ᠲᠤᠭᠤᠵᠢ
ᠨᠣᠬᠠᠢ ᠶᠢᠨ ᠨᠢᠯᠪᠤᠰᠤ
ᠬᠠᠶᠢᠷᠬᠠᠨ ᠠᠭᠤᠯᠠ ᠳᠤ ᠰᠠᠭᠤᠭᠰᠠᠨ ᠮᠠᠨᠠᠨ ᠬᠥᠭᠡᠷᠴᠦ᠂ ᠬᠠᠳᠠ ᠠᠰᠬᠠ ᠲᠠᠢ ᠡᠩᠭᠡᠷ ᠢᠶᠡᠷ ᠵᠡᠭᠡᠭᠯᠡᠨ ᠤᠷᠭᠤᠭᠰᠠᠨ ᠨᠢᠯᠬᠠ ᠬᠤᠰᠤ ᠮᠣᠳᠣᠳ ᠮᠥᠩᠭᠦᠷᠡᠨᠡ᠃ ᠬᠤᠰᠤᠨ ᠤ ᠨᠠᠪᠴᠢᠰ ᠭᠠᠯ ᠤᠯᠠᠭᠠᠨ᠂ ᠭᠦᠨ ᠴᠡᠩᠬᠡᠷ᠂ ᠨᠣᠮᠢᠨ ᠨᠣᠭᠣᠭᠠᠨ ᠥᠩᠭᠡ ᠪᠡᠷ ᠠᠯᠠᠭᠯᠠᠨ ᠰᠣᠯᠣᠩᠭᠠᠨ ᠥᠩᠭᠡ ᠠᠶᠠ ᠲᠠᠢ ᠭᠡᠷᠡᠯᠲᠦᠬᠦ ᠨᠢ ᠣᠩᠭᠣᠳ ᠲᠠᠢ ᠤᠷᠠᠨ ᠵᠢᠷᠤᠭᠠᠴᠢ ᠶᠢᠨ ᠬᠠᠯᠠᠮᠴᠠᠭᠤ ᠲᠠᠲᠠᠭᠰᠠᠨ ᠪᠢᠷ ᠦᠨ ᠲᠠᠲᠠᠯᠠᠪᠤᠷᠢ ᠠᠶᠠᠲᠠᠢ ᠠᠭᠤᠰᠤᠨ ᠠᠯᠳᠠᠷᠠᠨᠠ᠃ ᠁
1386
2021-10-28 16:18
发表于:内蒙古
ᠭ•ᠳᠠᠸᠠᠰᠦ᠋ᠷᠦᠩ ︵ᠮᠣᠩᠭᠣᠯ ᠤᠨ ᠵᠣᠬᠢᠶᠠᠯᠴᠢᠳ ᠤᠨ ᠡᠪᠯᠡᠯ ᠦᠨ ᠱᠠᠩᠨᠠᠯᠲᠤ ︶
… ᠬᠠᠶᠢᠷᠬᠠᠨ ᠠᠭᠤᠯᠠ ᠳᠤ ᠰᠠᠭᠤᠭᠰᠠᠨ ᠮᠠᠨᠠᠨ ᠬᠥᠭᠡᠷᠴᠦ᠂ ᠬᠠᠳᠠ ᠠᠰᠬᠠ ᠲᠠᠢ ᠡᠩᠭᠡᠷ ᠢᠶᠡᠷ ᠵᠡᠭᠡᠭᠯᠡᠨ ᠤᠷᠭᠤᠭᠰᠠᠨ ᠨᠢᠯᠬᠠ ᠬᠤᠰᠤ ᠮᠣᠳᠣᠳ ᠮᠥᠩᠭᠦᠷᠡᠨᠡ᠃ ᠬᠤᠰᠤᠨ ᠤ ᠨᠠᠪᠴᠢᠰ ᠭᠠᠯ ᠤᠯᠠᠭᠠᠨ᠂ ᠭᠦᠨ ᠴᠡᠩᠬᠡᠷ᠂ ᠨᠣᠮᠢᠨ ᠨᠣᠭᠣᠭᠠᠨ ᠥᠩᠭᠡ ᠪᠡᠷ ᠠᠯᠠᠭᠯᠠᠨ ᠰᠣᠯᠣᠩᠭᠠᠨ ᠥᠩᠭᠡ ᠠᠶᠠ ᠲᠠᠢ ᠭᠡᠷᠡᠯᠲᠦᠬᠦ ᠨᠢ ᠣᠩᠭᠣᠳ ᠲᠠᠢ ᠤᠷᠠᠨ ᠵᠢᠷᠤᠭᠠᠴᠢ ᠶᠢᠨ ᠬᠠᠯᠠᠮᠴᠠᠭᠤ ᠲᠠᠲᠠᠭᠰᠠᠨ ᠪᠢᠷ ᠦᠨ ᠲᠠᠲᠠᠯᠠᠪᠤᠷᠢ ᠠᠶᠠᠲᠠᠢ ᠠᠭᠤᠰᠤᠨ ᠠᠯᠳᠠᠷᠠᠨᠠ᠃ ᠲᠤᠩᠭᠠᠯᠠᠭᠰᠢᠨ ᠭᠡᠭᠡᠷᠡᠭᠡᠳ ᠣᠳᠬᠤ ᠠᠵᠡᠢ᠃ ᠬᠠᠶᠢᠷᠬᠠᠨ ᠤ ᠪᠡᠯ ᠳᠦ ᠴᠣᠬᠣᠷ ᠮᠣᠷᠢ ᠪᠠᠨ ᠲᠤᠱᠠᠴᠢᠬᠠᠭᠠᠳ ᠵᠢᠮ ᠢᠶᠡᠷ ᠥᠭᠰᠥᠵᠦ ᠶᠠᠪᠤᠭᠠ ᠡᠪᠦᠭᠡᠨ ᠪᠣᠯ ᠪᠠᠶᠢᠭᠠᠯᠢ ᠬᠠᠮᠠᠭᠠᠯᠠᠭᠴᠢ ᠰᠦᠬᠡ ᠪᠢᠯᠡ᠃ ᠡᠪᠦᠭᠡᠨ ᠠᠩ ᠤᠨ ᠵᠣᠷᠢᠭᠤᠯᠤᠯᠲᠠ ᠲᠠᠢ ᠳᠤᠷᠠᠨ ᠲᠠᠢ ᠴᠧᠺ ᠫᠤᠤ ᠡᠭᠦᠷᠴᠦ᠂ ᠭᠡᠷ ᠲᠡᠢ ᠬᠣᠶᠠᠷ ᠨᠢᠳᠦᠨ ᠦ ᠳᠤᠷᠠᠨ ᠪᠦᠰᠡᠯᠡᠭᠰᠡᠨ ᠠᠭᠠᠳ ᠶᠠᠭᠠᠷᠠᠩᠭᠤᠢ ᠠᠯᠬᠤᠵᠤ ᠪᠠᠶᠢᠭᠠ ᠨᠢ ᠨᠢᠭᠡᠨ ᠵᠦᠢᠯ ᠳᠦ ᠵᠣᠷᠢᠨ ᠰᠢᠮᠳᠠᠭᠰᠠᠨ ᠨᠢ ᠢᠯᠡᠳᠲᠡ ᠡ᠃
ᠨᠠᠰᠤ ᠥᠨᠳᠥᠷ ᠪᠣᠯᠪᠠᠴᠤ ᠱᠠᠯᠠᠮᠠᠭ ᠬᠥᠩᠭᠡᠨ ᠪᠠᠶᠢᠭᠠ ᠨᠢ ᠡᠳᠦᠷ ᠪᠦᠷᠢ ᠯᠠ ᠪᠠᠶᠢᠭᠠᠯᠢ ᠲᠠᠢ ᠪᠠᠨ ᠬᠠᠷᠢᠴᠠᠨ ᠠᠭᠤᠯᠠ ᠬᠠᠳᠠ ᠪᠠᠷ ᠪᠡᠳᠡᠷᠢᠵᠤ ᠶᠠᠪᠤᠳᠠᠭ ᠤᠨ ᠠᠴᠢ ᠲᠤᠰᠠ᠃ ᠡᠪᠦᠭᠡᠨ ᠠᠮᠢᠰᠬᠤᠭᠠᠳᠠᠭᠰᠠᠨ ᠴᠤ ᠦᠭᠡᠢ ᠵᠣᠷᠢᠭᠰᠠᠨ ᠭᠠᠵᠠᠷ ᠢᠶᠠᠨ ᠬᠦᠷᠦᠭᠡᠳ᠂ ᠬᠦᠷᠢᠶᠡᠯᠡᠭᠰᠡᠨ ᠬᠠᠳᠠ ᠠᠰᠬᠠᠨ ᠳᠤᠮᠳᠠ ᠰᠠᠭᠤᠵᠤ ᠠᠪᠤᠭᠠᠳ ᠠᠩ ᠦᠨ ᠫᠤᠤ ᠪᠠᠠ ᠤᠷᠢᠳᠤ ᠪᠠᠨ ᠲᠠᠯᠪᠢᠨ ᠬᠦᠬᠡᠭᠡᠭ ᠲᠦ ᠨᠢ ᠲᠠᠪᠤᠨ ᠰᠤᠮᠤ ᠳᠠᠷᠤᠭᠠᠳ ᠴᠡᠨᠡᠭᠯᠡᠪᠡ᠃ ᠬᠣᠶᠠᠷ ᠨᠢᠳᠦᠨ ᠦ ᠳᠤᠷᠠᠨ ᠢᠶᠡᠨ ᠨᠢᠳᠦᠨ ᠦ ᠪᠡᠨ ᠡᠮᠦᠨᠡ ᠪᠠᠷᠢᠨ ᠡᠷᠡᠪᠡᠭᠡᠷ ᠰᠡᠷᠡᠪᠡᠭᠡᠷ ᠲᠣᠷᠯᠣᠭ ᠪᠤᠲᠠ ᠲᠠᠢ ᠬᠠᠳᠠ ᠠᠰᠬᠠᠨ ᠳᠤᠮᠳᠠᠭᠤᠷ ᠨᠢᠭᠡᠨ ᠵᠢᠮ ᠬᠠᠷᠠᠭᠠᠳᠠᠨ ᠰᠠᠭᠤᠯᠠ᠃ ᠮᠠᠭᠤ ᠰᠣᠭᠣᠲᠣᠩ ᠤᠯᠢᠶᠠᠨ ᠨᠤᠭᠤᠳ ᠡᠭᠦᠪᠡᠷ ᠯᠠ ᠭᠦᠶᠦᠵᠦ ᠬᠠᠷᠠᠭᠳᠠᠳᠠᠭ ᠶᠤᠮ … ᠭᠡᠵᠦ ᠰᠢᠳᠦ ᠵᠠᠭᠤᠨ ᠰᠢᠪᠡᠨᠡᠪᠡ … ᠪᠠᠶᠢᠭᠠᠯᠢ ᠬᠠᠮᠠᠭᠠᠯᠠᠭᠴᠢ ᠬᠦᠮᠦᠨ ᠠᠮᠢᠲᠠᠨ ᠤ ᠬᠠᠮᠠᠷ ᠠᠴᠠ ᠴᠢᠰᠤ ᠭᠠᠷᠭᠠᠵᠤ ᠲᠠᠭᠠᠷᠠᠬᠤ ᠦᠭᠡᠢ ᠡ᠃ ᠳᠠᠷᠬᠠᠨ ᠴᠠᠭᠠᠵᠠᠲᠤ ᠬᠣᠪᠣᠷ ᠠᠮᠢᠲᠠᠨ ᠪᠠᠶᠢᠨᠠ ᠤᠤ᠃ ᠴᠢᠨᠣᠠ ᠨᠣᠬᠠᠢ ᠪᠠᠶᠢᠨᠠ ᠤᠤ᠃ ᠪᠣᠯᠬᠤ ᠦᠭᠡᠢ ᠳ᠋ᠡ᠃
ᠡᠪᠦᠭᠡᠨ ᠡᠭᠦᠨ ᠢ ᠲᠣᠭ ᠮᠡᠳᠡᠬᠦ ᠭᠠᠵᠠᠷ ᠳ᠋ᠠ᠃ ᠭᠡᠬᠦ ᠳᠦ ᠪᠡᠨ ᠯᠠ ᠰᠢᠳᠦ ᠪᠡᠨ ᠬᠦᠷᠲᠡᠯᠡ ᠵᠡᠪᠰᠡᠭᠯᠡᠨ ᠢᠷᠡᠭᠡᠳ ᠡᠭᠡᠭᠡ ᠯᠠ ᠳᠠᠶᠢᠨ ᠪᠠᠶᠢᠯᠳᠤᠭᠠᠨ ᠳᠤ ᠤᠷᠤᠬᠤ ᠨᠢ ᠬᠣᠯᠠ ᠦᠭᠡᠢ ᠪᠠᠶᠢᠭᠠ ᠨᠢ ᠤᠤ ᠪᠢᠯᠡ᠃ ᠫᠤᠤ ᠶᠢᠨ ᠬᠢ ᠪᠡᠨ ᠳᠤᠷᠠᠨ ᠢ ᠪᠣᠯᠭᠣᠮᠵᠢᠲᠠᠢ ᠵᠥᠭᠡᠯᠡᠨ ᠠᠷᠴᠢᠭᠠᠳ ᠬᠠᠷᠠᠭᠠ ᠪᠠᠷᠠ ᠶᠢ ᠲᠣᠬᠢᠷᠠᠭᠤᠯᠤᠨ ᠬᠡᠰᠡᠭ ᠰᠠᠭᠤᠪᠠ᠃ ᠰᠡᠳᠬᠢᠯ ᠰᠠᠨᠠᠭᠠ ᠨᠢ ᠲᠠᠪᠠᠭᠦᠶᠢᠲᠦᠭᠡᠳ ᠤᠶᠢᠮᠤᠷᠠᠭᠠᠳ ᠢᠷᠡᠪᠡ᠃ ᠤᠬᠢᠯᠠᠮᠠᠷ ᠪᠣᠯᠵᠤ ᠢᠷᠡᠪᠡ᠃ ᠵᠢᠷᠦᠬᠡ ᠰᠡᠳᠬᠢᠯ ᠨᠢ ᠨᠤᠷᠠᠬᠤ ᠰᠢᠭ ᠯᠠ ᠪᠣᠯᠪᠠ᠃ ᠭᠣᠪᠢ ᠨᠤᠲᠤᠭ ᠤᠨ ᠲᠣᠯᠣᠭᠠᠳ ᠠᠰᠬᠠ ᠳᠠᠮᠵᠢᠨ ᠨᠢᠭᠡᠨ ᠰᠦᠷᠦᠭ ᠤᠭᠠᠯᠵᠠᠨ ᠡᠪᠡᠷᠲᠦ ᠠᠷᠭᠠᠯᠢ ᠭᠦᠶᠦᠵᠦ ᠢᠷᠡᠭᠡᠳ ᠬᠡᠷᠡᠯᠦᠨ ᠭᠣᠣᠯ ᠳᠠᠭᠠᠤ ᠬᠢ ᠡᠨᠡ ᠬᠠᠶᠢᠷᠬᠠᠨ ᠠᠭᠤᠯᠠᠨ ᠳᠤ ᠨᠤᠲᠤᠭᠰᠢᠭᠠᠳ ᠠᠪᠴᠠᠢ᠃ ᠪᠠᠶᠢᠭᠠᠯᠢ ᠬᠠᠮᠠᠭᠠᠯᠠᠭᠴᠢ ᠡᠪᠦᠭᠡᠨ ᠲᠩᠷᠢ ᠶᠢᠨ ᠤᠮᠠᠳᠠᠭ ᠠᠳᠬᠤᠭᠰᠠᠨ ᠠᠶᠠᠲᠠᠢ ᠲᠤᠶᠢᠯ ᠤᠨ ᠶᠡᠬᠡ ᠪᠠᠶᠠᠷᠯᠠᠨ ᠬᠥᠷᠴᠦ᠂ ᠬᠣᠪᠣᠷ ᠠᠩ ᠠᠮᠢᠲᠠᠨ ᠤ ᠪᠦᠷᠢᠳᠬᠡᠯ ᠳᠦ ᠪᠡᠨ ᠣᠷᠣᠭᠤᠯᠤᠨ᠂ ᠲᠣᠭᠠ ᠲᠣᠯᠣᠭᠠᠢ ᠶᠢ ᠨᠢᠭᠡ ᠪᠥᠷᠢᠴᠢᠯᠡᠨ ᠲᠣᠭᠠᠯᠠᠵᠤ᠂ ᠬᠠᠷᠢᠭᠤᠯᠬᠤ ᠨᠢ ᠬᠣᠯᠠ ᠦᠭᠡᠢ ᠬᠠᠶᠢᠷᠠᠯᠠᠨ ᠬᠡᠳᠦᠨ ᠵᠢᠯ ᠦᠨ ᠨᠢᠭᠤᠷ ᠦᠵᠡᠵᠡᠢ᠃
ᠲᠩᠷᠢ ᠬᠠᠩᠭᠠᠢ ᠢᠪᠡᠭᠡᠵᠦ ᠨᠤᠲᠤᠭᠰᠢᠭᠰᠠᠨ ᠠᠷᠭᠠᠯᠢ ᠰᠦᠷᠦᠭ ᠦᠨ ᠪᠦᠯᠢ ᠲᠣᠭᠠ ᠥᠰᠬᠦ ᠶᠠᠩᠵᠤ ᠲᠠᠢ᠃ ᠬᠡᠭᠡᠷᠡ ᠶᠢᠨ ᠴᠢᠨᠣᠠ ᠨᠣᠬᠠᠢ ᠴᠤ ᠬᠦᠷᠦᠭᠰᠡᠨ ᠦᠭᠡᠢ᠃ ᠳᠣᠭᠰᠢᠨ ᠬᠠᠶᠢᠷᠬᠠᠨ ᠪᠣᠯᠬᠣᠷ ᠢᠯᠡᠭᠦᠦ ᠳᠤᠲᠠᠭᠤ ᠬᠠᠷᠠᠭᠰᠠᠨ ᠬᠤᠯᠠᠭᠠᠢ ᠶᠢᠨ ᠠᠩᠴᠢᠳ ᠴᠤ ᠣᠶᠢᠷᠠᠳᠤᠭᠰᠠᠨ ᠦᠭᠡᠢ᠃ ᠬᠡᠳᠦᠨ ᠲᠠᠷᠪᠠᠭᠠ ᠪᠠᠨ ᠴᠤ ᠲᠣᠭᠠᠯᠠᠵᠤ ᠪᠠᠶᠢᠳᠠᠭ ᠬᠡᠩᠬᠡᠭ ᠡᠪᠦᠭᠡᠨ ᠡᠴᠡ ᠪᠦᠭᠦᠳᠡ ᠵᠢᠭᠢᠷᠭᠡᠭᠡᠳ ᠫᠤᠤ ᠳᠤᠤᠭᠠᠷᠳᠠᠭ ᠦᠭᠡᠢ ᠪᠠᠶᠢᠨᠠ᠃ ᠳᠠᠷᠬᠠᠨ ᠴᠠᠭᠠᠵᠠᠲᠤ ᠤᠭᠠᠯᠵᠠᠨ ᠡᠪᠡᠷᠲᠦ ᠠᠷᠭᠠᠯᠢ ᠶᠠᠮᠠᠷ ᠰᠦᠷᠯᠢᠭ ᠰᠠᠶᠢᠬᠠᠨ ᠠᠮᠢᠲᠠᠨ ᠪᠢᠯᠡ᠃ ᠮᠣᠩᠭᠣᠯ ᠤᠨ ᠠᠩ ᠠᠮᠢᠲᠠᠳ ᠤᠨ ᠰᠣᠷ ᠰᠢᠦ᠃ ᠮᠢᠷᠠᠯᠵᠠᠨ ᠤᠷᠤᠰᠬᠤ ᠬᠡᠷᠡᠯᠦᠨ ᠭᠣᠣᠯ ᠤᠷᠤᠭᠤ ᠴᠤᠪᠤᠷᠠᠭᠠᠳ ᠤᠰᠤᠨ ᠳᠤ ᠪᠠᠨ ᠣᠴᠢᠵᠤ ᠪᠠᠶᠢᠭᠠ ᠨᠢ ᠬᠡᠶᠢᠮᠣᠷᠢᠯᠢᠭ᠃ ᠰᠣᠨᠣᠷ ᠰᠡᠷᠡᠮᠵᠢᠲᠡᠢ ᠨᠢ ᠠᠷᠭᠠ ᠦᠭᠡᠢ ᠤᠰᠤᠨ ᠳᠤ ᠪᠠᠨ ᠢᠷᠡᠴᠢᠬᠡᠭᠡᠳ ᠪᠤᠴᠠᠭᠠᠳ ᠥᠭᠰᠥᠨᠡ᠃ ᠴᠣᠬᠣᠷ ᠮᠣᠷᠢ ᠡᠪᠦᠭᠡᠨ ᠬᠣᠶᠠᠷ ᠢ ᠪᠠᠨ ᠪᠠᠷᠤᠭ ᠲᠠᠨᠢᠭᠠᠳ ᠮᠡᠨᠳᠦᠯᠡᠬᠦ ᠨᠢ ᠬᠣᠯᠠ ᠦᠭᠡᠢ ᠪᠠᠶᠢᠳᠠᠭ ᠰᠠᠨ᠃ ᠦᠷᠭᠦᠵᠦ ᠴᠣᠴᠢᠭᠠᠬᠤ ᠦᠭᠡᠢ ᠪᠣᠯᠬᠣᠷ ᠪᠦᠷ ᠳᠠᠰᠤᠨ ᠨᠤᠲᠤᠭᠰᠢᠭᠠᠳ ᠣᠮᠤᠭ ᠪᠠᠷᠳᠠᠮ ᠴᠤ ᠭᠡᠮᠡᠷ ᠲᠠᠶᠢᠪᠤᠩ ᠪᠣᠯᠴᠢᠬᠠᠭᠠᠳ ᠪᠠᠶᠢᠭᠰᠠᠨ ᠶᠤᠮ᠃
… ᠠᠷᠭᠠᠯᠢ ᠤᠭᠠᠯᠵᠠᠨ ᠡᠪᠡᠷ ᠮᠤᠰᠬᠢᠷᠠᠨ ᠵᠡᠭᠦᠳᠦ ᠨᠣᠶᠢᠷ ᠲᠤ ᠴᠣᠶᠢᠯᠠᠨ ᠢᠷᠡᠭᠡᠳ ᠬᠣᠨᠢᠨ ᠪᠣᠷᠣ ᠨᠢᠳᠦ ᠪᠡᠷ ᠢᠶᠡᠨ ᠲᠠᠶᠢᠪᠤᠩ ᠬᠠᠷᠠᠵᠤ ᠵᠣᠭᠰᠣᠨᠠ᠃ ᠭᠡᠨᠡᠳᠲᠡ ᠠᠷᠭᠠᠯᠢ ᠴᠣᠴᠢᠨ ᠦᠷᠭᠦᠨ ᠬᠠᠷᠠᠶᠢᠭᠠᠳ ᠨᠢᠭᠡ ᠶᠡᠬᠡ ᠬᠠᠷᠠ ᠤᠰᠤ ᠤᠷᠤᠭᠤ ᠴᠦᠯ ᠬᠢᠨ ᠣᠷᠣᠬᠤ ᠳᠤ ᠡᠪᠦᠭᠡᠨ ᠳᠠᠪ ᠬᠢᠨ ᠰᠡᠷᠡᠵᠡᠢ᠃ ᠠᠷᠭᠠᠯᠢ ᠬᠠᠷᠠ ᠤᠰᠤ ᠤᠷᠤᠭᠤ ᠦᠰᠦᠷᠦᠨ ᠣᠷᠣᠳᠠᠭ ᠠᠮᠢᠲᠠᠨ ᠪᠢᠰᠢ ᠳ᠋ᠡ᠃ ᠮᠠᠭᠤ ᠰᠣᠪᠢᠨ ᠲᠠᠲᠠᠭᠰᠠᠨ ᠡᠪᠦᠭᠡᠨ ᠴᠣᠬᠣᠷ ᠮᠣᠷᠢᠨ ᠳᠤ ᠪᠠᠨ ᠮᠣᠷᠳᠠᠨ ᠶᠠᠭᠠᠷᠠᠨ ᠱᠣᠭᠰᠢᠭᠤᠯᠤᠯᠠ᠃ ᠬᠠᠶᠢᠷᠬᠠᠨ ᠤ ᠰᠤᠭᠤᠨ ᠳᠤ ᠬᠡᠷᠢᠶᠡ᠂ ᠲᠠᠰ ᠡᠷᠭᠢᠯᠳᠦᠨ ᠰᠦᠢᠳ ᠪᠣᠯᠵᠤ ᠪᠠᠶᠢᠨᠠ᠃ ᠡᠪᠦᠭᠡᠨ ᠶᠠᠭᠠᠷᠠᠨ ᠢᠷᠡᠭᠡᠳ ᠳᠤᠷᠠᠨᠳᠠᠲᠠᠯᠠ ᠭᠤᠷᠪᠠᠨ ᠰᠣᠭᠣᠲᠣᠩ ᠤᠯᠢᠶᠠᠨ ᠠᠷᠭᠠᠯ ᠤᠨ ᠪᠦᠯᠢ ᠰᠦᠷᠦᠭ ᠢ ᠨᠢᠭᠡᠮᠥᠰᠦᠨ ᠲᠠᠷᠬᠠᠭᠠᠵᠤ ᠬᠣᠶᠠᠷ ᠢ ᠴᠤ ᠤᠨᠠᠭᠠᠨ ᠬᠣᠪᠳᠣᠭᠯᠠᠨ ᠵᠣᠭᠣᠭᠯᠠᠵᠤ ᠪᠠᠶᠢᠪᠠ᠃ ᠵᠡᠷᠯᠢᠭ ᠨᠣᠬᠠᠢ ᠶᠢᠨ ᠰᠡᠭᠦᠯ ᠬᠣᠩᠬᠣᠷᠴᠠᠭ ᠳᠡᠭᠡᠷᠡ ᠪᠡᠨ ᠡᠷᠭᠢᠨ ᠣᠯᠵᠠ ᠪᠠᠨ ᠵᠤᠯᠭᠠᠭᠠᠬᠤ ᠠᠵᠡᠢ᠃ ᠡᠪᠦᠭᠡᠨ ᠳᠡᠭᠡᠭᠰᠢ ᠫᠤᠤᠳᠠᠪᠠ᠃ ᠶᠠᠭᠠᠷᠠᠨ ᠳᠠᠪᠬᠢᠨ ᠬᠦᠷᠦᠯᠡ᠃ ᠠᠷᠭᠠᠯᠢ ᠰᠦᠷᠦᠭ ᠦᠨ ᠬᠣᠶᠠᠷ ᠴᠤ ᠰᠢᠳᠦᠯᠡᠩ ᠢ ᠦᠭᠡᠢ ᠬᠢᠵᠡᠢ᠃ ᠫᠤᠤ ᠶᠢᠨ ᠳᠠᠭᠤᠨ ᠢᠶᠠᠷ ᠰᠣᠭᠣᠲᠣᠩ ᠤᠯᠢᠶᠠᠨ ᠨᠤᠭᠤᠳ ᠭᠠᠵᠠᠷ ᠤᠨ ᠭᠠᠪᠠ ᠪᠠᠷ ᠣᠷᠣᠭᠰᠠᠨ ᠠᠶᠠᠲᠠᠢ ᠠᠯᠠᠭᠠ ᠪᠣᠯᠪᠠ᠃
ᠡᠪᠦᠭᠡᠨ ᠪᠠᠯᠠᠮᠠᠭᠳᠠᠨ ᠰᠠᠨᠳᠤᠷᠴᠤ ᠬᠡᠢ ᠯᠠ ᠱᠣᠭᠰᠢᠷᠠᠨ ᠭᠠᠵᠠᠷ ᠤᠨ ᠪᠠᠶᠢᠳᠠᠯ ᠢ ᠬᠠᠷᠠᠨ ᠬᠡᠰᠡᠭ ᠬᠠᠷᠠᠮᠰᠠᠨ ᠪᠡᠳᠡᠷᠢᠯᠡ᠃ ᠬᠡᠭᠡᠷᠡ ᠶᠢᠨ ᠪᠣᠣᠬᠠᠢ ᠴᠤ ᠠᠮᠤᠷ ᠪᠠᠷᠢᠬᠤ ᠦᠭᠡᠢ ᠡᠨᠡ ᠠᠮᠢᠲᠠᠳ ᠢ ᠵᠡᠷᠯᠢᠭᠰᠢᠭᠰᠡᠨ ᠨᠣᠬᠠᠢ ᠡᠬᠡ ᠵᠢᠩᠭᠡᠷ ᠬᠦᠮᠦᠨ ᠡᠴᠡ ᠴᠤ ᠭᠠᠷᠤᠮᠠᠷ ᠦᠭᠡᠢ ᠮᠠᠭᠤ ᠰᠠᠨᠠᠭᠠ ᠪᠠᠷ ᠤᠰᠤᠨ ᠳᠡᠭᠡᠷᠡ ᠣᠲᠣᠨ ᠥᠪᠡᠷ ᠦᠨ ᠵᠤᠯᠵᠠᠭᠠ ᠴᠢᠨᠤᠨ ᠡᠷᠯᠢᠵᠡ ᠬᠣᠶᠠᠷ ᠰᠣᠭᠣᠲᠣᠩ ᠤᠯᠢᠶᠠᠨ ᠢᠶᠠᠷ ᠢᠶᠠᠨ ᠪᠥᠰᠡᠯᠡᠨ ᠰᠦᠢᠳ ᠬᠢᠵᠡᠢ᠃ ᠨᠢᠳᠦ ᠬᠠᠯᠲᠤᠷᠢᠮᠠᠷ᠃ ᠬᠡᠳᠦᠨ ᠵᠢᠯ ᠬᠡᠨ ᠴᠤ ᠦᠷᠭᠦᠭᠡᠭᠡ ᠦᠭᠡᠢ ᠪᠦᠷ ᠨᠣᠮᠣᠬᠠᠷᠠᠨ ᠲᠠᠶᠢᠪᠤᠰᠢᠷᠠᠭᠠᠳ ᠳᠠᠰᠴᠤ ᠪᠠᠶᠢᠭᠰᠠᠨ ᠠᠷᠭᠠᠯᠢ ᠰᠦᠷᠦᠭ ᠢ ᠭᠡᠨᠡᠳᠡᠭᠦᠯᠦᠨ ᠳᠠᠭᠠᠷᠢᠵᠤ ᠳᠤᠷᠠ ᠵᠣᠷᠢᠭ ᠢᠶᠠᠷ ᠢᠶᠠᠨ ᠳᠠᠭᠠᠷᠢᠵᠠᠢ᠃ ᠰᠡᠭᠯᠡᠬᠦ ᠶᠢ ᠰᠡᠭᠯᠡᠵᠦ᠂ ᠠᠭᠤᠯᠠ ᠳᠠᠪᠠᠭᠤᠯᠤᠨ ᠲᠠᠯᠠ ᠤᠷᠤᠭᠤ ᠪᠠᠭᠤᠯᠭᠠᠨ ᠬᠥᠭᠡᠭᠡᠵᠦ᠂ ᠰᠠᠭᠤᠷᠢᠨ ᠤ ᠬᠠᠰᠢᠶᠠᠨ ᠤ ᠲᠡᠮᠦᠷ ᠤᠲᠠᠰᠤᠨ ᠳᠤ ᠣᠷᠢᠶᠠᠴᠠᠯᠳᠤᠭᠤᠯᠤᠨ᠂ ᠦᠷᠭᠦᠭᠰᠡᠨ ᠠᠶᠤᠭᠰᠠᠨ ᠠᠮᠢᠲᠠᠳ ᠥᠷᠭᠡᠰᠦᠲᠦ ᠲᠡᠮᠦᠷ ᠲᠣᠤᠷ ᠲᠤ ᠣᠷᠢᠶᠠᠭᠳᠠᠨ ᠨᠢᠳᠦ ᠠᠮᠠ ᠪᠠᠨ ᠰᠣᠬᠣᠯᠵᠤ᠂ ᠴᠡᠭᠡᠵᠢᠨ ᠤ ᠮᠢᠬᠠ ᠶᠢ ᠭᠠᠷᠲᠠᠯᠠ ᠤᠷᠠᠵᠠᠢ᠃
ᠨᠤᠲᠤᠭ ᠤᠨ ᠰᠠᠶᠢᠨ ᠰᠠᠨᠠᠭᠠᠲᠤ ᠪᠠᠶᠢᠭᠠᠯᠢ ᠠᠮᠢᠲᠠᠨ ᠳᠤ ᠬᠠᠶᠢᠷᠠᠲᠠᠢ ᠬᠦᠮᠦᠰ ᠲᠠᠭᠠᠷᠠᠵᠤ ᠠᠪᠤᠷᠠᠭᠰᠠᠨ ᠪᠠᠶᠢᠬᠤ ᠶᠤᠮ᠃ ᠰᠣᠭᠣᠲᠣᠩ ᠤᠯᠢᠶᠠᠨ ᠨᠤᠭᠤᠳ ᠪᠤᠴᠠᠨ ᠢᠷᠡᠭᠡᠳ ᠤᠨᠠᠭᠠᠭᠰᠠᠨ ᠵᠣᠭᠣᠭ ᠢᠶᠠᠨ ᠪᠠᠷᠢᠵᠤ ᠪᠠᠶᠢᠭᠠᠳ ᠡᠪᠦᠭᠡᠨ ᠦ ᠫᠤᠤ ᠶᠢᠨ ᠳᠠᠭᠤᠨ ᠢᠶᠠᠷ ᠰᠡᠭᠦᠯ ᠢᠶᠡᠨ ᠬᠠᠪᠴᠢᠨ ᠵᠤᠯᠪᠠᠭᠰᠠᠨ ᠨᠢ ᠡᠨᠡ᠃ ᠬᠠᠮᠤᠭ ᠤᠨ ᠬᠠᠷᠠᠮᠰᠠᠯ ᠲᠠᠢ ᠨᠢ ᠦᠯᠡᠳᠡᠭᠰᠡᠨ ᠤᠭᠠᠯᠵᠠᠨ ᠡᠪᠡᠷᠲᠦ ᠠᠷᠭᠠᠯᠢ ᠰᠦᠷᠦᠭ ᠪᠤᠲᠠᠷᠠᠨ ᠭᠣᠪᠢ ᠲᠣᠯᠣᠭᠠᠳ ᠤᠷᠤᠭᠤ ᠪᠠᠨ ᠬᠡᠵᠢᠶᠡ ᠴᠤ ᠡᠷᠭᠢᠨ ᠢᠷᠡᠬᠦ ᠦᠭᠡᠢ ᠪᠡᠷ ᠴᠣᠶᠢᠯᠠᠨ ᠣᠳᠤᠭᠰᠠᠨ ᠪᠠᠶᠢᠯᠠ᠃ ᠬᠠᠶᠢᠷᠬᠠᠨ ᠡᠵᠡᠭᠦᠶᠢᠷᠡᠵᠦ᠂ ᠰᠦᠨᠡᠰᠦ ᠰᠦᠯᠳᠡ ᠦᠭᠡᠢ ᠪᠣᠯᠤᠭᠰᠠᠨ ᠮᠡᠲᠦ᠃ ᠰᠦᠷᠯᠢᠭ ᠰᠠᠶᠢᠬᠠᠨ ᠠᠮᠢᠲᠠᠳ ᠢᠶᠠᠨ ᠰᠠᠨᠠᠭᠠᠯᠵᠠᠬᠤ ᠮᠡᠲᠦ ᠳᠦᠩᠰᠦᠶᠢᠨᠡ᠃
… ᠡᠪᠦᠭᠡᠨ ᠳᠤᠷᠠᠨᠳᠠᠩᠭᠠᠨ ᠰᠡᠳᠬᠢᠯ ᠳᠠᠬᠢᠨ ᠡᠵᠡᠭᠦᠶᠢᠷᠡᠵᠦ ᠭᠠᠩᠰᠠᠷᠠᠨ ᠪᠣᠳᠣᠵᠤ ᠪᠠᠶᠢᠭᠰᠠᠨ ᠢᠶᠠᠨ ᠫᠤᠤ ᠪᠠᠨ ᠡᠷᠭᠦᠨ ᠳᠣᠭᠣᠭᠰᠢ ᠪᠣᠯᠪᠠ᠃ ᠵᠡᠷᠯᠢᠭᠰᠢᠭᠰᠡᠨ ᠵᠢᠩᠭᠡᠷ᠂ ᠬᠡᠭᠡᠷᠡ ᠶᠢᠨ ᠴᠢᠨᠣᠠ ᠬᠣᠶᠠᠷ ᠤᠨ ᠳᠤᠮᠳᠠ ᠠᠴᠠ ᠲᠦᠷᠦᠭᠰᠡᠨ ᠠᠬᠠ ᠳᠡᠭᠦᠦ ᠬᠣᠶᠠᠷ ᠪᠠᠶᠢᠴᠠ ᠬᠠᠳᠠᠨ ᠳᠤᠮᠳᠠ ᠠᠴᠠ ᠱᠣᠭᠰᠢᠨ ᠭᠠᠷᠤᠭᠠᠳ ᠢᠷᠡᠪᠡ᠃ ᠲᠡᠳᠡᠨ ᠦ ᠪᠡᠶᠡ ᠥᠨᠳᠥᠷ᠂ ᠬᠦᠴᠦ ᠴᠢᠳᠠᠯ ᠶᠡᠬᠡ᠂ ᠵᠢᠰᠦ ᠤᠯᠠᠭᠠᠨ ᠰᠢᠷᠭᠠᠯ ᠰᠡᠷᠪᠡᠭᠡᠨ ᠳᠡᠭᠡᠷᠡ ᠪᠡᠨ ᠳᠡᠯ ᠲᠡᠢ᠂ ᠰᠡᠭᠦᠯ ᠨᠢ ᠬᠣᠩᠬᠣᠷᠴᠠᠭ ᠳᠡᠭᠡᠷᠡ ᠪᠡᠨ ᠭᠡᠷ ᠦᠨ ᠨᠣᠬᠠᠢ ᠰᠢᠭ ᠡᠷᠭᠢᠭᠰᠡᠨ ᠪᠠᠶᠢᠬᠤ ᠪᠥᠯᠦᠭᠡ᠃ ᠡᠪᠦᠭᠡᠨ ᠫᠤᠤ ᠶᠢᠨ ᠬᠢ ᠪᠡᠨ ᠳᠤᠷᠠᠨ ᠬᠠᠷᠠᠭᠠᠨ ᠳᠤ ᠪᠠᠨ ᠲᠣᠭᠲᠠᠭᠠᠭᠠᠳ ᠠᠪᠤᠪᠠ᠃ ᠡᠬᠡ ᠵᠢᠩᠭᠡᠷ ᠪᠠᠶᠢᠳᠠᠭ ᠦᠭᠡᠢ ᠡ᠃ ᠠᠷᠤ ᠠᠴᠠ ᠨᠢ ᠭᠠᠷᠤᠭᠠᠳ ᠢᠷᠡᠭᠦ ᠶᠢ ᠵᠢᠭᠠᠬᠠᠨ ᠬᠦᠯᠢᠶᠡᠪᠡ᠃ ᠮᠠᠭᠤ ᠡᠬᠡ ᠵᠢᠩᠭᠡᠷ ᠤᠷᠳᠤ ᠨᠢ ᠱᠣᠭᠰᠢᠵᠤ ᠶᠠᠪᠤᠮᠠᠷ ᠶᠤᠮ᠃ ᠠᠯᠠᠭᠠ ᠡ᠃ ᠡᠬᠢᠨ ᠦ ᠰᠣᠭᠣᠲᠣᠩ ᠳᠡᠭᠡᠷᠡ ᠳᠤᠷᠠᠨ ᠤ ᠬᠡᠷᠡᠭᠡᠰᠦ ᠣᠴᠢᠯᠠ…
…ᠪᠠᠶᠢᠭᠠᠯᠢ ᠬᠠᠮᠠᠭᠠᠯᠠᠭᠴᠢ ᠰᠦᠬᠡ ᠡᠪᠦᠭᠡᠨ ᠦ ᠰᠠᠭᠠᠬᠠᠯᠲᠠ ᠠᠶᠢᠯ ᠪᠣᠯᠬᠤ ᠵᠠᠯᠠᠭᠤ ᠮᠠᠯᠴᠢᠨ ᠠᠶᠢᠯ ᠳᠤ ᠨᠢᠭᠡᠨ ᠡᠳᠦᠷ ᠬᠠᠮᠢᠭᠠ ᠠᠴᠠ ᠴᠤ ᠶᠤᠮ ᠪᠡᠶᠡ ᠲᠣᠮᠣ ᠲᠠᠢ ᠤᠯᠠᠭᠠᠨ ᠰᠢᠷᠭᠠᠯ ᠵᠢᠰᠦ ᠲᠡᠢ ᠵᠢᠩᠭᠡᠷ ᠭᠦᠶᠦᠭᠡᠳ ᠢᠷᠡᠵᠡᠢ᠃ ᠨᠣᠬᠠᠢ ᠤᠷᠪᠠᠬᠤ ᠰᠠᠶᠢᠨ ᠭᠡᠳ ᠡᠬᠡᠨᠡᠷ ᠨᠢ ᠡᠬᠢᠯᠡᠭᠡᠳ ᠬᠣᠭᠣᠯᠠᠨ ᠤ ᠰᠢᠪᠬᠠᠷᠤᠤ ᠥᠭᠭᠦᠭᠰᠡᠨ ᠶᠤᠮ ᠪᠠᠶᠢᠨᠠ᠃ ᠳᠠᠩᠴᠤ ᠲᠡᠳᠡᠨ ᠦ ᠬᠣᠲᠠᠨ ᠤ ᠬᠣᠶᠠᠷ ᠪᠠᠩᠬᠤᠷ ᠡᠳᠦᠷ ᠰᠥᠨᠢ ᠦᠭᠡᠢ ᠵᠢᠩᠭᠡᠷ ᠢ ᠪᠤᠯᠢᠶᠠᠯᠳᠤᠨ ᠬᠣᠭᠣᠷᠣᠨᠳᠣ ᠪᠠᠨ ᠬᠡᠮᠡᠯᠢᠯᠳᠦᠨ ᠵᠣᠳᠣᠯᠳᠤᠭᠠᠳ ᠪᠥᠭᠡᠮ ᠱᠤᠤᠭᠢᠶᠠᠨ ᠪᠣᠯᠤᠭᠠᠳ ᠪᠠᠶᠢᠵᠠᠢ᠃ ᠭᠡᠷ ᠦᠨ ᠡᠵᠡᠨ ᠠᠭᠤᠷᠰᠠᠨ ᠣᠳᠣ ᠡᠨᠡ ᠵᠢᠩᠭᠡᠷ ᠡᠨᠳᠡ ᠭᠥᠯᠥᠭᠡᠯᠡᠵᠦ ᠪᠥᠭᠡᠮ ᠭᠠᠢ ᠪᠣᠯᠤᠨᠠ … ᠭᠡᠳ ᠵᠢᠩᠭᠡᠷ ᠢ ᠵᠣᠳᠣᠵᠤ ᠰᠢᠪᠬᠠᠭᠤᠷᠳᠠᠨ ᠬᠥᠭᠡᠭᠡᠯᠡ᠃ ᠮᠣᠷᠢ ᠲᠠᠢ ᠣᠷᠢᠶᠠᠯᠭᠠᠨ ᠡᠯᠳᠡᠭᠡᠳ ᠠᠭᠤᠯᠠ ᠳᠠᠪᠠᠭᠤᠯᠤᠭᠠᠳ ᠴᠤ ᠨᠡᠮᠡᠷᠢ ᠦᠭᠡᠢ ᠰᠥᠨᠢ ᠳᠦ ᠪᠡᠨ ᠢᠷᠡᠭᠡᠳ ᠪᠥᠭᠡᠮ ᠱᠤᠤᠭᠢᠶᠠᠨ ᠲᠠᠷᠢᠨᠠ᠃ ᠰᠥᠨᠢ ᠪᠠᠰᠠ ᠮᠠᠭᠤᠬᠠᠢ ᠤᠯᠢᠨᠠ᠃ ᠠᠷᠭᠠ ᠪᠠᠨ ᠪᠠᠷᠠᠭᠰᠠᠨ ᠭᠡᠷ ᠦᠨ ᠡᠵᠡᠨ ᠨᠢᠭᠡ ᠥᠷᠯᠥᠭᠡ ᠠᠭᠤᠷ ᠲᠤ ᠪᠠᠨ ᠺᠠᠯᠢᠪᠷ ᠫᠤᠤ ᠪᠠᠨ ᠠᠪᠴᠤ ᠭᠠᠷᠤᠨ ᠬᠥᠭᠡᠭᠡᠵᠦ ᠭᠡᠷ ᠡᠴᠡ ᠪᠡᠨ ᠬᠣᠯᠠᠳᠠᠭᠤᠯᠵᠤ ᠪᠠᠶᠢᠭᠠᠳ ᠳᠡᠭᠡᠭᠦᠷ ᠨᠢᠭᠡ ᠫᠤᠤᠳᠠᠭᠰᠠᠨ ᠴᠤ ᠨᠡᠮᠡᠷᠢ ᠠᠯᠠᠭᠠ ᠬᠡᠪᠲᠡᠭᠡᠳ ᠥᠭᠴᠡᠢ᠃ ᠲᠡᠭᠡᠬᠦ ᠪᠡᠷ ᠨᠢ ᠨᠢᠭᠡ ᠫᠤᠤᠳᠠᠴᠢᠬᠠᠵᠤ᠂ ᠵᠢᠩᠭᠡᠷ ᠳᠤᠩᠭᠤᠢ ᠬᠠᠳᠠᠨ ᠤᠨᠠᠭᠠᠳ ᠭᠠᠰᠠᠯᠵᠤ ᠭᠠᠩᠭᠢᠨᠠᠨ ᠪᠥᠭᠡᠮ ᠶᠠᠭᠤᠮᠠ ᠪᠣᠯᠵᠠᠢ᠃
ᠵᠢᠩᠭᠡᠷ ᠦᠨ ᠬᠣᠶᠢᠳᠤ ᠬᠥᠯ ᠪᠣᠷᠪᠢᠨ ᠳᠤ ᠰᠤᠮᠤ ᠲᠤᠰᠴᠠᠢ᠃ ᠰᠢᠷᠬᠠᠲᠤᠭᠤᠯᠵᠤ ᠬᠠᠶᠠᠭᠠᠳ ᠶᠠᠭᠠᠬᠢᠬᠤ ᠪᠤᠢ ᠭᠦᠢᠴᠡᠭᠡᠴᠢᠬᠡᠶᠡ ᠭᠡᠳ ᠵᠠᠯᠠᠭᠤ ᠫᠤᠤ ᠪᠠᠨ ᠳᠠᠬᠢᠨ ᠰᠤᠮᠤᠯᠠᠭᠠᠳ ᠳᠥᠬᠥᠨ ᠢᠷᠡᠲᠡᠯᠡ ᠵᠢᠩᠭᠡᠷ ᠦᠨ ᠨᠢᠳᠦᠨ ᠡᠴᠡ ᠨᠢᠭᠡ ᠲᠣᠮᠣ ᠨᠢᠯᠪᠤᠰᠤ ᠪᠥᠮᠪᠥᠷᠢᠨ ᠤᠷᠤᠰᠴᠤ᠂ ᠬᠠᠴᠢᠨ ᠴᠡᠩᠬᠡᠷ ᠲᠤᠶᠠᠭᠠ ᠲᠠᠲᠠᠭᠠᠳ ᠶᠠᠪᠤᠴᠢᠬᠠᠪᠠ᠃ ᠵᠠᠯᠠᠭᠤ ᠥᠷᠦ ᠡᠪᠡᠳᠬᠦ ᠰᠡᠳᠬᠢᠯ ᠲᠥᠷᠦᠭᠡᠳ ᠫᠤᠤ ᠪᠠᠨ ᠦᠷᠦᠭᠡᠳ ᠪᠤᠴᠠᠭᠠᠳ ᠠᠯᠬᠤᠵᠠᠢ᠃ ᠵᠢᠩᠭᠡᠷ ᠳᠣᠭᠣᠯᠠᠩ ᠭᠣᠮᠣᠳᠠᠯ ᠲᠠᠢ ᠭᠠᠰᠠᠯᠤᠭᠠᠳ ᠡᠷᠭᠢᠨ ᠬᠡᠪᠲᠡᠭᠡᠳ ᠰᠢᠷᠬᠠ ᠪᠠᠨ ᠳᠣᠯᠢᠶᠠᠵᠤ ᠪᠠᠶᠢᠪᠠ᠃ ᠰᠥᠨᠢ ᠳᠦ ᠪᠡᠨ ᠠᠯᠠᠭᠠ ᠪᠣᠯᠤᠭᠰᠠᠨ ᠪᠠᠶᠢᠯᠠ᠃ ᠵᠢᠩᠭᠡᠷ ᠬᠡᠭᠡᠷᠡ ᠪᠡᠷ ᠬᠠᠳᠠ ᠠᠰᠬᠠ ᠪᠠᠷ ᠬᠣᠷᠭᠣᠳᠠᠨ ᠰᠢᠷᠬᠠ ᠪᠠᠨ ᠳᠣᠯᠢᠶᠠᠭᠰᠠᠭᠠᠷ ᠡᠳᠡᠭᠡᠭᠡᠭᠡᠳ᠂ ᠣᠭᠤᠲᠤᠨᠠ ᠵᠤᠷᠠᠮᠠ ᠪᠠᠷ ᠬᠣᠭᠣᠯᠠ ᠬᠢᠵᠦ ᠶᠠᠪᠤᠭᠰᠠᠭᠠᠷ ᠡᠪᠦᠯ ᠦᠨ ᠡᠬᠢ ᠪᠡᠷ ᠨᠢᠭᠡᠨ ᠴᠢᠨᠣᠠ ᠲᠠᠢ ᠲᠠᠭᠠᠷᠠᠨ ᠨᠥᠬᠥᠴᠡᠵᠦ᠂ ᠬᠣᠶᠠᠷ ᠭᠥᠯᠥᠭᠡ ᠲᠥᠷᠦᠭᠦᠯᠵᠡᠢ᠃ ᠴᠢᠨᠣᠠ ᠨᠣᠬᠠᠢ ᠶᠢᠨ ᠡᠷᠯᠢᠵᠡ ᠨᠦᠭᠦᠳ ᠬᠤᠷᠳᠤᠨ ᠥᠰᠴᠦ ᠲᠣᠷᠨᠢᠭᠠᠳ ᠪᠡᠶᠡ ᠲᠣᠮᠣ᠂ ᠬᠤᠷᠳᠤ ᠬᠦᠴᠦ᠂ ᠠᠷᠭᠠ ᠴᠢᠷᠭᠠ᠂ ᠵᠣᠷᠢᠭ ᠰᠥᠰᠥ ᠲᠡᠢ᠂ ᠭᠠᠯ ᠤᠯᠠᠭᠠᠨ ᠵᠢᠰᠦ ᠲᠡᠢ᠂ ᠴᠢᠬᠢ ᠰᠣᠭᠣᠲᠣᠩ ᠪᠣᠯᠬᠤ ᠠᠴᠠ ᠰᠡᠭᠦᠯ ᠭᠡᠷ ᠦᠨ ᠨᠣᠬᠠᠢ ᠰᠢᠭ ᠬᠣᠩᠬᠣᠷᠴᠠᠭ ᠳᠡᠭᠡᠷᠡ ᠪᠡᠨ ᠡᠷᠭᠢᠭᠰᠡᠨ᠂ ᠰᠡᠭᠦᠯ ᠢᠶᠡᠨ ᠰᠢᠷᠪᠠᠭᠠᠳ ᠬᠡᠪᠲᠡᠭᠡᠳ ᠪᠠᠶᠢᠪᠠᠯ ᠭᠡᠷ ᠦᠨ ᠨᠣᠬᠠᠢ ᠯᠠ ᠭᠡᠵᠦ ᠠᠨᠳᠠᠭᠤᠷᠠᠬᠤ ᠪᠠᠷ ᠠᠮᠢᠲᠠᠳ ᠪᠠᠶᠢᠪᠠ᠃
ᠡᠬᠡ ᠵᠢᠩᠭᠡᠷ ᠲᠡᠳᠡᠨ ᠢ ᠪᠡᠨ ᠠᠩ ᠳᠤ ᠰᠤᠷᠭᠠᠨ᠂ ᠠᠶᠢᠯ ᠤᠨ ᠬᠤᠷᠠᠭᠠ ᠢᠰᠢᠭᠡ᠂ ᠰᠢᠳᠦᠯᠡᠩ ᠪᠣᠷᠯᠣᠩ ᠳᠡᠰᠬᠡᠭᠡᠳᠡᠭ ᠦᠭᠡᠢ ᠪᠣᠯᠵᠠᠢ᠃ ᠲᠣᠮᠣ ᠪᠣᠯᠤᠭᠠᠳ ᠳᠠᠭᠠ ᠰᠠᠷᠪᠠ ᠴᠤ ᠤᠨᠠᠭᠠᠳᠠᠭ ᠬᠣᠣᠷ ᠲᠠᠢ ᠠᠮᠢᠲᠠᠳ ᠪᠣᠯᠪᠠ᠃ ᠬᠣᠨᠢ ᠮᠠᠯ ᠶᠠᠭᠠᠬᠢᠬᠤ ᠪᠤᠢ ᠭᠡᠷ ᠦᠨ ᠨᠣᠬᠠᠢ ᠪᠠᠶᠢᠨᠠ ᠭᠡᠳ ᠬᠠᠷᠠᠳᠠᠬᠤ ᠰᠡᠷᠡᠳᠡᠬᠦ ᠦᠭᠡᠢ ᠢᠳᠡᠭᠡᠰᠢᠯᠡᠨ ᠪᠠᠶᠢᠬᠤ ᠳᠤ ᠰᠡᠭᠦᠯ ᠢᠶᠡᠨ ᠰᠢᠷᠪᠠᠨ ᠳᠥᠬᠥᠨ ᠣᠴᠢᠭᠠᠳ ᠰᠦᠢᠳ ᠬᠢᠨᠡ᠃ ᠠᠶᠢᠯ ᠬᠣᠲᠠ ᠪᠠᠷ ᠢᠶᠠᠨ ᠫᠤᠤᠳᠠᠵᠤ ᠬᠣᠷᠣᠭᠠᠶᠠ ᠭᠡᠳ ᠭᠠᠷᠬᠤ ᠪᠠᠷ ᠠᠭᠤᠯᠠ ᠬᠠᠳᠠ ᠪᠡᠷ ᠢᠶᠠᠨ ᠳᠠᠮᠵᠢᠭᠠᠳ ᠠᠯᠠᠭᠠ ᠪᠣᠯᠤᠭᠠᠳ ᠥᠭᠭᠦᠨᠡ᠃ ᠪᠦᠷ ᠬᠦᠮᠦᠨ ᠰᠢᠭ ᠪᠣᠯᠤᠭᠰᠠᠨ ᠮᠡᠲᠦ ᠨᠢᠭᠡᠨ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠡᠬᠡ ᠵᠢᠩᠭᠡᠷ ᠬᠥᠲᠥᠯ ᠳᠡᠭᠡᠷᠡ ᠡᠴᠡ ᠥᠩᠭᠡᠶᠢᠨ ᠬᠠᠷᠠᠵᠤ᠂ ᠥᠪᠡᠷ ᠢ ᠨᠢ ᠫᠤᠤᠳᠠᠭᠰᠠᠨ ᠨᠥᠭᠥᠭᠡᠬᠢ ᠮᠠᠯᠴᠢᠨ ᠵᠠᠯᠠᠭᠤ ᠶᠢ ᠠᠳᠤᠭᠤᠨ ᠳᠤ ᠪᠠᠨ ᠮᠣᠷᠳᠠᠬᠤ ᠶᠢ ᠠᠨᠠᠨ ᠪᠠᠶᠢᠭᠠᠳ ᠬᠣᠶᠠᠷ ᠰᠣᠭᠣᠲᠣᠩ ᠢ ᠪᠠᠨ ᠳᠠᠭᠠᠭᠤᠯᠤᠨ ᠲᠡᠳᠡᠨ ᠦ ᠬᠣᠲᠠᠨ ᠳᠤ ᠰᠡᠭᠦᠯ ᠢᠶᠡᠨ ᠰᠢᠷᠪᠠᠭᠠᠳ ᠬᠦᠷᠦᠭᠡᠳ ᠣᠴᠢᠵᠠᠢ᠃ ᠤᠭᠲᠤᠭᠠᠳ ᠢᠷᠡᠭᠰᠡᠨ ᠬᠣᠶᠠᠷ ᠪᠠᠩᠬᠤᠷ ᠢ ᠨᠢ ᠬᠣᠶᠠᠷ ᠰᠣᠭᠣᠲᠣᠩ ᠡᠯᠪᠡᠨ ᠪᠠᠭᠠᠯᠵᠤᠷᠳᠠᠭᠠᠳ ᠳᠠᠭᠤ ᠦᠭᠡᠢ ᠪᠣᠯᠭᠠᠵᠠᠢ᠃ ᠬᠣᠲᠠ ᠲᠠᠢ ᠬᠣᠨᠢᠨ ᠳᠤ ᠦᠰᠦᠷᠦᠨ ᠣᠷᠣᠭᠠᠳ ᠶᠣᠰᠣᠲᠠᠢ ᠨᠢᠭᠡ ᠴᠢᠰᠤᠨ ᠵᠠᠮ ᠲᠠᠲᠠᠭᠤᠯᠤᠨ ᠰᠦᠢᠳ ᠬᠢᠵᠡᠢ᠃
ᠪᠥᠭᠡᠮ ᠱᠤᠤᠭᠢᠶᠠᠨ ᠢᠶᠠᠷ ᠭᠡᠷ ᠦᠨ ᠡᠵᠡᠭᠲᠡᠢ ᠶᠠᠭᠠᠷᠠᠨ ᠭᠠᠷᠲᠠᠯᠠ ᠭᠡᠷ ᠦᠨ ᠡᠭᠦᠳᠡᠨ ᠳᠦ ᠡᠬᠡ ᠵᠢᠩᠭᠡᠷ ᠮᠠᠭᠤᠬᠠᠢ ᠠᠬᠢᠷᠠᠭᠠᠳ ᠣᠴᠣᠶᠢᠭᠠᠳ ᠰᠠᠭᠤᠵᠤ ᠪᠠᠶᠢᠪᠠ᠃ ᠲᠡᠭᠦᠨ ᠦ ᠨᠢᠳᠦᠨ ᠡᠴᠡ ᠨᠢᠭᠡ ᠶᠡᠬᠡ ᠨᠢᠯᠪᠤᠰᠤ ᠤᠨᠠᠨ ᠬᠠᠴᠢᠨ ᠴᠡᠩᠬᠡᠷ ᠲᠤᠶᠠᠭᠠ ᠲᠠᠲᠠᠭᠠᠳ ᠥᠩᠭᠡᠷᠡᠵᠠᠢ᠃ ᠬᠥᠭᠡᠷᠦᠬᠦᠢ ᠪᠦᠰᠡᠭᠦᠢ ᠭᠡᠷ ᠲᠦ ᠪᠡᠨ ᠣᠷᠣᠨ ᠡᠭᠦᠳᠡ ᠪᠡᠨ ᠴᠣᠣᠵᠢᠯᠠᠭᠠᠳ ᠬᠡᠦᠬᠡᠳ ᠢᠶᠡᠨ ᠲᠡᠪᠡᠷᠢᠨ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠰᠠᠭᠤᠵᠠᠢ …
…ᠡᠪᠦᠭᠡᠨ ᠰᠦᠬᠡ ᠰᠢᠳᠦ ᠵᠠᠭᠤᠨ ᠫᠤᠤ ᠶᠢᠨ ᠳᠤᠷᠠᠨ ᠢᠶᠠᠷ ᠢᠶᠠᠨ ᠬᠠᠷᠠᠭᠠᠯᠠᠭᠰᠠᠭᠠᠷ ᠪᠠᠶᠢᠪᠠ᠃ ᠠᠩ ᠤᠨ ᠫᠤᠤ ᠶᠢᠨ ᠳᠤᠷᠠᠨ ᠤ ᠬᠡᠷᠡᠭᠡᠰᠦ ᠴᠢᠨᠣᠠ ᠨᠣᠬᠠᠢ ᠶᠢᠨ ᠡᠷᠯᠢᠵᠡ ᠶᠢᠨ ᠬᠡᠩᠬᠦᠳᠡᠭ ᠴᠡᠭᠡᠵᠢᠨ ᠳᠦ ᠣᠴᠢᠪᠠ᠃ ᠴᠡᠭᠡᠵᠢᠨ ᠦ ᠦᠰᠦ ᠴᠠᠭᠠᠨ ᠠᠵᠡᠢ᠃ ᠵᠠᠯᠠᠭᠤ ᠳᠤ ᠪᠠᠨ ᠬᠥᠪᠴᠢ ᠶᠢᠨ ᠠᠩᠴᠢᠨ ᠶᠠᠪᠤᠭᠰᠠᠨ ᠡᠪᠦᠭᠡᠨ ᠲᠣᠭᠠᠴᠠᠭᠠ ᠪᠣᠳᠣᠨ ᠪᠠᠶᠢᠪᠠ᠃ ᠡᠬᠢᠨ ᠦ ᠬᠢ ᠤᠨᠠᠬᠤ ᠳᠤ ᠠᠷᠤ ᠶᠢᠨ ᠬᠢ ᠡᠷᠭᠢᠨ ᠬᠠᠮᠢᠭᠠᠰᠢ ᠵᠢᠭᠤᠳᠠᠬᠤ ᠪᠣᠯ ᠠᠯᠳᠠᠵᠤ ᠬᠡᠷᠬᠢᠪᠡᠴᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠭᠠᠳ ᠭᠠᠵᠠᠷ ᠤᠨ ᠪᠠᠷᠢᠮᠵᠢᠶᠠ ᠬᠠᠷᠠᠯᠠ᠃ ᠡᠬᠢᠨ ᠦ ᠰᠣᠭᠣᠲᠣᠩ ᠭᠣᠬᠠ ᠳᠠᠷᠤᠲᠠᠯᠠ ᠬᠢᠷᠭᠠᠭᠤᠯᠤᠭᠰᠠᠨ ᠮᠡᠲᠦ ᠨᠠᠮ ᠤᠨᠠᠵᠠᠢ᠃
ᠰᠡᠭᠦᠯ ᠦᠨ ᠵᠢᠯ ᠦᠳ ᠲᠦ ᠬᠠᠶᠢᠷᠬᠠᠨ ᠳᠤ ᠫᠤᠤ ᠳᠤᠤᠭᠠᠷᠴᠤ ᠪᠠᠶᠢᠭᠠ ᠦᠭᠡᠢ᠃ ᠫᠤᠤ ᠶᠢᠨ ᠳᠠᠭᠤ ᠨᠦᠷᠭᠢᠯᠡᠵᠦ ᠠᠮᠢ ᠲᠠᠢ ᠪᠦᠬᠦᠨ ᠰᠤᠴᠢᠪᠠ᠃ ᠵᠢᠭᠦᠷ ᠲᠡᠢ ᠪᠦᠬᠦᠨ ᠨᠢᠰᠪᠡ᠃ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠪᠦᠬᠦ ᠶᠠᠭᠤᠮᠠ ᠥᠩᠭᠡᠷᠡᠵᠤ ᠠᠷᠤ ᠶᠢᠨ ᠰᠣᠭᠣᠲᠣᠩ ᠭᠠᠶᠢᠬᠠᠨ ᠵᠣᠭ ᠲᠤᠰᠤᠭᠰᠠᠨ ᠢᠶᠠᠨ ᠡᠷᠭᠢᠨ ᠬᠠᠷᠠᠶᠢᠲᠠᠯᠠ ᠬᠣᠶᠠᠷ ᠳᠠᠬᠢ ᠫᠤᠤ ᠶᠢᠨ ᠳᠠᠭᠤ ᠲᠠᠰᠬᠢᠯᠡ᠃ ᠡᠷᠯᠢᠵᠡ ᠰᠣᠭᠣᠲᠣᠩ ᠳᠤᠩᠭᠤᠢ ᠬᠠᠳᠠᠭᠠᠳ ᠶᠠᠪᠤᠴᠢᠬᠠᠪᠠ᠃ ᠡᠪᠦᠭᠡᠨ ᠪᠣᠰᠴᠤ ᠠᠮᠵᠢᠭᠠ ᠦᠭᠡᠢ ᠪᠠᠶᠢᠲᠠᠯᠠ ᠠᠷᠤ ᠳᠤ ᠨᠢ ᠠᠷᠬᠢᠷᠠᠨ ᠭᠠᠰᠠᠯᠬᠤ ᠴᠢᠮᠡᠭᠡ ᠭᠠᠷᠪᠠ᠃ ᠡᠨᠡ ᠴᠢᠮᠡᠭᠡ ᠲᠡᠢ ᠬᠠᠮᠲᠤ ᠡᠬᠡ ᠵᠢᠩᠭᠡᠷ ᠦᠰᠦᠷᠦᠭᠡᠳ ᠢᠷᠡᠵᠡᠢ᠃ ᠡᠪᠦᠭᠡᠨ ᠦ ᠫᠤᠤ ᠲᠠᠢ ᠭᠠᠷ ᠠᠴᠠ ᠬᠠᠵᠠᠨ ᠫᠤᠤ ᠤᠨᠠᠭᠠᠳ ᠥᠭᠪᠡ᠃ ᠰᠠᠨᠳᠤᠷᠤᠭᠰᠠᠨ ᠡᠪᠦᠭᠡᠨ ᠭᠡᠳᠡᠷᠭᠦ ᠤᠨᠠᠵᠤ ᠡᠬᠡ ᠵᠢᠩᠭᠡᠷ ᠳᠡᠭᠡᠷᠡ ᠨᠢ ᠠᠷᠬᠢᠷᠠᠵᠤ ᠪᠠᠶᠢᠯᠠ᠃ ᠡᠪᠦᠭᠡᠨ ᠦ ᠬᠦᠵᠦᠭᠦᠦ ᠤᠷᠤᠭᠤ ᠳᠠᠮᠵᠢᠨ ᠠᠰᠠᠬᠤ ᠳᠤ ᠰᠣᠶᠣᠭᠠ ᠰᠢᠳᠦ ᠨᠢ ᠢᠷᠵᠠᠶᠢᠭᠰᠠᠨ ᠵᠠᠪᠠᠵᠢᠨ ᠠᠴᠠ ᠡᠪᠦᠭᠡᠨ ᠭᠠᠷ ᠢᠶᠠᠨ ᠯᠠᠪ ᠰᠢᠷᠭᠤᠭᠤᠯᠵᠤ ᠭᠡᠳᠡᠷᠭᠦ ᠳᠠᠷᠤᠨᠠ᠃
ᠭᠠᠷ ᠠᠴᠠ ᠴᠢᠰᠤ ᠤᠷᠤᠰᠤᠨᠠ᠃ ᠤᠯᠠᠩᠭᠠᠰᠤᠭᠰᠠᠨ ᠡᠬᠡ ᠵᠢᠩᠭᠡᠷ ᠬᠦᠴᠦᠲᠡᠢ ᠪᠠᠶᠢᠯᠠ᠃ ᠬᠣᠷᠤᠮ ᠵᠤᠭᠤᠤᠬᠠᠨ ᠡᠪᠦᠭᠡᠨ ᠦ ᠬᠣᠭᠣᠯᠠᠢ ᠭᠦᠷᠡᠭᠡᠨ ᠦ ᠰᠤᠳᠠᠰᠤᠨ ᠳᠤ ᠰᠣᠶᠣᠭᠠ ᠰᠢᠳᠦ ᠣᠶᠢᠷᠠᠳᠤᠭᠰᠠᠭᠠᠷ… ᠡᠪᠦᠭᠡᠨ ᠡᠴᠦᠰ ᠦᠨ ᠬᠦᠴᠦ ᠪᠡᠨ ᠰᠢᠪᠬᠠᠨ ᠲᠦᠷᠡᠶᠢᠨ ᠡᠴᠡ ᠪᠡᠨ ᠬᠤᠷᠴᠠ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠤᠨ ᠡᠬᠡ ᠵᠢᠩᠭᠡᠷ ᠦᠨ ᠰᠤᠭᠤᠨ ᠳᠤ ᠭᠦᠨ ᠵᠣᠭᠣᠵᠤ ᠠᠮᠵᠢᠯᠠ᠃ ᠬᠦᠮᠦᠨ᠂ ᠨᠣᠬᠠᠢ ᠶᠢᠨ ᠴᠢᠰᠤ ᠬᠣᠯᠢᠯᠳᠤᠨ ᠤᠷᠤᠰᠤᠨᠠ᠃ ᠡᠪᠦᠭᠡᠨ ᠠᠮᠢ ᠲᠠᠯᠪᠢᠵᠤ ᠪᠤᠢ ᠡᠬᠡ ᠵᠢᠩᠭᠡᠷ ᠦᠨ ᠳᠣᠣᠷᠠ ᠠᠴᠠ ᠠᠷᠠᠢᠬᠢᠨ ᠰᠤᠭᠤᠷᠠᠨ ᠪᠣᠰᠪᠠ᠃ ᠡᠬᠡ ᠵᠢᠩᠭᠡᠷ ᠦᠨ ᠨᠢᠳᠦᠨ ᠡᠴᠡ ᠭᠣᠮᠣᠳᠠᠯ ᠲᠠᠢ ᠨᠢᠯᠪᠤᠰᠤ ᠤᠷᠤᠰᠤᠨ᠂ ᠬᠠᠴᠢᠨ ᠴᠡᠩᠬᠡᠷ ᠲᠤᠶᠠᠭᠠ ᠲᠠᠲᠠᠭᠠᠳ ᠥᠩᠭᠡᠷᠡᠳᠡᠭ ᠪᠠᠶᠢᠨᠠ…
2021.08.21 ᠪᠠᠭᠠᠨᠠᠭᠤᠷ
2 0