ᠪ ∙ ᠷᠢᠨᠴᠢᠨ᠄ 《ᠠᠪᠤ ᠨᠢ ᠮᠣᠩᠭᠣᠯ ᠢᠶᠠᠨ ᠭᠡᠭᠰᠡᠭᠡᠷ ᠶᠠᠪᠤᠭᠠᠳ ᠡᠶᠢᠮᠦ ᠪᠣᠯᠤᠯ᠎ᠠ ᠳ᠋ᠠ》 ᠪ ∙ ᠷᠢᠨᠴᠢᠨ ᠭᠤᠸᠠᠢ ᠶᠢ ᠬᠣᠳᠣᠭᠣᠳᠣᠨ ᠤ ᠬᠡᠴᠡᠭᠦᠦ ᠨᠡᠷᠡᠲᠦ ᠡᠪᠡᠳᠴᠢᠨ ᠳᠤᠰᠤᠭᠠᠳ ᠮᠣᠩᠭᠣᠯ ᠳᠤ ᠡᠮᠴᠢᠯᠡᠭᠡ ᠦᠭᠡᠢ ᠪᠣᠯᠤᠭᠰᠠᠨ ᠢ ᠨᠢ ᠮᠡᠳᠡᠮᠡᠭᠴᠡ ᠤᠤᠭᠠᠨ ᠥᠬᠢᠨ᠂ ᠠᠷᠠᠳ ᠤᠨ ᠡᠮᠴᠢ ᠷ ∙ ᠨᠢᠮ᠎ᠠ ᠨᠢ ᠭᠣᠷᠢᠳᠠᠯᠭ᠎ᠠ ᠲᠡᠭᠡᠭᠡᠨ ᠮᠣᠰᠺᠸᠠ ᠤᠷᠤᠭᠤ ᠡᠮᠴᠢᠯᠡᠭᠦᠯᠬᠦ ᠪᠡᠷ ᠠᠪᠴᠤ ᠶᠠᠪᠤᠵᠤ ᠪᠠᠶᠢᠭᠰᠠᠨ ᠪᠣᠯ᠂ ᠲᠩᠷᠢ ᠳᠦ ᠬᠠᠯᠢᠬᠤ ᠶᠢᠨ ᠬᠢ ᠨᠢ ᠡᠮᠦᠨ᠎ᠡ ᠳᠤᠮᠳᠠ ᠥᠬᠢᠨ ᠷ ∙ ᠢᠨᠳᠠᠷ᠎ᠠ ᠨᠢ ᠳᠡᠷᠭᠡᠳᠡ ᠨᠢ ᠪᠠᠶᠢᠵᠤ ᠠᠰᠠᠷᠠᠵᠤ ᠬᠠᠯᠠᠮᠵᠢᠯᠠᠨ᠂ ᠡᠷᠭᠦᠵᠦ ᠲᠡᠭᠡᠭᠡᠵᠦ ᠪᠠᠶᠢᠵᠠᠢ᠃ ᠷᠢᠨᠴᠢᠨ ᠦ ᠢᠨᠳᠠᠷ᠎ᠠ : ᠠᠪᠤ ᠰᠤᠳᠤᠷ ᠪᠢᠴᠢᠭ ᠦᠨ ᠬᠦᠷᠢᠶᠡᠯᠡᠩ ᠳᠦ ᠠᠵᠢᠯᠯᠠᠵᠤ ᠪᠠᠶᠢᠬᠤ ᠳᠤ ᠮᠠᠨ ᠤ ᠬᠢ ᠲᠠᠷᠴᠢᠭ ᠶᠠᠳᠠᠭᠤᠬᠠᠨ ᠯᠠ ᠠᠵᠣ ᠲᠥᠷᠥᠵᠤ ᠪᠠᠶᠢᠭᠰᠠᠨ᠃ ᠬᠤᠪᠴᠠᠰᠤ ᠬᠤᠨᠠᠷ ᠮᠠᠭᠤᠬᠠᠨ ᠥᠯᠦᠨ ᠵᠡᠯᠮᠡᠭᠦᠨ ᠯᠠ ᠪᠠᠶᠢᠳᠠᠭ ᠪᠠᠶᠢᠭᠰᠠᠨ᠃ ᠰᠣᠩᠭᠢᠨ᠎ᠠ ᠶᠢᠨ ᠪᠤᠯᠤᠨ᠂ ᠴᠡᠩᠭᠡᠯᠲᠡᠢ᠂ ᠵᠠᠶᠢᠰᠠᠩ ᠳᠤ ᠵᠤᠰᠠᠯᠠᠩ ᠳᠤ ᠭᠠᠷᠳᠠᠭ ᠪᠠᠶᠢᠯ᠎ᠠ᠃ ᠠᠪᠤ ᠶᠢ ᠪᠠᠷᠢᠭᠳᠠᠬᠤ ᠶᠢᠨ ᠡᠮᠦᠨ᠎ᠡ ᠬᠡᠦᠰᠢ ᠶᠢᠨ ᠠᠮᠠᠨ ᠳᠤ ᠵᠤᠰᠠᠭᠰᠠᠨ᠃ ᠵᠤᠰᠠᠯᠠᠩ ᠳᠤ ᠨᠢᠭᠡ ᠴᠠᠭᠠᠨ ᠮᠣᠷᠢᠲᠠᠢ᠂ ᠱᠧᠢᠺ ᠭᠡᠳᠡᠭ ᠨᠣᠬᠠᠢ ᠲᠠᠢ᠂ ᠬᠣᠶᠠᠷ ᠣᠫᠧᠯ ᠳᠤᠭᠤᠢ ᠲᠠᠢ ᠪᠠᠶᠢᠳᠠᠭ ᠪᠠᠶᠢᠪᠠ᠃ ᠣᠷᠣᠰ ᠴᠡᠷᠢᠭ ᠦᠨ ᠳᠠᠷᠤᠭ᠎ᠠ ᠠᠴᠠ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠴᠠᠭᠠᠨ ᠮᠣᠷᠢ ᠶᠡᠬᠡ ᠭᠦᠶᠦᠨ᠎ᠡ ᠡ᠂ ᠪᠠᠶᠢᠰᠬᠢᠭᠡᠳ ᠯᠠ ᠠᠯᠠᠭ᠎ᠠ ᠪᠣᠯᠤᠨ᠎ᠠ᠃ ᠨᠢᠭᠡ ᠨᠠᠭᠠᠳᠤᠮ ᠢᠶᠠᠷ ᠠᠯᠳᠠᠭᠳᠠᠭᠠᠳ ᠳᠠᠬᠢᠵᠤ ᠣᠯᠳᠠᠭ᠎ᠠ ᠦᠭᠡᠢ᠃ ᠠᠪᠤ ᠴᠠᠯᠢᠩ ᠢᠶᠡᠨ ᠪᠠᠭᠤᠬᠤ ᠳᠤ ᠪᠢᠳᠡᠨ ᠳᠦ ᠨᠢᠭᠡ ᠨᠢᠭᠡ ᠶᠣᠣᠲᠠᠩ ᠠᠪᠴᠤ ᠥᠭᠭᠦᠨ᠎ᠡ᠃ ᠰᠤᠷᠭᠠᠭᠤᠯᠢ ᠶᠢᠨ ᠬᠤᠪᠴᠠᠰᠤ ᠮᠠᠨᠢ ᠰᠠᠩ ᠤᠨ ᠬᠢ᠃ ᠳᠠᠯᠢᠩᠪᠤᠨ ᠳᠡᠪᠡᠯ᠂ ᠪᠠᠬᠢᠶᠠᠯ ᠭᠤᠲᠤᠯ ᠲᠠᠯᠪᠢᠵᠤ ᠥᠭᠳᠡᠭ ᠪᠠᠶᠢᠵᠠᠢ᠃ ᠨᠢᠭᠡ ᠤᠳᠠᠭ᠎ᠠ ᠭᠣᠶᠣ ᠪᠥᠮᠪᠥᠭᠡᠨ ᠭᠤᠲᠤᠯ ᠬᠣᠷᠰᠢᠶᠠᠨ ᠳᠤ ᠭᠠᠷᠪᠠ᠃ ᠠᠪᠤ ᠶᠢ ᠠᠪᠴᠤ ᠥᠭᠭᠦᠭᠡᠴᠢ ᠡ ᠭᠡᠵᠦ ᠰᠢᠯᠭᠠᠭᠠᠭᠰᠠᠨ ᠳᠤ ᠣᠯᠠᠨ ᠬᠡᠦᠬᠡᠳ ᠡᠮᠦᠰᠴᠦ ᠪᠠᠶᠢᠨ᠎ᠠ ᠤᠤ︖ ᠭᠡᠵᠦ ᠠᠰᠠᠭᠤᠯ᠎ᠠ᠃ ᠴᠥᠭᠡᠬᠡᠨ ᠭᠡᠰᠡᠨ ᠳᠦ ᠲᠡᠭᠡᠪᠡᠯ ᠬᠡᠷᠡᠭ ᠦᠭᠡᠢ ᠪᠢᠵᠡ᠂ ᠵᠢᠷ ᠦᠨ ᠣᠯᠠᠨ ᠤ ᠪᠠᠨ ᠯᠠ ᠵᠢᠱᠢᠭ ᠶᠠᠪᠤ ᠭᠡᠰᠡᠨ᠃ ᠪᠢᠳᠡ ᠬᠥᠯ ᠨᠢᠴᠦᠭᠦᠨ ᠭᠦᠶᠦᠵᠦ᠂ ᠬᠥᠳᠡᠭᠡ ᠶᠢᠨ ᠬᠡᠦᠬᠡᠳ ᠲᠡᠢ ᠯᠠ ᠠᠳᠠᠯᠢ ᠦᠬᠡᠷ ᠦᠨ ᠪᠠᠭᠠᠰᠤᠨ ᠳ᠋ᠤ ᠬᠥᠯ ᠢᠶᠡᠨ ᠳᠦᠷᠦᠵᠦ ᠳᠤᠯᠠᠭᠠᠴᠠᠭᠤᠯᠤᠭᠠᠳ ᠬᠠᠷᠠᠶᠢᠯᠭᠠᠵᠤ ᠶᠠᠪᠤᠯ᠎ᠠ᠃ ᠠᠷᠪᠠᠨ ᠨᠠᠰᠤ ᠬᠦᠷᠲᠡᠯ᠎ᠡ ᠮᠢᠨᠢ ᠮᠢᠨᠦ ᠦᠰᠦ ᠶᠢ ᠠᠪᠳᠠᠭ ᠪᠠᠶᠢᠭᠰᠠᠨ᠃ ᠨᠢᠭᠡ ᠤᠳᠠᠭ᠎ᠠ ᠦᠰᠦᠨ ᠦ ᠮᠠᠨᠢ ᠲᠠᠯ᠎ᠠ ᠶᠢ ᠠᠪᠤᠭᠠᠳ᠂ ᠲᠠᠯ᠎ᠠ ᠶᠢ ᠨᠢ ᠦᠯᠡᠳᠡᠭᠡᠴᠢᠬᠡᠯ᠎ᠡ᠃ ᠪᠦᠲᠦᠨ ᠠᠪᠤᠭᠠᠳ ᠠᠯᠢ ᠭᠡᠵᠦ ᠠᠪᠤ ᠶᠢ ᠭᠤᠶᠤᠭᠠᠳ ᠪᠠᠶᠢᠳᠠᠭ᠂ ᠠᠪᠤ ᠠᠪᠴᠤ ᠥᠭᠳᠡᠭ ᠦᠭᠡᠢ᠂ ᠪᠦᠷ ᠣᠷᠣᠢ ᠪᠣᠯᠤᠭᠰᠠᠨ ᠬᠣᠶᠢᠨ᠎ᠠ ᠬᠣᠶᠠᠷ ᠡᠪᠦᠳᠦᠭ ᠦᠨ ᠬᠢ ᠪᠠᠨ ᠵᠠᠪᠰᠠᠷ ᠨᠠᠮ᠎ᠠ ᠶᠢ ᠬᠠᠪᠴᠢᠭᠤᠯᠵᠤ ᠰᠠᠭᠤᠯᠭᠠᠵᠤ ᠪᠠᠶᠢᠭᠠᠳ ᠠᠪᠴᠤ ᠥᠭᠭᠦᠭᠰᠡᠨ᠃ ᠪᠢᠳᠡᠨ ᠢᠶᠡᠷ ᠲᠡᠭᠡᠵᠦ ᠲᠣᠭᠯᠠᠭᠠᠮ ᠬᠢᠬᠦ ᠶᠠᠭᠤᠮ᠎ᠠ ᠪᠣᠳᠣᠵᠤ ᠣᠯᠬᠤ ᠳᠤ ᠪᠠᠨ ᠭᠠᠷᠭᠠᠭᠤᠳ᠃ ᠪᠢᠳᠡᠨ ᠢ ᠬᠠᠲᠠᠭᠤᠵᠢᠯᠲᠠᠢ᠂ ᠵᠣᠷᠢᠭᠲᠠᠢ ᠪᠣᠯᠭᠠᠬᠤ ᠭᠡᠵᠦ ᠶᠡᠬᠡ ᠬᠢᠴᠢᠶᠡᠳᠡᠭ ᠪᠠᠶᠢᠭᠰᠠᠨ᠃ ᠪᠢᠳᠡᠨ ᠳᠦ ᠣᠳᠣ ᠶᠢᠨ ᠺᠠᠷᠠᠲ᠋ᠧᠭᠢ ᠶᠢᠨ ᠮᠠᠶ᠋ᠢᠭ ᠤᠨ ᠶᠠᠭᠤᠮ᠎ᠠ ᠵᠢᠭᠠᠨ᠎ᠠ᠃ ᠭᠠᠳᠠᠭ᠎ᠠ ᠲᠦᠷᠨᠶᠢᠺ ᠲᠡᠢ᠃ ᠲᠡᠨᠳᠡ ᠦᠷᠭᠦᠯᠵᠢ ᠬᠢᠴᠢᠶᠡᠯᠯᠡᠭᠦᠯᠦᠨ᠎ᠡ᠃ ᠪᠢᠳᠡ ᠦᠯᠢᠭᠡᠷ ᠶᠠᠷᠢᠭᠤᠯᠬᠤ ᠳᠤᠷᠠᠲᠠᠢ᠃ ᠭᠡᠲᠡᠯ᠎ᠡ ᠳᠠᠩᠳᠠ ᠴᠤ ᠴᠢᠳᠬᠦᠷᠲᠡᠢ᠂ ᠠᠶᠤᠮᠠᠷ ᠦᠯᠢᠭᠡᠷ ᠬᠡᠯᠡᠨ᠎ᠡ᠃ ᠨᠢᠭᠡ ᠡᠴᠡ ᠨᠢ ᠬᠡᠯᠡᠬᠦ ᠳᠦ᠂ ᠨᠢᠭᠡ ᠮᠣᠷᠢ ᠲᠠᠢ ᠬᠦᠮᠦᠨ ᠳᠠᠪᠠᠭ᠎ᠠ ᠳᠠᠪᠠᠵᠤ ᠶᠠᠪᠤᠵᠤ ᠭᠡᠨ᠎ᠡ᠃ ᠲᠡᠭᠡᠲᠡᠯ᠎ᠡ ᠨᠢᠭᠡ ᠬᠦᠮᠦᠨ ᠳᠠᠭᠠᠷᠢᠯᠳᠤᠭᠠᠳ᠂ 《 ᠰᠤᠨᠳᠠᠯᠠᠭᠠᠳ ᠶᠠᠪᠤᠭᠠᠴᠢ》 ᠭᠡᠬᠦ ᠳᠦ ᠲᠡᠭᠦᠨ ᠢ ᠠᠷᠤ ᠪᠠᠷ ᠢᠶᠠᠨ ᠰᠤᠨᠳᠠᠯᠠᠭᠠᠳ ᠶᠠᠪᠤᠵᠤ ᠳ᠋ᠡ᠃ ᠨᠥᠭᠥᠭᠡ ᠬᠦᠮᠦᠨ ᠴᠠᠭᠠᠰᠢ ᠪᠠᠨ ᠶᠠᠪᠤᠵᠤ ᠪᠠᠶᠢᠭᠰᠠᠨ ᠢᠶᠠᠨ ᠥᠪᠥᠷ ᠡᠴᠡ ᠪᠠᠨ ᠠᠭᠠᠷᠤᠤᠯ ᠭᠠᠷᠭᠠᠭᠠᠳ ᠢᠳᠡᠲᠡᠯ᠎ᠡ 《 ᠠᠭᠠᠷᠤᠤᠯ ᠠᠴᠠ ᠪᠠᠨ》 ᠭᠡᠳ ᠯᠠ ᠮᠥᠷᠦᠨ ᠳᠡᠭᠡᠭᠦᠷ ᠨᠢ ᠶᠠᠰᠤᠨ ᠭᠠᠷ ᠣᠷᠣᠵᠤ ᠢᠷᠡᠭᠰᠡᠨ ᠳᠦ᠂ ᠡᠷᠭᠢᠭᠡᠳ ᠬᠠᠷᠠᠪᠠᠯ ᠠᠷᠤ ᠳᠤ ᠨᠢ ᠠᠷᠤᠭ ᠶᠠᠰᠤ ᠰᠤᠨᠳᠠᠯᠠᠳᠠᠴᠢᠬᠠᠭᠰᠠᠨ ᠪᠠᠶᠢᠵᠠᠢ ᠭᠡᠳ ᠯᠠ ᠶᠠᠷᠢᠨ᠎ᠠ᠃ ᠪᠢᠳᠡᠨ ᠦ ᠤᠬᠠᠭᠠᠨ ᠦᠭᠡᠢ ᠠᠶᠤᠬᠤ ᠶᠢ ᠬᠡᠯᠡᠬᠦ ᠦᠦ᠃ ᠠᠪᠤ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠳᠦ ᠠᠵᠢᠯᠯᠠᠵᠤ ᠪᠠᠶᠢᠭᠠᠳ ᠪᠠᠷᠢᠭᠳᠠᠭᠰᠠᠨ ᠶᠤᠮ᠃ ᠠᠪᠤ ᠶᠢ ᠱᠣᠷᠣᠩ ᠳᠤ ᠪᠠᠶᠢᠬᠤ ᠳᠤ ᠬᠡᠴᠡᠭᠦᠦ ᠪᠠᠶᠢᠭᠰᠠᠨ᠃ ᠨᠢᠮ᠎ᠠ ᠶᠢ ᠰᠤᠷᠭᠠᠭᠤᠯᠢ ᠠᠴᠠ ᠬᠥᠭᠡᠭᠡᠴᠢᠬᠡᠭᠰᠡᠨ᠃ ᠪᠠᠷᠰ ᠨᠢᠯᠬ᠎ᠠ᠃ ᠨᠢᠭᠡ ᠤᠳᠠᠭ᠎ᠠ ᠬᠡᠪᠯᠡᠬᠦ ᠦᠢᠯᠡᠳᠪᠦᠷᠢ ᠶᠢᠨ ᠬᠠᠰᠢᠶᠠᠨ ᠳᠤ ᠣᠴᠢᠭᠠᠳ ᠲᠦᠯᠡᠭᠡ ᠭᠤᠶᠤᠳᠠᠭ ᠶᠤᠮ ᠪᠠᠶᠢᠨ᠎ᠠ᠃ ᠭᠡᠲᠡᠯ᠎ᠡ ᠮᠠᠨᠠᠭᠠᠴᠢ ᠨᠢ 《ᠷᠢᠨᠴᠢᠨ ᠦ ᠪᠡᠯᠲᠡᠷᠭᠡ ᠨᠦᠭᠦᠳ ᠶᠠᠪᠤᠵᠤ ᠪᠠᠶᠢᠨ᠎ᠠ᠃ ᠨᠢᠳᠦ ᠶᠢ ᠨᠢ ᠬᠠᠷᠠᠭᠠᠴᠢ︕》 ᠭᠡᠳ ᠯᠠ ᠵᠠᠩᠨᠠᠵᠤ ᠭᠠᠷᠤᠯ᠎ᠠ᠃ ᠲᠡᠭᠡᠭᠡᠳ ᠬᠣᠶᠠᠷ ᠬᠡᠷᠴᠢᠮ ᠲᠦᠯᠡᠭᠡ ᠠᠪᠤᠭᠰᠠᠨ᠃ ᠮᠠᠷᠭᠠᠰᠢ ᠨᠢ ᠳᠠᠬᠢᠭᠠᠳ ᠯᠠ ᠣᠴᠢᠳᠠᠭ ᠶᠤᠮ ᠪᠠᠶᠢᠨ᠎ᠠ᠃ ᠲᠡᠭᠡᠲᠡᠯ᠎ᠡ ᠮᠠᠨᠠᠭᠠᠴᠢ 《 ᠨᠥᠭᠥᠭᠡ ᠪᠤᠷᠵᠢᠭᠢᠷ ᠪᠡᠯᠲᠡᠷᠭᠡ ᠶᠠᠪᠤᠵᠤ ᠪᠠᠶᠢᠨ᠎ᠠ᠂ ᠫᠤᠤᠳᠠᠬᠤ ᠶᠤᠮᠰᠠᠨ ᠭᠡᠵᠦ ᠠᠭᠠᠰᠢᠯᠠᠬᠤ ᠳᠤ ᠨᠢ 《 ᠲᠠ ᠫᠤᠤᠳᠠ ᠫᠤᠤᠳᠠ︕》 ᠭᠡᠳ ᠪᠠᠰᠠ ᠬᠣᠶᠠᠷ ᠬᠡᠷᠴᠢᠮ ᠲᠦᠯᠡᠭᠡ ᠠᠪᠤᠭᠠᠳ ᠵᠢᠭᠤᠲᠠᠭᠰᠠᠨ᠃ ᠡᠪᠦᠯ ᠪᠠᠷᠰ᠂ ᠱᠠᠨᠵᠠ ᠬᠣᠶᠠᠷ ᠳᠤᠮᠳᠠ ᠪᠠᠨ ᠨᠢᠭᠡ ᠭᠤᠲᠤᠯ ᠲᠠᠢ᠂ ᠣᠷᠣᠨ ᠳᠡᠭᠡᠷ᠎ᠡ ᠪᠡᠨ ᠯᠠ ᠰᠠᠭᠤᠵᠤ ᠪᠠᠶᠢᠨ᠎ᠠ᠃ ᠪᠢ ᠭᠠᠳᠠᠭ᠎ᠠ ᠭᠦᠶᠦᠵᠦ᠂ ᠨᠡᠭᠦᠷᠡᠰᠦ ᠬᠤᠯᠠᠭᠠᠶᠢᠯᠠᠨ᠎ᠠ᠃ ᠭᠠᠯᠲᠤ ᠲᠡᠷᠭᠡᠨ ᠳᠡᠭᠡᠷ᠎ᠡ ᠭᠠᠷᠴᠤ ᠨᠡᠭᠦᠷᠡᠰᠦ ᠤᠨᠠᠭᠠᠨ᠎ᠠ᠃ ᠪᠠᠰᠠ ᠵᠣᠮᠣᠭᠣᠯ ᠲᠡᠭᠦᠨ᠎ᠡ᠃ ᠵᠣᠮᠣᠭᠣᠯ ᠳᠡᠭᠡᠷ᠎ᠡ ᠴᠤ ᠴᠢᠪᠠᠭᠠᠨᠴᠠ ᠨᠠᠷ ᠲᠠᠢ ᠦᠵᠡᠵᠦ ᠭᠠᠷᠤᠨ᠎ᠠ ᠳ᠋ᠠ᠃ 《 ᠨᠥᠭᠥᠭᠡ ᠪᠤᠷᠵᠢᠭᠢᠷ ᠲᠣᠯᠣᠭᠠᠢᠳᠤ ᠢᠷᠡᠵᠦ᠂ ᠨᠠᠭᠠᠳᠠᠬᠢ ᠶᠢ ᠪᠠᠨ ᠬᠥᠭᠡᠭᠡ᠂ ᠪᠤᠤ ᠣᠶᠢᠷᠠᠲᠤᠭᠤᠯ》 ᠭᠡᠵᠦ ᠢᠷᠡᠭᠡᠳ ᠴᠢᠪᠠᠭᠠᠨᠴᠠ ᠨᠠᠷ ᠨᠠᠮ᠎ᠠ ᠶᠢ ᠬᠠᠵᠢᠭᠯᠠᠨ᠎ᠠ᠃ ᠬᠣᠨᠣᠴᠠ ᠬᠣᠨᠣᠴᠠ ᠳᠤ ᠪᠠᠨ ᠳᠤᠷ᠎ᠠ ᠦᠭᠡᠢ ᠭᠡᠵᠦ ᠲᠡᠷᠡ᠃ ᠠᠪᠤ ᠦᠬᠦᠭᠰᠡᠨ ᠠᠮᠢᠳᠤ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ᠃ ᠨᠢᠭᠡ ᠡᠳᠦᠷ ᠮᠠᠨ ᠤ ᠳᠤ ᠳᠡᠪᠡᠯ ᠢᠶᠡᠨ ᠬᠥᠭᠡᠷᠭᠡᠭᠰᠡᠨ ᠬᠦᠮᠦᠨ ᠣᠷᠣᠵᠤ ᠢᠷᠡᠭᠡᠳ 《 ᠪᠢ ᠫᠸᠷᠯᠠᠢ᠌ ᠮᠦᠨ᠃ ᠡᠵᠢ ᠳᠦ ᠪᠡᠨ ᠨᠠᠮ᠎ᠠ ᠶᠢ ᠢᠷᠡᠭᠡᠳ ᠶᠠᠪᠤᠯ᠎ᠠ ᠭᠡᠭᠡᠷᠡᠢ》 ᠭᠡᠰᠡᠨ᠃ ᠬᠥᠳᠡᠭᠡ ᠶᠢᠨ ᠫᠸᠷᠯᠡᠢ ᠭᠤᠸᠠᠢ ᠠᠪᠤ ᠶᠢ ᠠᠮᠢᠳᠤ ᠮᠡᠨᠳᠦ ᠪᠠᠶᠢᠨ᠎ᠠ ᠭᠡᠵᠦ ᠮᠡᠳᠡᠭᠳᠡᠵᠦ ᠪᠠᠶᠢᠭ᠎ᠠ ᠨᠢ ᠲᠡᠷᠡ ᠪᠠᠶᠢᠭᠰᠠᠨ ᠶᠤᠮᠰᠠᠨᠵᠢ᠃ ᠠᠪᠤ ᠶᠢ ᠨᠢᠭᠡ ᠰᠥᠨᠢ ᠰᠤᠯᠠᠯᠠᠭᠳᠠᠭᠠᠳ ᠣᠷᠣᠵᠤ ᠢᠷᠡᠬᠦ ᠳᠦ ᠪᠢᠳᠡᠨ ᠦ ᠨᠠᠷᠠ ᠭᠠᠷᠤᠭᠰᠠᠨ ᠳ᠋ᠠ᠃ ᠠᠪᠤ ᠮᠠᠨᠢ ᠮᠣᠭᠠᠢ ᠵᠢᠯ ᠲᠡᠢ ᠶᠤᠮᠰᠠᠨ᠃ ᠨᠦᠬᠡᠲᠦ ᠶᠢᠨ ᠠᠮᠠᠨ ᠳᠤ ᠵᠤᠰᠠᠵᠤ ᠪᠠᠶᠢᠬᠤ ᠳᠤ ᠣᠷᠣᠨ ᠳᠣᠣᠷ᠎ᠠ ᠮᠣᠭᠠᠢ ᠦᠷᠭᠦᠯᠵᠢ ᠪᠠᠶᠢᠨ᠎ᠠ᠃ ᠠᠪᠤ ᠳ᠋ᠢᠶᠸᠽᠢᠨ ᠳᠦ ᠰᠦ ᠬᠢᠵᠦ ᠮᠣᠭᠠᠢ ᠳᠤ ᠳᠠᠩᠳᠠ ᠲᠠᠯᠪᠢᠵᠤ ᠥᠭᠭᠦᠨ᠎ᠡ᠃ ᠨᠦᠬᠡᠲᠦ ᠳᠦ ᠪᠠᠶᠢᠬᠤ ᠳᠤ ᠠᠦᠢᠰᠲᠷᠢ ᠶᠢᠨ ᠪᠧᠱᠣᠹᠹ ᠭᠦᠩ ᠠᠪᠤ ᠲᠠᠢ ᠠᠭᠤᠯᠵᠠᠨ᠎ᠠ ᠭᠡᠵᠦ ᠮᠠᠨ ᠤ ᠳᠤ ᠢᠷᠡᠳᠡᠭ ᠶᠤᠮ ᠪᠠᠶᠢᠨ᠎ᠠ᠃ ᠭᠦᠩ ᠠᠪᠤ ᠶᠢ ᠬᠣᠶᠢᠮᠣᠷ ᠲᠤ ᠪᠠᠨ ᠬᠥᠯ ᠨᠢᠴᠦᠭᠦᠨ ᠰᠠᠭᠤᠵᠤ ᠪᠠᠶᠢᠭ᠎ᠠ ᠶᠢ ᠱᠠᠭᠠᠶᠢᠵᠤ ᠬᠠᠷᠠᠴᠢᠬᠠᠭᠠᠳ᠂ ᠭᠠᠳᠠᠭ᠎ᠠ ᠭᠤᠲᠤᠯ ᠢᠶᠠᠨ ᠲᠠᠶᠢᠯᠤᠭᠠᠳ ᠣᠷᠣᠵᠤ ᠢᠷᠡᠯ᠎ᠡ᠃ ᠨᠢᠮ᠎ᠠ ᠪᠢᠳᠡ ᠬᠣᠶᠠᠷ ᠭᠦᠩᠲᠡᠨ ᠢ ᠱᠣᠣᠯᠠᠭᠠᠳ ᠦᠬᠦᠲᠡᠯ᠎ᠡ ᠪᠡᠨ ᠬᠥᠬᠥᠷᠥᠯ᠎ᠡ᠃ ᠪᠧᠱᠣᠹᠹ ᠠᠪᠤ ᠲᠠᠢ ᠠᠯᠮᠠᠰ ᠶᠠᠷᠢᠵᠤ ᠪᠠᠶᠢᠭᠰᠠᠨ ᠢᠶᠠᠨ 《ᠶᠠᠮᠠᠷᠬᠠᠤ ᠦᠰᠦᠲᠡᠢ ᠠᠮᠢᠲᠠᠨ ᠶᠤᠮ ᠳ᠋ᠡ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ ᠠᠪᠤ ᠥᠪᠡᠷ ᠦᠨ ᠬᠢ ᠨᠢ ᠪᠠᠭᠤᠤ ᠶᠢ ᠵᠢᠭᠠᠭᠠᠳ 《ᠡᠶᠢᠮᠦᠷᠬᠡᠦ ᠯᠠ ᠦᠰᠦᠲᠡᠢ ᠶᠤᠮ ᠳ᠋ᠠ》 ᠭᠡᠳᠡᠭ ᠪᠠᠶᠢᠭ᠎ᠠ᠃ ᠪᠢᠳᠡ ᠬᠣᠶᠠᠷ ᠲᠦᠰ ᠬᠢᠲᠡᠯ᠎ᠡ ᠢᠨᠢᠶᠡᠳᠦ ᠠᠯᠳᠠᠵᠤ᠂ ᠡᠵᠢ ᠳᠦ 《ᠠᠭᠠᠯᠢᠭᠦᠶᠢᠲᠦᠯ᠎ᠡ》 ᠭᠡᠵᠦ ᠵᠠᠩᠨᠠᠭᠤᠯᠤᠭᠰᠠᠨ᠃ ᠶᠠᠭᠠᠬᠢᠭᠠᠳ ᠠᠪᠤ ᠶᠢᠨ ᠢᠶᠠᠨ ᠮᠡᠷᠭᠡᠵᠢᠯ ᠢ ᠠᠪᠤᠭ᠎ᠠ ᠦᠭᠡᠢ ᠶᠤᠮ ᠪᠤᠢ︖ ᠭᠡᠵᠦ ᠪᠢᠳᠡᠨ ᠡᠴᠡ ᠬᠦᠮᠦᠨ ᠶᠡᠬᠡ ᠠᠰᠠᠭᠤᠳᠠᠭ᠃ ᠦᠨᠡᠨ ᠳᠦ ᠪᠡᠨ ᠭᠡᠬᠦ ᠳᠦ ᠮᠣᠩᠭᠣᠯ ᠬᠡᠯᠡ ᠭᠡᠳᠡᠭ ᠴᠢᠨᠢ ᠤᠯᠤᠰ ᠲᠦᠷᠦ ᠶᠤᠮ ᠪᠠᠶᠢᠨ᠎ᠠ ᠭᠡᠵᠦ ᠣᠶᠢᠯᠠᠭᠠᠭᠰᠠᠨ᠃ ᠠᠪᠤ ᠰᠢᠭ ᠬᠦᠮᠦᠨ ᠡᠨᠡ ᠮᠡᠷᠭᠡᠵᠢᠯ ᠡᠴᠡ ᠪᠣᠯᠵᠤ ᠢᠩᠭᠢᠵᠦ ᠵᠣᠪᠠᠵᠤ ᠪᠠᠶᠢᠬᠤ ᠳᠤ ᠪᠢᠳᠡ ᠪᠣᠯ ᠳᠠᠪᠠᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠭᠰᠠᠨ᠃ ᠲᠡᠭᠡᠭᠡᠳ ᠷᠢᠨᠴᠢᠨ ᠦ ᠤᠳᠤᠮ ᠢ ᠠᠪᠴᠤ ᠦᠯᠡᠳᠡᠶ᠎ᠡ ᠭᠡᠪᠡᠯ ᠡᠨᠡ ᠮᠣᠩᠭᠣᠯ ᠬᠡᠯᠡ ᠭᠡᠳᠡᠭ ᠡᠴᠡ ᠬᠣᠯᠠᠬᠠᠨ ᠪᠠᠶᠢᠶ᠎ᠠ ᠭᠡᠵᠦ ᠰᠢᠢᠳᠦᠭᠰᠡᠨ ᠶᠤᠮ ᠳ᠋ᠠ᠃ ᠠᠪᠤ ᠴᠤ ᠪᠢᠳᠡᠨ ᠢ ᠵᠠᠪᠠᠯ ᠮᠣᠩᠭᠣᠯ ᠬᠡᠯᠡᠨ ᠦ ᠮᠡᠷᠭᠡᠵᠢᠯᠲᠡᠨ ᠪᠣᠯᠭᠠᠬᠤ ᠭᠡᠵᠦ ᠵᠢᠳᠬᠦᠭᠡ ᠦᠭᠡᠢ᠃ 53 ᠣᠨ ᠳᠤ ᠬᠥᠳᠡᠭᠡ ᠠᠵᠤ ᠠᠬᠤᠢ ᠶᠢᠨ ᠶᠠᠮᠤᠨ ᠳᠤ ᠠᠵᠢᠯᠯᠠᠵᠤ ᠪᠠᠶᠢᠬᠤ ᠳᠤ ᠪᠠᠨ ᠪᠢ ᠨᠠᠮ ᠳᠤ ᠡᠯᠰᠡᠭᠰᠡᠨ ᠶᠤᠮ᠃ ᠭᠡᠲᠡᠯ᠎ᠡ ᠬᠤᠷᠠᠯᠳᠤᠭᠰᠠᠳ ᠹᠧᠣᠳᠠᠯ ᠤᠨ ᠬᠠᠭᠤᠴᠢᠨ ᠪᠢᠴᠢᠭ ᠢᠶᠡᠷ ᠨᠣᠮ ᠤᠩᠰᠢᠳᠠᠭ ᠤᠤ ᠭᠡᠵᠦ ᠨᠠᠳᠠ ᠠᠴᠠ ᠠᠰᠠᠭᠤᠵᠤ ᠪᠠᠶᠢᠭᠰᠠᠨ᠃ ᠤᠩᠰᠢᠳᠠᠭ ᠭᠡᠪᠡᠯ ᠨᠠᠮ ᠳᠤ ᠠᠪᠬᠤ ᠦᠭᠡᠢ ᠪᠠᠶᠢᠭᠰᠠᠨ ᠲᠤᠯᠠ ᠪᠢ ᠮᠡᠳᠡᠬᠦ ᠦᠭᠡᠢ ᠯᠠ ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ᠃ ᠠᠪᠤ ᠪᠡᠶ᠎ᠡ ᠪᠡᠨ ᠣᠲᠣᠷᠯᠠᠬᠤ ᠶᠢ ᠶᠡᠷᠦ ᠪᠣᠳᠣᠳᠠᠭ ᠦᠭᠡᠢ᠃ ᠨᠢᠭᠡ ᠨᠢᠮᠭᠡᠨ ᠨᠣᠣᠰᠣᠨ ᠬᠥᠨᠵᠢᠯᠡ ᠲᠡᠢ᠂ ᠳᠠᠩᠳᠠ ᠲᠡᠭᠦᠪᠡᠷ ᠢᠶᠡᠨ ᠬᠤᠴᠢᠵᠤ ᠤᠨᠲᠠᠨ᠎ᠠ᠃ ᠪᠡᠶ᠎ᠡ ᠨᠢ ᠮᠠᠭᠤᠳᠠᠭᠰᠠᠨ ᠬᠣᠶᠢᠨ᠎ᠠ ᠪᠠᠨ ᠴᠤ ᠲᠡᠭᠦᠪᠡᠷ ᠢᠶᠡᠨ ᠯᠠ ᠬᠤᠴᠢᠳᠠᠭ ᠪᠠᠶᠢᠯ᠎ᠠ᠃ ᠠᠪᠤ ᠡ᠂ ᠲᠠ ᠳᠠᠭᠠᠷᠠᠴᠢᠬᠠᠨ᠎ᠠ᠂ ᠥᠭᠡᠷ᠎ᠡ ᠳᠤᠯᠠᠭᠠᠨ ᠶᠠᠭᠤᠮ᠎ᠠ ᠪᠠᠷ ᠬᠤᠴᠢᠨ᠎ᠠ ᠤᠤ ᠭᠡᠬᠦ ᠳᠦ ᠳᠤᠯᠠᠭᠠᠨ ᠶᠠᠭᠤᠮᠠᠨ ᠳᠤ ᠳᠠᠰᠠᠴᠢᠬᠠᠨ᠎ᠠ᠂ ᠬᠡᠦᠬᠡ ᠭᠡᠵᠦ ᠪᠢᠯᠡ᠃ ᠬᠡᠳᠦᠬᠡᠨ ᠬᠣᠨᠣᠭ ᠤᠨ ᠨᠠᠰᠤ ᠲᠠᠢ ᠪᠠᠶᠢᠵᠤ ᠭᠡᠵᠦ ᠪᠣᠳᠣᠬᠤ ᠠᠴᠠ ᠬᠥᠭᠡᠷᠦᠬᠦᠢ ᠮᠠᠭᠤ ᠠᠪᠤ ᠪᠠᠨ ᠬᠡᠴᠢᠨᠡᠨ ᠥᠷᠥ ᠡᠪᠡᠳᠦᠭᠰᠡᠨ ᠭᠡ᠃ ᠠᠪᠤ ᠮᠢᠨᠢ ᠨᠠᠰᠤ ᠪᠠᠷᠠᠬᠤ ᠠᠴᠠ ᠪᠠᠨ ᠬᠡᠳᠦᠬᠡᠨ ᠬᠣᠨᠣᠭ ᠤᠨ ᠡᠮᠦᠨ᠎ᠡ 《ᠠᠪᠤ ᠨᠢ ᠮᠣᠩᠭᠣᠯ ᠢᠶᠠᠨ ᠭᠡᠭᠰᠡᠭᠡᠷ ᠶᠠᠪᠤᠭᠠᠳ ᠡᠶᠢᠮᠦ ᠪᠣᠯᠤᠯ᠎ᠠ ᠳ᠋ᠠ》 ᠭᠡᠵᠦ ᠨᠢᠭᠡ ᠬᠡᠯᠡᠭᠰᠡᠨ᠃ ᠢᠩᠭᠢᠵᠦ ᠬᠡᠯᠡᠬᠦ ᠨᠢ ᠴᠤ ᠠᠷᠭ᠎ᠠ ᠦᠭᠡᠢ ᠪᠠᠶᠢᠭᠰᠠᠨ ᠳ᠋ᠠ᠃ ᠶᠠᠷᠢᠶ᠎ᠠ ᠶᠢ ᠲᠡᠮᠳᠡᠭᠯᠡᠭᠰᠡᠨ ᠭ ᠊ ᠠᠺᠢᠮ