᠃ ᠲᠡᠭᠦᠨ ᠢ ᠬᠠᠮᠢᠭ᠎ᠠ ᠠᠴᠠ ᠶᠠᠮᠠᠷ ᠵᠣᠷᠢᠯᠭ᠎ᠠ ᠪᠠᠷ ᠢᠷᠡᠭᠰᠡᠨ᠂ ᠶᠠᠮᠠᠷ ᠤᠴᠢᠷᠲᠠᠢ᠂ ᠶᠠᠮᠠᠷ ᠨᠠᠮᠲᠠᠷ ᠲᠡᠦᠬᠡ ᠲᠡᠢ ᠬᠦᠮᠦᠨ ᠪᠣᠯᠬᠤ ᠶᠢ ᠬᠡᠨ ᠴᠤ ᠰᠣᠨᠢᠷᠬᠠᠭ᠎ᠠ ᠦᠭᠡᠢ ᠪᠥᠭᠡᠳ᠂ ᠨᠠᠶᠢᠷᠰᠠᠭ ᠵᠠᠩ ᠲᠠᠢ᠂ ᠨᠢᠳᠦᠨ ᠳᠦ ᠳᠤᠯᠠᠭᠠᠬᠠᠨ᠂ ᠴᠢᠨᠡᠭᠡᠯᠢᠭ ᠨᠣᠶᠠᠨ ᠭᠡᠰᠡᠨ ᠭᠠᠳᠠᠨ᠎ᠠ ᠲᠠᠯ᠎ᠠ ᠶᠢᠨ ᠦᠵᠡᠭᠦᠯᠦᠯᠲᠡ ᠬᠦᠮᠦᠨ ᠪᠦᠬᠦᠨ ᠦ ᠰᠡᠳᠬᠢᠯ ᠳᠦ ᠨᠡᠶᠢᠴᠡᠭᠰᠡᠨ ᠪᠣᠯᠬᠣᠷ ᠲᠡᠷᠡ ᠨᠢ ᠢᠯᠡᠭᠦᠴᠡ ᠵᠦᠢᠯ ᠶᠤᠮ᠃ ᠥᠪᠡᠷ ᠢ ᠪᠡᠨ ᠺᠣᠯᠯᠧᠭᠢ ᠶᠢᠨ ᠵᠥᠪᠯᠡᠬᠦ᠂ ᠰᠢᠳᠤᠷᠭᠤ ᠦᠨᠡᠨ ᠦ ᠲᠥᠯᠥᠭᠡ ᠬᠡᠯᠮᠡᠭᠳᠡᠵᠦ ᠶᠠᠪᠤᠭᠰᠠᠨ ᠭᠡᠳᠡᠭ ᠡᠴᠡ ᠥᠭᠡᠷ᠎ᠡ ᠲᠣᠶᠢᠮᠣ ᠲᠠᠢ ᠵᠦᠢᠯ ᠬᠡᠯᠡᠭᠡ ᠦᠭᠡᠢ ᠮᠠᠨᠢ ᠴᠢᠴᠢᠺᠣᠸ ᠬᠡᠨ ᠬᠦᠮᠦᠨ ᠦ ᠤᠬᠠᠭᠠᠨ ᠰᠠᠨᠠᠭᠠᠨ ᠳᠤ ᠪᠠᠭᠲᠠᠮ᠎ᠠ ᠦᠭᠡᠢ 《ᠠᠮᠢ ᠦᠭᠡᠢ ᠠᠯᠪᠠᠲᠤ》 ᠬᠤᠳᠠᠯᠳᠤᠨ ᠠᠪᠬᠤ ᠲᠤᠩ 《ᠬᠠᠴᠢᠨ》 ᠵᠣᠷᠢᠯᠭ᠎ᠠ ᠲᠠᠢ ᠢᠷᠡᠭᠰᠡᠨ ᠪᠠᠶᠢᠵᠠᠢ᠃ ᠢᠩᠭᠢᠭᠡᠳ ᠮᠠᠨᠢ ᠬᠦᠮᠦᠨ ᠬᠥᠳᠡᠭᠡ ᠲᠣᠰᠬᠣᠳ ᠢᠶᠠᠷ ᠶᠠᠪᠤᠵᠤ ᠭᠠᠵᠠᠷ ᠤᠨ ᠡᠵᠡᠳ ᠲᠡᠢ ᠠᠭᠤᠯᠵᠠᠨ ᠦᠬᠦᠭᠰᠡᠨ ᠠᠯᠪᠠᠲᠤ ᠶᠢ ᠨᠢ ᠬᠤᠳᠠᠯᠳᠤᠨ ᠠᠪᠬᠤ 《ᠶᠡᠷᠦ ᠪᠤᠰᠤ》 ᠍ ᠤᠨ ᠮᠠᠶᠢᠮᠠᠢ ᠪᠠᠨ ᠡᠬᠢᠯᠡᠭᠦᠯᠪᠡ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠣᠷᠣᠰ ᠣᠷᠣᠨ ᠳᠤ ᠭᠠᠵᠠᠷ ᠤᠨ ᠡᠵᠡᠳ ᠦᠨ ᠬᠠᠮᠵᠢᠯᠭ᠎ᠠ᠂ ᠲᠠᠷᠢᠶᠠᠴᠢᠳ ᠨᠠᠰᠤ ᠪᠠᠷᠠᠭᠰᠠᠨ ᠴᠤ ᠳᠠᠷᠠᠭ᠎ᠠ ᠶᠢᠨ ᠬᠦᠮᠦᠨ ᠠᠮᠠ ᠶᠢᠨ ᠲᠣᠭᠠᠯᠠᠯᠭ᠎ᠠ ᠪᠣᠯᠲᠠᠯ᠎ᠠ ᠠᠮᠢᠳᠤ ᠬᠦᠮᠦᠨ ᠦ ᠳᠠᠩᠰᠠᠨ ᠳᠤ ᠪᠠᠶᠢᠯᠭᠠᠵᠤ᠂ ᠠᠯᠪᠠ ᠭᠤᠪᠴᠢᠭᠤᠷ ᠠᠪᠳᠠᠭ 《ᠵᠢᠷ》 ᠪᠤᠰᠤ ᠵᠢᠷᠤᠮ ᠲᠠᠢ ᠪᠠᠶᠢᠵᠠᠢ᠃ ᠡᠭᠦᠨ ᠢ ᠣᠪᠵᠢᠩ ᠢᠶᠠᠷ ᠠᠰᠢᠭᠯᠠᠵᠤ᠂ 《ᠮᠥᠩᠭᠥ ᠪᠣᠰᠬᠠᠬᠤ》 ᠮᠡᠷᠭᠡᠨ ᠰᠠᠨᠠᠭ᠎ᠠ ᠴᠢᠴᠢᠺᠣᠸ ᠲᠤ ᠲᠥᠷᠦᠵᠥ᠂ ᠭᠠᠩ ᠭᠠᠴᠢᠭ᠂ ᠡᠪᠡᠳᠴᠢᠨ ᠲᠠᠬᠤᠯ᠂ ᠦᠬᠦᠯ ᠵᠣᠪᠠᠯᠠᠩ ᠨᠢᠭᠤᠷᠯᠠᠭᠰᠠᠨ ᠭᠠᠵᠠᠷ ᠤᠳ ᠢ ᠰᠣᠩᠭᠣᠨ 《ᠠᠮᠢ ᠦᠭᠡᠢ ᠠᠯᠪᠠᠲᠤ》 ᠬᠤᠳᠠᠯᠳᠤᠨ ᠠᠪᠬᠤ ᠪᠠᠷ ᠣᠷᠣᠰ ᠣᠷᠣᠨ ᠢᠶᠠᠷ ᠬᠥᠨᠳᠡᠯᠡᠨ ᠭᠤᠯᠳᠤ ᠬᠡᠷᠦᠨ ᠬᠡᠰᠦᠭᠰᠡᠨ ᠲᠤᠬᠠᠢ ᠰᠣᠨᠢᠷᠬᠠᠯᠲᠠᠢ ᠠᠳᠠᠯ ᠶᠠᠪᠤᠳᠠᠯ ᠤᠳ ᠠᠷᠤ ᠠᠷᠤ ᠠᠴᠠ ᠪᠠᠨ ᠬᠥᠪᠥᠷᠡᠵᠥ ᠥᠭᠭᠦᠨ᠎ᠡ ᠳ᠋ᠡ᠃ ᠤᠭ ᠨᠢ ᠬᠡᠨ ᠳᠦ ᠴᠤ ᠬᠡᠷᠡᠭ ᠦᠭᠡᠢ ᠪᠡᠷ ᠦᠯᠦ ᠪᠠᠷᠠᠮ᠂ ᠪᠠᠶᠢᠩᠭᠤ ᠮᠥᠩᠭᠥᠨ ᠦ ᠭᠠᠷᠤᠯᠭ᠎ᠠ ᠭᠠᠷᠭᠠᠳᠠᠭ ᠲᠡᠳᠡᠭᠡᠷ ᠲᠠᠯᠢᠢᠭᠠᠴᠢ ᠨᠠᠷ ᠠᠴᠠ ᠰᠠᠯᠬᠤ ᠶᠢᠨ ᠲᠦᠦᠰ ᠪᠣᠯᠤᠭᠰᠠᠨ ᠭᠠᠵᠠᠷ ᠤᠨ ᠡᠵᠡᠳ ᠵᠦᠭᠡᠷ ᠯᠠ ᠪᠡᠯᠡᠭᠯᠡᠵᠦ ᠤᠷᠬᠢᠬᠤ ᠪᠠᠶᠢᠬᠤ ᠭᠡᠰᠡᠨ ᠲᠡᠭᠦᠨ ᠦ ᠪᠣᠳᠣᠯ ᠰᠠᠨᠠᠭᠰᠠᠨ ᠠᠴᠠ ᠱᠠᠯ ᠥᠭᠡᠷ᠎ᠡ ᠪᠡᠷ ᠡᠷᠭᠢᠵᠡᠢ᠃ ᠦᠬᠦᠭᠰᠡᠨ ᠠᠯᠪᠠᠲᠤ ᠶᠢ ᠨᠢ ᠮᠥᠩᠭᠥ ᠪᠡᠷ ᠬᠤᠳᠠᠯᠳᠤᠵᠤ ᠠᠪᠤᠨ᠎ᠠ ᠭᠡᠰᠡᠨ ᠲᠡᠭᠦᠨ ᠦ ᠰᠣᠯᠢᠶ᠎ᠠ ᠲᠠᠢ ᠭᠡᠮᠡᠷ ᠰᠠᠨᠠᠯ ᠢ ᠨᠢ ᠰᠣᠨᠣᠰᠤᠭᠰᠠᠨ ᠭᠠᠵᠠᠷ ᠤᠨ ᠡᠵᠡᠳ ᠭᠠᠶᠢᠬᠠᠰᠢ ᠪᠠᠨ ᠪᠠᠷᠠᠵᠤ᠂ ᠦᠨᠡᠨ ᠡᠰᠡᠬᠦ ᠳᠦ ᠨᠢ ᠡᠷᠡᠭᠡᠯᠵᠡᠵᠦ᠂ ᠶᠠᠮᠠᠷ ᠨᠢᠭᠡᠨ ᠳᠠᠯᠳᠠ ᠰᠠᠨᠠᠭ᠎ᠠ ᠨᠢᠭᠤᠭᠳᠠᠵᠤ ᠪᠠᠶᠢᠵᠤ ᠪᠣᠯᠵᠣᠰᠢ ᠦᠭᠡᠢ ᠭᠡᠵᠦ ᠡᠮᠢᠶᠡᠵᠦ᠂ ᠵᠠᠷᠢᠮ ᠨᠢ ᠠᠰᠢᠭ ᠬᠣᠨᠵᠢᠶ᠎ᠠ ᠣᠯᠬᠤ ᠶᠢᠨ ᠲᠤᠯᠠᠳᠠ ᠰᠠᠨᠠᠭᠠᠨ ᠳᠤ ᠪᠠᠭᠲᠠᠮ᠎ᠠ ᠦᠭᠡᠢ ᠮᠥᠩᠭᠥ ᠨᠡᠬᠡᠵᠦ᠂ ᠦᠬᠦᠭᠰᠡᠨ ᠬᠦᠮᠦᠰ ᠢᠶᠡᠨ ᠲᠩᠷᠢ ᠳᠦ ᠲᠤᠯᠲᠠᠯ᠎ᠠ ᠨᠢ ᠮᠠᠭᠲᠠᠵᠤ᠂ ᠶᠡᠷᠦ ᠨᠢ ᠦᠭᠡ ᠪᠡᠷ ᠬᠡᠯᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ ᠶᠢᠰᠦᠨ ᠰᠢᠳᠢ ᠶᠢᠨ ᠠᠪᠤᠷᠢ ᠭᠠᠷᠭᠠᠵᠠᠢ᠃ ᠭᠠᠵᠠᠷ ᠤᠨ ᠡᠵᠡᠳ ᠢᠶᠡᠷ ᠳᠠᠮᠵᠢᠭᠤᠯᠤᠨ ᠡᠶᠡᠯᠳᠡᠭ ᠨᠠᠶᠢᠷᠰᠠᠭ᠂ ᠪᠦᠳᠦᠭᠦᠯᠢᠭ ᠬᠠᠷᠠᠩᠭᠤᠢ᠂ ᠮᠤᠬᠤᠷ ᠰᠦᠰᠦᠭ ᠲᠡᠢ᠂ ᠬᠠᠷᠠᠮᠴᠢ ᠬᠠᠬᠢᠷ᠂ ᠰᠢᠨᠤᠬᠠᠢ ᠰᠤᠪᠳᠠᠭ᠂ ᠴᠠᠳᠢᠭ ᠦᠭᠡᠢ ᠬᠤᠳᠠᠯᠴᠢ᠂ ᠮᠠᠭᠤ ᠰᠠᠨᠠᠭ᠎ᠠ ᠲᠠᠢ ᠭᠡᠳ ᠬᠥᠮᠦᠨ ᠳ᠋ᠤ ᠪᠠᠶᠢᠳᠠᠭ ᠣᠯᠠᠨ ᠵᠠᠩ ᠴᠢᠨᠠᠷ ᠤᠳ ᠢ ᠤᠷᠠᠨ ᠢᠶᠠᠷ ᠡᠯᠡᠭᠯᠡᠨ ᠦᠵᠡᠭᠦᠯᠦᠭᠰᠡᠨ ᠪᠠᠶᠢᠳᠠᠭ᠃ ᠬᠣᠲᠠ ᠶᠢᠨ ᠢᠵᠠᠭᠤᠷᠲᠠᠨ᠂ ᠳᠡᠭᠡᠭᠦᠷ ᠲᠤᠰᠢᠶᠠᠯ ᠤᠨ ᠲᠦᠰᠢᠮᠡᠳ ᠦᠳ ᠦᠨ ᠦᠷᠡᠯᠭᠡᠨ ᠲᠠᠩᠰᠤᠭᠯᠠᠯ᠂ ᠪᠡᠶ᠎ᠡ ᠪᠡᠶ᠎ᠡ ᠪᠠᠨ ᠳᠠᠭᠤᠷᠢᠶᠠᠭᠰᠠᠨ ᠬᠣᠭᠣᠰᠣᠨ ᠬᠡᠶᠢᠷᠬᠡᠯ᠂ ᠨᠢᠭᠡᠨ ᠦ ᠬᠢ ᠪᠡᠨ ᠳᠡᠭᠡᠷ᠎ᠡ ᠭᠠᠷᠬᠤ ᠭᠡᠰᠡᠨ ᠠᠲᠠᠭᠠᠴᠢ ᠥᠷᠢᠰᠦᠯᠳᠦᠭᠡᠨ᠂ ᠴᠠᠮᠠᠨ ᠵᠠᠩ᠂ ᠬᠠᠭᠤᠷᠮᠠᠴᠢ ᠰᠦᠷᠵᠢᠭᠢᠨᠡᠯ ᠢ ᠢᠷᠠᠭᠤ ᠲᠣᠳᠣ ᠪᠠᠷ ᠳᠦᠷᠰᠦᠯᠡᠨ ᠦᠵᠡᠭᠦᠯᠵᠦ᠂ ᠨᠡᠶᠢᠭᠡᠮ ᠤᠨ ᠬᠦᠨᠳᠦ ᠰᠤᠷᠲᠠᠯ᠂ ᠠᠪᠯᠢᠭ᠎ᠠ ᠳᠤ ᠢᠳᠡᠭᠳᠡᠭᠰᠡᠨ ᠲᠥᠷᠥ ᠶᠢᠨ ᠠᠯᠪᠠᠨ ᠬᠠᠭᠠᠭᠴᠢᠳ ᠤᠨ ᠦᠨᠡᠨ ᠨᠢᠭᠤᠷ ᠴᠢᠷᠠᠢ ᠶᠢ ᠢᠯᠡᠴᠢᠯᠡᠨ ᠱᠣᠣᠯᠠᠵᠤ᠂ ᠬᠦᠮᠦᠰ ᠦᠨ ᠣᠯᠠᠨ ᠶᠠᠩᠵᠤ ᠶᠢᠨ ᠵᠠᠩ ᠠᠪᠤᠷᠢ᠂ ᠠᠭᠠᠰᠢ ᠠᠷᠠᠨᠰᠢᠨ ᠢ ᠨᠢᠳᠦᠨ ᠳ᠋ᠤ ᠬᠠᠷᠠᠭᠳᠠᠲᠠᠯ᠎ᠠ ᠶᠣᠵᠣ ᠦᠭᠡ ᠪᠡᠷ ᠶᠣᠭᠲᠠᠯᠠᠨ ᠪᠢᠴᠢᠭᠰᠡᠨ ᠨᠢ ᠭᠠᠶᠢᠬᠠᠯ ᠪᠢᠰᠢᠷᠡᠯ ᠢ ᠲᠥᠷᠦᠭᠦᠯᠦᠨ᠎ᠡ᠃ ᠵᠢᠷ ᠦᠨ ᠵᠠᠷᠤᠴᠠ᠂ ᠬᠠᠮᠵᠢᠯᠭ᠎ᠠ᠂ ᠲᠠᠷᠢᠶᠠᠴᠢᠨ ᠠᠴᠠ ᠡᠬᠢᠯᠡᠭᠡᠳ ᠭᠠᠵᠠᠷ ᠤᠨ ᠡᠵᠡᠳ᠂ ᠬᠣᠲᠠ ᠶᠢᠨ ᠲᠦᠰᠢᠮᠡᠳ᠂ ᠳᠡᠭᠡᠭᠦᠷ ᠲᠤᠰᠢᠶᠠᠯ ᠤᠨ ᠳᠠᠷᠤᠭ᠎ᠠ᠂ ᠭᠧᠨᠧᠷᠠᠯ᠂ ᠢᠵᠠᠭᠤᠷᠲᠠᠨ ᠨᠤᠭᠤᠳ ᠭᠡᠳ ᠨᠡᠶᠢᠭᠡᠮ ᠤᠨ ᠪᠦᠬᠦᠢ ᠯᠠ ᠳᠠᠪᠬᠤᠷᠭ᠎ᠠ ᠶᠢ ᠬᠠᠮᠤᠷᠴᠣ᠂ ᠡᠳᠡᠭᠡᠷ ᠬᠦᠮᠦᠰ ᠦᠨ ᠪᠠᠶᠢᠷᠢ ᠰᠠᠭᠤᠷᠢ ᠶᠢ ᠲᠣᠪᠣᠶᠢᠯᠭᠠᠨ ᠦᠵᠡᠭᠦᠯᠵᠦ᠂ ᠶᠠᠭᠤᠨ ᠤ ᠤᠴᠢᠷ ᠤᠯᠤᠰ ᠣᠷᠣᠨ ᠨᠢ ᠥᠭᠡᠳᠡᠯᠡᠨ ᠳᠡᠪᠵᠢᠬᠦ ᠦᠭᠡᠢ᠂ ᠤᠷᠤᠭᠤᠳᠠᠨ ᠳᠤᠷᠤᠶᠢᠲᠠᠬᠤ ᠵᠠᠮ ᠳᠤ ᠣᠷᠣᠭᠰᠠᠨ ᠢ ᠰᠢᠭᠦᠨ ᠲᠤᠩᠭᠠᠬᠤ ᠶᠢ ᠵᠣᠷᠢᠵᠠᠢ᠃ ᠮᠥᠩᠭᠥ ᠲᠡᠢ᠂ ᠡᠷᠬᠡ ᠮᠡᠳᠡᠯ ᠲᠡᠢ ᠴᠥᠭᠡᠨ ᠬᠦᠮᠦᠰ ᠬᠠᠩᠭᠠᠯᠤᠭᠤᠨ ᠴᠢᠨᠡᠭᠡᠯᠢᠭ ᠠᠮᠢᠳᠤᠷᠠᠵᠤ ᠪᠠᠶᠢᠬᠤ ᠳᠤ᠂ ᠨᠡᠶᠢᠭᠡᠮ ᠤᠨ ᠭᠣᠣᠯ ᠠᠴᠢᠶ᠎ᠠ ᠶᠢ ᠡᠭᠦᠷᠴᠣ ᠶᠠᠪᠤᠭ᠎ᠠ ᠡᠭᠡᠯ ᠵᠢᠷ ᠦᠨ ᠬᠦᠮᠦᠰ ᠶᠠᠳᠠᠭᠤ ᠲᠠᠷᠴᠢᠭ᠂ ᠵᠣᠪᠠᠯᠠᠩ ᠵᠦᠳᠡᠭᠦᠷᠢ ᠲᠡᠢ ᠪᠠᠶᠢᠭ᠎ᠠ ᠶᠢᠨ ᠤᠴᠢᠷ ᠰᠢᠯᠲᠠᠭᠠᠨ ᠢ ᠣᠯᠬᠤ ᠶᠢ ᠬᠦᠰᠡᠵᠡᠢ᠃ ᠲᠥᠷᠥ ᠶᠢᠨ ᠠᠯᠪᠠ ᠭᠡᠭᠴᠢ ᠦᠨᠡᠨ ᠳᠦ ᠪᠡᠨ ᠬᠦᠨᠳᠦ ᠰᠤᠷᠲᠠᠯ᠂ ᠠᠪᠯᠢᠭ᠎ᠠ ᠶᠢᠨ ᠡᠭᠦᠷ ᠠᠭᠤᠷᠬᠠᠢ ᠪᠣᠯᠤᠭᠰᠠᠨ᠂ ᠨᠡᠶᠢᠭᠡᠮ ᠤᠨ ᠪᠠᠶᠠᠯᠶᠭ ᠢ ᠰᠣᠷᠣᠨ ᠮᠥᠯᠵᠢᠭᠴᠢ ᠦᠷ᠎ᠡ ᠠᠰᠢᠭ ᠦᠭᠡᠢ ᠨᠦᠰᠡᠷ ᠲᠣᠭᠲᠠᠯᠴᠠᠭ᠎ᠠ ᠶᠤᠮ ᠭᠡᠳᠡᠭ ᠢ ᠭᠢᠷᠬᠠᠢ ᠠᠵᠢᠭᠯᠠᠵᠤ᠂ ᠲᠦᠰᠢᠮᠡᠳ ᠦᠳ ᠦᠨ ᠲᠡᠨᠡᠭᠯᠡᠯ ᠢ ᠡᠯᠡᠭᠯᠡᠨ ᠱᠣᠣᠯᠠᠭᠰᠠᠨ ᠪᠠᠶᠢᠳᠠᠭ᠃ ᠭᠠᠳᠠᠨ᠎ᠠ ᠶᠢᠨ ᠶᠠᠭᠤᠮ᠎ᠠ ᠪᠦᠬᠦᠨ ᠢ ᠰᠣᠬᠣᠷ ᠢᠶᠠᠷ ᠳᠠᠭᠠᠨ ᠳᠠᠭᠤᠷᠢᠶᠠᠵᠤ᠂ ᠠᠮᠢᠳᠤᠷᠠᠯ ᠳᠤ ᠦᠯᠦ ᠨᠡᠶᠢᠴᠡᠬᠦ ᠬᠣᠭᠣᠰᠣᠨ ᠣᠨᠣᠯ ᠢᠶᠠᠷ ᠰᠡᠴᠡᠷᠬᠡᠵᠦ ᠰᠠᠭᠤᠳᠠᠭ᠂ ᠰᠤᠷᠣᠭᠰᠠᠨ ᠡᠷᠳᠡᠮ ᠮᠡᠳᠡᠯᠭᠡ ᠪᠡᠨ ᠠᠰᠢᠭᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠥᠯᠪᠡᠷᠴᠦ ᠦᠬᠦᠬᠦ ᠭᠡᠵᠦ ᠪᠠᠶᠢᠪᠠᠴᠤ ᠭᠦᠨ ᠤᠬᠠᠭᠠᠨ ᠢᠶᠠᠷ ᠴᠡᠴᠡ ᠪᠤᠯᠢᠶᠠᠯᠳᠤᠳᠠᠭ ᠥᠷᠦᠪᠳᠦᠯᠲᠡᠢ ᠬᠦᠮᠦᠰ ᠦᠨ ᠳᠦᠷᠢ ᠲᠥᠷᠬᠥ ᠨᠢᠳᠦᠨ ᠳ᠋ᠤ ᠲᠣᠳᠣᠷᠠᠨ᠎ᠠ᠃ ᠬᠦᠮᠦᠨ ᠦ ᠰᠢᠨᠤᠯ ᠢ ᠠᠰᠠᠭᠠᠵᠤ᠂ ᠬᠦᠰᠡᠯ ᠢ ᠥᠳᠥᠭᠡᠵᠦ ᠪᠠᠶᠢᠳᠠᠭ ᠲᠤᠬᠠᠯᠢᠭ ᠠᠮᠢᠳᠤᠷᠠᠯ ᠤᠨ ᠬᠡᠷᠡᠭᠯᠡᠭᠡ ᠭᠡᠳᠡᠭ ᠦᠨᠡᠨ ᠳᠦ ᠪᠡᠨ ᠵᠠᠯᠢ ᠮᠡᠬᠡ ᠲᠡᠢ ᠬᠤᠳᠠᠯᠳᠤᠭᠠᠴᠢᠳ᠂ ᠨᠠᠶᠢᠮᠠᠭᠠᠴᠢᠳ ᠤᠨ ᠥᠭᠭᠦᠭᠡᠰᠢ ᠪᠥᠭᠡᠳ ᠥᠷᠲᠡᠭ ᠨᠢ ᠭᠧᠣᠮᠡᠲ᠋ᠷ ᠦᠨ ᠫᠷᠣᠭᠷᠧᠰᠰ ᠢᠶᠡᠷ ᠥᠰᠴᠦ᠂ ᠦᠷ᠎ᠡ ᠳ᠋ᠦᠢᠩ ᠨᠢ ᠳᠠᠮᠫᠤᠷᠠᠯ ᠢᠶᠠᠷ ᠳᠠᠭᠤᠰᠬᠤ ᠠᠵᠢ᠃ ᠲᠥᠷᠥᠯᠬᠢ ᠶᠢᠨ ᠦᠨᠡᠨᠴᠢ ᠰᠢᠳᠤᠷᠭᠤ ᠬᠦᠮᠦᠰ ᠪᠠᠶᠢᠳᠠᠭ ᠴᠤ ᠨᠡᠶᠢᠭᠡᠮ ᠤᠨ ᠣᠷᠴᠢᠨ ᠨᠥᠬᠥᠴᠡᠯ ᠨᠢ ᠰᠢᠳᠤᠷᠭᠤ ᠪᠤᠰᠤ ᠪᠠᠶᠢᠳᠠᠯ ᠤᠷᠤᠭᠤ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠲᠦᠯᠬᠢᠳᠡᠭ ᠪᠣᠯᠬᠤ ᠶᠢ ᠡᠨᠳᠡ ᠡᠴᠡ ᠮᠡᠳᠡᠵᠦ ᠠᠪᠤᠨ᠎ᠠ᠃ ᠰᠡᠳᠬᠢᠯ ᠵᠢᠳᠬᠦᠯ ᠪᠠᠶᠢᠪᠠᠯ ᠰᠢᠳᠤᠷᠭᠤ ᠬᠥᠳᠡᠯᠮᠦᠷᠢ ᠪᠡᠷ ᠰᠠᠶᠢᠬᠠᠨ ᠠᠮᠢᠳᠤᠷᠠᠵᠤ ᠪᠣᠯᠬᠤ ᠶᠢ᠂ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠬᠦᠮᠦᠨ ᠪᠦᠬᠦᠨ ᠮᠠᠭᠤ ᠮᠠᠭᠤᠬᠠᠢ ᠪᠠᠶᠢᠳᠠᠭ ᠦᠭᠡᠢ ᠶᠢ ᠮᠤᠵᠢ ᠶᠢᠨ ᠲᠡᠷᠢᠭᠦᠨ ᠪᠠᠶᠠᠨ ᠮᠤᠷᠠᠽᠣᠪ᠂ ᠭᠠᠵᠠᠷ ᠤᠨ ᠡᠵᠡᠨ ᠺᠣᠰᠲ᠋ᠠᠨᠵᠤᠭᠯᠠ ᠨᠠᠷ ᠤᠨ ᠰᠠᠶᠢᠬᠠᠨ ᠰᠡᠳᠬᠢᠯ ᠲᠡᠢ ᠬᠦᠮᠦᠰ ᠦᠨ ᠳᠦᠷᠢ ᠪᠡᠷ ᠦᠵᠡᠭᠦᠯᠵᠦ᠂ ᠵᠠᠯᠬᠠᠭᠤ ᠬᠣᠶᠢᠷᠭᠣ᠂ ᠠᠷᠠᠴᠢᠭ᠎ᠠ ᠦᠭᠡᠢ᠂ ᠠᠮᠢᠨ ᠬᠤᠪᠢ ᠪᠠᠨ ᠬᠢᠴᠢᠶᠡᠭᠰᠡᠨ᠂ ᠮᠥᠷᠥᠢ ᠲᠡᠢ ᠲᠣᠭᠯᠠᠭᠠᠮ᠂ ᠨᠠᠷᠭᠢᠶᠠᠨ ᠴᠡᠩᠭᠡᠭᠡᠨ ᠳᠦ ᠳᠣᠩᠲᠣᠭᠰᠠᠨ ᠠᠴᠠ ᠪᠣᠯᠵᠤ ᠠᠵᠤ ᠠᠬᠤᠢ ᠪᠠᠨ ᠰᠦᠢᠷᠡᠭᠦᠯᠦᠭᠰᠡᠨ ᠭᠠᠵᠠᠷ ᠤᠨ ᠡᠵᠡᠳ ᠢ ᠡᠰᠡᠷᠭᠦᠴᠡᠭᠦᠯᠦᠨ ᠳᠦᠷᠰᠦᠯᠡᠭᠰᠡᠨ ᠪᠠᠶᠢᠳᠠᠭ ᠪᠢᠯᠡ᠃ ᠶᠡᠷᠦ ᠡᠴᠡ ᠡᠨᠡ ᠵᠣᠬᠢᠶᠠᠯ ᠮᠠᠰᠢ ᠥᠷᠭᠡᠨ ᠬᠦᠷᠢᠶ᠎ᠡ᠂ ᠣᠯᠠᠨ ᠰᠡᠳᠦᠪ ᠢ ᠬᠠᠮᠤᠷᠴᠥ᠂ ᠬᠡᠯᠡᠬᠦ ᠭᠡᠰᠡᠨ ᠰᠠᠨᠠᠭ᠎ᠠ ᠪᠠᠨ ᠳᠠᠯᠳᠠ ᠶᠣᠭᠲᠠ ᠤᠳᠬ᠎ᠠ ᠪᠠᠷ᠂ ᠬᠥᠪᠥᠩ ᠳᠦ ᠪᠣᠭᠣᠭᠰᠠᠨ ᠴᠢᠯᠠᠭᠤ ᠪᠠᠷ ᠲᠦᠩᠰᠢᠵᠤ᠂ ᠤᠷᠠᠨ ᠬᠣᠱᠤᠩ ᠢᠶᠠᠷ ᠡᠯᠡᠭᠯᠡᠨ ᠦᠵᠡᠭᠦᠯᠦᠭᠰᠡᠨ ᠳᠦ ᠥᠪᠡᠷᠮᠢᠴᠡ ᠥᠩᠭᠡ ᠠᠶᠠᠰ ᠨᠢ ᠣᠷᠣᠰᠢᠵᠤ ᠪᠠᠶᠢᠭ᠎ᠠ ᠶᠤᠮ᠃ ᠭᠦᠨ ᠤᠳᠬ᠎ᠠ ᠰᠠᠨᠠᠭ᠎ᠠ ᠲᠠᠢ᠂ ᠤᠷᠠᠨ ᠭᠣᠶᠣ ᠦᠭᠡ ᠬᠡᠯᠡᠯᠭᠡ ᠲᠡᠢ ᠡᠰᠢᠯᠡᠯ ᠦᠳ ᠢᠶᠡᠷ ᠪᠠᠶᠠᠯᠢᠭ ᠵᠣᠬᠢᠶᠠᠯ ᠪᠢᠯᠡ᠃ ᠴᠢᠴᠢᠺᠣᠸ ᠪᠣᠯ ᠮᠠᠨ ᠤ ᠥᠨᠥ ᠶᠢᠨ ᠨᠡᠶᠢᠭᠡᠮ ᠳᠦ ᠪᠠᠶᠢᠭ᠎ᠠ ᠵᠢᠰᠤᠷᠴᠢ ᠪᠢᠯᠳᠠᠤᠴᠢ ᠬᠤᠷᠠᠭᠠᠨ ᠳᠠᠷᠤᠭ᠎ᠠ ᠨᠠᠷ᠂ ᠠᠪᠯᠢᠭᠠᠴᠢ ᠲᠦᠰᠢᠮᠡᠳ᠂ ᠠᠮᠠᠷ ᠬᠢᠯᠪᠠᠷ ᠠᠷᠭ᠎ᠠ ᠪᠠᠷ ᠬᠥᠯᠵᠢᠵᠦ ᠪᠠᠶᠠᠵᠢᠬᠤ ᠭᠡᠰᠡᠨ ᠮᠥᠩᠭᠥ᠂ ᠡᠷᠬᠡ ᠮᠡᠳᠡᠯ᠂ ᠲᠠᠩᠰᠤᠭ ᠠᠮᠢᠳᠤᠷᠠᠯ ᠳᠤ ᠰᠢᠨᠤᠨ ᠳᠤᠷᠠᠯᠠᠭᠰᠠᠳ ᠤᠨ ᠨᠡᠶᠢᠲᠡᠯᠢᠭ ᠲᠥᠷᠬᠥ ᠶᠤᠮ᠃ 《ᠶᠠᠮᠠᠷ ᠴᠤ ᠠᠷᠭ᠎ᠠ ᠪᠠᠷ ᠬᠠᠮᠢᠶ᠎ᠠ ᠦᠭᠡᠢ ᠮᠥᠩᠭᠥ ᠬᠤᠷᠢᠶᠠ᠃ ᠲᠡᠭᠡᠪᠡᠯ ᠴᠢ ᠰᠠᠶᠢᠬᠠᠨ ᠠᠮᠢᠳᠤᠷᠠᠯ ᠳᠤ ᠬᠦᠷᠥᠨ᠎ᠡ》 ᠭᠡᠰᠡᠨ ᠰᠢᠨᠤᠬᠠᠢ ᠰᠤᠪᠳᠠᠭ ᠡᠴᠢᠭᠡ ᠶᠢᠨ ᠢᠶᠡᠨ ᠵᠠᠬᠢᠶᠠᠰᠤ ᠶᠢ ᠠᠮᠢᠳᠤᠷᠠᠯ ᠤᠨ ᠢᠶᠠᠨ ᠵᠣᠷᠢᠯᠭ᠎ᠠ ᠪᠣᠯᠭᠠᠭᠰᠠᠨ ᠴᠢᠴᠢᠺᠣᠸ 《ᠮᠢᠨᠦ ᠬᠦᠮᠦᠵᠢᠯ ᠠᠩᠬᠠᠨ ᠠᠴᠠ ᠪᠠᠨ ᠯᠠ ᠪᠤᠷᠤᠭᠤ ᠶᠠᠪᠤᠴᠢᠬᠠᠭᠰᠠᠨ ᠶᠤᠮ》 ᠭᠡᠵᠦ ᠬᠣᠵᠢᠮ ᠬᠠᠷᠠᠮᠰᠠᠨ ᠦᠭᠦᠯᠡᠳᠡᠭ ᠪᠢᠯᠡ᠃ ᠰᠢᠭᠦᠬᠦ ᠲᠠᠰᠤᠯᠬᠤ ᠭᠠᠵᠠᠷ᠂ ᠪᠠᠷᠢᠯᠭ᠎ᠠ ᠶᠢᠨ ᠺᠣᠮᠢᠰ᠂ ᠭᠠᠶᠢᠯᠢ ᠶᠢᠨ ᠬᠣᠷᠢᠶᠠᠨ ᠳᠤ ᠲᠦᠰᠢᠮᠡᠯ ᠦᠨ ᠠᠯᠪᠠ ᠬᠠᠰᠢᠵᠤ ᠶᠠᠪᠤᠭᠰᠠᠨ ᠴᠢᠴᠢᠺᠣᠸ ᠳᠡᠭᠡᠳᠦ ᠳᠠᠷᠤᠭ᠎ᠠ ᠨᠠᠷ ᠤᠨ ᠢᠶᠠᠨ ᠠᠷᠭ᠎ᠠ ᠡᠪ᠂ ᠠᠭᠠᠰᠢ ᠠᠶᠠᠭ᠂ ᠢᠲᠡᠭᠡᠯ ᠢ ᠣᠯᠬᠤ ᠳᠤ ᠪᠠᠨ ᠭᠠᠷᠭᠠᠭᠤᠳ ᠪᠥᠭᠡᠳ᠂ ᠨᠡᠷ᠎ᠡ ᠬᠦᠨᠳᠦ ᠣᠯᠵᠤ ᠠᠪᠬᠤ ᠶᠢᠨ ᠲᠤᠯᠠᠳᠠ ᠵᠢᠰᠤᠷᠳᠠᠨ ᠳᠣᠯᠢᠭᠠᠨᠠᠬᠤ᠂ ᠰᠢᠳᠤᠷᠭᠤ ᠳᠦᠷᠢ ᠡᠰᠭᠡᠬᠦ᠂ ᠬᠣᠣᠷ ᠨᠠᠶᠢᠷᠠᠭᠤᠯᠬᠤ ᠳᠤ ᠪᠠᠨ ᠮᠡᠷᠭᠡᠰᠢᠭᠰᠡᠨ ᠲᠡᠳᠦᠢ ᠦᠭᠡᠢ᠂ ᠠᠪᠯᠢᠭ᠎ᠠ ᠠᠪᠬᠤ ᠳᠤ ᠪᠠᠨ ᠦᠨᠡᠨᠬᠦᠦ ᠲᠣᠯᠣᠭᠠᠢ ᠨᠢ ᠰᠡᠶᠢᠷᠡᠭ ᠠᠵᠢᠯᠯᠠᠳᠠᠭ᠂ ᠬᠤᠪᠢ ᠶᠢᠨ ᠡᠷᠬᠡ ᠠᠰᠢᠭ ᠤᠨ ᠲᠥᠯᠥᠭᠡ ᠬᠡᠨ ᠢ ᠴᠤ ᠵᠣᠯᠢᠶᠠᠰᠤᠯᠠᠬᠤ ᠳᠤ ᠪᠡᠯᠡᠨ ᠴᠡᠪᠳᠡᠭ ᠰᠡᠳᠬᠢᠯ ᠲᠡᠢ ᠬᠦᠮᠦᠨ ᠶᠤᠮ᠃ ᠲᠡᠷᠡ ᠪᠡᠷ ᠲᠥᠷᠥᠯᠬᠢ ᠶᠢᠨ ᠭᠦᠢᠯᠭᠡᠭᠡ ᠤᠬᠠᠭᠠᠨ ᠲᠠᠢ᠂ ᠠᠷᠭ᠎ᠠ ᠵᠠᠯᠢ ᠲᠠᠢ᠂ ᠰᠡᠶᠢᠷᠡᠭ ᠲᠣᠯᠣᠭᠠᠢ ᠪᠣᠯᠪᠠᠴᠤ ᠡᠭᠦᠨ ᠢ ᠪᠡᠨ ᠪᠤᠷᠤᠭᠤ ᠪᠠᠷ ᠠᠰᠢᠭᠯᠠᠵᠤ ᠡᠴᠦᠰ ᠲᠡᠭᠡᠨ ᠰᠦᠢᠷᠡᠨ ᠤᠨᠠᠵᠤ ᠪᠠᠶᠢᠭ᠎ᠠ ᠶᠢ ᠲᠣᠳᠣᠷᠬᠠᠢ ᠬᠠᠷᠠᠭᠤᠯᠳᠠᠭ ᠪᠢᠯᠡ᠃ ᠣᠷᠣᠰ ᠣᠷᠣᠨ ᠤ ᠬᠢ ᠪᠠᠨ ᠠᠮᠢᠳᠤᠷᠠᠯ ᠠᠬᠤᠢ᠂ ᠣᠷᠣᠰ ᠬᠦᠮᠦᠨ ᠦ ᠠᠵᠤ ᠲᠥᠷᠥᠯ᠂ ᠵᠠᠩ ᠲᠥᠷᠬᠥ ᠶᠢ ᠡᠭᠦᠨ ᠡᠴᠡ ᠢᠯᠡᠭᠦᠦ ᠶᠠᠭᠠᠬᠢᠵᠤ ᠳᠦᠷᠰᠦᠯᠡᠨ ᠦᠵᠡᠭᠦᠯᠬᠦ ᠪᠤᠢ ᠳ᠋ᠡ᠃ ᠴᠢᠴᠢᠺᠣᠸ ᠶᠠᠭᠤᠨ ᠤ ᠤᠴᠢᠷ 《ᠠᠮᠢ ᠦᠭᠡᠢ ᠠᠯᠪᠠᠲᠤ ᠨᠤᠭᠤᠳ》 ᠬᠤᠳᠠᠯᠳᠤᠨ ᠠᠪᠬᠤ ᠪᠣᠯᠤᠭᠰᠠᠨ ᠬᠢᠭᠡᠳ᠂ ᠲᠡᠭᠦᠨ ᠢ ᠲᠣᠭᠣᠷᠢᠭᠰᠠᠨ ᠠᠳᠠᠯ ᠰᠣᠨᠢᠨ ᠶᠠᠪᠤᠳᠠᠯ ᠤᠳ᠂ ᠢᠨᠢᠶᠡᠳᠦ ᠨᠠᠷᠭᠢᠶᠠᠨ᠂ ᠡᠮᠭᠡᠨᠢᠯ ᠭᠤᠨᠢᠭ᠂ ᠮᠥᠬᠥᠯ ᠰᠦᠢᠷᠡᠯ ᠢ ᠤᠭ ᠷᠣᠮᠠᠨ ᠠᠴᠠ ᠠᠮᠲᠠᠷᠬᠠᠨ ᠤᠩᠰᠢᠪᠠᠯ ᠢᠯᠡᠭᠦᠦ ᠭᠣᠶᠣ ᠲᠠᠭᠠᠰᠢᠶᠠᠯ ᠠᠪᠤᠨ᠎ᠠ ᠭᠡᠳᠡᠭ ᠢ ᠬᠡᠯᠡᠶ᠎ᠡ᠃ ᠠᠶᠤᠤᠷᠵᠠᠨᠧᠪ ᠦᠨ ᠬᠠᠭᠤᠴᠢᠨ ᠣᠷᠴᠢᠭᠤᠯᠭ᠎ᠠ ᠶᠢ ᠳᠠᠬᠢᠨ ᠰᠢᠨᠡᠴᠢᠯᠡᠨ ᠨᠠᠶᠢᠷᠠᠭᠤᠯᠬᠤ ᠳᠤ ᠪᠠᠨ ᠣᠶᠢᠯᠠᠭᠠᠮᠵᠢ ᠦᠭᠡᠢ ᠬᠡᠰᠡᠭ ᠢ ᠵᠠᠰᠠᠵᠤ ᠵᠠᠯᠠᠷᠠᠭᠤᠯᠤᠨ᠂ ᠤᠯᠠᠮ ᠢᠷᠠᠭᠤ ᠲᠣᠳᠣᠷᠬᠠᠢ ᠪᠣᠯᠭᠠᠵᠤ᠂ ᠵᠣᠬᠢᠶᠠᠯᠴᠢ ᠶᠢᠨ ᠪᠢᠴᠢᠯᠭᠡ ᠶᠢᠨ ᠳᠣᠨᠵᠢ ᠮᠠᠶ᠋ᠢᠭ ᠢ ᠲᠣᠳᠣᠷᠬᠠᠢ ᠰᠠᠶᠢᠬᠠᠨ ᠭᠠᠷᠭᠠᠵᠤ ᠴᠢᠳᠠᠭᠰᠠᠨ ᠳᠤ ᠣᠯᠵᠠᠭᠤᠷᠬᠠᠵᠤ ᠰᠠᠭᠤᠨ᠎ᠠ᠃ ᠬᠡᠯᠡᠬᠦ ᠭᠡᠰᠡᠨ ᠰᠠᠨᠠᠭ᠎ᠠ ᠪᠠᠨ ᠶᠣᠭᠲᠤ ᠪᠠᠷ ᠦᠭᠦᠯᠡᠵᠦ᠂ ᠬᠣᠱᠣᠩᠨᠠᠯ ᠳᠤᠮᠳᠠ ᠬᠦᠮᠦᠨ ᠦ ᠵᠠᠩ ᠠᠪᠤᠷᠢ ᠶᠢ ᠪᠦᠷᠢᠨ᠎ᠡ ᠨᠡᠭᠡᠭᠡᠨ ᠦᠵᠡᠭᠦᠯᠵᠦ ᠴᠢᠳᠠᠳᠠᠭ ᠬᠣᠣᠰ ᠦᠭᠡᠢ ᠠᠪᠢᠶᠠᠰ ᠪᠢᠯᠢᠭᠲᠦ ᠭᠣᠭᠣᠯ ᠤᠨ 《ᠠᠮᠢ ᠦᠭᠡᠢ ᠠᠯᠪᠠᠲᠤ ᠨᠤᠭᠤᠳ》 ᠬᠡᠳᠦ ᠳᠠᠬᠢᠨ ᠤᠩᠰᠢᠭᠰᠠᠨ ᠴᠤ ᠤᠶᠢᠳᠬᠤ ᠪᠠᠷ ᠦᠭᠡᠢ᠂ ᠵᠣᠬᠢᠶᠠᠯ ᠤᠨ ᠳᠣᠲᠣᠷ᠎ᠠ ᠠᠴᠠ ᠵᠣᠬᠢᠶᠠᠯ ᠭᠠᠷᠴᠤ ᠢᠷᠡᠬᠦ ᠮᠡᠲᠦ ᠥᠭᠦᠯᠡᠮᠵᠢ ᠲᠡᠢ᠂ ᠡᠩ ᠦᠨ ᠮᠥᠷᠲᠡᠯ᠎ᠡ ᠵᠢᠩᠬᠢᠨᠢ ᠰᠣᠩᠭᠣᠳᠠᠭ ᠭᠡᠵᠦ ᠡᠭᠦᠨ ᠢ ᠯᠠ ᠬᠡᠯᠡᠨ᠎ᠡ ᠳ᠋ᠡ᠃ ᠨᠢᠭᠡ ᠬᠠᠷᠠᠮᠰᠠᠯ ᠲᠠᠢ ᠵᠦᠢᠯ ᠨᠢ ᠬᠠᠮᠤᠭ ᠤᠨ ᠭᠣᠶᠣ ᠬᠡᠰᠡᠭ ᠦᠳ ᠦᠨ ᠨᠢᠭᠡ ᠪᠣᠯᠬᠤ᠂ ᠮᠠᠨᠢ ᠴᠢᠴᠢᠺᠣᠸ ᠭᠧᠨᠧᠷᠠᠯ ᠢ 《ᠬᠣᠰᠭᠢᠷᠠᠭᠤᠯᠳᠠᠭ》 2 ᠍ ᠳᠦᠭᠡᠷ ᠪᠣᠲᠢ ᠶᠢᠨ 2 ᠍ ᠳᠦᠭᠡᠷ ᠪᠦᠯᠦᠭ ᠦᠨ ᠲᠡᠭᠦᠰᠬᠡᠯ ᠳᠤᠲᠠᠭᠤ ᠪᠠᠶᠢᠭᠰᠠᠨ ᠠᠴᠠ ᠭᠠᠳᠠᠨ᠎ᠠ ᠵᠣᠬᠢᠶᠠᠯ ᠤᠨ ᠲᠡᠭᠦᠰᠬᠡᠯ ᠬᠡᠰᠡᠭ ᠦᠨ ᠭᠠᠷ ᠪᠢᠴᠢᠮᠡᠯ ᠦᠳ ᠢᠶᠡᠨ ᠵᠣᠬᠢᠶᠠᠯᠴᠢ ᠥᠪᠡᠷ ᠢᠶᠡᠨ ᠰᠢᠲᠠᠭᠠᠭᠰᠠᠨ ᠠᠵᠡᠢ᠃ ᠡᠨᠡ ᠨᠢ ᠶᠠᠮᠠᠷ ᠤᠴᠢᠷ ᠲᠠᠢ ᠶᠢ ᠬᠡᠨ ᠴᠤ ᠮᠡᠳᠡᠬᠦ ᠦᠭᠡᠢ ᠴᠤ ᠮᠠᠭᠠᠳ ᠦᠭᠡᠢ ᠵᠣᠬᠢᠶᠠᠯᠴᠢ ᠢᠩᠭᠢᠵᠦ ᠤᠴᠢᠷ ᠪᠢᠲᠡᠭᠦᠯᠢᠭ ᠲᠡᠭᠦᠰᠬᠡᠬᠦ ᠶᠢ ᠬᠦᠰᠡᠭᠰᠡᠨ ᠴᠤ ᠶᠤᠮ ᠪᠢᠯᠡ ᠦᠦ︖ ᠭᠣᠣᠯ ᠪᠠᠭᠠᠲᠤᠷ ᠲᠤ ᠴᠢᠨᠠᠭᠰᠢᠳᠠ ᠶᠠᠭᠤ ᠲᠣᠬᠢᠶᠠᠯᠳᠤᠬᠤ ᠶᠢ ᠪᠢᠳᠡ ᠲᠠᠭᠠᠮᠠᠭᠯᠠᠬᠤ ᠯᠠ ᠦᠯᠡᠳᠡᠯ᠎ᠡ᠃ ᠤᠳᠬ᠎ᠠ ᠵᠣᠬᠢᠶᠠᠯ ᠤᠨ ᠨᠢᠭᠡ ᠭᠣᠣᠯ ᠮᠥᠨ ᠴᠢᠨᠠᠷ ᠴᠢᠨᠢ ᠯᠠ ᠡᠨᠡ ᠰᠢᠦ ᠳ᠋ᠡ᠃ ᠠᠢ᠂ ᠭᠣᠭᠣᠯ ᠮᠢᠨᠢ︕ ᠲᠦᠮᠡᠲᠦ ᠰᠢᠨ᠎ᠡ ᠬᠥᠷᠪᠡᠭᠦᠯᠪᠡ

2        0       

               307       2023-11-23 11:03
       1681       2023-09-07 08:40
            1910       2023-07-05 21:05
ᠬᠥᠬᠡ ᠲᠣᠯᠪᠤᠲᠤ ᠳ᠋ ᠊ ᠲᠡᠮᠦᠷᠸᠴᠢᠷ : ᠶᠡᠬᠡ ᠨᠡᠭᠦᠳᠡᠯ - ᠡᠭᠡᠯ ᠦᠭᠡᠢ ᠰᠠᠢᠬᠠᠨ ᠵᠣᠬᠢᠶᠠᠯ  4589       2018-09-09 20:17
ᠳᠡᠯᠭᠡᠭᠦᠷ ᠡᠴᠡ ᠦᠨᠡᠲᠡᠢ ᠪᠢᠰᠢᠯᠠᠭ ᠠᠪᠬᠤ ᠬᠡᠷᠡᠭ ᠦᠭᠡᠢ᠃ ᠬᠠᠷᠢᠨ ᠡᠭᠦᠨ ᠢ ᠭᠡᠷ ᠲᠦ ᠪᠡᠨ ᠬᠢᠵᠦ ᠢᠳᠡᠭᠡᠷᠡᠢ  8405       2018-09-09 16:35
ᠬᠤᠷᠳᠤᠨ ᠬᠥᠭ᠍ᠰᠢᠷᠡᠵᠦ᠂ ᠶᠡᠬᠡ ᠡᠪᠡᠳᠦᠮᠡᠷ ᠪᠠᠢᠪᠠᠯ ᠳᠠᠪᠤᠰᠤ ᠲᠠᠢ ᠴᠠᠢ ᠪᠠᠨ ᠰᠠᠢᠨ ᠤᠤᠭᠤᠵᠤ᠂ ᠺᠢᠮᠴᠢ ᠪᠠᠨ ᠵᠥᠩᠳᠡᠭᠡᠨ ᠢᠳᠡᠭᠡᠷᠡᠢ  8069       2018-09-09 09:29
                             13847524386      211429899@qq.com      13847524386   QQ  211429899 蒙ICP备17002503号-1